ليلي : ادهم رايح فين كده علي الصبح حبيبي ؟
ادهم قرب وباسها وضمها لحضنه : المدير استدعاني
ليلي بتكشيره مصطنعه : ليه خير ؟
ادهم ابتسم وباسها بين عنيها في تكشيرتها : هيكون ليه يعني ! اكيد حاجه بخصوص التدريبات الجديده او الخريجين الجداد
ليلي : بس كده يعني ؟
ادهم : اه بس يا قلبي .. المهم آسيا ويوسف فين ؟
ليلي : نايمين لسه .. اصحيلك آسيا تاخدها معاك !
ادهم : لا سيبيها تصحي براحتها النهارده اجازه اصلا
سابها ونزل ودخل مكتب مديره :تعال يا ادهم
ادهم : خير يا افندم
المدير : خير ان شاء الله
( بدأ يحكيله بالتفصيل عايزه منه ايه ؟ ))
ادهم ساكت وبيفكر
المدير : ايه ساكت ليه ؟
ادهم : حضرتك اللي فهمته عايزيني اجيب قرار وليد نصار واسافر باريس واعرف اختفي فين صح كده !! طيب ما تكلف اي حد تاني ليه انا ؟
المدير : اولا وليد كان سمعته معروفه ورجل اعمال ناجح فازاي يهرب سلاح ؟ فاعتقد انه مش هو اصلا فده معناه ان اللي بيهرب موجود وممكن يكون كمان لسه بيشتغل بالتهريب فانا عايزلك تجيبلي قراره .. غير كده مراته اتحبست ودي بنت كانت بسيطه جدا من قريه بسيطه معندهاش العقليه دي ابدا .. الموضوع كله مش طبيعي
غير اختفاء وليد نصار نفسه .. فين جثته لو هو ميت ! ولو هو بره ساب مراته وابنه وليه ؟ وليه ساب طليقته وصيه علي ابنه مش مراته ؟ ولو هو محبوس فمحبوس فين ؟
ادهم كل دي اسئله غامضه انا محتاج لاجابتها ..
ادهم باستغراب : هو انا ليه حاسس ان في حاجه شخصيه في اهتمامك بوليد ؟
المدير : والدته كلمتني وانا اعرفها معرفه شخصيه … وهيا شخصيه محترمه جدا وكنا اصدقاء في فتره من الفترات هيا وزوجها
ادهم ابتسم : ليه حاسس ان علاقه حضرتك بيهم اتقطعت بعد ما ارتبطوا ؟
المدير بص لادهم : قصدك اني ….. قوم يا ادهم علي مكتبك وشوف هتعمل ايه قوم
ادهم ضحك ووقف وهو خارج المدير وقفه
المدير : الموضوع اتمني يكون سري يا ادهم وهيكون بصفه غير. رسميه ..
ادهم بابتسامه : عارف ( قبل ما يقفل الباب ) مجرد صداقه ؟
المدير يدوب هيقف بس ادهم قفل بسرعه ومشي وساب مديره اللي غرق في ذكرياته
المدير بيفكر : يا تري يا نبيله ليه اتأخرتي كل ده لحد ما طلبتي مساعدتي .. ليه مجيتيش من زمان ؟ اتأخرتي قوي .. جوزك اتوفي من سنين طويله ليه استنييتي كل ده
🌸🌸🌸🌸🌸🌸🌸🌸🌸🌸
بقلم /
shimooo novels الشيماء محمد
استنوني مع حكايه جميله في اقرب وقت نزلتلكم الاقتباس علشان يطمنكم ان الحزء الثاني هيكون مختلف تماما … وهيكون فوق الخيال ….
انتظروني
شيموووووووووو
الحلقه الاولي من الجزء الثاني
في مكتبه بيحاول يقنع تلميذته انها تفضل في مكانها بس هيا خلاص اخدت قرارها
دكتور احمد المنشاوي : جميله يا بنتي فكري كويس .. انتي معيده في الجامعه ازاي بتفكري تسيبي وظيفتك دي !
جميله : اعذرني يا دكتور بس الوظيفه التانيه اهم بالنسبالي
د/ احمد : يا بنتي دي اقرب للسكرتيره منها للمهندسه .. انتي تقريبا هتكوني سكرتيره مش اكتر
جميله : بس الراتب هيكون اعلي بمراحل
د/ احمد بعدم اقتناع : انتي عمرك ما كنتي ماديه ولا بتحسبيها كده .. انتي طلبتيني ازكيكي في الوظيفه دي وانا عملتها بدون اقتناع ومازلت عند رأيي مكانك هنا في الجامعه
جميله : انا عمري ما هنسي ابدا فضل حضرتك عليا بس اعذرني انا ليا اسبابي الخاصه فلو سمحت ما تضغطش عليا لاني مش بحب ارفض لحضرتك اي طلب
د/ احمد : والله ما عارف اقولك ايه يا بنتي
جميله : قولي ربنا يوفقني
د/ احمد : ربنا يوفقك وامري الى الله .. هتروحي امتي الشركه ؟
جميله : بكره الصبح عندي معاد مع ميس هانم
د/ احمد : انا كلمتها وباذن الله خير يا بنتي
مشيت علي بيتها وبتفكر في بكره واللي هتقابله بكره ..
عماد : انتي وصلتي يا جميله ؟ اخوكي معاكي ولا ؟
جميله : لا يا بابا مش معايا ..بعدين انا مش صغيره ومش محتاجه انتظرو يعدي يجيبني
عماد : ماشي يا لمضه هانم اتفضلي يالا علشان نتغدي
جميله : اديني عشر دقايق وانها هحضر الاكل بسرعه
عماد : لا عمتك حضرته ادخلي ساعديها انتي بس
جميله : ليه بس كده انا قلتلها ترتاح وانا هعمل كل حاجه
عماد : انتي عارفه عمتك ادخليلها
دخلت باستها في خدها : ليه بس يا عمتو بتتعبي نفسك
جميله الكبيره : حبيبتي مفيش تعب وبعدين انا فاضيه ورايا ايه يعني .. ادخلي غيري يالا وتعالي احكيلي يومك بالتفصيل
جميله : حاضر
اتغدوا مع بعض وقعدت جميله مع عمتها
عمتها : عملتي ايه النهارده !
جميله : مفيش جديد بكره هروح استلم ان شاء الله دعواتك بقي يا عمتو جوجو
عمتها : ربنا معاكي بس مش وظيفتك كمعيده افضلك !
جميله : لا طبعا انتي عارفه الراتب هيكون ٣ اضعاف راتبي في الجامعه
عمتها : هو احنا من امتي بنبص للفلوس والراتب ! انتي تعبتي علشان تكوني مهندسه قد الدنيا
جميله : وانا مهندسه يا عمتو .. دخلت كليه الهندسه واتخصصت في الاجهزه الطبيه واتخرجت بتفوق كل ده مكنش علشان اتعين في الجامعه
عمتها : وبعدين معاكي يا جميله !
جميله : وبعدين معاكي انتي يا عمتو وبعدين في طيبتك ! ده حقك ولازم هيرجع مهما الزمن يطول .. ابنك لازم يعرف الحقيقه ويرجع لحضنك
عمتها : يالا ارتاحيلك شويه وبعدين نتكلم
جميله : اهربي اهربي
عمتها : يا بت بطلي لماضه
سابتها وخرجت وقعدت مع اخوها عماد
عماد : لسه برضه مصممه تشتغل في الشركه ؟
اخته جميله : للاسف مصممه
عماد : مش عارف انا دماغها ناشفه لمين البنت دي ..
اخته جميله : ربنا يحرسها يارب انا خايفه عليها جدا
عماد : لا يا جميله ما تخافيش عليها احنا ربيناها صح .. زرعنا فيها قيمنا ومبادئنا وزرعنا فيها القوه لان المباديء من غير قوه ما تنفعش فهيا الحمد لله عندها الاتنين ..
اخته جميله : انا مش عارفه انت ازاي بتشجعها !
عماد : لازم اشجعها .. هيا عاقله وذكيه وعارفه بتعمل ايه فليه ما نشجعهاش ؟
اخته جميله : دي عايزه تدخل الشركه تنتقم
عماد : عايزه تجيبلك حقك يا جميله وترجعلك اللي ضاع منك
جميله عنيها دمعت : وهو اللي ضاع بيرجع ! هترجعلي ايه !! هاه ! ايه اللي ممكن يكونله اهميه بعد اللي راح !
عماد : ابنك !!! ولا نسيتيه ؟؟
اخته جميله : نسيته ازاي بس وهو حته من روحي
عماد : يبقي تدعيلها ربنا يوفقها وبس
……….
تاني يوم دخلت الشركه براس مرفوعه وخطوات ثابته وطلعت وسألت لحد ما وصلت للمكان اللي عايزاه
السكرتيره : حضرتك عندك معاد ؟
جميله : ايوه بلغيها ان الباشمهندسه اللي جايه من طرف د / احمد المنشاوي وصلت
السكرتيره بلغت وانتظرت وبعدها الجرس رن فطلبت من جميله تدخل اللي حست بشويه توتر بس قضت عليهم بسرعه
جميله : السلام عليكم يا افندم
ميس بصتلها من فوق لتحت بتفحص : شكلك صغير !!
جميله : انا اتخرجت من كليه هندسه وعملت دبلومه في الاجهزه الطبيه وبحضر حاليا في الماجستير
ميس هزت دماغها : خبراتك ايه في مجالنا !
جميله : انا دراستي كلها عن الاجهزه الطبيه واخدت تلات دورات في صيانه الاجهزه وفي برمجتها وفي تحديثها
ميس بدئت تعجب بيها : عندك ايه تاني !
جميله ابتسمت وعرفت انها بدئت تمسك طرف الخيط : عندي ٣ لغات بتقنهم تماما الانجليزي والالماني والفرنساوي .. ده غير الكمبيوتر اخدت كورسات في البرمجه والاتوكاد و الاوفيس وتقريبا كل ما يتعلق بالكمبيوتر .. كمان حضرتك انا اخدت كورس في اداره الاعمال ( مدت ملف لميس ) الملف فيه كل شهادتي وكل الكورسات اللي اخدتها بالتفصيل
ميس قلبت في الملف باعجاب : كل الكورسات دي اخدتيها !! اممممم !! مع ان شكلك صغير وما يديش كل ده ..
جميله : والله مش بالشكل لانه لو بالشكل فحضرتك برضه شكلك لسه متخرجه من كام سنه يدوب مش صاحبه شركه كبيره بالحجم ده
ميس ابتسمت : انا مش صغيره ابدا
جميله : ماهو انا بقول لحضرتك انه مش بالشكل
ميس : ماشي يا ستي .. اسمك ايه ؟
جميله ابتسمت : جميله
ميس بصتلها بحده شويه : نعم !
جميله : اسمي جميله
ميس علي طول جت صوره جميله قصادها ومش عارفه ليه تخيلت ان اللي قدامها دي تشبهها كتير
ميس : في حد في عيلتك عنده نفس الاسم ؟؟
جميله فكرت للحظه : لا يا افندم معرفش اي حد بالاسم ده تاني
ميس هديت : تمام شوفي مبدئيا كده انتي عجبتيني ودكتور احمد شكر فيكي جدا فأنا هجربك لمده اسبوع او اتنين وبعدها اقرر
جميله بثقه : وانا واثقه تماما اني هقدر ارضي حضرتك واكون لا غني عني ابدا
ميس : مش بحب الغرور يا .. يا جميله
جميله : مش غرور يا افندم دي ثقه في قدراتي مش اكتر
ميس : هنشوف .. هنشوف .. انا محتاجه حد معايا يكون دراعي اليمين واقدر اعتمد عليه في كل حاجه وعايزاه كمان يكون متواجد في اي وقت اطلبه .. ليل !! نهار !! ظهر !! تقدري
جميله بهدوء : انا كلي تحت امرك يا افندم
ميس ابتسمت : يعني مفيش عيال او حبيب او اي شيء تاني ؟
جميله : انا مش متجوزه ولا مخطوبه ومش بفكر في الحب نهائي انا امراءه عمليه وطموحه جدا
ميس : وده شيء يعجبني في البنت .. كمان ممكن احتاجك تسافري معايا او تسافري بدالي !!
جميله : معنديش مانع نهائي
ميس بشك : هتسافري يعني لوحدك !!
جميله باستغراب : ليه لأ !!
ميس: لانك ….. يعني من شكلك ولبسك كده بيقول انك من اسره متحفظه او انتي متحفظه
جميله : وده ايه علاقته بالسفر ؟
ميس : يعني تكوني من عيله متحفظه ومعندهمش فكره ان البنت تخرج وتسافر وحدها ومحرم والكلام الفاضي ده ؟
جميله : لا حضرتك ما تقلقيش والدي رباني كويس جدا وبعد ما والدتي اتوفت علمني ازاي اكون معتمده علي نفسي وبيثق فيا جدا وعارف ان بنته مفيش خوف عليها ابدا فما تقلقيش حضرتك
ميس : خلاص تمام من بكره تيجي الساعه ٨ وتستلمي وزي ما قلتلك هجربك فتره ونشوف هيطلع معاكي ايه
جميله بابتسامه انتصار : تمام بعد اذنك
جميله روحت وعمتها منتظراها بلهفه : عملتي ايه هاه ؟ قابلتي مين ؟ شوفتي فهد ؟ ردي يا جميله عليا
جميله : عمتو انتي مش مدياني فرصه ارد ادخلي وهحكيلك بالتفصيل
حكتلها كل حاجه
عمتها جميله : طيب فهد فين ؟
جميله : مشفتوش
عمتها : ليه ؟ مش موجود يعني ولا ايه ؟
جميله : مش عارفه يمكن مسافر مثلا
عمتها : طيب ما سألتيش عليه ؟
جميله : اسأل عليه ازاي يا عمتو !! انا لسه حتي ما استلمتش اصبري يا حبيبتي بكره هروح واكيد هجيبلك اخباره ما تقلقيش انتي ابدا ما تقلقيش
عمتها سابتها وخرجت وبتفكر .. اصبر ازاي بس ! كام سنه وانا صابره وبداري ! اه يا وليد سيبتني ليه ! قلتلك يا حبيبي ما تسافرش وتبعد عننا بس مسمعتش كلامي ! ياريتك ما كنت سافرت وكنت سيبتلهم الشركه يشبعوا بيها وعشنا انا وانت وابننا في حضن بعض .. اللهم اني لا اسألك رد القضاء ولكن اسألك اللطف فيه … الطف بيا يا رب واجمعني بابني وكفايه ابوه اللي عيشت محرومه منه كل السنين دي ….
فوقها من ذكرياتها صوت ابن اخوها : عمتووووووووو
عمته جميله : ايه يا ولد خضتني
& بقالي ساعه بكلم فيكي وانتي في ملكوت تاني .. اوعي تكوني بتحبي جديد يا شقي انت
عمته ضربته : اتنيل واسكت .. احنا خلاص عجزنا روح انت وحب
& حبيبه عمري انت يا شقي ياللي ما بتكبرش ابدا .. والله قمر وتتحبي ده انتي احلي من البت جميله اللي جوه
جميله طلعت : جايب في سيرتي ليه يا قرد انت
عماد ابوهم : انت رجعت امتي يا وليد !
وليد : لسه راجع اهو يا بابا وبنتك بتشتمني وتقولي قرد
عماد ابتسم : بذمتك مش مكسوف وانت شحط كده ووتقولي بنتك بتشتمني
وليد وقف :يعني اقوم الطشها قلمين ومالو !
عمته جميله : اوعي ابدا تمد ايدك علي بنت .. فاهم ابدا .. الراجل اللي بجد ما يمدش ايده علي بنت ابدا
وليد باهتمام : عارف يا عمتو انا كنت بهزر
عمته : ولا هزار يا وليد .. ولا هزار يا حبيبي
وليد ضمها : حبيبه قلبي انتي .. انا تربيتك ما تخافيش يا ست الكل انتي
عمته : طيب يالا يا بكاش ادخل غير واطلع اكون انا واختك حضرنا الغدا وناكل كلنا مع بعض
وليد دخل ويدوب جميله هتقوم بس عماد مسك ايدها : ادخلي انتي يا جميله حضري الغدا عايز عمتك في كلمتين
جميله : حاضر يا بابي
اخته : في ايه مالك !
عماد : حكتلك عملت ايه في الشركه النهارده !
اخته : يعني قلقان اهو !
عماد : اكيد قلقان بس مش همنعها وبعدين ده حقك اللي ضاع من سنين وانتي اتنازلتي عنه
اخته : يعني كان بايدي ايه اعمله !
عماد : كنت انا روحت حطيت ايدي في رقبه ميس دي خنقتها وجبت ابنك منها
اخته : ومين اللي هيربيه بقي هاه ؟ انا في السجن ؟؟ ولا سيادتك لما يعدموك !! يا عماد ده كان افضل الحلول ساعتها ..
عماد : يبقي لما خرجتي كنا جبناه
اخته : وهو كان في مصر ساعتها ! ماهيا سافرت بيه يدرس بره .. احنا حتي معرفناش كانت في اي بلد .. عماد يا حبيبي حقي عند ربنا هو هيجيبهولي .. وبعدين عيالك ملو حياتي ودنيتي وعوضوني عن كتير .. دخلتهم عليا بالدنيا
عماد : والله يا جميله بعد وفاه مراتي مش عارف من غيرك كنت هعمل ايه فيهم ..
اخته : كنت هتعرف تتصرف .. يالا ربنا بيقطع من ناحيه ويوصل من ناحيه وديما قضاؤه خير ساعات مش بنفهم حكمته ايه بس مع الوقت بتعرف ان ده افضل الحلول .. ربنا بس يجمعني مع ابني مش طالبه غير ده
عماد : باذن الله المهم احكيلي عملت ايه هناك
حكتله بالتفصيل
وتاني يوم جميله راحت بدري واستلمت شغلها وميس كلفت السكرتيره بتاعتها (مني) تفهمها كل حاجه وتوريها الشركه وتعرفها كل مكان .. طلبت برضه من كام مهندس كل واحد يوريها طبيعه شغله ايه ومطلوب منها ايه .. ميس كانت عايزاها تعرف كل حاجه في الشركه .. كل الاقسام وكل كبيره وصغيره .. اخيرا جه وقت الاستراحه
قعدت هيا ومني يتغدوا في الكافتيريا مع بعض
بقلم /
shimooo novels الشيماء محمد
مني : حاسه بايه ؟
جميله : خايفه
مني : طبعا لازم تخافي .. ميس هانم تعتبر هنا الكل في الكل ومش اي حد بيرضيها ومش اي حد بيعجبها
جميله : بس انا سمعت ان الشركه مجموعه من الشركا مع بعض مش واحد بس
مني : فعلا بس برضه ميس هيا المسيطره لان ابنها يعتبر الكل في الكل هو له نصيب الاسد
جميله : ابنها ده اللي هو مين ؟ ما شفتوش
مني : فهد بيه طبعا
جميله : امال ما شفتوش ليه ؟
مني : لانه مسافر وبعدين ما تشوفيش وحش ما تستعجليش علي رزقك .. اسبوع بالكتير وهيرجع
جميله : هو وحش قوي كده !
مني : مش حكايه وحش .. هو عصبي بيزعق كتير .. مش عاجبه حد .. تخيلي بقالي يجي سنتين في الشركه عمري ما شفته بيبتسم ابدا نهائي .. علي طول بوزه مترين قدامه ما تفهميش اصلا ماله ..
جميله سرحت وتخيلت شكله … طول بعرض .. حد غبي وشكله وحش .. بس عمتها جميله وهيا جميله فعلا و وليد جوزها كان وسيم جدا هيطلع شكله وحش لمين … بس برضه مش قادره تتخيله حد وسيم حساه هيكون وحش مخيف ومش بعيد يكون عنده انياب او بالليل مثلا بيتحول لمصاص دماء .. ابتسمت من افكارها دي
مني : ايه يا بت روشتيني معاكي
جميله : لا ما تشغليش بالك .. بس شكله ايه فهد ده ؟
مني : لا فهد ده خط احمر .. ما تفكريش فيه
جميله : ايه افكر فيه ؟ وانا افكر فيه بتاع ايه يعني ! بس فضول من كلامك عنه
مني : يا بت بهزر ما تقفشيش علي طول كده انتي هتكوني زيه ولا ايه ..
جميله : لا مش حكايه قفش بس في نقط عندي حتي الهزار ما بقبلوش فيها
مني : والله شكلك زيه
جميله : زي مين !
مني : فهد بيه
جميله : تاني !
مني ضحكت : خلاص المهم هو طويل عريض ( ابتسمت لانه زي ما تخيلت ) اموووور قوي جدا خالص مالص .. بصي حاجه كده مز من الاخر
جميله ضحكت : ده انتي واقعه بقي
مني : بصي من الاخر كل بنات الشركه واقعين فيه
جميله : شهريار هو يعني !
مني : لا ابدا .. مالوش في السكه دي .. ما تفهميش ليه ما بيحبش البنات … عمري ما شفته مع بنت زي ما يكون بينه وبينهم تار
جميله : ليه يعني ؟
مني : معرفش مفيش حد بيقربله غير سالي وبس
جميله : ومين سالي دي ؟
مني : بنت عمه واعتقد انها ميس الجديده .. هيتجوزوا ويمسكوا المجموعه هما .. او اسر ياخد هو سالي .. ما تفهميش بقي دول دنيتهم ايه !!
جميله : سالي مين واسر مين ؟ بت توهتيني
مني : ههههه سالي دي بنت عمه علاء مخلفش غيرها وهيا نسخه كده من ميس هانم اما اسر فده ابن عمته ندي وفي نفس ذات الوقت ابن عمه خالد برضه بس ده مخلف بنت كمان اسمها امل
جميله بتمثل انها مش فاهمه : بت انتي انا توهت منك خالص
مني : يا بنتي هما كانوا تلاته وليد وعلاء وخالد اولاد عم بس وليد عنده اخته ندي اللي اتجوزت خالد وخلفت اسر وامل وعلاء خلف سالي ومراته ماتت و وليد خلف فهد وبس كده فهمتي ؟ مش صعبه هيا
جميله : امال وليد بيه فين دلوقتي ؟؟
مني : مات من زمان وفي ناس بتقول انه اتقتل وناس تقول ان مراته قتلته وفي بيقول اولاد عمه وفي بيقول انه اشتغل في التهريب واتقتل وفي بيقول انه كان له عشيقه وقتلته والف حكايه وحكايه بس محدش ابدا يعرف ايه هيا الحقيقه
جميله جواها : انا عارفه الحقيقه كلها وهكشفها بس اصبروا عليا .. اصبروا كلكم عليا وهوريكم ..
اشتغلت بهمه لانها لازم تخلي ميس ما تستغناش عنها ابدا .. حاولت تستوعب كل حاجه بسرعه وميس فعلا مبسوطه منها ..
عمتها يوميا تسألها عن فهد اللي مسافر والظاهر ان سالي معاه لانها هيا كمان مختفيه .. طيب آسر فين ! عرفت بعدها ان هو كمان مسافر بيزور مامته واخته اللي بتدرس بره .. اكيد الكل هيرجع ويتجمعوا ..
كانت مع ميس في المكتب
ميس : كويس والله انك استوعبتي الشغل بسرعه كنت متخيله هتحتاجي وقت اطول من كده بس كويس
جميله : تمام يا افندم
ميس : عملتي ايه في المشروع اللي طلبته منك ! درستيه !
جميله : ايوه يا افندم درسته من كل النواحي ورأيي زي رأي حضرتك المشروع ده مالوش اي مكسب نهائي للمجموعه .. ومش عارفه صراحه ازاي فكرتو فيه !! دي شركه بتغرق وشراكتها في مشروع زي ده معانا يعتبر طوق نجاه بالنسبالهم لكن حمل بالنسبالنا
ميس: طيب كويس بقي اني رفضت المشروع المهم هاتي
مكملتش الكلمه لان الباب اتفتح بعنف ودخل حد بهجوم بيزعق : انتي ازاي ترفضي المشروع هاه ؟ بأي حق ترفضيه ؟
ميس : اولا صوتك عالي
زعق : ازاي ترفضي ؟
ميس : فهد وطي صوتك علشان اعرف ارد عليك واهدي
فهد خبط بايده علي المكتب : مش ههدي وما تقوليش اصلا اهدي
جميله بصتله وقلبها دق بتوتر ابن عمتها اهو قدامها .. اخيرا شافته .. في شبه كتير من جوز عمتها وليد .. بس عنيف وبيزعق و
فاقت من افكارها علي خناقهم
ميس : مش هرد عليك وانت كده
فهد : طبعا دي فكره سالي صح وانتي وافقتيها ! انتي ازاي
قاطعته ميس : فهد مش هقول تاني وطي صوتك وانت بتكلمني وبعدين انا مامتك
فهد : مامتي ده في البيت هنا حضرتك مدير اداره وكلميني علي الاساس ده
ميس وقفت وخبطت علي المكتب : يبقي تكلمني علي الاساس ده
فهد بتحدي : وما تنسيش اني انا رئيس مجلس الاداره هنا
ميس بصدمه : نعم !
فهد : ليه رفضتي المشروع وازاي تكلمي الشركه وتبلغيهم بالرفض من غير ما ترجعيلي وازاي تكسري كلمتي !
ميس : لان سيادتك دي شراكه خسرانه ملهاش اي لازمه .. شركه بتغرق ليه تحط ايدك فيها هاه ؟ علشان يتشعبطوا فيك وتنتشلهم من الغرق !! ( سكتت وكأنها فهمت ) ولا هو ده فعلا غرضك !! انك تنتشلهم من الغرق !! ليه طيب ؟
فهد : اسبابي تخصني وزي ما حضرتك بلغتيهم برفضي تتصلي بيهم وتبلغيهم اني موافق
ميس : لا طبعا ده مش هيحصل انا مش هشارك حد خسران
فهد : وانا بقولك هشاركهم
ميس : ليه الغباء ده !!
فهد : انا غبي انا حر وبعدين لو حضرتك كنتي حابه تعرفي كنتي جيتي وسألتيني الاول مش تسمعي لسالي وبس
ميس : انا ما سمعتش لحد انا شفت انه مشروع خسران ورفضته وبس
فهد : مش من حقك ترفضي
هنا دخلت واحده من الباب المفتوح : شايفه سيادته بيتخانق علي مشروعه الخيبان ده .. سيادته عايز يشارك شركه مفلسه
فهد : سالي انتي ما تتكلميش خالص
سالي : ليه بقي ان شاء الله كانت شركتك لوحدك ولا ايه ! مش معني انك رئيس مجلس الاداره انها شركتك في شركا ولازم تحترمهم
فهد : لما يكونوا بيفكروا صح وما يتخطوش حدودهم ابقي احترم وجودهم
سالي بصت لميس : سامعاه بيقول ايه !
ميس : يا تقعدوا وتتكلموا بطريقه متحضره يا تطلعوا بره انتو الاتنين واتخانقوا زي الاطفال في حته تانيه ..
الاتنين سكتوا وبصوا لبعض وميس شاورتلهم يقعدوا ويدوب فهد هيقعد لمح جميله واقفه علي جنب
فهد : ودي مين دي كمان ؟ انتي مين وواقفه هنا ليه ! بتعملي ايه هنا ومين باعتك ؟ انطقي
سالي بصتلها من فوق لتحت : مين باعت دي هنا !
بقلم /
shimooo novels الشيماء محمد
جميله بصت لميس وتجاهلت تماما فهد : حضرتك عايزه مني حاجه !
فهد زعق : انتي !! انا اللي بكلمك هنا ؟
جميله ما التفتش لفهد وفضلت باصه لميس
ميس ابتسمت : روحي انتي دلوقتي
جميله هتخرج بس فهد وقف قصادها : انا بكلمك وبقولك انتي مين وبتعملي ايه هنا ؟
ميس : سيبها يا فهد تمشي وانا هفهمك تعال اقعد
فهد واقف قصادها ومش عايز يفتحلها الطريق ومنتظر ردها
جميله بصتله واتقابلت عنيهم في نظره تحدي
جميله بهدوء : حضرتك ممكن تسأل مامتك وهيا هتقولك
اتكت قوي علي كلمه مامتك وكأنها بتتريق عليه وبعدها مشيت من قدامه وخبطت في كتفه وهيا ماشيه وخرجت وقفلت الباب وراها وبسرعه مشيت وجريت وما وقفتش غير بعد ما دخلت اقرب حمام .. وقفت تنهج وكأن في مليون حد بيجري وراها .. حطت ايدها علي قلبها تهديه وتطمن نفسها .. ومش عارفه ليه توترها وخوفها ده .. ليه خافت جدا من فهد .. امال هتنتقم ازاي لعمتها لما من اول مواجهه خافت ومن كلمتين اتوترت وجريت بالشكل ده .. لا يا جميله انتي لازم تكوني قويه ولازم تنتقمي من الست اللي حبست عمتك ظلم وقتلت جوزها واخدت ابنها وربته بالطريقه دي وخلته يبص للناس من فوق .. اجمدي يا جميله وخليكي قويه …
عند ميس
فهد : مين البنت دي ؟
ميس : دي دراعي اليمين
فهد : نعم ؟ دي ؟ ليه ؟
ميس : عندها خبرات كتير انا محتاجاها وبعدين خلينا في المهم
فهد : المشروع ؟ ده مفروغ منه ! حضرتك هتتصلي بالشركه وتبلغيهم ان في غلط
ميس : لا مش هيحصل انت هتصرف نظر عن المشروع ده
سالي : يا ابني دي صفقه خسرانه
فهد : بصوا ريحوا نفسكم انتو الاتنين لاني مش هغير رأيي
ميس رفعت تليفونها : تعاليلي بملف المشروع المرفوض
فهد : مين دي اللي تجيلك ؟
الباب خبط ودخلت جميله اللي كانت متوتره بس ده مش وقت التوتر
فهد : ودي جايه ليه هنا ؟
ميس : ليه المشروع ده مرفوض !! قولي رأيك
جميله : الشركه دي عندها ديون كتيره جدا وعليها قروض كبيره والافلاس بالنسبالهم مسأله وقت بمعني تاني الشركه بتغرق .. فشراكتهم معانا يعتبر طوق النجاه لهم اما بالنسبالنا هيكون لود احنا في غنا عنه .. ميس : كلميني بالارقام .. احنا هنخسر قد ايه في المشروع ده
جميله : بدايه كده مش اقل من ١٠ مليون وده بس لحد ما نوقفهم علي رجليهم طبعا الرقم في زياده ده بس تقدير مبدئي
ميس بصت لفهد : هاه !
فهد : خلصتوا كلامكم ولا لسه ؟
ميس : وبعدين
فهد وقف : تكلمي الشركه وتبلغيهم باللبس اللي حصل والمشروع هيكمل
جميله : طيب ليه ؟ يعني ايه وجهه نظرك في مشروع خسران زي ده ؟
فهد : تطلعي مين انتي علشان تكلميني !
جميله سكتت وندمت فعلا انها وجهت كلمه ليه
خرج من المكتب بنفس العنف اللي دخل بيه
ميس : روحي انتي يا جميله
سالي : وبعدين هنعمل معاه ايه !
ميس : هحاول اشوف ليه مُصر كده ؟
اخر النهار فهد كان خارج ولمح جميله بتتكلم مع كام حد من المهندسين وبعدها خلصت وماشيه بس وقف قصادها وبصتله كتير علي اساس يتحرك بس ما اتحركش فضل واقف في وشها قافل الطريق عليها
فهد : سألتك انتي مين ومارديتيش ؟ اسمك ايه !
جميله بصتله علشان لازم تشوف وقع اسمها عليه هيكون ايه : اسمي جميله
فهد للحظه اتأثر بس داري ده بسرعه : تاني مره لما اتكلم انتي تسكتي خالص وطالما انا مسألتكيش عن رأيك يبقي تحتفظي بيه لنفسك فاهمه ولا ؟؟
جميله بصتله وبعدها تجاهلته وحاولت تعدي من جنبه بس وقف تاني في وشها
فهد : انا بكلمك
جميله : بعد اذنك
حاولت تعدي تاني بس وقفها : ردي باسلوب احسن من ده واوعي تنسي انك هنا شغاله عندي فاهمه
جميله بتحدي : انا اللي عيني هنا كانت ميس هانم مش حضرتك فما تنساش ده .. وبعدين مش معني اني شغاله في الشركه بتاعتك اني شغاله عندك .. وبعدين اوعي تنسي ان الشركه دي لولا الناس اللي بتشتغل فيها مكنتش وصلت للي هيا فيه .. وبعدين انا اشتغلت هنا بشهاداتي وتعبي وذكائي وقدراتي وخبراتي مش مامي عينتني هنا ..
فهد : انتي متخيله اني هنا علشان مامي !! بعدين ايه مامي اللي بتقوليها دي ! ولا ده مجرد حقد اعمي طبقي
جميله : لا طبعا مش حقد اعمي لان مش كل الناس اللي في طبقتك من امثالك بالعكس في منهم محترمين جدا وعنده قيمه ومبادؤه وعارف ان اخرتها واحده للكل زي والدك الله يرحمه بس للاسف تطلع ايه انت جنب واحد زي وليد بيه .. بعد اذنك
فهد قبل ما تمشي : انتي مرفوده ما تجيش الشركه دي تاني فاهمه
جميله من غير ما تبصله : مدام ميس بس هيا اللي تقدر ترفدني .. ( قبل ما تخرج بصتله من علي الباب ) شكلك راجع من السفر تعبان روح نام
سابته وخرجت وهيا حاسه بانتصار صغير جواها .. انتصار علي فهد نصار ..
فهد كان علي اخره من ميس ومن جميله .. روح واتخانق مع ميس وطلب منها ترفد جميله من الشركه ..
………………
في مكان بعيد تحديدا في فرنسا
صحي من نومه مفزوع وقام يلف ويدور في مكانه الضيق .. طلع علي السرير ووقف يبص من الطاقه الصغيره الموجوده علشان يلمح شعاع النور يمكن يمده بشويه نور ينوروا الظلام اللي عايش فيه …
نزل وبدأ يعمل تمارينه … لازم يكون قوي علشان لما يرجع لازم ينتقم من كل اللي ظلموه واتسببوا في رميته السنين دي كلها .. لازم ينتقم من الكل ويسترد كل حاجه راحت منه..
بقلم /
shimooo novels الشيماء محمد
طبعا الكل منتظر ادهم ومنتظر وليد والاسئله كتيره جدا وفي عايز يعرف القصه هتمشي ازاي وفي مش فاهم حاجه بس كل اللي هقوله صبرا صبرا صبرا … كل حاجه هتوضح في وقتها وكل حاجه هتفهموها وكل اسئلتكم هيتجاوب عليها بس صبرا استحملوني شويه واعذروني جدا جدا علي تأخيري بالمنظر عليكم معلش ظروفي كانت لا تسمح بالنشر بدري فمعلش بقي
بحبكم جدا وبحب كومنتاتكم وربنا يقدرني ديما علي اسعادكم يارب واكون ديما عند حسن ظنكم فيا يارب
ونكمل بكره
توقعاتكم
اعذروني علي تأخيري واتمني الحلقه تكون عجبتكم
شيموووووو
رواية جميله الجزء الثاني للكاتبه شيمو
الجزء الثانى
فهد كان علي اخره من جميله ومن ميس اللي رافضه تطردها ..
جميله روحت واول ما عمتها شافتها : عنيكي بتلمع .. شوفتيه؟
جميله: اه شوفته
عمتها حطت ايدها علي قلبها ودموعها لمعت في عنيها : شكله ايه ؟ صورتيه ؟ طيب كلمتيه ؟ شبه وليد ؟ جميله قوليلي كل حاجه بالتفصيل
جميله : حاضر يا عمتو طيب دخليني الاول من الباب وهحكيلك بالتفصيل
جميله حكتلها كل حاجه بالتفصيل حصلت معاها
عمتها : يعني ميس طبعته بطباعها وخلته يبص للناس من فوق .. ربنا يهديه .. بس ما صورتيهوش ؟
جميله : اصوره ازاي يا عمتو ، اقوله استني والنبي واحده سيلفي اوريها لعمتي !
عمتها ابتسمت : حاولي تصوريه علشان خاطري
جميله حضنتها : حاضر من غير ما تقولي بس تيجي فرصه وانا هصورهولك ما تقلقيش حبيبتي .. بس هو مش سهل وغامض كده .. نفسي اعرف ليه مُصر علي الشراكه مع الشركه الخسرانه دي ؟ ليه ؟ هو مش هيكسب من وراها طيب ليه !
عمتها : يمكن زي ابوه بس عايز يساعد !
جميله : بشخصيته دي ما اعتقدش بس اكيد هعرف .. بكره هعرف ان شاء الله
فهد رجع اخر الليل كانت ميس في انتظاره
ميس : اتمني تكون هديت علشان نقدر نقعد ونتكلم
فهد : عايزه ايه يا ميس !!
ميس : انت ليه مهتم بالشركه دي ! اديني سبب مقنع !
فهد : اسبابي مش هتقنعك لانك بتحسبيها بطريقه مختلفه عني
ميس : فهمني طيب
فهد : ميس انا راجع من السفر واليوم كله مرتحتش ومحتاج انام
ميس : طيب وبالنسبه لجميله !
فهد : جميله مين !
ميس : جميله سكرتيرتي الخاصه
فهد بزهق : يوووووه عايزه ايه مني ؟
ميس : انا محتاجه البنت دي معايا
فهد : وانا مجرد وجودها خانقني باسمها ده
ميس : ده سبب اساسي من تعينها هو اسمها ..
فهد : ازاي مش فاهم ؟
ميس سرحت شويه : يعني ما تشغلش بالك
فهد : تقصدي ايه فهميني ؟اسمها ماله !
ميس : حته انها تكون شغاله عندي وانا أامرها وهيا تنفذ اوامري .. يعني ممكن اكون مريضه نفسيا بس ده مريحني
فهد ضمها وباس راسها : طالما مريحك اعمليه ولا ده مش مرض نفسي دي طبيعه فينا انتي اتجرحتي منها ودلوقتي شايفه ان ده بيردلك ولو جزء بسيط من اللي حصلك فبراحتك خالص ..
الصبح وصل الشركه وداخل من الباب واتقابل هو وجميله ولاحظت هيبته والكل بيرفع ايده ليه وقفوا قصاد الاسانسير وهيا اترددت تدخل معاه ولا تسيبه يدخل هو الاول ولا تعمل ايه ؟ الاسانسير وقف وهو فتح الباب وشاورلها بايده تدخل من باب الاحترام وده خلاها تستغرب تصرفه ده
دخلت بهدوء ووقفت في اخر الاسانسير وهو دخل وعطاها ظهره وهيضغط علي الدور ومن غير ما يبصلها : الخامس ؟
جميله : ايوه شكرا
وصلوا وهو نزل واتفاجئت لتاني مره انه ماسك الباب علشان ما يقفلش في وشها خرجت بذهول : شكرا لحضرتك
ماردش عليها وكان نفسها لو تشوف عنيه اللي مداريها بنظارته السودا او نفسها لو تصوره وهو واقف كده وتوريها لعمتها
بس خرجت وراحت علي مكتبها وبدئت شغلها
ايميل ( shimooelwady )
بقلم / الشيماء محمد
اتعمل اجتماع وميس استدعتها معاها وقعدت جنبها واتفاجئت بالكل بيحضر الاجتماع
سالي دخلت ومعاها واحد وقعدوا جنب بعض بس الولد ده دخل ووطي علي ميس وباس خدها
ميس : آسر ؟ بكاش انت .. جيت امتي ؟
آسر : اخر الليل
ميس : خالد وندي معاك ولا ؟
آسر : اه كلنا نزلنا .. امل اهي خلصت ونزلنا كلنا
ميس : طيب كويس
شويه ودخل اتنين وجميله عرفتهم من صورهم دول علاء وخالد والاتنين سلموا علي ميس وكل واحد قعد ودار حوار ما بينهم
علاء فجأه : مين دي ؟
الكل انتبه وميس ردت : دي جميله
الكل بص لميس باستغراب ومنتظرين منها تفسير وهيا ضحكت
ميس : مالكم ؟ دي باشمهندسه جميله عينتها تكون دراعي اليمين علشان عايزه اتفرغ شويه لنفسي بس محتاجه حد يكون ذكي ويقدر يسد مكاني وبالتالي هتلاقوها ديما تحت ايدي
علاء : تحت ايدك !! اممم
خالد : غريبه !! بس يا تري هيا ذكاءها يشبه جمالها ولا عينتيها لمجرد الاسم ؟
ميس : ما تشغلش بالك يا خالد
طبعا جميله بتمثل انها مش فاهمه هما يقصدوا ايه لكن هيا فاهمه كل كلمه وحرف وعارفه ان ميس عينتها مش بس علشان خبرتها وشهادتها لكن علشان اسمها كمان وانها تحس انها شغاله عندها وتحت ايديها
علاء : بس غريبه ان كل واحده بالاسم ده بتكون اسم علي مسمي
سالي : بابي بلاش يا ريت
علاء باستهبال : وانا عملت ايه حبيبه قلبي
سالي بصت لميس : هو فهد لسه مجاش الشركه ولا ايه ؟
جميله : لا موجود في الشركه
سالي باستغراب : وانتي تعرفي منين ؟
جميله : شفته الصبح وهو داخل الشركه مش اكتر
سالي بتلميح : للدرجه دي مهتمه تشوفيه اول ما يدخل الشركه !
جميله وقفت وبصرامه : تلميحك غير مقبول تماما كل الحكايه اني كنت لسه داخله الشركه انا كمان
سالي وقفت قصادها : انتي ازاي تتكلمي معايا باللهجه دي انتي نسيتي نفسك ولا ايه ؟
جميله : تلميح حضرتك غير مقبول بغض النظر حضرتك مين ! لكن ده ما يديش لحضرتك الحق انك تلمحي علي حاجه زي دي
فهد كان واقف علي الباب ومستمتع بكلامهم ونوعا ما عجبته شراسه جميله
سالي لسه هترد بس هو دخل وقطع كلام الكل : اسف لتأخيري .. عمي علاء ، عمي خالد ازيكم وحمدالله علي سلامتكم اتمني تكون رحلتكم موفقه .. اسر ازيك !
الكل رد وبعدين سالي كانت مخنوقه
سالي : لحظه قبل ما نبدأ .. هيا دي لازمتها ايه هنا معانا ؟ دلوقتي الموجودين اعضاء مجلس الاداره فهيا هنا ليه ؟
ميس باصرار: قولت انها هنا معايا وفي اوقات هتكون موجوده مكاني فمش هنتكلم كتير في الموضوع ده
فهد بنفاذ صبر : يا ريت نبدأ بقي
علاء : انت ليه بقي مُصر علي المشروع الفاشل ده ؟ سمعت ان مفيهوش اي مكسب ؟
فهد : عندي اسبابي الخاصه ولو كلكم مضايقين قوي منه هموله من حسابي الخاص
ميس : ليه يعني يا فهد ؟ جميله اعرضي المشروع بشكل واضح للكل بكل تفاصيله يمكن يكون هو شايف حاجه احنا مش شيفينها
جميله اترددت وبصت لفهد اللي ملامحه مفيهاش اي شيء ممكن تفهمه ..
ميس : قومي
قامت وقفت قدام التربيزه وشغلت الشاشه وبدئت تتكلم وتشرح كل تفاصيل المشروع
الكل كان بيبصلها وسرحان في افكاره الخاصه
*علاء سرح في اول مره شاف جميله وعاكسها وهيا مسكتله السكينه وجميله دي كشرت عن انيابها لبنته لمجرد تلميح .. ليه حاسس ان في شبه كبير بينهم ؟ بس دي اقوي واذكي مش بطيبه جميله الثانيه
*فهد بيسمعها ومركز معاها في كل التفاصيل اللي بتقولها .. بس في نفس الوقت بيفكر في جميله الثانيه اللي جرحت ميس وبهدلتها . يا تري شكلها كان ايه ؟ ليه ميس لغت وجودها تماما من البيت وملهاش حتي ولو صوره واحده …طيب ليه جميله دي بتوتره كده ؟
*ميس بتفكر في جميله .. ياتري انتي فين واراضيكي فين ! عايشه ولا ميته ؟ اهو الزمن لف ودار وجيتي في شكل البنت اللي تشبهك دي وتشتغلي تحت ايدي .. خليكي تابعه ليا تنفذي كل اوامري وبس .. حتي لو انتي مالكيش ذنب بس اسمك كفايه .. يكفي اني أأمر فيكي وانتي تنفذي وبس ..
*خالد مش عارف ليه افتكر وليد وجميله بتتكلم كأنه شايف جميله مرات وليد مش البنت دي ! ليه افتكر لحظه موت وليد ؟ ليه افتكر ندي مراته اللي جبرها تعيش معاه ولوي دراعها بعيالها .. ياتري يا ندي لو عرفتي اللي حصل هتعملي ايه ؟
*سالي بقي باصه لجميله بحقد وكره غريب مش عارفاله معنى مجرد انها نفسها تجيبها من شعرها وتضربها .. اول مره تحس بعدوانيه ناحيه بنت .. هل لانها جميله عنها ؟ لا هيا اجمل بمراحل مين دي اللي اجمل منها ! اهدي يا سالي انتي احلي بمليون مره من البنت دي .. انتي اجمل …
خلصت جميله كلامها ووقفت وسندت بايديها علي التربيزه : في اي استفسار ؟
فهد : لا شكرا اتفضلي .. زي ما كلكم سمعتو ايوه مش هنكسب من وري المشروع ده بس برضه مش هنخسر هو هيكون زي ما بنفتح فرع جديد للشركه .. هنعتبر ده فرع جديد لينا
ميس: بس الفرع الجديد بيكون تحت ادارتنا
فهد : وده برضه هيكون تحت ادارتنا بس المدير مش مننا ده الفرق
علاء : كلامك مش مقنع يا فهد في سبب واتمني تشاركنا فيه
هنا الباب اتفتح : فعلا في سبب وانا عارفو
الكل وقف احتراما للشخص اللي داخل
ميس : عمي محي اتفضل
علاء : بابا اتفضل ارتاح
محي دخل بهيبته والكل سلم عليه وقعد مكانه ويدوب هيتكلم بس لمح جميله : مين دي ؟ وبتعمل ايه في اجتماع خاص كده ؟
فهد : دي باشمهندسه جميله دراع ميس هانم الجديد
محي بص باستغراب لميس : ايه يا عمي ؟ محتاجه حد معايا وارتاح انا شويه
محي : عندك سالي ممكن تخليها هيا مكانك
ميس : سالي ليها مكانتها .. وبعدين انا محتاجه واحده تنفذ كل طلباتي مش خليفه ليا
جميله الكلام ضايقها بس سكتت لان مش وقت الكلام دلوقتي
محي : يعني هيا موثوق فيها يا ميس ؟
ميس : علي ضمانتي اتفضل
محي : تمام .. فهد عايزك تبصلي وتقولي انك مش عايز المشروع ده علشان تساعد صاحب الشركه اللي هو صلاح عبدالكريم
فهد سكت والكل بصله
ميس : مين ده حاسه الاسم مش غريب عليا
محي : مش غريب عليكي لان صلاح كان سكرتير وليد الخاص ووليد ساعده يعمل الشركه دي ويوقف علي رجليه وبالفعل هو نجح لفتره بس من فتره بسيطه دخل مناقصه خسرانه ووقع واعتقد ان ابنك عايز يقف معاه زي ما ابوه سبق ووقف معاه .. الله اعلم اصلا ابوك ساعدو ليه يمكن كان عنده غرض !! لكن انت غرضك ايه !
الكل بص لفهد بنظره استغراب وعدم تفهم ونوع من المعاتبه الا جميله بصتله بنظره تفاؤل .. فهد اللي جواه غير اللي بيظهره
ميس : صحيح الكلام ده يا فهد ؟ هو ده سببك فعلا ؟ انك عامل خاطر لصاحب ابوك
فهد : ولنفترض انه صح ؟ نعم ؟ عايزين ايه ؟
ميس وقفت : بعد كل ده يا فهد! خساره .. بعد اذنكم انا محتاجه ارتاح
فهد حاول يوقفها بس ميس مشيت ومردتش علي حد وجميله وقفت محتاره مش عارفه تمشي وري ميس ولا تفضل في الاجتماع
فهد بصلها : روحي وراها ولو سمحتي خلي بالك منها لحد ما انا اجيلها
جميله ابتسمت ومشيت .. لسه جواه بذره طيبه بس للاسف البذره دي للشخص الخطأ .. ياتري يا فهد تعرف ان ميس دي مش مامتك !! وياتري لو عرفت رد فعلك هيكون ايه !
محي : اعتقد بقي كده المشروع ده نلغيه ونشوف المهم
فهد : حضرتك المشروع ده منتهي انا مش عارف انتو بتتكلموا كتير فيه ليه ! انا مسؤل عنه ومش هيخسر ولا هيخسر الشركه وده اللي يهمكم ..
محي : فهد
قاطعه فهد ووقف : الموضوع منتهي وبصفتي رئيس مجلس الاداره انا وافقت عليه وبدئت فيه ودلوقتي بعد اذنكم رايح اشوف والدتي ..
خرج وسابهم وسالي وقفت ومشيت وآسر اعتذر ومشي معاها وفضل التلاته
علاء وخالد ومحي
علاء : ابن ابوه
خالد : وبعدين في دماغه دي ؟
محي : والله لو هيفضل ينشف دماغه وياخد قرارات غبيه زي ابوه نخليه يحصل ابوه ..
علاء : بس ميس ؟
محي : مالها ميس ؟
خالد : ده ابنها
محي: ده ابن جميله .. انت عايز تفهمني انها هتحبه او بتحبه مثلا اكتر من وليد جوزها ؟ زي ما هيا استغنت عنه عادي ممكن تستغني عن ده
علاء : بس هيا اتغيرت كتير واعتقد انها فعلا بتحبه !
محي : اه صح بدليل انها شغلت واحده اسمها جميله تحت ايدها علشان بس تأمر وتشخط فيها لمجرد ان اسمها جميله .. ميس زي ما هيا المهم خلونا نركز في المهم
………………
فهد راح مكتب ميس ودخل كانت جميله معاها بتناولها كوبايه ميه وبتاخد قرص للصداع وهو دخل وقعد علي مكتبها قدامها
فهد : زعلتي ليه كده ؟
ميس انفجرت : لانه علي الرغم من كل اللي وليد عمله فيا هو ومراته وانت لسه بتحن لذكراه ولذكري اصحابه ( عيطت ) انا للاسف عمر ما حد وقف جنبي وحتي ابني اهو بيقف ضدي
فهد وقف وضمها وهيا قاعده : حبيبه عمري كله انا ما نسيتش ابدا حاجه وعمري ابدا ما هقف ضدك ده كله شغل بيزنس .. الراجل قصدني وحكالي عن علاقته وان وليد ساعده وانا شفت ان الخطوه دي حلوه كدعايه للشركه وهتساعدنا في المرحله الجايه احنا داخلين علي مشروع ضخم
ميس: ومحتاجين لكل مليم
فهد : ومحتاجين اكتر للدعايه .. خلي عندك بعد نظر يا ميس هانم .. وبعدين الشركه بشراكتها معانا هتقف علي طول وهتكون تحت ايدينا اعتبريها فرع جديد
ميس : بس ليها مدير
فهد : مدير تحت ايدي .. ما تقلقيش انا مش برمي فلوس وخلاص انا عارف انا بعمل ايه !
بقلم / الشيماء محمد ( شيموووو )
جميله سرحت : يا تري فعلا ده غرضك ولا انت بتساعده لانه صاحب لابوك وبتصون ذكراه ؟ يا تري يا فهد انت فعلا وحش ولا جواك حلو وبتحاول تداريه عن الوحوش اللي حواليك لياكلوك ؟
فهد بص واتفاجيء بجميله واقفه : انتي واقفه ليه ! ما تشوفي وراكي ايه بدال الوقفه دي اتفضلي
جميله بصت لميس : حضرتك محتاجه مني حاجه !
فهد : يا بنتي انا اللي بكلمك
جميله : وانا سبق وقولت لحضرتك اني باخد اوامري من ميس هانم مش من سيادتك
فهد : طيب اخفي بقي من قدامي واحمدي ربنا انها عايزاكي والا
ميس : خلاص يا فهد .. جميله روحي انتي دلوقتي ولما فهد يروح مكتبه تعاليلي
جميله : تمام يا افندم
بعد ما خرجت : علي غلاستها .. نفسي اعرف عاجبك فيها ايه ؟
ميس : بغض النظر عن ذكاءها وشهادتها وكميه الكورسات اللي واخدها واللغات اللي بتتكلمها و و و .. مريحاني نفسيا
فهد : دي بتتكلم لغات ؟
ميس : اه بتتكلم ٣ لغات
فهد : دي ؟
ميس : سيبك منها وقولي عملت ايه في سفرك ووصلت لايه !
جميله وقت الغدا نزلت ومعاها مني الكافتيريا ياكلوا فيها واتفاجؤا بسالي وآسر داخلين وقعدوا يتغدوا بس جالهم اكل من بره مش من كافتيريا الشركه
جميله : هما بيتغدوا هنا ؟
مني : نادرا ما بيعملوها بس طالما جم يبقي كمان فهد بيه هيجي
جميله اتوترت ومنتظراه وحست بدخوله من غير ما تشوفه ، هيبته كانت طاغيه علي المكان ، لمحها اول ما دخل واستغرب ان كل الموجودين رفعوا دماغهم كتحيه او كاعجاب الا هيا فضلت باصه للطبق اللي قدامها ومش عارف ليه كان عنده فضول انها تبص ناحيته .. قعد مع سالي وآسر واختار كرسي يكون مواجه لجميله اللي حست انها محاصره منه وكأنه هو قصادها تماما مش بينهم مسافه طويله …
فهد كان مركز معاها واتمني لو يسمع بتقول ايه ومنتظر منها ترفع دماغها وتبصله بس هيا متجهلاه وده مضايقه جدا ومش عارفله سبب …
جميله حست ان دي فرصه تصوره لعمتها وهو قصادها بس ازاي !
طلعت موبيلها وعملت نفسها بتعلب فيه ومني اتشغلت بتليفون جالها وقامت ترد عليه .. اما هيا حطت التليفون وفتحت الكاميرا وبدئت تصور فيه من غير ما حد ياخد باله هيا باصه في تليفونها وبس .. اما فهد حس انه متراقب وبصلها قوي بس هيا بتلعب بتليفونها امال الذبذبات اللي وصلاله دي ايه مصدرها ؟
ابتسمت جميله وتخيلت شكل عمتها لما تشوف ابنها اما فهد كان نفسه يقوم يمسك الموبيل من ايديها ويشوف هيا بتبتسم لمين كده ومين شاغلها بالشكل ده ! فضول غريب جواه مسيطر عليه
سالي : هاه قلت ايه ! فهد ! فهد
فهد : عايزه ايه ؟ مالك ؟
آسر : هو اصلا مش مركز معانا
فهد : عايزين ايه ؟
آسر : بقول هنتجمع فين النهارده ؟
فهد : في البيت لان ميس عازمه العيله كلها بمناسبه رجوعكم من السفر
سالي : يوووو كنت عايزه اسهر بره .. تعال نزوغ يا فهد منهم
فهد : لا مش هينفع عمتي جايه وعايز اشوفها
آسر : فعلا هيا كمان عايزه تشوفك .. تصدق يا فهد ساعات بحسها بتحبك اكتر مني !
فهد ابتسم : يا ابني انا اي حد بيحبني دي طبيعه فيا
سالي : وده ايه الغرور ده كله !! براحه شويه علي نفسك
آسر : اه والنبي احنا مش قد كده !
جميله قامت وقفت ومشيت وفهد متابعها ومره واحده قام هو كمان
سالي : رايح فين ؟
فهد : راجع لحظه
آسر : غريب .. المهم اعدي عليكي اخدك في طريقي ولا هتيجي مع عمي ؟
سالي : مش عارفه بينا تليفون
آسر : امل كانت بتسأل عليكي
سالي : وحشتني جدا هيا كمان .. هنتقابل النهارده ونتكلم بقي براحتنا .. هو فهد راح فين ! حساه غريب
آسر : هو علي طول غريب اصلا
بقلم / الشيماء محمد ( شيموووو )
فهد خرج وري جميله وبينادي عليها : انتي !! انتي
جميله سمعاه ومكمله في طريقها وهو برضه بينادي بنفس الطريقه .. انتي
واخيرا لحقها و وقفها
فهد : انتي مش سامعه ؟
جميله باستهبال : انت اتكلمت ؟
فهد : انتي هتعملي فيها طرشه ولا ايه ؟ انا بنادي عليكي من بدري
جميله : ما سمعتش اسمي
فهد : واسمك مش علي هوايا ومش هتسمعيه مني
جميله بصتله من فوق لتحت باشمئزاز وسابته وماشيه وهو مسكها بعنف من دراعها وضغط عليه : انتي بتبصي لمين كده ؟ هاه ؟
جميله : سيب دراعي حالا واياك تلمسني مره تانيه والا
فهد : والا ايه هاه ؟ عندي فضول اعرف بتهدديني بإيه ؟
جميله بغضب : بلاش احسنلك بلاش
وشدت دراعها بعنف هيا كمان منه
جميله ( رافعه صوباعها بتشاور في وشه ) : بص بقي حضرتك علشان نكون واضحين .. زي ما سبق وقولتلك انا هنا عند والدتك مش عندك ولو شغلي عندك كنت هستقيل قبل ما ابدأ ده اولا
فهد بغموض : وثانيا ؟؟
جميله بغضب هو مستلذه : ثانيا بقي اسمي جميله مش عاجبك بقي الاسم يبقي تقول يا باشمهندسه وده اللي عندي .. غير كده مالكش عندي اعتقد كلامي واضح
فهد قرب منها زي الفهد اللي بيتربص بفريسته : انتي مش واخده بالك ان الشركه دي كلها بتاعتي انا وانتي سواء شغاله عند امي او عمي او الجن الازرق طول ما انتي هنا يبقي اسمك شغاله عندي
جميله : شغلي عند والدتك وده كفيل اني ما احتكش بيك وبعدين تقدر بسهوله ترفدني طالما الشركه دي كلها بتاعتك
( قربت هيا كمان وشها بتحدي من وشه ) اما طول ما انا هنا يبقي حضرتك تتجنبني ولو محتاج تتعامل معايا يبقي تتعامل بأحترام وزي ما حضرتك مهندس فانا مهندسه واللي يدور ويقلب تلاقيني متخرجه بتفوق عن سيادتك ولا تلاقيك اشتريت شهادتك بالفلوس بتاعت مامي
فهد : خلي بالك انا مستحملك بس علشان ميس عايزاكي لكن لولاها كنتي شفتي معامله تانيه مني ووش مختلف تاني
جميله ضحكت : ايه ده هو حضرتك عندك اسوأ من ده !!
فهد بصرامه : ما تتماديش فيها ودلوقتي زي الشاطره كده تطلعي عند ميس وتفكريها ان العيله كلها هتيجي تتعشي في البيت وسيادتك هتشوفي هيا محتاجه ايه وتنفذيه ولو عايزاكي معاها في البيت تروحي معاها .. فاهمه يا … يا شاطره
جميله بهدوء : والله امورك العائليه دي تتفضل كده سيادتك بموبيلك تتصل بمامتك وتقولها اما انا فهطلع لشغلي ولو ميس هانم طلبت مني حاجه مش هتأخر .. بعد اذنك
سابته ومشيت ولاول مره واحده تنجح في نرفزه وجنان فهد وليد نصار .. واحده توصله لدرجه انه بيتمني يخنقها بإيديه … ومسيرها هتقع فعلا بين ايديه وساعتها مش هيرحمها ابدا .. هيخليها تترجاه …
ميس طلبت جميله : شوفي يا جميله انا عندي حفله النهارده في البيت ومحتاجاكي معايا هناك
جميله : حفله ؟ طيب انا ليه ؟
ميس : منتظره كام تليفون مهم من عملاء من الخارج وكده كده سواء هنا او البيت كنت هحتاجك معايا فهاتي معاكي الملفات لاننا هنشتغل ..
جميله : حاضر تحت امرك بس امتي هنتحرك ؟
ميس : الساعه دلوقتي ٤ امممم ممكن علي ٧ كده
جميله : طيب ينفع اروح دلوقتي واجي لحضرتك علي ٧ علي هنا او علي البيت علي طول
ميس : مفيش مشكله روحي وتعالي علي هنا وهنروح انا وانتي
روحت جميله جري علي عمتها واول ما دخلت عندها : جبتلك صورته
عمتها حطت ايدها علي قلبها : وريني بسرعه
جميله طلعت موبيلها وفتحت علي صورته وعطتو لعمتها اللي مسكته بشوق ام اتحرمت من ابنها .. دموعها نزلت وحطت ايدها علي وشه واتمنت لو تقدر تلمسه بجد مش صورته بس …
بصت لبنت اخوها : ينفع تخليها معايا شويه !!
جميله : طبعا ولو تحبي ابعتهملك علي الواتس
عمتها بلهفه : اه ابعتيهم اه اه
جميله بحنيه باست عمتها واخدت التليفون وبعتت الكام صوره علي تليفون عمتها
جميله : كلهم بقم عندك
عمتها : اه يا حبيبتي انتي جايه بدري ليه ؟ في حاجه ؟
جميله : عايزه اجهز حاجه البسها في حفله ست ميس
عمتها : حفله فين ؟ في الشركه ولا البيت ؟
جميله : هيا مش حفله قوي هيا عازمه العيله كلها بمناسبه رجوع ندي وبنتها لمصر واعتقد حتي خالد جوزها كان مسافر وعلاء كمان فهيا جامعه العيله مش اكتر
عمتها : اهمم يبقي البسي بدله مثلا
جميله : انا بفكر في كده .. يالا هسيبك انا مع فهد شويه وبعدها اجي نختار مع بعض
عمتها ابتسمت ودخلت اوضتها لانها محتاجه تكون لوحدها مع ابنها ومع ذكرياتها الكتير اللي هاجمتها ….
جميله نامت ساعه وقامت اختارت لبسها بعنايه شديده وحطت ميكب خفيف جدا مجرد لمسات بس محدش يلاحظها الا عين خبير اما العادي هيفتكر انها طبيعيه
جمالها كان هادي جدا ومنظرها يسر الناظرين … راحت لعمتها اللي ابتسمت وقامت حصنتها
جميله : بتحصنيني من مين يا عمتو دول كلهم هيبصولي كده من فوق
عمتها : هيبصولك بغل لانك بطبيعتك اجمل منهم وهما بيحطوا اشكال والوان علي وشهم علشان بس يكونوا في نص حلاوتك .. عنيهم هتلاحقك وخلي بالك علي نفسك وخصوصا من اللي اسمه علاء ده
جميله : اه حسيت ان عنيه زايغه
عمتها : جدا انا قبل كده رفعت عليه سكينه فخلي بالك منه
جميله ابتسمت : ما تخافيش عليا .. يالا هسيبك انا علشان ما اتأخرش …
وهيا نازله اتقابلت مع اخوها داخل البيت واول ما شافها صفر : انتي محلوه كده ليه يا بت ورايحه فين كده والشباب يعاكسوكي
جميله : رايحه الشركه ومنها علي بيت ميس عندها احتفال في البيت وعايزاني معاها
وليد : عايزاكي ليه بقي ان شاء الله ؟
جميله : عندها شغل وعملاء هيكلموها وعايزاني معاها
وليد : دي حجج فاضيه هيا بس عايزه تشغلك في البيت والشركه
جميله : انا عارفه ده كويس
وليد : انا نفسي افهم انتي عايزه توصلي لايه بالظبط ؟
جميله : لثقتها التامه .. لفهد نفسه .. لازم اقرب علشان يعرف الحقيقه .. لازم يرجع لحضن عمتو يا وليد
وليد : طيب تعالي اوصلك لحد الشركه بدال ما حد يضايقك
جميله : مش تعبان ؟
وليد : يالا يا بت وبعدين معايا عربيه ابوكي
وصل اخته لحد باب الشركه ونزلت مشيت خطوتين نزل وراها كانت ناسيه شنطتها
عطاهالها ومسك ايدها بحب : خلي بالك من نفسك هاه
ومن وراهم عنين متابعاهم .. كان فهد ساند علي عربيته منتظر وشافها نازله من العربيه وشاف مسكته لايدها وحس بنار غريبه جواه وبانفاسه بتعلي ومش عارف ايه اللي مضايقه بس عنده احساس انه عايز يضرب اي حد او يتخانق مع اي حد ….
وليد ركب عربيته ومشي وجميله لفت وشها للشركه وداخله ومره واحده ايد مسكتها من وراها بعنف ولفها ليه بعنف اكتر
جميله بتلف: انت اتجننت
ونكمل بكره
توقعاتكم
بقلم / الشيماء محمد ( شيمووو )
رواية جميله الجزء الثاني للكاتبه شيمو
الحلقه الثالثه
وليد ركب عربيته ومشي وجميله لفت وشها للشركه وداخله ومره واحده ايد مسكتها من وراها بعنف ولفها ليه بعنف اكتر
جميله بتلف: انت اتجننت
سكتت لما شافته فهد وشدت دراعها من ايده
جميله : افندم ؟ خير ؟
فهد بغيظ : من اللي موصلك ده لحد هنا ؟
جميله : اعتقد ده شيء ما يخصكش
فهد : سمعه الشركه تخصني .. ميس قالت انك ولا متجوزه ولا مرتبطه يبقي مين بقي اللي بيوصلك لحد الباب ويمسك ايدك كمان ؟
جميله : وحضرتك مركز معايا قوي كده لدرجه شوفت كل التفاصيل دي !!
فهد بغيظ : تطلعي ايه انتي علشان اركز معاكي هاه ؟
جميله ببرود : امال شاغل نفسك بيا ليه ! يهمك في ايه مين يوصلني ؟ وبعدين طالما بره شركتك يبقي بالعربي كده مالكش فيه !! بعد اذنك
فهد : سيادتك رايحه علي فين ؟ ولا مش شايفه ان الشركه ظلمه جوه !
جميله انتبهت دلوقتي ان فعلا الشركه ظلمه مفيش غير اتنين الامن واقفين علي الباب بس
جميله : المفروض ان معادي مع ميس هانم الساعه ٧ واهي يدوب ٧ بالظبط اهي يعني انا ما اتأخرتش
فهد : وعلشان كده انا واقف منتظر سيادتك مش حكايه مركز معاكي يا فصيحه هانم .. اتفضلي معايا
جميله : علي فين ؟
فهد : ميس اضطرت تمشي وطلبت مني أجيبك معايا فاتفضلي
جميله اترددت بس هتعمل ايه ؟
جميله : طيب دلوقتي في ملفات المفروض اجيبها معايا
فهد : فين الملفات دي ؟
جميله : فوق في مكتبي
فهد : والشركه مقفوله ؟
جميله : انت صاحب الشركه ما تقوليش ان معكش مفاتيح شركتك !
فهد بصلها كتير واخيرا نطق : معايا
جميله مدت ايدها : هات
فهد : هتطلعي لوحدك !
جميله : ماهو اكيد مش هطمع ان سيادتك ممكن تتكرم وتتنازل وتطلع معايا ولا ايه ؟
فهد : ولا ايه اتفضلي
فهد مشي قدامها وبتوع الامن فتحولهم باب الشركه ودخلوا وفهد طلب الاسانسير اللي كان واقف .. دخل ومسك الباب وانتظرها تدخل وطلعوا لفوق وبمجرد ما الاسانسير وقف جميله اللي فتحت الباب ما انتظرتش فهد يفتح الاول اتفاجئت بظلام دامس جدا لدرجه خافت تطلع بره باب الاسانسير وجه في دماغها جميع افلام الرعب اللي اتفرجت عليها في حياتها وايه اللي ممكن يخرج من الظلام
فهد بتريقه : ايه يا عم رامبو ؟ رجعتي ليه ما تتفضلي ؟
جميله رجعت خطوه لوري وفتحتله الطريق : لا هنا تنطبق المقوله بتاعت الرجال قوامون علي النساء
فهد بصلها وشبح ابتسامه ظهر بس اختفي بسرعه ظهوره وخطي هو قدامها وطلع موبيله نور بيه علشان يشوف وهيا وراه تماما لدرجه بصلها من فوق كتفه
جميله : بعد ما تنور المكان هرجع رامبو تاني ما تقلقش
فهد بص لقدامه علشان يداري ابتسامته بس جميله ابتسمت لانها حست بابتسامته
فهد : هو ليه قافلين الانوار كده ؟ ما يسيبو اي نور
جميله : شكل صاحب الشركه بخيل وخايف علي فاتوره الكهربا
فهد لف وبصلها : ما تلمي لسانك ده بقي شويه لقسما بالله انزل واسيبك هنا تأزأزي لب مع العفاريت اللي هنا .. عارفه بيقولو الشركات والاماكن العامه دي كلها بالليل بتكون مسكونه
جميله اتلفتت حواليها بخوف وبصوت مهزوز : ما تهرجش في المواضيع دي واتفضل بقي شوف اي نور تاني
فهد وصل لزرار النور ونوره بس للاسف مانورش : شكلهم منزلين سكينه الكهربا كلها بقولك ايه انجزي وهاتي اللي انتي عيزاه خلينا نخرج من هنا يالا
ماشيه وراه بخوف ولولا حبة كرامه كانت مسكت في هدومه بس تقريبا لازقه فيه وبتتلفت حواليها وبتتخيل الاف الاشباح حواليها ، وهيا ماشيه شنطتها شبكت في حاجه علي مكتب فشدتها ووقعت وراها بصوت عالي وفي اللحظه دي جميله صرخت وفي اقل من اللحظه كانت نطت قدام فهد وبقت في حضنه لدرجه وقعت الموبيل من ايده فاتقفل والدنيا فعلا بقت ظلام دامس بس جميله دفنت وشها في كتفه وخبت نفسها كلها بين ايدين فهد حتي ايديها علي صدره
فهد استغرب رد فعلها ده بس يدوب هينطق حس بايديها ماسكه هدومه بخوف وحس بقلبها بينبض بعنف وعرف فعلا انها مرعوبه مش بس خايفه .. بتردد حط ايديه حواليها يطمنها وحس بقلبه هو كمان بيدق بنفس عنف قلبها بس هو مش خايف فليه قلبه بيدق كده ؟؟ ليه التوتر اللي هو فيه ؟ ليه معندوش مانع ابدا يفضلوا كده ؟ اخد نفس طويل وهنا شم ريحه برفانها وعجبته جدا .. اول مره يشم ريحه هاديه كده تعجبه وقارنه ببرفان سالي وميس اللي بيشمهم من اول ما يدخلوا من بوابه الشركه بس ده ما شموش غير وهيا بين ايديه ؟ ليه مش بتحط كتير ؟ ليه مع انه حلو جدا ؟ ليه محدش يشمه الا لو ضمها بس كده او قرب منها جدا ؟ استغبي نفسه انه شاغل نفسه ببرفانها للدرجه دي !!
فهد : ممكن تهدي ! مفيش حاجه !
جميله بخوف : امال ايه اللي وقع ؟ في حد هنا !
الخوف اللي في صوتها ضايقو جدا
فهد : مفيش حد غيرنا هنا .. انتي وقعتي حاجه من علي المكتب ..
رفعت راسها بتردد بس اكتشفت ان زي ما تكون عاميه لانها مش شايفه حاجه خالص فخبت وشها تاني في كتفه
جميله بتنهج : الدنيا ظلمه كده ليه ؟
فهد : علشان سيادتك وقعتي الموبيل من ايدي طلعي انتي بقي موبيلك يا تبعدي نشوفه فين
جميله : موبيلي في شنطتي ووقعت مني او انا رميتها مش عارفه
فهد : طيب يبقي نشوف موبيلي ممكن !
جميله بعدت بس ماسكه هدومه بايدها لانها مش شايفه اي حاجه
فهد مسك ايدها : هوطي اشوف الموبيل
وطي وهيا وطت معاه وبيحسسوا بايديهم علي الارض يشوفوا الموبيل فين .. ايديهم كل شويه يجوا فوق بعض لحد ما جميله لقته
جميله : اهو لقيته
فهد :هاتيه طيب
جميله : خده
فهد : ماهو انا مش شايف ايدك نوريه انتي طيب
جميله بتحاول بس مش عارفه : مش عارفه وبعدين مفيهوش اي زراير نهائي انوره منين ؟
فهد : ده ايفون اكس مفيهوش اصلا زراير هاتيه طيب
فهد مسك دراعها وبيمشي ايده علي دراعها كله علشان يوصل لايدها وهنا جميله اتوترت من لمسات ايده علي دراعها واخيرا لمس ايدها ومسكها بالموبيل وفضل للحظه ماسك ايدها بالموبيل وهيا كاتمه انفاسها لحد ما حست انها هتموت فاخدت نفس طويل وحاولت تسحب ايدها براحه فاخد الموبيل ونوره ومسك ايدها وقف ووقفها معاه
جميله : متشكره
فهد نور حواليه وشاف علبه صغيره وقعت وشاف شنطتها فوطي جابها وعطاهالها
فهد : شنطتك شبكت في العلبه وقعتها وبعدين انا كنت بهزر في الكلام اللي قلته
جميله : طيب ممكن بلاش السيره دي لحد ما نطلع من هنا
فهد بيغيظها : سيره العفاريت قصدك !
جميله : لو سمحت
فهد : امال لو شوفتي اللي واقف وراكي هتعملي ايه !
جميله نطت تاني في حضنه وهو المره دي ضحك : اه يا جبانه انتي
جميله بعدت بغيظ : لو سمحت يا فهد بلاش
فهد استغرب واستعذب اسمه علي لسانها : فهد ! مش يمكن ما اكونش انا فهد واكون عفريتو !
حس بجميله اتصلبت ووقفت قدامه تبصله برعب فاتضايق انه سببلها الرعب ده
فهد : انا اسف خلاص مش ههزر تاني .. تعالي مكتبك اهو
نور علي باب مكتبها وهيا واقفه وهو بصلها
فهد : خلاص وعد مش ههزر تاني اتفضلي
جميله طلعت موبيلها هيا كمان ونورته كأمان معاها و جابت الملفات اللي كانت مجهزاهم علي مكتبها واخدتهم
جميله : خلاص يالا
نور طريقها وهيا طلعت قدامه واخيرا خرجوا من مربع الرعب ونزلوا تحت وخرجوا من البوابه وهنا جميله اتشاهدت وفهد ابتسم
فهد : عربيتي اهي تعالي
راحت ناحيه عربيته ويدوب هتمد ايدها كان هو مد ايده وفتحلها الباب وهيا بصتله باستغراب
فهد : الملفات في ايدك انجزي وبعدين في حاجه اسمها اتيكيت مش اكتر ولا اقل
سابها تركب وهو ركب وحرك عربيته
جميله فضلت ساكته بس عقلها بيسترجع اللحظات اللي قضتهم بين ايديه .. ريحته .. برفانه … نبضات قلبه … لمساته .. رقته لما بيحب يكون رقيق .. كشرت لما افتكرت سخافه هزاره معاها
كل ده وهو ملاحظ تغيرات وشها من ابتسامه لهيام لغضب ونفسه لو يفهم سر التغيرات دي ايه ؟؟ او يفهم بتفكر وسرحانه في ايه ؟؟
وصلوا الفيلا وهو زمر فالبواب فتحله
البواب : فهد بيه اتفضل
فهد : عمي سليمان ازيك
دخل مدخل طويل وجميله بتتفرج علي فخامه المكان واخيرا ركن عربيته وبصلها وقبل ما ينطق
جميله : ينفع اطلب من حضرتك طلب !!
فهد : قولي
جميله : اللي حصل في الشركه ممكن يفضل بينا ! ايوه انا جبانه وبخاف من الظلمه بس مش لازم حد يعرف ده ! اذا سمحت !
فهد باستغراب : معقوله بتتنازلي وتطلبي مني انا طلب وبالذوق ده كله ! اللي يشوفك دلوقتي ما يشوفكيش بعد الاستراحه وانتي بتقولي انك مش شغاله عندي وان لو مش عاجبني اتفضل وارفدك
جميله بكبرياء : وانا مازلت عند كلامي ده وبعدين ايه علاقه ده بخوفي من الظلمه ! كل واحد فينا جواه حاجه بيخاف منها بغض النظر الحاجه دي ايه ! وبعدين خلاص لو حضرتك عايز تقول وتتريقوا علي اللي حصل فأنا مش همنعك اتفضل
نزلت من العربيه بعنف واخدت ملفاتها وهو نزل وراها ومشيت كام خطوه وهو مسك دراعها وقفها
جميله : علي فكره حضرتك كل شويه تمسك دراعي كده وبغض النظر ان دراعي وجعني من مسكتك دي كل شويه الي انه مش مسموح لحضرتك تمسكني كده
فهد : امال مسموحلك انتي ترمي نفسك في حضني ؟
جميله وشها اتحول للون الاحمر من الغضب والحرج في نفس الوقت : انا عارفه انك هتستغل ده غلط بعد اذنك
فهد مسكها تاني ويدوب بتلفله فرفع ايده باستسلام : الفيلا من الناحيه دي يا فصيحه انتي كده خارجه علي بره
جميله اتغاظت اكتر : ممكن سيادتك تتفضل قدامي !
فهد مشي قدامها وهيا ماشيه وراه مع انه ماشي براحه بحيث تمشي جنبه بس تعمدت تفضل وراه
وصل للفيلا ورن الجرس مره وبعدها طلع مفتاحه فتح الباب
جميله : ولما انت معاك مفتاح بترن ليه ولا هيا غلاسه وخلاص ولا اه علشان يقفوا انتباه لسياده فهد باشا قبل ما يدخل
فهد : مع ان لسانك عايز قطعه الي اني هرد عليكي .. رنه الجرس دي علشان اللي جوه فعلا يعرفوا انه انا لان في كتير جوه مش بس امي .. في شغالات وفي منهم محجبات وممكن يكونوا براحتهم فلما يعرفوا انه انا الكل هينتبه ما ادخلش وخلاص .. مش يقفوا انتباه !
سابها ودخل وساب الباب مفتوح وهيا استغربت جدا ان ده سببه .. معقوله بيهتم بحاجه زي دي ! مين علمه ده ؟ مش ممكن تكون ميس ابدا !! مين اللي زرع بذور الخير جواه ! عمته ندي ! هيا كمان سافرت بعيالها ومكنتش معاه! ممكن جدته نبيله بس يا تري هيا لسه عايشه ! آلاف الاسئله جواها بس مش وقتها دلوقتي
دخلت وراه وقابلتهم ميس : اخيرا جيتو جميله تعالي ورايا .. داده علية
علية : افندم يا هانم ؟
ميس : خدي الملفات دي وحطيها في المكتب ( بصت لجميله ) اديهملها
جميله بصت للداده الكبيره في السن : انا ممكن احطهم بنفسي عادي شاوريلي بس المكتب فين !
فهد فهم انها شفقه علي علية وعجبه ده منها
ميس : تعالي عايزاكي فوق معايا .. علية
عليه راحت مدت ايدها لجميله : هاتيهم يا بنتي
ميس : انجزي يا جميله
هنا علية بصت لجميله قوي قوي وجميله استغربت نظراتها دي .. معقوله تكون شبهت عليها هيا كمان ! وياتري هيا من زمان هنا وتعرف جميله عمتها ؟ هتبقي تسأل عمتها !!
طلعت وري ميس وفهد وراهم
ميس : فهد خدلك شاور وغير هدومك وانزل استقبل اعمامك لحد ما انا اجهز
فهد : اوك
بقلم : الشيماء محمد
سابهم ودخل اوضته وجميله متبعاه وميس تابعت نظرات جميله وابتسمت وفكرت : ياه لو تحبي انتي كمان فهد علشان اكسر قلبك واحطمه .. فهد تربيتي غير وليد ابو قلب حنين اللي حب جميله خدامتي .. فهد غير وهو هيساعدني في تحطيم قلبك .. هعمل فيكي اللي مقدرتش اعمله في جميله ..
ميس دخلت اوضتها ودخلت وراها جميله
ميس : ينفع تختاري معايا البس ايه ؟
جميله ابتسمت : طبعا
قلبت معاها واختارت فستان وميس اتضايقت ان ذوقها عالي في الاختيار
طلبت منها تساعدها في اللبس
ميس : تعرفي بقي تعمليلي شعري وتساعديني في الميكب الكوافيره بتاعتي اعتذرت من شويه .. ورطتني
جميله كانت عارفه ان ميس جيباها علشان كده بس ابتسمت : ومالو بس انا مش خبيره قوي
ميس ضحكت : هنخبط مع بعض .. لو عايزه تقلعي جاكت البدله براحتك محدش هيدخل علينا الا بستئذان
جميله : لا انا كويسه كده
بدئت تعمل استشوار لشعر ميس ومع السخونه عرقت وحست انها جابت اخرها واستغربت ازاي التكيف مش عامل اي تأثير في الاوضه وما اخدتش بالها ان ميس قاصده تغيظها بالتكيف اللي يدوب شغال
ميس : يا بنتي علي الاقل اقلعي الجاكت
اترددت بس قلعت جاكت البدله وكانت لابسه قميص ابيض كمه قصير جدا لدرجه انه يعتبر كت تقريبا
ميس : واو كل الجمال ده مخبياه !!
وقفت ميس وفكت شعر جميله .. كان متوسط طوله مش زي شعر جميله الطويل جدا ولونه شيكولاتي مش اسود زي عمتها بس يشتركوا في نعومه شعرهم الحرير
ميس : ازاي مخبيه الجمال ده كله !
جميله : مستخبي للي يستاهلو بس ..
ميس : ومين بقي ده ؟
جميله : ده شيء في علم الغيب
ميس : عايزه تتجوزي يا جميله ؟
جميله : كل البنات عايزه تتجوز بس حاليا انا لأ مش وقته
ميس : انتي في قمه جمالك اتجوزي في الوقت ده
جميله : عندي طموحات كتيره عايزه احققها الاول في حياتي اهم من الجواز
ميس ابتسمت : برافو عليكي الجواز في ناس كتير بتعتبره انجاز انا بعتبره اخر الطريق .. تضيع وقت .. يعني شيء مهمش مش اساسي .. ساعات بيكون اساسي بس ده لو هيخدمني غير كده تضيع وقت
جميله : فعلا عند حضرتك حق .. ايه رأيك احطلك كحل في عنيكي
ميس : مش ايلينر كفايه ! مش بحط كحل مش بيكون حلو عليا
جميله : هنحطه جوه العين وتحت عينك هتكوني جميله بيه .. جربي ولو معجبكيش مش هنخسر حاجه
ميس : جربي
جميله حطتلها كحل عريض وعجب ميس جدا .. لدرجه استغبت نفسها انها ازاي مش بتحط كحل ديما ..
ميس : رائع يا جميله جدا .. طيب انتي مش بتحطي لنفسك ليه ؟
جميله : ما انا قلت لحضرتك ده للي يستاهله
ميس كملت : واللي يستاهله ما ظهرش لسه
جميله : بالظبط كده
هنا الباب اتفتح فجأه وفهد داخل وجميله بتلف وشها للباب ومع لفتها شعرها بيلف معاها وهو اتسمر مع لفه شعرها بس اتفاجيء انها جميله اللي حاولت تداري نفسها باي شيء وجريت مسكت جاكتها حطته علي اكتفاها وفهد استوعب تصرفها فخرج بره الاوضه
فهد : انا اسف جدا ..
ميس ببرود : حصل خير .. جميله خلاص يدخل ؟
جميله بتلبس بسرعه جاكتها وظهرها للباب : لحظه بس … خلاص
ميس : ادخل يا فهد
فهد ما دخلش وقف بس في الباب : تليفون ليكي من مستر اليكس
ميس : جميله ردي عليه وجاوبي علي استفسارته كلها عن الملف اللي قولتلك تدرسيه مش انتي درستيه صح ؟
جميله : اه درسته … طيب ارد عليه فين !
ميس: فهد حبيبي ينفع تدلها علي المكتب !
فهد : حاضر اتفضلي
خرجت جميله متوتره من فهد وانه شافها كده
نزلت قدامه السلم
فهد : انا اسف فعلا انا مش متعود ادخل كده بس معرفش ازاي دخلت بدون استئذان بس يمكن علشان انتي معاها لكن ما تخيلتش ابدا انك ..
جميله : خلاص حضل خير وبعدين ده غلطي انا .. حضرتك في بيتك انا اللي غلطانه
فهد وقف : لا انتي مش غلطانه .. انا ما ينفعش ادخل علي اي حد بدون استئذان فأنا اسف فعلا
بصتله جميله وشافت اعتذار حقيقي في عنيه واستغربت تاني .. منين جايب الاخلاق دي ؟ مين زرعها فيك يا فهد !!
فهد : المكتب اهو اتفضلي
جميله دخلت وبصت حواليها : فين التليفون ؟
فهد : انا طلبت منه يتصل بعد عشر دقايق اكون بلغتكم
جميله : تمام
فهد : علي فكره .. شعرك مفكوك افضل بكتير من اللي بتعمليه ده
جميله بتوتر : انا مش بحب اعمل كده ولا افكه بس اعمل ايه ! والدتك معطتنيش فرصه اعدل نفسي كويس
فهد ابتسم : انا هسيبك وهو قدامه خمس دقايق وهيتصل تاني ظبطي فيهم نفسك براحتك .. وقدامك مرايه اهي عدلي فيها امورك
جميله : متشكره لحضرتك
خرج وسابها وهيا بسرعه ظبطت نفسها وعدلت كل حاجه اما فهد فعقله بيعيد كل شويه منظر شعرها وهيا بتلف ونظرتها ليه ويعيد وراه لما رمت نفسها في حضنه في الشركه .. بيعيد ابتسامتها وتكشيرتها .. لقي نفسه هو كمان بيبتسم وبيكشر لوحده
علية : اللي واخد عقلك
فهد بصلها وابتسم : مفيش حد يقدر ياخد عقلي
علية : امال التكشيره والابتسامه والهيام ده ليه؟
فهد : هيام مره واحده ؟؟ لا افتكرت بس موقف ضحكني مش اكتر
علية : ماشي هعمل مصدقاك المهم مين البنت دي ؟ واسمها فعلا جميله !
فهد سرح شويه : دي ميس عينتها في الشركه جديد واهي مخلياها تحت ايديها
علية : وانت عادي ؟
فهد : وانا مالي !
علية : يعني الاسم ملفتش نظرك !
فهد : عايزه توصلي لايه يا علية!
علية : واحده حلوه جدا واسمها جميله ما بتفكرش بحد !! ليه ميس معيناها ! اشمعني دي !!
فهد : علشان نفس اللي بتفكري فيه !! علشان جميله واسمها جميله .. بتعيد الزمن من تاني ( حاولت تتكلم بس وقفها ) ولو ده هيسعدها ويعوضها ولو بجزء بسيط فهيا حره
علية : فهد انت
قاطعها : انا مش عايز اسمع حاجه يا داده انتي بتقولي كلام وهيا بتقول كلام مختلف تماما
علية : حكم عقلك
فهد : عقلي !! عقلي بيقولي ان الدنيا كلها وقفت ضد امي
علية : امك !
فهد : ايوه امي .. الام يا علية اللي بتربي مش اللي بتخلف وترمي ابنها لغيرها ..
علية : انت مش فاهم حاجه ؟
فهد اتنرفز : انا فاهم كويس قوي .. واحده دخلت البيت علشان تأجر الرحم بتاعها .. تخلف وترمي ابنها وتقبض بس طمعت في الجمل بما حمل وقالت ليه ارضي بقرشين وامشي ما انا اخد كله ولعبت علي وليد باشا وهو ريل قدام جمالها ونسي مراته ونسي بيته وهده بايده ورفع الخدامه وعملها هانم .. فما تجيش انتي دلوقتي تتكلمي وتقوليلي مش فاهم .. انا فاهم كويس قوي واسم جميله ده مش عايز اسمعه هنا ابدا .. ومش عايزك تتكلمي معايا تاني في الموضوع ده وياريت ما تستغليش حبي ليكي غلط
سابها ومشي وهيا واقفه : انت مش فاهم حاجه خالص .. ميس قلبت كل الحقايق ولعبت بيك واستغلت طيبتك وبراءتك وحولتك للوحش الكاسر ده اللي مش عارف يميز ما بين صاحبه وعدوه .. بس يا تري يا جميله انتي فين وليه سيبتي ابنك لميس كل ده ؟ ليه اتخليتي عنه !
فهد طلع الجنينه وقعد فيها وجميله خلصت تليفونها وطلعت ومعرفتش تروح فين ! شافت باب التراس مفتوح فراحت ناحيته وطلعت بره اخدت نفس طويل مره وري مره
فهد : هتخلصي الهوا هنا
جميله مع نطقه صرخت : خضتني
فهد : انا اعملك ايه يعني !! انتي اللي خفيفه
خلصتي تليفونك ؟
جميله : اه خلصته
فهد : وناوي علي ايه ؟
جميله : مين ده ؟
فهد بتريقه : يعني هيكون مين ؟ مستر اليكس
جميله : اه .. اقتنع بكلامي ورديت علي استفسارته كلها وبيقول هيبعت حد يشوف علي الطبيعه وبكره هيبلغنا امتي مندوبه هيوصل
فهد : تمام ..
جميله : تمام
سكتت ووقفت مكانها وهو قاعد مع سيجارته وباصص للفراغ قدامه
جميله قطعت الصمت : ضيوفكم هيجوا امتي ؟
فهد بص في ساعته : المفروض علي وصول
جميله : طيب بما اني خلصت التليفون فأمشي انا
فهد : والله انتي مجيتيش بناءا علي طلبي وبعدين انتي بتشتغلي عند ميس هانم فروحي اطلبي منها هيا تمشي مش انا
اخد نفس طويل من سيجارته وطلعه
جميله : اكيد طبعا هقولها هيا انا بس
قاطعها بوقفته : ما بسش اتكلمي معاها مش معايا
سابها ونزل الجنينه وهيا اتغاظت واتمنت لو في ايدها حاجه ترميها عليه …. بس طلعت لميس تشوفها …
ميس رفضت انها تمشي وطلبت منها تخليها معاها
بقلم / الشيماء محمد
ايميل ( shimooelwady )
****************
جميله في بيتها ماسكه صوره ابنها ودموعها نازله .. وكل ما الموبيل بيقفل تفتحه وباصه للصوره ورجعت بذكرياتها لزمااااان
عماد : جميله التظلم قبلوه والمحامي متفاءل انهم هيخفضوا المده
جميله : بجد يا عماد ؟ يعني مش هفضل هنا العشرين سنه !
عماد : باذن الله لأ
افتكرت المحاكمه والمحامي حاول يثبت انها غير مسؤله وبالفعل خففوا الحكم ل ١٥ سنه بس .. جميله كانت زعلانه
المحامي : علي فكره اللي حصل ده كويس جدا
جميله : هتفرق ايه ١٥ من ٢٠ ؟ هخرج هيكون ابني عدي العشرين سنه لازمتها ايه بقي ؟
المحامي : لا تفرق كتير اولا ١٥ سنه دول مش هيكونوا ١٥ لان سنه السجن ٩ شهور بس مش ١٢ فمعني كده انك تقريبا هتقعدي ١١ سنه وممكن مع حسن السير والسلوك تاخدي نص المده او يقللوا شويه من ١١ يعني هتكون خفيفه
وبالفعل قضت جميله ٨ سنين في السجن بس للاسف لما خرجت معرفتش توصل لابنها .. راحت لميس وقابلتها
ميس : انتي هربتي من السجن ؟
جميله : لا انا خرجت ابني فين ؟
ميس : ابنك ؟؟ فين ابنك ده ؟ قصدك ابني انا
جميله : هو فين عايزه اشوفه ؟ ارجوكي يا ميس .. خليني اشوفه
ميس : ده بعدك يا جميله .. اخدتي مني وليد لكن فهد ده ملكي انا وبس ولا يمكن هسمحلك تاخديه ابدا فاهمه !
جميله نادت بصوتها كلها : فهد !! فهد. ابني فهد .. يا فهد
وميس بتضحك بصوتها كله : كملي سكتي ليه ؟ نادي نادي
جميله : هو فين ؟ ابني فين ؟
ميس : شوف برضه تقول ابني ! علي العموم هريحك .. هو مش هنا
جميله : هستناه لما يرجع .. يوم اتنين عشره هستناه ؟
ميس ضحكت تاني : مش في مصر خالص . انتي فاكراني عبيطه هخليه هنا في مصر .. فهد بيتعلم بره ومش هيرجع مصر دلوقتي خالص ومحدش يعرف طريقه غيري انا وبابا بس ده حتي علاء وخالد هيموتوا ويعرفوا مكانه بس مش عارفين فريحي نفسك يا جميله مش هتشوفيه .. فهد ابني وهربيه علي مزاجي وبطريقتي .. وبعدين دي قسمه العدل انتي اخدتي وليد وانا اخدت فهد خالصين
جميله : وهو فين وليد !
ميس بتريقه : يوووه انتي لعبتك باظت ما تطمعيش في لعبه غيرك… فهد لعبتي انا .. انا اشكلها علي مزاجي .. يالا بقي العبي بعيد يا شاطره
جميله : مش هسمحلك يا ميس تاخدي ابني
ميس طلبت من الامن يرموها بره وهيا بتصرخ انه مش هتسيبلها ابنها ..
فضلت سنتين قدام بيت ميس علي الرصيف وما بتمشيش غير لما الامن يطردها او البوليس يجي وهيا تمشي …
اخوها كمان بيترجاها تسافر معاه وهيا رافضه وفضلت كل يوم تنتظر رجوع فهد بس ميس ما بتسمحش لفهد ينزل مصر واخيرا لما مرات عماد اتوفت وافقت تسافر معاه علشان عياله جميله و وليد .. بس فضلت تستني ابنها وكل اجازه ينزلوها تروح بس فهد برضه مسافر ……
فاقت من ذكرياتها ومسحت دموعها واتصلت بجميله تشوفها اتأخرت ليه ! وجميله قالتلها ان الحفله مستمره وميس رافضه تخليها تمشي وعمتها قالتلها اول ما تخلص تكلمها علشان تبعت اخوها يجيبها …
***********
العيله بدئت توصل واولهم كان علاء وسالي وفهد استقبلهم ولمح جميله فوق متبعاهم وسالي بتسلم عليه هو بص لجميله وحس انها اتضايقت فلقي نفسه بيضم سالي ويستجيب لها علشان يضايقها اكتر ..
سالي : فين الباقي
فهد : علي وصول
علاء : اول مره اوصل مكان بدري
فهد : مره من نفسك بقي
علاء : سالي انتي السبب من زنك ده يالا يالا
سالي : طيب مش نيجي في معادنا ! المهم هنقعد فين يا فهد !
فهد : في الجنينه تعالو
علاء : اطلعوا انتو انا ورايا تليفون مهم هعمله واحصلكم
فهد استغرب وبص لجميله ولاحظ ان علاء شافها وحس ان ده سببه مش التليفون
خرج بسالي ومشغول علي جميله وتصرفها مع علاء ..
سالي مسكت دراعه متعلقه فيه وهو سرحان مع سيجارته ومش مركز معاها
سالي بدلع وحطت ايدها علي خده علشان يبصلها : سرحان في ايه كده ؟ ركز بقي هنا
فهد بعد براحه ايدها عن خده : معلش بس سجايري نسيتها اديني لحظه واحده اجيبها وارجع اركز معاكي اوك
ابتسمت : اوك ما تتأخرش
سابها ودخل يشوف عمه ليه ما طلعش معاهم
جميله كانت واقفه فوق وعنيها متابعه فهد وسالي بس لقت علاء رايح ناحيتها
علاء : الا انتي هنا ليه ؟
جميله : ميس هانم طلبتني
علاء : اممم وانتي عاجبك الشغل مع ميس ؟
جميله : اكيد والا مكنتش اشتغلت
علاء : اممم وانتي شغلك بقي في المكتب والبيت كمان طيب ما تيجي تشتغلي معايا انا وانا اوعدك اني هريحك جدا وبالراتب اللي تتمنيه
فهد كان وصل و وقف يسمع رد جميله ايه !
علاء مد ايده علي خدها وهو بيقولها : ايه رأيك؟؟
بقلم : الشيماء محمد
ونكمل بكره
توقعاتكم
شيموووووو
رواية جميله الجزء الثاني للكاتبه شيمو
الحلقه الرابعه
سوري علي التأخير يا حبايبي وانتظروني الساعه ١٠ في حلقه تانيه
بقلم / الشيماء محمد ( شيمووو )
علاء : اممم وانتي شغلك بقي في المكتب والبيت كمان طيب ما تيجي تشتغلي معايا انا وانا اوعدك اني هريحك جدا وبالراتب اللي تتمنيه
فهد كان وصل و وقف يسمع رد جميله ايه !
علاء مد ايده علي خدها وهو بيقولها : ايه رأيك؟؟
جميله ضربت ايده بسرعه قبل ما تلمسها: ايدك اذا سمحت تحتفظ بيها لنفسك بدال ما اتصرف تصرف مش هيليق ولا هيعجب حضرتك
علاء ابتسم ورجع خطوه لوري : شرسه اممم بتفكريني بحد كان شرس برضه كده زيك بالظبط
جميله : بعد اذنك
يدوب هتخطي بس علاء اتكلم : انا جاد في عرضي الشغل عليكي
جميله بصتله : وانا جاده في رفضي
علاء هيتكلم بس ميس جت وراه : زي ما انت يا علاء … جميله اذا سمحتي معلش ممكن تجيبي موبيلي من اوضتي تايه مني حبيبتي
جميله رجعت : حاضر لحظه
سابتهم وميس قربت من علاء وفهد كان هيقرب بس كلام ميس وقفه
ميس : تاني يا علاء ! محرمتش من جميله الاولي
علاء ضحك : طيب اعمل ايه هو جمالهم بيجنن .. يعني نفسي اعرف عقلك كان فين لما اختارتي واحده بالجمال ده لجوزك !!
ميس : حماتي الله يسامحها هيا اللي اصرت قال ايه علشان تخلف عيل حلو لاحسن يطلع شبهها
علاء: تقومي تجيبي صاروخ ارض جو
ميس : ما تفكرنيش المهم جميله دي مالكش دعوه بيها دي لعبتي انا وبس
علاء: طيب ما تسيبيني العب انا كمان التانيه ورفعت في وشي سكينه دي شكلها عاقل شويه ممكن تيجي بالمحايله
ميس : لا ما اعتقدش علي العموم جرب حظك بس اياك تطفشها فاهم
علاء : المهم وبعدين في فهد !
ميس باهتمام : ماله فهد ؟
علاء: لميه شويه بدال ما نلمه احنا زي ما لمينا اللي قبله
ميس : فهد غيره ….. وبعدين فهد تحت ايدي
علاء : لا ده ريشه طول فياريت تقصقصيله جنحاته قبل ما يطير ويعلي وما نعرفش نطوله فاهمه يا ميس !
ميس : علاء
قاطعهم رجوع جميله بالموبيل : الموبيل ميس هانم
ميس : شكرا انزلي انتي وانا جايه وراكي
جميله نازله وفهد اضطر يخرج بسرعه بس عقله شغال بسرعه البرق بيحاول يحلل اللي سمعه ..ازاي يلموه زي اللي قبله طيب وقصدهم مسن باللي قبله ! ايه اللي خططوله ؟ طيب ميس دورها ايه ! طيب هيا بتحبه فعلا ولا حكايتها ايه ! اسئله كتيره ظهرت وهو مش عارفلها اجابه …. قاطعت افكاره جميله اللي اتخضت من وقفته علي الباب في الظلمه
جميله شهقت : يعني انت واقف كده ليه
سلام قولا من رب رحيم
فهد : انا حر وبعدين ايه شوفتي عفريت ! ولا اه نسيت انتي بتخافي من خيالك
رفعت صباعها في وشه : اذا سمحت
قاطعها وهو بيزق صباعها بعيد عن وشه : ولا اسمح ولا ما اسمحش ما تدوشنيش شوفي وراكي ايه
جميله بعد ما هتمشي رجعت : هو ينفع امشي ! وجودي مالوش لازمه وانتو عيله في بعض
فهد بصلها شويه : تاني ؟؟ هرد عليكي تاني روحي اسألي اللي انتي بتاخدي اوامرك منها ولا نسيتي انك مش شغاله عندي وما بتاخديش اوامر مني
جت تتكلم بس : هششش ولا حرف
هتنطق بس دخلت عمته ندي واسر وامل وخالد وفهد شافهم فراح ناحيتهم وبيسلم علي عمته اللي ضمته قوي وجميله مرقباهم من بره التراس
ندي : حته من قلبي
فهد : قلبك ايه بقي ما انتي علي طول مسافره
مسكت وشه بايديها : غصب عني حبيبي غصب عني
فهد استغرب تأثرها : عارف عمتي ما تقلقيش
سلم علي خالد واسر وجه دور امل اللي اول مره يشوفها بعد رجوعها من السفر
ضمها بسرعه وباسها في خدها
فهد : حمدالله علي السلامه
امل بحرج ووشها احمر جدا: الله يسلمك يا .. ف هد
ميس وعلاء نزلوا يستقبلوهم وجميله راحت ناحيه القعده اللي في الجنينه وسالي اول ما شافتها اتجننت : بتعملي ايه هنا !
جميله قعدت : شيء ما يخصكيش
سالي يدوب هتتخانق بس لمحت الكل جاي فسكتت
علاء : مالك يا سالي
سالي : البني ادمه دي ايه اللي جابها هنا !
جميله وقفت وما ردتش
ميس : انا .. عندك اعتراض يا سالي
سالي : لا طبعا بس ليه ! يعني مش كفايه الشركه كمان هنا ؟
ميس : وانتي ايه اللي مضايقك كده !
سالي : وانا اتضايق ليه يعني !
ندي اتدخلت : مين دي !!
ميس : دي جميله
ندي بصتلها باستغراب وشهقت : جميله
حطت ايدها علي قلبها وبتلقائيه بصت لفهد اللي استغرب رد فعلها ده
ميس : مالك يا ندي ! دي شغاله عندي في الشركه مش اكتر اهدي
سكتت ندي بس قعدت وفضلت عنيها علي جميله كتير
جميله بعد ما العشا بدأ يجهز قامت لميس ووطت علي ودنها : ينفع امشي انا .. ده عشا عائلي
ميس : طيب اتعشي معانا وامشي
جميله : لا معلش كمان علشان اعرف امشي والوقت ما يتأخرش قوي
ميس : طيب بس ما تتأخريش بكره
جميله : اوك .. هاخد الملفات من جوه معايا ماشي
ميس شاورت بدماغها وجميله انسحبت وفهد مراقبها
جميله اتصلت بسرعه بأخوها علشان يجيلها وراحت تلم حاجتها والملفات بتاعتها وفهد واقف مراقبها في باب المكتب !! لحد ما اخدت بالها منه
جميله : حضرتك لو عايز المكتب لحظات وهمشي !
فهد : لا بس بدور علي تليفوني
جميله بصت حواليها لحد ما شافته علي المكتب : اهو
قرب منها ياخد الموبيل بتاعه : مين هيوصلك دلوقتي !
جميله : هتصرف
فهد : عمي علاء كان عايز ايه منك !
جميله : ولا حاجه بس بيعرض اشتغل معاه هو
فهد : وردك كان ايه !
جميله : قلتله مبسوطه في شغلي بس حضرتك شاغل نفسك بيا ليه !
فهد : لا فضول مش شاغل نفسي واكيد مش هشغل نفسي بيكي يعني
جميله بصتله بنظره خاطفه ورجعت تلم ملفاتها واوراقها : طيب حضرتك عايز حاجه تانيه !
فهد بيبصلها بتساؤل
جميله : يعني اصلك لسه واقف ؟
فهد : وانتي هتقوليلي اقف فين في بيتي وما اقفش فين ولا ايه ! ولا نسيتي انك في بيتي ! ولا اوعي تقولي اسطوانه انك في بيت ميس مش بيتي لان هنا بقي ده بيتي انا مش بيت ميس
ميس كانت داخله وسمعت الجمله دي ومعجبتهاش نهائي
جميله : لا طبعا ما نسيتش ان ده بيت حضرتك وانا لحظه وهخرج منه واتمني لو مدخلوش تاني
فهد : ياريت يكون افضل
ميس هنا دخلت : انتي لسه هنا يا جميله
جميله : لحظه وماشيه يا افندم
ميس : اكلم السواق يوصلك !
جميله : لا متشكره جدا لحضرتك انا هتصرف
ميس لفهد : وانت بتعمل ايه هنا !
فهد بهدوء : نسيت موبيلي وجيت اخده بعد اذنكم
خرج وسابهم وميس دخلت تشوف اللمسات الاخيره للعشا
فهد خرج وكلم سليمان البواب
فهد : هتخرج دلوقتي سكرتيره ميس اللي كانت داخله معايا عايزك تشوف هتركب ايه ولو حد منتظرها تصورهولي بموبيلك وتجيبلي صورته حالا عندي فاهم
سليمان : حاضر يا فهد بيه
فهد : طبعا من غير ما تاخد بالها
سليمان : اكيد يا باشا
خرجت جميله وكان وليد واقف منتظرها واول ما شافها قرب منها وابتسم وبيتكلم معاها وفتحلها الباب وركبها ومشيوا
وليد : كل ده مدخل فيلا !
جميله : امال من جوه بقي حاجه كده شبه الافلام
وليد : دي عمتك كانت واقعه واقفه
جميله : فلوس الدنيا كلها ما تعوضش موت جوزها وبعدين الفلوس عملتلها ايه غير الحزن والظلم والسجن
وليد : بس ما تنسيش لولا جوازها منه مكنش ابوكي اتعلم ولا سافر ولا اشتغل ولا احنا بقي حالنا كده والله اعلم كنا اتولدنا ولا لأ
جميله : يالا اكيد ربنا له حكمته في اللي حصل ده كله
عم سليمان دخل لفهد اللي قاعد بس قام وراح ناحيته ووراه موبيله
فهد مسكه وقلب في الكام صوره وبعدها مسحهم بغيظ
سليمان : معلش بقي مش واضحين قوي موبيلي علي قده
فهد : واضحين كفايه .. روح انت ولو حد سألك كنت عايز ايه قولهم انك كنت عايز سلفيه ولا يوم اجازه ولا اي حاجه وخصوصا ميس فاهم !
سليمان : تمام يا بيه هقولهم كنت عايز سلفيه
فهد شكره ورجع للعشي بس دماغه مشغوله وميس ملاحظه ده
جميله روحت وعمتها كانت منتظراها تقدملها تقرير عن الحفله وحكتلها كل التفاصيل اللي حصلت بس تجنبت حوارتها الخاصه مع فهد
جميله عمتها : علاء زي ماهو كلب ما اتغيرش ابدا
جميله : فعلا .. بس ندي دي حستها طيوبه وبنتها كمان طيوبه كده زيها
عمتها : اتكلمتي معاها
جميله : لا للاسف بس احساس .. هيا خجوله كده وهاديه غير سالي تماما
عمتها : سالي تربيه محي وعلاء متوقعه منها تكون ايه ! اما امل دي تربيه ندي حاولي تتصاحبي عليها
جميله : لو في فرصه اكيد …
تاني يوم ميس سألت سليمان وقالها زي ما اتفقوا
قبل ما ينزل ميس قابلته
ميس : انا مش هروح الشركه النهارده ابقي خلي جميله لو في حاجه مهمه تجيبهالي هنا
فهد شاور بدماغه ونزل علي الشركه
وشاف جميله وكان نفسه يسألها صريحه مين ده !!
ندي راحت الشركه لفهد اللي قابلها باستغراب واخدها مكتبه
ندي : اكيد مستغرب زياتي !
فهد : يا خبر يا عمتي لا طبعا الشركه كلها منوره
ندي : حبيبي ربنا يخليك
فهد : عايزه عمي خالد ! ممكن ابعتله ؟
ندي : لا لا ما انا عارفه مكتبه انا جيالك انت
فهد : خير
ندي اخدت نفس طويل : عايزه اطلب منك طلب واتمني توافقني
فهد : حضرتك تشاوري يا عمتي مش تطلبي
ندي ابتسمت : حبيبي .. عايزه جدتك
فهد بعدم فهم : يعني ايه عايزاها ! ما حضرتك عارفه مكانها !
ندي : اه عارفه بس اقصد عايزه اخدها بيتي انا رجعت اهو واستقريت وانا فاضيه
قاطعها : مش هترجعي الشغل !
ندي : لا مش عايزه اشتغل ولا قادره اشتغل .. عايزه امي يا فهد تعيش معايا في بيتي وانت المسؤل عنها في الدار فارجوك
فهد : ترجوني لايه يا عمتي بس هيا في الدار بيهتموا بيها وبادويتها احسن مننا
ندي : فهد عايزه
قاطعها بصرامه : هيا مرتاحه في الدار
ندي : انت مش عايزني اخدها ليه !
فهد : انا باصص لمصلحتها
ندي : طيب ينفع تيجي معايا نزورها !
ندي عايزه تاخده بعيد عن ميس واستغلت غيابها عن الشركه
فهد : ضروري ممكن تاخدي اسر معاكي
ندي : للدرجه دي عمتك ملهاش اي قيمه عندك وبترفض كل طلباتها !! يالا معلش عطلتك
وقفت بس فهد مسك ايدها : حاضر هاجي معاكي وياريت بلاش الكلام ده تاني حضرتك عارفه غلاوتك
نزل معاها وهما خارجين اتقابل مع جميله اللي وقفت بسرعه علشان ما تخبطش فيه وبصت لندي اللي حاسه بحاجه نحيتها
جميله : اهلا بحضرتك
ندي سلمت عليها
فهد بصرامه : عايزه ايه ؟
جميله : امضتك علي الورق ده
فهد بصله وبصلها : لما ارجع
جميله : امضتك هتاخد لحظه
فهد : وانا مش همضي علي ورق معرفش فيه ايه
جميله : يعني همضيك علي ايه يعني ؟
فهد : انتي بترغي كتير ليه ! قلت اما ارجع يبقي لما ارجع اتفضلي
جميله سابته ومشيت من غير ما تتكلم بس نظره غضب ناريه هو بيستلذها النظره دي … مشي مع عمته وطول الطريق سرحانه في جميله واخوها وليد .
وصلوا الدار وفهد طلب يقابل جدته وقعدوا ينتظروها في غرفه الانتظار
فهد جاله تليفون واستأذن عمته وخرج يرد عليه وهو داخل سمع اتنين من الشغالات في الدار
الشغاله ١: شايفه الاغنيه دول كل واحد اول ما ابوه ولا امه يكبروا يرموهم هنا ولولا العيب كانوا موتوهم
الشغاله ٢: ماهم مش فاضين من جمع الملاين هيفضوا بقي للعواجيز دول
الشغاله ١: شايفه الست اللي هناك دي رمت امها هنا وبتيجي كل كام سنه تبص عليها وتمشي
الشغاله ٢: يا بت دي مسافره بره مش هنا
الشغاله ١: طيب ما تاخد امها تعالجها بدال ما رمينها الرميه دي .. الست يا عيني عليها
الشغاله ٢ : عارفه دي ابنها مات وبعد ما مات اتبهدل حالها كده ومراته هيا اللي رمتها هنا ومتنغنغه في عز ابنها سمعت الدكتور مره بيقول انها مش مجنونه ولا حاجه بس اهلها اللي مش عايزينها
الشغاله ١: بجد .. يا عيني عليها .. طيب هو ابنها ده مخلفش ؟ ملهاش حفيد ولا حفيده يحنوا عليها ؟
الشغاله ٢ : لها حفيد قد الدنيا بس طالع لامه براوي كده وبيبص للناس من فوق وتقريبا لو يطول يقول اقتلوها وريحوها .. الناس دي بتشوف الموت راحه للي مش عايزينهم
فهد كل ده واقف وسامعهم ومشي ناحيتهم يتخانق معاهم بس وقف تاني لانه هيأكد كلامهم انه باصص للناس من فوق !! بس هل هو فعلا باصص للناس من فوق ! طيب جدته سايبها هنا ليه ! ماهو ممكن يجبلها اللي يخدمها وهيا في بيته ! بس ميس هيعمل فيها ايه ! مش جدته دي اللي فرقت ميس ووليد عن بعض ؟ مش جدته هيا اللي جوزت ابوه لجميله ! وهيا اللي طردت ميس من بيتها ؟ وهيا اللي نصرت جميله علي ميس وما وقفتش جنبها ؟ بس برضه دي جدته والمفروض حتي لو وحشه تكون في بيته !! لا ميس هتزعل وهيا اهم منها … سكت الحوار جواه ودخل لعمته وجدته طلعت بكرسيها هزيله عجوزه مكسوره .. اخر جلطه جاتلها سابتها مشلوله شلل نصفي وما بتتكلمش .. وده اللي مسكت نبيله انها فقدت النطق….
ندي حضنتها جامد وعيطت في حضنها تحت رجليها وفهد واقف علي الباب بجمود ومراقب في صمت
ندي : حقك عليا بس غصب عني والله .. غصب عني يا امي .. والله لو بايدي ما اسيبك لحظه هنا ..
نبيله هزت بدماغها بتفهم ورفعت ايدها اللي بتتحرك علي دماغ بنتها
ندي : عامله ايه وصحتك عامله ايه !
نبيله بتشاور عليها
ندي : انا كويسه وعيالي كويسين المره الجايه هجيبهم معايا امل واسر .. دول هيفرحوا قوي لما يشوفوكي ..
بصت لفهد وبتشاور عليه بس واقف جامد علي الباب
ندي : فهد تعال سلم علي جدتك
فهد جامد علي الباب وباصصلها بجمود
نبيله دمعه نزلت منها غصب
ندي : فهد
فهد بص لعمته : هستناكي بره لحد ما تخلصي
ندي جريت وراه لبره : خليني اخدها
فهد : لأ .. عايزه تاخديها استأذني ميس وبراحتها هيا
ندي مسكت فهد من قميصه : ميس ملهاش علاقه بامي دي جدتك وامي وملهاش غيرنا احنا الاتنين
فهد بتريقه : ميس ملهاش علاقه ؟؟وهو مين اللي دفع تمن جبروت الست اللي جوه دي غير ميس هاه !
ندي بعدم فهم : جبروت مين ؟ انت بتقول ايه ؟
فهد : بقول اللي انتي عارفاه كويس قوي يا عمتي ولا اه نسيت حضرتك كمان كنتي من انصار جميله هانم ..
ندي : انصار جميله ! انت عارف جميله دي تبقي مين ؟؟
فهد بتريقه : تبقي امي .. عارف يا .. يا عمتي ( مشي خطوتين ) هستناكي بره ما تتأخريش
ندي فضلت شويه واقفه مش مستوعبه ان فهد عارف ان جميله مامته ..
دخلت لامها ومش عارفه تقولها ايه !
ندي : تخيلي ان فهد عارف ان ميس مش امه وبرضه بيحبها . ليه كده ؟ وازاي اصلا كده
نبيله هزت دماغها وعيطت : ا ا ن ا
ندي : انتي ! انتي ايه ؟
نبيله بالعافيه وبتشارر علي نفسها :
ا ا ن ن ن ا …
ندي : انتي قولتيله ! طيب وليه بيكره جميله وازاي بيحب ميس .. يا تري يا ميس قولتيله ايه وازاي برمجتيه كده !
خرج فهد مخنوق ومضايق ومره واحده مشي واتصل بعمته واعتذرلها وطلب منها تاخد تاكسي وتروح بنفسها ..
راح علي الشركه علي اخره ودخل مكتبه وطلب السكرتيره
عبير السكرتيره : افندم
فهد : ما تدخليش اي حد
عبير : في اجتماع بعد نص ساعه
قاطعها : اطلبي من اسر يروح او سالي
عبير : بس يا
فهد : انهي جزء في ما تدخليش حد انتي مش فاهماه؟ اتفضلي من هنا
خرجت عبير من عنده وكلمت اسر يروح مكانه وظبطت كل امور الشغل
شويه وجميله جت
جميله : عبير ! فهد بيه وصل ؟
عبير : وصل بس علي اخرو ومش عايز يشوف حد حتي اجتماعه بعت اسر بيه مكانه
جميله : طيب والورق ده مين هيمضيه ؟انا هدخله
عبير وقفت : تدخلي فين انتي عايزاه يرفدني ولا ايه !
جميله سكتت شويه : بقولك ايه انا الورق ده لازم يتمضي عليه والا انا اللي ميس هانم هترفدني
عبير : طيب بعدين والعمل !
جميله : انتي روحي اي مكان بحيث اقوله ان مفيش حد بره
عبير : اه يقوم رازعني احلي استقاله
جميله فكرت شويه : هو مين اللي بلغ اسر يروح مكانه !
عبير : انا اللي بلغته
جميله : خلاص يبقي لو سألك قوليله انك روحتي بنفسك تبلغي اسر بيه علشان يروح مكانه الاجتماع
عبير : فكره برضه ربنا يسترها بقي انا هروح انا ودقيقتين وراجعه
جميله : روحي وانا هدخل
عبير مشيت وجميله اخدت نفس طويل وخبطت وفتحت
فهد : قولتلك ما تدخليش حد ايه ما بتفهميش ؟
جميله اتكلمت : قولت لمين ؟
فهد رفع دماغه وبصلها ودي كانت اخر حد عايز يشوفه دلوقتي
فهد بينادي : عبير ! انتي يا
قاطعته : مفيش حد بره وعلشان كده خبطت ودخلت ودلوقتي كفايه بقي دراما وسيادتك امضيلي علي الورق ده
فهد بغيظ : اطلعي بره واختفي من قدامي الساعه دي
جميله بهدوء : امضيلي الورق وانا هختفي تماما من قدام حضرتك
فهد قام وقف وهيا للحظه خافت منه وهو رايح ناحيتها وفكرت انه ممكن يمد ايده عليها لانه كان رايح ناحيتها بهجوم فقلقت ورجعت خطوه بخوف
فهد : طالما بتخافي كده يبقي ابعدي عني دلوقتي
جميله بصتله وحست … معرفتش هيا حست بايه ؟ هو ماله ؟ مهموم ؟ متضايق ؟ فيه ايه ؟ ليه حنت عليه ؟
جميله بهدوء : هو انت مالك ؟ ايه اللي مضايقك كده ؟
فهد استغرب سؤالها والطريقه اللي نطقت بيها السؤال ومعرفش يرد فعطاها ظهره وحط ايديه في جيوبه وبص من شباك مكتبه وهيا اتجرأت وقربت منه
جميله : عمتك كانت هنا وحضرتك نزلت معاها وراجع كده في حاجه حصلت لحد من عيلتك !
فهد بصلها باستغراب لانها اول مره تتكلم باللهجه دي معاه ! كان متخيل انها زيه من صخر ما بيلنش ابدا ! بس هل هو من صخر ؟ ولو من صخر ليه منظر جدته مجننه بالشكل ده ! وليه كلام الشغالات مأثر فيه كده ! ليه هو مش من صخر فعلا !!
جميله اتأثرت بصمته وفكرت ان ده ابن عمتها مش خصم لها ومش عدو هيا عايزه تكسبه هو
اتجرأت وحطت ايدها علي كتفه بهدوء
جميله : اقدر اساعدك بأيه !
فهد هنا بص لايدها باستغراب على كتفه ورجع لطبيعته وبص لايدها ولف نفسه لها ورجعت نظره الكبرياء لعنيه : تطلعي ايه انتي علشان تساعديني !
جميله كمان رجعت لطبيعتها : ايوه كده ارجع لطبيعتك لانك كنت بدأت تصعب عليا وشويه وكنت هصدق انك بني ادم طبيعي
فهد : لا وفري شفقتك لحد يستاهلها واتفضلي من هنا انا مش فايقلك
جميله راحت لمكتبه وحطت الورق عليه وطلعت قلم من علي مكتبه وفتحته فوق الورق : ده ورق المفروض يتبعت النهارده للشركه العالميه في باريس وما ينفعش يتبعت من غير امضتك عليه ولازم يتبعت النهارده فياريت تخرج من الحاله اللي انت فيها دي وتيجي كده زي الشاطر توقع عليه بدال ما تخسروا المشروع قبل ما تكسبوه اصلا وساعتها ولا مامتك ولا اعمامك هيرحموك
فهد : وانتي متخيله اني هخاف من امي او اعمامي ولا ايه ؟
جميله : مش من الذكاء انك تقف في وش الريح ساعات بيكون الذكاء انك تستني لما تعدي بدال ما تخسر
فهد بصلها وحس ان كلامها ده مش من فراغ ومش عارف ليه افتكر ميس وعلاء وهما بيتكلموا ورنت جمله علاء :
لميه شويه بدال ما نلمه احنا ونخليه يحصل اللي قبله
بصلها شويه وبعدها راح لمكتبه وقعد عليه وبدأ يتكلم معاها في الورق وهو بيقلب فيه .. كان بيسألها عن حاجه مش واضحه فاضطرت تقرب منه علشان تشوفها ولما قربت شم برفانها وهنا افتكر وهيا في حضنه .. غمض عنيه للحظه وافتكرها وهيا بين ايديه مستخبيه كلها جواه وابتسم للذكري.. جميله لاحظت انه مش مركز معاها ولاحظت ابتسامته دي وكانت بصاله قوي وهو فتح عنيه وبصلها
كانوا قريبين قوي من بعض وعنيهم في عنين بعض ولحظه صمت بينهم .. فهد عنيه بتلقائيه نزلت لشفايف جميله واستغرب وسأل نفسه ياتري ده لونهم طبيعي ولا هيا بتحط عليهم ميكب !!
قرب قوي منها واختلطت أنفاسهم من قربهم قوي وجميله عايزه تبعد وبتحاول تفكر في اي شيء ممكن يبعدها عنه بس عقلها عاجز تماما عن التفكير ..
فهد كمان عايز عقله يشتغل بس عقله مش مطاوعه ابدا واخيرا بقي مفيش فاصل بينهم نهائي افتكر ميس وجميله و وليد وحاجات كتيره مرت قدامه ومن غير ما يبعد عنها
فهد : هو ده اللي انتي عايزه توصليله هنا في الشركه دي ؟
جميله بعدت للحظه مش فاهمه هو قال ايه وبصتله باستفسار
فهد مسك دقنها بايده ثبتها قدامه : بقولك ده اللي انتي عيزاه ! انا ؟ عايزه توصليلي انا ! تمثيلك وشغلك و و و بس علشان توصلي لاكبر راس هنا صح ؟ علاء ايه مش كفايه ؟ عايزه اكبر ! صح ! عايزه تتسلقي من حته موظفه لصاحبه الشركه دي ! ومتخيله ان انا هكون طريقك صح ! كلكم طينه واحده
ضربت ايده وبعدت عنه وهيا مش مصدقه اللي بيقوله ولعنت ضعفها قدامه وغباءها اللي وصلها لده
جميله : انت بتقول ايه !
فهد وقف قصادها : انت فهماني كويس فبلاش تمثيل .. عايزه ايه ! هاه ! مره تقفي قصادي وتغلطي ومره تمثلي الخوف والضعف وترمي نفسك قدامي ومره تمثلي الشرف قدام علاء ومره تمثلي الجديه في الشغل ودلوقتي دور الحنيه ومالك والحوار التعبان ده ودلوقتي تمثلي خوفك علي الشركه ومصلحتها عايزه كل ده تلفتي نظري ليكي .. انا واخد بالي منك كويس قوي وفاهمك كويس قوي
جميله : انت اغبي ما يكون ومش فاهم اي حاجه نهائي
فهد : ممكن فعلا اكون غبي ومفهمتش تلميحاتك بس ملحوقه ولا يهمك وهصلح غلطي وعدم فهمي حالا
وبدون مقدمات وبدون فهم من جميله اتفاجئت بيه بيزقها علي الحيطه وراها وباسها بغل شديد وهيا بتحاول تزقه او تبعده عنها بس مسك ايديها بعنف ثبتهم فوق راسها وبتحاول تقاومه وتقاومه وهو زي ما يكون مليون شيطان في دماغه
بيبوسها بغل وعنف وحقد وكره وكل الاحاسيس اللي جواه طلعها في بوسته ليها فكانت خليط غريب ومره واحده حس ان مقاومتها وقفت وانها ثبتت تماما بين ايديه فاستغرب وبعد عنها شويه وبص لعنيها اللي دموعهم نازلين وهنا عقله اشتغل واستوعب هو عمل ايه ! فساب ايديها بسرعه وبعد عنها ومعرفش ينطق او يتكلم .. بص لشفايفها اللي باين عليها عنفه ووشها الاحمر ودموعها
هنا هيا هربت من قدامه بس وقفها : استني لحظه
وقفت من غير ما تبصله
فهد : ادخلي الحمام اغسلي وشك قبل ما تخرجي شكلك …
معرفش يكمل وهيا ما استنتش وخرجت بسرعه بره مكتبه تجري وعبير حاولت توقفها بس ما وقفتش
بقلم / الشيماء محمد ( شيمووو )
عبير بصت لفهد اللي واقف في الشباك وخافت تتكلم فقفلت الباب بهدوء واستغراب بس فكرت ان فهد طردها من الشركه علشان دخلت عليه ..
فهد في الشباك لمح جميله خارجه من الشركه بتجري وشاورت لاول تاكسي قابلها ورمت نفسها جواه وهو متابعها بعنيه ولعن نفسه ولعن كل حاجه حواليه
فهد بيفكر .. يعني ليه غباءك ده ؟ استفدت ايه كده ! ذنبها ايه دي ! هتعمل زي ميس وتنتقم منها لمجرد ان اسمها جميله ! لمجرد انها شايله اسم اكتر حد بتكرهه في الكون كله ! ذنبها ايه دي تطلع عليها غباءك كده ؟ ومن امتي بتبوس واحده بالشكل ده ولا من امتي اصلا تفكر تبوس واحده ! و يوم ما تبوس واحده يكون غصب عنها !! انت عمرك ما بوست واحده قبل كده اشمعني دي يعني اللي فكرت تبوسها ولا ما فكرتش ولا انت غبي ولا ايه حكايتك ؟؟؟
اه وليه لأ ليه ما تبوسهاش مش ده غرضها ؟ مش هيا بتلعب عليا علشان احبها واقع في غرامها ؟ كلهم كده… كل الستات كده وصوليه .. الستات عباره عن طفيليات بتمسك في الراجل وتمتصه كله وهو مش هيسمح لواحده تمتصه او تستغله او تقرب منه ابدا .. مش هيكون زي وليد الغبي اللي حته شغاله ضحكت عليه ..
بس مش يمكن تكون مختلفه ؟
لا كلهم واحد وبطل بقي تفكير في شيء ما يستاهلش وقتك ابدا ….
مضي الورق وطلب سالي تتصرف وتشوف حد يبعته للشركه وهو انسحب من الشركه خالص ..
تاني يوم انتظر ظهور جميله بس ما ظهرتش وميس هتتجنن ومش عارفه هيا فين وموبيلها مقفول ..
ميس راحت لفهد مكتبه
ميس : هتجنن ! يعني غابت ازاي ؟ وليه ؟ طيب حد زعلها ! وبعدين يا فهد اتصرف
فهد : اتصرف اعمل ايه ؟
ميس : طيب انت زعلتها ؟
فهد افتكر بوسته لها وعنفه معاها وسكت
ميس زعقت : فهد
فهد : لا مزعلتهاش
ميس : يبقي علاء .. انا هروح اشوفه هبب ايه
ويدوب هتخرج قابلت علاء وسالي داخلين عند فهد
ميس : انت عملت ايه ؟
علاء باستغراب : عملت ايه في ايه ؟
ميس : ما تستعبطش عليا
علاء : والله ما فاهم طيب
ميس : جميله !! زعلتها ومشتها صح ؟
سالي بفرح : في داهيه اخيرا
ميس بصتلها وهيا سكتت بس فرحانه
ميس : عملتلها ايه ؟
علاء : طيب ورحمة نسمه ما كلمتها من يوم العزومه ولا شفتها اصلا
ميس بصت لفهد : امال ايه طيب ؟ فهد اتصرف اعمل حاجه ..
فهد وقف واستأذن ومشي ومحدش عارف هيعمل ايه ! خرج من مكتبه وراح مكتب تاني وبعدها نزل من الشركه …
جميله رجعت البيت تعيط في حضن عمتها ومحدش فاهم مالها ابدا وفضلت عمتها الليل كله جنبها
النهار طلع وجميله رفضت تروح الشغل
وحبست نفسها في اوضتها
عماد : هيا مالها !
جميله : مش عارفه ما اتكلمتش ابدا
عماد : طيب حاولي تعرفي فيها ايه ! ولو ما اتكلمتش قوليلها مفيش شغل تاني وترجع الجامعه
جميله : ما انا قلتلك بلاش قلتلي سيبيها
عماد : مش وقته المهم شوفي مالها
دخلت جميله عند بنت اخوها ولقت وليد معاها بيحايل فيها وبيهزر معاها
وليد : خلصتي صلاه اهو قومي اقلعي اسدالك ويالا نشرب الشاي مع بعض يالا بقي وبطلي غلاسه وقوليلي مين ضايقك وانا الطشهولك
عمتهم : يا بنتي قومي واسمعي كلام اخوكي
وليد : طيب بما انك مش هتقومي بالذوق يبقي بالعافيه
جرس الباب ضرب وفتح عماد الباب ولقي قدامه فهد .. شاب طويل عريض نسخه من وليد وقلبه دق بسرعه واتوتر واتمني يضمه بس هيفسر ده بايه وبص بتلقائيه لباب اوضه بنته لاخته تخرج ويشوفوا بعض وبص لفهد ومش عارف يعمل ايه او يقول ايه !
هنا الباب اتفتح وخرج وليد شايل علي كتفه جميله وهيا بتضرب فيه وهو بيضحك وبيغلس عليها .. فهد بصلهم قوي وكشر جدا .. معني انه معاها في البيت ان علاقتهم رسميه .. علشان كده زعلت قوي .. علشان هيا مملوكه لحد تاني ..
عماد واقف في النص و وليد شايل جميله ولمح الباب واللي واقف في الباب ووقف هو كمان وتنح وهنا جميله نزلت وبصت للباب واتفاجئت هيا كمان بفهد واقف وبعدها الكل بص ناحيه الباب علشان جميله امه خارجه وراهم حتي فهد كمان بص زيهم للباب ومنتظر يشوف ليه الكل بيبص للباب ….
بقلم / الشيماء محمد ( شيمووو )
ونكمل بكره
توقعاتكم
فهد هيعمل ايه ؟
جميله هتسامح وترجع الشغل ؟
فهد هيستني يشوف امه ؟ هيعرف مين هو وليد ؟ ياتري اي اللي جاي !
شيموووووو
رواية جميله الجزء الثاني للكاتبه شيمو
الحلقه الخامسه
وليد بص للباب شاف فهد فبسرعه وقف قدام اخته اللي واقفه ب بجامه وشعرها مش مترتب وهيا باصه للباب بتفكر في عمتها لما تخرج بس لما وليد وقف قصادها استوعبت فرجعت للباب اللي وراها وقبل ما عمتها تخرج زقتها ودخلت وقفلت الباب بسرعه
فهد كمان لما وليد وقف قدام جميله رجع لوري وبعد وشه عن الباب
الموقف كله عدي بسرعه والكل متوتر ومحرج ومحدش عارف يتكلم نهائي ..
اخيرا عماد نطق : خير يا ابني !
فهد : خير ان شاء الله .. انا فهد نصّار
عماد قلبه دق بسرعه واتمني لو يضم ابن اخته وقلبه اتعصر ان فهد ما قالش اسم وليد بس فهد نصّار .. ياتري مجرد تعود انه يقول اسم العيله علي طول ولا قاصد يحذف اسم ابوه !!
وليد هنا وقف قدامه : نعم ! مين يعني فهد نصّار !
عماد كان هيتكلم بس افتكر انهم المفروض ما يعرفوش هو مين !
فهد بغيظ منه : انا صاحب شركات نصّار للاجهزه الطبيه اللي الباشمهندسه شغاله فيها
وليد : اه .. طيب خير !
فهد اتضايق جدا من برود وليد واتمني لو يسأله انت مين وبتعمل ايه هنا وبأي حق بتسألني ! بس عماد اتدخل : عيب يا وليد اتفضل يا ابني نتكلم جوه مش علي الباب
فهد بيبص لوليد وهو داخل : متشكر جدا لذوق حضرتك
دخل وقعد ورفع نظارته علي دماغه وبص حواليه
وليد بغلاسه : ايه البيت مش قد مقام فهد باشا نصّار ولا ايه ؟
فهد ماردش لان عماد اللي رد : وبعدين يا وليد !! يعني مش فاهم انت مالك النهارده !
فهد بصله من فوق لتحت واتمني يعرف ده مين ؟
جميله دخلت بسرعه وزقت عمتها لجوه الباب
عمتها : في ايه يا بت مالك ؟ مين اللي جه ودخلتي تجري بسرعه كده ليه ؟ طيب خرجيني !
جميله قلبها بيدق بسرعه وبتنهج وحاطه ايدها عليه بتحاول تهديه
عمتها : يا بت في ايه مالك ؟ اوعي خرجيني
جت تخرج بس جميله جريت ووقفت علي الباب وسندت عليه بظهرها وباصه لعمتها
عمتها : في ايه ومين اللي بره ! جميله ردي
جميله : فهد ….. فهد هو اللي بره
عمتها ابتسمت وكشرت ودمعت واتلخبطت ومبقتش عارفه تعمل ايه ! تعيط ولا تضحك ؟ ابنها بره ! اخيرا هتشوفه بنفسها !
عمتها : اوعي من الباب
جميله : عمتو انتي واثقه ارجوكي ما تكونيش عاطفيه .. ممكن يعرفك !
عمتها : يا ريت يعرفني اوعي يا جميله من قدامي
جميله : عمتو بس اهدي ممكن تفتحي الباب وتشوفيه بس بلاش تتواجهي معاه
فهد : يا بنتي لما بعدت عنه كان لسه عيل مش هيفتكرني ابدا .. ابعدي بقي
جميله مسكتها
عمتها : في ايه تاني ؟
جميله : البسي طرحه المفروض انه غريب عنك ولا ايه !
عمتها بصت حواليها بتوهان فجميله جابت طرحه وعطتهالها وهيا رتبت نفسها
جميله : ينفع اخرج انا الاول وبعدها تيجي بحيث يكون في سبب تخرجي علشانه !
عمتها قعدت مكانها : بسرعه
وليد خبط عليها ودخل : عايزك بره .. واد تنك والله لولا انتي يا عمتو كنت عرفت اوريه التناكه دي اخرتها ايه !
عمته : تربيه ميس عايزو يكون ايه !
جميله خرجت مع وليد وراحت الصالون عندهم : السلام عليكم
فهد رد السلام ومكنش عارف يقول ايه
جميله قعدت قصاده : خير اتفضل
فهد : مجيتيش الشركه ليه النهارده ؟
جميله بصتله بحده وسكتت : تعبانه
فهد بهدوء : انا شايفك كويسه
وليد اتدخل : طالما قالت لحضرتك تعبانه يبقي تعبانه ولا هو نظام سخره !
عماد : وليد ياريت ما تدخلش حضرتك ..
هنا عمتهم دخلت وعنيها علي ابنها ونفسها تضمه او تحضنه ومش عارفه تعمل ايه ؟عينيها مركزه عليه والكل وقف في دخولها هيبه للموقف وفهد كمان وقف معاهم.. اول مره تشوف ابنها من اكتر من عشرين سنه .. وهيا مركزه معاه اتكعبلت في شنطه اوراق وليد اللي في الارض ووقعت قدام فهد بس لحقها فوقعت بين ايديه او في حضنه .. غمضت عنيها في حضنه واخدت نفس طويل علشان تحفظ ريحته ومسكت هدومه وهو استغرب احساسه جدا وارتبك وحاول يعدلها براحه وعنيهم اتعلقوا في نظره هو مفهمهاش .. لمح دموع معرفش سببها ابدا
فهد بارتباك : حضرتك كويسه !
اضطرت تقف وتسند نفسها لان رجليها مش شيلاها ابدا فابتسمت وهزت دماغها : اه … اه كويسه
فهد بصلها كتير في احاسيس ملخبطه .. ليه الست دي ملخبطاه كده ! زي ما يكون شافها قبل كده ! دي مش اول مره يشوفها
وليد علشان يغطي علي الارتباك ده جري علي عمته مسك ايدها وباسها : حقك عليا عمتو ديما تزعقيلي وتقولي ما ارميش الشنطه في الارض وللاسف ديما برميها ..
عماد : حصل خير شيل شنطتك
جميله : عمتو حضرتك كويسه !
عمتها بابتسامه : اه يا حبيبتي
فهد هنا سأل بفضول : بما انها عمتكم انتو الاتنين فهل ده معناه انكم اخوات !
وليد بتريقه : ياه علي الفصاحه عرفتها لوحدك!
فهد ردد : جميله و وليد !! اسمين غريبين ! ليه الاسمين دول بالذات !
كلهم بصوا لبعض والمفروض انهم مستعدين لسؤال زي ده !!
اخيرا عماد رد : حمايا كان اسمه وليد ومراتي الله يرحمها اصرت تسمي علي اسم ابوها
فهد : وجميله ؟
عماد ابتسم : كانت زي القمر اول ما اتولدت وكل اللي كان بيشوفها بيقول الله جميله قوي ومن هنا طلع اسم جميله وسميتها جميله !!
فهد فضوله كان من الاسمين واجابه عماد ما اقنعتوش ابدا .. جميله و وليد .. يا تري دي مجرد صدفه ! ابوه وامه ! بس هنا جميله و وليد اخوات مش عشاق .. معقوله كل ده صدفه .. جميله و وليد ؟ الست دي عمتهم ! ايه حكايتها ؟
فهد : هو حضرتك اسمك ايه !
عماد ارتبك بس وليد جاوب بسرعه : عادل !! اسمه عادل واعتقد انك عارف ده !
فهد ابتسم : بتأكد بس
بقلم / الشيماء محمد ( شيمووو )
جميله اتضايقت من غباء اخوها اللي ريح فهد لانها مكنتش عايزاه يعرف دلوقتي ان وليد اخوها اما فهد فابتسم بغموض وهيا اتضايقت جدا
عمتها وقفت : تشرب ايه يا ابني !
فهد : لا ولا حاجه معلش انا متأخر علي شغلي هما كلمتين للباشمهندسه وهمشي علي طول
عمتها : اولا ما ينفعش تدخل بيتنا وتخرج كده وبعدين انا هعمل للعيال دي اصلا .. وليد وجميله قهوتهم زياده وانت ؟ ومش هقبل رفض ابدا
فهد ابتسم : قهوتي ساده
جميله عمتهم : ليه يا ابني ساده ؟
فهد : بحب طعمها المر
جميله امه اتضايقت من الجمله دي ودخلت من قدامهم تعمل القهوه ولقت نفسها بتعيط . ليه بيحب المر ؟ اكيد داقه كتير واتعود عليه ..
عملت القهوه ومسكت الصينيه وجملته بتتردد في ودانها مره وري مره
(( بحب طعمها المر ))
مره واحده حدفت الصينيه من ايديها بوجع والصينيه وقعت والفناجين اتكسرت وصوتها كان عالي .. وهيا قعدت في الارض
الكل بره سمع الصوت فقاموا جري عليها
جميله ووليد جريوا علي عمتهم في الارض بحب وبلهفه واخوها عماد واقف في الباب وفهد وراهم مستغرب من تصرفاتهم دي .. جو العيله ده جديد عليه ما يعرفوش ابدا …
وليد : عمتو انتي كويسه
جميله : حبيبتي مالك فيكي ايه !
عماد : فيكي ايه ؟ تعبانه نطلب دكتور ولا ايه ؟ طمنينا عليكي
جميله وقفت وبصت لفهد : انا كويسه جدا ما تخافوش .. الصينيه بس وقعت .. مالكم في ايه ؟
جميله الصغيره : خدت الشر وراحت .. ارتاحي انتي وانا هعمل القهوه
عمتها ابتسمت وضغطت علي ايديها : انا هعملها اطلعوا انتو كلكم .. قلقتوا الراجل يقول علينا ايه !! اطلعوا بره كلكم
خرجوا كلهم وجميله عملت شاي مش قهوه وحطت فيها سكر ونعناع
جميله : اي ده ! شاي ؟ بس هو قالك قهوه يا عمتو
عمتها بصت لفهد بحب هو حسه واستغربه : هو صغير علي القهوه الساده وطعمها المر .. هيشرب معانا شاي بالنعناع وفي شركته ولا بيته يبقي يشرب قهوته المره
مدت ايدها بكوبايه الشاي لفهد : هتكسف ايدي ؟
فهد بتلقائيه مد ايده واخد منها الكوبايه واخد اول رشفه منها وابتسم لها وهيا ابتسمتله وفرحت جدا انه مكسفهاش
جميله الكبيره : وليد !! مش وراك شغل ؟ قوم يا حبيبي اتأخرت علي شغلك يالا .. عادل عايزاك في كلمتين تعال .. حبيبي فهد انت في بيتك وياريت اللي زعل جميله امبارح تشوف ايه سببه وتصلحه .. انا عندي ثقه فيك يا ابني
فهد ابتسملها وحس بحاجه غريبه ناحيتها.. حاجه ملهاش تفسير ابدا ..
قعدت جميله قصاده وبعد ما الكل خرج
فهد : بقي ده اخوكي ؟
جميله بغيظ : ايوه عندك مانع !
فهد : لا طبعا بس غريبه ان اسمه وليد
جميله اتوترت وحاولت تتوهه في سكه تانيه : غريبه ليه بقي ان شاء الله ؟ اه علشان والدك اسمه وليد فما ينفعش حد في الكون ده يشيل نفس الاسم صح !
فهد : ايوه برافو عليكي .. الغريبه اسمكم انتو الاتنين مع بعض يا فصيحه ..
جميله : جميله ووليد مالنا بقي ان شاء الله حتي مامتك اسمها ميس ومفيش اي جميله في عيلتك ولا ايه !
فهد مش عايز يكشف قدامها اكتر من كده فغير الموضوع وقام قرب منها شويه
جميله بحده : حافظ علي مسافه بينا لو سمحت
فهد قلع نظارته من فوق دماغه : سيبك بقي من قصه الاسماء دي واهديلي كده شويه خلينا نتكلم
جميله بغيظ : عايز ايه !
فهد : انتي عارفه انا جاي ليه كويس فبلاش لف ودوران
جميله بحده : عايز تقول ايه بعد اللي عملته ؟ هتبرره بايه ؟ وازاي ؟
فهد : مش هبرره ومش هتكلم عنه
جميله : امال سيادتك جاي هنا ليه ؟
فهد : علشان ترجعي الشغل
جميله وقفت : اسفه مش هرجع .. مش الشركه بتاعتك وانت مش عايزني فيها خلاص ارتاح بقي
فهد : ميس قالبه الدنيا عليكي
جميله : اه وعلشان كده سيادتك جاي علشان مامي شاورت
فهد بغيظ : ايوه علشان مامي شاورت وسيادتك هتنفذي فاهمه
جميله بتحدي : لا مش فاهمه ووريني هتجبرني ازاي ارجع شركتك
فهد : بلاش انتي مش قدي
جميله : لا وريني .. هاتلي اخرك
فهد : انتي مش قد اولي فما بالك باخري
جميله : هتعمل ايه يعني ؟ هاه ؟
فهد : عيلتك جميله جدا واعتقد انها سعيده
جميله باستغراب : عيلتي ! عيلتي مالها وانت مالك بيها ؟
فهد بحزم : بسهوله اقدر امحي سعاده العيله دي كلها
جميله : ازاي بقي !
فهد : بلاش … يا ترجعي الشغل حضرتك بالذوق يا هخليكم كلكم تقعدوا في البيت وتتمنوا اي شغلانه ولو حتي تمسحوا عربيات ..
جميله بعدم تصديق : انت بتقول ايه ! انت فاكر نفسك مين ؟
فهد وقف : انا فهد نصّار ولسه ما اتخلقش اللي يقف في وشي … يا ترجعي الشغل بالذوق يا هقعد ابوكي واخوكي جنبك وياريت ما تضطرينيش اعمل حاجه زي دي لاني معجب بعمتك وبأخوها وبطيبتهم فبلاش تجرحيهم واكون انا السبب
جميله : انت ما تقدرش تعمل حاجه !
فهد لبس نظارته : بكره الصبح الاقيكي في مكتبك وتتصلي بميس تبلغيها انك تعبانه جدا وانك بكره هترجعي …
جميله : انا هرجع بس عندي شرط
فهد : هترجعي ومن غير شروط
جميله : انت مديونلي باعتذار
فهد ابتسم : انا ما بعتذرش لحد واكيد مش هعتذر لما اعمل شيء يعجبني ولو حبيتي تكرريها معنديش مانع
جميله بغيظ رفعت ايدها تضربه يمكن تشفي غليلها بس هو مسك ايدها وحطها وري ظهرها وده قربها منه جدا وبصلها من فوق : لسه ما اتخلقتش اللي تمد ايدها علي فهد وبعدين عمرك سمعتي عن قطه غلبت فهد !! العبي يا شاطره مع قطه زيك لانك مش قد الفهد ابدا .. وخلي بالك ليفترسك
ساب ايدها وخرج بره وهو ماشي قابلته جميله مامته : بسرعه كده !
فهد : معلش هيا هتريح النهارده وبكره ان شاء الله هترجع الشغل .. فرصه سعيده حضرتك …
مشي خطوه بس ضربت في دماغه فكره فرجع وبص لجميله
جميله مامته : خير محتاج حاجه !
فهد : لو وليد ابن اخو حضرتك محتاج شغل او زهق من شغله شركتي مفتوحه له وبالراتب اللي يعجبه
جميله ابتسمت لابنها : تسلم يا حبيبي علي عرضك بس العبره مش بالفلوس
فهد باستغراب : وهيا الدنيا فيها ايه غير فلوس او تمشي ازاي من غيرها !
جميله : تمشي بالحب والسعاده … الحب يسعدك ويعيشك ملك لكن الفلوس ما تشتريش اي حاجه مهمه ابدا
فهد بتريقه : ايه اللي الفلوس ما تقدرش تشتريه .. الحب ؟ بالفلوس تشتري اي واحده مهما كانت المهم بس تعرف تتمنها وتعرف سعرها ايه ! الصحه ! الفلوس تقدر برضه تشتري الصحه ايه تاني المهم !
جميله ابتسمت وقربت منه : الحب عمرك ابدا ما تقدر تشتريه بالفلوس .. اه ممكن تشتري واحده لكن ما تشتريش قلبها ابدا .. دقه القلب لحبيبك كنوز الدنيا ما تشتريهاش … سعادتك لما يكون بين ايديك كل ملايينك رخيصه جنبها .. حضن حبيبك بالدنيا وما فيها
فهد ابتسم : اهو ده الكلام اللي ما بيأكلش عيش ابدا .. ده كلام اشعار وبس بيضحكوا بيه علي الناس اللي معهاش فلوس
جميله : انا عشت الحب ده .. وكان غانيني عن الدنيا واللي فيها
فهد بتريقه : وفين بقي حبيبك ده مش شايفو ليه ؟ ايه اللي ممكن يكون بعده عنك طالما حضنه بالدنيا واللي فيها ؟ ايه اهم منك يروحله ويسيبك ؟
جميله بحزن : ايه اللي ممكن يفرق عشاق غير الموت !!
فهد اتصدم ومعرفش ينطق ومعرفش يقول ايه وسكت
جميله طبطبت عليه : انت لسه صغير وما شفتش حاجه من الدنيا وبكره تحب وتعرف وتفهم انا قصدي ايه !
فهد : انا ممكن اكون صغير سنا في نظرك بس انا شفت كتير وقابلت اكتر ولأ عمري ما هحب ولا عايز احب اصلا .. ولا شايف ان في حد يستاهل يتحب اصلا
جميله : سيب الايام تحكم
فهد : هسيبها تحكم ولو اتقابلنا تاني هفكرك
جميله ابتسمت : اتمني نتقابل تاني
خرج من عندها متلخبط جدا وكلامها كله بيرن في دماغه وراح الشركه وميس قابلته بعاصفه : عرفت هيا فين ؟
فهد : بكره هتكون موجوده ما تقلقيش
هديت شويه وبعدها استغربت عرف منين راحت وراه علي مكتبه وهو قعد وسرحان
ميس : انت عرفت منين وكنت فين !
فهد : امي بلاش اسئله كتيره اذا سمحتي
ميس : حاضر بلاش بس انت مالك !
فهد بتوهان : تعرفي ان جميله عندها اخ !
ميس باستغراب : ودي فيها ايه !
فهد : اسمه وليد .. اخوها اسمه وليد
ميس استغربت وسكتت شويه : تقصد ايه ! بتفكر في ايه يا فهد !
فهد : بفكر اجيبه هنا الشركه هو كمان
ميس : تجيبه ليه !
فهد : هديه ليكي يا ست الكل ( قام وباس ايدها ) الاتنين يكونوا تحت ايديكي والاتنين بيحبوا بعض والاتنين تأمريهم زي ما انتي عايزه .. ايه رأيك !
ميس فكرت شويه وتخيلت جميله ضرتها ووليد جوزها والاتنين تحت ايديها وضحكت
ميس : هديتك مقبوله حبيبي .. بس يا فهد هل ده مجرد صدفه ! الاسمين دول مع بعض !
فهد : اهو ده اللي بفكر فيه ! المهم استمتعي انتي بهديتك وسيبيلي انا القلق اوك
ميس ابتسمت لفهد وخرجت من عنده مبسوطه اما هو فكر كتير وقام خرج من مكتبه وراح علي مكان تاني .. وقف قدامه بعربيته وبص للعنوان .. يزيد للامن والتحقيقات الخاصه …
نزل ودخل وقابل مدير الشركه اللي هو يزيد كان شاب في عمره تقريبا
فهد دخل ويزيد استقبله
يزيد : اهلا بحضرتك باشمهندس فهد خير
فهد : حضرتك تعرفني !
يزيد : اصغر مدير لشركات نصّار للاجهزه الطبيه واكبر مجموعه في الشرق الاوسط وابن رجل الاعمال المعروف وليد نصّار الله يرحمه .. لازم اكون عارفو
فهد ابتسم : بس حضرتك برضه صغير علي شركه زي دي
يزيد ابتسم : انا زي زي .. حضرتك مسكت شغل والدك وانا كمان مسكت شغل والدي .. ندخل في المهم ؟
فهد : ندخل في المهم
فهد طلع صوره وعطاها ليزيد
يزيد : المطلوب ؟
فهد : دي اسمها جميله عادل مجرد موظفه في شركتي اسمها وعنوانها علي ظهر الصوره
يزيد : ولما هيا مجرد موظفه ؟
فهد : عايز اتأكد هيا فعلا مجرد موظفه ولا لها غرض تاني من شغلها عندي ؟ لها اخ اسمه وليد وعندها عمتها ما اعرفش اسمها ايه و والدها اسمه عادل
يزيد : عايز تعرف اصلها ؟
فهد : عايز كل حاجه عنها والاهم كل حاجه عن عيلتها وخصوصا عمتها دي ..
يزيد : ده شيء سهل جدا
فهد : عايز في اقرب وقت المعلومات دي
يزيد : ادينا ٤٨ ساعه وباذن الله هيكون عندك ملف كامل عنها ..
فهد : تمام منتظر منك الملف وعلي لقاء اخر
قام خارج وقابل حد داخل بس تجاهله وخرج ومشي
يزيد وقف يستقبل اللي دخل : بابا ازي حضرتك نورت الشركه
ابوه : مين ده اللي خرج دلوقتي ؟
يزيد : ده فهد نصّار ابن صاحبك الله يرحمه وليد نصّار مش انت كنت البودي جارد الخاص بتاعه !
اكرم : الله يرحمه .. بجد ده فهد ابنه !كبر وبقي شبه ابوه قوي .. فعلا اللي خلف ما متش زي ما بيقولو .. بس ده كان عايز ايه ؟ عايز بودي جارد ولا ايه ؟
يزيد : لا صراحه عايز طلب غريب ( وري الصوره لوالده ) دي موظفه اسمها جميله ولها اخ اسمه وليد وعايز يعرف اصلهم ويعرف كل حاجه عنهم
اكرم اخد الصوره وبصلها كتير ووقف
يزيد : رايح فين ؟
اكرم : هقولك بعدين المهم دلوقتي اطلعلي انت بره الموضوع ده تماما .، هفهمك كل حاجه بس خليني اتأكد الاول من حاجه كده
يزيد : طيب وفهد ؟
اكرم : بالليل هفهمك سلام .. وما تتكلمش مع فهد واوعي تقوله اي حاجه
يزيد : وهو انا فاهم حاجه علشان اقوله !!
سابه ونزل بسرعه
***************
جميله اترددت كتير وبالليل عمتها معاها
عمتها : مش هتقوليلي في ايه بقي وزعلتي ليه ؟ وبعدين ما جالك لحد هنا يصالحك !
جميله بحزن : جه يهدد مش يصالح
عمتها : لان دي اللغه اللي بيعرف يتكلم بيها بس هو جه يصالح
جميله : وانتي ايش عرفك ! وبعدين انتي مش فاهمه حاجه يا عمتو
عمتها : طيب فهميني
سكتت جميله وما ردتش
عمتها : فهد جه النهارده يرجعك الشغل .. معني كده انه عايزك معاه بغض النظر بقي هو هيرجعك ازاي المهم النتيجه
جميله زعقت : يا عمتو ده هددني انه هيطرد وليد وبابا من اشغالهم ويخلينا كلنا نشحت
عمتها : طيب ايه رأيك انه قالي انه عايز وليد كمان يشتغل معاه في الشركه !
جميله : علشان نكون كلنا تحت ايديهم وسيطرتهم .. يا عمتو بطلي طيبتك دي بقي
عمتها : لا مش هبطلها ابدا وبكره تشوفي بنفسك
جرس الباب رن وقامت جميله الصغيره تفتح الباب وفتحت لقت حد قدامها ما تعرفوش
جميله : خير !
اكرم : انتي باشمهندسه جميله ؟
جميله باستغراب : ايوه انا !
اكرم : والدتك هنا !
جميله : والدتي ! والدتي متوفيه من اكتر من عشر سنين
اكرم باستغراب : طيب والدك ؟ الاستاذ عادل
جميله : حضرتك مين وعايز ايه ؟
عماد طلع : مين يا جميله ؟
اكرم بصله وابتسم : ده انا !! انا يا عماد
عماد بصله كتير مش مصدق وبعدها خرج بسرعه سلم عليه ودخله وفضلوا يتكلموا كتير
جميله : ايه مش ناويين تعرفوني !
عماد : نادي علي عمتك روحي
جميله : طيب اقولها مين ؟
عماد : ما تقوليش روحي
جميله نادت علي عمتها اللي اول ما شافت اكرم ابتسمت وعنيها دمعت واكرم سلم عليها باحترام شديد
اكرم : اعذريني اني مقدرتش اساعدك زمان
جميله عمتها : وانت كان في ايدك ايه يا اكرم ومعملتوش .. هما لعبوها صح
جميله : لا انتو لازم تفهموني
اكرم بصلها : انتي بقي جميله اللي مجننه فهد بيه ومخلياه يلف حوالين نفسه !
كلهم هنا بصوله باستغراب
اكرم : انا هحكيلكم
حكالهم بالتفصيل كل اللي حصل
جميله : قولتلك يا عمتو بلاش تخليه يشوفك
اكرم : المهم دلوقتي انتو ناويين علي ايه !
عماد : انت ما ينفعش تقوله حاجه
اكرم : ماهو لو احنا مقولناش حاجه هيشوف غيرنا
جميله : يبقي احنا نقول اللي عايزين نعرفهوله بس ونخليه يطمن لشركتكم بحيث ما يدورش علي شركه غيركم
اكرم : برافو عليكي .. ده فعلا اللي لازم يتعمل .. لازم نلغي اي افكار من دماغه تماما والحمد لله اننا شركه مرموقه ومن اكبر شركات الامن في البلد فمش هيدور علي غيرنا
جميله عمتها : انا متشكره يا اكرم ليك والحمد لله فعلا انه جالكم انتو .. مش لازم فهد دلوقتي يعرف حاجه عننا .. لازم الاول نعرف ميس برمجته ازاي .. لازم نعده انه يعرف الحقيقه وينقبلها ويعترف هو بيها ..
جميله : لازم فهد يعرف الحقيقه بنفسه مش حد يقولهالو لازم هو يمشي الطريق خطوه خطوه الاول ..
عمتها : يبقي انتي لازم ترجعي الشركه وتكملي مشوارك يا جميله
رجعت جميله الشركه بعد تفكير عميق بس اقنعت نفسها انها رجعت علشان عمتها ما تزعلش منها
فهد شافها في الاجتماع وابتسم بخبث وانتصار وهيا معديه من وراه همس : رجعتي ؟
جميله تجاهلته وقعدت مكانها لحد ما الاجتماع خلص والكل خرج
ميس : لمي الاوراق يا جميله وهاتيها مكتبي
خرجت وسابتها لوحدها ولحظه وفهد دخل تاني بحجه موبيله اللي اتعمد يسيبه علي التربيزه دخل وأخدو ووقف يبصلها
فهد : رجعتي ليه !
جميله بتلم الاوراق : عمتو ترجتني ارجع وقالتي طالما جيت لحد باب بيتي فده لوحده اكبر اعتذار لان مفيش مدير شركه يروح لحته موظف عنده الا اذا كان الموظف ده مهم جدا وبصراحه وجهه نظرها اقنعتني فقلت لازم اجي واقعد علي قلبك
اتضايق من كلامها لان فيه شيء من الصحه وهيا خارجه من الباب وقفت وبصتله : وسيادتك مديونلي باعتذار وهاخده منك عاجلا ام آجلا
خرجت وسابته والاتنين تجاهلو بعض تماما
عدي يومين وفهد كلم يزيد اللي حدد معاد معاه وراحله الشركه يزوره
فهد : اتفضل يزيد بيه
يزيد : يا ريت لو ترفع الالقاب وكفايه يزيد
فهد : تمام .. وصلت لايه
يزيد عطاه الملف وفهد قلب فيه
يزيد : مجرد بنت عاديه لاب عادي سافر بره واشتغل وأتجوز وخلف ولد وبنت ومراته اتوفت واخته الارمله اتولت تربيه اولاده
فهد : اخته دي ايه حكايتها !
يزيد : بنت جامعيه بسيطه اتجوزت واحد زميلها في الجامعه بس اتوفي في حادثه وهيا رفضت الحياه بعده وعاشت مع اخوها تربي اولاده ..
فهد : مخلفتش ؟
يزيد : لا مخلفتش ..
فهد: طيب جميله و وليد ايه الاسمين دول
يزيد : والدة جميله ووليد كان اسمها
منى وليد حسين .. فاعتقد ان وليد علي اسم الاب اما البنت فمفيش سبب لتسميتها يعني ممكن تكون هيا جميله فسموها جميله
فهد : طيب في حد في عيلتهم اسمه جميله غيرها ؟
يزيد : لا مفيش
فهد : طيب ابوهم اسمه عادل وعمتهم دي اسمها ايه اصلا !
يزيد : اسمها عايده
فهد : امممم
يزيد : هو في حاجه معينه انت عايز توصلها ؟ يمكن لو قلتلي بتفكر في ايه اساعدك !
فهد اتردد شويه : لا متشكر بس هنفضل علي اتصال
يزيد : انا في الخدمه ديما
*************
امل كانت بتيجي الشركه لسالي وتقعد معاها .. جت كانت سالي مش فاضيه فخلت السكرتيره تقعدها بره تنتظر وشافتها جميله فراحتلها : حضرتك بنت الاستاذ خالد ! واخت الاستاذ آسر صح !
امل ابتسمت بطيبه : ايوه انا
جميله : الشركه كلها نورت .. حضرتك قاعده كده ليه ! دي شركتك
امل : مستنيه سالي وشكلها مشغول
جميله : طيب ينفع اعزمك علي اي حاجه في الكافتيريا لحد ما تخلص ؟
امل : مش هعطلك
جميله : لا ابدا تعالي
اخدتها ونزلت الكافتيريا وفضلوا يتكلموا مع بعض وحست جميله ان امل دي مختلفه تماما عن باقي العيله .. ممكن تكون زي امها .. دردشوا كتير وحبوا بعض من اول مقابله .. بيهزروا وبيضحكوا واتفاجئت امل بصوت سالي وراها : بقي اتأخر عليكي شويه الاقيكي اتلميتي علي البيئه اللي في الشركه ؟ ايه مش بتعرفي تختاري تقعدي مع مين كمان ؟ مش كفايه لبسك اللي مالوش علاقه ببعض ومبينك تخينه جدا كمان ما بتعرفيش تختاري تتكلمي مع مين وما تكلميش مين !
جميله تجاهلت سالي تماما: فرصه سعيده جدا وفي اي وقت تحبي تتكلمي او تكوني زهقانه انا موجوده ..( همست في ودنها ) انتي اجمل ما يكون ما تصديقش كلامها ولا تتهزي ابدا وخليكي واثقه في نفسك
جت تمشي بس اتفاجئت بآسر وفهد واقفين هما كمان
آسر : شكرا ليكي جميله علي اهتمامك
جميله : لا بالعكس اخت حضرتك شخصيه جميله جدا لدرجه تحسها مش منكم
فهد : قصدك ايه مش مننا !
جميله : قصدي ان روحها جميله ..
سالي : انت مهتم تعرف قصدها ايه ليه ؟ يفرق معاك في ايه رأي واحده زيها ! شوفي وراكي ايه روحي مكتبك يالا !
جميله بصتلها من فوق لتحت بقرف ضايق سالي جدا وبعدها راحت تطلب قهوه لنفسها
سالي : شايف الانسانه البارده
امل : بالعكس يا سالي دي لذيذه جدا
فهد تابع جميله وحركاتها وابتسم لكلمه لذيذه لانها فعلا لذيذه في خناقها ..
آسر : هيا فعلا ظريفه
سالي : انتو فعلا اخوات وذوقكم هابط
آسر : ما تتلمي بقي يا سالي واهدي كده
اللي يسمعك يقول غيرانه منها وعلشان كده مش طيقاها
سالي شهقت : انا يا اسر .. انا اغير من دي !! دي !! ليه اجمل مني مثلا !! رد عليا
آسر سكت وما ردش عليها بس بصلها
سالي : بقي كده ماشي يا آسر .. بما انكم كلكم عجباكم المخلوقه دي فأنا ماليش مكان هنا وسطيكم
فهد : ما تبطلي افوره بقي وتتهدي تقعدي دي مجرد موظفه مش عارف انا انتي مركزه معاها قوي ليه وشاغله تفكيرك !
سالي بتريقه : علشان اجمل مني !!
آسر : يوووه يا سالي .. يا بنتي انتي مفيش اجمل منك في الكون ده كله .. هاه مبسوطه كده!!
سالي : عيله انا قدامك بتضحك عليا ، انا غلطانه اني قاعده معاكم
قامت مشيت من قدامهم وامل جريت وراها تحصلها ومشيوا مع بعض ..
آسر جواه : انتي فعلا يا سالي اجمل من في الكون ده كله
فاق علي صوت فهد : عملت ايه في مشوارك النهارده
آسر : كله تمام روحت وقابلته
فهد : قابلت صلاح بنفسه ؟
آسر : ايوه وهتابع معاه من بكره ما تقلقش
فهد : الفلوس كفت الاجهزه كلها اللي كان عايزها ؟
آسر : ايوه وزادت كمان وعايز يرجع الباقي
فهد : لا خليه سيوله معاه علشان يعرف يمشي شغله وانت تابع معاه
آسر : ابويا وعمك وجدودك لو عرفوا مش هيعدوها بالساهل كده ! دول عشره مليون مره واحده
فهد : عارف والموضوع مجرد وقت وهيعرفوا المهم انت ركز مع صلاح في شركته وسيبلي انا عيلتك الجميله دي !!
آسر بتردد : هو انا ينفع اسألك سؤال ؟
فهد بصله : طبعا انت بتسأل يا آسر
آسر : انت ليه مش عايز ماما تاخد تيته عندها البيت ! يعني مش ممكن صحتها تتحسن في البيت عن الدار !
فهد اتضايق وسكت شويه وبعدها وقف وآسر وقف كمان : تيته محدش اتظلم منها غير انا وامي ميس .. هيا بتدفع تمن اخطاءها مش اكتر
آسر : بس انت يا فهد بتسمع
قاطعه فهد : آسر اذا سمحت انت عشت حياتك وسط ابوك وامك واختك وعشت حياه عائليه جميله مليانه حب فما تحكمش عليا وعلي حياتي .. اذا سمحت .. بعد اذنك ورايا مشوار مهم
طلع علي مكتبه وفضل فيه واخر النهار مروح كان الكل مشي وهو نازل لمح جميله علي مكتبها مركزه قوي فابتسم وحب يضايقها فراح لسكينه الكهربا ونزلها وخلي الشركه كلها بقت كحل
جميله اول ما النور اتقطع قلبها دق بسرعه حسست علي المكتب لحد ما لقت تليفونها فنورته بسرعه وبتقري ايات قرآن كتير
وقفت علي باب المكتب ونادت : عم صبحي ! عم صبحي انا لسه هنا .. عم صبحي
صوتها كان بيرن وانفاسها عليت والخوف سيطر عليها بصت حواليها الكراسي والمكاتب بيتهيألها ان كلهم اشباح ..
جميله لنفسها بصوت مسموع :
جميله جمدي قلبك النور اتقطع ولا اكتر ولا اقل .. خدي شنطتك وامشي بهدوء .. اقري أية الكرسي وبس وكل حاجه هتكون كويسه
فهد ابتسم وهو واقف متابعها ومبسوط من رعبها ده .. شافها بتاخد شنطتها وخارجه من باب المكتب فبص حواليه وراح موقع كرسي علي الارض واستخبي
جميله قلبها كان هيقف من الرعب ونورت شافت الكرسي علي الارض
جميله برعب وبصوت مهزوز : مين هنا ؟؟ مين !
دموعها نزلت وحست انها مش لوحدها فهد قرب عليها وشدها من طرحتها وهنا جميله صرخت برعب واغمي عليها من الخوف
فهد ما تخيلش ابدا رد فعلها ده ومسكها بسرعه : انتي يا بنتي .. جميله .. انا فهد
كان بيحاول يفوقها بس مفيش فايده مسك تليفونها وشالها واخدها مكتبه ونومها علي الكنبه وجري بسرعه فتح سكينه الكهربا ورجعلها وبيحاول يفوقها .. جاب برفانه وبدأ يفوقها لحد ما فتحت عنيها واتعدلت تصرخ وتضرب في اللي قدامها وفهد بيحاول يهديها وهيا بتصرخ وبس .. مسك ايديها وثبتهم : انا فهد اهدي بقي .. اهدي
جميله بصتله واتنفست مره وري مره وفتحت في العياط علي صدره وهو ماسك ايديها زي ماهو ومش عارف يعمل ايه او يقولها ايه ! بس سايبها تعيط ..
فهد : اهدي خلاص .. اهدي
ساب ايديها وهيا هديت وبعدت عنه وبتمسح دموعها بايديها
قام فهد وجاب منديل وعطاهولها وجاب كوبايه ميه وهيا بصتله باستغراب بس اخدتها منه وشربت لان ريقها نشف من الرعب اللي كانت فيه
جميله اخيرا نطقت : انا اسفه والحمد لله ان حضرتك كنت موجود
فهد : اهمم .. علي فكره عم صبحي والموظفين بيمشوا الساعه ٥ والساعه دلوقتي ٦ وشويه
جميله : عارفه بس كان ورايا ملف لازم اخلصه
فهد : تمام ..
جميله وقفت وهتمشي : متشكره لحضرتك مره تانيه ( بس قبل ما تخرج بصتله ) هو مين اللي نزل سكينه الكهربا ؟
فهد ابتسم وبصلها وهيا فجأه الامور وضحت قدامها وعنيها وسعت لفهمها : انت ؟ انت كنت بتتسلي ؟ انت وقعت الكرسي ؟ وانت شدتني ؟
فهد ضحك : ما تخيلتش ان ده رد فعلك
جميله وشهااحمر وكانت هتنفجر من الغيظ وفجأه هجمت عليه لدرجه انه ملحقش يوقفها بدئت تضربه في صدره بايديها وبشنطتها وتزعق : انت اتجننت ولا اتهبلت .. انا قلبي كان هيقف ! انت ايه ما بتحسش ؟ انت مش بني ادم اصلا
اخيرا فهد قدر يمسك ايديها الاتنين
فهد : انتي اتهبلتي يا بت انتي ولا نسيتي نفسك ؟
جميله بتحاول تخلص ايديها منه : لو في حد اتهبل فده حضرتك . انت غبي ولا متخلف يا بني ادم انت ؟
فهد زعق : ما تحترمي نفسك !
جميله : ما تحترم انت نفسك يا … يا ايه ؟ انا مش عارفه اصلا اقول انت ايه !! مش لقيالك مسمي
فهد : انتي اللي جبانه ومتخلفه
جميله : جبانه مش جبانه انا حره .. انا جايه اشتغل في شركه محترمه ولا جايه سيرك لشاب غني متخلف بيتبسط برعب الناس
فهد ساب ايديها : انتي غلطتي قوي وانا سايبك علشان بس حالتك لكن قسما بالله حرف زياده وهوريكي الانبساط بجد ..
جميله بغضب : هتعمل ايه اكتر من اللي عملته ؟ هاه ؟
فهد بهدوء : هحبسك في مكتبي هنا للصبح وهقفل السكينه وامشي واجيلك الصبح الاقيكي اتجننتي
جميله بصدمه : انت لايمكن تكون طبيعي او سوي .. انت مش طبيعي
فهد : ايوه انا مش طبيعي انا مجنون
جميله اتضايقت : وانا اجن منك مليون مره
بصت حواليها وشافت خدادية صغيره علي الكنبه مسكتها وحدفتها عليه وبعدها اتفاجيء ان اي شيء بيقابلها بتحدفه عليه .. اي حاجه بتقابلها علي مكتبه بتحدفها في وشه
فهد بيزعق : يا بنت المجنونه
جميله : ايوه مجنونه
مسكت التليفون وحدفته عليه بس هو بيفادي الحاجه .. الابجوره حدفتها .. وقفت تاخد نفسها فهو قرب منها بتوعد ويدوب مسك ايد واحده : انتي محتاجه تتأدبي
خافت جميله منه وبتحاول تشد ايدها منه ولمحت وراها فاظه صغيره علي التربيزه وراها فمسكتها ومن غير ما تفكر خبطته في دماغه فسابها وهنا هيا جريت من قدامه وجريت من الشركه كلها .. ما وقفتش غير في الشارع وقفت اول تاكسي ورمت نفسها جواه والخوف ماليها تماما …
وصلت بيتها مرعوبه وعمتها قابلتها
عمتها : في ايه يا جميله مالك !!
جميله جريت علي اوضتها واستخبت في سريرها وغطت نفسها
عمتها بتجري وراها بخوف وقلق : يا بنتي هتموتيني معاكي بطلي توقعي قلبي بالشكل ده !! في ايه وبتجري كده ليه وخايفه من ايه ؟
جميله برعب : خايفه من ابنك .. لو لسه عايش ( بصت لعمتها برعب ) انا ممكن اكون قتلت فهد !
************
في باريس
في سجنه الظلمه وتمارينه المستمره بيحاول يطمن نفسه انه هيجيله يوم ويرجع لحبيبته ويرجع بيته .. يرجع لكل اللي ضاع منه
الباب اتفتح
واحد بالفرنساوي :: قوم معايا
قام بهدوء معاه واخدو طريق طويل ودخله اوضه مفيهاش غير كرسي وبس
دخل واللي معاه قعدوا علي الكرسي وخرج
صوت حواليه : مش هتقولنا انت بتشتغل لحساب مين ؟ مين اللي عايز الاسرار دي وازاي وصلتلها
رد : قلتلك مليون مره انا معرفش حاجه عن الفلاشه دي .. معرفش ايه اللي فيها
الصوت : دي كانت في ايدك
رد : ايوه كانت في ايدي بس اللي ضربني هو اللي حطهالي في جيبي وانا طلعتها بشوف ايه دي وبعدها اغمي عليا ومعرفش اصلا فيها ايه لحد دلوقتي
الصوت : فيها اسرار بلدنا العسكريه .. فيها صور لاماكن حيويه وسريه .. فيها حاجات كفيله انها تقلب موازين البلد كلها
رد : كل ده انا معرفوش انا مجرد رجل اعمال عادي اتضحك عليا .. عيلتي خططت لكل ده علشان يخلصوا مني ..
انا وليد نصّار .. ماليش علاقه باي اسرار عسكريه .. قسما بالله انا وليد نصّار
بقلم / الشيماء محمد ( شيمووو )
رواية جميله الجزء الثاني للكاتبه شيمو
الحلقه السادسة
حلقه امبارح الخامسه لظروف خارجه عن ارداتي اتنشرت النسخه الاوليه اللي بدون مراجعه او تعديل لاني زي ما سبق وقولتلكم اني بكتب ولما بخلص براجعها ولو في تعديلات بعدلها لكن امبارح كان عندي ظرف ومقدرتش افتح خالص فالادمن نشروا النسخه اللي عندهم وبالتالي فيها شويه اخطاء بسيطه … وتم تعديلها فلو رجعتوا دلوقتي للحلقه الخامسه من تاني هتلاقوا النسخه المعدله مش اللي اتنشرت امبارح طبعا حاجات طفيفه جدا اتعدلت …
اسيبكم مع الحلقه بقي واتمني تعجبكم شيموو
في باريس
في سجنه الظلمه وتمارينه المستمره بيحاول يطمن نفسه انه هيجيله يوم ويرجع لحبيبته ويرجع بيته .. يرجع لكل اللي ضاع منه
الباب اتفتح واتخض واتحطت صينيه اكل واتقفل الباب تاني .. كل فتحه باب بيتخض ورجع لذكرياته لعشرين سنه وري .. افتكر ازاي جه هنا
فلاش باك
فاق في مكان غريب اكيد مش مستشفي ابدا لانه مربوط ومش بيشوف حد .. استجوبوه كتير ومش فاهم هما بيستجوبوه ليه وعايزين منه ايه لحد ما اتحسن وكل يوم بيتعذب ويستجوبوه مره وري مره …
واحد بالفرنساوي :: قوم معايا
قام بهدوء معاه واخدو طريق طويل ودخله اوضه مفيهاش غير كرسي وبس
دخل واللي معاه قعدوا علي الكرسي وخرج
صوت حواليه : مش هتقولنا انت بتشتغل لحساب مين ؟ مين اللي عايز الاسرار دي وازاي وصلتلها
رد : قلتلك مليون مره انا معرفش حاجه عن الفلاشه دي .. معرفش ايه اللي فيها
الصوت : دي كانت في ايدك
رد : ايوه كانت في ايدي بس اللي ضربني هو اللي حطهالي في جيبي وانا طلعتها بشوف ايه دي وبعدها اغمي عليا ومعرفش اصلا فيها ايه لحد دلوقتي
الصوت : فيها اسرار بلدنا العسكريه .. فيها صور لاماكن حيويه وسريه .. فيها حاجات كفيله انها تقلب موازين البلد كلها
رد : كل ده انا معرفوش انا مجرد رجل اعمال عادي اتضحك عليا .. عيلتي خططت لكل ده علشان يخلصوا مني ..
انا وليد نصّار .. ماليش علاقه باي اسرار عسكريه .. قسما بالله انا وليد نصّار
###########
جميله برعب : خايفه من ابنك .. لو لسه عايش ( بصت لعمتها برعب ) انا ممكن اكون قتلت فهد !
عمتها جميله شهقت وتنحت وشويه مقدرتش تنطق : قتليته ! قتلتي ابني ! انتي تقصدي فهد ابني انا يا جميله !
جميله عيطت : مش عارفه يا عمتو انا خبطته علي دماغه وجريت مش عارفه هو جراله ايه ! بس ممكن يكون مجرالوش حاجه ! ولا جراله ؟ عمتو مش عارفه
وفضلت تعيط وعمتها ضماها وهيا قلبها من جوه في نار بتولع فيه : اكيد كويس يا حبيبتي .. طيب انتي خبطتيه بايه !
جميله اتعدلت : بفاظه صغيره
عمتها بلعت ريقها : خبطتيه فين ؟
جميله : مش عارفه بالظبط فين بس علي دماغه
عمتها : طيب ليه ! هو عملك ايه ! اوعي يكون حاول ….
جميله بسرعه : لا لا مش ده اللي حصل
عمتها زعقت : امال عمل ايه طيب علشان تعمليله كده !
جميله عيطت : انا اسفه يا عمتو حقك عليا .. والله مكنت اقصد
عمتها هديت وطبطبت عليها : عارفه انه اكيد غصب عنك بس احكيلي عمل ايه ! المره اللي فاتت مرضيتيش تحكيلي وانا سكتت بس المره دي وصلت لانك تضربيه انتي لازم تحكي
وليد كان داخل : تضرب مين ؟ مالك يا جميله وايه اللي بيحصل هنا ؟ عمتو في ايه !
عمته : مفيش حاجه روح انت شوف وراك ايه !
وليد دخل : البت دي مالها ! وضربتي مين ! جميله انتي مخبيه ايه ! من كام يوم رجعتي تعيطي وسكتنا لكن المره دي مش هسكت قسما بالله اروحله الشركه واطربقها عليه
عمته : تطربقها علي مين يا وليد ! علي ابني !
وليد اتحرج : عمتو انا مش قصدي بس فهد اللي هناك ده مش ابنك .. ده
قاطعته عمته : ده ايه ؟ ابن ميس ؟ علشان هيا ربته بقي ابنها خلاص ! علشان علمته الانانيه والوحاشه والكره يبقي ابنها ! بدال ما تقول هصاحبه واكون اخ ليه تقول هتروح وتطربقها عليه ! والله متشكره يا وليد .. وانتي يا جميله انا مطلبتش منك ابدا تروحي تشتغلي هناك .. انا مطلبتش منكم انتو الاتنين اي حاجه وبدال ما تروح تطربقها عليه وانتي تقتليه سيبوه في حاله .. سيبوه يعيش زي ما يحب .. وانا اسفه ان ابني ضايق حضراتكم .. امسحوها فيا انا ده لو ليا خاطر عندكم … بعد اذنكم
سابتهم وخرجت تعيط وراحت اوضتها قفلت عليها والاتنين جريوا وراها وخبطوا علي بابها بس رفضت تفتح لحد فيهم
جميله : عمتو انا اسفه والله ما كنت اقصد انا بس خفت منه
وليد : عمتو حقك عليا انا بوق علي الفاضي زي ما انتي عارفه افتحي بقي ما تزعليش مننا
جميله : وبعدين حتي الاخوات بيتخانقوا ما احنا بنتخانق انا و وليد وانتي تصالحينا علي بعض افتحي بقي ما تزعليش مننا
رفضت تفتح الباب مهما يحاولوا وابوهم رجع لقاهم قاعدين الاتنين قدام اوضه اخته
عماد : في ايه وقاعدين كده ليه ؟ عمتكم مالها ؟
حكوا اللي حصل لابوهم
عماد : روحوا دلوقتي من هنا
خبط علي اخته وفتحتله
عماد : خوفتي العيال عليكي يا جميله
جميله : هبقي اصالحهم بعدين
عماد بحب : ده انت تديهم بالجزمه مش تصالحيهم .. حبيبتي هما غلطوا بس اعذريهم انتي عارفه انهم بيحبوكي انتي امهم يا جميله .. وبعدين لسه مش مستوعبين وجود فهد وما يعرفوش مين هيا ميس وممكن تعمل ايه ! اعذريهم يا جميله
جميله : انا مش زعلانه منهم يا عماد
عماد : امال ايه طيب ؟
جميله دمعه نزلت : انا زعلانه علي ابني وحاله واللي وصله
عماد ضمها : معلش .. بكره بإذن الله كل الامور هتتعدل .. قومي كده صلي ركعتين لله واطلبي منه يهدي ابنك وانه يرجع لحضنك .. قومي يا حبيبتي
************************
في باريس
رد : كل ده انا معرفوش انا مجرد رجل اعمال عادي اتضحك عليا .. عيلتي خططت لكل ده علشان يخلصوا مني ..
انا وليد نصّار .. ماليش علاقه باي اسرار عسكريه .. قسما بالله انا وليد نصّار
الصوت : رجعه مكانه تاني
وليد فضل يزعق بس محدش سامعه ورجع زنزانته واتقفل عليه من تاني
وليد فاق من ذكرياته لقي نفسه في مكانه في زنزانته الصغيره … سنين كتيره معدش عارف قد ايه وهو مرمي هنا زي ما يكون اتنسي من العالم كله .. حبسوه وخلاص بدون حتي محاكمه .. مخفي عن الكون كله بس ربنا مطلع علي حاله وعارف انه مظلوم وتوجه بدعاؤه لربنا يفرجها عليه
وليد : يارب افرجها من عندك انت يا رب انت عارف بحالي وعارف اني مظلوم فالنصر من عندك انت يارب .. اللهم اني مغلوب فانتصر .. اني مغلوب فانتصر .. اني مغلوب فانتصر
جميله نامت وهيا قاعده ماسكه مصحفها وفجأه صحيت مفزوعه وحطت ايدها علي قلبها وعيطت … عيطت كتير جدا لدرجه جميله الصغيره سمعتها وخبطت براحه عليها ودخلت
جميله : عمتو انتي لسه زعلانه ! حبيبتي والله ما اقصد ازعلك ابدا
عمتها مسحت دموعها : لا يا حبيبتي بس كابوس
جميله قعدت جنبها : خير
عمتها : مفيش بس حلمت بوليد .. حلمت انه بيتعذب … بيتعذب وبيتوجع
جميله بحب : عمتو .. هو زمانه دلوقتي في الجنه ونعيمها ده كان انسان كويس .. كان طيب جدا يا عمتو .. عمره ما هيكون بيتعذب ابدا
عمتها بتردد : حسيته عايش يا جميله .. عايش وبيتوجع
جميله : وايه اللي هيبعده عنك السنين دي كلها ! لا يا عمتو بلاش تعيشي في وهم وامل كداب يوجعك
عمتها غيرت الموضوع: المهم ضربتي ابن عمتك ليه !
حكتلها جميله كل حاجه حصلت
جميله : بس يا عمتو ده كل اللي حصل
عمتها : اعذريه معلش .. ميس ربته ما يراعيش حد ولا يهتم بمشاعر حد .. علمته ياخد ما يديش .. علمته ان اهم شيء في الكون ده هو الفلوس وبس فمتوقعه منه ايه !
جميله : يعني انتي مش زعلانه ؟
عمتها ضمتها : لا يا قلبي مش زعلانه منك وبكره ان شاء الله تطمنيني عليه
بالليل فهد روح بيته واول ما ميس شافته : ايه ده ؟ انت متعور ؟
فهد : ايوه بعد اذنك
ميس : اتعورت ازاي ؟
فهد افتكر جميله وهيا بتخبطه واتضايق
فهد : اتخبطت هيكون ازاي يعني
ميس : طيب روحت لدكتور !
فهد : ايوه وزي ما حضرتك شايفه اخدت غرزتين فيه
ميس ابتسمت : ما تخافش شكلك امور زي ما انت .. الخبطه في الحاجب بتكون ظريفه والشباب بقم بيعملوها موضه .. تلاقي الشاب من دول حتي لو مش مخبوط يعمل خط في حاجبه
فهد بغيظ : يعني احمد ربنا واسكت صح
ميس : يعني ما تعملش قصه
فهد : انا معملتش قصه ..انا طالع انام
ميس : صح عملت ايه في حكايه جميله و وليد وعرفت ايه عنهم ؟
فهد بصلها : كلمت شركه تحقيقات خاصه والاسمين مجرد تشابه .. دول اقل من اننا نضيع وقت في التفكير فيهم
ميس : كويس انك عملت كده .. كنت هكلم انا حد بس خلاص طالما اتأكدت
فهد : مفيش في عيلتها كلها حد باسم جميله نهائي. واخوها على اسم جده ودي نهايه القصه
سابها وطلع بس صوره جميله الكبيره في دماغه .. ليه ملامحها محفوره قدامه ! ليه قلبه بيدق لما يفكر فيها ! ليه حاسس انه شافها قبل كده ؟ وهنا افتكر جميله الصغيره اللي متغاظ منها وافتكر اللي عملته فيه .. رقد علي سريره وتخيلها قدامه ونام وراح في النوم وتخيل نفسه بيمسكها من رقبتها يخنقها بس فجأه شدها عليه وبدال ما يخنقها فعلا باسها .. وبيحاول يوقف نفسه هو عايز يضربها ، عايز يخنقها ، عايز يوجعها فليه بيبوسها ؟ البوس مش هيوجعها ! ابعد يا فهد عن شفايفها .. ابعد عنها
ايديها اتلفت حوالين رقبته وشدته اكتر لها وهو استسلم اكتر واكتر .. وغرق معاها وعقله رافض ده .. اكيد انت بتحلم .. اصحي يا فهد .. فوق
فتح عنيه فجأه واتعدل بسرعه لقي داده علية قدامه بتصحيه
علية : اصحي يا فهد .. فوق
فهد مسك دماغه من الصداع ورقد تاني : في ايه يا داده !
علية : اصحي حبيبي
فهد : عندي صداع وعايز انام
علية : سلامتك يا حبيبي بس ميس هانم عايزاك وطلبت مني اصحيك وكمان سالي بنت عمك تحت
فهد : اووووف .. مصدع
علية : معلش قوم والبس وانا هجيبلك مسكن للصداع
لبس ونزل بالعافيه من الصداع وقعد معاهم علي السفره
سالي : ايه مفيش صباح الخير !
فهد : مفيش دماغي هتنفجر من الصداع
سالي : سلامتك يا قلبي .. طنط كانت لسه بتقولي انك اتخبطت معلش بقي
فهد بتجاهل: داده فين المسكن !
جت علية بالاقراص وهو اخدها
ميس : في اجتماع النهارده وجدك محي هيكون موجود وحتي جدك محسن هيكون اون لاين معانا من فرنسا واعمامك كمان
فهد : ما ينفعش يتأجل ؟
ميس وقفت وماشيه : لا ما ينفعش .. سالي هاتيه معاكي وما تتأخروش
سالي : اوكي اطمني
خرجت وسابتهم وهو شرب قهوته وقام رمي نفسه علي اقرب كنبه وهيا قعدت جنبه وقريبه منه
مدت ايدها علي خده وهو مغمض عنيه
سالي : مش حالق دقنك ليه ! مش بحبها طويله
فهد بدون اهتمام : ماليش مزاج ومصدع ولا مش واخده بالك
سالي قربت قوي منه لدرجه انه حس بانفاسها علي وشه : دلوقتي المسكن يشتغل وتفوق
فتح عنيه وبصلها وبعد دماغه عنها شويه وبص لشفايفها اللي بتقدمهم له
افتكر جميله وشفايفها اللي حلم بيهم..
افتكر حلمه بكل تفاصيله .. قام وقف
فهد : يالا علشان ما نتأخرش
اتضايقت سالي وقامت وراه وراحوا علي الشركه ..
الصبح جميله متردده تروح شغلها ولا تفضل بقي في البيت
عمتها : روحي شغلك وما تخافيش
جميله : ولو عمل حاجه ولا قال لحد ولا
قاطعتها : ولا هيعمل اي حاجه .. فهد كبرياؤه هيمنعه يتكلم .. هيقول ايه .. موظفه عنده ضربته ! ما تخافيش هو مش هيعمل حاجه ظاهريا لكن دماغه بقي هيكون فيها ايه !! الله اعلم
وليد : تحبي اروح معاكي النهارده!
جميله : مش عارفه
عماد : مش فهد كان قالك يا جميله ( اخته ) انه ممكن يوظف وليد عنده ؟
وليد : قصدك ايه ؟
جميله اخته : فعلا قالي كده
عماد : يبقي انت يا وليد تروح مع اختك وتقابله وتطلب منه شغل وبكده تكون عينك علي اختك
وليد بغيظ : انا اشتغل عنده ! بعدين انا دكتور علاج طبيعي هشتغل ايه عنده ؟؟
عماد : قوله عايز شغل في مستشفي كبيره وخلاص
جميله : والله فكره تحفه يا وليد ارجوك وافق
وليد : يا بنتي لأ وبعدين انا اصلا شغال في مستشفي كبيره وغير كده ده معناه احنا بنتلزق فيه
جميله بترجي لاخوها : ارجوك يا وليد
وليد : مرواحي معناه انك خايفه وهو هيفهم ده انا ممكن اوصلك وبس
نزلوا الاتنين مع بعض ودخلوا الشركه وراحوا علي مكتبها وقعد اخوها معاها
ميس طلبت ملف من جميله فجابته و راحت علي مكتبه وشافت عبير
عبير : عايزه تدخليله ! ابلغه !
جميله : اه
عبير بالجهاز علي مكتبها : فهد بيه ! باشمهندسه جميله عايزه تدخل لحضرتك
جوه عند فهد
ميس : دخلها تلاقيها جابت الملف
فهد اتكلم في الجهاز : دخليها
جميله خبطت ودخلت بتردد
جميله بصت لفهد قوي وشافت الجرح في حاجبه وندمت للحظه بس بعدها افتكرت رعبها فقالت يستاهل …
فهد شافها ومش عارف ليه حلمه مش رايح عن باله .. اتمني يقوم يخنقها زي ما كان المفروض يعمل في الحلم .. بتلقائيه حط ايده علي شفايفه وبدال ما يكشر ابتسم للذكري .. استغبي نفسه وفاق علي صوت ميس : هاتي الملف
جميله عطتها الملف : حضرتك عايزه حاجه تاني !!
ميس : لا شكرا روحي انتي
اسر وصل الشركه ودخل عند سالي واول ما شافها اتضايق
سالي : في ايه مالك !
آسر : انتي بتتريقي علي امل علي هدومها وانتي !!
سالي باستغراب : انا ايه ! لبسي ماله
آسر : غبي يا سالي مجرد انه غبي
سالي وقفت : غبي ! ازاي بقي ان شاء الله
آسر : ضيق بطريقه مستفزه .. يعني تستفادي ايه لما بتلبسي بنطلون ضيق بالشكل ده ! يعني مش بيضايقك ولا البلوزه اللي ملهاش لازمه دي معناها ايه!
سالي : وانت مالك يا آسر اصلا .. مالكش انك تتكلم عن طريقه لبسي انا حره فاهم ولا لأ !
آسر سابها ومشي بغيظ
وميس راحت لجميله : جهزتي كل اللي طلبته منك علشان الاجتماع !
جميله : كل حاجه جاهزه
ميس : تمام يالا بينا ( لمحت وليد اخوها ) مين ده !!
جميله : ده وليد اخويا
ميس بصتله كتير هو مفيهوش شبه من وليد خالص وبتجاهل : طيب الاجتماع ولا ايه !
جميله : اه يالا ..( مشيت ميس وبتفكر في طريقه تشغله عندها وجميله بصت لاخوها ) وليد روح انت بقي علي شغلك ونتقابل في البيت
وليد : مش محتاجه مني حاجه خلاص يعني
جميله : لا خلاص روح انت انا بس كنت محتاجه دعم نفسي مش اكتر
راحت وراها علي الاجتماع وحست بالخوف اول ما دخلت وشافت محي وعلاء وخالد واسر وسالي وعلى شاشه اللاب في حد اكيد ده محسن بس فهد مش موجود يا تري اتأخر ليه !
محي : فهد فين يا ميس ؟
ميس : مش عارفه المفروض انه جاي
علاء : وهو فهد من امتي بيجي اجتماعاته في معاده !
سالي : بابي فهد علي طول منتظم
محي زعق : ميس شوفيه فين ؟
ميس بصت لجميله : روحي شوفيه في مكتبه وهاتيه بسرعه ..
جميله قامت وراحت لمكتبه تشوفه
محي : البنت دي وراكي في كل مكان ليه يا ميس ؟
ميس : انا محتاجاها
محي : مشكتيش في اسمها !
ميس : عملت سيرش كامل عنها وطلعت نظيفه اطمن من ناحيتها
محي : ابوكي مختفي ليه ! هو لسه تعبان !
ميس : فعلا تعبان ومش فايق للشغل
محي : ابقي سلميلي عليه
محسن : وبعدين هنفضل ملطوعين كده كتير لحد ما فهد باشا يشرف
خالد : زمانه علي وصول ما تقلقوش بس قبل ما يجي ناوين علي ايه معاه !
سالي : قصدكم ايه !
آسر : ايوه يا بابا تقصد ايه ؟
محي بص لخالد بعتب : قصده الشغل هيكون قصده ايه يعني ! قرارته الغلط في الشغل
آسر : حسيت ان حضرتك يا بابا بتتكلم بطريقه غريبه
خالد : لا عادي بس بسأل هنعمل ايه لو هو اصر علي اللي في دماغه
محسن : ما نسبقش الاحداث يا خالد
جميله راحت لمكتب فهد وخبطت خبطه واحده ودخلت مكنش علي مكتبه فتحت الباب اكتر وبصت واتفاجئت بيه نايم علي الكنبه وايده علي دماغه .. دخلت وبصتله كتير ولاحظت ان تحت عينه بدأ يزرق من الخبطه واستغبت نفسها بس قالت برضه يستاهل هو اللي غبي
مدت ايدها بفضول لمست جرحه واخدت بالها انه واخد غرزتين تقريبا فابتسمت مشت ايدها علي خده وعجبها اكتر بدقنه
هزت ايده علشان تصحيه وصحي فعلا بصلها : عايزه ايه !
جميله : الاجتماع
فهد اتعدل بسرعه ووقف وده كان غلط جدا ويدوب هيتحرك الدنيا كلها اسودت قدامه وكان هيقع في الارض بس جميله مسكته وهو اتعلق فيها وطي جامد وقعد مكانه تاني وهيا قعدت جنبه ماسكه ايديه اللي متعلقه فيها
جميله : انت اكيد دايخ ما ينفعش تقوم مره واحده كده
فهد ما ردش عليها وفضل شويه موطي دماغه لحد ما اخيرا قدر يرفعها : وده بسبب مين هاه !
جميله بصتله : بسبب غباء حضرتك طبعا .. لكل فعل رد فعل مساوي له في المقدار ومضاد في الاتجاه اول قوانين نيوتن ولا نسيتها !
فهد : بت انتي .. انا مش ناقصك
حاول يقوم بس الدنيا فعلا بتلف بيه مدت ايدها تساعده وهو اتردد شويه بس مسك ايدها ووقف معاها وفضل ماسك ايدها لحظات
فهد : ايوه الدنيا وقفت اهو .. يالا
جميله : انت تعبان الغي الاجتماع
فهد : الناس دي ما بتقتنعش بالتعب والكلام الفاضي ده
جميله : بس انت فعلا تعبان
فهد : البركه فيكي
جميله : محدش قالك تعمل اللي عملته
فهد : والله لولا اني فعلا مش فايقلك كنت هتصرف معاكي تصرف تاني خالص بس حظك اني فعلا تعبان
خرج وهيا وراه ونوعا ما خايفه عليه يقع وهو ماشي لانه مش مظبوط ابدا
جه يدخل الاجتماع بس وقف قدام الباب وشيء خلاه يبص لجميله وراه
جميله : ادخل بس لعلمك اللي ميس هانم طلباه مني مش في صالح مشروعك ابدا
فهد ابتسم : عارف .. اعملي المطلوب منك
جميله دخلت وراه وحست انه زي ابوه بيحارب في صف لوحده ومحدش معاه وحتي اللي المفروض انها امه ضده
محي بصله : سيادتك متخانق مع مين فتح دماغك كده ؟
فهد خطف نظره لجميله اللي باصه للارض وندمت انها خبطته لانه المفروض يكون في الاجتماع ده قوي علشان يعرف يقف في وشهم
فهد : انا ما بتخانقش مع حد
علاء ضحك : اوعي تكون واحده فتحت دماغك !
ميس : اعتقد ده انت مش فهد يا علاء
علاء سكت : خلاص سكت المهم خلونا في المهم
محسن : انا اتفقت مع كذا بلد اننا نكون المورد الوحيد للاجهزه في الشرق الاوسط
محي : تمام وايه المطلوب ؟
محسن : راس مال كبير جدا لخطوه زي دي هنحتاج اي سيوله ممكنه
محي : يعني احنا حاليا نتحمل خساره عشرين مليون والله اعلم قد ايه كمان !
محسن : ولا حتي مليون واحد ده احنا كمان هنقترض من البنك
محي بص لميس : عندك ايه يا ميس !
ميس بصت لجميله : جميله الملف فين !
جميله عطتها الملف
جميله : اتفضلي حضرتك
ميس: قدمي للكل ملخص سريع عن اللي فيه
جميله بصت لفهد اللي حاطط دماغه بين ايديه وباين عليه التعب ووبدئت تتكلم : الاول اتبعتت طلبيه من الاجهزه يوصل تمنها في حدود العشره مليون للشركه الجديده والشركه استلمتها وبدأت توزيعها وعلشان تقدر تمشي الشغل استلمت سلفه ب عشره مليون تانين علشان تقدر تدفع الديون المتراكمه عليها وتدفع رواتب الموظفين وياريت ده كله للاسف هتحتاج ما يقارب الخمسه مليون كمان علشان تقدر تبدأ تقف علي رجليها
سالي : كل الملايين دي يا فهد .. ولسه عايزه تاني .. امال هتكسب امتي
آسر : مش قبل ٦ اشهر لسنه علشان تقدر تاخد من وراها مكسب قبل كده مستحيل انت تعتبر بتأسس شركه جديده .. هتكسب اه لكن محتاجه وقت
محسن : وقت احنا ما نملكوش اصلا
محي : سيادتك ساكت ليه يا فهد بيه؟
فهد رفع دماغه وشكله يغني عن اي سؤال وجميله استغربت ازاي مش شايفينه تعبان كده
فهد : انا عارف كل الكلام ده !! عارف دفعت فيها ايه وعارف محتاجه قد ايه تاني وعارف امتي المفروض اتوقع دخل منها ..
محي : وبعدين عملت ايه بمعرفتك دي !
فهد :انا مش فاهم حضرتك معترض علي ايه !
محي هيتكلم : احنا محتاجين
قاطعه فهد واتكلم بصرامه: ما تقوليش سيوله وما تقنعنيش ان العشرين مليون دول هيأثروا في مشروع بالضخامه دي .. احنا هنعمل شراكه مع معظم دول الشرق الاوسط وبتتكلم عن مشروع تكلفته لا تقل عن عشرين مليار فمش هيفرق معاك شويه الفكه اللي بتتلكم فيها الا اذا كان كل اللي مضايقك ان صاحب الشركه كان صديق مقرب لابويا وليد نصّار !! ولا هو ده فعلا اللي مضايقكم !
محي وقف : وليد غرق الشركه دي في يوم من الايام واستغلها في التهريب وخلي سمعتنا في الارض واحنا بنعالج اللي حصل بقالنا عشرين سنه فما تجيش سيادتك تاخدك العاطفه وتخرب اللي عملناه والا
وقف فهد قصاده وكان هيقع وجميله لاحظت ده بس سند علي الترابيزه وداري تعبه عن الكل الا هي
فهد : الا ايه !! عايز اعرف حضرتك بتهددني بايه !
خالد تدخل : اقعد يا فهد .. مش كده الكلام
علاء : بابا اقعد واهدي احنا بنتفاهم
ميس : مش عايزين ننسي كلنا اننا هنا مصلحتنا واحده ..
محسن : واحده ازاي يا ميس وابنك واقف ضد الكل وبيصمم رأيه علي حاجات غريبه
آسر : يا جماعه المشروع ده مش وحش هو بس توقيته غلط
سالي : يبقي نأجله
جميله : لو اتأجل الشركه هتعلن افلاسها وهتنتهي لو فهد بيه مكنش اتدخل كانت الشركه انتهت
سالي : ما تنتهي وهيا تفرق معانا في ايه !
علاء : تفرق مع فهد وهو رافض يقول اسبابه
ميس : الكلام الكتير ده مالوش لازمه عايزين نقرر هنعمل ايه !
محي : المشروع ده هيقف وحالا وآسر تروح تسحب اي فلوس تقدر تسحبها وتنقذ ما يمكن انقاذه ونقفل بقي القصه دي وحضرتك يا فهد باشا قبل ما توعد حد تاخد ارآءنا كلنا وبلاش القرارت الفرديه او العاطفيه
فهد بص لمحي كتير واتكلم بمنتهي الهدوء : المشروع هيكمل زي ما انا قلت وانت يا آسر مش هتسحب اي شيء من الشركه وده اخر الكلام ومش هنتكلم تاني عن الموضوع ده .. اما بقي بالنسبه للشركه العالميه لو فعلا هتتأثر بالعشرين مليون دول يبقي نوقف كل الفلوس اللي بتخرج ملهاش لازمه
محي : فلوس ايه اللي ملهاش لازمه
فهد : كلكم عارفين فلوس ايه فبلاش نفتح في مواضيع زي دي
محسن : لا نفتح طبعا تقصد ايه !
فهد : اقصد الملايين اللي بيسحبها عمي المبجل علاء بيه ارضاءا لفتياته ولهداياه ولنزواته ولا الفلوس اللي حضرتك يا عمي محسن بتشتري بها اسهم في شركات عندك بره او الاراضي اللي عمي خالد بيشتريها هنا .. كل واحد هنا بيسحب ملايين من الشركه وبيصرفها علي حياته الخاصه ومحدش بيحاسبه فمش من حق حد فيكم يقولي في شركتي اعمل فيها ايه وما اعملش فيها ايه !
محي : شركتك !!
فهد وقف : الشركه كانت لجدي محمود نصّار اللي استلمها غرقانه في الديون ووقفها علي رجليها في الوقت اللي انتو هربتوا فيه وبعد كده ورثها لابنه وليد اللي ورثها ليا وعلشان كده معظم الاسهم في الشركه باسمي ومش علشان ميس هانم قبلت انها توزع الباقي بالتساوي بينكم ده ينسيكم انها اصلا بتاعتي واحمدوا ربنا اني سايبكم فيها بمزاجي ودلوقتي خلص الاجتماع بعد اذنكم
خرج فهد وسابهم كلهم في حاله صدمه من كلامه اللي سبق وسمعوه من ابوه قبل ما يقرروا يخلصوا منه … حسوه انهم قدام وليد مش ابنه ابدا لان الاسد اللي كان واقف في وشهم دلوقتي اسد وليد نصّار مش مجرد فهد
بقلم / الشيماء محمد ( شيموووو)
رواية جميله الجزء الثاني للكاتبه شيمو
الحلقه السابعه
خرج فهد وسابهم كلهم في حاله صدمه من كلامه اللي سبق وسمعوه من ابوه قبل ما يقرروا يخلصوا منه … حسوه انهم قدام وليد مش ابنه ابدا لان الاسد اللي كان واقف في وشهم دلوقتي اسد وليد نصّار مش مجرد فهد
اخيرا محي نطق : اسر ، سالي اطلعوا بره
آسر : عمي
زعق محي : اطلعوا بره ( بص لجميله ) وانتي كمان بره معاهم
طلعوا التلاته
اسر : يا تري فهد ناوي علي ايه !سالي شوفي فهد وهديه روحي
سالي راحت وجميله اتضايقت بدون سبب واتمنت لو ميس خلتها تفضل معاها
ميس : بتفكر في ايه يا عمي ؟
محي : فهد كلامه ده جديد .. مين بيلعب في دماغه ومين بيقلب في الدفاتر القديمه ؟
ميس : مفيش حد
محسن : امال جاب الكلام ده كله منين ؟
خالد : بقولكم ايه احنا مخلصناش من وليد علشان يطلعلنا ابنه يبوظ كل اللي عملناه قسما بالله ادفنه بالحيا زي ما دفنت ابوه
ميس : خالد وبعدين !
علاء فجأه : هيا نبيله فين !
ميس : في الدار وما تقلقش من اخر جلطه وهيا اتخرست وما بتتكلمش
محسن : لما مش نبيله مين ! خالد.. ندي مراتك هيا اللي ممكن تتكلم
خالد : ندي لا .. ندي خايفه علي عيالها وبعدت تماما عن الجو ده
محي : اعتقد ده كلام صلاح عبد الكريم سكرتير وليد .. هو ده اللي بيتكلم ولازم نقص لسانه خالص ..
علاء : انا اقصلك لسانه سيبولي انا السكه دي
محي : بسرعه اما انتي يا ميس يا تلجمي فهد يا هتاخدي عزاه قريب
ميس : لا فهد لأ … فهد غير وليد
محسن : فهد نسخه من وليد .. حته من ابوه انا اصلا النهارده كنت شايف وليد مش فهد
خالد : فعلا كان شبهه قوي النهارده
ميس اصرت : فهد غيره
علاء بتريقه : اوعي تكوني يا حلوه صدقتي انه ابنك وانه بيحبك ! ده ابن جميله خدامتك ولو عرف عن اللي عملتيه معاها هيخنقك بايديه
ميس بخوف : فهد بيحبني
محي : فهد بيحب النسخه اللي انتي رسمتيها قدامه لكن لو شاف الاصل هو اول حد هيخلص منك فخليكي فاكره ده ومستعده له ديما ..
محسن : طيب لازم فهد يكون تحت ايدينا اكتر من كده
علاء بتردد : ايه رأيكم لو نجوزه ؟
محي : نجوزه! فكره كويسه ! لازم نجوزه حد تبعنا .. قدامكم اتنين يا سالي يا امل
خالد : امل طيبه ونسخه من امها مش هتقدر علي حد زي فهد
محي بص لعلاء : يبقي سالي ؟
علاء : سالي فعلا تقدر عليه
محسن : تمام جهزوا للموضوع ده بس والنبي اتأكدوا انها بتخلف عايزين وريث تبعنا بعيد عن سلسله محمود و وليد
علاء: ان شاء الله
سالي راحت لفهد مكتبه ودخلت عليه
سالي : انت ايه اللي عملته ده؟ انت اتجننت تتكلم كده !
فهد : والله ما ناقصك يا سالي سيبيني في حالي
سالي : انت لازم تعتذر لاعمامك
فهد : سالي انا تعبان دلوقتي
سالي زعقت : وانا بقولك انك خربت الدنيا وقومتها وانت تقولي تعبان !! تعبان ايه دلوقتي ! انت مش متخيل انت عملت ايه !
فهد هيرد بس الباب خبط ودخلت جميله بصينيه وارتبكت لما شافت سالي لسه عنده
سالي : عايزه ايه انتي !
جميله لفهد: القهوه والمسكن اللي حضرتك طلبتهم
سالي : حطيهم واتفضلي
جميله راحت لجنب فهد وحطتهم قدامه وفهد مد ايده لها وهيا باستغراب بس فهمت فاخذت المسكن وفتحت قرصين بايدها وحطتهم في ايده
سالي : انت ازاي تاخد من ايدها ؟ وانتي ازاي تلمسيهم هاه !
جميله ما ردتش عليها وعطت لفهد كوبايه الميه يشرب المسكن
جميله : القهوه عملتها زي ما حضرتك طلبت بن زياده
فهد سكت وبصلها مستغرب تصرفها ده
سالي : مش خلاص خدمتيه .. امشي بقي من هنا ولا طمعانه في ايه تاني !
جميله ما ردتش عليها بس بصتلها من فوق لتحت وده ضايق سالي اللي قامت وقفت قصادها وقفتها : انتي مش عاجبك كلامي !
جميله : كلامك اسخف من اني ارد عليه او اشغل بيه تفكيري حتي
سالي رفعت ايدها هتضربها بالقلم بس اتفاجئت بفهد مسك ايدها وكان هيقع لما سالي شدت ايدها بعنف منه
سالي : انت بتوقفني علشانها ؟
فهد : انا بوقفك علشان انتي ما ينفعش تقفي قصاد موظفه عندك .. انتي من امتي كده !
سالي : انا برضه اللي من امتي كده ! انا غلطانه اني جيتلك هنا بعد اذنك
سابته وخرجت رزعت الباب وراها وهو غمض عنيه من الوجع وقعد علي الكرسي وراه
جميله : انا اسفه
فهد : متشكر علي اهتمامك .. تقدري تروحي تشوفي شغلك
جميله : انت عارف انك غلطت في الاجتماع وقلبتهم كلهم ضدك
فهد : عارف
جميله : طيب ليه عملت كده !
فهد بصلها شويه وحس انه عايز يتكلم معاها كتير ويحكيلها كل اللي جواه بس فجأه : وانتي يهمك في ايه عملت كده ليه ولا بتسألي ليه ! انتي جايه هنا اصلا مكتبي ليه ! ولا علي رأي سالي طمعانه في ايه ! عايزه تاني ؟
جميله وقفت : نفس الافكار السودا كلكم عيله واحده .. اسفه فهد بيه اني حسيتك بني ادم وبتتوجع واسفه اكتر اني قررت اساعدك .. دي غلطه مش هتتكرر .. استمتع بوجعك وحدك ولعلمك تستاهل كل لحظه انت بتتوجعها دلوقتي بعد اذنك
سابته ورزعت الباب هيا كمان .. وفهد اتخنق اكتر واكتر وافتكر اول مقابله مع صلاح عبد الكريم
بقلم / الشيماء محمد ( شيموووو)
فلاش باك ….
فهد : تقدر تقولي انا ليه احط فلوس في شركه تقريبا هتعلن افلاسها ! اي فلوس هتتحط فيها تعتبر خساره بحته
صلاح : خساره قريبه بس مكسب بعيد
فهد قلب شفايفه : مكسب بعيد انا مش مهتم بيه اصلا
صلاح : الشركه هتعتبر فرع جديد لمجموعتكم وده في حد ذاته اعتقد مكسب لحضرتك
فهد : مكسب لحضرتك انت مش ليا .. انا في غني عن الفرع الجديد اللي هيصرف ملايين لحد ما يشتغل ويسد الديون اللي عليه
صلاح سرح شويه: تعرف انك شبه ابوك بالشكل فقط
فهد بصله قوي ورد : معني كده ان حضرتك كنت تعرف والدي !
صلاح ابتسم : اعرفه !! انا كنت دراعه اليمين هنا في الشركه
فهد باستغراب : دراعه اليمين ؟ ازاي ؟
صلاح : سكرتيره الخاص ودراعه اليمين واعرف كل حاجه عنه .. كل صغيره وكل كبيره عنه ولعلمك هو اللي ساعدني اقف علي رجليا قبل كده وساعدني في الشركه دي بس للاسف عديت بأزمه وهيا اللي دهورت الامور بالمنظر ده
فهد : وقلت اروح لابنه يوقفها من تاني علي رجلها صح
صلاح وقف : الظاهر اني غلطت لما جيت هنا انا اسف فهد بيه انا بس تخيلتك زي والدك لكن للاسف طلعت زي … بعد اذنك
فهد وقفه : طلعت زي مين ؟
صلاح : مش مهم بقي
فهد : انا بسأل حضرتك سؤال اتمني تجاوبني عليه
صلاح : زي اعمامك وميس هانم واعمام والدك محي ومحسن .. ابوك طول عمره كان واقف قصادهم وعمره ما طاوعهم وقبله كان ابوه وعمرهم ما قدروا عليهم ابدا بس للاسف قدروا عليك وطلعت نسخه منهم بس يمكن ده احسنلك بدال ما يخلصوا منك زي ما خلصوا من اللي قبلك ..
ماشي بس فهد وقفه : ما ينفعش ترمي كلام زي ده وتمشي
صلاح : كلامي معاك خلص يا ابن ميس شريف … لانك اكيد مش ابن وليد نصّار
سابه وخرج وفهد هيتجنن دي مش اول مره يسمع ان ابوه كان شخص كويس بس كلام ميس واعمامه واعمام ابوه بيقول غير كده ..
حتي عمته كتير تقوله انت فاهم كل حاجه غلط .. لازم يسمع لصلاح ده ويسمع اكتر عن ابوه .. قرر يزوره في شركته واول ما دخل عند صلاح ابتسم : كنت منتظر زيارتك
فهد : انت رميت كلام ومشيت وكان لازم اسمع باقيه
صلاح : عايز تعرف ايه عن ابوك؟
فهد : كل حاجه واي حاجه !! مبدئيا لما هو كويس ليه اشتغل في التهريب ؟
صلاح : مين قال ان ابوك اشتغل في التهريب ! اعمامك اللي طول عمرهم طمعانين فيه ! ولا والدتك بنت شريف باشا اللي اتقبض عليها مره بتهمه محاوله قتل وليد ابوك !
فهد : انت كداب علي فكره
صلاح : هكدب عليك ليه ؟ ايه مصلحتي !
فهد : احكيلي كل اللي تعرفه
صلاح : ابوك كان راجل شهم واخلاقه عاليه وراجل بمعني الكلمه .. خلافه مع اعمامك بدأ باعمامه هو او بالاصح بدأ بجدك ..
فهد : انا مش فاهم حاجه
صلاح : جدك لما والده اتوفي كان مديون وشغله في النازل جدا وجدك ساعتها كلم اخواته محي ومحسن ولما سمعوا بالديون دي رفضوا يمدوا ايديهم وقالوا لجدك يشبع بالشركه وقالوله حلال عليك مش لزمانا وسافروا كل واحد في طريقه
جدك وجدتك نبيله هانم اشتغلوا ليل ونهار لحد ما سدوا الديون وبدؤا يوقفوها علي رجليها ويعملوا اسم وبعدها كمل وليد المشوار وكبر الشركه وبدأ يطلع للعالميه هنا اعمامه رجعوا وقالوا نصيبنا وتتقسم علي الثلاثه وحاولوا يقنعوا وليد ان ابوه نصب عليهم بس نبيله اللي هيا جدتك رفضت تعبها وتعب جوزها ياخدوه علي الجاهز وكمان وليد كان شايف تعب ابوه ورفض بس شهامه منه عمل اسهم لكل واحد فيهم وشغل عيالهم معاه واعتبرهم اخواته بس ده معجبهمش هما عايزين كله فضلوا يحاولوا يوقعوا الشركه او يوقعوه بس كان ديما مفتح وفي مره غافلوا وليد بيه وطلبوا شحنه مضروبه بدل السليمه ولغوا صفقه وليد بس الوحيد اللي اضر فيها كان علاء بيه لانه ساعتها مراته وابنه ماتوا بسبب الاجهزه دي والكل رمي الاتهام علي ابوك بس ابوك قدامي وعلي يدي كان بيتعامل في السليم بس ولما سافر يشوف ايه اللي حصل مرجعش وساعتها مسك الشركه الثلاثي شريف ومحي ومحسن ومسكوها لعيالهم الثلاثه ميس وعلاء وخالد ودلوقتي مسكوها ليكم انت وبنت علاء وابن خالد بس انت مازال ليك نصيب الاسد حاول كده تخرج عن طوعهم وانت هتشوف الوش التاني بتاعهم .. الوش اللي انت ما تعرفوش اصلا .. طول ما انت تحت طوعهم فهتفضل حبيبهم لكن لو خالفت مش هيحصلك كويس ابدا
فهد : وايه حكايه ان ميس اتقبض عليها لانها حاولت تقتل وليد ؟
صلاح : وليد بيه فجأه عمل حفله وعرفنا علي واحده اسمها جميله وقال انها مراته وكانت حامل وقبلها كان اتعرض لحادثه كان هيموت فيها وفي الحفله جاب الرجاله اللي ضربوه واعترفوا ان ميس هانم اللي مسلطاهم واتقبض عليها وغير كده ما اعرفش لاني ساعتها سيبت الشركه وبدأت شغلي انا
فهد قام مشي من عنده وكل افكاره متلخبطه وساعتها قرر يعمل الشراكه مع صلاح عبد الكريم ويشوف رد فعلهم ايه !!
****************
رجع بيته كانت ميس منتظراه
ميس : انا عايزاك تصلح الامور مع اعمامك محي ومحسن ..
فهد : انا مغلطتش في حد علشان اصلح
ميس : لا غلطت .. لما تقف تقول ان دي شركتك تبقي غلطت وغلط كبير كمان .. الشركه دي مش بتاعتك انت لوحدك ولا كانت بتاعت ابوك ومعرفش مين بيدخل في دماغك الافكار دي
فهد : محدش بيدخل اي افكار بس انا ليّه اعلي نصيب في الاسهم فده معناه ايه !
ميس : معناه انهم راعوا موت ابوك وامنولك مستقبلك وعارفين ان الكل ايد واحده لكن ما تخيلوش ابدا انك تقف تبجح فيهم كده وتقول شركتي والكلام الفاضي ده !! ده جزاتهم انهم وثقوا فيا ووقفوا جنبي وساعدوني انا وابني !! ده رد جميلهم يا فهد !! انت ازاي قدرت تقول كده اصلا !!
عيطت دموع مصطنعه وهو اتلخبط اكتر واكتر ومعدش عارف مين الصح ومين الغلط!
عدي كام يوم علي التوهان ده وفهد بيتحاشي الكل وخصوصا جميله اللي نظراتها بتقتله من بعيد …
ميس راحت مكتبه : انا رايحه عند جدك تيجي معايا !
فهد : عايزاني معاكي !
ميس : طبعا حبيبي
راحوا مع بعض يزوره في المستشفي لانه تعبان جدا ..
فرح بيهم جدا وكانت نظراته غريبه لفهد
شريف : ميس انا تعبان قوي وحاسس ان دي النهايه
ميس : بابا انت هتخف وهتبقي كويس فاهم
شريف كان بيتكلم بتوهان بس مركز علي فهد وبصله قوي : ميس الحقي نفسك .. التعب وحش قوي .. الالم اوحش .. الوجع بيدمر البني ادم …انا غلطت كتير .. غلطت كتير قوي .. الحقي نفسك يا ميس قبل ما تندمي .. الحقي نفسك
ميس : بابا انت فيك ايه !! مالك !! انا هنادي الدكتور
شريف مسك ايدها : الدكاتره معدوش ينفعوني .. الحقي نفسك .. انا خلاص عمري انتهي ..
ميس سابت ايده : انا هنادي دكتور ..
جابت الدكتور بسرعه وبدأ يتحرك بسرعه
بص لفهد : ميس رجعي الحق لاصحابه يا ميس ..رجعي الحق لاصحابه
اخدوه علي العمليات وهو بيردد نفس الكلمه .. ميس انهارت من العياط وفهد ضاممها طول الوقت .. ليه بتحب ابوها كده ! ليه محوطاه بكل العنايه والاهتمام دول .. ليه كل ده !!
ميس مسحت دموعها ووقفت وبصت لفهد : فهد .. بلغهم في الفيلا يجهزوا اوضه لبابا انا مش هسيبه هنا تاني .. اكيد نفسيته تعبت من القعده هنا لوحده .. كلمهم يا فهد يالا
فهد استغرب : حاضر هكلمهم .. اهدي انتي بس
ميس : لا يا فهد مش هسيبه .. مش هسيبه هنا لوحده تاني
فهد ضمها : مش هنسيبه تاني خلاص اهدي
عيطت كتير وانتظروا اكتر لحد ما خرجوا من العمليات وقالوا حالتوا حرجه ودخل الانعاش
فهد اتصل بعمته ندي
ندي : خير يا فهد
فهد : بكره نبيله هانم هتطلع من الدار وهتيجي الفيلا عندي فلو تحبي تستقبليها
ندي ضحكت : هجيبها هنا عندي !
فهد : لا يا عمتو .. هترجع بيتها وحضرتك اهلا بيكي في اي وقت .. تيته هترجع بيتها عندي وقصادي ..
ميس دخلت وسمعت كلام فهد : انت قلت ايه ! ايه اللي سمعته ده !
فهد : كلامك يا امي .. قلتي مش عايزين نسيبهم لوحدهم
ميس : انا اقصد بابا
فهد : ودي جدتي .. ليه مهتمه بابوكي ومش مهتمه بام جوزك ! علشان هو اذاكي ؟ بتنتقمي من امه !! حتي لو بابا كان وحش هيا ملهاش ذنب
ميس : هيا اللي جوزت ابوك .. هيا اللي دخلت الحيزبونه دي بتنا .. هيا اللي نصرتها عليا
فهد : هيا ام عايزه ابنها يخلف بغض النظر عن الطريقه وبعدين النتيجه ايه !! بقي عندك ابن بيحبك وبيهتم بيكي طبعا ده لو بتعتبريني فعلا ابنك ؟
ميس تراجعت وضمته بحذر : طبعا ابني .. انت ابني يا فهد …
كملت جواها … ناوي علي ايه يا فهد يا ابن وليد وجميله ؟؟
جميله تاني يوم الصبح جاتلهم المستشفي وجابت فطار لهم وجهزته في الاوضه وميس قعدت وبصت لفهد اللي نايم علي الكرسي
ميس : صحيه يا جميله خليه يفطر
جميله صحته بهدوء وهو فتح عنيه شافها واتهيأله انه بيحلم .. فرك عنيه بس هو صاحي وسمع صوت ميس : تعال افطر
فهد بص حواليه مش مستوعب هو فين وبص لجميله باستغراب انها موجوده
ميس : في ايه مالك ! انا كلمت جميله تجيبلي ملف عايزه اراجعه وتجيب فطار
فهد : طيب ..
ميس : تعال افطر
فهد : هدخل اغسل وشي وافوّق كده الاول
سابهم ودخل وقف قدام المرايه مش عارف ليه كل حاجه متلخبطه معاه .. مش عارف ياخد اي قرار في اي حاجه ..
خرج كانت جميله جنب ميس بيتكلموا في الشغل وهو قعد قصادهم يتفرج عليهم
ميس بصتله : مالك ؟ افطر
فهد : ماليش نفس .. عايز قهوه
ميس : لا مفيش قهوه هنا .. انزل الكافتيريا
فهد بصلهم وجميله مرتبكه من نظراته
جميله : حضرتك عايزه حاجه تانيه مني ! ولا ارجع الشركه
ميس : لا خلاص روحي وزي ما اتفقنا
فهد وقف : انا نازل اجيب قهوه اجيبلك معايا ؟
ميس : لا يا حبيبي
خرج وجميله بصت لميس : امشي ؟؟
ميس : اه امشي وخليكي علي اتصال معايا
خرجت جميله كان فهد قدام الاسانصير وكأنه تعمد يستني لانها بمجرد ما وصلت الاسانصير فتح ودخل وبصلها تدخل وفضلوا ساكتين شويه … سالي طلعت من الاسانصير التاني ودخلت عند ميس
جميله : الف سلامه علي جدك
فهد : متشكر
جميله بتردد : دماغك كويسه !
فهد بصلها وما ردش ورجع بص لقدامه
الاسانصير اتحرك دورين ووقف
جميله : في ايه !
فهد : مش عارف
داس علي الزراير بس مفيش حاجه مستجيبه خالص ..
جميله : ايه وبعدين ؟
فهد بعصبيه : ممكن تهدي !
جميله : اهدي ازاي واحنا محبوسين هنا ! انت عارف ممكن يحصلنا ايه ! وخصوصا لو المروحه دي وقفت او النور اتقفل !!
مكملتش الجمله وفعلا النور اتقفل والمروحه وقفت
فهد : بركاتك .. نحستي الاسانصير .. يا ساتر منك
جميله مردتش عليه وهو افتكر انها بتخاف من الظلمه فقالها
فهد : ما تخافيش انا معاكي
اترددت جميله بس فعلا هيا عندها فوبيا من الظلمه .. بتترعب رعب غير طبيعي من الظلمه .. مسكت قميصه وهيا في ظهره بايديها الاتنين وكانت قريبه منه
فهد مكنش عارف يعمل ايه وفي نفس الوقت خوفها وحالتها دي بتخنقه لاقصي حد وبيتمني لو يقدر يمحي الرعب ده تماما من جواها .. الاسانصير اتحرك بعنف ووقف تاني وهنا جميله مسكت هدومه جامد قوي
فهد : جميله ركزي .. انا موبيلي مش معايا سيبته فوق موبيلك انتي فين !
جميله برعب : في شنطتي
فهد : طلعيه طيب
جميله ماسكه في قميصه برعب : ايديا مش بتتحرك
فهد بعصبيه : يعني ايه ايديكي مش بتتحرك انتي بتهزري !
جميله عيطت وهو تراجع : خلاص خلاص اهدي طيب ينفع انا اطلعه من شنطتك !!
جميله شاورت بدماغها وهو طبعا مش شايف
فهد : اعتقد انك موافقه
لف لها وهيا هديت شويه ومسك شنطتها منها
فهد : في مليون حاجه في شنطتك ومش من ضمنهم الموبيل
جميله بخوف : في جيب الشنطه اللي بره
فهد اخيرا قدر يطلع الموبيل وفتحه ونور وهنا بصلها وبيطمنها
فهد : لحظات وهنطلع من هنا اتفقنا
جميله بصوت مرعوب : الاكسجين قل صح ؟
فهد : الاكسجين كويس جدا بيتهيألك .. خوفك اللي بيهيألك ده !! دلوقتي معاكي رقم ميس صح مسجلاها باسم ايه !
جميله : ميس
فهد ابتسم : ميس كده بس … عارفه لو شافتك !!
فهد اتصل بميس واتفاجئت ان هو اللي بيتكلم
ميس : في ايه وبتتكلم من موبيل جميله ليه؟
فهد : احنا في الاسانصير ووقف بينا اطلعي شوفيلنا ايه المشكله يا امي وواقف ليه ويا ريت بسرعه
ميس : حاضر لحظه يا فهد
سالي : وجميله دي بتعمل ايه مع فهد !
ميس : مش وقتك يا سالي
ميس طبعا قلبت الدنيا وازاي مستشفي بالحجم ده اسانصيرها يعطل بس ده شيء وراد في اي مكان
واخيرا قدروا ينزلوا الاسانصير واول ما نور واتحرك
فهد : جميله حاولي تكوني طبيعيه لان اكيد كتير هيكون قدام الباب والكل هيسأل مالك
جميله استردت انفاسها وحاولت فعلا تظهر طبيعيه لحد ما خرجوا وسالي جريت علي فهد
سالي : حبيبي انت كويس
فهد استغرب تصرفها وبتلقائيه بص لجميله اللي بصت بعيد ومعرفش اي رد فعلها .. انسحبت بهدوء ومشيت
سالي راحت الكافتيريا مع فهد وفضلت تتكلم كتير بس هو دماغه مشغوله تماما ب جميله ورعبها اللي مالوش مبرر .. شخصيتها قويه جدا بس ليه بتترعب كده من الظلمه !! ايه مشكلتها !!
ندي كلمت فهد وبلغته ان نبيله وصلت البيت وقالتله انها هتقعد معاها كام يوم لحد ما تستقر او تقنعه يخليها تاخدها بيتها ..
بس حتي نبيله نفسها رفضت وطلبت من ندي تسيبها في بيتها مع حفيدها ..
اخر النهار فهد روح تعبان وعايز ينام في سريره لان بقاله يومين ما بينمش ولو نام بينام علي كرسي ..
قابل ندي عمته وجدته قاعدين ورمي السلام وطالع بس ندي وقفته
فهد : خير يا عمتو ؟
ندي : مش هترحب بجدتك !
فهد بصلها : ده بيتها محدش بيرحب بحد في بيته بعد اذنكم
طلع وسابهم وندي طلعت وراه
ندي : دي جدتك علي فكره
فهد : وبعدين !
ندي : المفروض تعاملها احسن من كده
فهد : ان شاء الله ممكن انام !
ندي : فهد ارجوك حاول تبص للامور من ناحيه تانيه غير ناحيه ميس .. سمعت لميس اسمع بقي من غيرها
فهد بص لعمته : اسمع لمين هاه ؟ هاه ! مين ؟ لابويا اللي سافر والله اعلم مين قتله ولا اختلف مع المهربين اللي كان بيتعامل معاهم ولا ايه اللي جراله ! ولا مراته الخدامه اللي فضلها عن مراته !! ولا لنبيله هانم اللي زرعت كل ده !! ولا لحضرتك اللي سافرتي بعيالك ولسه راجعه !! اسمع لمين !! هو كان معايا غير ميس !! عارفه يا عمتي حتي لو ميس وحشه حتي لو فيها كل عبر الدنيا فهيا امي وهيا اللي فضلت معايا وهيا اللي اتحملت المسؤوليه .. فايوه مش هسمع غير منها وبس … يا ريت بقي تريحيني وتريحي نفسك وتحمدي ربنا اني سمحتلك تشوفي والدتك وطلعتها من الدار وبطلي تضايقيني والا هوديها بس المره دي مش هعرفك حتي مكانها بعد اذنك
سابها ومشي واتضايق من نفسه انه زعل عمته بالشكل ده .. عمته ندي بالذات طيبه واكيد لو سافرت فممكن يكون غصب عنها وبدون سبب افتكر كلمه جميله وهيا بتقوله ((استمتع بوحدتك )) هو فعلا وحيد او هو بيفضل وحدته .. بس ليه دلوقتي مش عايز يفضل لوحده وليه جميله صورتها في باله !!
مكملش ساعتين نوم وموبيله رن وكانت ميس منهاره تماما
فهد : في ايه اللي حصل اهدي وفهميني
ميس : جدك تعب جدا .. دخل العمليات تاني يا فهد .. جدك هيروح مني
فهد : اديني دقيقتين وهكون عندك
وهو نازل قابل عمته : في ايه مالك !
فهد : رايح لامي بعد اذنك
خرج وهيا دعت ان ربنا يكشف غشاوه عنيه ويشوف ميس علي حقيقتها
خلال دقايق فهد كان عندها وهيا بتعيط جامد ومنتظره قدام العمليات .. وقف معاها ضاممها وساكت لحد ما الدكتور خرج
ميس : طمنا
الدكتور بأسف : انا اسف ..( ميس شهقت) قلبه وقف ومهما حاولنا ننعشه مفيش فايده والمخ كمان اتحرم من الاكسجين .. فالبقاء لله
هنا ميس انهارت علي الارض والدكتور نادي علي الممرضه ودخلوها اوضه وعطوها مهديء علشان تقدر تتحمل ..
طبعا العيله كلها عرفت والكل اتجمع والصبح بدري راحوا المدافن .. الكل كان موجود .. حتي جميله ووليد اخوها وليد كان بيبص للكل بقرف وكراهيه اما جميله فعنيها كانت مركزه مع فهد فقط .. ونظارته اللي مخبيه وشه وتعابيره واتمنت لو تعرف هو زعلان ولا عادي مش متأثر ولا ايه !!
الكل بيمشي بس فهد وقف وراح ناحيه قبر وقف قدامه شويه
جميله لاخوها : ما تيجي نعزي فهد !
وليد : اشمعنا ده الي نعزيه وبعدين ما احنا جينا وقمنا بالواجب خلاص بقي
جميله : فهد ابن عمتك يالا نعزيه واهو الكل مشي وبعدين عندي فضول اعرف ليه القبر ده وقف عليه ..
وليد : يالا
راحوا الاتنين عندوا و وليد حمحم وفهد بص ناحيتهم بصمت وجميله بصت للقبر واتفاجئت ان ده قبر وليد جوز عمتها
مسكت هدوم اخوها بتلقائيه اللي لمح الاسم علي القبر
وليد : البقاء لله فهد بيه
فهد : ونعم بالله متشكر
جميله : هو ده قبر باباك !
فهد : ايوه
جميله : بتشتاقله !
فهد بصرامه : لأ
الاتنين بصوله باستغراب ووليد سحب اخته : احنا هنروح … حضرتك عايز اي حاجه !!
فهد : لا شكرا .. ( بص لجميله ) خلي موبيلك متاح ديما علشان ميس لو احتاجتك
جميله : اكيد طبعا ما تقلقش
ميس فضلت يومين في المستشفي وبعدها فهد اخدها بيتها ودخلت شافت ندي ونبيله والغيظ ملاها اكتر واكتر
ندي : البقاء لله
ميس : انتي بتعزيني !! تلاقيكم فرحانين فيا انتي وامك .. ايوه فرحانين اني بقيت لوحدي .. بس عارفه يا نبيله هانم انا مش لوحدي انا معايا فهد .. فهد اللي كنتي عايزه تاخديه مني .. زي ما اخدتي ابوه مني .. حرمتيني من جوزي وكنتي عايزه تحرميني من ابني بس اهو ربنا نصرني عليكم وفهد انا اخدته منكم ومش هسمح لحد يقرب منه ابدا ..
ندي : محدش اخد منك حاجه.. انتي معرفتيش تحافظي علي جوزك
ميس صرخت : اخرسي انتي تخرسي خالص
ندي : احنا بنعزيكي يا ميس انتي اللي بتفتحي في القديم
ميس : انا مش عايزه عزاكم .. مش عايزاه
فهد اتدخل وشد ميس ؛ خلاص يا ميس يالا مش وقته الكلام ده ..
اخدها اوضتها وقعد جنبها
ميس مسكته : اوعي تتخلي عني .. انا مبقاش عندي غيرك .. ندي جايه هنا علشان تاخذك مني انا فهماها .. عايزين يقلبوك ضدي .. اوعي تسيبني يا فهد
فهد ضمها لحضنه : عمري ابدا .. عمري اطمني .. محدش ابدا هيفرقنا عن بعض ابدا .. ما تقلقيش انا ابنك انتي وبس
الكل بيتجمع في البيت اخر النهار ويفضلوا كام ساعه ويروحوا ..
محي : بقولكم ايه اللي مات كان غالي علينا كلنا بس دلوقتي وقت الشغل احنا داخلين علي مشروع ضخم ومحتاج تركيزنا ياريت الكل بقي يركز
فهد : ميس محتاجه لفتره
محي : الحزن في القلب .. تحزن زي ما هيا عايزه بس الشغل اللي هيطلعها من حالتها دي ..
فهد هيتكلم تاني بس ميس قاطعته : عمك محي عنده حق الشغل هيطلعني .. من بكره هتابع الشغل ما تقلقوش عليا ..
مسكت ايد فهد علشان ما يتكلمش ولا يقف قصاد محي اللي الكل بيعتبره الكبير …
الصبح كان فهد نازل شغله بس كعادته وقف عند حوض الورد .. وقف بيتأمله وفجأه سمع صوتها : صباح الخير .. جميل قوي القلب اللي في النص ده
فهد بصلها بلامبالاه وما ردش
جميله سمعت حكايات كتيره عن حوض الورد ده وازاي عمتها زرعته هيا و وليد وازاي كانوا بيهتموا بيه مع بعض .. حاولت تعرف فهد يعرف حاجه عن الحوض ده ولا !!
جميله : الابيض والاحمر حلوين قوي مع بعض .. منظر حلو قوي تصطبح بيه ..
فهد بصلها : منظر حلو !! المنظر الحلو ده انا بكرهه فوق ما تتخيلي .. المنظر ده اتعمل بشقي وتعب امي ..
جميله فكراه بيتكلم عن عمتها وفرحت : ليه بتقول تعب ! مش يمكن يكون حب وطيبه خاطر ..
فهد نسي هو بيتكلم مع مين بس الغيظ كان مسيطر عليه وزعق : حب ايه ! تخيلي جوزك يطلب منك انتي هانم القصر انك تزرعي ارض وانتي هانم عمرك ما اشتغلتي بايدك بس يشغلك غصبا عنك وليه علشان حته خدامه عايزه الحرق كانت عايزه قلب في النص .. خدامه ما تسواش نكله تأمر والمحروص جوزها ينفذ فيهين مراته ويجبرها تخدم خدامتها وكل ده ليه علشان سيادته ريّل قدام جمالها ..
جميله اتصدمت لانه فاهم كل حاجه بالمقلوب وكان نفسها تمسكه وتصرخ وتفهمه
ندي كانت وراها : انت بتقول ايه ! الحوض ده يشهد علي اعظم قصه حب ودليل حبهم
جميله اتراجعت واتمنت ان عمته تفهمه
فهد زعق لعمته : الحوض ده دليل خيانته وفراغه عينه .. ( جت تتكلم بس قاطعها ) ولو هتفضلي تتكلمي عنها قسما بالله همنعك من دخول البيت ده تاني وهنسي انك عمتي واهي قله الاصل وراثه في عيلتنا ابويا قبل كده نسي انها مراته وانا هنسي انك عمتي فارجوكي ما تضطرينيش لحاجه زي دي ( بص لجميله ) وانتي واقفه هنا ليه ! مش جايه لميس هانم اتفضلي اطلعيلها يالا .. جميله جريت من قدامه وهو مشي علي شغله
دخلت الفيلا شافت حد قاعد علي كرسي بتحاول تمد ايدها تمسك كوبايه ميه ومش قادره فجريت هيا بسرعه واخدت الكوبايه وسقتها .. نبيله بصتلها كتير وحست انها قدام جميله .. عيونها دمعت ونطقت كلمه مش واضحه بس مفهومه
نبيله : ج م ييي له
جميله ابتسمت : اه انا جميله
اتفاجئت بميس من فوق : جميله !! بتعملي ايه عندك ؟ تعالي هنا وسيبي الست دي ..
جميله قضت وقت طويل مع ميس اللي متضايقه منها وبتشغلها اي حاجه وخلاص وحست ان وجود نبيله في البيت خطر عليها
فهد نزل شغله وذكريات كتير بتطارده
افتكر ميس بتحكيله ازاي زرعت حوض الورد ده وازاي حرتت الارض وجميله ووليد قاعدين بيتفرجوا عليها ويضحكوا .. حكتله ازاي كان بيلبس جميله اشيك القمصان وياخدها لاوضتها يفرجها علي جمالها ويقولها تخيلي انا هقضي الليله ازاي معاها!! افتكر ازاي جميله غارت من ميس وقصتلها شعرها كله علشان ما تعرفش تنزل الشغل بتاعها وتحرجها وازاي وليد ساعتها طردها من بيته وطلقها علشان زعلت جميلته
افتكر ازاي اخد جميلته شهر عسل وازاي اخد ميس تخدمها وتشهد علي كل حاجه وازاي حول ميس من هانم لخدامه جميله وازاي حول جميله من خدامه ميس لهانم عليها .. افتكر حاجات كتير قوي وزاد كرهه اكتر واكتر لجميله ولوليد ..
روح بيته علي اخره مش طايق اي حد ودخل كانت نبيله بتنادي علي اي حد يساعدها
اتردد كتير بس دخل عندها : نعم
نبيله ابتسمت : م يه
فهد بص حوليه وشاف الميه فصب كوبايه ومد ايده لها وحاولت تمد ايدها بس مقدرتش فبصتله
فهد : ما تتوقعيش اني هسقيكي بايدي فيا تمدي ايدك وتشربي يا تفضلي عطشانه لحد الصبح بنتك تجيكي
نبيله عنيها دمعت وبصتله وشاورت بدماغها خلاص مش عايزه تشرب وهو حط الكوبايه بعنف علي الكمود جنبها وخرج بره الاوضه
قفل الباب ووقف ينهج .. منين جاب القسوه دي كلها .. ده ايه جبروته ده .. لف وشه هيدخلها يسقيها
ميس : ادخلها واسقيها
وقف وبص لميس
ميس : بتبصلي ليه ! ادخلها اسقيها ! اسقي اللي علمتني كل شغل البيت وعلمتني ازاي اطبخ لان جميله هانم امرت اني انا اشتغل كل شغل البيت وطبعا ابوك كان بينزل الشغل بس قبل ما ينزل كان بيدي اوامره لوالدته وينبه عليها انها تتأكد ان جميلته تفضل هانم وان اوامرها تتنفذ بالحرف وكانت نبيله هانم تقف فوق راسي وتخيلني انا ميس شريف الهانم انضف اوضتها وانضف حمامها واشيل هدوم جوزي اللي في اوضتها وهدومها هيا المرميه في الارض وكانت تحكيلي ازاي جوزي دلعها طول الليل وسابني اعيط طول الليل .. كانت بتحكيلي بالتفصيل كل حاجه عملها .. والست اللي جوه دي كانت بتنصرها عليا .. انت عارف شعري قصوه ليه ! علشان في مره وانا بخدمهم شعري اتفك علي كتف وليد جوزي .. اتجننت واستنت لما هو مشي وجم الاتنين جميله وهيا كتفوني وقصوه وانا بدافع عن نفسي زقيت جميله وقعت ابوك ضربني علشانها ..لطشني بالقلم علشانها وطلقني فيها ورماني بره بيته .. جرجرني علي السلم ده ورماني زي الكلبه بره بيته .. فكل ده عادي ادخل يا فهد واسقيها بايدك .. ادخل وما تهتمش بدموع امك .. ( زعقت )ادخل اسقيها مستني ايه ؟
فهد اتحرك وضم ميس يهديها وشالها دخلها اوضتها
فهد : حقك عليا انا .. انا ما دخلتش علشان هيا جدتي لا انا بس اعتبرتها حد كبير
ميس : لا يا فهد لا .. النار اللي جوايا ما بتهداش ابدا فمش مسموحلك تعتبرها حد كبير دي سبب كل اذيتي .. ربنا عمل فيها كده علشان بيخلص ذنبي انا .. انت هتعرف اكتر من ربنا .. ده عقاب ربنا ليها ..
فهد : خلاص حقك عليا .. ولو مضيقاكي قوي كده وعايزاني اطردها هطلع حالا ارجعها مكان ما جبتها او هرميها في اي مكان محدش يعرف طريقها تاني .. اللي يرضيكي هعمله المهم ما تزعليش ابدا .. زعلك عندي بالدنيا يا ست الكل
ميس ابتسمت بانتصار من كلام فهد
ميس : هترميها علشاني !
فهد : انتي تشاوري وفهد ينفذ وبس
ميس :
بقلم / الشيماء محمد ( شيموووو)
رواية جميله الجزء الثاني للكاتبه شيمو
الحلقه الثامنه
علشان خاطركم حلقه زياده اهي بس ياريت الناس تكون صاحيه بقي …..
ميس : هترميها علشاني !
فهد : انتي تشاوري وفهد ينفذ وبس
ميس ابتسمت بس لازم تكسب احترام فهد مع ولاؤه لها
ميس :حبيبي كنت واثقه في حبك بس لا يا حبيبي دي مهما كان جدتك ولازم تراعيها
فهد باسها وخرج من اوضتها .. افكار كتير متزاحمه في دماغه .. افتكر اول مره سمع كلامها ده كان ساعتها يدوب راجع من السفر بعد دراسته كان عنده تقريبا ١٤ او ١٣ سنه مش متذكر بالظبط بس فاكر انه طلب يزور جدته وميس اخدته المستشفي وكانت نبيله تحت رحمتها علي طول بتخدرها وبتديها مهدئات وده اللي دهور صحتها .. ميس اقنعته انها مجنونه بس هو اصر يشوفها .. كانت موصيه الدكتور ان فهد ما يتكلمش مع نبيله ابدا ..
بالفعل راحوا ودخل عندها بس كانت نايمه وايديها مربوطه في السرير
فهد : هيا مربوطه ليه !
الدكتور : علشان ما تأذيش نفسها .. حالتها الصحيه والنفسيه من بعد موت والدك ما اتحسنتش نهائي
فهد : امال انت بتعمل ايه ! لو مش عارف تعالجها قول واحنا ناخدها لدكتور تاني
الدكتور اتوتر وبص لميس اللي اتدخلت
ميس : فهد حبيبي الدكتور بيعمل كل اللي يقدر عليه ..ما ينفعش نتهمه اتهام زي ده ولا ايه رأيك !
فهد : ماهو يا ماما بقالها قد ايه وما عالجهاش يبقي هو مش عارف
ميس : او تبقي هيا حالتها متأخره .. في ناس يا فهد مش بتتحمل الصدمات ابدا تيته من الناس دي ..
الدكتور : طيب يا ميس هانم ينفع كلمتين بره لو سمحتي
ميس : حاضر .. فهد دقيقه ورجعالك وانت اشبع من تيته قبل ما تسافر تاني
ميس خرجت مع الدكتور
ميس : في ايه !
الدكتور : صحتها بدأت تتعب وممكن تموت فيها .. قلبها معدش مستحمل
ميس بلا اهتمام : وهيجرالها ايه ؟ هتموت ؟
الدكتور : ايوه فعلا ممكن تموت
ميس : طيب هبقي اعملها جنازه ما تحلمش بيها .. زي جنازه ابنها بالظبط !!
جوه مع فهد مسك ايديها : تيته كان نفسي تبقي كويسه وتقومي .. تيته .. كان نفسي تكوني معايا وتمنعي ماما تسفرني كل شويه وتقوليلي يا تري بابا وحش قوي زي ما هيا ديما بتقول !! تيته فوقي بقي واثبتيلهم انك كويسه وانك مش مجنونه ابدا
فجأه نبيله فتحت عنيها وبصتله كتير قوي
نبيله بتعب : فهـ د
فهد ابتسم : تيته ايوه انا .. انا هنادي ماما والدكتور
مسكت ايده بضعف : ماما مين !
فهد باستغراب : ماما ميس هو في غيرها !!
نبيله : ميس مش امك يا فهد ميس هيا
دخلت ميس علي صوت نبيله : يعني يوم ما تفوقي تحاولي تقلبي ابني عليا
فهد : ماما تقصد ايه تيته ؟
ميس : ما تقصدش .. دكتووور
الدكتور دخل عندها وشاورت علي نبيله بتوعد
الدكتوو : نبيله هانم اهلا بيكي انتي عارفاني ! انا الد
قاطعته : انت اللي بتنومني ديما ومش عايزني اصحي بتعملوا فيا كده ليه ! انتو رابطني ليه !! فكوني !! حرام عليكم
بدأت تعلي صوتها وتصرخ وفهد خاف ورجع لورى وميس ضمته : ما تخافش حبيبي الدكتور هيهديها دلوقتي
الدكتور رن الجرس والممرضه جت تجري وطلب مهدئ وكتفوها وعطوها المهديء ونامت تاني وهيا باصه لفهد
نبيله : ميس مش امك يا فهد .. ميس .. مش امك …. امك ……. هيا …. ج ميله
وراحت من تأثير المهديء بس فهد بص لميس : جميله ! مين جميله ! جميله دي مامتي !! ايوه انا فاكرها !! انا فاكرها
ميس شدت ابنها وخرجت بيه بره وبصت للدكتور بنظره اترعب منها ووصلت للفيلا وفهد طلع علي اوضته ومهما تكلمه الي انه مش بيرد عليها لحد ما طلعتله وقعدت جنبه بهدوء : مالك ! كلمني
فهد : انا فاكر جميله دي !! الاسم ده مش غريب عني ابدا ..
ميس : وبعدين عايز ايه !
فهد : تقوليلي الحقيقه !! تقوليلي مين جميله بالظبط ! وتيته تقصد ايه بإنك مش مامتي ؟ انا فاكر حاجات وناسي حاجات ومش عارف اصلا .. انا متلخبط
ميس : وانا هقولك كل حاجه حبيبي .. ايوه انت مش ابني وانت ابن جميله
فهد شهق ووقف من علي السرير : انتي مش امي !!وجميله فين !! وليه سابتني !! فهميني اكتر
ميس اخدت نفس طويل وبدأت تحكي : بدايه كده لازم تعرف يا فهد اني بحبك جدا حتي لو انت مش ابني بس انا اعتبرتك حته مني واعتبرتك ابني ..
فهد : طيب احكيلي كل حاجه وما تخبيش عني اي حاجه .. عايز اعرف كل حاجه
ميس : انا ما بخلفش يا حبيبي .. ربنا اختار اني اتحرم من النعمه دي وطبعا باباك كان عايز يخلف باي طريقه المهم انه يخلف ويبقي اب وجدتك نبيله كانت عايزه حفيد علشان يورث الشركه والاملاك ومحدش فيهم راعي مشاعري ابدا .. جدتك سافرت بلد جنبنا ونقت بنت جميله قوي وجابتها معاها وقالتلي انها خدامه ويتيمه ومسكينه وانا عطفت عليها ووافقت انها تفضل معانا بس بعد كده لاحظت نظرات باباك لها قلت يمكن لانها حلوه شويه وبعدها اكتشفت بالصدفه لما سمعت باباك وجدتك بيتكلموا عن الجواز ولما واجهتهم قالولي ان وليد هيتجوزها علشان تخلف
قولتلهم وانا ! قالولي يا تقبلي وتسكتي يا تخلفيلنا وريث يا الباب قدامك ولاني كنت بحب باباك جدا وافقت انه يخلف علشان ما احرموش من الخلفه ولما بابايا زعل منهم وطبعا كان صاحب اسهم في الشركه ومش عايزين يخسروه اقنعونا انا وهو ان البنت دي هتخلف وتاخد قرشين وهتمشي والبيبي هيتكتب باسمي
فهد : وهيا وافقت علي كده !
ميس : ايوه كانت عايزه فلوس فوافقت تخلف وتمشي
فهد : وعملت كده ؟ خلفتني ومشيت ؟
ميس حطت ايدها علي دماغه بحب : لا يا حبيبي .. طمعت في كل حاجه .. لعبت علي ابوك وعملت عليه بنت مثاليه وطبعا مع جمالها الفتان ابوك ما استحملش ووقع في غرامها ونسي كل وعوده ليا وبقت هيا الكل في الكل .. عكسوا كل الادوار خلوني انا خدامتها وهيا هانم عليا ( بدئت تحكي كل حاجه عملتها في جميله بالعكس ان جميله عملتها فيها )
فهد : وانتي ليه فضلتي ! ليه وافقتي يعاملوكي كده !
ميس عيطت جامد ووقفت : كنت بحبه ومستعده استحمل اي شيء علشانه .. انت متعرفش انا حبيت وليد قد ايه ؟ اسوأ شيء ممكن يحصل للانسان في حياته هو الحب
الحب نزلني من هانم لخدامه .. الحب اهاني .. الحب خلي واحده زي جميله تدخل شركه ابوك وتقعد وتحط رجل علي رجل .. الحب اسوأ شيء يا فهد فأوعي في يوم تفكر وتحب ..
فهد : وبعدين ! لما خلفت !
ميس : ابوك طلقني ورماني ولبسني تهمه .. وخلي البوليس يقبض عليا وساوم بابا علشان يتنازل عن المحضر بابا يتنازل عن نصيبه في الشركه وطبعا بابا وافق وبعدت عنهم
فهد : ورجعتي تاني ازاي !
ميس : جميله وابوك اشتغلوا في التهريب وفي الممنوع والاجهزه المضروبه وده لان جميله كانت عايزه فلوس اكتر واكتر وما بتشبعش فاقنعت ابوك يشتغل في التهريب
لحد ما ابوك في سفريه اتقتل والشركه وقعت وطبعا ساعتها جميله خافت انها تشيل الليله لان اخر طلبيه اتمسكت في المينا فهربت بس قبل ما تهرب جاتلي وقالتلي لو انا عايزاك اخدك لانك ما تلزمهاش ومش عايزه حاجه تمنعها تتجوز تاني ولاني خفت منها ترجع في كلامها خليتها تمضيلي علي ورق وانا اتبنيتك رسمي وبقيت ابني .. واعمامك ساعتها رجعوا الشركه ورجعوني معاهم واشتغلنا كلنا مع بعض نصلح اللي ابوك عمله ولان ابوك كان اكبر نصيب وعلي الرغم من انه مكنش حقه بس اعمامه قالوا ابنه برضه يكون اعلي نصيب وخلوا اعلي نصيب باسمك انت .. قولي بقي يا فهد انا غلطت في ايه ؟ انا رفضت اسيبك واخدتك وحافظت علي ميراثك وحتي جدتك اللي اذتني اختارتلها اكبر مستشفي اعالجها فيها لو واحده غيري كانت رمتها .. قولي غلطت في ايه انا علشان انت تزعل مني وتخاصمني وتاخذ اليوم كله ما تكلمنيش ! جميله خلفتك ورمتك والله اعلم تلاقيها اتجوزت راجل تاني تلعب عليه .. وما سألتش عنك حتي مره واحده .. غلطت انا يا فهد رد عليا
عيطت وفهد قام ورمي نفسه في حضنها
فهد : من هنا ولاخر يوم انتي مامتي .. انتي وبس !!
ميس مسحت دموعها وضمته بحب وانتصار : طبعا يا قلبي لاخر يوم في عمري انت ابني وحته مني ..
فاق فهد من ذكرياته الكتيره دي .. مش عارف يفكر ازاي ! حس انه متلخبط .. جدته صعبانه عليه .. بس ميس كمان اتظلمت كتير .. طيب صلاح وكلامه .. بلاش عمته ندي .. حاجات كتير في دماغه هتخلي عقله ينفجر من التفكير .. طيب ابوه كان فعلا راجل وحش وبيشتغل في التهريب ولا زي ما صلاح قال كان كويس ؟؟ طيب اعمامه ممكن فعلا لو عارضهم يقفوا في وشه ولا هيطبطوا عليه .. لخبطه لخبطه لخبطه !!
قام خرج من اوضته نزل الجنينه و وقف عن حوض الورد … يا تري مين اللي زرعكم ؟ ميس فعلا زرعتكم ؟ ولا ايه ! نفسي الاقي حل للحيره دي !!
جدته عطشانه فوق ! ليه ما سقاهاش ؟ ليه سمح لقسوته تسيطر عليه بالشكل ده !
طلع براحه وفتح اوضتها بس كانت نامت قفلها وراح اوضته والنوم حلف ما يقرب منه
واخيرا طلع النهار وراح شركته
جميله كانت معاه في مكتبه بتتكلم معاه في شغل بس هو مش مركز نهائي
جميله : وبعدين معاك !
فهد : نعم
جميله : ركز هنا شويه
فهد قفل الملف في ايدها : مش قادر افكر في الشغل
جميله باستغراب : افندم !
فهد : بتخافي من الظلمه ليه كده ؟
جميله عنيها وسعت وبصتله قوي وفهد بصلها وبيشاورلها تجاوب علي سؤاله
جميله : ده شيء ما يخصكش
فهد ابتسم : طيب وعد مش هقول لحد بتخافي ليه بقي ! علي فكره خوفك مش طبيعي ده مرضي
جميله : مرضي ولا غير مرضي ده شيء لا يخصك من قريب ولا من بعيد
فهد : طيب ايه حكايه العفاريت معاكي !!
جميله : استغفر الله العظيم .. يا ابني امضيلي الورق ده خليني اروح اشوف شغلي
فهد : ابنك ! همشيها ابنك بس جاوبيني
جميله : عندي عقده من وانا صغيره خلاص
جاوبتك !
فهد مد شفايفه بعدم اقتناع : لا طبعا لو في موقف او حاجه حصلتلك وانتي صغيره فهتكون زي الفيلم في دماغك بكل تفاصيلها بكل معالمها ومش هتتمحي ابدا وده اللي بيحصلك لما بتكوني في ظلمه بتعيشي الموقف ده من تاني مفيش تفسير تاني
جميله : ما شاء الله عليكي دكتور نفسي ميه ميه .. ما تسيبك بقي من الشركه اللي مش عارف تركز في شغلها وتفتح عياده علاج نفسي
فهد : انتي رخمه ليه ! ما تحكيلي !
جميله : طيب انت احكيلي الاول ليه انت كده وايه اللي شكل شخصيتك دي بالشكل ده وليه مش بتنطق اسمي نهائي وديما تقولي انتي انتي
فهد بصلها ورفع حاجبه قوي
فهد : قوليلي انتي الاول ليه بتخافي من الظلمه بالشكل ده ؟؟
هيا ابتسمت وقربت قوي من وشه وسندت بايديها علي مكتبه : في ايه في القرآن بتقولك ايه
فهد قرب اكتر : ايه ؟
جميله 😞 يَا أَيُّهَا الَّذِينَ آمَنُوا لَا تَسْأَلُوا عَنْ أَشْيَاءَ إِنْ تُبْدَ لَكُمْ تَسُؤْكُمْ ).
فهد كشر شويه : الايه بتقول كده فعلا !
جميله : ايوه بتقول كده فما تسألش كتير
فهد سرح شويه وبيتكلم كأنه بيكلم نفسه: ممكن يكون عندك حق !! ممكن اكون انا مش عايز اعرف الحقيقه وممكن لو عرفتها تضرني اكتر ما هتنفعني ! بس في حاجات لازم الواحد يعرفها ! الحقيقه ساعات بتوجع اكتر من الكدبه
جميله كشرت لان مش ده ابدا اللي هيا عيزاه .. هيا عايزاه يعرف الحقيقه كامله
جميله : بس كتير الحقيقه بتريح الواحد حتي لو هتتعبه برضه هتريحه
فهد : ما انتي لسه قايله اهو ان تبد لكم تسؤكم
جميله :كماله الايه بتقول ايه ( يَا أَيُّهَا الَّذِينَ آمَنُوا لَا تَسْأَلُوا عَنْ أَشْيَاءَ إِنْ تُبْدَ لَكُمْ تَسُؤْكُمْ وَإِنْ تَسْأَلُوا عَنْهَا حِينَ يُنَزَّلُ الْقُرْآنُ تُبْدَ لَكُمْ عَفَا اللَّهُ عَنْهَا وَاللَّهُ غَفُورٌ حَلِيمٌ )
فهد بعدم فهم : مش فاهم
جميله : الايه انا وصفتها غلط هنا
فهد : وايه الصح بتاعها ؟
جميله : الايه نزلت للناس اللي كانوا بيسألوا الرسول عليه افضل الصلاة اسئله كتيره عن دينهم مثلا وساعتها الرسول لازم يجاوبهم وبما ان الوحي بينزل عليه فممكن اجابة السؤال تكون واجبات اضافيه عليهم فتكون مشقه فنزلت الايه تمنعهم عن ده لكن بعد ما توفي الرسول عليه الصلاة والسلام من واجبنا نسأل ونعرف لان خلاص مفيش وحي ومفيش حاجه جديده هتضاف فلازم نعرف ونسأل
فهد : انتي عندك معلومات كويسه
جميله : فوق ما تتخيل
فهد ابتسم : طيب انا سألت جاوبي
جميله : طيب سؤال قصاد سؤال وابدأ انا الاول وممنوع الكدب تماما
فهد فكر لحظه : موافق
جميله : ليه ما بتقولش اسمي
فهد : انا بقوله علي فكره
جميله كشرت : انت ما نطقتش ولا مره اسمي
فهد فكر لحظه : في حد مر عليا في حياتي كان بنفس الاسم وجرحني وانا بكره الاسم ده …. دورك
جميله كشرت : لا مش لاعبه
فهد : انتي هتنصبي من اولها !
جميله : انت اللي بتنصب باجابتك العايمه دي .. حد بتكرهه نفس الاسم ؟ دي بذمتك اجابه ! طيب انا هجاوبك .. مر عليا موقف مخيف في الظلمه ومن ساعتها بخاف جاوبتك اهو….. دورك
فهد: لا ده نصب علني
جميله : نفس نصبك .. سلام
جت تمشي بس وقف علشان يطولها ومسكها من دراعها يوقفها وشدها : تعالي هنا
جميله كانت هتقع من شدته فسندت بايدها التانيه علي دراعه التاني فبكده ايديه الاتنين ماسكين ايديها الاتنين ودي كانت لحظه دخول سالي عليهم وجميله سابت فهد بسرعه وجت تخرج بس سالي مسكتها من ايدها : جميل قوي تمثيلك الشرف والنرفزه لما حد يكلمك ما انتي اهو في حضنه
جميله بصتلها : حضرتك فاهمه غلط وانا ما اسمح
قاطعتها : اخرسي اوعي تكملي .. فاهمه ! اوعي لقسما بالله اجمعلك كل الموظفين هنا واقول انك كنتي في حضنه
جميله بصت لفهد اللي قعد واسترخي في كرسيه وبيتفرج عليهم وفهم نظرة جميله بس شيء جواه خلاه يسكت ويتفرج وجميله فهمت انه مش هيتدخل علشانها
جميله : حضرتك فاهمه غلط انا كنت هقع و
سالي: وهو سندك صح !! اصل فهد من النوع ده صح !
جميله وقفت قصادها : امال فهد بيه من اي نوع .. شكل حضرتك عارفه انواعه كويس او … او ممكن مجرباها وبالتالي مش فاهمه معني حاجه بريئه زي هقع مثلا .. عقلك مش مستوعبها ومتخيله انك طالما بتغلطي يبقي كل الناس بتغلط
سالي اتنرفزت قوي : انتي ازاي تجروئي ؟
جميله : بنفس الجراءه اللي حضرتك بتتكلمي بيها
سالي رفعت ايدها علشان تضرب جميله بس جميله مسكت ايدها
جميله : عهد العبيد خلص زمان هو محدش بلغك !! انا هنا مهندسه وكنت معيده في الجامعه قبل ما اشتغل هنا فأوعي حضرتك تتخيلي اني علشان شغاله هنا انك هتكوني رئيسه عليا او تأمري او الكلام الفاضي ده
فهد مستمتع لاقصاه وعجبته شراسه جميله وعاجبه كمان لخبطة سالي اللي مش عارفه تعمل ايه وصعبت عليه
سالي بعجز : اطلعي بره شركتي
جميله : اوعد حضرتك انها اول ما تبقي شركتك انا مش هعتبها ابدا .. بعد اذنكم
خرجت وسالي هتعيط من كتر الغيظ وبصت لفهد بغيظ : كنت بتعمل ايه ؟ ماسكها كده ليه !
فهد بص للملف قدامه : عادي يعني ! انا مش فاهم انتي متعصبه كده ليه يا سالي ؟
سالي بغيظ : البت كانت في حضنك
فهد : وايه يعني !
سالي : يعني ايه ايه يعني ؟
فهد : خلينا في الشغل
سالي : كلم عمك محي بعد اذنك
خرجت وسابته وهو قام مبتسم بدون سبب وراح ناحيه مكتب ميس وهو عارف ان جميله هناك ومني السكرتيره شافته واستغربت ابتسامته اللي تقريبا اول مره تشوفها
فتح الباب وجميله بصتله بغيظ بس هو ابتسم : هنكمل لعبتنا والمره الجايه هتكون من غير نصب
خرج وقفل الباب وهيا ابتسمت لانها كانت متخيله انه هيتخانق معاها بسبب سالي
محي قعد مع فهد وفضل يتكلم كتير جدا عن العيله واهميتها والثقه
فهد قاطعه : عمي اذا سمحت .. ادخل في الموضوع مباشره
محي : اوك هدخل في الموضوع .. عايزك تتجوز سالي
فهد بصله باستغراب : نعم
محي : انت تتجوز سالي بنت عمك علاء
———————
علاء راح الجامعه وهناك قابل بنت وقفها
علاء : لو سمحتي انا تايه هنا
البنت : عايز تروح فين حضرتك
علاء : كنت عايز المكتبه بتاعت تصوير الورق في دكتور صاحبي عايز اقابله وقالي ان مكتبه في المبني اللي فيه المكتبه
البنت : في كذا مكتبه للتصوير هنا .. حضرتك عايز اي فيهم في المكتبه الرئيسيه هناك اهي وفي واحده في اتصالات بس صغيره وفي تحت مبني اعدادي واحده هو في اي مبني فيهم
علاء حط ايده علي دماغه وهرشها وابتسم : مش عارف
البنت ضحكت : وبعدين !
علاء : هتصل بيه واعرف
علاء بعد خطوه واتصل واتكلم ورجع ناحيتها : يعني قدامك نص ساعه لسه ؟ يا نصاب طيب امشي انا ….. يعني انت عايزني اتلطع في الشمس نصايه بحالها
قفل وبص للبنت وهز أكتافه : طيب اقدر استناه فين النصاب ده لحد ما يرجع
البنت : في كافتيريا اتفضل هوصلك لعندها
علاء مشي جنبها : اه انا علاء .. علاء محي الدين نصّار
البنت : اهلا بحضرتك باشمهندس علاء
علاء : انا فعلا مهندس بس انا قلتلك علاء بس
البنت ابتسمت : وانا مي .. مي صلاح عبدالكريم
علاء ابتسم : في سنه كام !
البنت : في سنه ثالثه وكلها سنه واتخرج
علاء : ان شاء الله يا قمر .. طيب تسمحيلي اعزمك علي حاجه ومش هقبل رفض ابدا
قعدت معاه بحسن نيه وهو فرد كل سحره عليها ….
……………….
امل راحت الشركه تزور سالي اللي كانت علي اخرها وطلعت غيظها كله علي المسكينه امل اللي مش عارفه تقف قصادها
سالي : كالعاده لبسك وشكلك ! انتي علي فكره لو مخسيتيش شويه انا هبطل امشي معاكي .. مفيش اي شاب عدل هيبصلك ابدا .. البنطلون واسع كده بهبل والبلوزه طويله وغبيه والالوان ايه مش قادره اقولك مش عارفه يعني بتكون عنيكي فين وانتي بتلبسي .. طيب قولي لمامتك تلبسك لو مش بتعرفي .. يا الوانك يا امل
امل عيطت ومردتش عليها
سالي : اووووف ناقصه بقي كمان عياط زي الاطفال البيبيهات .. انتي مستحمله نفسك ازاي بس
خرجت امل من عندها تعيط وبتجري وخبطت في حد وقعت اللي في ايده
امل مسحت دموعها بايديها زي الاطفال : انا اسفه
وليد : حصل خير ده يدوب مفاتيحي ..
وطي جابهم واتعدل : بس خلص الموضوع مش مستاهل اسفك ابدا
امل ابتسمت ربع ابتسامه : شكرا لحضرتك
وليد : برضه بتشكري ! ماشي يا ستي هقبل اسفك وشكرك بس بشرط
امل بخضه : شرط ؟ شرط ايه ؟
وليد بسرعه : لا ده انتي حكايه يا بنتي بهزر .. في ايه مالك ! انا بس كنت عايز اضحكك بما انك كنتي بتعيطي مش اخوفك زياده .. طيب بما اني خوفتك كده ينفع تقبلي واحد ليمون يهديكي قبل ما تمشي
امل : لا اصل
قاطعها : ولا اصل ولا فصل انتي خبطتيني ووقعتي مفاتيحي وممكن مفتاح عربيتي يكون اتكسر ومعرفش اروح ومش عايزه كمان نهدي بعصير ليمون
امل بخوف : بجد ممكن يكون اتكسر .. انا ممكن اكلم حد ياخده يصلحه او اكلم آسر يتصرف او بابا
وليد ضحك : انتي بتصدقي علي طول
امل ابتسمت : انت بتضحك عليا تاني !
وليد : اسف بس ارجوكي اقبلي عزومتي انا هموت من العطش
ندي : طيب اشرب حضرتك
وليد : يعني عايز ادي حجه لنفسي فارجوكي كوني حجتي
امل ابتسمت : طيب يالا
نزلوا الكافتيريا وطلب اتنين ليمون وقعدوا
وليد : مين صح بابا اللي هتكلميه !
امل : بابي خالد نصّار
وليد شرق وكح : انتي اخت آسر نصّار
ندي : ايوه آسر اخويا انت تعرفه !
وليد بلع ريقه بتمثيل واتكلم بخوف : آسر ده مديري .. انتي طبعا هتروحي تقوليله عندي موظف خبطني وارفده صح
امل بتلقائيه : والله ابدا
وليد بصلها باستغراب : انتي حكايه .. انا ممكن افضل النهار كله اشتغلك كده
امل ضحكت : انت بتهزر تاني ؟
وليد : تاني ايه بقي قولي عاشر علي فكره انا مش شغال في الشركه خالص فاهدي
جميله نزلت وشافت اخوها فراحت ناحيته وشافت امل وسلمت عليها
وليد : تعرفيها دي اخت آسر !
جميله : اه اعرفها
وليد : بس ايه نكته انما نكته
امل كشرت وبصت لجميله اللي خبطت اخوها في صدره وبصت لامل : عملك ايه البكاش ده !
امل : انتو زمايل صح !
جميله : لا ده وليد اخويا ..دكتور علاج طبيعي
امل : د/ وليد !!
وليد : هو انا مقولتلكيش اسمي اخص عليا
امل : وانا مقولتش اسمي برضه
وليد : اخص عليكي
امل ضحكت : انا امل
وليد : اهلا يا امل .. مش هتقولي بقي كنتي واخده في وشك كده ليه وبتعيطي ؟
جميله : ليه يا امل يتعيطي مين زعلك !
امل : لا مفيش بس اتضايقت شويه
جميله : امل ما تسمحيش لحد يهزك ابدا مهما يقولك .. خليكي قويه
وليد : شكلك فاهمه ايه اللي مزعلها طيب فهموني
امل : لا عادي ما تشغلش بالك .. المهم انا همشي علشان ما اتأخرش علي ماما
جميله : طيب هننزل نوصلك
امل : معايا عربيتي تحت
وليد : يعني مش عايزه حد وبتقولك تطلعي مين انتي علشان توصليها دي بنت صاحب الشركه
امل فتحت عنيها مستغربه وبتدافع : لا والله ابدا ما اقصدش .. انا بس بعرفكم
وليد هنا انفجر في الضحك فأمل كشرت وجميله ضربت اخوها : بطل غلاسه
وليد : مش قادر غصب عني .. يعني مش ممكن انتي مش ممكن .. انا ما تخيلتش ابدا انك هتصدقيني وبتدافعي كمان
امل : وبعدين بقي ..
جميله : امل حاولي حبيبتي ما تصدقيش كل كلمه يعني لازم ما تدافعيش علي طول خليكي في موقع الهجوم
امل : طيب اعمل ايه في نفسي انا كده .. بصدق اي حاجه .. آسر واحنا صغيرين كان بيفضل يلعب عليا النهار كله وحتي زمايلي بعد كده كانوا بيشتغلوني بس مش هزار زي اخوكي لا دول … يالا معلش
جميله : انتي لازم تتمرني .. الواد ده ممكن تتمرني عليه .. اتعلمي ما تهتميش شويه وما تصدقيش علي طول بلاش طيبتك قوي دي .. خدي شويه من بنت عمك سالي بس شويه صغيرين جدا اوعي تكتري
امل ضحكت : المهم مش هتوصلوني !
وليد : لا معاكي عربيتك بقي زقي عجلك
امل بزعل : طيب خلاص
وليد : يخربيت كده .. يا بنتي بهرج و الله بهرج
امل بصتله : خلاص ما تهرجش لحد ما اتعود
وليد : هتتعودي ازاي لو انا بطلت ! هاه !
امل : مش عارفه بقي .. هو يعني ايه زقي عجلك دي انا مش معايا عجل
وليد وجميله ضحكوا
وليد : يعني اتطرقي
امل كشرت مش فاهمه
جميله : اسكت انت .. دي يعني امشي يالا من هنا حاجه بالمعني ده
امل : طيب يالا زقوا معايا عجلي
ضحكوا الاتنين و وليد : انتي مسخره
امل : ليه مسخره !
وليد : امممم انتي حالتك مش بس مستعصيه دي انتي هوبلس كيس
امل : انا بقول كده برضه
——————
اخر النهار فهد داخل البيت ولفت نظره جميله واقفه مع نبيله وماسكه طبق بتأكلها ومبتسمه وبتتكلم كتير ونبيله مبتسمه فقرب منهم بحذر وسمع جميله
جميله : بس يا ستي ومش قادره اوصفلك شكلها وانا خارجه من مكتبه ودانها بتطلع نار
الاتنين ضحكوا وقاطع ضحكهم فهد
فهد : اوعي تكوني بتتكلمي عن سالي
جميله اتفاجئت بيه وتجاهلته وكملت وهو اتضايق : هو انا مش بكلمك
جميله خلصت وقامت وماشيه ولا ردت عليه وهو مشي وراها ونبيله بصتلهم ودعت دعوه صامته في قلبها
فهد : اقفي هنا كلميني زي ما بكلمك
جميله طنشته برضه ودخلت لمت ورقها واخدت شنطتها وخارجه
فهد زعق : اقفي هنا واتكلمي زي ما بكلمك
جميله وقفت وبصتله : دلوقتي بتكلمني !! لا يا سيدي متشكره عن كلامك انا في غني عنه ..
فهد : انتي بتقولي ايه انا مش فاهم
جميله : وانت تفهم ليه ! انت بس اقعد علي كرسيك زي الباشا وتتفرج
فهد فهم قصدها وبصلها : انتي كنتي مستنيه مني ايه بقي ان شاء الله !
جميله : ما انا بقول امشي احسن
فهد وقفها : استني واتكلمي عدل كنتي منتظره مني اقول ايه لسالي !
جميله : تقولها اللي حصل !
فهد : وايه هو اللي حصل ؟اننا كنا بنلعب ؟
جميله بغيظ : اني كنت هقع وسندت عليك
فهد بيغيظها اكتر : هو انتي كنتي هتقعي !
جميله وشها احمر وبصت حواليها وهو رجع خطوه لوري وضحك : بتدوري علي ايه !
جميله : علي حاجه تفتح دماغك اكتر يمكن تفوق وتركز كده طالما طول اليوم النهارده مش مركز .. انا هفوقك واخليك تركز
فهد : امشي يا بنت من هنا .. ابعت السواق يوصلك !
جميله بغيظ: لا شكرا فيك الخير
فهد خرج وراها : انا بتكلم بجد علي فكره
جميله بصتله وكملت طريقها : شكرا
فهد : طب اوصلك انا
جميله من غير ما تبصله : وليد بره
وشاورت بايدها باي وهيا ماشيه وهو وقف يتابعها ومبتسم ومن فوق واقفه ميس متابعه ومبتسمه : ايوه .. حبيه يا جميله واتعلقي فيه اكتر واكتر .. اتعلقي اكتر واكتر وبعدها اصدمك بخطوبته لسالي وجوازه منها .. ضحكت بشر اكتر واكتر وقبل ما ابنها يدخل رسمت الحزن علي وشها والتعب ..
قعد فهد مع امه شويه
فهد : انتي تعرفي ان عمي محي طلب مني النهارده اتجوز سالي ؟
ميس : وقولتله ايه !
فهد باستغراب : انتي مش مستغربه ؟
ميس : اكيد عمك قبل ما يكلمك هيكون عرفني ولا ايه ؟
فهد : وانتي مقولتيليش ليه !
ميس : عمك الكبير وهو المسؤل عن الامور دي
فهد : افهم من كده انك موافقه علي الارتباط ده ؟
ميس : طبعا موافقه وانت ؟؟
قبل ما يرد سمع فهد صراخ علية وبتنادي عليه وفتح الباب قابلها
علية : الحقني يا فهد بيه الحقني !
فهد : في ايه يا علية ايه اللي حصل ؟
علية : الست هانم الكبيره وقعت في الارض ومش بترد ولا بتفوق .. اطلب الاسعاف بسرعه يا ابني بسرعه يا فهد
فهد بص لميس اللي واقفه جامده وبصاله ومنتظره رده وتصرفه هيعمل ايه !!
بقلم / الشيماء محمد احمد
رواية جميله الجزء الثاني للكاتبه شيمو
الحلقه التاسعه
علية : الست هانم الكبيره وقعت في الارض ومش بترد ولا بتفوق .. اطلب الاسعاف بسرعه يا ابني بسرعه يا فهد
فهد بص لميس اللي واقفه جامده وبصاله ومنتظره رده وتصرفه هيعمل ايه !!
فهد اخيرا نطق : هطلب الاسعاف حالا وانتي يا علية حاولي تفوقيها
علية جريت وفهد طلب الاسعاف ونزل لجدته .. شالها وحطها علي الكنبه واتفاجيء وهو بيشيلها انها خفيفه جدا .. خفيفه لدرجه هو ما تخيلهاش ابدا .. ناشفه وعباره عن شويه عظم استغرب هيا ليه كده !
الاسعاف وصل واخدوها وفهد خارج
ميس : انت هتروح معاها ؟
فهد : مش هينفع اسيبها لوحدها
خرج بسرعه قبل ما تتكلم تاني وراح وري جدته ودخلت المستشفي وهو وراها ودخلوها العنايه المركزه وفهد واقف منتظر اي دكتور يجي
الممرضه : هو حضرتك ابنها؟
فهد : حفيدها
الممرضه : ربنا يشفيها .. الدكتور جاي حالا هيشوفها
فهد : طيب كويس
الممرضه : علي فكره في دكتوره كبيره قوي في المستشفي ، استشاريه هيا ومن حظك انها يدوب خارجه من العمليات وبتستعد انها تروح حضرتك ممكن تطلبها بالاسم .. هيا ما بتتأخرش عن اي حد ابدا ..
فهد باستغراب : يعني الدكتور اللي جاي مش كويس !
الممرضه : لا طبعا كويس وكويس قوي بس اللي بقوله ان دي كبيره وشاطره مش لسه صغيره
فهد : اه تمام طيب اسمها ايه ؟
الممرضه : اسمها دكتوره ليلي محمد استشاريه قلب هيا كمان مديره المستشفي
فهد : تمام بلغيهم اني طالبها بالاسم ..
الممرضه : تمام وليا الحلاوه بقي
فهد طلع ورقه من جيبه وحطها في ايد الممرضه اللي فرحت جدا وطلعت تجري تنادي علي الدكتوره بنفسها .. جت الدكتوره ودخلت لنبيله وكشفت عليها وطلبت فحوصات كتير واشعه كتير وبعد ما حالتها استقرت طلعت لفهد
الدكتوره : فهمت من الممرضه ان دي جدتك !
فهد : فعلا .. هيا مالها ؟
الدكتوره بصتله باستغراب : انت باين من شكلك ولبسك انك غني !
فهد باستغراب اكتر : ايوه بس ده ايه علاقته ؟
الدكتوره : مستغربه واحد غني زيك واكيد عنده خدم في بيته واكيد يقدر يتحمل تكلفه ممرضه او داده في بيته لجدته
فهد : حضرتك عايزه توصلي لايه لاني مش فاهمك
الدكتوره : جدتك قلبها تعبان جدا وما اعتقدش انها بتتعالج واعتقد كمان انها تعبانه من فتره كبيره وكمان من شكلها عندها سوء تغذيه وواضح من شكل ايديها وحالتها المتدهوره انها بتتعرض لسوء معامله وانكم بتحبسوها او بتكتفوها
فهد : انتي بتقولي ايه !! انتي الظاهر اتجننتي ( بص للمرضه ) بقي دي اشطر دكتوره ؟ انا عايز اخدها من المستشفي دي كلها
الدكتوره : اسفه مش هسمحلك تاخدها علشان تقتلها بهدوء في مكان تاني
فهد اتجنن : اقتلها ! انتي عارفه انتي بتكلمي مين ! انا فهد نصّار صاحب شركه نصّار للاجهزه الطبيه اللي موجوده في المستشفي دي كلها وكل مستشفيات مصر
الدكتوره بكل هدوء : نعم ! وبعدين ؟ المفروض اني اخاف من اسمك ! جدتك هتفضل هنا لحد ما تطلع نتيجه التحاليل والاشعه واعرف سبب تعبها ايه وسبب سوء تغذيتها ايه ! وبعدين هيا ما بتتكلمش ليه !
فهد : جاتلها جلطه ولا دي احنا كمان اللي عملناها ؟
الدكتوره : جلطه ما اتعالجتش وده سببلها الشلل النصفي وعدم الكلام .. جدتك مش بتتعالج ومن سنين ويا اما انت عايز تقتلها او حد غيرك عايز يقتلها
فهد تراجع ومش عارف ليه جه في باله صوره ميس ! وافتكر لما كانت متربطه في المستشفي ولما سأل قالولو مجنونه !! هل ممكن تكون ميس عملت كل ده !
الدكتوره : ايه بتفكر في ايه ! كدبه تانيه !
فهد : انتي تخطيتي كل حدودك ولعلمك انا اقدر في لمحه اقفلك المستشفي دي كلها فاهمه !
الدكتوره ابتسمت : الظاهر ان انت اللي متعرفش بتتكلم مع مين ! ( بصت للمرضه ) هاتيلي امن هنا وممنوع اي حد يزورها مهما تكون درجه القرابه .. اتحركي
فهد استغرب من تصرفها وقوتها بس حاليا عقله مشغول بأمه ميس !!!
تليفونه رن وكانت ميس : ايه يا حبيبي ! جدتك ماتت ولا لسه ؟
فهد استغرب سؤالها قوي وميس كمان حست بغباء سؤالها فكملت : اقصد يا حبيبي لحقوها بتوع الاسعاف صح ! طمني انا قلقانه هنا
فهد بهدوء : اه لحقوها وهيا كويسه ما تقلقيش بس علشان المنظر العام انا هفضل معاها للصبح لانه اتعرف انا مين في المستشفي ماشي ؟
ميس : اه طبعا ضروري طالما عرفوك يبقي لازم تفضل موجود .. قلبي معاك حبيبي حاول تنام شويه في اي اوضه والصبح كلمني
الامن جه وفهد واقف وراح للدكتوره
فهد : علي فكره الامن مالوش لازمه مش عايز اعمل شوشره علي الفاضي وبعدين لو جدتي اتعرضت لسوء معامله فأنا احب اتأكد من ده اكتر منك .. انا هخليها هنا بس عندي شرطين
الدكتوره رفعت حاجبها باستغراب : نعم !
فهد : اسمعيهم وبعدها اعترضي
الدكتوره : اتفضل
فهد : الاول ان محدش يعرف اي شيء عن الكلام اللي قولتيه كله ونتايج التحاليل دي تسلميها ليا بشكل شخصي بدون ما مخلوق يعرف عنها حاجه
الدكتوره : ده سهل والثاني ؟
فهد : الثاني ان لو حضرتك غلطانه فسيادتك مديونه ليا باعتذار
الدكتوره ابتسمت : اتفقنا بس انا نادرا ما بكون غلطانه بعد اذنك
طلعت وصرفت الامن بس طلبت من الممرضات يخلوا بالهم ومنعت تماما خروجها بدون اذنها
فهد للمرضه : هيا مين دي وليه بتتكلم بثقه قوي كده ؟
الممرضه : دي جوزها مدير المخابرات .. اللواء ادهم محمود السيد لو تعرفه
فهد : مدير المخابرات !!! امممم قولتيلي بقي !
……………
الدكتوره ليلي نزلت كان في عربيه منتظراها ساند عليها واحد مركز في موبيله واول ما لمحها بصلها بحب : روح قلبي
ليلي : سوري حبيبي اتأخرت عليك ؟
ادهم : يا قلبي انتي تتأخري براحتك
باسها بسرعه وضمها وماسك ايديها الاتنين : وحشتيني جدا جدا
من فوق واقف فهد ومراقبهم وتخيل لو هو طبيعي وعنده اهل طبيعين كان ابوه وامه هيكونوا زي دول بيحبوا بعض بالشكل ده حتي وهما في السن ده .. بس ابوه مات وامه طلعت نصابه فلوس .. وامه الثانيه الظاهر انها مخبيه حاجه عنه … حظه سيئ جدا افتكر جميله وخناقها معاه وتخيلها في العمر ده !! ايه ده يا فهد بتتخيلها ليه ! لا اوعي تعيد غلط ابوك .. اوعي من الحب ! حب ايه ! ليه بيفكر في الحب ! ده غباء ده ولا اتأثر بالمشهد الرومانسي اللي قدامه ! اه اكيد اتأثر وبس واقفل بقي عقلك علي كده .. دخل عند اوضه جدته وقعد …
عند العربيه : ادهم حط ايده علي كتف ليلي ودخلها عربيته وركب واتحركوا
ادهم : الجميل سرحان في ايه !
حكتله ليلي اللي حصل كله
ادهم : عادي يعني يا ليلي ليه مهتمه قوي كده ! طيب ما هي امي تعبانه وكبرت جدا في السن ولو وزنتيها هتلاقيها خفيفه ولو بصيتي علي ايديها هتلاقي علامات الربط لاننا ساعات بنضطر نربطها .. حكم السن يا قلبي وبعدين ما تحكميش من الغلاف
ليلي : لا يا ادهم لا الوضع مختلف .. مامتك عندها شيزوفرينيا .. دي مش مريضه نفسيه علشان تتربط
ادهم : عرفتي منين انها مش مريضه نفسيه !
ليلي سكتت شويه : مش باين عليها علي العموم التحاليل والاشعه الصبح هتوضح كل حاجه بس مش غريبه انه طلب مني معرفش حد خالص زي ما يكون هو كمان شاكك زيي ان حد عايز يقتلها !
ادهم : فعلا غريبه انتي قولتيلي اسمه ايه؟
ليلي : فهد نصار بتاع الاجهزه الطبيه
ادهم باستغراب : نصّار ؟ الاسم ده مش غريب عليا ليه ! زي ما يكون مر عليا قبل كده ؟ ابوه اسمه ايه !
ليلي : معرفش هو بس قالي كده ؟ مقالش اسم ابوه .. انا كمان حاسه ان الاسم مر عليا قبل كده
ادهم : غريبه فعلا
وصلوا البيت وطلعوا اوضتهم وهيناموا ليلي اتعدلت : هو ممكن نكون نعرفهم واحنا ناسيين
ادهم : نعرف مين ؟
ليلي : حد في عيله نصّار ؟
ادهم شدها وقلبها : بقولك ايه انتي طول الطريق ترغي وسيبتك ترغي براحتك بس قبل ما ندخل اوضه النوم وندخل سريرنا فسيادتك تنسيلي كل اللي بره السرير ده .. السرير فيه ايه ؟
ليلي ضحكت : فيه ادهم
ادهم : بس كده يبقي تركزي بقي في اللي معاكي وتنسيلي الكون كله .. انتي هنا لوليتي انا وبس فاهمه !
ليلي : فهمني اكتر
ادهم ضحك : افهمك بس كده
………………
الصبح طلع وفهد كلم عمته وبلغها وزعلت انه مقلهاش من بالليل وجتله هيا ومعاها امل
امل بارتباك : ازيك يا فهد
فهد بتعب : كويس الحمد لله
امل : كنت قولت من بالليل كنا جينا
فهد : حصل خير وبعدين هيا نايمه من بالليل يعني مجيكم مكنش هيفرق ..
امل : ازاي بقي ده
فهد قاطعها : امل !! اذا سمحتي انا تعبان ومش قادر اتكلم حتي .. خلاص حصل خير
امل الدموع لمعت في عنيها . اسفه
بعدت وقعدت بعيد تماما عنه وهو استرخم نفسه فراحلها : امل انا مش قصدي اضايقك بس فعلا تعبان ومعلش اتنرفزت عليكي
فرحت جدا : زي ما انت قلت حصل خير
راح قعد مكانه واستغرب كميه الطيبه اللي جواها وانها بتزعل وتتراضي بكلمه ..
……………
عند ادهم صحيوا وفطروا مع بعض وقاعدين في الجنينه علي مرجيحه وليلي سانده علي كتف ادهم وبيتهامسوا بحب وضحك
@ صباح الخير .. بتضحكوا علي ايه الصبح بدري كده
ليلي : وانتي مالك ؟
ادهم ابتسم : صباح النور اسيتي
اسيا : حبيبي انت .. شايفه الرد مش انتي ( بتقلدها ) وانتي مالك
ليلي بصت لجوزها : شايف بنتك !
ادهم : مالها بس ما هيا عسلايه اهي
ليلي : عسلايه !! دي عسلايه !! دي ولد متنكر في بنت لا والله دي بنت متنكره في ولد .. بص دي لا هي بنت ولا هي ولد
ادهم ضحك : عايزه ايه من البنت علي الصبح وبعدين ماهي قمر اهي .. وبعدين الله يرحم الضفرتين
آسيا ضحكت : ضفرتين ؟ مامي بضفيرتين؟ لا مش متخيلاها ابدا .. دي علي طول ملكه جمال … لازم تحكيلي
ليلي ضربت ادهم في كتفه واتعدلت وادهم كمل لبنته : كان عليها جوز ضفاير مش قادر اقولك وكانت غفير كده واقف .. بنطلون وبالطو ابيض وكوتش ومفيش ميكب نهائي ولما تضايق مني بدلع كده تقولك ( بيقلدها ) انا جمالي رباني مش زي السلعوه بتاعتك
ليلي مكشره قوي وبصاله وآسيا ضحكت جامد
آسيا : مين السلعوه دي ؟
ليلي : بنت حاطه اتنين كيلو بودره علي وشها وبتتكلم كده بمياصه وهيا عوجالك بوقها كانت بتتعالج
آسيا : بتتعالج من ايه وعلاقتها بابي ايه !
ادهم : ايوه جاوبي عليها والنبي
ليلي : أجاوب وماله ! كانت واخده رصاصه بداله علشان كانت هيمانه
ادهم قرصها من خدها : بس اللي في القلب في القلب سيبك انتي
ليلي بصتله : بس انا مكنتش في القلب ساعتها
ادهم : روح قلبي انتي دخلتي قلبي في اليوم اللي دخلتي في شقتي تدور علي الدوش اخوكي
آسيا : مامي انتي دخلتي شقه بابي قبل ما تعرفيه
ليلي بصت لبنتها : ده كان غباء وتخلف مني .. اسيا : فعلا غباء جدا منك .. say مثلا ان بابي ده واحد سكير او خطير او عجبتيه اتحرش بيكي ؟ ازاي تدخلي شقه واحد ما تعرفيهوش ؟
ليلي ضربت ادهم
ادهم : طيب البنت بتنصحك ذنب امي ايه دلوقتي !
ليلي : علشان انت بتحكيلها غبائي وتهوري
ادهم : مش تحمدي ربك ان بنتك عاقله عنك
ليلي : حمداه .. انا رايحه المستشفي سلام
ادهم : استني هوصلك .. آسيا جايه معانا
آسيا : لا يا حبيبي انا هسبقك علي الاداره وانت وصل مامي وحصلني
مشيت وسابتهم وليلي سرحت
ادهم : قولتلك كام مره ممنوع السرحان وانتي معايا !
ليلي : هو انت يا ادهم مش بتخاف عليها لما بتروح مهمه او تطلع حتي من البيت ؟
ادهم : طول الوقت بكون خايف عليها حتي لو نايمه في سريرها بس دي سنه الحياه وبعدين هيا اختارت حاجه بتحبها وماشيه فيها ومبسوطه في حياتها وده مكفيني
ليلي : يا ريتني زيك
ادهم ضمها : خوف الام بيستمر مدي الحياه يا لوليتي .. يالا اوصلك علشان ما تتأخريش
ليلي وصلت ودخلت اطمنت علي نبيله وفهد واقف لحد ما خلصت كشف
ندي : طمنيني عليها دكتوره !
ليلي بصتلها وتنحت شويه وندي كمان تنحت ليها لحد ما ندي نطقت : معقوله ؟ ليلي ؟
ليلي : ندي نصّار ! وانا اقول ليه اسم نصّار مش غريب عني .. ازيك
الاتنين سلموا جامد علي بعض وفهد واقف مكشر وخاف ان ليلي تخل باتفاقها معاه
ندي : طمنيني علي ماما يا ليلي !
ليلي : هيا مستقره دلوقتي يا ندي ما تقلقيش عليها هيا في عنيا ..
الباب خبط والممرضه دخلت وبصت للدكتوره
ليلي : خير !
الممرضه : جوز حضرتك بره عايزك لحظه
ليلي اعتذرت منهم وفضول فهد خلاه يطلع وراها يبصله من قريب ..
ليلي : ايه حبيبي !
ادهم : وحشتيني
ليلي : يا سلام ما انا كنت لسه في حضنك
ادهم : برضه وحشتيني
ليلي ضحكت : همشيها وحشتك خير بقي
ادهم : تصدقي انا غلطان اني جايبلك موبيلك اللي سيبتيه عندي في العربيه كان المفروض خليتك تلفي عليه نص النهار
ليلي قربت وبصت حواليها وخطفت بوسه : ما اهونش عليك
ادهم ابتسم : ماشي يا بكاشه .. اللي مين الواد اللي شايف نفسه هناك ده مراقبنا
ليلي من غير ماتبص : هو ده فهد نصّار اسكت عرفت الاسم مش غريب ليه ؟
ادهم : ليه ؟
ليلي : ندي صاحبتي فاكر ! اللي اتعرفت عليها في سياتل لما قضيت هناك كام شهر وانا حامل في ابنك ..
ادهم : اه انتو حتي فضلتو علي اتصال هنا فتره طويله ! هيا اختفت ليه ؟
ليلي : بعد موت اخوها جوزها اخدها وسافر بره مصر وتقريبا كده لسه راجعه
ادهم : اخوها مين ؟
ليلي : مش فاكره اسمه ؟ بس تقريبا وليد
ادهم كشر وبعدها سابها ترجع شغلها وهو راح شغله !!
ليلي رجعت لفهد
فهد : انا طلعت بره علشان اسألك التحاليل طلعت !
ليلي : اه طلعت ما تقلقش مش هتكلم مع حد هخلص مع ندي ونروح انا وانت علي مكتبي نتفاهم …. صح هيا ندي تقربلك ايه ؟
فهد : عمتي
ليلي : هو انت والدك مين ؟ وليد الله يرحمه ؟
فهد : ايوه هو تعرفيه !
ليلي : مش قوي بس اعرف انه كان انسان محترم وله وزنه في المجتمع .. مره اتبرع بكميه اجهزه للمستشفي هنا وخصص جناح كامل للعلاج المجاني .. كنت ساعتها دكتوره صغيره بس فاكره البسمه اللي كان بيرسمها علي كل حد بيتعالج من الغلابه علي حسابه ..
فهد سابها تدخل وهو واقف متلخبط ازاي واحد زي ده يشتغل في التهريب وليه فجأه الفتره دي كل الناس دي بتظهر في حياته ! هل دي رساله من ربنا انه يظهر براءه ابوه ولا يثبت خيانته ؟؟
ليلي اخدته مكتبها وقعدوا قصاد بعض
فهد : هاه وصلتي لايه ؟
ليلي : شكوكي كلها صحيحه .. جدتك اتصابت بجلطه وما اتعالجتش وقلبها ضعيف نتيجه كميه مهدئات غير طبيعيه بتتعاطاها .. طبعا انا حاولت اطلب ملفها من المستشفي اللي انت قولتلي عليها .. قالولي ملهاش ملف اصلا فده له معنين
فهد : اللي هما ؟
ليلي : يا اما هيا مكنتش في المستشفي دي اصلا او حد مش عايز ملفها يوصل لحد وده معناه ان في دكتور بايع ضميره مشترك مع حد عندك وهو اللي عمل كده
فهد سرح تماما وافتكر الدكتور اللي ميس كانت بتكلمه واللي اتهمه وهو عيل بريء انه مش عارف يعالج جدته ..
فهد : طيب ينفع حضرتك تعالجيها !! بس من غير ما حد يعرف انك بتعالجيها .. انا محتاجها تتكلم من تاني .. اعملي اي شيء وانا هوافقلك عليه بس بيني وبينك
ليلي : ولو جرالها حاجه تقول ماليش دعوه الدكتوره من دماغها عملت ؟ في حاجات لازم موافقه الاهل فيها
فهد : همضيلك علي اي ورق انتي عيزاه وانا المسؤل عنها يعني قانونيا هتكوني في السليم ماتقلقيش بس مش عايز حد يعرف علشان لو في فعلا حد بيحاول يقتلها هيحترس وينتبه وانا محتاج اعرفه ممكن تساعديني !
ليلي : انا ممكن فعلا اساعدك وممكن كمان اساعدك اكتر من كده !! انا جوزي مدير المخابرات يعني يقدر يعرف تاريخ المريضه كله لو تعرف الدكتور المسؤل عنها انا اقدر اجيب تاريخها كلها
فهد فضل مع ليلي كتير يتفقوا مع بعض …
…………….
ميس عدت علي المستشفي علشان فهد وبس ورجعت علي شغلها واخر النهار
ميس : جميله ! عايزه اطلب منك طلب بس براحتك توافقي او ترفضي !
جميله : طبعا اتفضلي
ميس : عايزاكي تاخدي الغدا ده لفهد في المستشفي
جميله بسرعه : فهد في المستشفي ليه ؟ ( تراجعت من نظره ميس ) يعني اقصد فهد بيه ! خير ؟
ميس : جدته تعبت ومن امبارح وهو معاها
جميله : اه الف سلامه عليها طبعا هروحله هاتي حضرتك
اخدت الغدا وخرجت وبعدها ابتسمت : ايوه اتعلقي اكتر واكتر .. ( بتقلدها ) فهد في المستشفي
ضحكت ضحكه شريره بانتصار …
جميله وصلت المستشفي وطلعت زي ما ميس قالتلها وصلت كان فهد قاعد علي كرسي وتقريبا نايم او الله اعلم لانه ساند دماغه علي ايده ومغمض عنيه
جميله بهمس : فهد بيه
فتح عنيه وبصلها : انتي ! خير !
جميله : ميس هانم بعتتني بغدا ليك
فهد بضيق : اه ميس بعتتك
جميله بدفاع : مكنتش اعرف انك هنا
فهد : ولو كنتي عرفتي !
جميله : كنت برضه هجيبلك غدا ( كملت ) اي حد مكاني هيعمل كده
فهد : امم واديكي جيبتي الغدا
جميله قعدت جنبه : انت عايزني امشي ؟ وجودي مضايقك ؟
بصلها وحاسس انه عايز اكتر من وجودها بس في نفس الوقت لسانه مربوط تماما
جميله وقفت : تمام الف سلامه علي جدتك
فهد قبل ما تمشي : لو عايزه تتطمني عليها ادخليلها
جميله فهمت ان دي طريقته علشان يمنعها تمشي : اه طبعا
دخلت واطمنت عليها وباستها وفهد استغرب من حركتها دي وخرجت
جميله : بتبصلي كده ليه !
فهد : ليه بوستيها وكأنها من عيلتك ؟
جميله : انا بحبها وبحترمها واكيد بعتبرها زي جدتي .. شوف .. اجمل حب في الكون ده حب الجد والجده .. حب غير مشروط بلا اي مقابل .. الجده بتحب مهما يكون حفيدها وحش مهما يكون قاسي بتحبه .. بتحبه حتي في اسوأ صوره
فهد افتكر نظرتها لما بتشوفه كل مره وابتسامتها اللي بتنور عنيها وكأن روحها بتترد لما بتشوفه ؟ ليه ما شافش حبها ده ! ليه كان قاسي قوي كده عليها ! افتكر لحظه ما رفض يسقيها ميه وهنا اتخنق جدا وخرج بسرعه بره وقف بعيد وسند علي حيطه وكأنه بيحاول يسيطر علي اعصابه وبعدها مشي كام خطوه ودخل اوضه وجميله راحت وراه كان عاطيها ظهره دخلت بهدوء وقفلت الباب وراها وقربت منه
جميله بهدوء وايدها علي كتف ابن عمتها : فهد مش عيب ابدا تظهر حبك لحد او تخاف علي حد او حتي تفقد السيطره علي اعصابك .. مش عيب ابدا تظهر مشاعرك
هنا فهد اتلف ورمي نفسه في حضنها لدرجه انها كانت هتقع بس حطت ايديها حواليه وهو عيط ولاول مره يعيط من ساعت ما وعي علي الدنيا دي .. لاول مره فهد يعيط
فهد بعياط : انا مش عارف ايه بيحصلي ! كل حاجه متخلبطه ! مبقتش فاهم حاجه حواليا ! مش فاهم مين الصح ومين الغلط ؟ انا جوايا كره وقسوه وغيظ يحرقوا الكون كله .. انا اسوأ انسان ممكن تقابليه في حياتك ! انا مستغرب اصلا ازاي انتي قابله تقفي تتكلمي معايا
جميله : كلنا لينا لحظات بنقسي فيها
فهد بعد و بصلها : لحظات مش حياتك كلها
جميله مسكته من دراعاته : كل واحد بيختلف عن التاني
فهد : انا رفضت اسقي جدتي ميه وهيا عطشانه ( جميله حاولت ما تظهرش رد فعلها بس دموعها فضحاها ) رفضت اسقي واحده مشلوله ميه .. مسكت الكوبايه وقولتلها يا تمدي ايدك تشربي يا تفضلي عطشانه للصبح شوفتي قسوه اكتر من كده ؟
دموعها نزلت اكتر واكتر بس مش من قسوته دموعها نزلت عليه هو وعلي السبب في قسوته كده وعلي لومه وعتابه لنفسه
فهد بعد عنها : عارف بتحتقريني بس ذوقك مانعك تقوليها
جميله شدته ووقفت قصاده : بطل تقسي علي نفسك بالشكل ده .. انت مش وحش بالشكل اللي انت عايز تظهرو
فهد : انا اسوأ بمراحل .. امشي لو سمحتي وسيبيني
جميله : مش همشي وانت حالتك كده .. فهد مش همشي
فهد زعق : جميله ارجوكي سيبيني
جميله بصتله قوي .. دي اول مره ينطق اسمها
فهد : بتبصيلي كده ليه !
جميله : اول مره تنطق اسمي
فهد بصلها قوي واستوعب انه فعلا نطق اسمها وبدون اي مقدمات زقها علي الحيطه وراها وباسها …………………
بقلم / الشيماء محمد احمد ( شيمووو)
رواية جميله الجزء الثاني للكاتبه شيمو
الحلقه العاشرة
فهد زعق : جميله ارجوكي سيبيني
جميله بصتله قوي .. دي اول مره ينطق اسمها
فهد : بتبصيلي كده ليه !
جميله : اول مره تنطق اسمي
فهد بصلها قوي واستوعب انه فعلا نطق اسمها وبدون اي مقدمات زقها علي الحيطه وراها وباسها
جميله ضربته في صدره وزقته بعيد عنها وزعقت : انت اتجننت ولا ايه !
فهد باستغراب : امال انتي هنا ليه وعايزه ايه مني !
جميله كانت هتنطق انه ابن عمتها بس تمالكت نفسها وبعدها زعقت : وهو علشان واقفه معاك يكون ده تفكيري !! هو انت معندكش اي احساس .. الناس بتقف مع بعض في وقت الشده بياخدوا بإيد بعض .. زياره المريض سنه وانا اعرف جدتك وحبيتها وطبيعي لما تتعب اجي واشوفها وطبيعي جدا لما حفيدها اشوفه كده اخد بايده لان ده واجبنا تجاه بعض انت هنا فهد حفيد الست اللي جوه دي مش فهد مدير الشركه .. انت هنا مجرد انسان عادي في ضيقه .. لكن ده مش معناه ابدا اللي في دماغك ده
فهد مش مصدق ولا حرف من كلامها واستناها لحد ما خلصت : خلصتي كلامك !! كل كلامك ده ما يسواش عندي مليم واحد .. كل اللي اعرفه اني شاب وانتي بنت دخلتي معايا اوضه وقفلتي الباب وده مالوش اي معني تاني في اي مكان تاني غير ان ده غرضك .. انا لا اخوكي ولا من باقي عيلتك علشان تيجي تمسكي ايدي او تقفي جنبي انتي مش راجل واقف جنب راجل .. انتي بنت وانا راجل وبس كده ..
جميله بتحرك دماغها بأسف وكانت عايزه ترميها في وشه انها بنت خاله وهو ابن عمتها لكن سكتت بأسف
فهد : وبس علشان ابقي عملت اللي عليا معاكي ونصحتك .. في اي مره هتتكلمي معايا بالشكل ده او تدخلي في مكان معايا هو ده بس اللي هيكون في تفكيري والمره الجايه مش هوقف .. اعتقد كده انا عداني العيب ولا ايه !! ( دور وشه بعيد لانه مش متحمل نظراتها ولانه عايز يبعدها كمل ) قال زياره مريض قال .. ابقي شوفيلك حجه احسن من دي المره الجايه
جميله خرجت ورزعت الباب وراها وروحت بيتها وعمتها قابلتها وحكت لعمتها كل اللي حصل
عمتها : يعني نبيله تعبت جامد ! يا ريتني اقدر اشوفها .. ما تخديني ازورها يا جميله
جميله : ولو ميس شافتك ولا ندي ولا اي حد من العيله ! هتقوليلهم ايه ! هتواجهي الكل ؟ لو مستعده للمواجهه يالا
عمتها تراجعت : لا مش دلوقتي هو فهد بدأ يشك وده كويس لو ظهرت دلوقتي هيعند وميس هتلعب عليه فخليه لما هو يعرف بنفسه كل حاجه ( مسكت ايدين جميله ) جميله ما تزعليش منه حبيبتي ، هو تلاقيه بس متضايق واهو طلع ضيقه عليكي
جميله : عمتو انا مش مضايقه منه بس ده مش ضيق ده فهمه كده وهو صراحه مشكور انه قالي علي اللي في دماغه .. هو اتربي ان مفيش حاجه اسمها شيء لوجه الله او حد يساعد حد او حد يقف معاك من غير مقابل ميس علمته ده .. فهو ده تفكيره للاسف …..
فهد طول الوقت هيتجنن من كل حاجه حواليه .. مش طايق حد ولا عايز يشوف حد ولا يتكلم مع حد ..
الصبح نزل علي شركته وبعد ما وصل متأخر و كان في ملف ميس بعتت جميله بيه لفهد يمضيه واول ما شافته رايح ناحية مكتبه
جميله : فهد بيه ،، فهد بيه لحظه
فهد لف لها وزعق بصوته كله لدرجه ان كل الموظفين وقفوا في مكاتبهم والكل بيبصلهم
فهد : عايزه ايه مني !
جميله صعقت بصوته العالي ومعرفتش ترد بس جمدت قصاده وفهد استوعب ان الكل بيبصلهم
فهد بتعمد ان صوته يكون مسموع : اوك سوري انا جاي من المستشفي وبقالي يومين ما نمتش .. خير يا باشمهندسه
جميله بغضب : الملف ميس هانم طالبه امضتك عليه
اخد من ايدها الملف : حاضر
بص للموظفين وزعق : كل واحد يروح شغله ولا اول مره تشوفوا حد متنرفر اتفضلوا علي اشغالكم .. ( بص لجميله اللي ماشيه ) باشمهندسه تعالي خدي ملفك
دخل مكتبه وجميله وراه وتعمدت تسيب الباب كله مفتوح وهو لاحظ ده
وبدأ يقلب في الملف وبصلها : امضي فين !
قربت جميله وشاورتله بصمت
فهد : علي فكره مش لدرجه تسيبي باب المكتب بالشكل ده !
جميله : الحذر عمره ما بيضر حد وخصوصا مع اصحاب العقول المريضه
فهد بصلها بعنف وكمل امضاؤه وقفل الملف : ملفك
جميله : بتاع مامتك مش بتاعي بعد اذنك
مشيت خطوتين وافتكرت كلام عمتها انها تقف جنبه وتستحمله شويه فرجعت تاني وهو بصلها باستغراب
سندت علي المكتب بايديها الاتنين قصاده
جميله بغيظ : هقدملك نصيحه قصاد نصيحتك بتاعت امبارح علشان بس نبقي خالصين
فهد بتريقه : اتفضلي
جميله : مش وقت انهيارك ده ونرفزتك دي لان نرفزتك وصوتك العالي ده بيدل علي ضعفك وانت اعداءك حواليك وكتير حتي لو مش واخد بالك منهم ولما يشوفوك مهزوز كده هيعرفوا امتي يضربوك وازاي يقضوا عليك .. انت مش عايز تبين مشاعرك ناحيه جدتك والله اعلم ليه بس انهيارك ده وصوتك ده اكبر دليل علي مشاعرك .. انت حاليا المفروض تركز وتحط عنيك وسط راسك وياريت يكون فيك ولو شويه من اسمك يا فهد .. الفهد بيقرب بحذر وفريسته ما بتحسش بيه غير لما تلاقي نفسها بين ايديه .. بينقض بهدوء .. فقلد اسمك او اعتبر بيه .. بعد اذنك يا .. يافهد بيه
خرجت وسابت فهد في حاله هو مش عارفها … كلامها كله جاي في وقته بالظبط !! هو فعلا بينهار وده مش وقته ولا وقت ضعفه !! بس ياتري مين اعداؤه اللي هيا بتتكلم عنهم !! معقوله تكون عارفه حاجه هو ما يعرفهاش …. جميله وهيا خارجه خبطت في سالي اللي داخله عند فهد
سالي : ما تفتحي ولا بتخرجي من عند فهد مش شايفه قصادك !!
جميله بعنف : انا مش هسمح لتعليقاتك السخيفه دي تستمر
سالي محستش بنفسها غير وهيا بتضرب جميله بالقلم في وسط المكاتب والكل كان مستغرب ايه اللي بيحصل في اليوم ده ..
سالي : ده علشان تتأدبي وتردي علي اسيادك باحترام
ميس كانت داخله : ايه اللي بيحصل هنا
سالي : سيادتها بتقل ادبها ومش عاجبها اني بقولها تبعد عن خطيبي
اللي كل ما ادخل الاقيها في حضنه
ميس زعقت : سالي وبعدين !! انتي زودتيها قوي .. جميله ما بتروحش مكتب فهد الا اذا انا بعتها اعتذريلها حالا
سالي : انا اعتذر لدي !
فهد خرج علي صوتهم : في ايه هنا؟
بص لجميله اللي ايدها علي خدها مصدومه لتاني مره
الكل بصله وسالي ردت : بأدب اللي بترمي نفسها في حضنك كل شويه بحافظ علي خطيبي
فهد بصدمه غيظ : بتعملي ايه ؟ انتي اتجننتي ! يعني انتي مش بس بتغلطي فيها انتي بتغلطي فيا انا كمان !! وانا من امتي باخد حد في حضني في مكتبي ! اتهاماتك السخيفه دي غير مقبوله وانا ما اسمحش لاي حد يتكلم بالشكل ده . اعتذري لها حالا
سالي : مش انا اللي اعتذر لدي
فهد : هتعتذري غصب عنك يا سالي وبعدين مين ده اللي خطيبك هاه ! ولا انتي بتحلمي ؟؟ ولا دي كمان ضمن التهيؤات بتاعتك
سالي بصتله بصدمه : تهيؤات !! ماشي يا فهد .. يا انا يا البنت دي في الشركه
فهد بهدوء : يبقي اتفضلي فضي مكتبك لان مش فهد نصّار اللي يتلوي دراعه ابدا .. اتفضلي بقي من هنا
سالي مشيت وميس شدتها علي مكتبها وفهد وقف قصاد جميله : انا اسف لحضرتك علي الهبل اللي اتقال ده .. اتمني تتقبلي اعتذاري انا شخصيا ..
جميله ما ردتش ولا رفعت دماغها وهنا دخل آسر
آسر : في ايه !
بص لجميله : في ايه يا جميله مالك !
جميله بعياط : انا لازم امشي من هنا
جريت من قدام الكل وآسر بيسأل فهد في ايه وفهد مركز مع جميله اللي خرجت
آسر دخل المكتب مع فهد اللي ما اتكلمش نهائي
ميس مع سالي اللي هتتجنن
ميس : اهدي بقي وبطلي غباءك ده
سالي : غبائي انا ؟
ميس : طبعا غباءك وتخلفك كمان .. رايحه تضربيها قدام الشركه كلها وتقولي كمان علي فهد خطيبك واهو احرجك انتي وردلك القلم بعشره والكل هيبصلك انتي ويتكلم عليكي انتي انك غيرتي من موظفه ورميتيها بالباطل وكمان لزقتي نفسك لحد مش عايزك
سالي : محدش يقدر يفتح بوقه
ميس : قدامك اه .. من وراكي الكل هيشتمك وخصوصا ان فهد نفي كلامك معنى كده انك بتتبلي عليهم وبدال ما هيا كانت حته موظفه هتخلي فهد يحميها وياخد باله منها ويركز معاها قوي ومش بعيد بجمالها ده …
سالي : تعمل ايه يعني !
ميس : تعمل اللي عملته خدامتي قبل كده
سالي : اللي خلت اونكل وليد يحبها
ميس : مش بس حبها ده اتجوزها وطلقني انا
سالي : طيب اعمل ايه ! انا هولع منها
ميس : بصي انا عملت البدع في الخدامه بتاعتي بس عمر ما كان في شهود والصنف ده من النوع اللي ما بيتكلمش . كنت اعمل ما بدالي فيها واذلها بس محدش بيشوفنا وقدامهم كنت ملاك والمره الوحيده اللي شافني فيها بأذيها طلقني فيها
سالي ابتسمت : اه يعني كنتي بتاخدك حقك بس بالمداري .. فهمتك انا كده ! بس هيا بتحب فهد؟؟
ميس : خليها تحبه .. ده انا عيزاها تعشقه كمان وكمان واوعي تنبهيها لده
سالي : انتي بتقولي ايه !
ميس : لو حد داخل في البحر وناديتي عليه وهو لسه علي الشط هيطلع لكن لو سبتيه يغوط قوي ويدخل في الغريق ساعتها مش هينفع تنادي ولو ناديتي مش هيطلع وهيغرق وانا عايزه جميله تغرق في
عشق فهد وتغرق .. علشان لما يعلن خطوبته هتموت .. لكن دلوقتي هيا لسه علي الشط
سالي : ولنفترض انها مغرقتش وهو انقذها بحبه !
ميس : مين هيسمحله ! كان ابوه عرف ينقذ خدامته من الغرق دول غرقوا الاتنين .. فهد هيتجوزك انتي وبس .. سيبلنا احنا الطريقه .. دلوقتي عايزاكي تعتذري لجميله قدام الكل وما تسمحيش لحد يمسك عليكي غلطه وانتي لوحدك معاها اعملي ما بدالك ..
ضحكوا الاتنين مع بعض
…………….
جميله روحت وطول الطريق جامده طلعت بيتها وعمتها فضلت جنبها بس رفضت تتكلم ..
اخر النهار الباب خبط وراحت جميله العمه تفتح واتفاجئت بفهد قدامها
جميله : فهد ابني
قلبه اتقبض مع كلمه ابني .. ليه الست دي بتحركه كده ؟ وليه واثق انه مش بس شافها لا ده عارفها !! عارفها كويس قوي بس عقله عاجز عن التفكير !!
جميله : اتفضل يا ابني ادخل
فهد دخل وامه قعدت قصاده وهو مش عارف يقول ايه !
جميله : جدتك عامله ايه ؟ جميله كانت قالتلي انها بالمستشفي وقولتلها اروح معاها ازورها بس رفضت وقالتلي انك مش بتتقبل زيارات حد
فهد باحراج : لا مش كده بس مالوش لزوم التعب وهيا الحمد لله اتحسنت ..
جميله : طيب الحمد لله … تشرب ايه يا ابني !
فهد : ارجوكي ولا اي حاجه .. بصي هما كلمتين وماشي
جميله : جميله قافله علي نفسها من الصبح ورافضه اي حد يكلمها ومش بترد علي حد ينفع تقولي انت ايه اللي حصل بالظبط ؟
فهد : والله ما اعرف انا خرجت من مكتبي علي صوت بنت عمي و والدتي وجميله في النص وكل اللي عرفته ان بنت عمي غلطت فيها ..
كلمة والدتي وجعت جميله قوي بس تماسكت .. كله يهون علشانه …
جميله : بس جميله قويه مش كلمه هتهزها يعني
فهد : طيب معلش ينفع تقوليلها اني هنا وتشوفي هترضي تقابلني ولا لأ
جميله : حاضر يا ابني لحظه
جميله دخلت عند بنت اخوها وكانت قاعده : هو فهد بره ؟ عايز ايه ؟
عمتها : عايز يفهم ايه اللي حصل
جميله : هو فاهم وعارف !! انا مش عايزه اقابله ومش عايزه ارجع الشركه دي تاني .. هو بدأ يشك وجدته بكره تخف وهتعرفه الحقيقه انا وجودي مالوش لازمه
عمتها : براحتك .. بس ما تخيلتش انك بالضعف ده .. ده انا اللي ضعيفه وجاهله وبنت مكسوره ميس مقدرتش تكسرني ابدا وحافظت علي حبي للنهايه وحتي لو هيا كسبت فأنا كسبت شيء عمرها ما هتفهمه ابدا
جميله : انتي وليد كان بيحبك
عمتها : وليد كان كارهني اول ما دخلت البيت .. انتي ضعيفه وسالي من اول جوله كسبت ودي نهايه الكلام .. حبيبتي انا عمتك وانتي مش محتاجه تبرري قصادي
جميله وقفت بغيظ لعمتها : انا مش ببرّر .. وسالي دي اصلا مش قدي بس ابنك اللي غبي وما يستاهلش اني استحمل زي ما انتي استحملتي علشان ابوه
عمتها : اقول للواد اللي بره ايه ما ترغيش كتير !
جميله : طالعه
لبست وخرجت ووقفت قصاده : نعم ! افندم ! هو انتو فاكرين ايه ؟ اشترتوني ؟ انتو ايه !
عمتها : جميله عيب كده !
جميله لعمتها : عمتو اذا سمحتي .. وبعدين مش هتعملي لفهد باشا قهوته الساده المره !
عمتها : حاضر هعملها بس ما تعليش صوتك
دخلت وسابتهم وبعد ما بعدت فهد وقف : اللي يسمعك دلوقتي ما يشوفكيش الصبح وانتي قطه صغننه كمشانه وبتعيطي (بيقلدها ) انا لازم امشي من هنا
جميله بصت حواليها وفهد شاف فازه صغيره علي التربيزه فجريوا عليها بس فهد كان اسرع وشالها بعيد
فهد : اهدي واتكلمي بالعقل
جميله : مفيش عقل .. سالي زودتها قوي ولحد سُمعتي ومليون خط احمر
فهد : سمعتك محفوظه وانا وقفتها عند حدها
جميله بتريقه : وقفتها ؟؟ بعد ايه ان شاء الله ! قال خطيبتك قال طب والله لايقين علي بعض .. معدومين الاحساس والاخلاق زي بعض .. فوله واتقسمت نصين .. تعرف انها فعلا لايقالك .. اتجوزوا وخلفوا وحوش صغيره هتعملوا مكس تحفه
فهد بغيظ : اولا سالي مش خطيبتي ثانيا انتي ايه اللي غيظك قوي لو هيا خطيبتي ! هاه !
جميله بصتله : نفس التلميحات السخيفه !! مش بقولك لايقين علي بعض
فهد : الخلاصه .. علشان بس اكون عملت اللي عليا .. سالي غلطت فيا قبل ما تغلط فيكي واعتقد اني اخدتلك حقك وزياده .. فهو سؤال واحد .. هترجعي الشركه ولا سالي قهرتك !
جميله بغيظ : ولا هيا ولا عشره من نوعها يقهروني فاهم !
فهد : لا من جهه قهرتك فهيا قهرتك .. سمعت انها لطشتك قلم معتبر
جميله بغضب مخيف : انا للاسف متربيه لان مفيش اسهل من قله الادب ابدا ولولا انها اخدتني علي خوانه وفاجئتني كنت عرفت اوريها مقامها
فهد بصدق : عارف .. وبعدين هيا غلطت باللي عملته ومفيش اي حد من حقه ابدا انه يهين حد او يضربه وعلشان كده انا النهارده هنا علشان اتأسفلك مره تانيه واقولك اللي يرضيكي انا هعمله مهما يكون
امه كانت جوه ودموعها نزلت لانها حست ان اللي بيتكلم ده وليد مش ابنه .. هو ده وليد وهيا دي اخلاقه
جميله : مهما يكون !
فهد : مهما يكون !!
جميله سكتت شويه وفهد اتكلم : هاه قولتي ايه !
جميله : بكره ارد عليك
فهد ابتسم : معني كده انك جايه الشركه بكره !
جميله : مش واحده زي سالي اللي تخليني اهرب او اديها شعور الرضي انها تغلبت عليا ..
فهد ابتسم باعجاب : خلاص اشوفك بكره سلام
خرجت جميله امه بالقهوه وهو بصلها باعتذار
امه : لا مش هقبل اعذار وبعدين المره اللي فاتت شربناك علي مزاجنا فالمره دي قهوتك اهي
فهد ابتسم : طيب
امه : قلت مش هقبل اعذار
بص لجميله اللي رفعت ايديها : ماليش دعوه اتصرف معاها موبيلي بيرن بعد اذنكم هشوف مين..
سابتهم ودخلت علشان عمتها تشبع بلحظات من ابنها .. قعد معاها يرغوا مع بعض شويه وقام مشي وهيا دخلت لجميله اللي ضمتها اول ما دخلت عندها
عمتها : شكرا ليكي يا جميله
جميله : علي ايه يا عمتو
عمتها : لولا انتي مكنتش هشوفه .. انتي دخلتيه هنا وجبتيلي ابني ..
جميله بهزار : ما انا اكلت حته قلم معتبر من اللي ما تتسماش
عمتها باست خدها : اوعي تسمحيلها تهينك وتسكتي .. وطالما قلتي ان ميس دافعت عنك يبقي ميس لها غرض الله اعلم ايه !! بس ميس عمرها ما عملت شيء قدام وليد كان ديما في السر وانا كنت غبيه وبسكتلها .. بس كنت عامله اعتبار انها مراته وحبيبته وانها ست ما بتخلفش والظروف اضطرتها تقبل ضره لكن هيا مقدرتش ده .. اوعي انتي تضعفي قصاد سالي او تتقبلي شيء منها غصب عنك
جميله سرحت : ماهي ممكن تقول لابوها او عمها محي ويطردوني ؟؟
عمتها : لا مش هتقول لانها لو قالت هتكشف نفسها الاول وبعدين النوعيه دي عندها غرور غير عادي فمش هتقول ابدا ان حد غلط فيها وهيي مقدرتش عليه .. يعني العبي عليها بنفس طريقتها .. هيا هتلعب في السر وانتي هتأدبيها برضه في السر ومحدش فيكم هيتكلم والشاطر اللي هيكمل للاخر
……………
فهد رجع كانت رجالة العيله كلها في انتظاره وعلاء اول ما شافه هجم عليه : انت ازاي تغلط في بنتي قدام موظفين الشركه ! وعلشان ايه حته موظفه لا راحت ولا جت !
فهد تجاهل الكل بهدوء غير طبيعي نرفز الكل
خالد : اهدي يا علاء الكلام مش كده
علاء : انت مش شايف بروده
خالد : فهد !! عمك بيكلمك
فهد : بجد هو بيكلمني !! اصلي ما بسمعش الصوت العالي اللي نغمته ما بتعجبنيش
علاء كان هيهجم عليه تاني وخالد مسكه ومحي زعق : وبعدين في لعب العيال ده .. علاء اقعد مكانك وانت يا فهد رد على عمك بأدب واتكلم بأدب
فهد : حاضر يا عمي هرد بأدب اتفضل !! نعم
محي بضيق : انت ليه زعلت بنت عمك النهارده
فهد باستعباط : امل !! امل انا ما شفتهاش اصلا النهارده
الكل علي اخره ومحي اتكلم : سالي مش امل
فهد ببرود : اه سالي … مالها ! قلت ادبها ورديت عليها مالها بقي !!
علاء : وانت اللي هتربيها بقي ولا ايه ؟
فهد : ماهو الظاهر يا عمي ان حضرتك وسط انشغالك بالتنطيط بين الحريم في الكباريهات نسيت ان عندك بنت مطلوب منك تربيها فلازم حد يربيها
الكل وقف وميس زعقت : فهد !! انت تخطيت كل حدودك
فهد وقف كمان : وهيا لما تتهمني قدام الشركه كلها اني باخد كل واحده تدخل مكتبي في حضني ده مش تعدي لحدودها ! ولا لما تضرب موظفه بالقلم ده مش تعدي لحدودها ! ولا لما تعلن قدام الكل اني خطيبها وده محصلش ده مش تعدي ! جايين كلكم تحاسبوني علي ايه ! اني تخطيت حدودي ! اه تخطيتها واللي هيقل ادبه هرد عليه باسلوب ما يعجبوش واللي غلط يتحمل غلطه ولا ايه يا عمي محي يا كبير العيله ! مش ده كلامك ! اللي يغلط يتحمل غلطه ! قولي حضرتك انا غلطت في ايه النهارده !
محي سكت لانه حس ان فهد مش خصم سهل ومش هيجي بالصوت العالي ومش هيخاف بسهوله .. لازم يتلعب معاه بالعقل
محي قعد : انت مغلطتش وسالي غلطت ( الكل بصله حتي فهد نفسه استغرب وقبل ما علاء يتكلم ) لكن دي بنت عمك وانت المفروض تصلح غلطها بذكاء مش تغلط انت كمان وترد غلطها بغلط …
فهد سكت لان معندوش رد
علاء : ده ردك ليه ! كده انت جيبت حق بنتي !!
سالي نزلت من فوق وزي ما ميس فهمتها : بابي جدو وفهد عندهم حق وانا غلطت وبكره ان شاء الله قدام الكل انا هعتذر للباشمهندسه
ودي بقي كانت تاني صدمه للكل وفهد هنا بدأ ينتبه هو بيتلعب بيه بينهم ودي لعبه جديده هو مش فاهمها او ممكن ده تمهيد لاجباره علي جوازه منها …
قربت منه ومدت ايدها لفهد : انا اسفه يا ابن عمي بس كنت متضايقه وطلعت ضيقي عليها ومخدتش بالي ابدا اني بأذيك انت ممكن تقبل اسفي
علاء كان هيتكلم بس محي شده وسكته تماما لانه عجبته لعبة سالي
فهد : اسفك مقبول يا بنت عمي ..
ميس وقفت : طالما الكل اتراضي .. علية ( جت علية ) العشا بسرعه
علية : جاهز يا افندم
اتعشوا والكل بيفكر في اللي حصل ومحدش فاهم اي حاجه ..
الصبح بالفعل سالي اعتذرت لجميله قدام الكل وجميله استغربت ده بس عرفت انها هتضرب في السر واستعدت لها ……
فهد راح لجميله : هاه مقولتيش راضيه ولا لسه !
جميله ابتسمت بس دارت ابتسامتها قبل ما تبصله : اعتذارها قدام الكل كفايه .. شكرا فهد بيه .. بس يا تري اقنعتها ازاي !
فهد : سر المهنه بقي المهم حقك رجعلك سلام
خرج من عندها مبتسم ومش عارف ليه ابتسامته دي ….
…………..
امل راحت الشركه كذا مره وما بتصدق تلاقي سالي مشغوله تقعد مع جميله اللي بتحاول جاهدةً تعلمها ازاي ترد علي الناس وتبطل طيبتها دي شويه ..
ندي طول الوقت في المستشفي مع امها اللي بدأت تتحسن
دكتوره ليلي : النهارده هتدخل العمليات ..
ندي : بس انتي قولتي انها ضعيفه
ليلي : كانت بس دلوقتي اتحسنت وصحتها هتستحمل باذن الله العمليه
وان شاء الله هتتحسن اكتر واكتر بعد العمليه دي
ندي : يعني ممكن تقف تاني وتتكلم تاني
ليلي : بصي يا ندي مش عايزين نسبق الاحداث بس ان شاء الله فعلا
تتحسن .. ممكن تتكلم ومش هيكون في سبب للشلل بس لان بقالها فتره فعضلاتها حصلها ضمور وهتاخد فتره طويله من العلاج الطبيعي ..
ندي : ربنا يسهل .. ليلي انا مش عارفه اشكرك ازاي !!
ليلي : حبيبتي احنا اصحاب .. طمنيني عليكي انتي اخبارك ايه ! تعبتي تاني من ساعتها
ندي ابتسمت : انتي لسه فاكره .. لا الحمد لله ما تعبتش .. كانت ايام جميله كنتي حامل ساعتها صح
ليلي : فعلا كنت حامل وجوزي مكنش راضي ابدا اسافر بس وافق واتقابلنا هناك
ندي : كنت في رحله ساعتها ولما تعبت خوفت قوي اني لوحدي بس لما شوفتك واتعرفت عليكي اطمنت ان حد من بلدي معايا ما تتخيليش انا حمدت ربنا قد ايه اني عرفتك هناك وشكرته كتير انه بعتك ليا مخصوص
ليلي بهزار : شوفتي طلعت بعثه مخصوص للمكان اللي انتي هتتعبي فيه علشان اتعرف عليكي
ضحكوا الاتنين مع بعض
ليلي : مالك يا ندي ! حساكي حزينه
ندي : سيبك مني .. الا قوليلي لسه حبك المجنون مستمر مع ادهمك ولا الزمن قهره
ليلي : فشر ابدا .. حبنا بيكبر وبيزيد مع الزمن مش بيقل يا ندي
ندي زعلت : ده الحب اللي بجد يا ليلي ومش اي حد محظوظ يلاقيه
ليلي : بس انا فاكره انك اتجوزتي ابن عمك اللي بتحبيه !
ندي : فعلا اتجوزته ( غيرت الموضوع ) المهم العمليه امتي ؟
ليلي تقبلت ده : بالليل الساعه عشره ان شاء الله بس كلمي بقي فهد علشان يمضي علي الاوراق ولا اكلمه انا !!
ندي : اتصلت بيه ما بيردش ممكن ابقي اسيبله رساله او اقول لميس
ليلي بسرعه : لا ما تبلغيش اي حد
ندي باستغراب : ليه !
ليلي اتوترت : بصي هو طلب مني محدش يعرف اي حاجه عن علاجها لاني اتهمته اني بيعاملها وحش وهو عايز يعرف مين بيعمل كده بصي انا قلتلك لاني شايفه حبك ليها وانتي استحاله تعملي كده
ندي فرحت وابتسمت : بجد فهد قالك كده ..
ليلي : علي فكره انا مش فاهمه حاجه !
ندي : ده موضوع طويل خلاص هكلمه بنفسي وما تقلقيش واه ما تعرفيهوش انك قولتيلي حاجه .. خليكي علي اتفاقك بيه
ندي كلمت فهد وجه بالليل مضي الورق للدكتوره وفضل في المستشفي وطلب من ندي تروح
ندي : انا مش هروح
فهد : هتروحي وحالا ولما تخرج انا هبلغك ..
ندي : فهد
فهد قاطعها : عمتي انا مش عايز حد يعرف انها عملت عمليه روحي وخلي كل الامور طبيعيه وانا اول ما تخرج هبعتلك رساله اطمنك اتفقنا
ندي حطت ايدها علي خده : معقوله يا فهد انت هتفتح وتشوف الامور علي حقيقتها !
فهد رجع خطوه لوري : لا اوعي تفهمي الامور غلط .. انا بعالجها لانها جدتي وبس مش حبا فيها وبخبي لاني مش عايز ميس تزعل او تضايق فاوعي تفتكري اني بعمل كده حبا او تأثرا لا ده واجب وبقضيه علشان كمان اسمي في المستشفي اتعرف ومعدش ينفع اتراجع
ندي ابتسامتها اختفت واملها انهار ومشيت خايبه الرجا بس عندها امل ضعيف ان ممكن امها تقدر تغيره لو اتكلمت ….
العمليه خلصت ونجحت وهو فرح واستغرب فرحه ده ..
فهد : دلوقتي هيا هتقوم وتتكلم
ليلي : تتكلم اه لكن تقوم لا زي ما وضحت لعمتك انها هتحتاج لعلاج طبيعي
فهد : تبدأ فيه من امتي !
ليلي : يعني ترتاح بس وجرحها يقفل ونتفق مع بعض .. حمدالله علي سلامتها ..
عدت الايام ونبيله خرجت من المستشفي بس ما اتكلمتش لسه
………….
@علاء مع محي @
محي : عملت ايه !
علاء : بكره هيتم كل شيء
محي : ظبطت كل حاجه !!
علاء : عيب عليك
ضحكوا الاتنين مع بعض
………….
ندي كانت مع امها في البيت واتشغلت عنها شويه ونبيله كانت عايزه كوبايه الميه وحاولت تمد ايدها بس كانت بعيده وندي مركزه في موبيلها .. شاورت نبيله بس ماردتش عليها
نبيله بهمس : ندي
ماسمعتهاش وهيا مشغله الموبيل
نبيله علت صوتها سنه : ندي
ندي رفعت دماغها وبصت لامها مش مصدقه : انتي اتكلمتي !! ماما انتي اتكلمتي
قامت جري علي امها : قولي اي حاجه ! اتكلمي !!( عيطت ) سمعيني صوتك تاني
نبيله : بطلي …..عياط ….بقي
ندي عيطت اكتر واكتر : انتي بتتكلمي
نبيله مسكتها : لو ميس عرفت اني بتكلم الله اعلم هتعمل ايه ! محدش لازم يعرف ابدا
ندي شاورت بدماغها : وفهد ؟
نبيله : فهد مش دلوقتي ! لما نشوف ونفهم دماغه فيها ايه ! لما ولاؤه يتهز في ميس شويه
ندي : طيب تعالي عندي
نبيله : لا يا ندي مكاني هنا مع حفيدي .. لازم حفيدي يفوق ويعرف مين حبيبه ومين عدوه .. لاحسن ياخدوه زي ما اخدوا ابوه ..
ندي : فهد مفيهوش طيبه وليد يا ماما
نبيله : وده هيخليه اقوي من وليد .. صح هيا مين البنت اللي اسمها جميله دي !
ندي : بنت شغاله عند ميس
نبيله ابتسمت : بتفكرني بجميله .. واسمها جميله وحساها هتاخد قلب فهد زي ما جميله اخدت قلب وليد
ندي : بس سالي موجوده و واخده فهد امر مسلم بيه !
نبيله : سالي ما تملاش عين فهد ابدا … المهم اسكتي خالص وداري فرحتك دي واوعي توقعي بلسانك
فهد خبط ودخل وبصلهم الاتنين وندي تحت رجلين مامتها
فهد : في ايه مالكم !
ندي وقفت : ايه هو ما ينفعش الواحده تعيط في حضن امها
فهد : عيطي براحتك .. بس اقصد لو في حاجه اقدر اساعدك فيها !
ندي : لا دي فضفضه مني
فهد : وبترد عليكي ؟
ندي : لا يافهد بس عايزه اتكلم مع حد ابقي واثقه انه بيحبني
فهد : ومين اللي بيكرهك يا عمتي !
ندي : انت
فهد : انا ! انا ما بكرهكيش ابدا بس ده مش معناه اني هسمحلك تغلطي في امي واسكت
ندي بتريقه : حاضر يا فهد مش هنغلط في ميس القديسه ..( قربت منه ) بس يا تري شوفتها بتعمل ايه قبل كده لله في لله ! امتي ميس عملت اي شيء ما بيصبش في مصلحتها ؟ واوعي تقولي ربتك انت لان انت في مصلحتها
فهد : ازاي بقي في مصلحتها ؟ وانا كنت مجرد عيل مش هنفعها بحاجه ده غير اني مسؤليه هيا في غني عنها ؟
ندي : ده مين ضحك عليك وقالك انك كنت مجرد عيل !!
فهد بتريقه : كنت كبير ومش واخد بالي
ندي قربت قوي من وشه : كنت كبير اه بس بأملاكك لان ابوك كان كاتب كل حاجه باسمك انت … ما سألتش نفسك انت ليه عندك اكبر نصيب في الشركه !! ليه انت نصيب الاسد يا …. يا فهد .. كان لازم ميس تاخدك علشان تضمن انك في حضنها بدال ما تبقي هيا بره
فهد بتوهان : اعمامي اللي وقفوا جنب ميس وابن عمهم كتبولي النصيب ده
ندي بتريقه : اه فعلا اصل الحدايه بتحدف كتاكيت .. طيب زمان وكنت عيل ويتضحك عليك ودلوقتي ! انت شايف ان اعمامك دي أخلاقهم .. هما هيتنازلوا عن نصيبهم لعيل صغير !! طب ان كان اللي بيتكلم مجنون فاللي بيستمع عاقل … انا اتأخرت ولازم امشي .. ماما هجيلك الصبح
سابته وخرجت وهو بص كتير لجدته اللي عنيها بتنطق كتير وخرج علي اوضته .. كلام عمته كله منطقي .. هو فعلا مكنش عارف ولا مقتنع ان اعمامه يكتبوا اعلي نصيب له هو لكن ابوه يكتبله نصيبه مقبوله ايوه .. عقله شغال في ناحيه هو رافضها لانه لو هيفكر يبقي كلهم اتفقوا عليه
الصبح لازم يبدأ ينكش كل الجحور المقفله وينبش الاسرار المدفونه !!!
الصبح راح مكتبه واتصل بيزيد وطلب منه يتقابلوا
عبير السكرتيره : فهد باشا .. صلاح عبدالكريم بره وعايز يقابل حضرتك
فهد : هو في معاد ؟
عبير : لا بس بيقول الموضوع ضروري
فهد : طيب دخليه
صلاح دخل وسلم علي فهد وقعد قصاده
فهد : خير صلاح بيه !!
صلاح : خير يا فهد بيه اتفضل
فهد : ايه ده !
صلاح : ده شيك بعشرين مليون اللي حضرتك كتبتهولي انا مش محتاجه خلاص
فهد : نعم ! هو لعب عيال ولا ايه !
صلاح : معلش اعذرني
فهد فجأه : انت حد ضغط عليك !!
صلاح وقف : انا محدش يقدر يضغط عليا
فهد زعق : امال ايه ! من شويه تيجي تقولي عايز شراكه ودلوقتي جاي تفضها وبعدين هو مش في شروط جزائيه ! مش في فلوس انا خسرتها
صلاح طلع دفتر شيكاته : عايز تعويض قد ايه ! قول
فهد باستغراب : لا كده افهم بقي
صلاح : بما انك ساعدتني فأنا مديونلك بتوضيح .. جالي عرض افضل من عرضك
فهد بكبرياء : مفيش حد ممكن يقدم عرض افضل مني
صلاح : لا في
فهد : ايه هو العرض !!
صلاح : هقولك .. جه لبنتي عريس غني جدا والمبلغ ده هيقدمه مهر لها
فهد : مهر ؟ عشرين مليون !!
صلاح : مش بالظبط بس لما اكون مديون لجوز بنتي افضل مليون مره اني اكون مجرد اجير في شركتي ولا ايه رأيك !
فهد بفهم : عرض افضل !! ماشي
صلاح : اكتب تعويض قد ايه !
فهد : اعتبر التعويض هديه فرح بنتك
صلاح ابتسم : ده كرم منك .. انت فعلا غير ابوك خالص
هنا فهد وقف وراح قصاده : ازاي بقي ! لما كنت وحش كنت غير ابويا ودلوقتي برضه غير ابويا
صلاح ابتسم وطبطب علي كتفه : انت لسه صغير علي لعب السوق
فهد : قصدك ايه !
صلاح ضحك : قصدي لسه السوق معلمكش ان السوق ده بحر ولو انت عايز تعيش لازم تبقي قرش
فهد : برضه مش فاهم
صلاح : مش بقولك لسه صغير .. انت عمرك ما كنت هتقبل شراكه مع شركه خسرانه ابدا ولما رميت الكلمه دي انت اتجننت وساعتها لقيتها طاقه قدر واتفتحلي كلمتين عن شهامه ابوك واخلاقه وكرمه وانت علي طول صدقت .. وانا كسبت شراكه مكنتش احلم بها .. انا اسف اني استغليت ذكري ابوك بس ابوك كان مهرب واعمامك تعبوا كتير لحد ما نضفوا اسم الشركه من تاني .. سوري بقي فهد بيه تعيش وتاخد غيرها …
خرج وفهد مسك اللاب قدامه وحدفه بكل قوته في الحيطه ..
واتردد صوت ميس ملي الاوضه لدرجه غطي ودانه بايديه ::: الحب ضعف … الطيبه ضعف .. الاخلاق والقيم ضعف … ضعف .. ضعف .. ضعف … ضعف
بقلم / الشيماء محمد احمد
رواية جميله الجزء الثاني للكاتبه شيمو
الحلقه الحادية عشر
عايزه أوضح حاجه بس صغيره
بالنسبه للناس اللى عندها فيس لايت والحلقه مش بتفتح معاهم ومش عارفين يكملوا الروايه
اتعبوا نفسكم وافتحوا الفيس من على جوجل .. هتقدروا تفتحوا فيس والحلقه وكل حاجه بسهوله
الفيس لايت حلو وكل حاجه بس عيبه ف موضوع الروايات ده علشان كده نفتح الفيس من جوجل أقرأ الحلقه وما تتعبوش نفسكم وتدوروا ف مكان تانى وأسفه ع الإطاله
اسيبكم مع الحلقه
صلاح خرج وفهد مسك اللاب قدامه وحدفه بكل قوته في الحيطه ..
واتردد صوت ميس ملي الاوضه لدرجه غطي ودانه بايديه ::: الحب ضعف … الطيبه ضعف .. الاخلاق والقيم ضعف … ضعف .. ضعف .. ضعف … ضعف
الباب خبط وجميله بصت : فهد بيه
قبل ما تنطق زعق فهد : عايزه ايه مني !! اطلعي بره !! مش عايز حد !! مش عايز اشوف حد
خرجت جميله وهيا مستغربه فهد ايه اللي جراله .. كان الصبح كويس ..
……………..
صلاح خرج وماشي وقابله تحت علاء اللي كان داخل وبصله
علاء : ظبطت الدنيا !
صلاح : ايوه وعطيته الشيك
علاء : تمام طول ما انت شاطر وبتسمع الكلام كل حاجه هتكون تمام .. يالا روح بقي يا شاطر
صلاح : طيب ارجوك يا علاء بيه
علاء بصله : بعدين .. الصبر حلو
سابه وطلع وصلاح روح بيته واول ما دخل مراته جريت عليه : عملت ايه !
صلاح قعد علي اقرب كرسي : عملت كل اللي طلبوه
مراته : وبعدين ايه اللي هيحصل !
صلاح : معرفش يا هاله معرفش .. بنتك غلطت واللي غلط بيتحمل غلطه
هاله : دي عيله وهو ضحك عليها
صلاح زعق : عيله ؟؟ سنة وتتخرج من جامعتها وتقوليلي عيله !! هو لسه في بنات في الزمن ده ومع كل الوعي ده والشباب تضحك عليها !! اللي بيحب بيدخل البيت من بابه وخلص الكلام وكل البنات عارفه كده اما اللي عايز يتسلي ويخرج ويتدلع فده عدم تربيه .. احنا مربيناش بنتنا صح !! احنا اديناها حريه وهيا فهمتها غلط
هاله بعد تصديق : بنتي متربيه كويس
صلاح : امال جابتلنا العار ازاي !! ازاي حطتنا تحت ضرس واحد زي علاء زفت .. سيبيني والنبي لوحدي
مي جوه اوضتها دموعها بتحرقها واستغبت نفسها ازاي صدقته وازاي
علاء وثق علاقته بيها بالشكل ده … تقريبا يوميا بيشوفها واتعلقت فيه جدا وافتكرت اليوم المشؤم من اوله
فلاش باك :::
مي : علاء وبعدين واخرتها ايه في خروجنا كل يوم !!
علاء : حبيبتي شاوري بس عايزاني اعمل ايه وانا اعمله
مي : خد اي خطوه
علاء : انتي عارفه فرق السن بينا قد ايه !
مي : انا ما يهمنيش
علاء : ابوكي هيهمه وهيرفض ومش هيوافق انا لو حد اتقدم لبنتي في سني هرفضه بتتكلمي ازاي !
مي مسكت كمه: انا بحبك وده المهم
علاء : وانا بعشقك يا مي بس هعمل ايه !! ابوكي عمره ما هيوافق ومش بعيد يجوزك غصب عنك وساعتها انا اخسرك قوليلي انتي حل وانا موافق عليه .. عايزينه يكون مضطر يوافق .. غصبا عنه يوافق فكري انتي وانا معاكي
مي فكرت شويه : نحطه قدام امر واقع
علاء بلهفه : قصدك ايه حبيبتي ؟
مي : نتجوز مثلا وساعتها غصب عنه هيوافق
علاء باس ايديها الاتنين : حبيبه قلبي انا موافق طبعا بس هيكون عرفي
مي : عرفي ! طيب ليه ؟
علاء : علشان ابوكي يخاف ويوافق علي طول .. حبيبتي انتي مش واثقه فيا ولا ايه !!
مي : حبيبي طبعا بثق فيك بس
علاء : ما بسش يالا بينا .. دلوقتي !
مي بفرحه : بجد دلوقتي ؟
علاء : حبيبتي بس تشاور وانا انفذ
مي : طيب يالا
علاء : طيب نطلع علي شقتي الجميله وتشوفي عش الزوجيه بتاعنا علشان كمان لو حاجه معجبتكيش نغيرها ونكتب الورق وهكلم المحامي بتاعي يجي ومعاه شاهد تمام كده !
مي : تمام حبيبي
اخدها بانتصار علي شقته وكلم محاميه اللي جهز الورقتين وقابله هو المساعد بتاعه ودخلوا الشقه ومضوا عليهم ومشيوا وعلاء عطي ورقه لمي
علاء : وبكده بقيتي مراتي رسمي
مي : بجد مراتك
علاء مسك الورقه : بجد طبعا مراتي مش الورقه دي بتقول كده !
قرب منها بس الخوف والتوتر سيطر عليها : انا خايفه
علاء : يبقي ما بتحبينيش
مي : لا انا بحبك .. بحبك قوي كمان
علاء : بتحبيني يبقي ولا تخافي مني ولا تتوتري كده وتسترخي في حضن حبيبك
مي : يعني احنا مش بنعمل حاجه غلط ؟
علاء : ولا غلط ولا حرام حبيبتي انتي مراتي وبعدين احنا هنطلع من هنا علي باباكي علي طول وبكره ايدي في ايد ابوكي ونتجوز رسمي وبعده تدخلي هنا عروسه بفستانك الابيض
مي : هتجيبلي فستان ابيض !
علاء : أجمل فستان لاجمل عروسه
مي ابتسمت ببراءه وما تعرفش انها بين ايدين ذئب هيفترسها ويرميها
علاء عملها عصير وحطلها فيه مخدر وبدئت هيا تضحك وبس وهو قام وفتح الباب ودخل كام واحد
مي : مين دول ؟
علاء : صحابي
مي بصوت زي السكران : يووووه بقي
علاء : تعالي معايا
اخدها اوضه نومه وهيا مش في وعيها خالص وبتضحك وخلاص قلعها هدومها وصورها كذا صوره وبعدها لبسها بدله رقص وهيا بتضحك واخدها بره وسط الشباب وشغل مزيكا وهيا الشباب شدوها ترقص وهو بيصورها وسطهم وكل واحد بيشدها بطريقه شكل وهيا سكرانه وبترقص وبتضحك وعلاء كمان بيضحك وبس …
………………..
صحيت مي بعد فتره طويله مستغربه هيا فين وشدت الغطا عليها مستغربه هيا فين وليه قالعه هدومها والخوف سيطر عليها طيب علاء مش جنبها
قامت لبست هدومها بسرعه ودورت عليه مفيش حد في الشقه كلها
اتوترت وخافت واخدت شنطتها فتحتها ملقتش الورقه بتاعت الجواز العرفي فيها
الخوف والرعب سيطروا عليها بتحاول تفكر مش عارفه .. ممكن يكون ضحك عليها طيب ليه علشان ايه !! لا بس هيتجوزها ليه ؟ وهو كده اتجوزها ؟ امها كانت ديما تقولها الجواز ايه غير زغاريط تملي البيت وبنت تخرج بفستان ابيض قدام الكل .. ده الجواز امال اللي عملته ده ايه !!
لا يا مي علاء بيحبك مش هيعمل كده ده مش شاب طايش ده راجل ناضج كبير وعنده بنت في سنك ممكن بس عنده شغل ..
طلعت موبيلها واتصلت بيه كان داخل مكتب ابوه
محي : ايه فين من بدري !
علاء تليفونه رن وشاور لابوه لحظه
علاء : ايوه يا قلبي
مي بخوف : انت فين !!
علاء : في الشركه يا قلبي جالي تليفون مهم ومهنش عليا اصحيكي
مي بعياط : علاء انت بتحبني بجد ؟ وهتيجي بكره فعلا لبابا !!
علاء : طبعا طبعا بصي انا في اجتماع ومش واخد راحتي هخلص واكلمك
مي : طيب الورقه بتاعتي فين !
علاء: في الخزنه عندك .. يوووه المفاتيح معايا .. بصي بكره اشوفك واديهالك بس خفت تروح كده ولا كده دي دليل حبنا والورقه اللي هنضغط بيها علي باباكي .. هتعرفي تروحي ولا ابعتلك اوبر !
مي : هروح انا
اطمنت شويه او ضحكت علي نفسها وروحت الرعب مسيطر عليها ليه عملت كده ! ليه نسيت كل كلام امها ! ليه نسيت ابوها اللي بيحبها طول عمره وبيثق فيها ! ليه ما جربتش الطريق الصح مش يمكن ابوها يوافق ويقتنع بحبها ؟ ديما ابوها يقولها الشيء اللي تخبيه وما تقدريش تعلنيه يبقي غلط وديما اسألي نفسك السؤال ده وانتي تعرفي ده صح ولا غلط ؟
دخلت بيتها وقفلت علي نفسها ومنتظره بكره يجي بسرعه وبالفعل جه بكره وعلاء راح زي ما وعدها وهيا فرحت بغباءها
صلاح باستغراب : علاء بيه ؟ خير ؟
علاء : طبعا خير .. فتحت شركه زينا وقولنا ماشي … وليد وقف جنبك ومالو حقه .. عملت شراكه مع فهد وقولنا ماشي اما اللي مش ماشي بقي انا لسانك يطول وتقول كلام مالوش لازمه لفهد
صلاح : وانا قلتله ايه غير ان ابوه كان راجل محترم وشهم
علاء : وانا عايزك تروحله وتقوله ان ابوه مهرب واطي
صلاح وقف : ده لا يمكن ابدا اخون واحد البيت ده اتفتح بكرمه واخلاقه .. انا كل حاجه عملتها مديون بيها لوليد بيه الله يرحمه
علاء : توقعت هتقول كده .. وعملت حسابي .. نادي بنتك
صلاح : نعم !!
علاء بهدوء ورجل علي رجل : نادي بنتك ..مش اسمها مي برضه .. ناديها يالا
صلاح : انت مالكش دعوه ب بنتي
علاء نادي هو : مي .. مي صلاح عبدالكريم تعالي هنا
صلاح : اطلع بره بيتي
علاء : لأ لأ لأ .. الاسلوب ده ما بحبوش .. تعالي يا مي واقفه بعيد ليه ! مش تقولي لباباكي اننا نعرف بعض وتقوليله ان امبارح كله وانتي في شقتي وفي سريري وفي حضني
مي اتوترت وصلاح قام شد علاء علشان يضربه بس علاء زقه : ما تسأل بنتك الاول
مي باصه للارض وحست ان الدنيا كلها بتلف بيها ومش عارفه تعمل ايه
صلاح : انا بنتي اشرف من امثالك يا كلب بره بيتي
علاء بهدوء : شوف انا خايف عليه وهو يشتم طيب بلاش اتفضل اهو علشان بس مش مصدق
علاء طلع موبيله وشغل فيديو وحطه قصاد وش صلاح
وصلاح بص وعنيه وسعت جدا
علاء : صورت بنتك من لحظه دخولها شقتي لحد ما خرجت انا منها وراحت كمان في سابع نومه .. فيديو تحفه اخد عليه الأوسكار
مشي بايده لقطات يوريها لابوها اللي في حاله صدمه تامه اما مي فجمدت مكانها لان مهما تخيلت سيناريوهات سيئه الا انها عمرها ما تخيلت الحقاره دي ..
علاء : اه شوف اللقطه دي .. هنا بترقص ولا اجدع رقاصه في كباريه وسط الشباب دول .. ايه رأيك ؟ ممكن تجيبلك عروض كتيره من كباريهات كبيره ولا تحتاج لفهد ولا لغيره …
صلاح خبط ايديه وزقها بعيد و وقع علي الكرسي وراه
علاء : ايوه اهدي وحط جزمه في بوقك وتنفذ كلامي بهدوء ..
طلع شيك مكتوب عليه عشرين مليون جنيه وحطه قدام صلاح
علاء : بكره هتروح تفض شراكتك مع فهد وترجعله فلوسه كلها وهترجعلي انا كل مليم اخدته من فهد واللي اتصرف في بضاعه ترجعلي البضاعه واللي اتصرف هيكون ديون عليك ولا اقولك خليه تمن رقصه بنتك انا بصرف قدهم في الليله الواحده في اي كباريه وهتقول لفهد ان جالك عرض افضل وهترجع صوره وليد الوحشه قدامه وهتسبك الدور كويس قوي والا قسما بالله لاخلي الفيديو ده ياخد فعلا جايزه الاوسكار افضل توزيع فهمت يا صلاح باشا .. بعد اذنك .. باي يا عروسه
مي نطقت : انت ليه عملت فيا كده ! انا مراتك
صلاح بصلها وعلاء نطق : مراتي ! ليه انتي شوفتي مأذون امبارح ولا حاجه !
مي : احنا كتبنا عقد
علاء : طيب هاتي العقد .. هو فين ؟ هاتيه يا قطه ! يعني واحد زيي يبص لعيله زيك عايز منها ايه ! انتي غبيه اعملك أنا ايه ؟ بس ما تيأسيش انتي حلوه وعندك مستقبل باهر في الرقص سيبك من الكليه واشتغلي في اي كباريه
صلاح وقف : قولت كلامك ؟ اطلع بره بيتي
علاء : الصبح تروح لفهد سلام
فاقت مي علي بابها بيتفتح وابوها دخل : عملتي كده ليه فينا ؟ قصرت معاكي في ايه !
مي عيطت : انا اسفه انا اسفه انا اسفه يا بابا حقك عليا
صلاح : اعمل بيه ايه اسفك .. ازاي قدر يضحك عليكي !! ازاي تروحي بيته ازاي !!
مي : اقنعني انه بيحبني واتفقنا نتجوز عرفي علشان نحطك في امر واقع وتوافق ما تخيلتش انه بيكذب عليا
صلاح : وانا من امتي كنت متعصب معاكي ! من امتي كنت الاب اللي محتاجه تحطيه في امر واقع علشان يوافق !! ليه خبيتي عننا ؟ ليه محكيتيش لحد فينا ؟ ليه محكيتيش لامك اتصرف ازاي واعمل ايه ؟ امال لو كنا متعصبين زي باقي الابهات والامهات كنتي عملتي ايه !! ازاي توافقي يتضحك عليكي بالسذاجه دي !
مي عيطت: حبيته وافتكرته بيحبني
صلاح : وهو ده الحب !! هو الحب الخروج والاحضان ومسك الايد .. الحب قيم واخلاق .. الحب خوف ومراعاه لربنا علشان يبارك الحب ده .. الحب هو دخول البيت من بابه .. الحب هو انك تتمني انسان في الحلال وفي النور .. الحب انك تخاف علي حبيبتك من كل حاجه واولهم نفسك .. الحب انك ماترضاش حد يبص لحبيبتك بصه مش كويسه او تحطها في وضع سيء .. الحب شيء مقدس وعلاقه مقدسه دنستوها انتو .. انتي مش بس ضيعتي نفسك انتي ضيعتيني كلنا معاكي … انتي ضيعتينا كلنا .. روحي ربنا يسامحك لاني مش هسامحك ابدا .. مش هسامحك ابدا يا مي … البنت اللي تحط راس ابوها في الطين ما تستاهلش اي شيء ..
سابها وخرج وهيا انهارت من العياط بس العياط هيفيد بايه …..
امها دخلت هيا كمان عندها
مي : انا اسفه يا ماما حقك عليا
هاله : معدش ينفع الاسف يامي المهم دلوقتي انتي عملتي ايه تاني في شقته وسمحتيله بايه ؟؟
مي عيطت جامد : انا معملتش اي حاجه وما سمحتلوش باي حاجه احنا بس كتبنا عقد عرفي
هاله لطشتها بالقلم : بس كده !!
مي عيطت قوي
هاله : امال قلعتي هدومك ازاي ولبستي بدله الرقص دي ازاي ورقصتي وسط الشباب بالمياعه دي ازاي !! عملتي ايه تاني ؟ وانتي بنت ولا الشباب دول اتسلوا عليكي
بتكلمها وبتزعق وبتضربها كله في نفس الوقت .. بتضربها بغل وبزعل وبضياع وبحب .. بنتها ضاع مستقبلها ومش عارفه تعمل ايه غير انها تطلع غليلها فيها
هاله : عملتي ايه تاني ردي ؟؟
مي : والله ما عملت حاجه ومش فاكره اي حاجه خالص .. احنا بس شربنا عصير وبعدها مش عارفه صحيت لقيت نفسي في سريره لوحدي ومعرفتش اعمل ايه !!
هاله : يعني ايه خدرك ولا ايه ؟؟ ردي
مي : معرفش يا ماما صدقيني
هاله : طيب انتي لسه بنت ؟؟ طمنيني
مي بعياط وبتضرب في نفسها : والله ما اعرف والله ما اعرف والله ما اعرف
وفضلت تضرب في نفسها وامها تحاول تمسك ايديها ومش عارفه لحد ما اغمي عليها بين ايدين امها اللي صوتت ونادت علي جوزها اللي معرفش يعمل ايه !! اخدوها المستشفي وبعد الكشف
هاله : بنتي مالها يا دكتور!
الدكتور : عندها انهيار عصبي الظاهر انها اتعرضت لصدمه كبيره .. حاولوا تبعدوا عنها الانفعال وتشوفوا ايه سبب المشكله ،، الف سلامه عليها
هاله طلبت دكتوره تكشف عليها وتطمنها علي بنتها وبعد الكشف
هاله : طمنيني يا دكتوره علي بنتي
الدكتوره : بنتك لسه بنت ومحدش قرب منها
هاله عيطت وغمضت عنيها للحظات
الدكتوره : لو بنتك اتعرضت لتحرش او خطف بلغي البوليس وهاتيلها حقها
هاله : والفضيحه ! والناس ! والمجتمع ! هنعمل فيهم ايه ! ولا ناخد التقرير الطبي بتاع حضرتك ونعرضه للكل علشان براءه بنتنا !!
الدكتوره : اهي دي الافكار المتخلفه اللي بتزود التحرش لان المتحرش عارف ان محدش هيلومه ولا هيتحاسب ولا حد هيعرف وعلشان كده بيأذي في بنات الناس لكن لو وقفنا وقلنا لأ هنقضي عليه وهيفكر مليون مره قبل ما يضايق بنت
هاله : اوعدك يا دكتوره ان لما الناس والمجتمع يقف ويقول لأ انا كمان هبقي اقول لأ
الدكتوره : ولما كل واحد يقول زيك مين اللي هيبدأ !
هاله : مش مشكلتي المهم ان بنتي سليمه
الدكتوره فضلت في حوار عقيم مع هاله اللي رافضه تماما اي شيء يعرض بنتها لكلام الناس ….
فهد اخر النهار دخلت عنده عبير
: في واحد اسمه يزيد بيه بره
فهد فضل باصصلها شويه
عبير : ادخله ولا امشيه؟
فهد : دخليه
عبير : طيب بعد ما ادخله ينفع امشي ولا حضرتك عايزني !
فهد : امشي .. في حد في الشركه ؟
عبير : لا بس عم صبحي بيقفل
فهد : ميس وجميله مشيوا ؟
عبير : مشيوا من بدري
فهد : خلاص دخلي يزيد وامشي وقولي لعم صبحي يمشي
دخل يزيد وقعد قصاد فهد
يزيد : خير فهد بيه
فهد فضل كتير ساكتت وباصصله
يزيد : فهد بيه انت كويس ! في حاجه !
فهد : مفيش اي حاجه.. الصبح كنت عايزك بس حاجات كتيره قوي اتغيرت من الصبح لدلوقتي .. فمش عارف اقولك ايه ! اقولك انا مش عايزك ! طيب ولو نفترض ان في لعب فهل انا عايزك ! او ممكن يكون بيتهيألي وعندي امل كذاب وساعتها انا مش عايزك .. بس ممكن يكون احساسي صح يبقي انا عايزك .. فهمت حاجه بقي !!
يزيد كان عنده خلفيه كامله من ابوه اللي فهمه كل حاجه وفاهم تماما فهد قصده ايه !!
فهد كمل كلامه : مفهمتش اذا كان انا نفسي مش فاهم
يزيد : لا فهمت وفهمت كتير قوي كمان
فهد : فهمت ايه بقي ؟ ياريت تفهمني انا كمان
يزيد قرب : فهمت انك متلخبط وفي امور في ماضيك مش عارف مين الصح ومين الغلط ؟ مين في اللي حواليك بيكذب ومين بيقول الحقيقه ؟ ومحتاج حد يساعدك بس خايف من اللي هتكتشفه او مش مستعدله ؟؟ فالسؤال هنا يا فهد انت مستعد تكشف كل الحقايق ولا انت مبسوط بتخبيطك في الظلام والكل بيضحكوا عليك وانت بتتخبط ؟؟؟
فهد استغرب ازاي يزيد قدر يفسر حالته بالظبط كده ! هل ده ذكاء من شغله وذكاء منه ولا هو كمان عارف حاجه عنه !!
فهد بحذر : ولنفترض اني عايز افتح دفاتر قديمه وادخل عش دبابير ؟؟
يزيد : نفتح وندخل بس اهم حاجه يكون معاك خبير يكشفلك كل الدبابير دي والاهم انك تكون مستعد للي هيقابلك في طريقك
فهد : ولو انا مش مستعد ؟؟
يزيد وقف : يبقي حضرتك بتضيع وقتي وانا عندي شركه كبيره محتاجه ايد من حديد .. عايز مساعدتي ولا مش عايزها ؟؟؟؟
فهد بصله وجاوبه ……..
…………
نبيله ندي اخدتها عند الدكتوره في معادها وفهد معاهم
فهد : حالتها ايه ؟
ليلي : المفروض تبدأ العلاج الطبيعي هيا حاليا كويسه جدا وهتتحسن اكتر مع الحركه ..
فهد : تمام .. هفضل علي اتصال بحضرتك
ليلي : في اي وقت فهد بيه .. ندي خليني اشوفك باستمرار
اخدها وروحوا وندي طلعت مامتها وميس قعدت مع فهد
ميس : قالتلكم ايه الدكتوره !
فهد : محتاجه لعلاج طبيعي علشان تتحرك
ميس مطمنه طول ما نبيله مش بتتحرك وفجأه بصت لفهد : اما انا جاتلي حته فكره
فهد : ايه ؟
ميس : اخو جميله وليد
فهد باستغراب : مالو ده وايه اللي فكرك بيه ؟
ميس : دكتور علاج طبيعي
فهد : وبعدين ؟
ميس : هاته هو يعالج جدتك بكره تجيبو
فهد : انتي عيزاه هنا في البيت ؟
ميس : بالظبط .. تحت ايدي وتحت عيني وتحت رحمتي هههههههههههه
ضحكت بشر ودي كانت اول مره فهد يلمح الشر ده فيها …..
في الشركه فهد راح لجميله
فهد : كنت عايز تليفون اخوكي
جميله : نعم !!
فهد : عايز تليفون اخوكي بتكلم عربي انا
جميله : عايزو ليه !!
فهد : وانتي مالك انتي
جميله تجاهلته : اتصرف وهاتو لنفسك
فهد خبط بايده علي مكتبها : انا مش ناقصك خالص النهارده .. اخوكي دكتور علاج زفت وانا محتاج لدكتور علاج زفت خلاص
جميله كشرت شويه وبعدها فهمت لما افتكرت جدته : اه لجدتك .. طيب قول كده اتفضل
فهد اخد الرقم ومشي وهيا بسرعه اتصلت باخوها وبلغته وطلبت منه يوافق علشان خاطر نبيله وبالفعل وليد وافقت وحدد معاد مع فهد وراح علي الفيلا وكانت ندي في استقباله هيا ونبيله
ندي : اهلا بحضرتك يا دكتور اتفضل .. دي والدتي نبيله
وليد وطي وسلم عليها : انا دكتور وليد اهلا بحضرتك
نبيله بصتله بحب ودموعها نزلت
وليد بص لندي : هو في ايه ؟
ندي بتأثر : اخويا اللي يرحمه كان اسمه وليد وماما لسه بتتأثر لما تسمع اسمه
وليد زعل : البقاء لله
ميس نزلت بتألق : عجبكم الدكتور اللي اخترته .. د/ وليد .. اخو جميله
وليد وجميله .. جمال الاتنين مع بعض صح !!
نبيله وندي بصوا لبعض واستغربوا وخافوا من ميس ومن اللي ناويه عليه
د/ وليد : هنبدأ
ميس : طبعا يا دكتور .. اتفضل هوريك الاوضه اللي هتشتغل فيها
أخذته ميس وندي زقت مامتها ودخلوا الاوضه وسابتهم وخرجت بس ندي خرجت وراها : ناويه علي ايه يا ميس !
ميس ضحكت : كل خير يا ندوش استمتعي بالعرض .. جميله و وليد كلاكيت تاني مره .. بس المره دي انا ماسكه خيوط اللعبه وانا اللي بلعب بيها .. انا وبس
…………
محي استدعي فهد في مكتبه
فهد : خير يا عمي
محي : انا كنت سبق وكلمتك في موضوع ولحد دلوقتي ما ردتش عليا فيه
فهد فهم قصده : موضوع ايه ؟
محي : خطوبتك لسالي .. انا سكت الفتره اللي فاتت احتراما لموت شريف بيه والد ميس بس عدي فتره اهو هنعلن عن الخطوبه امتي !
فهد : نعلن ! علي اساس اني وافقت !
محي : هترفض ليه ! المنطق بيقول انك توافق
فهد : ازاي بقي فهمني !
محي : اولا مفيش حد في حياتك وانت ما بتؤمنش بالحب والكلام ده
فهد : وثانيا؟
محي : ثانيا والاهم ان علاء وريثي الوحيد وسالي وريثه علاء الوحيده وبالتالي سالي هتاخد نصيبي ونصيب ابوها ولما تتجوزك وتخلفوا تخيل ابنك هيكون نصيبه ايه لما يورث كل ده بالاضافه اللي نصيبك
فهد بصله وبيحلل كلامه
تفكيره كل في الميراث والورث ومش بعيد هو يتجوز سالي ويخلصوا منه ويكون ابنه ولي العهد .. ياتري ده اللي عملوه مع ابوه ! اول ما خلف خلصوا منه واخدوا ابنه !! بس اول ما ابنه بدأ يتمرد عايزين بقي المره دي يجوزوه تبعهم علشان يضمنوا ان كل الشركه تكون في جيبهم…
فاق علي صوت محي : قولت ايه !
فهد بهدوء شديد : تحب نعمل الخطوبه امتي !
محي ابتسم ووقف يسلم علي فهد : برافو عليك ابني حبيبي .. ده الصح ؟ الخميس الجاي كويس !
فهد : طيب مش نبلغ ميس ؟
محي : نبلغها ومالو انا هكلمها واحدد معاها اليوم
خرج من عند محي وراح مكتبه وقفل عليه ومتضايق من نفسه ومن غباؤه وفجأه تخيل جميله لما تعرف الخبر ده .. مسك الباب علشان يروحلها بس تراجع .. فايدته ايه يروحلها ؟ وليه يروحلها اصلا !!
سالي عرفت الخبر وجريت علي مكتب فهد بس قبل ما تدخل تراجعت وراحت الاول مكتب جميله
دخلت وقفلت الباب
جميله : خير سالي هانم !!
سالي : خير بس جيت بنفسي اعزمك
جميله : علي ايه ؟
سالي بصتلها قوي : علي خطوبتي
جميله بتريقه: بجد خطوبتك ! ومين سعيد الحظ ده !
سالي : فهد .. تعرفيه !
جميله مصدقتهاش ابدا وبصتلها قوي بعد تصديق
سالي : ايه مش مصدقاني !
شدتها من دراعها لحد الباب وفتحت الباب شويه والكل كان متجمع ومحي بيعلن الخبر وبيعزم الكل علي حفله الخميس
سالي زقتها بعيد وقعت علي الكرسي : اتمنيتيه .. بس فهد ابعد من نجوم السما .. اه ممكن يتسلي بيكي شويه بس هو بتاعي انا ..
خرجت بانتصار من عند جميله وفهد كان واقف مع محي وعينه علي باب مكتب جميله وشاف سالي خارجه بابتسامه عريضه وعرف انها رمت الخبر في وشها وكرهها في اللحظه دي واتمني … اتمني ايه ! مش عارف هو تمني ايه !!
…………
سالي راحت لميس البيت فرحانه جدا بترقص وبتتنطط من الفرحه
ميس : مش قلتلك اصبري
سالي : حبيبتي انتي .. ما تتخيليش فرحتي قد ايه وانا بقولها خبر خطوبتي علي فهد .. مكنتش شايفه قدامها
ميس : ولسه كمان وانتي بتستمتعي
بدورك كخطيبه لفهد قدامها .. هتحريقها بنار الغيره .. هتموتيها بالبطيء
سالي : انا عايزه الخميس يجي بسرعه .. الفستان .. تعالي ننقي فستان .. موبيلي فين ؟ اه تحت هنزل أجيبه
نازله بتجري واتقابلت مع وليد داخل
سالي : انت بتعمل ايه هنا !
وليد : انا عندي شغل هنا
سالي ابتسمت : اما انتو حته نكته
وليد : افندم
سالي : لا روح لشغلك ما تهتمش بيا ابدا روح روح يالا
……………
جميله روحت بيتها مش شايفه قدامها ومش عارفه سبب حالتها دي ايه بس عايزه توصل بيتها باي طريقه وحست ان بيتها بعيد جدا جدا .. اخيرا وصلت ودخلت ووصلت لسريرها واستخبت فيه .. عقلها بيصورلها كل اللي مر عليها من يوم ما دخلت الشركه دي لحد النهارده وسالي بتبلغها الخبر …
عمتها دخلت عندها وقعدت جنبها
عمتها : فيكي ايه يا جميله ؟؟ اشكي لعمتك يا حبيبتي !! عملوا فيكي ايه !!
جميله اتعدلت ورمت نفسها في حضن عمتها وفضلت تعيط بصوتها كله .. عيطت كتير جدا وعمتها ضماها وبس
جميله من ضمن دموعها : فهد خطب سالي
مقالتش غير الجمله دي بس وهيا بتعيط وتعيط وعمتها تهدهد فيها لحد ما نامت في حضنها ..
سابتها وخرجت وعماد اخوها كان واقف : مالها !! كل العياط ده ليه !
جميله : علشان فهد خطب سالي
عماد : ودي فيها ايه ! ما يخطب
جميله : يعني ايه فيها ايه بقولك خطب يعني هيتجوز !!
عماد : ماشي فاهم .. سالي شريره بنت علاء اوكي فاهم دي بس اللي مش فاهمو ليه جميله بتعيط كل ده ؟
جميله اخته بصتله باستغراب : لانها .. لانها …
عماد : لانها ايه يا جميله انطقي ؟
جميله غيرت رأيها : لانها حست انها خسرت قصادهم .. مصدومه مش اكتر
عماد : وبعدين هتعمل ايه ؟ هيا قالتلك ايه ؟
جميله : مقالتش يا عماد .. مش عارفه هيا ناويه علي ايه .. انا مش عارفه صراحه اقولك ايه يا عماد بس انا اترجيتك بلاش تدخل بنتك لكن انت اصريت وشجعتها وادي التمن انت كمان هتخسر بنتك .. اسحب عيالك من دايره الشياطين دي .. دول شياطين واللي بيقربلهم بيتحرق
عماد باستغراب : اخسر بنتي ليه ؟ علشان اتهزمت في جوله يبقي هخسرها !! انتي مخبيه عني ايه يا جميله !!
اخته بهروب : مش هقولك تاني اسحب عيالك وابعدهم .. انا خسرت ابني انت عايز تخسر الاتنين !! افهم بقي دي قضيه خسرانه
الاتنين اتفاجؤا بجميله وراهم : مش خسرانه وما ابقاش انا جميله ان ما رجعت ابنك لحضنك .. فهد هيفوق .. ما تخافيش عليا انا مش ضعيفه انا بس خسرت جوله واتعلمت لما اخسر اقف .. وبعدين انا زعلت لان فهد بس اختار الشيطانه دي مش علشان حاجه تانيه .. ما تخافيش علينا يا عمتي . احنا وراكي ..
سابتهم ودخلت تكمل عياطها اللي كانت مسيطره عليه علشان تظهر قوتها قدامهم …..
تاني يوم راحت الشركه قويه رافعه راسها في دماغها عمتها وبس .. ونار ملياها لكل اللي في الشركه هنا
سالي اول ما شافتها اتوترت من نظرتها اللي اتغيرت ..
فهد في مكتبه بيتخانق مع كل اللي يدخله
عبير : يعني حضرتك عايز ايه دلوقتي !
فهد : شوفيلي حد يعرف يترجملي الزفت ده .. مش عارف انا ازاي تقبلوا شروط عقد مكتوبه بالالماني يا تطلبوا منهم يترجموا العقد يا ما تقبلهوش .. اتصرفي وهاتيلي مترجم حالا ( جت تمشي ) استني
عبير : نعم حضرتك
فهد : مين اللي قبل العقد بالشكل ده اصلا !
عبير بتوتر : سالي هانم سكرتيرتها اللي جابته
فهد : تمام هاتيلي مترجم خلال نص ساعه
عبير جريت من قدامه وهو خرج في ايده العقد وراح لمكتب سالي اللي فاتحه مجلات كتير وهو دخل بعنف وحط العقد فوق كل اللي قدامها
سالي باستغراب : في ايه !
فهد : ترجميلي الكلام ده !!
سالي بصت للعقد : ده ايه اللغه دي اصلا !! معرفش
فهد بغضب مكتوم : ولما ما تعرفيش ازاي تقبليه !!
سالي : انا وانا مالي
فهد مسك ايديه وضمهم علشان ما يتهورش : العقد سيادتك اللي قبلتيه وسكرتيرتك اللي جابته .. لو انتي مش فاضيه للشغل يبقي خدي مجلاتك وروحي اقعدي في بيتك نقي فساتينك براحتك لكن غلطه تانيه زي دي يا سالي هتكلفك كرسيكي هنا
سابها وخرج وهيا في حاله ذهول وجريت علي ابوها تشكيله وهيا خارجه قابلت جميله اللي ماسكه مبرد وبتبرد اضافيرها وسانده علي حيطه واول ما شفتها
جميله وحولت وشها بتريقه وكأنه صعبان عليها: لا لا لا لا يا حرام .. ازاي فهد ما يقدرش انك بتنقي فستان خطوبتك وازاي هو مش معاكي ينقيه وليه مش بينقي بدلته ! مش حرام يزعل خطيبته في اول يوم ليهم ! ده يا عيني مالبستوش حتي دبل .. مش يقدّر فهد !! لا عايز قرصه ودن !! اجري علي بابي قوليليه يا بابي اقرص ودن فهد زعلني وزعقلي .. بس ليه فهد زعلك !( عملت نفسها بتفكر ) اه علشان اصلا ده جواز مترتب اللي هو نظام زيتنا في دقيقنا والشركه ما تروحش لحد بره .. امممم ( حطت ايدها علي بوقها ) هشششش مش هقول لحد انه ما بيحبكيش قلبي عندك يا عمري .. انتي مضطره معلش تستحملي .. ممكن يحبك .. ايوه زمن المعجزات خلص بس مفيش حاجه بعيده عن ربنا …
ضحكت وسابتها ومشيت وسالي جريت بغيظ تعيط فعلا لابوها
جميله نازله ولمحتها عبير وخايفه
جميله : في ايه مالك !
عبير : ما تعرفيش حد بيتكلم الماني بسرعه ينوبك ثواب هترفد يا جميله
جميله : حبيبتي اهدي انا بعرف الماني كويس عايزه ايه !
عبير باستها من خدها وشدتها من ايدها لمكتب فهد وفتحت الباب وجميله حتي مالحقتش تعترض ومش فاهمه في ايه !!
فهد بصلهم : نعم !
عبير : جبت لحضرتك المترجم اللي طلبته
شدت جميله اللي مش فاهمه حاجه
فهد : مين هو !
عبير : اهو جميله
فهد بصلها : انتي بتعرفي الماني !
جميله رفعت راسها : اه بعرف ليه !
فهد بص لعبير : شكرا يا عبير روحي انتي
عبير خرجت وقفلت الباب وجميله بتبص لفهد بتكبر
فهد قعد علي مكتبه وحط العقد : اتفضلي ترجميلي العقد ده !
جميله بصت للعقد وبصتله : دي مش وظيفتي اترجملك !
فهد : بقولك ايه انا علي اخري والحكايه مش طلباكي اصلا
جميله بتريقه : امال طالبه مين ؟ اه سالي حبيبتك !! طيب لحظه اجيبهالك تروق دمك شويه ..
فهد زعق : استني هنا وبطلي اللي بتعمليه ده !! بلا سالي بلا زفت
جميله : ايه ده بقي ! تروح وتزعقلها ودلوقتي تقول مش طلباني وطي صوتك لحد يسمعك ويقول يا عيني جابرينك وضاغطين عليك .. ويقولي يا عيني فهد بيه رئيس مجلس الاداره هيجوزوه غصب عنه هيكون شكلك وحش قوي
فهد قام بغضب هيا قابلته بغضب اكبر : قسما بالله يا جميله
جميله : نعم !! بتقسم بايه يا ابن ميس ..
فهد بصلها وافتكر كلمه صلاح يا ابن ميس لانك مش ابن وليد واهو جميله بتقولها .. ليه جميله بتقوله يا ابن ميس !!!
فهد :……..
بقلم / الشيماء محمد
رواية جميله الجزء الثاني للكاتبه شيمو
الحلقه الثانية عشر
كتير بيقولي اختصري الاحداث وانجزي يعني صراحه معنديش رد ليكم غير اني مش بجبر حد يقرأ ولا ايه ! يعني ايه اختصر الاحداث ؟ انا صراحه معنديش رد ليكم !!!
هسيبكم مع الحلقه للي حابب يقراها
فهد قام بغضب هيا قابلته بغضب اكبر : قسما بالله يا جميله
جميله : نعم !! بتقسم بايه يا ابن ميس ..
فهد بصلها وافتكر كلمه صلاح يا ابن ميس لانك مش ابن وليد واهو جميله بتقولها .. ليه جميله بتقوله يا ابن ميس !!!
فهد : نعم !! ابن مين !! لاخر مره هحذرك اعرفي حدودك هنا في الشركه
جميله بتحدي : انا عارفه حدودي كويس بس هل يا تري انت عارف حدودك !
فهد : انا هنا ماليش حدود نهائي الشركه شركتي والموظفين هنا كلهم بلا استثناء موظفيني ولو انتي فاهمه ان احترامي لخاطر والدتي ده هيخليكي في مركز قوه فلا فوقي لنفسك واعرفي انتي بتتكلمي مع مين !! اه خاطر والدتي علي عيني وعلي راسي بس مش هسمحلك تتمادي في تصرفاتك علي حساب الخاطر ده .. فانتبهي لنفسك لو عايزه تكملي في الشركه هنا والا هتلاقي نفسك بره وروحي ارجعي لطلبتك ولتدريسك ..
جميله كانت هترد بس افتكرت عمتها ودموعها وشوقها لابنها وحرمانها طول السنين اللي فاتت دي .. فهد اه ممكن يسمحلها بشويه تجاوزات بس فعلا مش للدرجه دي فلازم تكون حذره
فهد فهم سكوتها ده انها فعلا خافت تترفد وحس بانتصار مالوش معني جواه لانه بيحب وقوفها قصاده وبيحب تحديها ليه
فهد : ودلوقتي اتفضلي ترجميلي شروط العقد ده ايه وتجهزي علشان في حد من الشركه هيتكلم معايا اون لاين دلوقتي وممكن ما يكونش بيعرف انجليش فهحتاجك تترجميلنا
جميله برضه مش عايزه تستسلم بالسهوله دي لفهد وفي نفس الوقت مش عارفه تعمل ايه
فهد حط الورق قصادها وزعق : اتفضلي
جميله : يعني انت محتاجاني وعايز مليون طلب مني باي عين بتعلي صوتك هاه !!
فهد : ده شغلك
جميله : شغلي اه بس انا مش محتاجاله للدرجه اللي اخاف فيها من سيادتك لا ترميني بره فخلي انت كمان النقطه دي في بالك .. انا كمان بسهوله اقدر اسيب الشغل هنا وأرجع لطلبتي المحترمين
شددت قوي علي كلمه المحترمين وفهد بصلها وهيا بصاله والاتنين واقفين قصاد بعض زي الاسدين اللي بيستعدوا للهجوم .. وقطع عليهم هجومهم دخول علاء بنرفزه واول ما شاف جميله اللي رجعت خطوه لوري بدخول علاء
علاء بتريقه : مش تحطلك لمبه حمرا قدام الباب زي بتوع زمان علشان قبل ما حد يدخل يعرف انك مشغول
فهد بصله : تلميحات سخيفه زي بتوع بنتك مش هسمح بيها يا عمي عندك حاجه مهمه عايز تقولها قول معندكش فاتفضل لاني منتظر مكالمه اون لاين مع الشركه في المانيا والباشمهندسه حاليا الوحيده في الشركه اللي بتعرف الماني وبسبب بنتك الفصيحه اللي قبلت تستلم فاكس كله الماني فأنا علي اخري ومش مستحمل حرف واحد من حد
علاء : الباشمهندسه امممم قولتلي
فهد : لو حضرتك تعرف الماني اتفضل علي الاقل هيا تروح بدري ؟؟
علاء : ولا الماني ولا ياباني .. كلامنا في البيت يا فهد اسيبك ل …. لشغلك
خرج وقفل الباب وراه وفهد بص لجميله
فهد : انجزي
جميله بصتله نظره ناريه الاول وبعدها وقفت جنبه وبدئت تترجمله
فهد : قومي نقعد هناك بدال ما انتي واقفه كده !!
جميله استغربت اهتمامه بحاجه زي دي بس طبعا لازم تحط التاتش بتاعها : وانت مهتم قوي بوقفتي وتعبي !!
فهد بصلها : انا غلطانلك .. اشبعي وقفه كملي
جميله تعبت وضهرها وجعها من الوقفه وبدئت تبدل الوقفه علي رجليها وهو ملاحظ ده ومطنشها وبيقول جواه .. تستاهلي بس فجأه اتضايق من تعبها .. اتضايق من كبرياءها ومعدش مركز معاها فقام وقف وهيا سكتت و أخد الورق بصمت وراح قعد علي تربيزه الاجتماعات الصغيره في ركن مكتبه وهيا بصمت باعت كبرياءها وراحت قعدت جنبه واول ما قعدت جسمها كله أنّ من الوجع فغمضت عنيها للحظه وهو هنا لعن كبرياءها الغبي .. فتحت عنيها لقته مركز معاها قوي فاتحرجت وبصت للورق وبدئت تكمل بس هو شد الورقه من ايدها
فهد : يعني بس فهميني استفدتي ايه من رفضك غير تعبك انتي !!
جميله بتهور وسرعه : اني ضايقتك
فهد هنا بصلها الاول بدهشه ومره واحده انفجر في الضحك ودي كانت اول مره جميله تشوفه بيضحك كده .. كان نفسها تقوله قد ايه هو وسيم لما بيضحك ..انتظرته يخلص ضحك
جميله : هاه خلصت ضحكك .. الحمد لله ان في حاجه ضحكت فهد بيه
فهد بابتسامه : معلش هو ايه اللي هيضايقني لما انتي تتعبي من الوقفه !! بس فضولي الرهيب هيموتني واعرف اجابتك
جميله معندهاش رد بس لازم تبتكر : اني قلتلك لأ .. وانك عارف اني بعاندك حتي لو حاجه هتريحني برضه اجابتي ليك لأ
فهد ضحك بخفه : وهو انتي متخيله انك لما بتقولي لأ فانا مش هعرف اخليكي تعملي اللي انا عايزو !! يا حلوه انتي انا بسيبك بمزاجي لاني بس بستمتع بمحاولاتك دي .. عارفه زي الفهد بالظبط لما بيلعب بفريسته .. انا بلعب معاكي لما بسيبك ترفضي .. لكن في الحاجه المهمه انا بعرف كويس اخليكي تعملي اللي انا عايزو بالظبط !!
جميله بصتله شويه ومره واحده قامت وخارجه
فهد باستغراب : انتي رايحه فين !!
جميله : مروحه بيتنا وانت هاتلك حد يترجملك العقد ولما يتصل اللي هيتصل ده بلغه انك ما بتعرفش الماني .. ( بتحدي ) اجبرني بقي اقعد واترجملك يا … يا فهد بيه
خرجت ورزعت الباب وراها وهو بدال ما يتضايق ابتسم .. وعاجبه عنادها ده الي اقصي حد ومستغرب ازاي تحول من قمه غضبه الي الابتسامه الغبيه اللي علي وشه
تليفونه رن وكانت الشركه وتجاهل التليفون وقام يخرج من مكتبه .. خرج قابل آسر في وشه داخل فسلم عليه
فهد : جيت امتي !!
آسر : لسه واصل حالا .. خلصت تسليم الاجهزه ورجعت علي طول
فهد : مش قلت اخدت امل معاك علشان تقعد معاك يومين في الغردقه قبل ما تيجو !
آسر : لقينا الدنيا خنقه واحنا لوحدنا كده فقلنا نبقي نطلع كلنا مع بعض هتكون الذ
سالي كانت خارجه من عند ابوها ورايحه ناحيه مكتبها ولمحت جميله مركزه مع فهد وهيا بتتكلم مع امل وكأنها ماشيه بس قابلت امل صدفه علي باب الاسانصير فراحت بسرعه علي اسر وسلمت عليه
آسر : ازيك سالي
سالي : حمدالله علي السلامه اسر .. مش تباركلي !
آسر باستغراب : اباركلك علي ايه الاول !!
سالي عينها علي جميله وعلت صوتها ومسكت دراع فهد بتملك : خطوبتي انا وفهد بعد بكره يوم الخميس .. بذمتك مش خبر يجنن ؟
آسر نزل عليه الخبر زي الصاعقه وبص لفهد اللي دور وشه بعيد مخنوق من سالي وتصرفاتها وامل كمان سمعت وشهقت بهمس وجميله لاحظت تغيرها
لحظه من الصمت عدت علي الكل قطعها آسر : مبروك ( بص لفهد بنظره فهد مافهمش معناها ) مبروك يا .. يا ابن عمي
انا جاي من السفر تعبان بعد اذنكم ..
سالي : اوك نتقابل بعدين .. ( بصت لامل ) امل ما تيجي تنقي معايا الفستان بتاع الخطوبه ونشوفلك انتي كمان فستان !!
امل مكنتش عارفه ترد فجميله ضغطت علي ايدها بتشجعها
امل بصت لجميله اللي بتشجعها تتكلم وتداري ضعفها : وقت تاني
آسر وقف واخد اخته ودخلوا الاسانصير ومعاهم جميله ونزلوا التلاته بصمت وامل ماسكه ايد جميله لحد ما خرجوا بره الشركه
جميله بتشد ايدها : امل انتي هتروحي مع اخوكي
امل : ما تخليكي معايا .. خليكي معايا يا جميله !!
جميله بتردد : مش عارفه يا امل ! مقولتش لحد من عيلتي
امل بصت لاخوها : آسر استني لحظه تتصل باهلها تقولهم وناخدها معنا ارجوك
آسر : هنتظركم في العربيه
هرب هو كمان من قدامهم وجميله اتصلت بعمتها وبعدت خطوتين عن امل وكلمت عمتها وبعدها رجعت لامل : بس مش هينفع اتأخر ماشي
امل فرحت بيها جدا وركبوا الاتنين جنب بعض وري ، امل سندت علي كتف جميله وعيطت بهدوء وجميله مش عارفه تواسيها ازاي او تواسي حتي نفسها ازاي ..اما آسر فساق بتوهان لحد ما روحوا ودخلوا فيلتهم .. نزلوا ودخلوا بيتهم كان خالد ومعاه ندي تقريبا بيتخانقوا بس سكتوا مع دخول عيالهم
ندي جريت علي بنتها : في ايه امل مالها !
جميله : هيا كويسه .. تسمحيلي اطلعها اوضتها
ندي ابتسمت لجميله : طبعا طلعيها
طلعوا الاتنين مع بعض اما آسر انتظر لحد ما طلعوا وبص لابوه : انت كنت عارف ؟؟
خالد : كنت عارف ايه !
آسر : باللي حصل ؟
خالد : وايه اللي حصل !
آسر : خطوبه سالي وفهد ؟
ندي : سالي وفهد اتخطبوا معقوله ! واحنا ما نعرفش !
آسر : الخطوبه لسه الخميس .. بابا انت كنت عارف !!
خالد ابتسم : طبعا انا اللي اقترحت اصلا الخطوبه دي .. جدودك كان لازم يكبحوا جماح فهد وقولنا ان الجواز افضل شيء للسيطره عليه واقترحوا امل بس انا رفضت وقولت امل طيوبه ما تنفعش مع واحد زي فهد فاقترحت سالي والكل وافق وفهد كمان وافق
آسر كان بيسمع بصدمه : انت اللي اقترحت سالي !! انت !! يعني من ضمن بنات الكون كله ملقتش غير سالي
خالد باستغراب : ماهو يا امل يا سالي !! وامل ما تنفعوش !!
امل من فوق : ليه ما انفعوش !! هو انا مش بنت زي باقي البنات !! ولا علشان سالي اجمل مني وبتتكلم افضل مني !! انت استكترت فهد علي بنتك !!
خالد باستغراب : العيال دي مالها !! مالكم انتو الاتنين
امل زعقت وجريت : انا عمري ما هسامحك
دخلت اوضتها لجميله اللي اتفزعت من منظرها : في ايه مش نزلتي تجيبي كوبايتين ليمون نهدي بيهم ! مالك بقي
رمت نفسها في حضنها وفضلت تعيط وجميله تهديها
اما اسر فبص لابوه بغضب وساب البيت كله وخرج وخالد بص لمراته : العيال دي مالها ؟ اتجننوا ولا ايه !!
ندي بصتله قوي : هو انت للدرجه دي اعمي ؟ ما بتشوفش ولا بتحس خالص ؟
خالد : انتي بتقولي ايه انتي كمان ؟ في ايه مالكم !
ندي : في انكم لسه ما بطلتوش الشر بتاعكم وبتخططوا لفهد زي ما قبله كنتو بتخططوا لوليد بس المره دي انت خطتك اتقلبت عليك وعلي رأي المثل ( لا يحيق المكر السيء الا باهله )
خالد : مكر ايه وخطط ايه ؟ فيها ايه لما نتفق ان فهد يتجوز سالي !! ده ايه الشر اللي فيها ؟
ندي : انكم عايزين تضمنوا ما يبصش لحد بره ويجيبلكم حد يخلفله وريث تاني وتفضل الشركه في حضنكم علشان انتو اصلا مخلدين فيها ..
خالد : بقولك ايه مهياش طالباكي .. عيالك مالها !
ندي : عيالي !! عيالي انت كسرتهم الاتنين النهارده
خالد: ليه بقي ان شاء الله ؟؟
ندي : علشان آسر ابنك ولا حب ولا هيحب غير سالي ومن زمان وهو بيحبها وبنتك بتحب فهد وبس !! ( خالد اتصدم ) شوفت بقي انت عملت ايه بايدك في عيالك ! كسرتهم الاتنين وحطمتهم !! وبنتك فهمت انك مستعر منها ومن شخصيتها المهزوزه ورفضت تجوزها لفهد لانه عايز سيده مجتمع زي سالي اما ابنك فربنا يعينه .. وريني بقي هتعمل ايه وهتصلح كسرتهم دي ازاي !!
سابته هيا كمان وطلعت لبنتها ولقت جميله منوماها علي رجليها وشاورتلها تسكت علشان نامت
ندي بهمس : نامت حبيبتي !!
جميله : ايوه نامت .. شكلها تعبانه من السفر
ندي : اكيد .. انتي طيبه قوي يا جميله .. بتفكريني بحد كنت اعرفه زمان .. كانت طيبه قوي زيك
جميله ابتسمت لانها عارفه انها تقصد عمتها : وطيبتها دي كانت حلوه ولا وحشه
ندي : قصدك ايه !
جميله : اقصد نفعتها طيبتها ؟!
ندي بزعل : للاسف لأ .. دمرتها تماما .. زي امل كده برضه طيبه وطيبتها للاسف برضه مدمراها
جميله : يعني ابطل انا الطيبه دي !
ندي : والله ما عارفه يا جميله ايه الصح وايه الغلط !
جميله : الطيبه مش وحشه ابدا .. بس الطيبه لازم يكون معاها قوه بحيث محدش يستغلها غلط ويحول طيبتك دي لضعف يدمرك .. اكون طيبه اه بس بدون ما حد يستغلني ..
ندي : فعلا الطيبه لازم يكون معاها قوه .. المهم تعالي نتغدي انا وانتي ايه رأيك نقعد مع بعض لحد ما امل تصحي !
جميله : لا معلش اعذريني انا لازم امشي علشان مش هينفع اتأخر اكتر من كده وقت تاني وظروف احسن من كده ونقضي وقت مع بعض
مشيت جميله وراحت لعمتها مهمومه وحكت لعمتها اللي حصل كله ..
وعمتها كمان معرفتش تقولها ايه او تواسيها ازاي !! الدنيا كلها متلخبطه ..
……………..
مي فاقت واتحسنت وامها ساعدتها وخصوصا لما عرفت انها سليمه .. واخدوها البيت وصلاح راح لعلاء يطلب منه يطلق البنت بهدوء ووعده انه مش هيتكلم مع فهد تاني وعلاء رفض يطلق وقاله ينتظر لحد ما يطمن تماما من ناحيته ويتم فرح بنته بهدوء
…………….
قبل الخطوبه بيوم ندي كانت رايحه بأمها المستشفي لاستشاره سريعه
نبيله : عملتي اللي قلتلك عليه ؟
ندي : عملته بس خايفه .. لو فهد عرف !
نبيله : فهد مشغول بخطوبته اللي بكره والنهارده افضل فرصه
ندي : طيب مش افضل كنا طلبنا مساعده ليلي
نبيله : ليلي متفقه مع فهد والله اعلم مش يمكن تبلغه !! خلينا في المضمون
ندي : طيب ومين قالك ان الراجل ده مضمون !
نبيله : ده صديق قديم ومقرب جدا مننا ومش هيتأخر ابدا عن مساعدتي
ندي : برضه خايفه
نبيله : ندي وبعدين !! يعني ايه اللي ممكن يحصل اسوأ من اللي بيحصل اصلا ؟
ندي بصت لامها : اني اخسرك تاني !!
امها طبطبت علي ايدها بابتسامه : مش هتخسريني ابدا
خلصوا الاستشاره وراحوا علي معادهم وكانت في راجل كبير اسمه سليم عبد الرحيم في انتظارهم في المكان اللي اتفقوا عليه .. رحب بنبيله جامد
وفضلوا يتكلموا شويه في ذكرياتهم
سليم : خير يا نبيله !! بنتك قالت انك عايزاني في حاجه مهمه !
نبيله حكتله حكايتها كلها
سليم : انتي عايزاني اتدخل لميس دي ؟
نبيله : لا لا انا عايزه اعرف قرار وليد
سليم : وليد !! مش قلتي انه اتوفي من زمان !!
نبيله : بس جد في الامور امور
فلاش باك
———-
نبيله خرجت من اوضتها علي كرسيها كانت قلقانه علي فهد انه اتأخر وقربت من اوضه ميس لانها سمعت بابها بيتقفل تسمع هل فهد معاها ولا لأ وهنا سمعت صوت ميس بتتخانق مع محي في الموبيل
ميس : بقولك ايه يا عمي فهد غير وليد .. وبعدين فهد اصلا بيكره وليد
سكتت شويه وبعدها كملت : مش هيحن لذكري ابوه مش معني انه وقف دقيقتين قدام قبر ابوه يوم جنازه جده انه حن مش يمكن يكون بيشتمه .. وبعدين وهو القبر ده فيه وليد اصلا !! ماهي جثه والسلام الي فيه
سكتت كتير : عمي عمي .. فهد مش زي ابوه ولا هيحن له وبعدين اهو وافق علي سالي وبكره يخلف منها والعيل ده هيكون الكل في الكل فالصبر حلو .. وبعدين وليد لو كان هيرجع كان رجع من زمان مفيش شيء في الكون كله ممكن يبعده عن جميلته غير الموت .. وليد اكيد مات وشبع موت كمان نقفل بقي صفحته وخلينا نركز في الفرح اللي جاي .. يالا سلام وبطل قلقك ده .. اجهز لفرح حفيدتك ..
نبيله رجعت اوضتها وهيا مش عارفه تفسر اللي سمعته ده ايه
نرجع للواقع
———
سليم : يعني انتي شاكه ان ابنك يكون عايش ! طيب فين وليه ما رجعش !
نبيله : معرفش .. لو كانوا واثقين من موته مش هيكونوا خايفين للنهارده من اسمه وذكراه .. هما بيفترضوا انه ميت معني كده انه ممكن كمان يكون عايش
ندي : ماما مش يمكن بيتهيألك !! بلاش امل كداب والنبي يا ماما
نبيله : لو في امل ولو واحد في الميلون ان ابني عايش فأنا هتعلق بيه .. ارجوك يا سليم ارجوك ساعدني
سليم : من غير رجا ابدا يا نبيله انتي عارفه معزتك ولو ابنك عايش هرجعهولك وده وعد مني
نبيله : بس اوعي مخلوق يعرف ليقتلوه
سليم : عيب عليكي ده شغلي انا بقي .. وبعدين انتي نسيتي اني كنت مدير مخابرات ولا ايه !! اوعي تفكري ان طلوعي علي المعاش اثر فيا ولا انا عجزت !!
نبيله ابتسمت : انا متشكره جدا ..
سليم : بس يا نبيله ما تحطيش امل كبير
نبيله بحزن : انا تقبلت موت ابني بس عايزه اريح ضميري وقلبي اني عملت كل اللي اقدر عليه ومش عايزه افضل في حيره لو هو ميت قلبي يطمن ولو عايش يبقي ….
دموعها غلبتها وسكتت
ندي : ماما حبيبتي .. هنتأخر وممكن يشكوا في تأخيرنا
سليم وقف : لو في اي شيء هتواصل معاكي استاذه ندي
ندي : تمام بس ازاي ! اخاف
سليم قاطعها: ما تقلقيش هعرف اوصلك بدون ما حد يحس ده شغلنا بقي ..
روحوا وكلهم امل ان ممكن يكون وليد فعلا عايش ..
………………
بقلم /
shimooo novels الشيماء محمد
ليلي : ادهم رايح فين كده علي الصبح حبيبي ؟
ادهم قرب وباسها وضمها لحضنه : المدير استدعاني
ليلي بتكشيره مصطنعه : مدير مين ما انت مدير نفسك ؟
ادهم ابتسم وباسها بين عنيها في تكشيرتها : اقصد المدير سابقا
ليلي : غريبه ليه ؟
ادهم : الله اعلم ممكن عايز خدمه او حاجه هعرف وابقي اقولك ما تقلقيش .. المهم آسيا ويوسف فين ؟
ليلي : نايمين لسه .. اصحيلك آسيا تاخدها معاك !
ادهم : لا سيبيها تصحي براحتها النهارده اجازه اصلا
سابها ونزل وراح لبيت مديره اللي رحب بيه جدا : بقي ما تسألش علي مديرك مكنش العشم ادهم بيه
ادهم بحرج : والله غصبا عني معلش اعذرني
سليم : هعذرك يا بكاش المهم طمني عليك وعلي بيتك وعيالك
اتكلموا شويه مع بعض
سليم : طبعا اكيد مستغرب ليه انا طلبتك
ادهم : لا يا افندم عادي
سليم : بجد عادي !
ادهم : مش عادي قوي يعني اكيد عندي فضول
ضحكوا الاتنين و بدأ يحكيله بالتفصيل عايز منه ايه ؟
ادهم ساكت وبيفكر وافتكر كلام مراته وافتكر دلوقتي هو سمع اسمع وليد نصار ليه قبل كده …
سليم : ايه ساكت ليه ؟
ادهم : حضرتك اللي فهمته عايزيني اجيب قرار وليد نصار واسافر باريس واعرف اختفي فين صح كده !! بس ليه !! يعني ايه اللي جد دلوقتي بعد اكتر من عشرين سنه
سليم حكاله اللي نبيله سمعته
ادهم : انت شايف ان ده سبب كفايه ! دي ست مريضه وابنها ميت بتتعلق بقشايه
سليم : حتي لو قشايه ما تستهونش بيها .. مش ساعات بيقولك القشه اللي قسمت ظهر البعير .. يمكن يا ادهم
ادهم بفضول : ماشي بس برضه ليه مهتم بوليد ده اصلا او والدته
المدير : اولا وليد كان سمعته معروفه ورجل اعمال ناجح فازاي يهرب سلاح ؟ فاعتقد انه مش هو اصلا فده معناه ان اللي بيهرب موجود وممكن يكون كمان لسه بيشتغل بالتهريب فانا عايزك تجيبلي قراره .. غير كده مراته اتحبست ودي بنت كانت بسيطه جدا .. من قريه بسيطه معندهاش العقليه دي ابدا .. الموضوع كله مش طبيعي
غير اختفاء وليد نصار نفسه ! ولو هو بره ساب مراته وابنه ليه ؟ وليه ساب طليقته وصيه علي ابنه مش مراته ؟ ولو هو محبوس فمحبوس فين ؟
ادهم كل دي اسئله غامضه انا محتاج لاجابتها ..
ادهم باستغراب : هو انا ليه حاسس ان في حاجه شخصيه في اهتمامك بوليد ؟
المدير : والدته كلمتني وتهمني وانا اعرفها معرفه شخصيه … وهيا شخصيه محترمه جدا وكنا اصدقاء في فتره من الفترات هيا وزوجها
ادهم ابتسم : ليه حاسس ان علاقه حضرتك بيهم اتقطعت بعد ما ارتبطوا ؟
سليم بص لادهم : قصدك اني ….. قوم يا ادهم من بيتي وشوف هتعمل ايه قوم
ادهم ضحك ورجع لجديته : المهم مبدئيا كده اول حاجه هعملها هعمل تحليل لل DNA
سليم باستغراب : لمين ؟
ادهم : للي في قبر وليد مش يمكن يكون هو اصلا وميت وشبعان موت واحنا نفضل نلف عليه بره !! الاول اتأكد انه مش هو وبعدها اتحرك فعايز من حضرتك عينه من فهد ابنه
سليم : دي سهله هجيبهالك
ادهم : تمام .. بس ايه بقي حكايه نبيله هانم دي !
سليم مسك مخده وحدفها علي ادهم اللي ضحك ووقف وهو خارج سليم وقفه : الموضوع اتمني يكون سري يا ادهم وهيكون بصفه غير رسميه كخدمه شخصيه ليا .. اه كمان حتي مراتك ما تعرفهاش حاجه
ادهم : مراتي ؟؟
سليم : نبيله بتقول انها علي اتفاق مع فهد فقلقانه من ناحيتها
ادهم بابتسامه : لا ما تقلقش ( قبل ما يقفل الباب ) بس مجرد صداقه ؟
سليم يدوب هيقف بس ادهم قفل بسرعه ومشي وساب مديره اللي غرق في ذكرياته
المدير بيفكر : يا تري يا نبيله اتغيرتي ولا لسه زي ما انتي عنيده !! الدنيا عركتك ولا لسه قويه !! ويا تري ويا تري ويا تري ؟؟
…………………
ندي كانت بتشتري هديه وخالد منتظرها في عربيته ومره واحده لقت حد جنبها اتكلم لدرجه انها كانت هتصوت
سليم : اهدي اهدي ده انا
ندي اتلفتت حواليها بخوف : اهدي جوزك في العربيه وهيا كلمه .. عايزه عينه من فهد
ندي : يعني ايه عينه !!
سليم : اي حاجه نعمل بيها تحليل DNA
ندي : تحليل لايه ! وليه ؟ و زي ايه ؟
سليم : مفيش وقت لاسئلتك دي كلها لاحسن جوزك يجي .. المهم عينه زي نقطه دم او شعره .. اي حاجه منه .. ابعتيلي رساله علي الواتس حتي بكلمه تم وهبعت اللي ياخدها منك او هجيلك انا زي كده ..
قبل ما ترد كان اختفي فجأه زي ما ظهر فجأه وندي بتتلفت حواليها واتفاجئت تاني لما سمعت صوت جوزها وراها : بتتلفتي علي ايه !
ندي : يا لهوي يا خالد خضتني
خالد: المهم نقيتي هديه ولا لسه خلينا نخلص من ام اليوم اللي مش فايت ده .. كلمتي آسر ابنك !
ندي : ما ردش عليا
خالد : يعني وبعدين هيقاطعنا يعني ولا ايه !
ندي : الله اعلم بقي
نقوا هديه ومشيوا وندي راحت علي بيت امها تشوف هتجيب العينه ازاي لان ميس مش سايباها ابدا .. انتظرت فهد كتير اللي قاعد في شغله ….
ميس : عزمتي الدكتوره صاحبتك !
ندي : عزمتها
ميس: بعتيلها دعوه ولا روحتيلها بنفسك ؟
ندي : الاتنين بس نفسي اعرف ليه عايزه تعزميها مع انك ما تعرفيهاش
ميس ابتسمت : مش علشانها علشان جوزها مدير المخابرات .. هو في حد يتردد في معرفه حد بالمستوي ده !! عايزاكي تعرفيني عليها بشكل افضل
…………….
ادهم اتقابل مع مراته اللي ما شفهاش من امبارح لانها كانت نباطشيه
ليلي : حبيبي وحشتني
ادهم : انا ماشفتكيش من امبارح طيب ازاي !
ليلي : صح مديرك السابق كان عايزك في ايه !
ادهم افتكر : الا قوليلي صح ايه الاتفاق اللي بينك وبين فهد نصّار؟
ليلي : مين قالك ؟
ادهم : بجد انتي بتسأليني عرفت حاجه عنك ازاي !!
ليلي ابتسمت : لا بجد مين قالك ؟
ادهم : قوليلي الاول بس اتفاق ايه اللي بينكم
ليلي حكتله وفكرته بالموضوع كله
ادهم : طيب مش يمكن يكون هو نفسه اللي بيعمل فيها كده وضحك عليكي يا قطه !
ليلي كشرت : علي اساس انك شايفني عيله ومش بعرف الناس
ادهم ضمها : علي اساس قطتي الجميله طيوبه وبتثق في الكل بسهوله
ليلي سرحت : لا يا ادهم عارف فهد فكرني بمين !
ادهم : بمين يا قلبي ؟
ليلي : بيوسف ابننا
ادهم باستغراب : يوسف ؟؟ ليه ؟؟
ليلي : معرفش بس انا شوفته يوسف لما انت رجعت فاقد الذاكره فاكر كان عامل ازاي ! كان تايه .. مش فاهم .. مش عارف اذا كنت بتحبه ولا بتكرهه . مش عارف مين الكويس ومين الوحش !! مش عارف ولا فاهم بيتخبط وخلاص اهو فهد شاب وكبير بس نفس التوهه واللخبطه فيه ..
ادهم : هو فعلا يا ليلي تايه وباذن الله هنرسيه علي بر
ليلي : ازاي !
حكالها ادهم الحوار اللي دار
ادهم : اهو نفسي اتقابل معاهم كلهم الشله دي !!
ليلي ابتسمت : بس كده ( بعدت وجابت ظرف من شنطتها ) اتفضل
ادهم : ايه ده !
ليلي : دعوه لخطوبه فهد .. ندي عطتهالي النهارده .. تروح ؟؟
ادهم ابتسم : طبعا اروح .. اجهزي بس اوعي تقعي بحرف
ليلي : عيب يا حبيبي انا تلميذتك
ادهم : يؤبر قلبي ها الحلو ……
………….
فهد كان في مكتبه مش عايز يروح وبيفكر في جميله اللي مكلمهاش من اخر خناقه بينهم وحس انه مفتقد لجرعه خناقها ..
خرج من مكتبه كانت خارجه بسرعه من مكتبها وبتقفل الباب وراها واول ما اتعدلت شافته اتخضت وحطت ايدها علي قلبها
جميله : استغفر الله العظيم .. بعد اذنك
فهد فتح الطريق : هتيجي النهارده
جميله وقفت لحظه بجمود وبعدها بصتله ورسمت ابتسامه عريضه مصطنعه وهو عارف ده : طبعا امال انا بجري ليه !! مش علشان الحق اجهز نفسي لحفله فهد بيه وسالي هانم .. دول ثنائي محصلش .. اخيرا هيجتمعوا .. ( عملت صوت مقدم برامج ) واخيرا بعد طول انتظار لقاء السحاب سالي وفهد .. هيييييي
فهد : خلصتي تريقه !!
جميله بتريقه : تريقه !! عيب يا فهد بيه !! انا حته موظفه ازاي اتريق علي صاحب الشركه كلها ( مثلت بحزن ) احسن ممكن يرفدني وامشي في الشارع اشحت اهيء اهيء اهيء
فهد وصل لاخره وانفجر : جميله بطلي بقي هبلك ده .. كنتي عايزه مني اعمل ايه هاه !! اقف قصادهم !! مش انتي اللي قلتي بنفسك انه ساعات من الذكاء ان الواحد يوطي لحد ما الريح تعدي .. مش ده كان كلامك انتي ولا ايه !!
جميله بصتله وهي مش عارفه تفسر مشاعرها اللي اتلخبطت كلها من بس كلمه جميله اللي نطقها .. ولا كلامه نفسه معناه ايه !! معناه ايه يا فهد وضح اكتر!! اسأليه يا جميله وخليه يفسر اكتر اسأليه
فتحت بوقها تسأل بس هو اتكلم : بعدين انتي يفرق معاكي في ايه انا اتجوز مين ولا اخطب مين هاه !! مهتمه بايه وليه !!
فهد لنفسه جاوبيني بقي يا جميله !! عرفني اجابتك ايه وانا افرق معاكي بجد ولا مجرد عناد اجوف
جميله اتراجعت : ولا تفرق معايا بس مجرد انك اثبت نظريه
فهد بخيبه : نظريه ايه !
جميله : الطيبون للطيبات والخبيثون للخبيثات
فهد بصلها بصدمه وجعتها هيا اكتر منه هو : وانا من اي قسم فيهم .. بس اعتقد ان رأيك واضح .. علي العموم مش هأخرك اكتر من كده اتفضلي ..
جميله ندمت علي كل حرف نطقته وهو عطاها ظهره وراجع مكتبه وهيا عايزه تنطق اسمه وتوقفه وتقوله يستني ويفهمها بس عايزه تفهم ..
جميله :…..
بقلم / الشيماء محمد احمد
ت
رواية جميله الجزء الثاني للكاتبه شيمو
الحلقه الثالثة عشر
بدايه كده قبل الحلقه
اولا شكر لكل اللي قال ان (ولا يحق المكر السيء الا باهله) دي آية قرآنيه مش مثل
ثانيا :
قال الله تعالى : ( الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ أُولَئِكَ مُبَرَّأُونَ مِمَّا يَقُولُونَ لَهُمْ مَغْفِرَةٌ وَرِزْقٌ كَرِيمٌ ) النور/26 .
وقد اختلف المفسرون في معناها على أقوال متقاربة ، لا يناقض بعضها بعضا .
فمن معاني ” الخبيث ” و ” الطيب ” في الآية :
1. الخبث والطيب في الأقوال .
فيكون معنى الآية : الكلمات الخبيثات من القول للخبيثين من الرجال ، وكذا الخبيثون من الناس للخبيثات من القول ، وكذا الكلمات الطيبات من القول للطيبين من الناس ، والطيبون من الناس للطيبات من القول ..
” تفسير الطبري ” ( 19 / 144 ، 145 ) .
2. الخبيث والطيب من الأفعال :
ويكون معنى الآية : الأفعال الخبيثات للخبيثين من الرجال ، وكذا الخبيثون من الناس للخبيثات من الأفعال ، وكذا الأفعال الطيبات للطيبين من الناس ، والطيبون من الناس للطيبات من الأفعال .
وهو قول حبيب بن أبي ثابت ، وعطاء بن أبي رباح ، وقتادة ، وروي عن هؤلاء الأئمة أنهم أضافوا الأقوال إلى الأفعال في معنى الآية ؛ فجمعوا بين القولين السابقين .
قال شيخ الإسلام ابن تيمية – رحمه الله – :
قال جمهور السلف : الكلمات الخبيثة للخبيثين ، ومن كلام بعضهم : الأقوال والأفعال الخبيثة للخبيثين .
” مجموع الفتاوى ” ( 14 / 343 ) .
3. الخبث والطيب من الأشخاص في النكاح :
ويكون معنى الآية : الخبيثات من النساء للخبيثين من الرجال ، وكذا الخبيثون من الرجال للخبيثات من النساء ، والطيبات من النساء للطيبين من الرجال ، والطيبون من الرجال للطيبات من النساء .
والله ورسوله اعلم ….
نرجع بقي لحلقتنا
فهد بصلها وجعتها هيا اكتر منه هو : وانا من اي قسم فيهم .. بس اعتقد ان رأيك واضح .. علي العموم مش هأخرك اكتر من كده اتفضلي ..
جميله ندمت علي كل حرف نطقته وهو عطاها ظهره وراجع مكتبه وهيا عايزه تنطق اسمه وتوقفه وتقوله يستني ويفهمها .. هيا بس عايزه تفهم .. حاولت تنادي اسمه بس صوتها ما اسعفهاش ودخل وقفل بابه وراه وهيا مشيت لبيتها …
عمتها دخلت عندها : ما لبستيش ؟؟
جميله : هلبس اهو
عمتها : جميل قوي فستانك ده هتبقي قمر
جميله : وهيفيد بإيه اني اكون قمر او لأ !
عمتها قعدت جنبها : حبتيه امتي ؟؟
جميله بصتلها كتير وفتحت عنيها وكأنها استوعبت حاجه كانت مش فهماها ابدا … بقي هو ده اللي هيا حساه !! بقي معقوله تكون بتحبه !! هو ده سبب الوجع اللي مالي قلبها !! الحب !! من امتي هيا بتحب !! طيب امتي حبته !! طيب ليه حبته اصلا دي مش بتبطل خناق معاه ابدا!! الحب مكنش في حسابتها ابدا !! وتحب مين ! فهد !! ابن ميس !!
عمتها بصتلها : حبتيه !!
جميله عيطت : طيب ليه وامتي !! طيب اشمعني هوه !! فهد اخر واحد في الكون ده كله ممكن افكر فيه !
عمتها : وهو الحب بيستأذن او بيختار !! وليد كان اخر شخص في الكون كله ممكن افكر احبه ! واعتقد ان انا كمان كنت اخر حد ممكن هو يحبه بس حبينا بعض !! الحب ما بيتقالوش امتي وليه وازاي !
جميله وكأنها استوعبت نقطه تانيه مهمه : عمتو !! فهد خطوبته النهارده ! وعلي سالي ! ملقاش بنات في الكون كله غير سالي !
عمتها : سالي ولا غيرها مش هتفرق !!
جميله بعند : لا لو واحده غيرها كان ممكن اديله عذر الغبي ده
عمتها ابتسمت : يعني لو كانت امل كنتي هتتقبليها !!
جميله سكتت شويه : امل طيوبه حرام
عمتها : قلتلك مش هتفرق المهم هتروحي ولا لأ
جميله : لا هروح طبعا واول واحده ههنيه ..
وكمان امل معرفش هتروح ولا لأ بس لو راحت هتحتاجني معاها
عمتها : يدوب تجهزي علشان اخوكي جهز
جميله لبست وعمتها ساعدتها واترددت كتير بس حسمت ترددها وقعدت قدام مرايتها وحطت لمسات بسيطه من المكياج لكن خلتها ملكه جمال .. كحل في عنيها مع ايلينر مع مسكره عطت عنيها شكل مختلف تماما .. خدودها بقت بلون الورد وشفايفها لونهم هادي وجميل .. المكياج البسيط اعطاها جمال علي جمالها ..
عمتها دخلت : اخوكي بيستعجلك … ماشاء الله تبارك الله .. انتي ناويه علي ايه يا جميله !
جميله بتحدي : علي كل خير يا عمتو .. حفله وحطيت ميكب خفيف ! انا مزوداه قوي ولا ايه ؟
عمتها فهماها : لا يا حبيبتي مش مزوداه بس ما تتهوريش
جميله خرجت واول ما ابوها شافها: ايه المكياج ده كله ! انتي هتخرجي كده ؟
جميله : بابا انا مش حاطه غير كحل وروج خفيف جدا
عماد : انتي مش شايفه شكلك !
عمتها : مالها بس يا عماد ؟
عماد : شكلها … شكلها … معرفش بس مش عاجبني
عمتها حطت ايدها علي كتفه : بنتك كبرت ورايحه حفله وفي مكان راقي يعني مش هيكون شكلها غريب ولا اوفر اهدي
عماد : جمالها هيطغي علي كل بنات الحفله
عمتها : دي مشكلتهم مش مشكلتنا
وليد دخل من باب الشقه : ساعه ملطوع تحت انجزي
عماد : وليد اختك شكلها عادي!!
وليد : اه عادي يا بابا .. بعدين جميله من غير حاجه خالص حلوه يا بابا فطبيعي لو اهتمت شويه بنفسها هتكون دي النتيجه .. عرفت بقي انا كنت طول النهار اتخانق ليه مع الشباب في الحته والمدرسه .. يالا يا بنتي
اخد اخته وراحوا للحفله وجميله متحفزه لفهد وسالي ،..
……………
ميس كل شويه تتصل بفهد وموبيله مقفول وهتتجنن ..
ميس : رايحه فين يا ندي !!
ندي : كنت هطلع اطمن حاجته جاهزه ولا لأ ؟
ميس : كل حاجته جاهزه انا مش عارفه هو اتأخر ليه !! اطلعي يا ندي استقبلي الناس مكاني وخليني انا وراه لحد ما يرد ..
خلصت كلمتها فهد دخل عليهم
ميس : كل ده تأخير يا فهد .. يعني اعمل فيك ايه بس ؟
فهد بص لساعته : ما اتأخرتش .. المفروض الحفله تبدأ ٨ ولسه فاضل عشر دقايق
ميس : يا برودك يا فهد .. اطلع وريني هتعمل ايه في العشر دقايق دول ..
فهد طلع مخنوق ومش قابل حد نهائي .. اخد شاور سريع وبص لنفسه في المرايه وكسل يحلق دقنه الطويله .. رمي من ايده المكنه وطلع يلبس بدلته …. بيلبس ومتخيل جميله وشكلها وضحكتها وغضبها ونظرتها الناريه اللي بيعشقها … عايز يفتكر شكل سالي اللي هيلبسها دبله بعد شويه بس مش قادر يفتكر اي ملامح لها ..
ميس دخلت عنده : انت محلقتش دقنك ليه !
فهد بلا اهتمام : ماليش مزاج
ميس : نعم !! النهارده خطوبتك !!
فهد : ايه علاقه خطوبتي بدقني !!
ميس : انت عايز تجنني يا فهد !! احلق دقنك
فهد : ميس !! ريحي دماغك مش هحلقها ..
ميس : طيب يالا اعمل ايه بس فيك .. ولسه لما سالي تشوفك كده !
فهد : والله مش هيعجبها شكلي كده يبقي بلاها من اولها
ميس : بطل بس استفزاز ويالا
فهد نزل معاها وطلعوا الجنينه اللي مليانه ناس كتير
فهد لميس : بعدين احنا واقفين كده ليه !
ميس : علاء جاي بعربيته دلوقتي ومعاه سالي والمفروض انت تستقبلهم وتاخد سالي وتروحوا تقعدوا هناك ..
فهد : انتي عملتي كل ده امتي !!
ميس : مش وقته .. افتح الباب لعروستك
فهد استغرب كلمه عروسته دي .. عروسته ..
الصحافه بتصور وناس كتير بتصور ولازم يمثل دوره كويس .. ابتسم وفتح الباب ومد ايده لسالي اللي نزلت واتعلقت في دراعه وباسته في خده وهو من باب الذوق باسها في خدها ومن بعيد جميله مع اخوها بتراقبه في صمت …
اخدها وراح قعد في مكانهم والكل بيهني ويسلم ويبارك ..
امل وآسر دخلوا وامل بتدور بعنيها عن جميله اللي لمحتها وطلعت من مكانها علشان امل تشوفها وهنا فهد شافها .. حس ان انفاسه اتخطفت .. فستانها طويل وجميل بلونه الهادي .. البوليرو اللي لبساه .. كل حاجه فيها جميله .. بس عايز يشوف عنيها .. لازم يشوف عنيها ..
اتفاجيء بآسر قدامه بيسلم عليه فوقف يسلم عليه وهو مش مركز وسلم علي امل اللي سلمت عليهم وبتبعد
جميله : امل تعالي
امل ابتسمت اول ما شافتها ولسه هتروح ناحيتها سالي مسكتها من دراعها
سالي : هتقفي جنبها !! علشان تكوني هوا صح !! يعني واحده أجمل منك مليون مره توقفي معاها ليه !!
امل بصت للارض ومش عارفه تعمل ايه !!
وجميله لاحظت ده وعرفت انها سممتها بكلمتين فقربت منها ومسكت ايدها
جميله : تعالي يا امل هعرفك علي شخصيه ظريفه
فهد مركز معاها وشايف جمالها بس برضه عايز نظرتها .. عايز عنيها تتقابل مع عنيه
سالي : ايه يا جميله ! مش هتباركيلنا ولا …. ولا ايه !
جميله بتريقه : ايه ده انا مباركتش .. عيب عليا .. مبروك سالي هانم عقبال الفرح مبروك فهد بيه
( بصت لفهد واخيرا جت اللحظه اللي هو منتظرها واتقابلت عنيهم وللاسف فهد تاه في عنيها وحس ان الاكسجين هرب من الجنينه كلها واتمني لو يمسك ايدها ويقعدها هيا جنبه وفجأه استوعب هو بيفكر في ايه واستوعب ان ايدها ممدوه فبسرعه مد ايده وضغط علي ايدها بعنف وغيظ لدرجه انها بصتله تاني وسالي لاحظت ضغطه ايده علي ايدها ولاحظت غضبه ومفهمتوش )
جميله حاولت تسحب ايدها بس فهد ماسكها
جميله : فهد بيه ! ايدي
فهد هنا ساب ايدها بسرعه : سوري سرحت للحظه .. الله يبارك فيكي
جت تمشي بس سالي وقفتها تاني : مش هتصورينا يا جميله !! كل الموظفين في الشركه طلبوا يصورونا ولا انتي في حاجه مضياقاكي !! حساكي متضايقه .. ما تقلقيش علي نفسك هتتخطبي في يوم من الايام
جميله ابتسمت : انا لو عايزه اتخطب يا سالي هانم مش هحتاج اكتر من نظره وهلاقيهم مرصوصين علي بابي .. بس ورايا حاجات اهم وبعدين يوم ما هتخطب هتخطب لواحد بحبه مش مجرد اتفاق بيزنس ( سالي اتنرفزت وكانت هترد بس جميله كملت ) اه هاخد صوره للذكري ممكن تبتسموا حتي من باب التمثيل !!
مسكت موبيلها وصورتهم : هو انا ابقي طماعه لو قلتلكم تقربوا من بعض شويه !
فهد كان علي اخره منها اما سالي اللي كانت بتحاول تنزفزها الا ان جميله خرجتها تماما عن شعورها بس لازم تغيظها
سالي : ومالو
سالي مسكت دراع فهد وايدها التانيه حطتها علي رقبته وشدته عليها وكأنها هتبوسه في شفايفه بس فهد دور وشه بعيد وباسته في خده وجميله لاحظت حركته دي …
جميله ابتسمت : كيوت قوي .. هطبعهم وهبعتهم هديه ليكم انتو الاتنين .. مبروك مره تانيه …
راحت لامل وآسر وسلمت عليهم ووقفت معاهم وشاورت لوليد اللي قرب وسلم
وليد : امل ازاي حضرتك
امل : اهلا دكتور
وليد : لا مفيش دكتور بقي .. وليد وبس
جميله : باشمهندس اسر ده وليد اخويا دكتور علاج طبيعي
آسر : اهلا وسهلا بحضرتك يا
وليد : وليد وبس يا باشمهندس
آسر : يبقي آسر وبس وانتي كمان يا جميله آسر كفايه ..
وقفوا الاربعه مع بعض وفهد اتمني يروح يقف وسطهم ويضحك ويهزر ببساطه زيهم
اما سالي اللي واصله معاها للاخر
سالي : ما تخليك معايا هنا شويه
فهد ببرود : امال انا فين !!
سالي : معرفش سيادتك .. محلقتش دقنك ليه ضايقتني لما بوستك
فهد : محدش قالك تبوسيني .. وبعدين دي مجرد خطوبه يا سالي فيا ريت كفايه حركاتك دي
سالي : حبي ليك وقربي منك حركات ؟؟
فهد بصلها : حب ؟ حب ايه اللي بتتكلمي عنه يا سالي ! الحب ده تخرجيه بره المعادله خالص .. وبعدين لحد اول امبارح كنا مجرد اولاد عم فجأه بقي حب !! ارجوكي
سالي جت تتكلم بس ناس جت تسلم عليهم
…………….
ادهم بينادي : لولييييتتتتتااااااااا
ليلي نازله : وبعدين معاك
ادهم رفع دماغه : يعني سا
مكملش الكلمه لانه اتفاجيء انه قدام ملكه جمال الكون ده كله .. نزلت بابتسامه هو بيعشقها و وراها عيالها الاتنين اللي مبتسمين علي منظر ابوهم
آسيا : شايف بابي بيبصلها ازاي
يوسف : بابا اقفل بوقك يا بابا شكلك وحش
ادهم : وانت مالك يا رخم وبعدين انتو نازلين وراها ليه يعني ازاي انا اعبرلها وانتو لازقين كده .. وشكم للحيط
آسيا : بابي
ادهم : للحيط
الاتنين دورا وشهم وهو مد ايده لايد ملكته اللي نزلت ووقفت قصاده
ادهم : حبيبه عمري كله
ليلي ضحكت : بجد عجبتك !!
ادهم : نعم ؟ عجبتيني ( بص ليوسف ) للحيط !!
ليلي ضحكت وادهم : العيال دي رخمه .. ما تيجي نمشي من هنا .. هنتكلم في العربيه بعيد عن العيون المتطفله دي
آسيا : علي فكره احنا عيالكم مش عيون متطفله
ادهم : اخرسي
مسك مراته في ايده واخدها للعربيه فتحلها الباب : ست الحسن والجمال
ليلي : شكرا قلبي
قعد جنبها واتحرك بعربيته وخرج من فيلته ومشي شويه ووقف وقفل عربيته وبصلها
ليلي : وقفت ليه !
ادهم اخد نفس طويل : علشان دي
وقبل ما تنطق كان قاطعها بشفايفه وبعد عنها بعد فتره طويله
ليلي بنفس متقطع : ادهم هتبهدل الميكب بتاعي
ادهم : ايه رأيك نطلع انا وانتي علي اي فندق نقضي ليلتنا ونسهر سهره محصلتش ؟
ليلي ابتسمت : معنديش مانع بس انت كنت عايز تروح الخطوبه دي
ادهم باسف : انا فعلا محتاج اروحها
ليلي : طيب نروحها وبعد ما نخلص نطلع علي الفندق ايه رايك !
ادهم ابتسم : فكره جهنميه .. خليكي فاكراها
ليلي : غنيلي
ادهم بصلها باستغراب : نعم ! ايه يا حبيبتي مالك !
ليلي : غنيلي
ادهم ابتسم وسكت ودور عربيته ومشي وشويه وغنالها :: شو حلو حبيبي شو حلو ها القمر شوفوا ما اجملو
بس انا علي بالي ادللو وحياتي ما حدا بقا يزعلو
واسمحوا اذا بتسمحوا واستحوا ما بقى بتجرحو
لو زعل انا بصالحه حبيبي بالقلب صاير مطرحو
ما إلي غيره انا إلي،، ما إله غيري انا إله
بقبله بلا محل اله بصراحة بعشقه ما بقى تسألوه
واسمعوا اذا بتسمعوا حبيبي راسه بيوجعه
واسكتوا بلا كتر حكي ما بقى تطرحوا ما بقى تجمعوا
وصلوا الفيلا ودخلوا ايديهم في ايدين بعض وليلي بتدور بعنيها علي ندي صاحبتها لحد ما لمحتها وشاورتلها
ميس : ندي في حد بيشاور .. مش دي الدكتوره ! مين الجامد اللي معاها ده ؟
ندي : ده جوزها هروح استقبلها ( قبل ما تمشي )
ميس : خديني معاكي استقبلهم
ندي سلمت وعرفتهم علي بعض
ميس مدت ايدها لادهم ورفعتها بحيث يبوس ايدها زي ما هيا متعوده بس ادهم مسك ايدها ونزلها وابتسم : سوري ميس هانم
ميس : لا عادي .. اهلا بحضرتك اتفضل
ادهم : متشكر ( بص لمراته ) لوليتا يالا
دخلوا مع بعض
ميس : تعالوا سلموا علي العرسان
اخدتهم والعرسان وقفوا باشاره من ميس من بعيد
ميس : فهد ابني وسالي .. اللواء ادهم مدير المخابرات ومراته دكتوره ليلي اعتقد انتو عارفينها
سلموا وفهد بص ل ليلي كتير وكأنه بيأكد عليها اتفاقه لاحسن تقول حاجه قدام ميس وليلي بصتله تتطمنه
بعدوا وقعدوا لوحدهم
ادهم : ما بحبش كده انا
ليلي : ما تحبش ايه ؟
ادهم : كل الابتسامات دي يا ليلي مصطنعه مفيش حد هنا بيبتسم من قلبه
ليلي بتريقه: وانت بقي عرفت اللي جواهم صح !!
ادهم : حبي انا .. ابتسميلي كده
ليلي: نعم
ادهم : ابتسميلي بالحب اللي جواكي .. ايه طلب غريب ابتسمي يا لوليتي .، يا بت اضحكي
ليلي ابتسمت وضحكت من اسلوبه: مجنون انت
وادهم بسرعه صورها : دلوقتي بقي شيلي الابتسامه دي
ليلي برضه مبتسمه فادهم علشان يشيل الابتسامه : شايفه ميس زي القمر
ليلي بصتلها وكشرت وادهم : تمام شلنا الابتسامه .. ابتسمي ابتسامه مصطنعه
ليلي بغيظ ابتسمت
ادهم : لا اعملي نفسك بتبتسمي بجد
ليلي ابتسمت وهو صورها وبعدها وراها الموبيل
ادهم : شوفي الفرق بين الصورتين
ليلي : مفيش
ادهم : لا ازاي … بصي هنا يا قلبي ابتسامتك من قلبك .. عنيكي تضيق شويه وبيكون في خطوط حواليها وبتبتسم معاكي
لكن هنا في المصطنعه بصي لعنيكي هتلاقيها طبيعيه جدا مفيهاش اي شيء مفيش ضيق مفيش خطوط وده بيوضح الفرق وعلي فكره ميس مش حلوه ولا اي نيله …
ليلي رجعت لابتسامتها
ادهم : حفله بيزنسيه بحته . خاليه من اي فرح او بهجه
ليلي باستغراب : دي خطوبه لازم يكون في بهجه وحب
ادهم : فين يا ليلي الحب .. بصي كده لفهد مش طايق سالي وبصيلها هيا هتلاقيها مهتمه بفستانها وصورها مع الصحافه … بس فهد عنيه مركزه مع مين ؟اه حب مجهول .. مين البنت دي اللي بتبصله بنظرات ناريه كفيله انها تحرقه من بعد .. جت بكل اسلحه انوثتها علشان تظهر لفهد الغبي هو خسر ايه !!
ليلي مستمتعه بتحليله : اممممم جميل قوي .. دي علي فكره جميله شغاله عنده في الشركه او تحت ايدين مامته ميس
ادهم : اممم علشان كده هو ما ينفعش يتكلم ولا يقدر حتي يعترف لنفسه بمشاعره بس غريبه اسمها جميله
ليلي : اقولك الاغرب بقي
ادهم : قولي قمرايتي
ليلي : اخوها اسمه وليد
ادهم بصلها وكشر
ليلي : تاخد التقيله بقي
ادهم : طبعا قولي
ليلي : الاتنين شغالين هنا .. جميله في الشركه و وليد في البيت دكتور للجده
ادهم ابتسم : اقطع دراعي ان مكانوا الاتنين ليهم علاقه بالعيله دي وداخلين بغرض
ليلي : ايه هو بقي !
ادهم : بكره اجيب قرارهم ..
ليلي : طيب كمل لعبه التحليل
ادهم ضحك : عايزه تحللي مين شاوري وانا اقولك
ليلي بصت حواليها : اه دول .. اعتقد دول اولاد عم فهد وسالي
ادهم بصلهم : من مسكه كاس الولد ونظراته لسالي اعتقد انه بيحبها اما البنت فدي خجوله مهزوزه بس بتسرق نظرات بدموع لفهد .. كده الدنيا اتلخبطت .. الاربعه محدش فيهم مبسوط .. طيب ليه الجوازه دي اصلا .. كلهم عيله والغنا واحد ومش هتفرق مين يتجوز مين !! فليه اللخبطه دي ؟
ليلي : انا عارفه .. المهم انا هروح اشوف نبيله فين وانت اياك اجي الاقي حد بيعاكسك
ادهم ضحك : روحي قمرايتي انا ورايا حاجه مهمه اعملها
ادهم مراقب الكل ولاحظ ان ميس مركزه معاه قوي .. ونظراتها له كلها اعجاب بس تجاهلها
فهد قام ووقف مع اسر وامل او ممكن يكون قاصد يقرب من جميله ..
ادهم قرب منهم عمل نفسه هياخد كاس عصير من البار اللي واقفين جنبه
اخده وهو بيلف اتخبط في فهد اللي اتزق علي البار وتأوه ومسك ايده اللي حاجه شكتها
ادهم بسرعه بص حواليه وشد
منديل عطاه لفهد لانه نقطه دم طلعت مكان ما اتشك
ادهم : سوري اتفضل
فهد استغرب اخد المنديل مسح ايده وادهم اخده منه وفهد سالي شدته اما ادهم فابتسم وشد دبوس من البار ولمح ساعتها ندي مركزه قوي معاه وشافته بيسحب الدبوس وبيحط المنديل في جيبه وكل ده في تقريبا لحظتين
الموقف كله مكملش ال٣٠ ثانيه بس هيا شافته كله .. ادهم بتسملها وغمزلها ومشي في طريقه وعدي من جنبها وقف لحظه : استمتعي بالحفله وما تشغليش نفسك بال DNA خلاص كده
ندي بصتله بس ادهم ابتسم : اكشفينا بقي (ومره واحده علي صوته ).. ليلي فين شوفتيها !
ندي بصت حواليها : هناك اهي
ادهم : شكرا لحضرتك
ادهم وصل ل ليلي ويدوب وقف معاها اتفاجؤا بميس بتناديه فبصلها
ميس : ينفع اعرفك علي كام حد هنا !!
ادهم ابتسم : ومالو اتفضلي
ميس اخدته وليلي في ايده طبعا لباقي العيله اللي رحبوا بيه جامد وعرفوه بنفسهم .. محي وعلاء وخالد
علاء سلم عليه وبص لليلي : حضرتك اكيد مش من مصر !
ليلي باستغراب : لا من مصر ليه !!
علاء : انا قلت ممكن من تركيا او ليكي عرق تركي .. يعني الاتراك حلوين بطبيعتهم
ادهم يدوب هيرد بس ميس تدخلت بسرعه : مرات حضرتك زي القمر ماشاء الله عليها جمالها غير طبيعي
ليلي ابتسمتلها وادهم رد باقتصاب : متشكر لحضرتك
محي غير الموضوع : وجودك في الحفله شرفنا جدا يا باشا ولا ايه يا فهد !
كلهم بصوا لفهد اللي انضم لهم : اكيد طبعا
ادهم : الشرف من نصيبي ، بعدين اسم نصّار له وزنه برضه ولا ايه !
محي : فضل من عند ربنا ( بص لفهد ) ايوه الاسم ده اتحط في الارض مره بس الحمد لله قدرنا ننظفه من تاني
فهد اتضايق اما ادهم : اه سمعت عن اللي حصل ( بص لفهد ) اتقابلت مره مع والدك وكان انسان محترم جدا بس للاسف الفتره اللي حصل فيها اللي حصل انا كنت …. يعني كنت تقريبا مش انا
ليلي : كنت فاقد الذاكره ساعتها صح؟
ادهم : فعلا للاسف لو كنت في وعي كنت هتصرف واعرف اصل الموضوع ايه ؟
قرب من فهد وحط ايده علي كتفه
ادهم : فهد لو تحب اتدخل واعرف ايه اللي حصل لوالدك بالظبط وننظف اسمه انا معنديش اي مانع ابدا !!
الكل هنا اتوتر وبصوا لفهد اللي حس بنظراتهم ورعبهم
فهد : اللي حصل كان من اكتر من عشرين سنه .. مالوش لازمه الموضوع اتنسي ووالدي ومات والحياه استمرت وبعدين لنفترض ان والدي كان كده فعلا !! هستفاد ايه ! علي الاقل كده مطمن نفسي انه ممكن مش كده لكن لو حضرتك اثبت ده فأكيد ده مش هيفيدني
محي : فعلا عندك حق يا فهد .. الموضوع اتنسي بس ممكن يكون في غلط وحد استغل والدك .. احنا ممكن نبرأ فعلا اسمه !!
علاء بص لابوه باستغراب اما خالد فهمه وكمل
خالد : طول عمر وليد جد ومحترم .. انا كنت بعزه جدا .. واللي مصبرني اني معايا حته منه .. مراتي ندي اخته .. الله يرحمه
ميس سكتت لانها مرضيتش تشكر فيه علشان فهد ما يفهمش انهم بيمثلوا كلهم ….
ادهم : فعلا الله يرحمه .. ( بص لمراته ) تشربي حاجه !
ليلي : يا ريت
ادهم بصلهم : بعد اذنكم
محي : اتفضل والحفله حفلتك طبعا
ادهم : متشكر جدا ..
اخدها وبعد بيها وقعدوا علي البار
ليلي : انطباعك ايه عنهم !!
ادهم : مهماش طبيعين .. شوفتي اتوتري ازاي اول ما قلت افهم وليد ايه اللي جراله !
ليلي : لا يا ادهم كانوا عادي وبعدين محي قال فعلا يا ريت والكلام اللي قاله ده
ادهم ابتسم : حبيبه قلبي ده بس علشان يغطوا علي توترهم .. بعدين ده قلبهم كان هيقف من الخوف والتوتر .. طيب بلاش انتي دكتوره ملاحظتيش الوريد اللي في رقبتهم كان بينبض بعنف ازاي وده معناه خوف
ليلي بصتله : وريد في رقبتهم ! انت بتهزج يا ادهم انا هقف مع ناس الاحظ نبضات قلبهم !
ادهم ضحك : مش لازم تكوني لماحه وتفهمي اللي قدامك بيفكر في ايه وازاي !
ليلي : اممممم بس محي ده شكله طيوب
ادهم : محي ده رئيس العصابه دي كلها
ليلي : انت سميتهم عصابه !! طيب وخالد ؟
ادهم : خالد ده لاول وهله تحسيه طيب ومحترم بس اعتقد انه من النوعيه اللي بتضرب من تحت لتحت
ليلي : وعلاء !! كيوت هو
ادهم مسكها من دراعها : ماله يا حيلتها !! كيوت علشان قالك انتي حلوه بقي كيوت
ليلي باسته في خده : لا طبعا بس بحب اغيظ ك واشوف حمشنه الراجل المصري
ادهم رفع حاجب : تحبي اقوم اعملهولك سلطه
ليلي : لا هنبوظ الحفله للواد التايه ده
ادهم : فهد !!! عينه ما نزلتش من علي جميله دي خالص .. اتمني يلحق نفسه قبل فوات الاوان ..
ليلي شافت نبيله مع ندي وشاورولها وليلي راحتلهم اما ادهم راح وقف جنب اسر علي البار وبصله : بتشرب كده ليه ! وواقف لوحدك المفروض تكون جنب ابن عمك
آسر : افندم
ادهم بصله : العمر اجمل واصغر من انك تضيعه في الاسف علي شيء ( بص لسالي ) ما يستاهلش ومش شا يفك اصلا
آسر : وانت تعرف ايه انت ؟
ادهم : تقدر تقول اني كنت استاذ في تضيع العمر .. شوف .. لما تحب بجد هتندم علي كل لحظه ضاعت
آسر بص لسا لي : ما انا حبيت بجد
ادهم : لا طبعا .. الحب اللي من طرف واحد ما لوش علاقه بالحب .. الحب اللي بجد ده علاقه بين اتنين بيتبادلوا الحب ده لما تقابله وتعيشه هتعرف بنفسك الفرق وبعدين ده حب طفوله علي ما اعتقد ما تقلقش هياخد فترته ويروح المهم ( اخد نفس طويل ) افتح قلبك للحياه ..
سابه ومشي وقابل علاء اللي كان رايح للبار فمسكه من دراعه بعنف لدرجه ان علاء كان عايز يصرخ وهمس
ادهم : قسما بالله لولا اننا في حفله خطوبه ومش عايز اطربقها علي اللي فيها لكنت عرفتك ازاي تبص لمراتي ووتغزل فيها قدامي لو لمحتك بتبص بس ناحيتها هحطلك عنيك في طبق واكلهملك .. فاهم !
سابه وراح للدي جي واتكلم معاهم ..
شد الميك : مساء الخير .. عارف اني ماليش علاقه باهل العروسين بس اسمحولي اتدخل
مبروك لاجمل اتنين في الدنيا .. اسمحولي اخطف منكم الاجواء شويه واستغل حفلتكم في اني اهدي لوليته عمري واهديكم انتو كمان الاغنيه دي .. فهد باشا اتمني انه يجيلك يوم تهديها للي يستاهلها في حياتك
لوليتا ( بصتله والكل بصلها ) تسمحيلي بالرقصه دي علي الاغنيه دي
ليلي ضحكت وادهم مسك ايدها وبدئت الاغنيه …
الاغنيه كانت رائعه وكلماتها اروع هزت كيان كل اللي سمعها …( اللينك اهو اتمني تسمعوها )
خلصت الرقصه وسابت الكل في حاله صمت
كل واحد باصص للي بيحبه .. وفهد اتفاجيء بنظرات جميله ومعرفش يفسرهم بس لمح دموع عايزه تنزل وهيا بتحاول تداريهم ..
ادهم اخد ليلته ومشيوا من الحفله يقضوا ليلتهم زي ما اتفقوا …….
جميله راحت لوليد اللي واقف مع امل وبيضحكوا مع بعض
جميله : وليد معلش ينفع نروح بقي
وليد : لسه بدري يا جميله
جميله : بس عندي صداع وعايزه امشي
امل بزعل : هتمشوا وتسيبوني ؟
ميس من وراهم : جميله عايزاكي لحظه
اخدتها ومشيت وفهد مراقبهم وطلعوا فوق
ميس دخلت اوضتها كانت سالي جوه
جميله مش فاهمه مالهم الاتنين
ميس : انا قولت لسالي قد ايه انتي شاطره جدا في رسم العين وسالي مكياجها محتاج تظبيط ويتعمله ريفرش ممكن تساعدينا !!
جميله كانت عايزه تعيط ودماغها هتنفجر من الصداع وكانت وصلت لقمه احتمالها وعارفه ان الاتنين بيلعبوا بأعصابها بس هيا بشر
سالي : هتساعديني يا جميله .. بليييز فهد لازم يشوفني جميله طول الوقت ..
جميله ابتسمت : ومالو .. تحت امرك
قربت ومسكت الايلينر وبدئت تحط لسالي وتحاول تظبطه كويس ومره واحده بصتلها وراحت بالفرشه ملخبطه وشها كلها ومسكتها من شعرها
جميله : انتي متخيله ان انا هرسملك عنيكي يا زباله انتي .. هو انتو فاكريني شغاله تحت امركم ولا خدامه هنا .. فوقوا انا مهندسه قد الدنيا .. بعد اذنكم
بقلم / الشيماء محمد احمد
رواية جميله الجزء الثاني للكاتبه شيمو
الحلقه الرابعه عشر
قربت ومسكت الايلينر وبدئت تحط لسالي وتحاول تظبطه كويس ومره واحده بصتلها وراحت بالفرشه ملخبطه وشها كلها ومسكتها من شعرها
جميله : انتي متخيله ان انا هرسملك عنيكي يا زباله انتي .. هو انتو فاكريني شغاله تحت امركم ولا خدامه هنا .. فوقوا انا مهندسه آد الدنيا ..
ميس بتتكلم : ايه رأيك يا جميله .. جميله ( علت صوتها ) جميييييله
فاقت جميله من افكارها وبصت لميس : نعم
ميس : بقولك ظبطي ده علشان حاسه ان العين دي ارفع شويه !!
جميله : لحظه .. اهو .. تمام !
سالي بصت للمرايه : جميل جدا .. تسلم ايدك
ميس : خلاص روحي انتي جميله
جميله ابتسمت ونزلت بسرعه وطلعت الجنينه بس بدال ما تروح ناحيه الحفله جريت بعيد خالص .. بعيد وسط الظلمه .. فضلت تجري كتير لحد ما حست انها بعدت وبعدها وقفت جنب شجره وعيطت .. ومن صوت عياطها محستش باللي متابعها وماشي وراها لحد ما اتفاجئت اول ما اتكلم
فهد : بتعيطي كده ليه !!
جميله اتفاجئت بيه اولا وبعدها مسحت دموعها ومعرفتش تقول ايه …
فهد : سألتك سؤال
جميله زعقت :واحنا هنا مش في الشركه ولا انت هنا مديري
فهد وقف قصادها تماما وايديه في جيوبه
فهد : مين ضايقك !
جميله : محدش ضايقني .. عندي صداع مش اكتر .. ايه عمرك ما تعبت للدرجه دي ولا نسيت لما اتخبطت في دماغك كان شكلك ازاي !
فهد : يعني ده مجرد صداع !
جميله : ايوه ما تشغلش نفسك ارجع لعروستك ..
فهد : عروستي !! غريبه قوي الكلمه دي !!
جميله : غريبه ليه مش هيا النهارده عروستك
فهد ماردش عليها وسكت وبص للقمر
جميله بصت للقمر الكامل فوقهم واخدت نفس طويل وغمضت عنيها وبعد ما فتحتهم لقت فهد باصصلها قوي ومركز معاها بس تجاهلته
فهد : بتقولي ايه للقمر ؟ ولا هو بيقولك ايه !
جميله : دي حاجه خاصه بيني وبينه ما تدخلش انت فيها
فهد : ايه رأيك في الاغنيه اللي شغلها الدي جي ؟؟
جميله : اغنيه الراجل اللي هداها للدكتوره مراته !!
فهد : ايوه هيا
جميله ابتسمت : يا بختها بحب جوزها ليها ! كل البنات هنا بيحسدوها علي حبها ..
فهد : ما يمكن بيمثل ؟
جميله بهجوم : انت شفت او حسيت ان ده تمثيل ولا علشان انت ما بتحسش اصلا فاكر الناس كلها زيك !
فهد : طيب ليه الغلط ده بقي !
جميله : لمجرد ان انت انسان مستفز
فهد مسكها من ايدها جامد من عند معصمها وشدها عليه قوي وهيا بتحاول تشد ايدها بس هو صخر قدامها
جميله : وبعدين سيب ايدي
فهد : وبعدين معاكي انتي ؟ هاه ! شويه تقولي خبيثون وشويه مستفز وشويه ما بتحسش واخرتها ايه معاكي ! كل ده ليه؟
جميله بصدق : هو انت بتحس يا فهد
فهد الطريقه اللي نطقت بيها اسمه كان نفسه يصرخ ويقولها انه مش بس بيحس ده بيتوجع يمكن زيها واكتر كمان .. بس مره واحده ساب ايدها : لا ما بحسش .. اخوكي كان بيدور عليكي روحيله
عطاها ظهره ووقف وهي فضلت شويه باصه لظهره …..
قربت وحطت ايدها علي كتفه ونطقت : فهد
بصلها كتير وهيا بصاله ومره واحده حط ايديه في وسطها وشدها ليه وباسها .. مره بعد مره بعد مره مش قادر يقف او يبعد عنها .. وفجأه فاقت من تخيلاتها
فهد : انتي لسه واقفه ليه ما تمشي ؟
فاقت جميله من احلام يقظتها وبصت لفهد اللي بعيد عنها وايديه في جيوبه زي ما هو واستغربت تفكيرها … مالها النهارده شويه تتخيل نفسها بتبهدل سالي وشويه تتخيل نفسها مع فهد … لا لازم ترجع لطبيعتها وقوتها هيا ما اتعودتش علي الضعف ده .. مش هتكون زي عمتها ضعيفه في وسط شويه ذئاب ما بترحمش ..
فهد فرقع بصوابعه قدام وشها : هاي انتي ؟ فوقي وصلتي لفين !
جميله بصتله : سوري سرحت ( بتقلده )
سابته ومشيت وهو فضل كتير واقف مكانه ولما رجع الحفله كانت مشيت هيا واخوها حتي اسر وامل اختفوا برضه
سالي راحت ناحيته : كنت فين !! الناس بتسأل عليك !
فهد : عادي يعني .. بقولك ايه ميس فين !
ميس واقفه بعيد عنهم وهو شاورلها
ميس راحت : في ايه مالك !
فهد : بقولك ايه فوضيلي بقي الليله دي كفايه كده انا تعبان وعايز انام
سالي : نعم ! نفض الليله ؟ انت بتهرج صح !
فهد : انتي شيفاني بهرج !
ميس : يعني يا فهد نقول للناس روحوا كل واحد علي بيته ؟
فهد : معرفش المهم اني عايز انام وتعبان ! اتصرفي
ميس : اتصرف اعمل ايه يعني !
فهد : طيب خلاص انا همشي وانتي قولي اي حاجه !! اتفقنا
سالي : اقف هنا اياك تمشي
فهد وقف : نعم !! اوعي تنسي نفسك يا سالي انا مش موظف عندك هتأمريه وهينفذ ومفيش حاجه اتغيرت بالخطوبه دي لا تفتكري ان دي هتديكي حق عليا ولا حاجه
ميس : فهد مش وقته انتو هتتخانقوا ولا ايه !
فهد : انا سايبلكم البيت كله وهشوف مكان انام فيه للصبح سلام
سابهم ومشي ومعرفش يروح فين لانه ممكن يروح فندق بس حد من الصحافه المتطفله يكتب اي حاجه بما انه يوم خطوبته
اخيرا راح مكتبه ودخل ونام فيه للصبح
العيله بعد الحفله اتجمعوا كلهم
علاء : هو مين عزم مدير المخابرات ده ؟
محي : فكرتني صح .. يعني انت متخلف ولا متخلف
علاء : ليه ان شاء الله
محي : انت رايح تعاكس مراته قدامه ؟
علاء : انا بجامل
خالد : اهي مجاملتك دي ممكن تكلفك رقبتك
علاء : انت بتقول فيها اصلا جالي وقالي لو شوفتك بتبص ناحيتها بس هحطلك عنيك في طبق واكلهملك
خالد ضحك : تستاهل
ميس : المهم هو فعلا ممكن ينبش في موت وليد !
محي : ما اعتقدش هيفتح ملفات قديمه ليه ! المهم حاليا سالي تركز مع فهد وتخليه ديما قدام عينها
ميس : اشمعني
محي : ادهم مش هيفتح ملفات قديمه الا اذا اتطلب منه .. لو فهد طلب يبقي لازم نعرف .. او حتي فكر يطلب .. علاء انت تفهم بنتك دورها !! وتخليها تحكيلك بالتفصيل اول بأول .. هما العيال يعرفوا ايه عن وليد وجميله !
علاء : سالي تعرف انها كانت خدامه وانها كانت جايه تخلف وتقبض وتمشي بس طمعت في وليد كله وهو ندل واتجوزها
خالد : ده نفس اللي امل واسر يعرفوه بس امهم ديما بتتكلم كويس عن وليد .. لكن جميله محدش بيجيب سيرتها
محي : تمام خلاص يبقي ده بس اللي يفضلوا عارفينه مش عايز حاجه زياده
علاء : طيب وسالي اللي هتتجوز فهد ؟
محي : كفايه برضه عليها اللي عارفاه مش عايز حد يعرف عن ماضينا حاجه .. يالا بقي اليوم كان طويل كل واحد يروح بيته
كله روح وخالد بعد ما وصل دخل لمراته كانت نايمه قرب منها ويدوب بيلمسها صحيت وزقته بعيد
خالد : وبعدين هتفضلي تمني عليا بقربك لامتي !
ندي : تصبح علي خير انا عايزه انام
خالد نور النور وشد المخده بتاعتها : انا بكلمك
ندي اتعدلت : افندم ؟ عايز ايه ؟ اتكلم
خالد : عايز حبيبتي مش لاقيها !
ندي بتريقه : حبيبتك !! والله العظيم يا جدع … قال حبيبته قال
خالد مسكها من ايدها : بقول عايز حبيبتي ومش بهزر
ندي شدت ايدها : حبيبتك ماتت يا خالد .. ماتت مع اخوها زمان .. ماتت لما حبستها في بيتها بالحيا .. ماتت لما ما سمحتلهاش تاخد امها في بيتها .. ماتت لما خليتها تتخلي عن ابن اخوها وبدال ما تاخده في حضنها سابته لميس تربيه علي الكره .. ماتت لما ملقتش الامان وافتقدته … ماتت لما جبرتها تسافر وتعيش عمرها متغربه .. ماتت لما خيرتها يا تخرس يا تسيب عيالها الاتنين .. فما تجيش دلوقتي تقولي حبيبتك فين وراحت فين لان خلاص معدلهاش وجود اصلا
خالد : ايه الاتهامات دي كلها هاه ! امك انا ما منعتكيش منها امك كانت تعبانه وبتتعالج
واللي دخلها الدار كان حفيدها ولما رجعتي رجعتيها بيتها .. اما ابن اخوكي اتربي ملك ناقصه ايه هاه ! ربته ميس احسن مليون مره من ما كانت امه هتربيه .. اهو راجل طول بعرض قد الدنيا .. اما خيرتك بين عيالك وبين مشيك كان حبا فيكي لاني مكنتش عايز اخسرك فقلت اجبرك وانتي مع الوقت هتفهمي ان ده حب يا ندي .. مكنتش عايز اخسرك وعلشان كده جبرتك تفضلي معايا جايه دلوقتي تلوميني ..
ندي : خالد ابوس ايدك اسكت بقي ..
خالد : لحد امتي هتفضلي تتهميني بموت اخوكي
ندي : انا مش بتهمك
خالد : نظراتك كلها اتهام وانا بريء من دمه
ندي : ارجوك انا عايزه انام وتعبانه
الامور رجعت لطبيعتها في الشغل وكل واحد استقر في شغله والكل بيتجنب بعضه
وليد كان داخل البيت عند نبيله وميس كانت في الجنينه واول ما شافته قعدت في الارض ونادت عليه
وليد : خير ميس هانم حضرتك في الارض ليه !
ميس بتوجع : وقعت ورجلي تعباني قوي ينفع تساعدني لحد بس الكرسي
وليد وطي يساعدها بس مش قادره خالص حتي تقف معاه
ميس : مش قادره .. وليد اتصرف
وليد مش عارف يعمل ايه : طيب هنادي لحد لحظه
ميس حطت ايدها حوالين رقبته : انا مش تقيله قوي ممكن انت تشيلني
وليد استغرب بس شالها وحطها علي اقرب كرسي
ميس : ينفع تقولي مالها رجلي ؟
وليد وطي يشوف رجلها وهيا ابتسمت ووصلت لغرضها انها قاعده وهو تحت رجليها وهو حس بده فاتعدل
وليد : رجل حضرتك كويسه يا افندم بس ارتاحي وهيا هتتحسن
ميس : ولو ما اتحسنتش ؟ تعملي جلسات ؟
وليد : لو ما اتحسنتش تروحي لدكتور عظام وتشوفي هيقولك ايه ! بعد اذنك
دخل خلص جلسته مع نبيله اللي بتتحسن يوم بعد يوم …..
ميس : ماشي يا وليد اتقل براحتك بس هتروح مني فين !!
……………
ادهم في مكتبه واستدعي الثلاثه اياد واريان وآسيا
ادهم : هتطلعوا انتو التلاته في مهمه سريه خاصه بعيد عن السجلات الرسميه .. حد عنده اعتراض
التلاته : لأ
ادهم حكالهم حكايه وليد كلها
آسيا : طيب مش الاول نتأكد ان مش وليد اللي في القبر !
ادهم ابتسم : وده نفس تفكيري وده اللي عملته .. مش وليد اللي في القبر وبالتالي محدش يعرف وليد فين او جثته فين !! محدش عارف هو مصيره ايه حتي اهله .. بس ده ما يمنعش انهم ممكن يكونوا لبسوه اي مصيبه او تهمه او حابسينه او حتي بعتوا حد يقتله وظيفتكم بقي يا حلوين تعرفولي قراره ايه ؟ عايش ترجعوه .. ميت ترجعولي بجثته حتي لو كانت شويه عظم
آسيا : طيب بابي المفروض نبدأ هنا من عيلته
ادهم : ابدئي من المكان اللي يعجبك بس في سريه تامه وعيلته كلهم مشتبه فيهم
اريان : طيب مراته جميله فين ؟
ادهم : مراته عايشه مع اخوها وعياله الاتنين اللي هما جميله و وليد والاتنين شغالين في شركه نصّار
اياد : طيب شغلهم مجرد صدفه ؟؟
ادهم : لا طبعا اكيد لهم غرض لان محدش يعرف خالص ان لهم علاقه بجميله مرات وليد
آسيا : طيب عايزين ايه ؟
ادهم : اعتقد ان دول اهتمامهم هيكون محصور في فهد فقط كابن لعمتهم وممكن يكونوا عايزين يجمعوه بأمه مش اكتر المهم هما ما يشغلوناش حاليا وهتشتغلوا بحذر
اريان : اسافر انا وآسيا من بكره علي باريس واياد هنا يجمع اللي يقدر عليه
اياد : ناصح انت ولا ايه .. طيب ما اسافر انا وآسيا وانت تجمع المعلومات هنا ؟
اريان : انا مش من البلد دي وما اعرفش فيها كتير انت من هنا وهتفهم اكتر مني
اياد : انت بقالك كام سنه هنا انت هتستعبط ولا ايه ؟ انا اللي هسافر مع آسيا
اريان : لا طبعا بره تخصصي انا اللي هسافر
ادهم قاعد علي حرف مكتبه بيتفرج عليهم وآسيا قعدت جنبه وابتسمتله
آسيا بهمس : هنسيبهم يتخانقوا كده كتير
ادهم : فرجه حلوه وببلاش كنا بس عايزين حبه فشار
آسيا ضحكت وسندت علي كتف ابوها : انت رأيك مين فيهم اللي يسافر معايا
ادهم بصلها : انا رأيي هما الاتين يسافروا وتفضلي انتي هنا في مصر
هنا آسيا وقفت وشهقت لابوها: نعم
اريان واياد سكتوا وبصوا لآسيا : انا ايه
ادهم : مش انتي سألتي وانا جاوبتك
آسيا : انت بتهزر صح ! لانه ما ينفعش يكون بتتكلم جد اصلا ؟
ادهم : واهزر ليه !
آسيا : بابي انا مش هفضل هنا طيب ايه رأيك انا هسافر لوحدي والاتنين يفضلوا هنا
ادهم : نعم يا حلوه امك انتي
آسيا : ايوه
وكمل اسيا وابوها خناقهم وفي الاخر قرروا التلاته يفضلوا مع بعض والتلاته يسافروا مع بعض لان مفيش حل تاني
……………..
تاني يوم ( يوم اجازه ) ميس اتصلت بجميله تجيلها البيت كانت سالي مع فهد علي البيسين وامل كانت مع جدتها نبيله
جميله دخلت وساعتها لمحت فهد علي البيسين لابس نظارته الشمس وشورت وباصص للسما وسالي جنبه وهو متجاهلها وامل واقفه بتقول حاجه لسالي
جميله وقفت تتابعهم لانها حست ان سالي بتضايق امل ..
سالي : معدش ينفع بقي يا امل تبصي لفهد خطيبي بنظراتك دي ..
امل باحراج : نظرات ايه ؟ فهد ابن عمي وبس !
فهد : نظرات ايه يا سالي احنا اولاد عم وبس
سالي ضحكت : اوعي تقولي يا فهد ان انت كل ده ما اخدتش بالك من نظرات امل ليك ؟
فهد بص لامل باستغراب وهو مش فاهم
سالي : حبيبي امل بتعشقك من واحنا عيال صغيرين .. يا ابني دي بطلت تكلمني من ساعه ما عرفت بخطوبتنا
فهد بص لامل : صح يا امل كلامها ده ! انتي اختي الصغيره يا امل وطول عمري بعتبرك كده
امل بعياط : طبعا يا فهد .. سالي بس بتهزر
سالي ضحكت ومسكت ايد فهد : سيبك خلاص انا فعلا بهزر .. ( من غير ماتبص لامل ) امل شوفي رايحه فين علشان عايزه ابوس خطيبي
جريت امل واتخبطت في جميله واتفاجئت بس ارتاحت انها هيا فعيطت علي صدرها
فهد : انتي مستفزه قوي يا سالي !
سالي : انا مستفزه علشان بغير علي خطيبي ابقي مستفزه ؟
فهد وقف : علشان بتحرجي بنت عمك وبتتكلمي باسلوب مستفز .. يعني استفادتي ايه لما زعلتيها واحرجتيها كده ؟ ولا دي مجرد متعه عندك ؟ هروح الحقها قبل ما تمشي بعد اذنك
جميله مع امل
امل : سمعتيها ؟
جميله : لا للاسف ما سمعتهاش .. قالتلك ايه ؟
امل بعياط : تخيلي بتقولي قدام فهد انه خلاص بقي خطيبها واني ما ينفعش بقي احبه وبعدها قالتلي امشي علشان تعرف تبوسه متخيله انتي !!
جميله : هيا بجحه اه بس هيا مش غلطانه ابدا
امل بعدت وبصتلها باستغراب حتي فهد اللي واقف علي الباب استغرب
امل : مش غلطانه !
جميله : طبعا مش غلطانه انتي وبس اللي غلطانه
امل زعلت : ليه ؟
جميله : لانك بتسمحيلها يا امل تهينك .. مش قادره افهم هيا ماسكه عليكي ايه مخليكي ساكته كده !!
امل : مش ماسكه عليا حاجه ؟
جميله بغيظ : امال ايه ؟ احلي منك ؟ لأ انتي احلي مليون مره .. دمها اخف ؟ لأ دمها يلطش ومحدش ابدا بيحبها … اغني منك ؟ لأ انتو عيله واحده … اذكي منك ؟ لأ دي غبيه وما بتفهمش ولولا ابوها كانت اتطردت من زمان في الشغل.. فليه سكوتك ده ؟ ليه ؟
امل بحزن : ايوه بس اهي في الاخر هيا فازت بفهد
جميله بتريقه : فازت بمين ؟ فهد ؟ يطلع مين فهد ده اصلا ! يا بنتي فهد ده ما يستاهلش ضفرك .. انتي ما بتحبيش فهد يا امل .. وعارفه لو كنتي انتي مكان سالي مكنتيش هتكوني مبسوطه
امل : ليه بقي انا بحبه ؟
جميله : بتحبيه كابن عمك ماشي لكن مش الحب نفسه … يابنتي انتي عايزه حد يحبك ويفهمك ويسعدك فهد هيقدر يعمل ده !جاوبيني بأمانه .. فهد هيخرجك مثلا ويفسحك ويجري ويلعب ويتنطط معاكي ؟
امل : لأ
جميله : لو شافك زعلانه هيجي يقعد جنبك وياخدك في حضنه ويعملك اراجوز علشان تضحكي
امل افتكرت وليد هنا وهو بيحاول ديما يضحكها
جميله : فهد لايقه عليه قوي سالي لانهم باردين زي بعض .. معدومين الاحساس
جميله مسكت امل وشالت شعرها من علي وشها : امل انتي ارق من انك تكوني مع حد زي فهد .. فهد عايز واحده تقف قصاده ند بالند علشان تقدر تعيش معاه .. واحده تغتصب حقها منه .. ولو كنتي ارتبطتي بيه كنتي هتكوني اتعس انسانه لانك هتعيشي ديما منتظره .. هتنتظري كلمه .. هتنتظري ابتسامه او لفته او حتي مجامله وياريت في الاخر هتطوليها .. احمدي ربنا .. وبطلي تكوني سلبيه وانطلقي يا امل .. شوفي ايه اللي يسعدك واعمليه .. قولتي هتفتحي مكتب ديكورات وتصميم فين ! يالا ابدئي ونصيبك هيجيلك لتحت رجليك ويتمنالك الرضا ترضي وانتي تحطي رجل علي رجل وتأمريه وهو يلبي بسعاده .. حبيبتي الحب اجمل وارق من انك تضيعيه مع حد مش شايفك ولو شافك مش هيحسك
امل : كلامك حلو بس التنفيذ صعب
جميله : مش صعب .. انتي بتحبي فهد بس كابن عم افضلي رددي العباره دي كتير لحد ما عقلك يصدقها .. يالا بقي روحي علشان اطلع لميس انا
امل ابتسمت ومشيت بتفكر في كلام جميله
وبعد ما قفلت الباب ، جميله اتخضت لما فهد اتكلم وراها : بقي انا ما انفعش مع واحده زي امل ؟
جميله بصتله بعنف : ولا تنفع ولا تستاهلها اصلا .. دي ارق واجمل من انها تكون مع حد زيك ..
فهد : وانتي ؟؟
جميله : انا ايه ؟
فهد : انتي تنفعي معايا !!
جميله ضحكت : انا معاك انت !! بغض النظر اني مش مستغنيه عن حياتي وعايزه اعيشها بس انت ما تنفعش معايا وواحد زيك بمواصفاتك ما يعجبنيش اصلا
فهد بغيظ : انا ما اعجبكيش !! انا فهد نصّار ما اعجبكيش تطلعي مين انتي اصلا ؟
جميله : اهو ده اللي اقصده .. انا فلان انا فلان تطلع مين انت ؟؟ انت مين بدون اسم نصّار ؟ انت مين بدون شركتك وفلوسك ؟ انتي كانسان تطلع مين ؟؟ للاسف يا فهد انت ولا حد انت خاوي من جوه .. اه انت رجل اعمال ناجح لكن كانسان تاخد صفر من عشره وانا لو هتجوز وارتبط هيكون بانسان يحبني واحبه مش هرتبط بشركه وبفلوس فبالتالي مقوماتك ما تنفعنيش ..
فهد كل كلمه نطقتها هو حاسسها فعلا وعلشان كده مقدرش يرد عليها وجميله حست ان كلامه ضايقه جدا وحاولت تغير الموضوع
جميله : وبعدين بعيد عن كل الحوارات دي انت ابن عمها وقاعد ازاي تسمح لاي حد حتي ان كانت سالي تغلط فيها وتتريق عليها ؟؟
فهد : انا ما سمحتش
جميله : لا فعلا انت قومت عطيت سالي قلمين قولتلها ما تتكلمش علي بنت عمها
فهد : انا لو همد ايدي وادي لحد قلمين فمش هتكون سالي ابدا
جميله قربت : انا ابعد من نجوم السما بالنسبالك يا فهد
سابته وطلعت لميس
ميس : اتأخرتي ليه !
جميله : امل عطلتني وانا طالعه
ميس: امم طيب تمام .. اقعدي وركزي وافهمي .. شوفي انا احتمال اغيب فتره اسبوعين او تلاته كده من الشركه وعايزاكي تكوني سمعي وبصري هناك .. يوميا هتجيلي وتسلميلي تقرير
جميله : طيب خير ليه مش هتروحي
ميس : هعمل عمليه
جميله اتفاجئت : ايه عمليه ؟ ليه حضرتك تعبانه ؟
ميس : ما تشغليش بالك انتي
جميله : لا اشغل بالي حضرتك مالك ؟
ميس : جميله بعدين هقولك .. جيبتي الملف اللي طلبته
جميله : اه اهو اتفضلي
قعدوا مع بعض كتير وبعدها طلعوا البلكونه فجميله شافت حوض الورد من مكانها وبصتله وابتسمت
ميس بأسف : جميل صح ! معمول بحب ! كل يوم بنزل اسقيه بنفسي بس للاسف تعبانه النهارده وامبارح والجنايني مش بيسقيه لانه عارف ان ده مسؤليتي
جميله : انا ممكن اسقيه لحضرتك لو تحبي ؟
ميس ابتسمت : بجد يا جميله ؟ هتسقيه علشاني ( مثلت الحزن ) بس انا مقدرش اطلب منك طلب زي ده !!
جميله : لا انا بحب الورد جدا وده شيء هيسعدني .. بعد اذنك هنزل اسقيه
نزلت جميله تسقي الورد وهيا عارفه ان ده غرض ميس بس هيا مبسوطه يمكن علشان عمتها زرعت الحوض ده وخططته .. يمكن احساس بالحب اللي جواه .. يمكن علشان كذا مره تشوف فهد واقف جنبه .. هيا مش عارفه السبب بس يكفيها انها مبسوطه وهيا بتسقيه ..
خلصت ومبسوطه وبصت لفوق مكنتش ميس موجوده .. هتدخل البيت تجيب شنطتها وتمشي .. وهيا باصه لفوق و ماشيه ومبسوطه اتكعبلت في الخرطوم اللي كانت بتسقي بيه ووقعت بس للاسف وقعتها جت علي المقص بتاع الجنايني كان مكسور نصين ونص منه مغروز في الارض وده اللي وقعت عليه .. وقعت عليه وجرح ركبتها جرح كبير جدا لدرجه ان هيا مش قادره حتي تنطق او تصرخ مع كميه الدم اللي بتنزفها بغزاره دي ….
رواية جميله الجزء الثاني للكاتبه شيمو
الحلقه الخامسة عشر
يا جماعه جميله حاليا انا بكتب في الحلقه ٣١ ولسه مش عارفه هتكون كام حلقه علشان بس كتر الاسئله .. ورجاء خاص بلاش رسايل تسأل عن حلقه زياده او لو اتأخرت دقيقتين الاقي ١٠٠ رساله بيسألوا عن الحلقه يعني انا مش ساعه .. ممكن اخر دقيقتين او تلاته الدنيا مش هتتهد فخلوا الرسايل للاسئله المهمه او للي عايز يتكلم معايا مش لحاجه زي كده …
كل اللي بتوه منه الحلقه يقدر يعملي متابعه ومشاهده اولا ايميلي الخاص ( shimooelwady )
اسيبكم بقي مع الحلقه
خلصت ومبسوطه وبصت لفوق مكنتش ميس موجوده .. قررت تدخل البيت تجيب شنطتها وتمشي .. وهيا باصه لفوق و ماشيه ومبسوطه اتكعبلت في الخرطوم اللي كانت بتسقي بيه ووقعت بس للاسف وقعتها جت علي المقص بتاع الجنايني كان مكسور نصين ونص منه مغروز في الارض وده اللي وقعت عليه .. وقعت عليه وجرح ركبتها جرح كبير جدا لدرجه ان هيا مش قادره حتي تنطق او تصرخ مع كميه الدم اللي بتنزفها بغزاره دي …. حست انها بتغيب عن وعيها
فهد قام من علي البيسين
سالي : رايح فين ؟
فهد : تعبت هاخد شاور والبس هدومي
سالي : خلينا شويه كمان
فهد : بقولك تعبت خلاص والشمس اصلا هتغيب اهي
سالي : طيب براحتك
فهد داخل من التراس وحس كأن حد همس باسمه .. مجرد همس بس هو سمعه .. بص وراه ناحيه البيسين بس سالي قاعده مكانها .. بص ناحيه الجنينه وهناك لمحها في الارض
فهد : بتعمل ايه المجنونه دي في الارض كده !
جميله مبقتش قادره فرقدت علي ظهرها هنا فهد شاف الدم اللي في رجلها وشافها وهيا بترقد وجري عليها زي المجنون
فهد : يا مجنونه يا مجنونه يا مجنونه عملتي ايه في نفسك ! انتي متعوره فين !!
فهد قعد جنبها علي الارض وبيشوف بتوتر وخوف هيا بتنزف منين !!
جميله ابتسمت وحطت ايدها الغرقانه دم بضعف علي خده : انت هنا !
فهد مسك ايدها : انا هنا ما تخافيش
هنا ابتسمت واغمي عليها بين ايديه
فهد : جميله !! جميله خليكي معايا .. جميله
لمح الجرح في رجلها بينزف بغزاره قلع تيشرته اللي بحمالات بسرعه وشقه نصين وربط رجلها يمكن يقل النزيف شويه وشالها دخلها جوه وبينادي بصوته كله علي ميس وعلية اللي جم يجروا الاتنين وميس اول ما شافت جميله بين ايديه اتضايقت جدا .. و وقفت مكانها تتفرج علي خوفه ولهفته عليها
كمان سالي دخلت علي صوته وواقفه متبعاه بغل
علية الوحيده اللي اتحركت : مالها يا ابني فيها ايه ؟
فهد : معرفش معرفش بتنزف جامد .. اتصلي بالاسعاف بسرعه يا علية بسرعه
جريت علية تكلم الاسعاف اما فهد فنادي : يا ميس .. ميس
ميس بهدوء : نعم
فهد اتفاجيء انها قريبه واستغرب وقفتها كده : اعملي حاجه !! البنت بتنزف
ميس قربت بهدوء مستفز وفهد ضاغط علي رجلها جامد لانه كل ما بيتحرك بتنزف جامد
ميس : اعملها ايه ! انت قايم بالواجب .. بعدين ده جرح في رجلها .. هيجرالها ايه يعني !
فهد باستغراب : البنت بتنزف وممكن تموت فيها لو ملحقناهاش وانتي تقولي هيجرالها ايه !
سالي تدخلت : وانت خايف عليها قوي !
فهد بص لسالي وراه وميس قدامه واستغربهم الاتنين .. استغرب برودهم في موقف زي ده .. استغرب ازاي قادرين يكونوا بالبرود ده وحد بيموت قدامهم !!
علية : الاسعاف علي وصول يا ابني ..
الاسعاف وصلوا ودخلوا واخدوها من فهد اللي مش عايز يسيبها ..
هو قالع هدومه مش هيعرف يروح معاها طبعا عمر ما سالي او ميس هيتحركوا
فهد : علية اطلعي معاها يالا وانا هغير واحصلكم اطلعي
علية طلعت معاها وهو قلبه طلع معاها .. اول مره يخاف علي حد بالشكل ده .. طلع جري علي اوضته يلبس بس لمح شكله في المرايه .. وشه وصدره وايديه كلها دم
وقف ينظف نفسه وعقله بيصور مليون سيناريو لجميله اللي هيموت من القلق عليها بسرعه لبس ونزل
سالي : وصلني في طريقك البيت
فهد : انا رايح المستشفي للبنت اللي كانت بتموت قدامكم وانتو الاتنين واقفين بمنتهي البرود بتتفرجوا عليها.. زي ما يكون عادي جدا ان حد يموت قدامكم
سالي هتتكلم بس ميس شاورتلها تسكت وفهد خرج بسرعه
ميس : قولتلك ما تقفيش قصاده كده .. وبعدين هو دلوقتي متنرفر تسكتي انتي وتضربي بعدين !
سالي : انا مش عايزه البنت دي .. اياك تموت ونخلص منها بقي
ميس : ما تعمليلهاش اهميه انتي بس علشان هو كمان ما يعملهاش اهميه
فهد راح المستشفي وهناك كلم وليد وقابله وعرفه اللي حصل ووليد راح لاخته بسرعه وفهد معاه .. اسعفوها وعطوها مسكنات ومحاليل علشان يعوضوا النزيف اللي حصلها
علية : الحمد لله لحقناها
فهد : الحمد لله
علية : افضل معاها الليله !
فهد : لا يا علية تسلمي تعبناكي .. روحي انتي بقي
علية : تعبتني ايه دي جميله دي بنت طيبه وحبوبه وبتساعد الكل .. نفس اخلاق والدتك
فهد بصلها : تاني !! تاني بتجيبي سيرتها
علية : يا ابني جميله دي كانت بلسم .. مجرد ما تتعامل معاها تحبها .. ميس بتسمم افكارك ناحيتها
فهد : طيب هيا فين ! ردي عليا !! اختفت فين ! ليه ما ظهرتش من عشرين سنه
علية فكرت تقوله انه اتقبض عليها بس ساعتها هيروح لميس ويسألها وميس هتألف كدبه جديده وتطردها او تشوفلها اي مصيبه تخلص منها فيها وتبعدها هيا كمان عن فهد اللي نبيله و وليد وصوها عليه ..
فهد : سكتي ليه ! مش لاقيه حاجه تقوليها صح !
علية : مش يمكن تكون ماتت !!
فهد الكلمه نزلت عليه لجمته بس تمالك نفسه : تبقي ريحت وارتاحت .. روحي انتي ومتشكر لوقفتك معاها ..
فهد فضل واقف شويه يفكر في كلام علية وبعدها بص لاوضه جميله
فهد دخلها : عامله ايه ؟
جميله ابتسمت : انا بهدلت وشك صح !
فهد ابتسم : عادي مش مهم
جميله مبتسمه جامد : انت قطعت التيشرت بتاعك صح
فهد : فداكي
جميله : انا كويسه جدا وحاسه اني طاااايره
فهد ضحك : ده من المهدئات اللي انتي وخداها ، عملالك دماغ ، ولولا اني واثق انك مش هتفتكري حاجه كنتي هتلاقيني معاكي بطبيعتي
جميله : يعني انت دلوقتي مش بطبيعتك
حط ايده علي خدها : انت شايفه اني انا فهد اللي تعرفيه !
جميله غمضت عنيها : لأ … انا عايزه انام
فهد ابتسم : نامي المهم انك كويسه !! نامي
جميله من نومها : خليك ….. جنبي
فهد بيمسد علي شعرها : ياريت بس غصب عني … لو تعرفي انتي ايه بالنسبالي !!!
جميله ابتسمت وغمضت عنيها
فهد قام وخرج كان وليد راجع لاوضه اخته
وليد : خلصت اللي ورايا هيا كويسه !
فهد : نامت
وليد : يبقي مفعول المسكنات اللي اخدتها اشتغلت .. هيا اتعورت ازاي ايه اللي حصل ؟
فهد : معرفش انا كنت داخل لقيتها في الجنينه ومغمي عليها .. اتصلت بالاسعاف وجبتها معرفش ايه اللي عورها او ايه اللي حصل .. هيا لما تفوق كده هنعرف منها
وليد : متشكر يا فهد بيه علي اهتمامك
فهد بصله : ده واجبي بتشكرني علي ايه
وليد : يعني انت بعت معاها داده علية وجيت بنفسك
فهد : لو كنت لابس كنت جبتها بنفسي بس ساعتها انا كنت علي البيسين فبالتالي كنت يدوب بتيشرت وشورت والتيشرت قطعته علشان الف رجلها فمكنش ينفع اجي كان لازم البس الاول فبعت معاها علية وانا حصلتها
وليد : انت مش محتاج تبرر مجيك كفايه
فهد : طيب هيا هتخرج امتي ؟
وليد : علي طول .. تخلص بس المحاليل بتاعتها وهاخدها ونروح
فهد : معاك عربيه !!
وليد : هاخد تاكسي ما تشغلش بالك
فهد : لا هوصلكم بنفسي
وليد : فهد بيه ما تشغلش بالك انت وروح شغلك يالا او شوف مصالحك
فهد : د/ وليد انا هوصلكم مش هنتكلم كتير بقي لو ورايا حاجه كنت هروح لكن النهارده اصلا اجازه .. هعمل كام تليفون كده تكون المحاليل خلصت بعد اذنك
وليد دخل لاخته وفهد رد علي موبيله اللي بيرن كل لحظه : نعم
ميس : انت ما بتردش ليه !
فهد : مكنتش فاضي ارد
ميس : عملت ايه !
فهد : هعمل ايه في ايه !
ميس : جميله عملت ايه وحالتها ايه !
فهد : الجرح بتاعها كبير ونزفت كتير ودلوقتي بيحاولوا يعوضوا النزيف ده
ميس : يعني هترجع الشغل امتي !
فهد باستغراب : الشغل !! شغل ايه يا امي اللي بتتكلمي عنه ! البنت كانت هتموت وانتي تقوليلي الشغل؟
ميس : اهي كويسه المهم هترجع امتي ؟
فهد : معرفش .. معنديش الجرأه اني اسأل سؤال زي ده اصلا ..
ميس : طيب اديني الدكتور بتاعها وانا اسأله
فهد : سلام يا ميس
قفل السكه وبعدها خبط ودخل عند وليد
فهد : قدامكم قد ايه ؟
وليد : هيا رايحه في النوم وصراحه صعبان عليا اصحيها لان لما مفعول البنج والمسكنات يروح هتتوجع جامد ..
فهد : طيب خليها الليله هنا وبكره خدها
وليد : والله بفكر في كده بس كمان بفكر في عمتو وبابا هقولهم ايه
فهد : تقولهم ايه ازاي ؟ عادي يعني
فهد بيفكر ان ميس عادي عندها حد يتعور او يجراله حاجه فمستغرب من كلام وليد
وليد : عمتو ممكن يجرالها حاجه لو عرفت .. بتقلق كتير … لازم امهدلها
فهد : طيب تحب انا اروح اجيبها بنفسي ؟
وليد بصله كتير وفكر انها فرصه لعمته تقضي شويه مع ابنها
وليد : انا مش عارف اقولك ايه ! انت بتحرجني بذوقك وانا مش عايز استغل ده
فهد : خلاص يبقي هروح اجيبها وانت افضل جنب اختك
وليد : طيب هو ميس هانم ممكن تيجي !
فهد : ميس !! تيجي !! شوف لو انا اللي مكان جميله واتصلت وعرفت حالتي مش هتيجي جاوبتك كده !!
وليد ابتسمله بس في نفس الوقت اتضايق علشانه .. اتحرم من ابسط حقوقه ..
فهد بعد ما خرج رجع تاني : هقولها ايه !
وليد فكر : قولها !! قولها تيجي تزور جدتك نبيله لان جميله حكت عنها وعايزه تشوفها
فهد : طيب ممكن ترفض
وليد : عمتي ما بتعرفش تقول لأ لاي حد روح ما تقلقش وانا هكلمها واديها فكره بحيث تجهز
فهد مشي ووليد اتصل بعمته وقالها ان فهد هيجيلها ويطلب منها تزور جدته وتوافق
عمته : نبيله هتعرفني
وليد : نبيله مش هتشوفك اصلا دي حجه عاملينها المهم تعالي معاه انتي بس ووافقيه علي كلامه فهمتي
عمته : وليد انت بتخطط لايه !
وليد : انتي مش عايزه تشوفي ابنك وتقعدي جنبه شويه !! اهو بقدملك فرصه ما تضيعيهاش منك
علية خرجت من المستشفي الافكار بتتزاحم .. نفسها تساعد بس مش عارفه تعمل ايه ! قعدت علي الرصيف قدام المستشفي وفضلت تعيط شويه علي وليد وجميله واللي حصلهم وابنهم اللي فاهم كل حاجه غلط …
فهد راح للبيت وخبط وقلبه بيدق قبل ما الباب يتفتح ومتوتر انه يشوفها .. فتحت بابتسامتها الجميله اللي بتنسيه هو عايز يقول ايه او يعمل ايه
امه : اتفضل يا ابني !!
فهد باحراج : هو مش د/ وليد كلمك
امه : كلمني وجاهزه طيب ادخل بس الاول اشرب حاجه
فهد : معلش مش وقته انا سايبهم في المستشفي
امه : سايبهم ! مين هما !
فهد اتوتر : اقصد نبيله ومعاها جميله و وليد
امه : طيب واعمامك و والدتك حد فيهم موجود !
فهد : لا ما تقلقيش يالا
جميله نزلت معاه بترقب وبصت لعربيته مختلفه عن عربيه ابوه بس الاتنين ذوقهم راقي جدا .. فتحلها الباب جنبه : اتفضلي
جميله امه ابتسمتله وركبت وقفل بابها وقعد جنبها ودور عربيته واتحرك
جميله افتكرت اول مره ركبت جنب وليد لما سرقوا يوم علي البحر ونامت علي كتفه ودمعه نزلت منها غصبا عنها مسحتها بس فهد لمحها : في ايه مالك !
جميله : لا يا حبيبي مفيش
فهد ركن علي جنب : انتي عيطتي ! مالك ! ما تعتبريني زي وليد وجميله ولا ما ينفعش
جميله دموعها نزلت وكان نفسها تنطق وتقوله انه اغلي منهم هما الاتنين .. ده حته منها .. ياما اتمنت تلمحه بس … حطت ايدها علي خده بحب وابتسمت من وسط دموعها
فهد ابتسم : قوليلي مالك !
جميله : افتكرت اول مره ركبت فيها جنب جوزي الله يرحمه .. لما فتحتلي الباب وركبني افتكرته
فهد : الله يرحمه .. الحب اللي بتحكي عنه !
جميله : هو انت ما جربتوش ! مش خطبت بنت عمك !
فهد دور عربيته وكمل طريقه : ده بيزنس ..
ولا اكتر ولا اقل
جميله : بس يا حبيبي الجواز ده حياه ومشاركه وبيت واطفال ما ينفعش يكون بيزنس
فهد : ده عندكم .. عندنا بيكون بيزنس .. وظيفه بتأديها
جميله : طيب ولما تخلفوا ؟
فهد : في دادات وبعدها متخصصين وبعدها مدارس داخليه .. علشان تعديهم وتجهزيهم يمسكوا مكانك
جميله : بس دي مش عيشه ابدا
فهد ابتسم : لا مش عيشه… وظيفه زي ما قولتلك .. مجرد بيزنس
جميله حطت ايدها علي ايده : حبيبي اوعي تعيش زي ما بتقول كده .. حب يا فهد واتحب وعيش في حضن حبيبتك وخلف عيال وربيهم بحب في حضنك واوعي تبعدهم بحجه التعليم .. خليهم يكبروا في حضنك انت وحبيبتك .. اوعي تكون دي حياتك
فهد بتأثر : دي فعلا كانت حياتي.. دادات ومربين ومدارس داخليه وبعدها شغل .. لولا داده علية اللي حبتني علي قد ما تقدر مكنتش هعرف اتكلم معاكي زي دلوقتي .. علية خلتني شويه بني ادم
جميله : لا ما تقولش كده ده انت سيد الناس كلها
فهد ابتسملها : مش هتقوليلي بقي شوفتك فين قبل كده !
جميله اتوترت وهو كمل : يعني فاكر اني شوفتك لكن فين مش قادر افتكر فين وامتي
وصلوا المستشفي وركن قدامها ونزل وفتح الباب لجميله ومسك ايدها يساعدها تنزل
علية كانت قاعده ولمحته نازل وقفت علشان تكلمه بس اتثبتت مكانها لما لقت جميله نازله معاه واخدها وطلع بيها …
وصلها واول ما دخلت الاوضه وشافت جميله جريت عليها وفضلت تعيط وتشتم في وليد وتعاتب فيهم وتبوس في جميله وفهد بيتفرج علي مشاعرها دي وغار منهم .. عمر ما داق الخوف ده والحب ده والحنيه دي …
خرج فهد وركب عربيته ومشي وعلية بعد ما شافته مشي طلعت جري علي اوضه جميله وخبطت وفتحتها .. وليد وعمته وقفوا الاتنين يبصولها و وليد خاف علي عمته فوقف قدامها بس عمته شدته بعيد وعلية جريت عليها حضنتها وفضلوا الاتنين يعيطوا كتييير … وبعد كلام كتير بينهم
علية : انا شفت فهد ماسك ايدك هو يعرف !
جميله : لا ما يعرفش اني امه ده ما يعرفش حتي ان اسمي جميله
علية : امال يعرف ايه !
جميله حكتلها كل حاجه بالتفصيل
علية : اه يا زمن … رخصت الغالي وغليت الرخيص … انتي ما تتخيليش ميس قيلاله ايه … ميس قلبت كل الحقايق .. مخليه فهد شايفكم شياطين وشايفها هيا ملاك
جميله : حسبي الله ونعم الوكيل فيها .. هقول ايه بس ..
علية : طيب جميله بنت اخوكي ووليد ناويين علي ايه ؟
جميله : والله ما اعرف .. عايزين يوصلوا لفهد ويوصلوني بيه
علية : جميله فعلا وصلت لفهد وهو بيخاف عليها وبيسمعلها
جميله : دول ما بيبطلوش خناق ابدا
علية : وهو الخناق هيجي منين غير من القرب !! طالما بيتخانقوا يبقي بيقربوا وبعدين دي جميله مجنناه ومخلياه يشد في شعره
جميله : بس اهو خطب بنت علاء
علية : سالي اجارك الله منها دي بقي حته من علاء وميس بحقارتهم .. كوكتيل منهم هما الاتنين .. ما اعتقدش ان فهد ممكن يتجوزها .. فهد اذكي من كده
جميله :ربنا يسترها معاه .. ويبعد اولاد الحرام عنه ….. المهم اوعي يا علية لسانك يقع بكلمه معاه
علية : عيب عليكي يا جميله .. ده انا بدعي ليل نهار ربنا يشيل الغشاوه من علي عنيه وما تقلقيش علي جميله و وليد انا هخلي بالي منهم ..
جميله : اصيله يا علية .. اصيله يا حبيبتي
عدي يومين وميس هتتجن وكلمت فهد يعرفلها جميله هترجع امتي اما سالي فبتفكر ازاي تبعد جميله عن طريقها لانها حست انها مهدده منها
سالي كانت مع ميس
ميس : متعرفيش جميله دي هتتنيل وترحع امتي !
سالي بغيظ : نفسي اعرف انتي عايزاها ليه ! ما تمشيها بقي من هنا
ميس : لا مش دلوقتي انا محتاجاها دلوقتي وبعدين الفتره دي بالذات كنت محتاجاها
سالي : اه صح عمليه ايه بقي اللي انتي هتعمليها ومحتاجه جميله مكانك؟
ميس : ما تشغليش بالك انتي
سالي : لا بجد قوليلي ومش هعرف حد نهائي
ميس : ولا فهد ؟؟
سالي : ولا فهد
ميس : هعمل تجميل
سالي بصتلها كتير قوي : تجميل لايه .. ميس انتي جميله جدا كده
ميس ابتسمت : عارفه اني جميله
سالي : امال تجميل لايه ؟
ميس : شويه تظبيطات كده
سالي : اوعي تقولي هتنفخي شفايفك وخدودك وتغيري مناخيرك والموضه اللي طالعه دي ؟
ميس : وفيها ايه ! وبعدين ماكل الممثلات بيعملوها فيها ايه ؟
سالي : ولو معجبكيش شكلك !
ميس : الدكتور بيديكي توقعات وشكلك هيكون ايه بعد العمليه .. انا مظبطه كل حاجه ما تقلقيش
سالي : طيب وفهد ؟ لما يشوفك !
ميس : فهد ما بيتدخلش في خصوصياتي
سالي : طيب براحتك بس بعد العمليه تمشي جميله دي من الشركه خالص
ميس ابتسمت : اوك
بقلم / الشيماء محمد
ايميل ( shimooelwady )
اما فهد قرر يزور جميله واقنع نفسه انه هيزورها علشان ميس وبس
خبط وامه فتحتله وابتسمتله وهو غصب عنه بيبتسم لها
دخلته وفضلت تتكلم معاه شويه وطلع عماد قعد معاهم وشكر فهد علي وقفته معاهم
امه جميله : لحظه هشوف جميله واخليها تقابلك
فهد وقف : انا بس قولت اطمن عليها واطمنت من حضرتك خليها مرتاحه
جميله امه : حبيبتي تعبانه وكل حركه بعياط فممكن لما تشوفك تتقوي شويه استني
جميله دخلت وبلغت بنت اخوها ان فهد موجود
جميله : عمتو هاتي مرايه بسرعه .. هاتي مشط .. شكلي كله متبهدل
عمتها : يا بنتي انتي تعبانه هدخله
جميله : طيب استني هاتي مرايه الاول استني يا وليه انتي
عمتها خرجت وفتحت الباب لفهد وشاورتله يدخل ، بتردد دخل عندها
فهد : عامله ايه ؟
جميله : كويسه .. متشكره لزيارتك
فهد : انتي عارفه ميس وزنها عليكي فقولت اعرف انتي هترجعي امتي
جميله بغيظ : شوف ازاي وانا كنت فاكره
فهد كمل : اني بني ادم وبحس وجاي اطمن عليكي صح !
جميله باسف : غلطانه عندك حق .. بلغ ميس هانم اني اول ما اقدر اقف لوحدي هاجي علي طول.. صح هيا عملت ايه في العمليه بتاعتها
فهد : اجلتها طبعا لحد ما انتي ترجعي
جميله : هيا عمليه ايه اصلا
فهد : معرفش ابقي اسأليها
جميله : مامتك هتعمل عمليه وانت ما تعرفش !
فهد : ما تشغليش بالك المهم اقفي بسرعه وارجعي بسرعه
جميله بتريقه : اللي يسمعك يقول انك بتشتاقلي وعايزني ارجع بجد
فهد كان نفسه فعلا يقولها ان الشركه من غيرها بتفقد روحها ورونقها
فهد : علشان الصداع بس اللي ميس عملاه
يالا انا ماشي سلام
جميله : سلام .. فهد !
فهد بصلها : نعم !
جميله : سلملي علي امل وارجوك ما تخليش سالي تيجي عليها قوي كده يعني اعتبرها زي اختك الصغيره وطمنها شويه
فهد ما ردش عليها وخرج وقابلته جميله امه
فهد : انا ماشي حضرتك عايزه حاجه !
جميله : حبيبي ما اتحرمش منك
فهد بصلها قوي واستغرب حبها اللي هو حاسه من ناحيتها .. ليه بتحبه كده ! ولا ممكن هيا بتحب الكل مثلا .. مش هيفكر كتير هو مستمتع باحساسه ده منها …
فهد : معاكي موبيل !
جميله باستغراب : معايا
فهد : ممكن توريهولي !
جميله جابته وعطتهولو وهو اخده وعمل عليه حاجه ورجعهولها : رقمي معاكي اهو سجليه وفي اي وقت تحتاجيني كلميني وارجوكي ما تترديديش ممكن !
جميله ابتسمت وكانت عايزه تعيط بس سيطرت علي نفسها : ما اتحرمش منك ابدا بس العلاقه دي متبادله
فهد : يعني ايه !
جميله : يعني انت كمان لما تحتاج لحاجه ما تترددش ابدا ..
فهد ابتسم : اتفقنا .. البت اللي جوه دي خليها ترجع بسرعه اكليها كتير علشان تخف بسرعه
جميله ضحكت : طيب بقولك ايه انا عامله محشي ما تاكل قبل ما تمشي
فهد ابتسم : للاسف واكل في ميتنج قبل ما اجي بس هعتبر دي دعوه مفتوحه
جميله : طيب استني لحظه واحده ممكن !
فهد : ممكن
جميله دخلت المطبخ وهو واقف وشيء تلقائي خلاه بص لاوضه جميله فلقاها بتحاول تطول اللاب بتاعها من تربيزه صغيره جنب السرير ومش طايله .. واقف متابعها ومبتسم وايديه في جيوبه ..
جميله بترفع دماغها وهيا بتبص حواليها شافته مبتسم قوي : بتبص علي ايه !
فهد بابتسامه : بتفرج يمكن تتقلبي ولا حاجه
جميله بتضحك بتريقه : هي هي هي خفه الاخ
فهد وقف علي بابها : الاخ ماشي يا خفتين مش واحده
جميله : انت واقف ليه ما تروح بيتكم
فهد : وانتيييييي مالك ..
جميله بتريقه بتقلده : علي فكره انت هنا في بيتي مش في الشركه هاه فاكر ولا نسيت
فهد ابتسم : بترديها يعني ! علي العموم عمتك طلبت مني انتظر لحظه مش عارف ليه
دخل عندها بخطوات بطيئه جدا ومسك اللاب وحدفه براحه علي رجليها بس جميله صرخت : اه اه اه رجلي حرام عليك
فهد اتفاجيء واستغرب لان حدفه بعيد عن جرحها بس صوتها ومسكتها لرجلها قرب منها بخوف : سوري سوري سوري .. مخدتش بالي خالص .. انتي كويسه ردي عليا ( جميله موطيه دماغها ووشها مش ظاهر وهو بيرفع شعرها من علي وشها وبيحاول يرفع وشها يطمن عليها وصوته مليان خوف واسف ) جميله ردي عليا انتي كويسه
هنا سمع صوت ضحكها فجمد مكانه وسابها ووقف من علي السرير وبصلها وهيا رفعت دماغها بصتله : ما انت بني ادم عادي اهو وبتحس بالناس امال ايه بقي
فهد اتحول لشيء بدون اي ملامح او مشاعر لدرجه خلت جميله تندم علي عملتها دي …
فهد : وبفضلك ما اعتقدش اني ممكن اصدق حد تعبان تاني .. شكرا انك قضيتي علي حاجه كانت هتتشكل واحس بالناس بعد اذنك اتمنالك اجازه سعيده
خرج وهيا بتنادي عليه بس ما ردش ورزع الباب وراه وامه جريت وراه ونادت عليه علي السلم : فهد
الطريقه اللي نطقت بيها اسمه جمدته مكانه
ورفع دماغه يبصلها من غير ما ينطق .. نزلت هيا السلمتين دول وهو مستغرب
جميله مدت ايدها بعلبه : خد دول معاك .. لما تجوع كلهم
فهد بص لايدها كتير وعايز يمشي من قدامها من غير ما ياخد حاجه بس لا قادر يمشي ولا قادر يسيبها
جميله : ما تكسفنيش .. وبعدين دول حبه ورق عنب مش اكتر ماتكسفش ايدي بقي
فهد رفع دماغه بصلها كتير وهيا اتوترت
فهد اتردد بس مد ايده واخده منها ونزل .. راح علي مكتبه هروبا من الكل واخر النهار شاف العلبه قدامه فتحها واكتشف انه جعان جدا وهو فعلا بيحب ورق العنب جدا .. اكل العلبه كلها وهو مبسوط جدا .. حس انه اول مره يستطعم اكل كده .. ممكن لانه بياكل بدون قيود .. او بياكل من ايدين الست اللي بيحبها بدون سبب .. او ايه ! مش عارف المهم انه استمتع بالاكل ده لاقصي حد
………………..
آسر كلامه مع فهد بقي ضيق جدا
فهد : آسر استني هنا اتكلم معايا وفهمني انا مبقتش فاهم انت مالك ولا انت بعيد ليه حتي الشغل بتهمله
آسر بضيق : انت عايز ايه يا فهد ! انا مش عايز اتكلم والشغل في مليون غيري يقوموا بيه او ابعت اي حاجه لبابا هو هيتصرف فيها انا تعبان اليومين دول ومحتاج اكون لوحدي شويه انت ايه مشكلتك !
فهد : مشكلتي انك ابن عمي لو في حاجه مضيقاك قولي مش يمكن اساعدك !
آسر بتريقه : تساعدني !! لا ما اعتقدش مش هتقدر
فهد : جرب !!
آسر : لا شكرا
سابه ومشي وهو مستغرب ماله
في البيت كان وليد خارج من عند نبيله وعلية قابلته : د/ وليد لو سمحت قبل ما تمشي ابقي كلم مدام ميس في اوضتها .. دي اوضتها اتفضل
وليد : اكلمها في اوضتها ؟ ليه ؟
علية : معرفش يا دكتور حضرتك روح وشوف ولا ابلغها بايه هيا في انتظارك !
وليد : هشوفها حاضر
علية راحت قدامه وهو وراها وخبطت خبطه علي الباب وفتحتله وشاورت لوليد يدخل
وقفلت الباب ووليد مستغرب جدا
ميس كانت لابسه روب وبصت لوليد وقفت وقلعت روبها كانت تحته شيء كب وقصير جدا وراحت نامت علي السرير علي بطنها
وليد بيتفرج ومذبهل : نعم حضرتك خير ؟
ميس : ظهري واجعني ومجهده
وليد : نعم برضه !
ميس بصتله من تحت شعرها : اعملي مساج
وليد وقف للحظه مستغرب وبعدها اتكلم : حضرتك فعلا فاهمه العلاج الطبيعي غلط .. اعتقد في مراكز متخصصه للي حضرتك عايزاه ممكن تتصلي بيهم بعد اذنك
ميس اتعدلت : اقف هنا
وليد من غير ما يبصلها : نعم
ميس : انا هنا ولية نعمتك ! انا هنا اقول انت تعمل ايه وانت تنفذ فاهم ولا مش فاهم
وليد بصلها من فوق لتحت وخرج من الاوضه وهيا وراه بتزعق : اقف هنا واتكلم عدل معايا
وليد بصلها وبص لقدامه هينزل خبط في فهد اللي وقف قصاده : في ايه بيحصل هنا
ميس ردت بسرعه : بطلب منه يعالجني وهو مش راضي
فهد بص لميس : يعالجك ؟ يعالجك من ايه !
ميس فكرت : علي رجلي .. وقعت عليها من كام يوم حتي هو شافني في الجنينه وبتوجعني
فهد بص لوليد اللي اتكلم : وقولت لحضرتك لو الالم استمر تروحي لدكتور عظام يعمل اشعه عليها ده مش تخصصي .. ولا ايه يافهد بيه ! افتي في حاجه ما اعرفهاش !!
فهد : لا طبعا متشكر لوقتك د / وليد اتفضل انت وحضرتك يا ميس انا هاخدك بنفسي للدكتور
فتح الطريق لوليد اللي نزل وفهد فضل واقف لحد ما خرج وبص لميس
فهد : في ايه بقي ! عايزه منه ايه وهو رفض ؟ وبلاش قصه رجلك دي !
ميس دخلت اوضتها وهو وراها : بعدين ايه اللي انتي لابساه ده ! وازاي تقابليه كده ؟
ميس بصت بحده فهد : وانت هتحاسبني يا فهد البس ايه وما البسش ايه !
فهد : لا يا ستي مش هحاسبك بس عايزه منه ايه !
ميس زعقت : عايزاه يسمع كلامي !! يكون تحت ايدي .. عايزاه يخضع ليا .. مش عيزاه يقف في وشي ويقولي لأ ( بدئت تتكلم بهستيريا وعياط ).. مش عيزاه يطلع من تحت ايدي .. مش عيزاه يقوم من تحت رجلي .. عايزاه يفضل معايا .. مش عيزاه يروح لغيري .. مش عيزاه يسيبني بتكلم ويمشي مش عايزاه يمشي
فهد قرب منها وضمها وهيا بتحاول تبعد بس هو كتفها وضمها كلها بين ايديه
فهد : اهدي ،… اهدي …. ده مش وليد جوزك اهدي …. هشششششش اهدي
ميس دخلت في هستيريا عياط وفهد شالها وحطها في سريرها وغطاها وفضل جنبها شويه لحد ما نامت فقام خرج وبعد ما خرج هيا اتعدلت : وريني بقي يا فهد هتعمل ايه لميس بعد نوبه العياط دي وازاي يا تري هتجيبلي وليد تحت ايدي !!! ضحكت جواها كتير من فهد اللي بتشكله زي ما تحب …
…………….
ضرب نار كتير ودربكه واصوات كتير .. ناس كتيره بتجري وفي الي بيصرخ .. ايه اللي بيحصل ده .. فجأه الباب اتفتح ودخلت بنت
: يالا هتطلع من هنا … ( هو قاعد مكانه ومش مستوعب او مش فاهم هيا بتقول ايه) مش عايز تروح بيتك ولا ايه .. يالا قوم
فضل برضه قاعد مكانه .. معقوله هيا بتتكلم عربي ولا هو مش سامع ولا بيحلم حس بيها بتمسكه من ايده
& مش انت وليد نصّار ؟؟ ( معرفش يرد بس شاور بدماغه اه ) طيب يالا هنرجعك بلدك ..هترجع بيتك قوووم
……………..
علاء نازل من الشركه وبص حواليه كتير بيشوف اي بنت معديه في الشارع وبعدها اتحرك ناحيه عربيته وحد ماشي وراه وفي ايده سكينه .. السكينه لمعت في ايده واتحرك بسرعه ناحيه علاء قبل ما يركب عربيته …… بس قبل ما يوصله حد مسكه من وراه وشاله بعيد وايده كانت علي بوقه منعاه يتكلم او يتنفس .. بعد بيه بعيد و بصوا لبعض …
بقلم / الشيماء محمد احمد
نكمل بكره
توقعاتكم
رواية جميله الجزء الثاني للكاتبه شيمو
الحلقه السادسة عشر
علاء نازل من الشركه وبص حواليه كتير بيشوف اي بنت معديه في الشارع وبعدها اتحرك ناحيه عربيته وحد ماشي وراه وفي ايده سكينه .. السكينه لمعت في ايده واتحرك بسرعه ناحيه علاء قبل ما يركب عربيته …… بس قبل ما يوصله حد مسكه من وراه وشاله بعيد وايده كانت علي بوقه منعاه يتكلم او يتنفس .. بعد بيه بعيد و بصوا لبعض … باستغراب شال الغطا اللي علي دماغها وشعرها اتفرد واتفاجيء بيها بنت وبصلها كتير
آسر : انتي مجنونه ؟ بتعملي ايه ؟
مي : انت بتمسكني ليه ! كان المفروض سيبتني اقتله !
آسر : ليه ! عملك ايه ! وبعدين انتي عارفه ده مين !
مي: ايوه عارفاه نصاب ومحتال كبير .. فاكر انه يقدر يملك الناس ويلعب بيهم زي ماهو عايز ( عيطت ) انت كان لازم تسيبني اقتله كان لازم اقتله
آسر : طيب ممكن تهدي .. تعالي نتمشي شويه يمكن تهدي
مي : لا انا لازم امشي .. هبقي اجيله تاني
جت تمشي بس مسك ايدها : مش كل مره هتسلمي ممكن بتوع الامن كان شافوكي وقبضوا عليكي .. انتي مالك انتي بالقتل ! شكلك بنت ناس وصغيره كمان
مي : ممكن تسيبني لو سمحت ؟
آسر سابها : اوك سيبتك بس بلاش جنان ما تضيعيش نفسك
مي قبل تمشي بصتله : انت مين ؟
آسر : اسمي آسر وانتي ؟
مي : انا مي ( بصت للمبني ) انت بتشتغل هنا !
آسر اتردد شويه : اه
مي : تعرفه كويس ؟
آسر هنا بصلها شويه : اه اعرفه ده واحد من الشركا الاساسين في الشركه
مي : عارفه هو انت ينفع تساعدني ؟
آسر : طيب فهميني هو عمل ايه وانا احاول علي قد ما اقدر
مي : هتساعدني ولا لأ !
آسر : يا بنتي افهمي
مي : خلاص .. شكرا لحضرتك
آسر : طيب استني .. اساعدك ازاي ؟
مي : تقولي بس امتي بيجي وامتي بيمشي
آسر : علشان تقتليه .. يا بنتي انتي فاكره القتل ده حاجه سهله !! وبعدين متخيله لو انا مكنتش مسكتك كنتي فعلا هتقتليه !
مي : ايوه كنت هقتله !
آسر : اصلا قبل ما توصليله كان الامن مسكك وحتي لو وصلتيله كان هيشوفك وهقدر يوقفك .. متخيله ممكن يعمل فيكي ايه لما يمسكك !
مي بعياط : هو خلاص عمل .. هو عمل كل اللي ممكن يتعمل !!
آسر : اهدي طيب مش هتعيطي تاني .. طيب ايه رأيك نشرب قهوه مع بعض وتحكيلي عملك ايه ! وعايزه تقتليه ليه !
مي افتكرت ثقتها السريعه في علاء وصلتها لايه واهي تاني هتثق بسرعه في واحد ما تعرفوش .. ايه مش بتتعلم من دروسها !!
مي : لا شكرا انا اتأخرت ولازم امشي ورايا جامعه
آسر : جامعه ايه ! بتدرسي ايه ؟
مي بعنف : وانت مالك !
آسر : سوري لو كان سؤالي ضايقك خلاص اتفضلي مش هعطلك
فتحلها الطريق وهيا يدوب هتمشي : بدرس في كليه الهندسه ..
آسر ابتسم : طيب هتديني تليفونك ابلغك امتي بيجي وامتي بيمشي ؟
مي اترددت بس عطته تليفونها وهو عطاها رقمه …
………….. .
ميس كل شويه تكلم جميله تطلب منها ترجع لانها محتاجها جدا
ميس : جميله هخلي حد من البنات يكون تحت ايدك بس تعالي في ملفات مهمه محتاجاكي تراجعيها وشغل كتير عايزاكي فيه .. انتي اقعدي علي مكتبك وهخلي مني او عبير تشوف طلباتك ..
جميله : حاضر يا ميس هانم هحاول بكره اخلي وليد يوصلني
ميس : لو عايزاني ابعتلك سواق مفيش مشكله !
جميله : لو احتجت او ظروف وليد ما سمحتش هبلغك
تاني يوم ومع اعتراض عمتها وابوها الا انها اصرت تنزل بس ليه ياتري ؟ علشان فعلا كلام ميس ! ولا علشان اشتاقت لفهد ؟
سؤال معندهاش اجابه عليه ابدا ……
فهد كان داخل مكتبه الصبح وسالي وقفته في الطرقه وبتتكلم معاه وبتحب جدا تقرب منه وهو يبعد
فهد : لاحظي اننا في الطرقه واغلب الموظفين عينهم علينا
مسكته من الكرافت بدلع : غيرانين
فهد شد الكرافت بتاعه رجعها مكانها بهدوء : ده ما يمنعش اننا هنا في مكان شغل يا سالي
سالي : حبيبي ….
كانت بتتكلم كتير بس فهد عنيه مركزه مع حد وراها واخدت بالها انه مش معاها نهائيا .. بصت وراها وهنا لمحت جميله داخله معاها عكاز واخوها وليد ساندها وكذا حد من الموظفين اتلموا حواليها بيسلموا عليها ويستقبلوها .. بصت لفهد فعنيه فعلا مركزه مع جميله وحركاتها ..
سالي بغيظ : فهد ؟
فهد بصلها : هاه ! قولتي حاجه !
سالي شدته : قلت تعال ندخل المكتب طالما نظرات الموظفين مضيقاك
فهد بص لجميله مره تانيه واتقابلت عنيهم وده اللي هو كان مستنيه .. نظرتها اللي وحشته جدا .. الدفء اللي بيحسه في عنيها .. بس سالي ماسكه دراعه واضطر يدخل معاها مكتبه
سالي رزعت الباب وهو بصلها وهو بيقعد علي كرسيه: بترزعي الباب كده ليه !
سالي : انت بتبصلها كده ليه !
فهد : مين دي ؟
سالي : لو سمحت ما تستعبطش عليا
فهد اتنهد : عايزه ايه يا سالي علي الصبح ! ومين دي اللي ببصلها اصلا !
سالي خبطت بايدها علي مكتبه : جميله هو في غيرها !!
فهد بمنتهي الهدوء : جميله !!
سالي : تنكر انك بصتلها !
فهد : واحده داخله بعكاز واخوها ساندها والموظفين اتملوا فطبيعي بصيت ناحيتهم وبعدين دي موظفه عندي وموظفه مهمه كمان وميس صدعتني في اليومين اللي غابتهم فطبيعي ( علي صوته ) لما تدخل ابصلها وطبيعي كمان اهتم بيها اللي مش طبيعي بقي انك انتي حتي النظره بتضايقك فده اللي مش فاهمو ولا عارفله سبب اصلا .. ودلوقتي بعد اذنك ورايا شغل وعندي ميتنج لازم احضرله قبل ما اروحه
فتح اللاب بتاعه وبصله وهيا بغيظ سابت مكتبه وراحت لميس
ميس : مالك علي الصبح ؟
سالي : الزفته دي جت النهارده
ميس : زفته مين ؟
سالي : هتعمل زي ابنها وتقولي مين ! في كام زفته في الشركه هنا وجودها بيضايقني هاه ؟
ميس بصتلها : تقصدي جميله ( ابتسمت ) جميله جت النهارده
سالي : ما تقوليش انك انتي كمان فرحانه بمجيها
ميس وقفت : طبعا انا اللي كلمتها وطلبت منها تيجي .. لازم استقبلها
خرجت وسالي هتولع في نفسها وفي الشركه كلها ..
ميس راحت لجميله ورحبت بيها وفهمتها عايزه منها ايه وبعتتلها مني بكذا ملف وبشغل كتير جدا لدرجه ان جميله حست انها غلطت برجوعها وهيا لسه تعبانه ..
مني قعدت معاها وجابتلها كرسي تفرد عليه رجلها وهيا قاعده .. وقت الغدا مني نزلت تتغدي وتجيب اكل لجميله معاها .. اغلب المكاتب فاضيه ..
فهد كان راجع من الميتنج وداخل لاحظ ان كل المكاتب فاضيه لان دي استراحه الغدا وقبل ما يفتح مكتبه اتراجع وراح لمكتب جميله .. خبط علي الباب خبطه واحده ودخل كانت رجليها الاتنين علي كرسي قدامها وهيا راسها لوري ومغمضه عنيها الاتين لدرجه انه افتكرها نايمه .. لحظات بيبصلها واتمني يقرب منها بس فضل واقف مكانه
جميله مغمضه : اخيرا جيتي بالاكل !! هموت من الجوع يا بنتي
فهد ما ردش ف جميله فتحت عنيها واتفاجئت بيه : سوري كنت فاكراك مني جايبه الاكل !
فهد : للدرجه دي جعانه !
جميله : فوق ما تتخيل
فهد ابتسم :عامله ايه !
جميله : كويسه وانت !
فهد : كويس
صمت بينهم قطعه فهد : لو عايزه تروحي روحي
جميله ابتسمت : مامتك محوشالي شغل ايه ! حاجه كده فله
فهد ابتسم : لو تعبانه روحي
جميله : لا انتو بس اكلوني وانا هكون ميه ميه
فهد : هبعت اجيبلك اكل
جميله بابتسامه : مني هتجيب من تحت
فهد : وانا بقولك هبعت اجيبلك اكل
جميله فكرت للحظه : عايزه بيتزا .. جبنه كتير وزيتون كتير .. بالفراخ .. بيتزا هت مش اي بيتزا ومعاها فانتا تفاح اخضر
فهد بصلها كتير وهيا كمان بصاله وبتسأل نفسها يا تري ممكن يجيب فعلا طلبها ولا هيا زودتها قوي !! احساس غريب جواها انه ممكن ينفذ اي حاجه تطلبها .. مش عارفه وبصاله وهو ساكت ومش فاهمه حاجه من نظراته … كان واقف قصاد الباب اللي اتفتح فجأه وخبطه في دماغه وجميله ضحكت ومني داخله واتفاجئت انها خبطت فهد بنفسه بفتحتها للباب
مني : انا اسفه جدا جدا
فهد ايده علي دماغه : حصل خير ( كان خارج ) بس تاني مره خبطي قبل ما تفتحي اي باب
مني : اسفه يا افندم جدا
فهد خرج وسابهم بدون اي رد ومني دخلت باحراج
مني : فهد بنفسه هنا ! وانا خبطته .. كويس انه ما رفدنيش فيها
جميله علشان تتوه مني وما تخليهاش تسأل عن وجود فهد معاها : اهمم .. كان بيسأل علي ملف .. الناس دي فاكرانا الات ولا ايه !! مش ملاحظين اني تعبانه .. امه تجيب عشرين ملف وهو عايز شغل ايه مفيش رحمه خالص
مني : يا ماما دول مش بيعتبرونا اصلا بني ادمين زيهم المهم .. جبتلك ساندوتش هاتكلي ولا ايه ؟
جميله ابتسمت : خليه دلوقتي .. تعالي نكمل الملف ده علشان فهد عايزو الاول
مني قعدت واشتغلوا الاتنين ونص ساعه بالظبط الباب خبط ومني فتحت
مني : احنا مش طالبين بيتزا
جميله : خليه يدخل يا مني
مني باستغراب : انتي طلبتي !! طيب مش كنتي تقوليلي مكنتش اتغديت !
جميله : وليد قالي الصبح انه هيبعتلي وانا نسيت خالص دخليه بقي
دخل بتاع الديليفري : بيتزا بالفراخ .. اكسترا تشيز واكسترا زيتون .. و واحد فانت تفاح مظبوط كده يا افندم
جميله ابتسمت : مظبوط .. حسابك كام !
الديليفري : كله واصل يا افندم حتي التيبس بتاعي واصل .. بالهنا يا افندم بعد اذنكم
خرج وسابهم وجميله مبتسمه جدا
مني : ما تجوزيني اخوكي يا بت انتي .. ده كيوت قوي
جميله ابتسمت وماردتش وفكرت في فهد اللي في مكتبه مبتسم هو كمان واتمني لو يشوف جميله دلوقتي ويشوف رد فعلها ايه !
جميله اتمنت لو تقدر تاخد العلبه وتروح مكتب فهد وتاكل معاه هو ..
مني ميس كلمتها وطلبت منها تروحلها
مني وقفت
جميله : رايحه فين !
مني : ميس وسالي عايزيني .. انتي لازم تخفي بسرعه كنت بطلت انا المشواير بتاعتهم دي .. سيبلي حته ..
جميله : خدي طيب دلوقتي
مني : ما انا شبعانه للاسف .. لما ارجع سيبيلي انتي بس حته واوعي تكوني طفسه وتاكليها
مني سابتها وجميله بصت للعلبه كتير واترددت .. ماسكه تليفونها ومتردده .. فاتحه الواتس علي اسمه وكتبت الرساله ومش قادره تبعتها .. والاخر داست علي ارسال
فهد موبيله اعلن عن رساله وفتحها
(( البيتزا وصلت في انتظارك ))
هو كمان تردد كتير يعمل ايه ! طيب ميس وسالي !! هيفسر ازاي اكله معاها !!
طيب يقولها ايه ؟ يرفض ؟ يقبل ؟ اي مش عارف يعمل ايه ؟ فبعت رساله
(( الاجواء لا تسمح ))
جميله استغربت ازاي الاجوا لا تسمح ؟ مين اللي معاه ؟ ممكن يكون قصده علي مني ! لازم تعرفه انها مش موجوده .اترددت بس طالما بدئت يبقي تكمل للاخر
(( ازاي وميس وسالي بره وطلبوا مني وراحتلهم بره الشركه ))
فهد ابتسم وراح وجميله باصه لموبيلها منتظره الرد بتاعه واتفاجئت بالباب بيتفتح وهو واقف مبتسم
فهد : نعم
جميله : البيتزا هتبرد
فهد : دي ليكي انتي بما انك تعبانه وبعدين عمتك من كام يوم اكلتني
جميله كملت : فانت بتردها معايا ماشي هقبل المبرر ده .. ممكن تشاركني قبل ما مني ترجع او اللي معاها يرجعوا ؟ ولا ده طلب كبير !
فهد قعد قصادها وهيا ابتسمت وفتحت العلبه وناولته قطعه وهيا اخدت واحده : بسم الله يالا
حاولت تفتح الكانز بس استعبطت وعطتها لفهد يفتحها وفتحها وعطاهلها وهيا حطت فيها الشاليمون واخدت منها وناولتهالو وهو بصلها كتير مش فاهم هيا عايزه ايه او قصدها ايه ؟
فهد : ايه !
جميله : ايه اللي ايه ؟ اشرب
فهد : مش عايز
جميله : مش عايز ولا علشان انا شربت منها وانت مش متعود تشرب مع حد
فهد فعلا مش متعود يشرب مع حد ومش عارف ازاي يرفض بالذوق
جميله فجأه : امسك
فهد بتلقائيه مد ايده واخد منها وشرب وهيا ابتسمت ..
فهد : هتروحي ازاي ؟
جميله : انت هتوصلني
فهد بصلها وابتسم : انا !! الظاهر اني غلطت في موضوع الاكل ده
جميله ضحكت : اه غلطت وهتدبس في توصيلي
فهد عجبته ضحكتها جدا : غلطه مش هتتكرر
جميله بتمثيل : لا انا كده اعيط .. دي اجمل غلطه انت غلطتها من ساعت ما دخلت الشركه دي .. خلاص يا سيدي ما توصلنيش .. كفايه عليك النهارده الاكل مش هكون طماعه .. هقبل بقليلي منك
فهد بصلها : بجد !
جميله : بجد ايه ؟
فهد : هتقبلي بالقليل !
جميله مش عارفه قصده ايه بالظبط ؟ وايه اللي يقصده بالقليل
جميله : انا عمري ما كنت طماعه ابدا .. برضي باللي ربنا كاتبو ديما وعارفه وواثقه ان له حكمه في كل شييء بيحصل
فهد : طيب وايه حكمته في انك مثلا تتعوري بالشكل ده !
جميله بصتله : يمكن علشان اعرف ان انت عكس اللي بتظهره ديما .. في جواك انسان مستخبي .. ولو جرحي ده هو التمن فانا مبسوطه جدا بيه
فهد وقف وبصلها : للاسف جرحك طلع علي الفاضي .. انا مدير شركه ومسؤل عن كل الموظفين هنا ولو اي حد طلب طلبك ده كنت هنفذه برضه ليه !!
سابها وخارج وقبل ما يقفل الباب : لو عايزه حد يوصلك بلغيني هخلي السواق يوصلك لباب البيت
جميله بصتله بزعل : لا متشكره .. هتصرف ما تشغلش بالك
خرج من عندها وهو متضايق من نفسه انه ضايقها بس في نفس الوقت مبسوط جواه من كلامها …
سالي رجعت ودخلت عند فهد بترغي كتير وهو مش مركز معاها
سالي : هاه قولت ايه !
فهد فاق: في ايه ؟
سالي : تعال نتغدي مع بعض !
فهد بعدم تركيز: لا اكلت
سالي : اكلت ايه !
فهد : بيتزا .. بقولك ايه انا عندي مشوار كده لازم اعمله سلام
سالي : استني
فهد : نعم يا سالي
سالي : نتعشي مع بعض طيب؟
فهد : اوك
سالي : طيب خلص مشوارك وتعال علي الفيلا عندي
فهد : اوك سلام
سابها وخرج وهيا قامت وهيا بره خبطت في مني اللي ماسكه علبه بيتزا وبتاكل منها وسالي بعد ما كانت ماشيه وقفت
سالي : منين البيتزا دي ؟
مني : كانت جايه لجميله وكانت جايه سخنه بس حضرتك وميس هانم طلبتوني فباكلها بارده
سالي : يعني دي جت لجميله قبل ما انتي تقابليني !
مني : ايوه
سالي : هو فهد راح لجميله المكتب النهارده ؟
مني باستغراب : اه لما رجعت من الغدا كان هو في مكتبها بس خير في حاجه !
سالي سابتها ومشيت متغاظه وعندها يقين ان فهد اكل مع جميله وعلشان كده رفض غداها هيا …
فضلت سالي في مكتبها منتظره ودماغها بتخطط مليون خطه وخطه ومش عارفه ازاي تشفي غليلها من جميله …
الكل مشي وسالي منتظره جميله تمشي لاحسن فهد يرجع ويفضلوا لوحدهم تاني
قاعده مراقبه مكتبها ومنتظراها تمشي فجأه ضربت في دماغها فكره ونزلت تحت بسرعه وطلبت من الامن يمشوا خلاص وهيا رجعت تاني .. وانتظرت
جميله خلصت وطلعت بره مكتبها ووقفت علي الاسانصير وداست مفتاحه كذا مره بس شكله عطلان او متعلق ..
جميله : يا الله .. هنزل ازاي انا الخمس ادوار دول .. ربنا يعيني
راحت جميله بعاكزها ناحيه السلم وبصتله من فوق وحست بهيبه كده .. مش متعوده تنزل السلالم في وقت زي ده والمكان كله فاضي .. كام مره قررت انها مش هتتأخر تاني ولا تفضل للاخر كده !! هيا بتحط نفسها في المواقف دي .. ( انتي قويه يا جميله ومش اي شيء يهزك دول يدوب كام سلمه مش اكتر ))
بدئت تنزل ويدوب نزلت دور حست بحد وراها فبصت كانت سالي
جميله : كنت فاكره اني لوحدي هنا .. خضيتيني
سالي ساكته وبصالها بغضب
جميله : في ايه ! حضرتك متضايقه من حاجه !!
جميله ظهرها للسلم وباصه لسالي اللي واقفه قصادها
سالي : مجرد وجودك مضايقيني .. انتي مضايقاني
بغيظ زقتها بس جميله محفظتش توازنها ووقعت لوري .. سالي كانت هتمد ايدها تلحقها بس اترددت وجميله وقعت السلم واتدحرجت كتير لحد ما استقرت في الدور اللي تحت ..
سالي نزلت جري بصتلها بس جميله مش بتتحرك .. اخدتها جري وسابتها
فكرت تتصل بميس او فهد .. بس فجأه فكرت بعقلها .. ممكن تموت وتخلص منها .. الكل هيقول انها وقعت لان عكازها خانها .. محدش هيعرف ان لها دخل ابدا .. هيا متوتره ليه كده .. ماتت !! في داهيه تريحها ولى ما ماتتش مش هتتجرأ وتتكلم .. وبعدين مين هيصدقها .. الامن نفسه شافوها نازله لما مشتهم وهيشهدوا ان سالي مشيت بدري .. اتنهدت وخرجت بهدوء من الشركه ونسيت تشيل الكراسي اللي حطتهم توقف بيهم الاسانصير خرجت وخطوتين واتفاجئت بوليد
وليد : اسف لو كنتي اتفاجئتي بس كنت جاي اخد جميله ومش بترد عليا
سالي : جميله !! محدش في الشركه خالص انا لسه نازله .. الشركه كلها ظلمه اكيد مشيت مع حد اعتقد ان ميس اخدتها معاها وهيا هتوصلها بنفسها
وليد باستغراب : ميس هانم !!
وليد شكرها ومشي بسرعه علشان يلحق يروح قبلهم يبلغ ابوه وعمته محدش يقابل ميس لو جت مع جميله وينبههم …
فهد راح لسالي البيت زي ما اتفقوا وسالي كانت مجهزه قاعده في الجنينه ليهم في جو المفروض انه رومانسي بس فهد مخنوق جدا بس مستحمل يقعد ويتعشي معاها ويمشي باي حجه قعدت قريبه منه جدا .. كان في طبق فاكهه علي تربيزه صغيره جنبهم ..
سالي : عايزه احس اني خطيبتك .. عايزه اكون زي باقي البنات
فهد : وانتي ايه اللي ناقصك علشان تكوني زيهم
سالي : حبك
فهد : سالي انتي عارفه اني ماليش في قصه الحب دي ولا في الرومانسيات والكلام ده وده مش غريب عنك
سالي : مش انت مالكش سيبني انا بقي اعمل اللي انا عيزاه
فهد بضيق : اعملي يا ستي اللي انتي عيزاه
سالي ابتسمت وقامت قعدت علي رجليه وهو دور وشه بعيد بس هيا رجعته تاني وبصتله واخدت عنبه من الفاكهه وحطتها في بوقه : تسمحلي أأكلك ؟
فهد كان هيقولها لأ وانه مبيحبش الحركات دي ولا حد يأكله بس اتراجع هيا برضه خطيبته وهو بيهملها تماما …
قربت منه قوي تلمس شفايفه
سالي : مش بحب دقنك طويله .. احلقهالي علشاني انا ..
فهد : ان شاء الله
سالي : ينفع كده تشوكني
فهد اخد نفس طويل بنفاذ صبر : طيب ابعدي لحد ما ابقي احلقها ايه رأيك ؟
سالي : لا طبعا انا مصدقت انك معايا ولوحدنا
قربت شفايفها منه وهو باصصلها جامد وبيفكر ازاي يبعد وباي سبب .. افتكر لما باس جميله غصب عنها .. افتكر دقه قلبه وتوتره وهو معاها .. افتكر قربها منه .. ريحتها .. انفاسها .. اتمني ان اللي معاه دي تتحول لجميله واستغبي افكاره وحس بغضب جواه كبير …
لمست سالي شفايفه وموبيله رن فبعد عنها
فهد : الموبيل
سالي : اقفله
فهد بصلها وبيفكر …..
جميله فاقت كانت الدنيا ظلمه جدا .. حاولت تتعدل مقدرتش .. مش شايفه اي حاجه حواليها .. دموعها نزلت .. الخوف سيطر عليها .. خوف من مجهول .. حاولت تقف بس الالم في رجلها اكبر من انها تتحمله .. حسست بايدها علي رجلها بس ما استحملتش تلمسها وحست بالبروده .. معني كده ان رجلها بتنزف من تاني ..
عيطت من قلبها .. حسست بايدها حواليها لازم تلاقي شنطتها … لقتها وطلعت موبيلها
وفتحته .. بصت حواليها .. الخوف والرعب سيطروا عليها .. مفكرتش غير في فهد وبس اتصلت بيه وبتدعي انه يرد عليها ….
……………………
@ مش انت وليد نصّار ؟ يالا هنرجعك بلدك
حد شده من ايده وخرج وهو مش فاهم حاجه وكل الي فكر فيه هو جميلته وبس .. بقي ممكن يشوفها من تاني ! فاق من افكاره علي صوتها بتكلم حد تاني
@ انت فين انا معايا الهدف امنولي طريق الخروج بسرعه ..
باب اتفتح قدامها وشدت وليد ودخلوا لمكان تاني
وليد : ده مش طريق الخروج وبعدين انتي مين ؟
آسيا : انا اسمي آسيا وده طريقنا هفهمك كل حاجه بس نخرج من هنا الاول ..
دخلوا مكان تاني ووليد وراها ومره واحده وقفته : استني هنا وخليك ورايا
آسيا اتكلمت في السماعه اللي في ودنها : انا في المكان المظبوط
هنا الارض حصل فيها انفجار مكتوم واتعملت فتحه في الارض وحد من تحت
@ انزلوا يالا بسرعه
آسيا شاورت لوليد : يالا انزل وصاحبي هيساعدك
وليد نزل وبعدها آسيا نزلت
@ حمدالله علي سلامتك يالا نخرج من هنا بقي قبل ما حد يعرف مكاننا
خرجوا كلهم وفي حاله من الصمت لحد ما وليد اتكلم : انتو مين وواخديني علي فين ؟
آسيا : سوري معرفناكش بنفسنا انا زي ما قلتلك آسيا وده اياد .. وهنقابل حد تالت دلوقتي واسمه اريان
وليد : برضه انتو مين ؟
اياد : احنا المخابرات المصريه.. وجايين نرجعك بلدك
وليد زعق : مخابرات !! وكنتو فين من عشرين سنه !! كنتو فين ؟؟
آسيا : انت كنت ميت بالنسبه للكل يا وليد بيه ولما وصلنا خيط واحد انك عايش جرينا وراه وجبناك .. اسفين علي تأخيرنا بس مش بايدينا
وليد سكت وبص بعيد من الشباك الف الف سؤال جواه ..
اياد : هناخدك علي بيت امن وبعدها ان شاء الله هننزل مصر علي طول
وليد بصله وماردش .. مش مصدق اصلا انه خرج من سجنه …
……………
فهد مع سالي اللي رافضه انه يطلع موبيله ويشوف حتي مين بيتصل بيه ..
فهد : سالي اذا سمحتي .. علي الاقل اشوف مين بيتصل ..
طلع موبيله ولمح اسمها واتوتر وفكر ما يردش بس هيا مش هتتصل بيه الا لو في حاجه وحاجه مهمه كمان ..
سالي جت تبص بس هو وقف : لحظه
فهد : الو ايوه
جميله برعب مخلوط بعياط هيستيري : فهد
فهد اول ما سمع صورتها اتحرك بسرعه وماشي من عند سالي : في ايه ! انتي فين !
سالي : انت رايح فين !
فهد شاور بايده وجري تقريبا مش مشي من عندها وسالي مستغربه : ياتري مين وقاله ايه خلاه مشي كده ؟؟وممكن يكون له علاقه بجميله واللي حصلها ؟؟ اتوترت وخافت
فهد : ردي عليا يا جميله انتي فين ؟
جميله : في الشركه .. تعال بسرعه .. ارجوك
فهد : انا في الطريق .. اهدي بس .. الدنيا نور عندك ولا ظلمه ؟؟؟
جميله : ظلمه
فهد لعن في سره : طيب ما تخافيش انا في اقل من دقيقتين هكون عندك .. اتكلمي معايا وما تخافيش … كلميني ..
جميله عيطت : تعال
فهد : جميله .. جميله انا معاكي ما تخافيش .. انا اهو قربت منك ..
جميله بتعيط عياط هستيري وفهد هيتجنن ومش عارف يعمل ايه غير انه يدوس بنزين وطاير بعربيته وبيحاول يهديها الي انه مش عارف وهيا مرعوبه
فهد : جميله انا وصلت وداخل الشركه انتي فين بالظبط ؟
جميله : في الدور الرابع علي السلم
فهد وصل للاسانصير بس اتفاجيء انه متعلق وفي كرسي في كل اسانصير معلقو علشان ما يفتحش .. فهد شال الكراسي ودخل الاسانصير وطلع للرابع ودخل ونادي جميله انا هنا
جميله بصوت ضعيف : انا هنا
فهد جري عليها وهنا هيا انهارت بين يديه وعيطت اكتر من ما كانت بتهيط وهو ضاممها قوي … عايز يدخلها كلها جواه وهيا ماسكه في هدومه بعنف وكأنها غريق واخيرا اتعلق بحد ينقذه ..
فهد : خلاص انا هنا .. خلاص اهدي
جميله بتعيط وجسمها كله متخشب وضامه جسمها كله .. فهد بيحاول يوقفها او يفردها الي انها متخشبه بين ايديه
فهد بخوف : جميله خلاص انا هنا معاكي .. اهدي بقي .. جميله بصيلي .. بصيلي
جميله بصتله وهو مسك وشها بايديه الاتين : انا معاكي خلاص .. انا معاكي ومش هبعد تاني انا معاكي
دموعها نزلت وهو مسحها وضمها لصدره وبيحاول يهديها : خلاص اهدي بقي
فضلت كتير بين ايديه وهو قاعد في الارض وضاممها وهيا بتعيط وبس
فهد : هاه خلاص هديتي
جميله مخبيه وشها في صدره : ينفع تخرجني من هنا ؟
فهد : يالا
حاول يوقفها بس صرخت : رجلي مش قادره
فهد نور علي رجلها ولقاها بتنزف فشالها براحه وهيا متعلقه في رقبته .. اخدها الاسانصير
جميله : مش شغالين الاتنين
فهد : شغالين ما تقلقيش
الاسانصير فتح وفهد دخل بيها
جميله : الاتنين مكنوش شغالين
فهد : عارف
خرج من الشركه ودخلها عربيته وقعدها براحه وقعد جنبها : هاخدك علي المستشفي الاول
جميله شاورت بدماغها موافقه
فهد اتحرك والاتنين ساكتين
جميله : متشكره انك رديت عليا وانك جيت بسرعه
فهد : عمري ما هتأخر عنك ابدا
جميله بصتله قوي وهو بصلها ومحدش اتكلم ابدا
وصلوا المستشفي وغيرت علي جرحها واخدها ومشي بصمت وهما في العربيه
جميله حطت ايدها علي ايده وهو بصلها : ينفع تجيبلي ميه !
فهد بص حواليه واول ما لمح سوبر ماركت وقف ونزل جابلها ميه وعصير وسقاها
كان راكن علي جنب وهيا بتشرب العصير وهو طفي العربيه وقعد في هدوء
فهد بهمس : ليه بتخافي قوي من الظلمه ؟
جميله فضلت كتير ساكته وهو سكت واحترم صمتها بس هيا قطعته : كان عندي سبع سنين و وليد كان عنده تسعه ، كنا عايشين بره مع بابا وماما اللي كانت تعبانه وقلبها ضعيف واصرت علي الخلفه وخلفتنا احنا الاتنين انا و وليد .. بابا سافر وسابنا لان عمتو كانت ساعتها في مشكله وماما تعبت جامد وماتت .. ماتت في سريرها واحنا صغيرين .. صحيتها مرضيتش تصحي مره بعد مره .. كنت كل شويه بيعيط ووليد بيحاول يسكتني او يألكني او يعملي اي حاجه ..
فهد : كنتو لوحدكم ؟
جميله : ايوه لوحدنا .. اخدنا يومين معاها وهيا ميته وانا ماعرفتش انها ماتت وانها مش هتصحي تاني بس وليد كان عارف كنت كل شويه ادخل احاول اصحيها وهو يخرجني بره ونعيط شويه ونسكت .. اول ليله عدت علينا المشكله كانت في الليله التانيه
فهد : ايه اللي حصل فيها ؟
جميله سكتت وكأنها بتفتكر احداث الليله : الكهربا قطعت ( سكتت كتير وهو اتمني لو يقدر يضمها ) قضينا ليله في الضلمه .. وليد وانا عيطنا في الليله دي كتير قوي وهو ضاممني في حضنه ومش عارف ازاي يسكتني لاني انا مرعوبه وهو مرعوب اكتر مني .. وبعدها هو نام لكن انا عنيا مغمضتش للحظه وخيالي بيهيألي وحوش كتيره حواليا كانت ليله مش قادره انساها ابدا .. مهما اوصفلك عمري ما هقدر اوصلك احساسي ابدا .. النهار طلع بصعوبه … جارتنا جت تسأل علي ماما وقولتلها واول ما دخلت وشافتها صوتت .. والجيران كلها اتلمت علينا .. واخدتنا عندها وكلموا بابا وبلغوه وجه علي اول طياره .. كنت ساعتها ساكته كتير وكانت جارتنا كل شويه تتكلم مع جوزها او عيالها وتقول اني اكيد اتلبست علشان فضلت مع حد ميت ..
وكل شويه تقولي ما تقعديش في الظلمه ابدا ما تبصيش في مرايه .. وتقول كلام كتير وتحكي حكايات عن عفاريت واشباح وده اللي زود هواجسي وخوفي ورعبي من الظلمه ..والمشكله انها حاولت تقنع بابا اني مش طبيعيه بس بابا مارضيش يمشي وري كلامها … حاول يقف جنبي بس كان معظم الوقت في شغله .. وانا معظم الوقت مع جارتنا اللي طول ما انا عندها بتشغل قرآن وتفضل كل شويه تسألني شايفه ايه وحاسه بايه وتولع بخور وتحكيلي حكايات كتيره عن الناس اللي اتلبست من عفاريت واتجننوا وبابا مهما يحاول الي انه خلاص الرعب اتمكن مني و الزعل اللي جوايا اتحول لرعب ..قضينا مع جارتي سنه بابا بيسيبنا عندها وجارتي مع الوقت اقنعتني تماما اني مش طبيعيه وبقي عندي يقين ان اي ظلمه فيها عفاريت واني لو ركزت في مرايه هيطلعلي عفريت .. بقيت بترعب وبس
فهد : طيب وعمتك كانت فين ؟؟
جميله : كان جوزها هيا كمان ميت ومكنتش عايزه تسيب بيته وكانت عايشه علي ذكراه ورافضه تسافر مع بابا ..
فهد : امال هيا بقت معاكم امتي ؟
جميله : لما حالتي ساءت وبابا عرف ان جارتي زودت الرعب اللي جوايا ساعتها نزل بينا اجازه عند عمتي وخلاها تشوفنا علي الواقع ومن ساعتها ما بعدتش عننا ابدا .. عوضتنا عن حنان امنا اللي ماتت بس للاسف مقدرتش تخلصني من عقده الظلمه
سكتت كتير وهو اتمني هنا لو يضمها ويقولها انه هيفضل علي طول جنبها ..
جميله ضحكت : طبعا هتقول عليا مجنونه ومش بعيد ترفدني من شركتك وتقول ما بنشغلش ناس ملبوسه
فهد ضحك : فعلا عندك حق .. هيا مش ناقصه عفاريت اصلا
الاتنين ضحكوا وسكتوا وساعتها فهد كمان اتكلم : جميله دي اللي قولتلك اني بكرهها تبقي امي الحقيقيه
جميله بصتله : ميس مش امك ؟
فهد شاور بدماغه : لا مش امي .. دي اللي ربتني
جميله : ومامتك فين ؟
فهد : باعتني لميس ومشيت
جميله سكتت بالعافيه لازم تكمل معاه فكملت بهزار : يعني انت في الاخر مش صاحب الشركه دي وانت حاله خيريه !!
فهد ابتسم : لا انا صاحب الشركه
جميله كشرت : لا انا كده مش فاهمه ! منين بتقول انك مش ابنها ومنين صاحب الشركه
فهد : ابويا وليد وهو اتجوز جميله وحبها وخلفني منها بس جميله دي كانت جايه تخلف وتقبض وتمشي بس طمعت في وليد بقي بشركته بكل ما يملك فبدال ما تمشي كوشت علي كله .. بس وليد وقع في مشكله ومات وهيا ساعتها حست انها خسرانه فباعتني لميس ومشيت هيا كمان وعلشان كده بكره اسم جميله
جميله كانت متغاظه جدا ونفسها تفهمه الحقيقه بس مش وقتها : هو اخد خطوه وهيا انه وثق فيها وهيا لازم تكسب ثقته التامه
جميله : وانت محاولتش تدور عليها !
فهد : ادور عليها ليه ! واحده باعتني واتنازلت عني اعمل بيها ايه ؟
جميله : مش يمكن يكون هيا لها وجهه نظر تانيه ! مش يمكن يكون في جانب تاني من الحكايه انت ما تعرفوش
فهد : اللي اعرفه انها باعتني من عشرين سنه وما ظهرتش تاني .. لو عايزاني كانت ظهرت .. لو ندمت كانت ظهرت .. لو بتحبني كانت ظهرت .. ده اللي اعرفه .. المهم اقفلي الكلام .. الموضوع ده مش هنفتحه تاني ونتكلم فيه تاني .. يالا وصلنا و وصلها بيتها وجميله اتصلت علي وليد اخوها ينزلها
كانوا منتظرين وليد ينزل ياخدها
فهد : ما قولتيليش .. انتي ازاي وقعتي
جميله : اقولك بدون ما تاخد اي رد فعل
فهد باستغراب : قولي
جميله : سالي زقتني
فهد بصلها : بتقولي ايه ! سالي ؟
جميله : انت مش هتعرف حد باللي حصل ولا هتعمل اي حاجه !! ولا هتعمل مشاكل
فهد : اخوكي وصل انزلي
ومشي بدون ما يطلع فوق مع انه كان عايز يشوف عمتها بس منع نفسه .. راح مشوار الاول وبعدها راح عند سالي اللي كانت منتظراه واستغربت انه رجع
فهد : مستغربه ليه ! مش هنتعشي مع بعض ولا ايه !!
سالي : لا هبلغهم يجهزوا العشا
فهد : هو انتي ما شفتيش جميله وانتي خارجه من الشركه !!
سالي وقفت وبصتله
بقلم / الشيماء محمد
رواية جميله الجزء الثاني للكاتبه شيمو
الحلقه السابعة عشر
فهد : مستغربه ليه ! مش هنتعشي مع بعض ولا ايه !!
سالي : لا هبلغهم يجهزوا العشا
فهد : هو انتي ما شفتيش جميله وانتي خارجه من الشركه !!
سالي وقفت وبصتله وبتردد : لا ما شفتهاش اشمعني
فهد بلا مبالاه : لا اصلها وقعت وهيا مروحه
سالي : وبعدين حصل ايه ؟ وانت عرفت منين ؟
فهد : التليفون اللي جالي .. المهم هيا كويسه يالا نتعشي !!
سالي قاعده مش علي بعضها وفهد ملاحظ ده جدا وبيتكلم في اي مواضيع
سالي : هو انت اللي رحت لجميله ولا ايه اللي حصل ؟
فهد بصلها : انتي مهتمه ليه بيها !! مع انه مش من عوايدك تتكلمي معايا عليها
سالي : مش حكايه مهتمه بس فضول
فهد : اممم فضول !! طيب هرضي فضولك اخوها اتصل بيا وانا قابلته عند الشركه واخدها وروح وبس كده
سالي : بس كده ؟؟
فهد : اه بس كده
سالي : طيب قالتلك ايه ؟
فهد : انتي عايزاها تقولي ايه !
سالي : انت ليه كل سؤال تجاوبني عليه بسؤال ؟
فهد : علشان اسئلتك غريبه انتي عايزه ايه منها ؟؟ بتسألي ليه كتير ؟؟
سالي : انا مش عايزه حاجه .. صح افتكرت هو انت اتغديت فين النهارده !!
فهد وقف بعد ما خلص اكل وبصلها وقال بهدوء مستفز : اتغديت مع جميله
سالي بصتله كتير : مين طلب البيتزا ؟ انت ولا هيا عزمتك !!
فهد : انا عزمتها تفرق معاكي !!
سالي قامت وراه : هو انت ليه مهتم بجميله !
فهد بصلها : وانتي ليه حطاها فوق راسك ؟ هل لانها اجمل منك ! ولا اذكي منك ؟ ولا ايه بالظبط ؟
سالي زعقت : مين دي اللي اجمل واذكي مني هاه ؟ الجربوعه دي ؟؟
فهد بهدوءه المستفز : لا لا لا .. صوتك العالي ده اكبر دليل اني كلامي جاي في الجون .. ده احساسك ناحيتها وعلشان كده انتي متضايقه منها .. حاسه انك مهدده من ناحيتها صح !! ديما بتعيبي علي امل انها معندهاش ثقه في نفسها وانتي طلعتي العن منها ومهدداكي حته موظفه علي الاقل امل انتي السبب في هزتها وانتي ليكي وضعك ومكانتك لكن جميله مقارنه بيكي ولا حاجه بس برضه حسستك انك قليله جنبها
سالي : انا مش هرد عليك يا فهد .. كلامك كله غلط بس انا اكبر من اني ارد عليه
فهد : اتمني ان كلامي يكون غلط لاني مش هتجوز واحده ما بتثقش فيا او في نفسها او تحس انها مهدده من اي حد ..
سابها ومشي ركب عربيته واتحرك ومره واحده وقف علي جنب وخرج بره عربيته مخنوق عايز … مش عارف هو عايز ايه ! طلع موبيله وفتح رقم جميله ومتردد … الوقت اتأخر .. يا تري نايمه ولا صاحيه !! طيب هيقولها ايه !! خلاص يرن رنه واحده كاطمئنان عليها .. لا طيب يكلم عمتها ومنها يسمع صوتها ومنها يطمن برضه علي جميله !! محتار بين الرقمين واخيرا رن
جميله امه شافت الرقم وردت بسرعه : الو ازيك يا ابني .. ما طلعتش اشوفك ليه النهارده ؟
فهد ابتسم : معلش كنت مستعجل .. انتي اخبارك ايه !!
جميله امه : الحمد لله طول ما انت بخير انا بخير
فهد استغرب حنيتها وغير الموضوع : جميله عامله ايه دلوقتي !! كويسه !!
جميله امه ابتسمت : اه يا حبيبي كويسه قالتلنا انك انت لحقتها بسرعه والله الواحد مش عارف يودي جمايلك فين !!
فهد : لا جمايل ايه ما تقوليش كده ..
جميله امه : لحظه هخليك تكلمها تطمن بنفسك
فهد : مش لازم انتي طمنيني عليها وخلاص خليها مرتاحه
جميله : لا لحظه بس
دخلت عمتها عند جميله وكانت نايمه قفلت المايك علشان فهد ما يسمعش
عمتها : جميله !! جميله اصحي
جميله : في ايه يا عمتو ! عايزه انام
عمتها : في فهد تكلميه ؟؟
جميله فتحت عنيها وبصتلها : هو فين ؟
عمتها ابتسمت : علي التليفون خدي
جميله اخدته من ايدها وردت : الو .. الو مفيش حد يا عمتو
عمتها : افتحي المايك علشان يسمعك
فتحته واتكلمت : الو
فهد : كنتي نايمه ؟
جميله : يعني
عمتها خرجت وسابتها تتكلم مع ابنها
فهد : طيب كملي نومك كنت بس بطمن عليكي
جميله : بس انت ما اطمنتش
فهد : ازاي ! مش كلمتك اهو
جميله : بس ما سألتنيش عن حالتي ايه او رجلي اخبارها ايه او نفسيتي عامله ايه ؟
فهد ابتسم : طيب حالتك عامله ايه ورجلك اخبارها ايه ونفسيتك عامله ايه !!
جميله ضحكت واسترخت في السرير : حالتي كويسه ورجلي الحمد لله زفت ونفسيتي نص نص
فهد فضل كتير يتكلم معاها ومعظم الوقت هيا اللي بتتكلم وهو بيسمع والمفروض بقي يقفل
جميله : علي فكره انا رغيت كتير جدا وانت ساكت جدا
فهد : ما اتعودتش اتكلم
جميله : ماشي طيب انا هسأل وانت جاوب
فهد : اوك
جميله : مالك بقي ؟
فهد : مالي ازاي يعني ؟
جميله : يعني ايه اللي مضايقك ! في حاجه خنقاك وده اللي خلاك تكلمني !! ( قلبتها هزار ) اصل انا عارفاك مش بتعمل حاجه لله في لله ابدا
فهد ابتسم وبص للارض : انا فعلا مخنوق
جميله : عارفه وحاسه انك مخنوق بس بسألك ليه !
فهد : تخيلي ان سالي عنيها في عنيا وبتكدب عادي جدا
جميله : فهد انا قلتلك مش عايزاك تاخد اي رد فعل
فهد : وانا معملتش رد فعل بس كنت عايز اشوف هيا هتكدب عيني عينك كده ولا مش هتقدر
جميله : وعرفت انها تقدر !! وعرفت ان ممكن يكون حد قريب منك قوي ويقدر يكدب عليك عادي !! علشان كده يا فهد قلتلك ما تحكمش ابدا من طرف واحد لازم تسمع الطرفين قبل ما تصدر قرارك
فهد : هو انا ليه حاسس انك مش بتتكلمي عن سالي !
جميله : انا بتكلم عامه يا فهد
فهد سكت شويه : تصبحي علي خير
قفل بسرعه قبل ما يغير رأيه وروح بيته دخل كانت جدته قاعده في اوضتها وهو دخل عندها وقعد قصادها
فهد : وليد كان انسان كويس صح ؟
نبيله شاورت بدماغها اه
فهد : اي واحده بتشوف ابنها كويس !! طيب جميله ! كانت كويسه ولا بتاعت فلوس
نبيله شاورت بدماغها وعنيها دمعت وفهد بصلها كتير وبعدها وقف : سوري يا جدتي بس مش فاهمك واللي انا فاهمو هو الحقايق اللي قدامي وانا قدامي حقيقه واحده…. ميس فضلت وجميله مشيت وبس تصبحي علي خير
سابها وخرج ودخل اوضته يفكر في كل اللي حصل النهارده .. كلامه مع جميله وذكريتها واتمني لو يقدر يمحيها من دماغها او يطمنها .. افتكر بعدها مشواره اللي راحه
فلاش باك
فهد : جهزت اللي طلبته منك
يزيد : جهزته اتفضل .. حددلي عايز ايه بالظبط واي وقت
فهد : عايز السلم الدور الرابع والساعه من ٥الي ٦
يزيد شغل اللاب وبدأ يمشي : طيب قولي ادور علي ايه
فهد : مشي بس لحد ما تظهر جميله او سالي
يزيد بيمشي لحد ما ظهرت سالي
يزيد : سالي اهي نازله في الاسانصير
فهد : تمام عايز اشوفها وهيا خارجه منه
يزيد : لحظه … اهي خرجت بره امشي ؟؟
فهد باستغراب : لا استني عايز اشوفها هتركب عربيتها فعلا ولا ايه !!
سالي اتكلمت مع رجاله الامن ومشيت كام خطوه وبعدها رجعت تاني و حطت الكراسي في الاسانصير
يزيد : هيا بتعمل ايه !!
فهد ساكت ومركز ومراقبها طلعت فوق
فهد : اطلعلي وراها عايز اشوفها هتعمل ايه
يزيد : اصبر عليا بس حاضر اديني اهو بتتبع خطواتها
فهد : جميله اهي عايز اشوفها ركزلي عليها
شافها قدام الاسانصير واتمني لو رجع الشركه وكان موجود ساعتها وراحت للسلم
فهد : بسرعه وراها
يزيد : والله حاضر ما تقلقش وبعدين ده ماضي يعني حصل خلاص فاهدي الشريط في ايدينا .. اهدي اهي نازله علي السلم
وبعدها ظهر وراها سالي ووقفوا قصاد بعض وبعدها سالي زقتها ووقعت علي السلم ويزيد وقف : دي وقعت ؟ هيا كويسه !
فهد : اه كويسه بس وريني سالي هتعمل ايه ؟
سالي شافتها ونزلت جري من جنبها والكاميرا مركزه علي جميله اللي باين انه اغمي عليها وفهد كان عايز يكسر الشاشه بس سيطر علي نفسه …
يزيد قفل الشريط وبصله وساكت
يزيد : انت كويس
فهد : ايوه كويس .. المهم عملت ايه في الموضوع التاني
يزيد : ماشي فيه .. يوم او اتنين بالكتير وهيكون عندك كل اللي طلبته
فاق فهد علي ميس بتخبط وداخله عنده
ميس : حبيبي هيا جميله فعلا وقعت ؟
فهد : اه وقعت
ميس : يعني هتيجي الشركه بكره لا ايه ؟
فهد بخنقه : هو ده بس طبعا اللي يهمك ! لكن وقعت ازاي ؟ او جرالها ايه ! او هيا حالتها ايه ؟ دي حاجات ثانويه بالنسبالك ما تعنلكيش شيء صح !! بقولك ايه معاكي موبيلها كلميها اسأليها بطلي تسأليني انا عنها
سابها وقام دخل الحمام لانه محتاج لشاور بارد يفكر فيه كويس ……
………………
الصبح آسر في الشركه وطلع موبيله وكلم مي
آسر / ايه الاخبار كويسه !
مي : انا الحمد لله ايه الجديد ؟
آسر : علاء في الشركه ونازل خلال نص ساعه
مي : طيب انا جايه سلام
آسر : است
قفلت قبل ما يتكلم وهو نزل جري من الشركه وفهد قابله : استني عايزك
آسر وهو بيجري : بعدين
فهد استغرب بس عادي .. راح مكتب جميله لكن فاضي وعرف انها مجتش ..
وليد كان في الفيلا مع نبيله وبيتمشوا في الجنينه وهو ساندها ..
قعدوا وعلية جابتلهم عصير علشان يريحوا شويه
علية بصتله بحب وهو ابتسملها
علية : علي فكره انت هنا في امان
وليد : قصدك ايه ؟
علية : قصدي ان نبيله هانم من انصار جميله مش ميس
وليد ابتسم : عارف
ونبيله استغربت وبصتلها
علية ابتسمت وطبطبت علي كتفها : هو يقولك اسيبكم انا بقي
نبيله بصتله ومنتظراه يتكلم وهو باصصلها
وليد : طيب قومي نكمل مشي وانا اقولك قصدها ايه
اخدها وبعدوا وقالها انه ابن اخو جميله وهيا فرحت بيه جدا وطبعا كلمته وفضلوا يرغوا كتير
نبيله : عايزه اشوفها يا وليد
وليد : هحاول حاضر .. ارتبها وتتقابلوا والله وهيا كمان عايزه تشوفك وتطمن عليكي
رجعوا وقعدوا ونبيله حذرته انه يعرف حد انها بتتكلم اتقاءا لشر ميس
وهما قاعدين جت ندي ومعاها امل اللي فرحت بوجود وليد جدا وفضلوا يتكلموا مع بعض وهو يشتغلها كل شويه ..
ميس شافت وليد بيهزر مع امل وبيضحكوا ونادت عليه : انت بتعمل ايه !
وليد ؛ بعمل ايه في ايه ؟
ميس : امل خط احمر فاهم
وليد : والله حضرتك مش هتحدديلي اتكلم مع مين ومين لأ !!
ميس : انت هنا شغال عندي
وليد : لا طبعا انا جيت علشان نبيله هانم مش علشانك انتي وشغلي معاها هيا
ميس : انت بتقبض مني انا
وليد : لأ برضه انا قبضت من فهد باشا ومن شغله هو وشركته هو مش من حضرتك بعد اذنك
سابها ورجع لامل واتفق معاها يقابلها بره بعيد عن عيون المتطفلين …
اما ميس فاتخنقت من امل وقررت انها تشوف عريس لها ياخدها بعيد عن وليد .. وليد بتاعها هيا وبس ومش هتتنازل عنه لحد تاني …
اسر فضل واقف بره الشركه منتظرها تيجي
وخايف عليها جدا .. اتلطع كتير في الشمس واخيرا شافها جايه واول ما قربت شدها ومشي بعيد وهيا مستغربه
مي وقفت : وبعدين
آسر : اتأخرتي يا هانم وهو مشي .. تعالي من هنا نفوخي ساح من الشمس
مي ضحكت واحساس غريب ناحيته بيتكون جواها .. اخدها وقعدوا في مكان يشرب حاجه ساقعه
آسر : مش هتقوليلي عايزه تقتليه ليه !
امل : احكيلي انت الاول عن نفسك
آسر حكالها عن حبه لسالي
امل : هيا فين دلوقتي.
آسر : اتخطبت لابن عمي ..
امل شهقت : طيب ليه وانت ؟
اسر : اختارت الاغني فينا والاوسم
امل بدفاع : انت وسيم برضه
آسر بصلها وابتسم وهيا اتحرجت منه ومن اندفاعها : يعني اقصد انك مش وحش يعني
اسر : ربنا يجبر بخاطرك بس انتي ما شفتيهوش وعلشان كده بتتكلمي
مي : ولو وبعدين الراجل مش بشكله .. طيب هو ازاي يوافق ياخدها منك؟
آسر : الحق يتقال هو ما يعرفش حاجه عن احاسيسي بالعكس هو كل يوم يسألني ايه اللي غيرني
مي : يعني مش من حقك تزعل منه ؟
آسر : فعلا مش من حقي
وبعد ما مشي من عندها راح وقعد مع ابن عمه يتكلموا زي الاول .. وفهد مستغربو جدا …..
فهد كان في مكتبه ودخلت عنده ميس
ميس : انا سيبتك امبارح ومرضيتش اتكلم بس ده مش معناه اني هسكت علي الطريقه اللي اتكلمت معايا بيها
فهد بزهق : يوووووه يا ميس .. عايزه ايه مني ؟ اعتذار مثلا ؟ حقك عليا
ميس : انت شايفني عيله هتضحك عليها بكلمه يعني ولا ايه !
فهد : يعني اعمل ايه !!
ميس : مش مسموح تتكلم بالطريقه دي تاني ولا تلمح كده تاني .. جميله مجرد موظفه هنا وبس وخلي بالك من النقطه دي كويس قوي
فهد : قصدك ايه بقي !
ميس : قصدي دي موظفه وبس يا فهد واوعي تنسي ده
فهد : خلاص عامليها انتي علي الاساس ده واعتبريها موظفه فعلا
ميس : انا عارفه ده كويس لكن انت بتعمل ايه ! ليه خوفك وقلقك ده عليها ! ليه خناقك مع سالي عليها ! ازاي تقارن سالي اصلا بيها ! هاه ! ولا انت ابن ابوك برضه يا فهد وهتعمل زيه ؟ هاه
فهد بتحذير : ميس !! انا غيره تماما
ميس : ولما انت غيره بتخلي واحده نكره تقف في وش خطيبتك وبنت عمك وشريكه في الشركه دي ليه ؟ بتخلي جميله قويه قصادها ليه ! ده نفس اللي عملو ابوك ! قواها واحده واحده لحد ما سيطرت عليه تماما وانت اهو ماشي علي خطاه
فهد : انا مش ماشي علي خطي حد .. ودلوقتي بعد اذنك ورايا شغل …
…………………
وليد : فات اسبوع بحاله واحنا هنا .. هنسافر امتي بقي ؟
آسيا : الدنيا مقلوبه بس هروبك وخروجنا حاليا مخاطره .. مش لازم نأمن الطريق قبل السفر ولا عندك استعداد يتقبض عليك تاني
وليد : لا الموت ارحم مليون مره من السجن
آسيا : يبقي تصبرلحد ما تتجمع مع حبايبك .. اوعدك اول ما احس ان خروجنا امان هنتحرك علي طول .. عارفه ان الصبر صعب وخصوصا بعد الفتره دي كلها بس معلش مقدمناش غيره
وليد : الكلام سهل انتي مش متخيله انا حاسس بايه ؟ ولا جوايا ايه ؟
آسيا : بالعكس انا حاسه بيك ومقدره جدا شعورك ده وعارفاه كويس
وليد بصلها : انتي اصغر من انك تفهمي انا بتكلم عن ايه !
آسيا : مين قال ان الفراق والوجع للكبار بس
وليد : انتي عايزه تفهميني انك دوقتي طعم الفراق !! افترقتي عن مين يا بنت العشرين ؟
آسيا : عن ابويا .. غاب عننا فتره طويله والكل قال انه ميت الا ماما كان عندها يقين تام انه هيرجع وعدت فتره طويله الكل بيتخانق معاها وبيعتبروها مجنونه لدرجه انهم اخدوها مستشفي للامراض العقليه وعلشان ترجعلنا انا واخويا كدبت عليهم وقالتلهم انه ميت وخرجوها ولما رجعتلنا قالتلنا بابا عايش بينا احنا بس وكنت بشوفها ازاي بتموت كل ليله وهو بعيد وازاي بتواجه يوم بعد يوم الناس لحد ما رجع بس للاسف رجع ناسينا
وليد : ناسيكم ازاي ؟ بطل يحبكم ؟
آسيا : لا الحادثه اللي اتعرضلها سابته فاقد للذاكره ولما رجع مصر رجع يقضي شهر عسل بعروسته الاسبانيه واتخيل بقي ماما والحب الكبير اللي بينهم لما جوزها يرجع بزوجه غيرها .. فلما اقولك اني جربت طعم الفراق وعارفه وجعك فأنا فعلا عارفاه
وليد : باباكي فين دلوقتي ؟
آسيا ابتسمت : في حضن مامي وبطل يطلع اي مهمات وفضل معاها
وليد ابتسم : يا تري جميله لسه مستنياني ؟
آسيا ابتسمت : لو حبكم حقيقي هتستناك
وليد : حتي لو كنت ميت بالنسبه للعالم كله ؟
آسيا : مش هتكون ميت بالنسبالها
وليد : بس هيا صغيره وحلوه والف مين يتمنوها
آسيا : وماما كانت صغيره وحلوه وعيلتها كل يوم يجيبوا عريس ويتخانقوا معاها علشان توافق بس وقفت وقالتها صريحه انا متجوزه وجوزي لو ميت بالنسبالكم فعايش جوايا فازاي اتجوز وانا متجوزه
وليد : وبعدين ؟ استسلموا ؟
آسيا : محدش بيقدر يقف في وش الحب ابدا .. الحب بينتصر في النهايه
وليد اتنهد : اتمني ان حبي ينتصر في النهايه
آسيا : اتمني
………………..
جميله بتلبس ونازله شغلها
عمتها : مش كنتي فضلتي يومين كمان بدال ما يجري حاجه تانيه ؟
جميله : لا كفايه يا عمتو .. بقالي اسبوع وميس هتتجنن وصراحه فهد بقاله كتير ما اتكلمش وخايفه تكون سالي وميس برمجوه من تاني ..
عمتها : ربنا يوفقك يا بنتي
وصلت الشركه واتقابلت هيا وسالي
سالي : اخيرا شرفتي الشركه !! ( همست في ودنها ))ابعدي بقي عن طريقي والا المره الجايه محدش عارف ايه ممكن يحصلك ؟
جميله همست : منتظره بفارغ الصبر اشوف ناويه علي ايه تاني ؟
سالي باستغراب : انتي بتحبي بقي الاذيه؟
جميله بدلع جنن سالي : لا بس بحب لهفه وخوف فهد عليا لما يجرالي حاجه ..( حطت ايدها علي بوقها كأنها وقعت في الكلام ) اوبس ولا مقالكيش انه هو اللي خرجني وشالني لحد المستشفي ووصلني لحد البيت
سابتها ومشيت وسالي عايزه تقتلها وبتفكر تخلص منها خالص
دخلت عند ميس اللي استقبلتها بفتور علي غير المعتاد
ميس : كويس انك رجعتي في اجتماع مهم خدي الملف ده وراجعيه مع فهد
جميله : مع فهد ؟ ليه ؟
ميس : من غير ليه نفذي وبس روحي وراجعي النقط دي مع فهد وبعدين ما اسموش فهد اسمه فهد بيه بالنسبالك
جميله ابتسمت بتكلف : اوامرك يا افندم بعد اذنك
اخدت الملف وراحت عند مكتب فهد واستقبلتها عبير بحب
عبير : انتي داخله لفهد ؟ ابلغه ؟
جميله : يا ريت ! هيا ميس زرابينها طالعه ليه ؟
عبير : بقالها كام يوم من ساعت ما اتخانقت هيا وهو والاتنين زرابينهم طالعه
جميله : ربنا يستر قوليله يالا بدال ما اتأخر
عبير بلغت فهد ان جميله عايزه تدخله
فهد سمع اسمها قلبه دق بتلقائيه وهو كره ده .. كره شوقه لها .. افتكر كلام ميس كله وعايز يرجع لطبيعته وشراسته معاها ..
فهد : دخليها
جميله دخلت بتعرج وهو لاحظ ده بس ما رفعش دماغه حتي يبصلها
جميله : يا ساتر علي الوش ده علي الصبح
فهد ما ردش عليها وبصلها واقفه علي الباب
فهد : نعم !
جميله استغربت بروده ده وحست انها رجعت لنقطه الصفر معاه ..
جميله : ميس هانم طلبت مني اراجع مع حضرتك الملف ده
فهد : اشمعني ؟؟ ومن امتي بتراجعي معايا انا الملفات ؟؟
جميله : والله ده نفس كلامي لوالدتك بس قالتلي انفذ وانا ساكته فأنا بنفذ اهو حضرتك عندك مشكله اتكلم معاها هيا !!
فهد سكت شويه : وريني ملف ايه اللي معاكي ده اصلا !
جميله قربت بتعرج ومثلت ان رجلها تعبانه فوق العاده وهو ركز معاها قوي وهيا حست باهتمامه وده عطاها امل انه موجود لسه ..
عطته الملف وهو هيموت ويسألها عن رجلها ووجعها بس كابر وسكت
قلب في الملف ورماه من ايده
فهد : نراجع فيه ايه الملف ده بالظبط ! مش فاهم انا هيا بتفكر في ايه ولا تقصد ايه ؟
جميله مسكت الملف وقلبت فيه وبعدها بصتله واتكلمت باندفاع : انت سمعت كلامهم ! لغيت شراكتك مع صلاح عبد الكريم ! طيب ليه ؟
فهد : وانتي مالك انتي ؟ وبعدين مش ده المشروع اللي كنتي بترصي العيوب بتاعته ولا نسيتي سيادتك ؟
جميله : ايوه انا ارص عيوبه لان ده شغلي بس من امتي انت بتسمع لحد !! ولا اه خلاص فهمت
فهد باهتمام : فهمتي ايه بقي حضرتك ؟
جميله بخيبة امل : فهمت اللي فهمته بقي ؟
فهد : بقولك فهمتي ايه ؟
جميله بنرفزه : فهمت ان ده رأي سالي خطيبتك مش هيا كمان رافضه المشروع وبما انها خطيبتك لعبت عليك واقنعتك !!
اعتقد كده مفيش حاجه نراجعها بعد اذنك
كانت خارجه وهو قام ووقف في وشها علي الباب : انتي بترمي كلام وتمشي وخلاص ؟
جميله : مش ده اللي حصل ؟ انكره بقي
فهد : لا مش ده اللي حصل وبعدين من امتي حد بيغيرلي رأيي هاه !
جميله بصت بعيد : اديك غيرت رأيك اهو
فهد : مش انا اللي غيرت رأيي
جميله بصتله : امال مين ؟
فهد رجع وقعد علي الكنبه : صلاح نفسه هو اللي جه وغير رأيه ولغي الشراكه بينا
جميله بصدمه : ايه ! لا طبعا ده لا يمكن ! انت بتنتشله من الافلاس ؟ ازاي ؟ الا اذا
سكتت فهو كمل : الا اذا ايه ؟
جميله : حد طلب منه واكيد مش بالذوق
فهد فكر شويه : قصدك ايه ! يجبره ؟ ليه وازاي ؟ وهيجبره بايه اصلا ! علي العموم الموضوع ده منتهي
جميله : ولما منتهي ليه ميس بعتتني ليك !
فهد فكر وفهم ان ميس عايزه تشوف بس رد فعله ايه لمقابلته مع جميله
فهد : ينفع اطلب منك طلب وتنفذي بدون اسئله !
جميله : لو اقدر هنفذ
فهد : تروحي دلوقتي عند ميس وتقوليلها اني طردتك من عندي ولما قولتيلي انك جايه بناءا علي طلبها برضه طردتني وقلتلي ولا يفرق معايا لا ميس ولا غيرها
جميله ابتسمت : اه تقوم هيا كمان طرداني من عندها صح !
فهد ابتسم : وانتي خايفه تطردي ؟
جميله اتوترت من قربه فبعد خطوه : اتعودت علي الشغل والناس هنا مش اكتر
فهد : وطلبتك ما وحشوكيش ؟
جميله : مش قوي
فهد : علي العموم ما تقلقيش ميس مش هتطردك ولو طردتك انا همنعها
جميله بصتله واكتفت بكلامه وماشيه من عنده والمره دي مقدرش ما يسألهاش
فهد : هيا رجلك لسه تعباكي ؟
جميله ابتسمت قبل ما تبصله : يعني لسه في الم بس اتحسنت كتير
فهد : طيب ما تحاوليش تتعبيها قوي
………………..
آسيا : يالا يا وليد هنسافر النهارده ..
وليد مكنش مصدق نفسه ابدا .. اخيرا هيرجع بلده من تاني … اخيرا هيرجع لحبيبته وابنه ….
وليد اخيرا بقي في الطياره اللي اتحركت بيه لمصر ونزل في المطار ودموعه نزلت غصبا عنه واتفاجيء بصوت وراه : حمدالله علي سلامتك في بلدك
وليد بصله وهو مش عارفو قرب منه ومد ايده يسلم عليه ويعرف نفسه : انا اسمي ادهم
وليد : اهلا بحضرتك
ادهم : تعال معايا
وليد : علي فين ؟ انا عايز ارجع بيتي
ادهم : انهي بيت !! وترجع لمين بالظبط !
وليد : لمراتي ولابني
ادهم : تعال بس معايا الاول علي الاقل تغير هدومك وتستعد ونتكلم الاول ..
وليد مشي معاه وادهم اخده بيته واول ما دخل ليلي استقبلتهم : هو ده !!
ادهم : اه هو .. غداكي جاهز ؟
ليلي : اه اتفضلوا
وليد : مع احترامي ليكم بس انا حاليا مش عايز اكل انا عايز اروح بيتي
ادهم ابتسم بتقدير : عارف بس بيتك مش زي ما انت متخيل وعلشان كده جبتك هنا
وليد بقلق : مراتي جرالها حاجه!! ولا ابني ؟؟
ادهم : الاتنين بخير اطمن .. يا ابني بس ادخل نتكلم كلمتين وتاكل لقمتين وهوديك بنفسي لحبايبك
وليد بتردد دخل واكل وقعد هو وادهم اللي اصر انه يغير هدومه قبل ما يوديه لحبايبه
وليد : اكلت وغيرت ممكن بقي تفهمني ايه اللي حصل وليه مش عايزني ارجع بيتي لمراتي ولابني ؟؟
ادهم : في حاجات كتيره حصلت هنا بعد اختفاءك يا وليد
وليد : حاجات زي ايه وانت مين اصلا !
ادهم : انا مدير المخابرات واللي انقذوك كانوا بنتي وابن اخويا اياد واريان ودول من اكفأ الظباط عندي
وليد : طيب انا متهم بحاجه !!
ادهم ابتسم : لا طبعا احكيلي انت اللي حصلك هناك وليه اتحبست ؟
وليد : احكيلك ايه بس ؟؟ ازاي شحنه اجهزه طلبتها وتطلع كلها مضروبه ولما اسافر اشوف ايه الوضع اتفاجيء بفخ معمولي هناك وعيلتي حاولي يقتلوني
ادهم : بس ده مش سبب لحبسك هناك ؟
وليد ابتسم بوجع : لا مش ده السبب ..
ادهم : امال ايه ! كان معاك اسرار عسكريه تخص امن البلد جبتها منين ؟؟
وليد : انت بتحقق معايا صح ؟ وعلشان كده رفضت تخليني اروح بيتي !! بس ليه محبستنيش زيهم وتستجوبني بطرقهم
هنا ليلي دخلت بعصير : ادهم بيستفسر منك استاذ وليد مش اكتر .. هو واثق في براءتك وعلشان كده بعت بنته بنفسها ترجعك بس لازم يفهم ده شغله برضه
وليد : انا طبعا متشكر جدا ليكم بس قدروا اللي انا حاسس بيه
ادهم : احنا مقدرين بس استحمل اسألتي
وليد : انا معرفش حاجه عن موضوع الاسرار ده ..
حكاله كل حاجه حصلت وضرب علاء له بالنار وخالد والفلاشه اللي عطاهالو
ادهم : اممم يعني الفلاشه دي اللي خالد عطهالك كان عليها الاسرار
وليد : وهو بيديهالي قالي دي ضمان لو فضلت عايش ما ترجعش تاني
ادهم بتفهم : وفعلا ما رجعتش تاني
وليد : بس اشمعني دلوقتي دورتو عليا ؟؟
ادهم : بسبب مكالمه تليفون والدتك سمعتها وشكت للحظه انك ممكن تكون عايش
وليد ابتسم : هيا دي امي .. لما بتحط حاجه في دماغها بتنفذها بس ازاي وصلتلك ؟
ادهم : ما وصلتليش .. وصلت لمديري السابق سليم باشا كان صديق قديم لها وهو كلفني
وليد : انا متشكر جدا ومش عايز ابان قليل الذوق بس انا عايز اشوف جميله وابني
ادهم ابتسم : اديني دقيقه هغير هدومي واوصلك لجميله
ادهم قام وطالع يغير بس وليد وقفه : هو انت ليه قلت هاخدك لجميله بس ما قولتش ابني !!
ادهم ابتسم : لان اعتقد مش هينفع تشوف ابنك دلوقتي
وليد: ليه هو مالو ؟ جراله حاجه ؟
ادهم : لا ابنك ماشاء الله مدير شركه نصّار للاجهزه وماسك مكانك وشبهك
وليد ابتسم : امال ليه مش هينفع ؟؟
ادهم : لانه حاليا هو ابن ميس مش ابنك او ابن جميله
وليد اتصدم : ميس ؟؟ ازاي ؟؟ يعني ايه ؟؟ فهمني
ادهم : اعتقد الافضل جميلتك تفهمك .. لحظه وهاخدك عندها
وليد : يعني جميله حاليا مش في الفيلا ؟؟
ادهم : لا جميله مش في الفيلا .. هوديك عندها
ادهم غير هدومه وليلي معاه : ادهم ارجوك خدني معاك
ادهم : اخدك معايا فين يا ليلي ؟
ليلي : لازم اشوف جميلته دي ولازم اشوف هيقابلو بعض ازاي بعد كل ده !!
ادهم ابتسم وبصلها : زي ما انتي قابلتيني لما رجعت من الموت
ليلي كشرت : كان في ايدك واحده تانيه ومعرفتش اقابلك اصلا
ادهم ابتسم : طيب حظك كان كده
ليلي : ادهم خدني معاك يعني اعتقد هو مش هيمانع
ادهم : بطلي زن بقي
ليلي : يووووه علشان خاطري بقي
ادهم اخدها قدام اصرارها وراحوا وطول الطريق وليد حاله من الصمت مسيطره عليه واخيرا وصلوا قدام البيت
ادهم : وصلنا يالا
وليد نزل معاه وطلعوا بخطوات تقيله
ادهم : دي شقتهم
وليد وقف قدام البيت شويه وادهم وليلي واقفين مدينه مساحه لما يستعد هيرن الجرس .. وليد اخذ نفس طويل وبص لادهم وليلي اللي ماسكين ايدين بعض
ليلي : يالا خبط خليك تشوفها
وليد ابتسم واتنهد ومد ايده علي الجرس ورن رنه
……………
آسر مع مي علي كافيه
مي : وبعدين هنفضل كل يوم نتقابل وانت مش بتقولي اي اخبار عن علاء !!
آسر : والله يا بنتي علاء مسافر من ساعه ما قلتلك راح عند عمه محسن بيجهزوا لمشروع ضخم الشركه هتقوم بيه
مي : طيب انت بتطلب تشوفني ليه ! ولا انت بتستغلني زي ماهو استغلني قبلك !
آسر وقف : انا بستغلك ! طيب يا مي طالما بستغلك قاعده معايا ليه !! اسف يا ستي مش هستغلك تاني .. بعد اذنك
جه يمشي بس مي مسكت ايده بسرعه : آسر مش قصدي اسفه انا مخنوقه وانت قدامي
آسر واقف ومتضايق
مي : خلاص بقي حقك عليا اقعد ..
آسر : انا اصلا ورايا شغل وهتأخر
مي : يوووه بقي يا اسر ما تحبكهاش قلتلك خلاص ..
آسر بصلها شويه : يبقي تثقي فيا وتحكيلي ايه اللي علاء عمله عايزه تقتليه علشانه
مي بصت للارض : مش يمكن لما تعرف ايه اللي عملو نظرتك ليا تتغير !! وتبطل تساعدني ! بلاش يا آسر خلينا اصحاب كده
آسر : مش انا عمر ما شيء ممكن يغير احترامي ليكي
مي اترددت وفضلت ساكته كتير واخيرا نطقت وبدئت تحكيله ازاي اتقابلوا واتعرفوا علي بعض وازاي استغلها وجوازهم العرفي واستغلاله لها وتصويره لها في اوضاع صعبه علشان يلوي دراع ابوها واسر بيسمع بجمود تام .. افتكر صلاح لما لغى شراكته مع فهد معقول ده فعلا السبب .. لا مش هيفكر في الشغل دلوقتي خليه في مي اللي قدامه مش معقول ان مي البريئه اللي قدامه دي ما تكونش بريئه ومش مصدق ان عمه تكون دي اخلاقه .. مصدوم من الناحيتين … وافتكر سالي وحس ان كل البنات نوعيه واحده .. وشوش مختلفه لكن في الاخر نوعيه واحده
مي سكتت وبصتله : قول اي حاجه يا اسر
آسر : عايزاني اقول ايه !!
مي بدموع بتهدد بالنزول : اي حاجه
آسر : معنديش حاجه اقولها يا مي وعندي شغل بعد اذنك
وقف وخرج بس مي وراه وشدته من دراعه وقفته : انت قلت ان نظرتك مش هتتغير واديك اهو
آسر زعق : ما تخيلتش اللي قولتيه ده كله .. ما تخيلتش انك متخلفه وسمحتي لحد يستغلك وتغلطي وبعدها جايه تلوميه علي غلطو اللي هو في الاساس غلطك انتي
مي تراجعت : غلطي انا يا آسر ؟؟
آسر : ايوه غلطك انتي .. الغلط راكبك انتي من ساسك لراسك يا مي
مي سابت دموعها تنزل : ازاي غلطي ؟ هو ضحك عليا !
آسر مسكها بعنف من دراعها : ضحك عليكي ! ليه وانتي متخلفه ولا عيله ! ده انتي كام شهر وهتتخرجي من الجامعه .. قال ضحك عليها قال ..
مي زعقت : ايوه ضحك عليا واستغلني وهو اللي غلطان وبس
آسر انفجر : هو اللي غلطان !! ليه وانتي غلطك فين يا هانم .. كان عقلك فين لما بصيتي لرجل قد ابوكي ! ولما قربتي منه وحبيته مكنش ده غلط ! واما خرجتي معاه مره بعد مره مكنش ده غلط ! بلاش كل ده ؟ لما قال نتجوز عرفي مكنش ده اكبر غلط ولا كان ضربك علي ايدك علشان توافقي ؟ ازاي واحده محترمه تقبل تتجوز بالشكل ده ! ازاي واحده عندها عقل توافق بعقد عرفي !! ازاي ؟؟ ازاي توافقي تدخلي شقه راجل غريب لوحدك ! وتتجوزيه لوحدك ! وبعدها جايه تعيطي وتقولي اصله استغلني ! فين الاستغلال ده ! انا مش شايف استغلال ! انا شايف بنت متخلفه وبقول متخلفه لاني مش عايز اسميكي بمسمي تاني لان اخلاقي ما تسمحليش اقوله قدام بنت ده اذا كنتي بنت اصلا
سايبها وماشي وهيا واقفه بتعيط مكانها وبعد ما مشي كام خطوه رجعلها تاني
آسر : وعلشان بس ما تقوليش اني استغليتك او اني كدبت عليكي انا اسمي آسر خالد نصّار ( مي بصتله بصدمه ) وعلاء نصّار يبقي عمي وخبيت اسمي عنك مش كدبا عليكي او استغلالا ليكي لا بس خوفا عليكي وعلي مستقبلك لاني للاسف اعجبت بيكي من اول ما شفتك وخبيت علشان اقدر احميكي من غباءك بس كان المفروض اسيبك لغباءك علشان يقضي عليكي واسيبك لعمي يفرمك لو وقعتي في ايده .. بعد اذنك …..
روح مخنوق وعايز ينفجر في اي حد وروح بيته قعد مع امه اللي بيرتاح في الكلام معاها ومع شويه ضغط منها حكالها كل اللي حصل
ندي : ظلمتها قوي يا آسر
آسر : انا ظلمتها يا امي؟ ولا هيا اللي غبيه
ندي : انت اصلا ما تعرفش عمك علاء يقدر يعمل ايه وطرقه ايه وازاي ممكن يأذي اي حد علشان مصلحته .. عمك علاء للاسف معدوم الضمير والأخلاق يا آسر وقادر يكون مفتري ويظلم
آسر : انتي ازاي بتحطيلها اعذار يا امي
ندي : لاني عارفه عمك كويس .. عمك مش بس ممكن يضحك علي واحده لا ده ممكن يقتل بدم بارد عادي جدا ومش بس عمك ده كمان
قاطعها صوت غاضب : كمان مين يا ندي هانم ! انتي بتقلبي ابني علي عيلته ولا ايه !
ندي اتوترت من دخول خالد عليهم
آسر : بابا انت
قاطعه خالد : انت تسكت خالص واتفضل سيبنا لوحدنا انا وامك
آسر بص لامه فشاورتله يخرج وهو خارج
خالد : استني بنت مين اللي تقصدوها؟ اللي عمك ضحك عليها ؟
آسر : بنت صلاح عبد الكريم وعمي استغلها علشان ابوها يفسخ شراكته مع فهد
خالد : وانت زي الاهبل صدقت .. روح واياك اسمع الكلام الاهبل ده تاني وخصوصا قدام فهد ما صدقنا اصلا الشراكه المنيله دي انتهت اتفضل …
اسر خرج وندي وقفت منتظره كلام خالد لها واتفاجئت بيه بيشدها من دراعها بعنف
خالد : قسما بالله يا ندي ادفنك بالحيا لو هتفتحي مواضيع قديمه .. احنا داخلين علي خبطه العمر والمشروع ده يتم وساعتها ولا اي شيء ممكن يفرق مع الواحد فاهمه ! انا مش ناقص غباء منك ولا من ابن اخوكي دلوقتي .. والا اقسم بالله لاخليه يحصل ابوه ويتحط في قبر جنبه .. الكل متوتر والكل منتظر المشروع ولو اي شيء او اي حد مهما يكون هيقف في وشه انتي عارفه مصيره فبلاش تكتبي علي ابن اخوكي الموت خليه يدخل دنيا الاول قبل ما نخرجه منها … اياك كلام اهبل تاني والا هسفرك بره واحبسك في اي مكان لحد ما المشروع يخلص فاختاري هتخرسي ولا تسافري ؟
ندي بصتله بكره : ربنا هينتقم منكم فاهم !! اوعي تفتكر ربنا غافل عن ظلمكم ده ده يمهل ولا يهمل ابدا وهفكرك يا خالد هفكرك
خالد : يتم المشروع بس الاول وبعدها ابقي فكريني …
……………..
جميله كانت في المطبخ وبتنادي اي حد يفتح :: وليد .. عماد .. محدش فيكم سامع؟
جميله الصغيره : هفتح انا يا عمتو لحظه
جميله : لا يا حبيبتي خليكي انتي انا هفتح .. خلي الرجاله دي قاعده كده
وليد : اوعي بقي يا عمتو هيجيبو جون ..
جميله زقته وراحت تفتح الباب وفتحت …
غمضت عنيها وفتحتهم مش مصدقه اكيد بتحلم لانه استحاله يكون ده وليد جوزها اللي قدامها … مجرد انه استحاله …
وليد :………
بقلم / الشيماء محمد احمد
رواية جميله الجزء الثاني للكاتبه شيمو
الحلقه الثامنة عشر
النهارده شيمو تعبانه جدا وبعتتلي الحلقه انا زوجها علشان انشرها ومع اني بلغتها تعتذر خالص بس رفضت وقالت ان الكل منتظر الحلقه دي بالذات .. دعواتكم ليها تقوم بالسلامه بسرعه …..
جميله كانت في المطبخ وبتنادي اي حد يفتح :: وليد .. عماد .. محدش فيكم سامع؟
جميله الصغيره : هفتح انا يا عمتو لحظه
جميله : لا يا حبيبتي خليكي انتي انا هفتح .. خلي الرجاله دي قاعده كده
وليد : اوعي بقي يا عمتو هيجيبو جون ..
جميله زقته وراحت تفتح الباب وفتحت …
غمضت عنيها وفتحتهم مش مصدقه اكيد بتحلم لانه استحاله يكون ده وليد جوزها اللي قدامها … مجرد انه استحاله … وقفوا قصاد بعض محدش فيهم قادر ينطق او يتكلم وكأنهم تماثيل اتحطوا قصاد بعض ولا هو قادر ينطق ولا هيا قادره حتي تتنفس .. معقوله بعد كل السنين دي جوزها قدامها .. حبيب عمرها كله ..
ليلي مسكت ايد ادهم وضغطت عليها جامد وكأنها هيا كمان حاسه بيهم وقلبها هيخرج من مكانه من انفعالها ….
وليد همس اسمها : جميله
سمعته … سمعته بقلبها وبجوارحها .. سمعت اسمها من بين شفايفه اللي يدوب اتحركت وهمست باسمها …
عماد جوه : وليد مين علي الباب وعمتك واقفه كده ليه !
جميله : لاحسن تكون ميس ؟
الكل وقف ورايحين ناحيتها
جميله علي الباب ولما وليد همس اسمها رجليها ما شالتهاش فوقعت من طولها بس وليد كان قريب منها وقطع المسافه بينهم في خطوه وبقت بين ايديه ……. واخيرا بعد غياب سنين طويله بقت بين ايديه ….
وليد ضمها قوي : جميلة عمري
طبعا وليد وعماد جريوا عليها بس كان جوزها اسرع منهم وهما اتصدموا بوليد اللي رجع من الموت والكل مصدوم واقف مكانه ووليد بين ايديه جميلته اللي ضماه قوي وهو كمان ضاممها قوي وقاعدين في الارض و وليد دفن وشه في رقبتها .. جميله بعدت وشها عن صدره وهو بصلها مسكت وشه بايديها الاتنين مش مصدقه انه قدامها .. مثبته وشه بايديها وبصاله
جميله بعياط : انت بجد هنا قدامي ولا انا بيتهيألي .. اتكلم
وليد : انا بين ايديكي
عيطت وضمته قوي قوي لصدرها وبعدت تاني
جميله : وليد انا مش بحلم صح !!
وليدابتسم بحب : مش بتحلمي يا اما انا وانتي بنحلم مع بعض
جميله مدت ايدها : طيب اقرصني في ايدي علشان اتأكد ان انا صاحيه
وليد ابتسم ومسك ايدها وباسها : حبيبة عمري انا قدامك اهو
باس ايدها وباس كل حته في وشها وهيا بتعيط وبتضمه قوي ليها
بعدت عنه وبصت لجميله بنت اخوها : انا مش قلتلك اني حاسه انه عايش مش ميت .. مصدقتينش وقولتيلي بيتهيألي … مش قولتلك انه عايش … عماد .. عماد وليد جوزي عايش انت شايفو صح !!
وليد ضمها قوي ووقف و وقفها معاه وهيا بين ايديه : انا موجود ورجعت ومش هبعد تاني ابدا يا جميلتي
جميله عيطت قوي : جميلتك .. قد ايه اشتقت للكلمه دي منك .. ( عيطت قوي ورمت نفسها في حضنه ) انا اشتقت لكل حاجه منك .. انا اشتقتلك كلك يا وليد … الحياه من غيرك كانت صعبه .. انا كنت ميته ما كنتش عايشه ابدا …
وليد ضاممها قوي : وانا مكنتش عايش يا جميله .. كانت انفاس بتدخل وبتخرج مش اكتر الحياه بتتحسب بالسعاده اللي بنعيشها مش مجرد ايام وبس بنقضيها
الكل حواليهم دموعه نزلت علي لقاؤهم الحار ده
جميله سندت علي اخوها وليد اللي مسح دموعه بسرعه علشان محدش ياخد باله ..
ليلي ضامه ادهم قوي وهو حط ايده حواليها بيطمنها انه مش هيبعد عنها
عماد مسح دموعه : جميله …. وليد مش واحشك انتي لوحدك
جميله بعدت عن وليد واخوها قرب و وليد ابتسمله وضمه بحب
عماد : نورت الدنيا كلها يا وليد .. رجوعك رجع الحياه لحياتنا ..
وليد : تسلم يا عماد .. انا كنت محتاج لرجوعي وسطكم اكتر منكم
وليد الصغير لمح ادهم وليلي : اتفضلوا انتو واقفين بره ليه ! اتفضلوا
ادهم : الموقف ده لازم الكل يقف احتراما له .. الحمد لله ان ربنا جمعهم مع بعض .. حمدالله علي سلامته
ليلي بصت لجميله اللي في حضن وليد : حمدالله علي سلامته ما تسمحيلوش يبعد عن حضنك تاني ابدا .. ( بصت لجوزها ) لانه بعد شويه هينسي وهيحاول يبعد تاني فانتي ما تسمحيلوش ابدا
ادهم : انا ما بعدتش تاني
ليلي : علشان انا ما سمحتش
وليد نصّار : اتفضل يا ادهم انت ومراتك ادخلوا
ادهم : مش وقته خالص يا وليد
وليد نصّار : انا مصر جدا اتفضل بس حتي تتعرف علي عيلتي الجميله دي ..
عماد اتدخل : اتفضل حضرتك اتفضل
ادهم وليلي دخلوا والكل اتجمع
وليد نصّار : عماد مش هتعرفني مين دول ؟
عماد ابتسم : عيالي جميله ووليد
وليد نصّار بصله قوي وابتسم : جميله ووليد هاه !
وليد قرب منه ومد ايده : كان نفسي بجد اتعرف علي الشخصيه اللي سمعت عنها كتير واتسميت علي اسمه ..
وليد نصّار حضنه قوي : ابوك راجل اصيل فوق ما تتخيل ..
جميله الصغيره قربت منه : انا سمعت حكايات كتيره جدا من عمتو عن حضرتك
وليد ضمها بدراعه كده : ما شاء الله عليكي واخده نفس جمال عمتك ربنا يحفظك
وليد نصّار : اعرفكم بضيوفي ده اللواء ادهم مدير المخابرات وهو السبب في اني هنا وسطيكم دلوقتي ودي دكتوره ليلي مراته
الكل رحب بيهم جدا
ادهم : احقاقا للحق مش انا بس السبب في حد نكش موضوعك وهو طلب مني وبناءا عليه انا اتدخلت
جميله :مين الحد ده ؟
ادهم بص لوليد: والدتك نبيله هانم .. (وليد ابتسم لذكري والدته ) هيا سمعت مكالمه وشكت انك عايش ولجأت لصديق قديم لها وهو مديري السابق اللواء سليم وهو اللي طلب مساعدتي وبناءا عليه اتحركت وعملت تحرياتي لحد ما وصلنالك
جميله : نبيله هانم شخصيه عظيمه جدا كان نفسي اشوفها بس مقدرتش
وليد نصّار : ليه مقدرتيش ؟ وليه صح فهد مش معاكي ؟؟ وليه انتي مش في الفيلا ؟؟ في الف ليه عندي يا جميله ؟؟
جميله ابتسمت : مش وقت كل الاسئله دي المهم دلوقتي انك رجعت .. هحكيلك كل حاجه بس سيبني اشبع منك شويه
جميله الصغيره : اه حضرتك اللي عالجتي مدام نبيله صح يا دكتوره ؟
وليد نصّار :عالجتيها ؟؟ عالجتيها من ايه ؟
ليلي : كان عندها ازمه قلبيه والحمد لله اتحسنت
وليد نصّار : ازمه ؟؟ طيب ودلوقتي صحتها عامله ايه ؟
ليلي : هيا اتحسنت كتير عن ما جاتلي المستشفي ودكتور وليد ( شاورت عليه ) بيعالجها علاج طبيعي في البيت والمفروض انها بدئت تتحرك اما الكلام مش عارفه ليه ما نطقتش لحد دلوقتي
وليد نصّار باستغراب : اتحركت ونطقت ؟؟ هيا والدتي مالها وفيها ايه ؟
ليلي : زي ما مراتك قالت مش وقته دلوقتي المهم انها حاليا كويسه د/وليد طمنه عليها
د/ وليد : هيا بتتحرك وبتتكلم كمان بس مخبيه ده عن الكل
وليد نصّار :مخبيه ليه انها بتتكلم ؟؟
د/ وليد : علشان ميس ما تعرفش
وليد نصّار :ميس ؟؟ ايه اللي رجع ميس تاني ؟ انا طلقت ميس من زمان ازاي رجعت تاني ؟
جميله مراته : حبيبي في حاجات كتيره قوي حصلت هحكيلك كل حاجه بالتفصيل .. ارتاح بس شويه وانا هقولك كل حاجه
وليد نصّار هدي شويه بس بص لليلي : هيا لما جاتلك حالتها كانت ايه بالظبط ؟
ليلي بصت لادهم اللي شاورلها بدماغه انها تحكي لوليد : هقولك بالظبط
حكتله حالتها كلها واتفاقها مع فهد وكل التفاصيل
وليد نصّار : برضه عايز افهم ميس ايه دخلها بكل ده ؟؟؟
جميله مراته مسكت ايده : اجابه سؤالك ده عندي بس مش دلوقتي علشان خاطري
وليد باس ايدها : خاطرك علي راسي يا جميلتي
ادهم وقف ومراته معاه : حمدالله علي سلامتك يا وليد نصّار ارتاح واشبع من مراتك ومعاك تليفوني كلمني لما تستقر ونشوف هتعمل ايه وازاي هترجع حقك ؟؟ دلوقتي نستأذن ونسيبك وسط عيلتك
وليد خرج معاهم وحضن ادهم جامد عرفانا بالجميل اللي عمره ما هينساه ابدا ..
دخل وحط ايديه علي كتف جميلته بتملك وهيا ايدها حواليه : حمدالله علي سلامتك
عماد : خديه اوضتك ارتاحو شويه
وليد نصّار : هيا شقتنا لسه موجوده يا جميله ؟؟
جميله ابتسمت : موجوده طبعا يا حبيبي
جميله الصغيره : دي كل شويه تخلينا نروح وننضفها ونفتحها ..
وليد نصّار ابتسم : طيب يالا
عماد : يالا ايه !! قسما بالله ما يحصل .. انت تقعد ونتغدي مع بعض واخر النهار علشان بس راجع من غياب ممكن اسمحلك تاخدها
وليد نصّار : غدا ايه اللي بتتكلم عنه يا عماد ؟
عماد مسك ايده : عارف يا وليد ان مراتك وحشاك بس انت واحشنا احنا كمان .. ربنا يعلم انك اكتر من اخ ليا بعدين بس ارتاح شويه وسطينا وبعدها خدها يا سيدي وروحوا بعدين عايز اتكلم معاك انا كمان شويه
وليد نصّار : ماشي يا عماد .. ساعتين بس وهمشي
عماد ابتسم : يالا يا جميله وري عمك شطارتك في الاكل
جميله شدت عمتها معاها ووليد كشر بس جميله لحقته : هرجعالك تاني يا عمو ما تقلقش
وليد نصّار : بسرعه هاه
قعد عماد و وليد ابنه كان هيقعد بس ابوه مشاه
وليد : خير مالك ؟
عماد : حمدالله علي سلامتك
وليد : الله يسلمك يا عماد
عماد : جميله بنتي شغاله مع ابنك فهد و وليد كمان
وليد ابتسم : بجد طيب ده كويس ! ولا مش كويس ؟
عماد : شغاله مع العصابه كلها متجمعه يا وليد
وليد : بس هيا مع فهد ؟
عماد : فهد مش ابنك يا وليد للاسف ده ابن ميس
وليد : يعني ايه ابن ميس ؟ عماد قولي حتى باختصار ايه اللي حصل بعد غيابي
عماد : حاضر هقولك .. وصلنا خبر موتك واتمسك في المينا اسلحه متهربه جايه للشركه وطبعا بما ان جميله كانت شغاله معاك وانت عملتها زيك وامضتها زيك وهيا وصيه علي فهد في حاله موتك فكل حاجه كانت باسمها وبامضتها واتهموها هيا بالتهريب وهيا مسافره في المطار علشان تستلم جثتك اتمسكت بدولارات متهربه واتقبض عليها واتعملها قضيه
وليد كان هيتجنن : وبعدين ؟
عماد : اتحكم عليها بعشرين سنه
وليد هنا اتصدم : انت عايز تفهمني ان انا كنت محبوس بره ومراتي محبوسه هنا يا عماد ؟
عماد : مش بالظبط عملنا تظلم واترفض وساعتها ميس ظهرت طلبت من جميله تمضيلها علي تنازل عن فهد وانها هيا تكون الوصيه عليه
وليد وقف : وجميله وافقت ؟
عماد : كان المفروض تعمل ايه ؟ هاه ؟ عليها حكم بعشرين سنه تعمل ايه ؟
وليد : تسيب ابنها لعقربه !! تعمل اي حاجه غير ميس ، تسيبه لامي او لندي
عماد : والدتك كانت في مصحه ومش في وعيها وندي كانت تحت ايد خالد ولا نسيته !
وليد افتكر لما خالد قرب منه وحط الفلاشه اللي كانت السبب في عذابه عشرين سنه : نسيته ؟ نسيته ازاي بس !!
عماد : فكرت كأم ساعتها ومكنش قدامها غير ميس اللي قالتلها هتربيه كابنها
وليد : وفي نفس الوقت تاخد الشركه وتقعد هيا علي عرشها !! ما علينا المهم جميله اتحبست قد ايه !
عماد : تمن سنين عملنا تظلم تاني واتقبل وخفضوا المده وطلعت بعد تمن سنين لحسن السير والسلوك ومن ساعتها وهيا معايا
وليد : ليه ما حاولتش ترجع فهد ؟
عماد : ميس سفرته بره ومحدش كان عارفله طريق ابدا .. فضلت هنا سنه تدور عليه بس معرفتش توصله وساعتها انا مراتي اتوفت وهيا جتلي تربي معايا وليد وجميله وكل اجازه كانت بترجع للفيلا وتشوف ميس وابنك كان مسافر .. ميس خلته يقضي تعليمه كله برا مصر علشان محدش فينا يقدر يوصله …
وليد قعد مكانه في صمت طويل وبيفكر ازاي هينتقم من كل الناس دي …
عماد : بتفكر في ايه ؟
وليد وكأنه مش سامعه : فهد اخلاقه ايه ؟
عماد : والله اللي يجاوبك علي السؤال ده جميله بنتي هيا اكتر حد بيتعامل معاه .. وليد ارجوك ما تتهورش اختي اتعذبت كتير خليها ترتاح بقي ..
وليد : ان شاء الله بس صح انت قولت وليد كمان تقصد ايه بوليد شغال معاهم ؟
عماد : مش معاهم قوي بس هو دكتور والدتك نبيله وبيروحلها الفيلا وميس بتغلس عليه
وليد : امممم انا عايز اقعد مع عيالك قعده طويله بس علي رأي جميله مش وقته .. مش وقته
عماد : هقوم اشوف الغدا اخباره ايه .. وليد البيت بيتك اتحرك براحتك هاه
وليد قام ولمح جميله الصغيره : عمتك فين ؟
جميله الصغيره ابتسمت : كانت معايا في المطبخ ومشيتها بالعافيه تاخد شاور وتغير هدومها بس هيا كانت مهتمه اكتر تعمل اكل لجوزها
وليد ابتسم : هيا دي جميله …
جميله : حمدالله علي سلامتك يا عمو
وليد ابتسملها وسند علي باب المطبخ وسرح شويه وبص لجميله لقاها مركزه معاه قوي
وليد : انتي بصالي كده ليه !
جميله اتحرجت : لا عادي بس فهد فيه كتير منك
وليد : شكلا بس ولا اخلاقا ؟؟
جميله اتنهدت : اتمني يكون الاتنين
وليد بصلها قوي : كلميني عنه
جميله ابتسمت : عنيد لاقصي درجه .. عصبي جدا .. بيتحول بسرعه يعني ممكن تلاقيه عادي كده ومره واحده تلاقيه اتجنن .. نرفوز .. طيب بس طيبته دي مستخبيه ومش بتطلع لاي حد .. جواه كويس قوي يا عمو بس هو ديما بيظهر عكس ده .. بيحاول يظهر ديما انه عديم الاحساس والانسانيه لكن لما تقرب منه وتفهمه هتشوفه علي حقيقته اللي بيخبيها
وليد بيسمعها وفهم انها مش بس بتشتغل معاه دي بتحبه لاقصي درجه ….
جميله مره واحده : تحب تشوفه .. لحظه .. موبيلي فين !!
جابت موبيلها بسرعه وفتحته وبدئت توري وليد صور فهد الكتيره اللي علي موبيلها و وليد بيتفرج ويراقب حركاتها وانفعالاتها
وليد : لحظه رجعي الصوره دي .. مين دي اللي مع فهد وليه مسكاه كده ؟
جميله بزعل : دي سالي نصّار بنت علاء
وليد : وليه مسكاه كده ؟
جميله : كانت حفله خطوبتهم
وليد بص للحزن اللي في عنيها اللي اكدله احساسه : سالي تشبه مين !
جميله بصتله : نسخه من ميس .. بالظبط
وليد اتنهد : يعني الزمن بيكرر نفسه تاني .. وليد وجميله وميس ودلوقتي فهد وجميله وسالي
جميله بنرفزه : لا طبعا
وليد : اهدي بس .. انتي بتحبي فهد ( جت تعترض بس وقفها ) بتحبيه وده واضح جدا جدا يا جميله .. وزي ما كان في زمان ميس لعمتك دلوقتي في سالي ليكي
جميله اعترضت : انا غير عمتي .. انا مش هنكر اني فعلا في مشاعر ناحيه فهد بس انا مش طيبه زي عمتي ولا بتنازل عن حقي زيها ولا فيا سماحتها وطيبتها الزايده عن الحد .. انا قويه يا عمي ومش واحده زي سالي اللي ممكن تغلبني
وليد بصلها : افلح وان صدق … اتمني فعلا تكوني قويه زيها .. ليا قعده معاكي طويله ادخلي شوفيلي عمتك بتعمل ايه
اتغدوا مع بعض والكل متجمع
وليد نصّار : صح ازاي ميس قبلت تشغلك عندها في الشركه !
جميله : هيا متعرفش ان جميله تكون عمتو .. مجرد تشابه اسماء
وليد نصّار : يعني عدي عليهم الاسم كده عادي
جميله واخوكي وليد وعادي جدا ..
جميله : ميس شغلتني لمجرد ان اسمي جميله علي اسم غريمتها علشان تحس انها بتأمر فيها هيا مش انا
وليد نصّار : طيب دي ميس وفهد ؟ ولا فهد ما يعرفش حاجه عن جميله والدته!
جميله : يعرف طبعا يا عمو
وليد نصّار : يعرف ؟؟ يعني هو بقي علي كده غبي
جميله بدفاع : لا طبعا مش غبي هو شك فعلا في الاسم وكلف شركه تحريات تجيب كل التفاصيل عننا
وليد نصّار :وبعدين ؟ الشركه كمان غبيه ؟
عماد : لا الشركه طلعت بتاعت اكرم .. فاكرو
وليد نصّار : طبعا فاكرو
عماد : اكرم جالنا هنا وظبطنا اللي هنقوله لفهد مع بعض .. وابنه يزيد اللي ماسك الشركه علي تواصل معانا علي طول
وليد نصّار :الموضوع كبير يعني !! انا لازم اقابل اكرم
قعدوا واتغدوا كلهم مع بعض و وليد سأل عن اكرم
وليد نصار: هو انا لو عايز اقابل اكرم اعمل ايه !
جميله مراته : هتقابله النهارده !
وليد نصّار :لا يا حبيبتي مش النهارده ..
وليد الصغير : نكلمه في التليفون عادي وهو مش هيتأخر
وليد نصّار : تمام تمام …. اعتقد يا عماد اتغدينا .. يالا يا جميله ؟
عماد : كنت عايزكم
وليد نصّار قاطعه : انت تخرس خالص بقي بعد كده
الكل ضحك ووليد اخد مراته وعماد عطاه عربيته وراحوا شقتهم وجميله عطت المفتاح لجوزها فتح الباب وبصلها : فكره اول مره جبتك هنا !
جميله : طبعا اتجوزتني رسمي وجبت عمي واخويا هنا
وليد : والنهارده هنجدد جوازنا تاني يا جميلة عمري
شالها وليد ودخلها وهيا معترضه بس هو مش سامعها .. دخلوا اوضتهم وحطها علي السرير
وليد : نعم مالك !
جميله : انت جاي من السفر تعبان ارتاح
وليد : ارتاح .. وهو انتي مش عارفه انا راحتي فين يا جميله ولا نسيتي
اتعدلت جميله وضمته بشوق سنين : عارفه حبيبي بس ده ما يمنعش اني خايفه عليك
وليد بحب : اركني الخوف علي جنب وريني الحب والشوق وبس ….
( (سيبوا الراجل ومراته غايب بقاله سنين عايزين ايه منهم ، ياباي منكم فضولين جدا ))
جميله نايمه علي صدر وليد وهو ضاممها بحب
جميله : وحشتني قوي يا وليد
وليد : انتي كمان مش هتتخيلي ابدا انتي وحشتيني قد ايه .. كل يوم بيعدي عليا مكنش بيصبرني غير ذكرياتنا مع بعض ولحظاتنا الحلوه وعشت علي امل اللحظه دي اللي تكوني فيها في حضني وراسك علي صدري وايدي في شعرك بالمنظر ده .. ده اللي صبرني
جميله باسته في صدره بحب : انا كمان اخدت القوه من ذكرياتنا بس للاسف كنت فاكراك خلاص روحت وسيبتني وفكرت كتير اموت نفسي ماتستغربش اه فكرت انهي حياتي بس ربنا كان بيحبني ولجأتله انه يلهمني الصبر علي بعدك وعلي كل اللي جرالي وفكرت في فهد واستحملت علشانه … انه في يوم يرجع هو لحضني … انا اتعذبت كتير يا وليد كتير قوي
وليد اتعدل ومسح دموعها : بصيلي يا جميله بصيلي
بصتله وهو مسكها من اكتافها : وعد اني هنتقم منهم كلهم وابننا هيرجع لحضننا انا وانتي
جميله رمت نفسها في حضنه وعيطت : لا ارجوك مش عايزه انتقم من حد … مسامحه الكل بس كفايا بقي .. كفايا عداءات وخناق وكره وغل انا مش عايزه غير اكل لقمتي وانت جنبي وابني في حضني مش طالبه من الدنيا غير كده .. كفايا يا وليد ارجوك
وليد وقف وزعق : وعمرنا اللي ضاع .. وابننا اللي اتربي بعيد عننا ..وانتي اللي اترميتي في السجن … وامي اللي اتحبست في مصحه … واختي اللي عاشت الله اعلم ازاي مع خالد .. كل ده ايه ! نسيبه !
جميله : كله فدي لحظه في حضني يا وليد ولو جرالك حاجه هاه ! هعمل ايه انا تاني .. مش عايزه اعيش من غيرك تاني مش هقدر اصلا اعيش من تاني
وليد ضمها قوي : اهدي اهدي .. اهدي دلوقتي ما تخافيش يا جميله مش هبعد عنك تاني .. اهدي حبيبتي ..
اخدها في حضنه يطمنها انه هيفضل موجود وانه مش هيبعد عنها …
وليد : ليه اتنازلتي عن فهد لميس يا جميله ؟ ده لو اتربي في ملجأ كان هيكون احن عليه من ميس
جميله غمضت عنيها بوجع : كانت الدنيا متقفله في وشي .. وكان عليا حكم بعشرين سنه وابني كان لوحده .. ندي خالد منعها وهددها بعيالها يحرمها منهم و والدتك ميس حبستها في مصحه ومكنش في غيرها وساعتها كل حاجه كانت باسمه واعمامك بسهوله ممكن يقتلوه علشان ياخدوا كل حاجه فكان لازم احميه باي تمن حتي لو التمن انه يروح لميس او انه يكرهني المهم انه يكون كويس ده اللي فكرت فيه يا وليد
وليد : وده الصح يا جميله ده الصح !!
ضمها لحضنه وهيا نامت وغرقت في النوم لكن هو قام يتمشي في الشقه .. النوم مجافي عنيه . التفكير هيقتله ..
جميله صحيت ملقتوش جنبها خافت للحظه انها تكون بتحلم وانه مش معاها فنادت بخوف : وليد … وليد
وليد سمعها وجالها بسرعه : في ايه مالك ؟
قامت بسرعه ورمت نفسها بين ايديه : خفت اكون بحلم وانت مش موجود
وليد بحب : حبيبه قلبي انا اهو جنبك بس معرفتش انام
جميله : طيب كنت صحتني !
وليد : ليه يعني !!
قعدوا مع بعض شويه يتكلموا
وليد : معاكي موبيل ؟ اطلبيلي جميله بنت اخوكي
جميله طلبتها وعطته الموبيل بعد السلامات
وليد : ازيك يا قمر معلش اتعبك هو انتي معاكي رقم اكرم !
جميله الصغيره : ايوه معايا يا عمو .. هبعته لحضرتك علي الواتس
وليد : ماشي .. اقفل يعني ولا ايه !
جميله الصغيره : انت عايز حاجه تانيه ؟
وليد : لا يا جميل ما اتحرمش
جميله بعتتله الرقم و وليد اتصل بيه
اكرم : الو مين ؟
وليد : انا يا اكرم
اكرم اتعدل ووقف وابنه جنبه سأله في ايه بس ما ردش ابدا
وليد : ايه يا ابني عرفتني ولا ايه ؟
اكرم : انت بجد !! بجد يعني انت بتكلمني ؟ انت عايش ؟ انت موجود ؟ انت فين ؟ طيب اتكلم ! قول حاجه
يزيد : بابا في ايه مالك ؟
اكرم : قول اي حاجه
وليد ابتسم : انا وليد يا اكرم وايوه عايش ولسه راجع مصر اول ما اشوفك هفهمك كل حاجه ينفع تجيلي ؟
اكرم : ينفع ؟ انت بتسألني بجد ! انا اجيلك لو انت في اخر الكون كله
وليد : عارف يا اكرم عارف .. انا في شقتي فاكرها ولا نسيتها !
اكرم : انساها ازاي بس !! اجيلك دلوقتي ولا امتي ؟ انا اجيلك دلوقتي حتي بس اشوفك وبعدها ابقي اجيلك تاني !! مسافه الطريق استناني هاه .. انا جاي
وليد ضحك : انا في انتظارك يا اكرم
وليد قفل وبص لجميلته : مالك يا قمر
جميله مسكت ايده : اوعدني انك مش هتتهور ولا هتعمل حاجه تعرضك لاي خطر.
وليد : حبيبه قلبي اكرم عايز اشوفه كصاحب مش اكتر واوعدك ما تقلقيش خلاص ممكن بقي تعمليلي قهوه من اخر مره شربتها من ايدك قبل ما اسافر مشربتش قهوه
جميله عيونها دمعوا : حبيب عمري انت.. مفيش قهوه في البيت ولا اي حاجه خالص
وليد : اممممم طيب استني
اتصل باكرم وطلب منه يجيب قهوه وهو جاي علشان نفسه فيها ..
اكرم وصل ومكنش مصدق عنيه ابدا انه قدامه وكان معاه ابنه يزيد … ضمه جامد قوي وكأنه اخ ليه مش مجرد صاحب …
عطي لجميله القهوه بكل ما يمكن ان تحتاجه وجميله عملتلهم القهوه وقعدت معاهم علشان تشوف وليد عايز ايه من اكرم
وليد حكي باختصار لاكرم اللي حصله واكرم حكاله شكوك فهد وطلباته من يزيد …
يزيد : هو بدأ يقلب في كل الدفاتر القديمه بس انا مخبي عنه كل المهم
وليد : لا كفايه تخبي هنبدأ نكشفله الاوراق واحده واحده
يزيد : طيب حاليا هو منتظر رد مني علي صلاح وليه رفض مشروعه
وليد باستغراب : صلاح ؟ صلاح مين ؟
جميله : صلاح عبد الكريم سكرتيرك القديم اللي وقفته علي رجليه
وليد : اه اه فاكرو مالو ده ؟
يزيد حكاله كل حاجه عن الموضوع
وليد : يعني فهد فيه اصول كويسه طيب كويس امال صلاح ليه غير رأيه ؟ ليه فض الشراكه معاه ؟
يزيد : انا مقدرتش اعرف السبب الاصلي بس هو مفيش عريس متقدم لبنته وشركته تقريبا اعلنت افلاسها بس علاء قابله كذا مره وصلاح راحله كذا مره وكأنه بيترجاه في شيء معين ؟ ده حتي بنته بتروح الشركه تنتظر قدام الباب وحاليا بتقابل اسر
وليد : آسر مين ؟
يزيد : آسر ابن خالد وابن اخت حضرتك مدام ندي !!
وليد ابتسم لذكراها : اه عارفو آسر .. كانت حامل صح قبل ما امشي !!
جميله : معاها امل ..
وليد : آسر وامل … بس يا تري دول طالعين لمين ؟ لخالد ولا لندي ؟
جميله : لا دول تربيه ندي .. الاتنين طيبين وزي اختك فيهم براءه جميله ..
وليد : تمام .. طيب راقب صلاح كويس واعرفلي ايه السبب الاساسي لرفضه شراكه فهد وعرف فهد كل حاجه وصلتلها في الموضوع ده ..
يزيد : انا فعلا حاطو تحت المراقبه واي حركه بيعملها رجالتي بتوصلهالي
وليد : تمام تمام
اكرم : انت ناوي علي ايه يا وليد !
وليد ابتسم : علي كل خير طبعا انا بس عايز فهد يفتح عنيه مش اكتر
اكرم بص لوليد وفهم من نظرته انه مش عايز يتكلم قدام مراته فاكتفي باجابته دي ..
اكرم وقف : حمدالله علي سلامتك ولينا لقاء تاني نتكلم فيه بالتفصيل اكتر .. حمدالله علي سلامتك يا وليد بيه
وليد ضمه بحب : الله يسلمك يا اكرم الله يسلمك
اكرم : اجيبلكم حاجه هنا في البيت قبل ما امشي !
وليد بص لجميله : لا متشكر انا هاخدها وننزل نشوف ايه اللي ناقص .. بقولك صح هو انا دلوقتي بما اني ميت فهل ده معناه اني ما املكش اي حاجه !!
اكرم : ازاي وشركتك واموالك واراضيك وكل ثروتك فين !
وليد : باسم فهد !
اكرم : باسم فهد ده وانت ميت لكن طول ما انت عايش كل حاجه بتاعتك انت .. هو يورثك لكن مش وانت عايش يا وليد بيه ولا ايه !!
وليد : امممم يعني دلوقتي انا عايز فلوس اعمل ايه !!
اكرم : ده محتاج اننا نشوف محامي ونبطل شهاده وفاتك ونثبت انك علي قيد الحياه ونرجعلك حقوقك كلها وحسابك في البنك يتفعل من تاني .. اديني كام يوم
وليد : بس تشوف حد موثوق فيه مش عايز حد يعرف دلوقتي اني عايش فاهم !
اكرم : عيب عليك يا وليد بيه كل حاجه هتتم في السر وفعلا لازم حضرتك تفضل كده لحد ما نبطل وفاتك ونرجعك علي قيد الحياه من تاني والا لو اعمامك عرفوا ممكن يقتلوك بجد ومحدش يقدر يقولهم بم حتي لان انت قانونا ميت فلازم ترجع عايش قبل ما حد يشوفك
وليد : تمام همتك معايا ترجعني علي قد الحياه
خرجوا مع بعض للباب ويزيد سبق للعربيه واكرم مع وليد فطلع كارت وعطاه لوليد
وليد : ايه ده !
اكرم : دي الفيزا بتاعتي فيها حساب مفتوح خليها معاك لحد ما نظبط الدنيا
وليد رفض بس مع اصرار اكرم وافق
اكرم : وليد انا كل اللي انا فيه دلوقتي ده من خيرك انت .. انت اللي سيبتلي كل ده والمبلغ اللي سيبتهولي في الوصيه خلاني بدأت شركتي الخاصه انت سبب كل الخير اللي انا فيه وده اقل شيء ممكن اعمله .. ارجوك اعتبرني اخ ليك
وليد : واكتر من اخ طبعا يا اكرم
اكرم : يبقي تاخد الفيزا وتصرف منها براحتك
وليد اخدها وعرف ان الدنيا زي ما فيها الوحش فيها الحلو والاصيل
………………..
الباب خبط بعنف وصلاح قام بسرعه يفتح ولقاه خالد في وشه وخالد اول ما شافه مسكه من رقبته خنقه
ونكمل بكره
بقلم / الشيماء محمد
رواية جميله الجزء الثاني للكاتبه شيمو
الحلقه التاسعة عشر
الباب خبط بعنف وصلاح قام بسرعه يفتح ولقاه خالد في وشه وخالد اول ما شافه مسكه من رقبته خنقه
خالد : قسما بالله ما هرحمك .. علاء بيحب اصلا اللف والدوران انا غيره .. انا أقتلك مكانك ومالكش دية عندي فاهم !
صلاح : في ايه بس ! الشراكه ولغتها وكلامي عن وليد وغيرته في ايه تاني
خالد زقه وقعه علي كرسي وراه وزعق : المحروسه بنتك فين !!
صلاح : بنتي ؟ بنتي مالهاش دعوه باي حاجه
علاء زعق : بنتك فين بقولك !
مي طلعت ووقفت في وشه : نعم
اتفاجئت بخالد مسكها من شعرها وهيقلعه في ايده : ابعدي عن ابني فاهمه ولا مش فاهمه ! والا الفيديوهات اياها هخليهالك تلف مصر كلها وهخلي عروض الرقص من الكباريهات تنزل ترفرف عليكي .. فاهمه ولا مش فاهمه؟
صلاح قام وبيحاول يشد بنته من ايد خالد الا ان خالد كان ماسكها بعنف ولما صلاح حاول يضربه طلع مسدس وحطه في وش صلاح اللي مراته صوتت ووقفت قدام جوزها
خالد : انا ما بهزرش وانا غير علاء خالص .. لو انت او بنتك هوبتو ناحيه الشركه مش هيحصلكم خير ابدا .. فاهم ولا افهمك بطريقه تانيه ؟
صوب المسدس ناحيه مراته فصلاح وقف في وشها : فاهم !! والله فاهم خلاص
خالد ( بص لمي ) :وانتي يا بت انتي حركاتك دي ما تنفعش معايا عيلتي كلها خط احمر فاهمه ولا تحبي افهمك؟
صلاح شد بنته : فاهمه ! خلاص
خالد خرج من عندهم مسدسه في ايده
……………….
خرج وليد وجميله يشتروا كل طلبات بيتهم وقضوا السهره بره ورجعوا بيتهم وجميله الفرحه مش سيعاها واتمنت لو فهد معاهم ..
قبل ما تنام فتحت صورته وبصتله و وليد ضمها وفضل هو كمان يبص لابنه اللي اتحرمو منه
وليد : هيرجع لحضننا يا جميله ما تقلقيش
جميله : بجد هيرجع !! علي فكره يا وليد هو كويس .. هو فيه كتير منك بس ميس ديما وراه بتحاول تمحي اي اثر ليك جواه …
وليد باسها في كتفها : مش هتقدر مهما تحاول ده ابننا ولو عدي مليون سنه هيفضل برضه ابننا ..
موبيلها رن وكان يزيد فعطته لوليد
يزيد : اسف للازعاج
وليد : لا عادي …ايه الجديد ؟
يزيد : خالد نصّار لسه خارج من عند صلاح وكان بيهددهم ان محدش فيهم يهوب ناحيه الشركه او اي حد من العيله وخرج من بيتهم مسدسه في ايده
وليد : تمام بلغ فهد بكل اللي حصل !!
يزيد : الصبح هكون عنده ان شاء الله
وبالفعل الصبح يزيد راح لفهد وقعدوا مع بعض ويزيد حكاله كل اللي حصل
فهد : طيب ليه ايه الغرض من كل ده ! معقول علشان بس المشروع ولا ايه اسبابهم ؟
يزيد : اعتقد ليهم اسباب خاصه .. لو عايز نصيحتي قابل صلاح واعرض عليه حمايتك وهو هيفهمك كل حاجه ..
فهد : فعلا ده الصح .. طيب اخر النهار نروح ؟
يزيد : تمام .. انا عندي رجاء خاص
فهد : قول علي طول يا يزيد
يزيد : تسمحلي اعين كام واحد بودي جارد عليك .. عيلتك مش بتهزر
فهد : عيلتي مش هتأذيني
يزيد : انا اتعودت ما اثقش في اي حد ..
فهد : بس بودي جارد !! همشي ب بودي جارد ليه يعني ! لا لا ملوش لازمه
خرج يزيد من عنده بعد ما فشل في اقناعه بفكره الحراسه الخاصه
جميله كانت عند ميس اللي علي اخرها من فهد
ميس : خدي الملف ده خلي فهد يمضي عليه !
جميله : فهد بيه كل ما بروحله بيطردني من عنده
ميس : يعني ايه يطردك ! روحي وامضي الملف وخليه يراجعه .. دي الخطوات النهائيه في المشروع ولازم هو يدرسها بنفسه .. ده اهم ملف في المشروع كله
جميله باستسلام : حاضر
اخدت الملف ومشيت بس قبل ما تدخله لفهد صورته كله لوليد زي ما طلب منها …
دخلت عند فهد وقلبها بيدق ونفسها لو تقوله ابوك عايش يا فهد وانت مش يتيم كان نفسها تفرحه وتكون هيا اول من يشاركه فرحته بس هل فهد هيفرح بخبر زي ده !!
فهد : اييييييه واقفه علي الباب كده ليه ووصلتي لفين !
جميله فاقت وبصتله : سوري اتفضل
فهد : تاني !
جميله : بقولك ايه خرجوني بره حساباتكم انتو الاتنين … ده اهم ملف في المشروع ومحتاج مراجعتك وامضاءك
فهد قلب فيه بدون اهتمام ورماه من ايده
جميله : مالك ؟ وايه كميه الزهق اللي انت فيها دي ؟
فهد : مخنوق وزهقان ومش طايق الشغل باللي فيه ! حاسس اني في دوامه ما بتنتهيش ابدا
جميله : خدلك يوم اجازه
فهد : اعمل فيه ايه !
جميله : اعمل ما بدالك .. نام فيه .. اخرج .. روح مكان فيه بحر .. يا ابني انت مليونير يعني اي شيء هتفكر فيه هتقدر تعمله امال الغلابه يعملو ايه !
فهد بصلها كتير : ماليش مزاج اعمل اي شيء من كل اللي قلتيه ده
جميله : ليه بس !! طيب ادخل سينما في فيلم حلو نازل اكشن بكوميديا شويه
فهد : انتي عارفه انا ما دخلتش سينما من امتي ؟ تقريبا من وانا عندي بتاع ١٥ سنه
جميله : طيب يبقي جه اوانها
فهد : اسمه ايه الفيلم !
جميله : اسمه
The hitman’s bodyguard
فهد : ده بطوله مين ؟
جميله : صموايل ال جاكسون ومعاه ريان رينولدز
فهد : مين ريان ده !
جميله : اهو واد كده له كذا فيلم حلوين
فهد : تمام يالا بينا
جميله : يالا بينا فين ؟ ومين دول اللي يالا ؟
فهد : انا وانتي يالا ما انا مش هروح ادخل سينما لوحدي
جميله : وانا مش هروح ادخل معاك خد خطيبتك
فهد : خطيبتي مين ؟ وبعدين سالي اصلا ملهاش في الحاجات دي .. سالي خديها شوبنج او نادي او نايتكلب ..
جميله : لا برضه سوري
فهد : بت هو انا باخد اذنك ولا ايه ! يالا يعني يالا
جميله : نعم هو انت هتاخدني غصب عني يعني مثلا ولا ايه مش فاهمه سيادتك
فهد بضيق : خلاص روحي شوفي وراكي ايه ! هيا اصلا فكره غبيه
جميله اتضايقت لضيقه ومش عارفه تعمل ايه ! ابن عمتها برضه مش اي حد !! فيها ايه لما تروح مع ابن عمتها سينما ! بتحاول تقنع نفسها ان فكرتها صح وانها هتروح بس علشان ابن عمتها اللي ياما ضحت علشانها هيا واخوها وده ابنها ومتضايق وده اقل واجب
جميله : طيب وميس هقولها ايه ؟ سلام انا رايحه السينما مع ابنك !
فهد : لا هتروحي تقوليلها اني مشيت من هنا وانتي هتستأذني لاي سبب وتمشي وبس
جميله ضحكت : هنهرب من المدرسه ؟
فهد : مدرسه ايه ؟
جميله : ماهو اهو زي العيال لما بيهربوا من المدرسه بيعملوا الحركات دي
فهد : انا فعلا بهرب من الدنيا كلها يا جميله
جميله حست بوجع غريب جواه وضيق خانقها هيا : طيب هروح بس ما اوعدكش انها هتوافق
فهد : قوليلها سبب ما ينفعش ترفض علشانه
جميله : ده اللي هو ايه !
فهد : اي حد عيان وفي المستشفي او محتاجلك ولازم تروحي
جميله : هجرب
فهد قام مشي وجميله دخلت لميس
ميس : مضي عليه !
جميله : لا يا افندم كان خارج من مكتبه ورفض يرجعله وقالي بكره الصبح
ميس : قولتيله ان الملف مهم ؟
جميله : ايوه وما اهتمش
ميس : وبعدين في الولد ده طيب حطي الملف وروحي انتي
جميله : بعد اذنك انا كنت حابه استأذن
ميس : ليه انتي كمان خير ؟
جميله : عمتي محتاجاني جدا النهارده ووعدتها اني هحاول اروح بدري واكون معاها اذا سمحتي الموضوع ضروري
ميس : طيب طيب روحي بس ما تتعوديش علي كده
جميله فرحت جدا وجريت علي تحت وبصت حواليها كتير واتصلت بفهد : انت فين ؟
فهد : وري الشركه يا فصيحه .. ارفعي دماغك لفوق هتلاقي ميس واقفه متبعاكي فابعدي عن الشركه يالا
جميله بصت لفوق وفعلا لمحت ميس واقفه فبعدت وقابلت فهد
جميله اول ما ركبت ضحكت : حاسه اني عيله في ثانوي هربانه من المدرسه
فهد ابتسم وكأن فرحتها معديه : طيب يا عيله هنروح فين ؟
جميله : نروح سيتي ستارز ! السينما هناك تحفه
فهد بص لساعته : انتي عارفه بينا وبين سيتي ستارز قد ايه! ما تختاري حاجه قريبه
جميله : ماهو القريب هيكون شعبي لا يليق بفهد نصّار
فهد : شعبي ولا زفت انجزي اختاري مكان خلينا ننجز في ام الليله دي
جميله : بقولك ايه انت ما تتنرفزش عليا احنا هنا مش في الشغل .. اختار انت بقي اي سينما
فهد : انتي غلسه علي فكره جدا
جميله شهقت : انا !! حوش حوش السكر اللي بينقط منك لاحسن الدنيا لزقت .. قال انا غلسه قال واوعي خفه الدم اللي فيك ..
فهد ضحك وسكت واخدها علي سيتي ستارز وبعد ما وصلوا ودخلوا عند السينما
جميله كانت بتكلم عمتها وفهد مركز معاها
جميله : طيب يا عمتو هبعتلك ارقام الديلفيري وشوفوا هتطلبوا ايه ! واتغدوا
فهد : قوليلها اني عازمها علي الغدا اوك وهبعتلهم الاكل لحد عندهم
جميله : عمتو فهد بيقولك انه هو عازمك علي الغدا
جميله عطت الموبيل لفهد يكلمها وامه فتحت الاسبيكر علشان وليد يسمعه
فهد : تسمحيلي يا ست الكل انا اعزمك علي ذوقي ممكن ! اذا سمحتي
امه : حبيبي مش عايزه اتعبك
فهد : انا مش هقبل رفضك نهائي فريحي نفسك هتختاري حاجه معينه ولا اختارلك علي ذوقي ؟؟
امه : علي ذوقك يا حبيبي
فهد : اوك يا قمر باي
فهد طلب الاكل وبعدها عطي الموبيل لجميله تمليه العنوان وراح هو يحجز التذاكر
جميله قفلت وبصت لجوزها : ابنك عازمنا علي الغدا
وليد ابتسم : هو فين كده هو وجميله ؟
جميله : اخدها سينما
وليد : وهيا عادي بتخرج معاه ؟
جميله : لا مش عادي دي اول مره
وليد : هو فهد بتاع بنات يا جميله ؟
جميله : لا عمره ابدا ما عرف بنت .. جميله اول واحده يتكلم معاها ويفتحلها قلبه وان شاء الله تكون اخر واحده
وليد : انتي عندك امل ان فهد يتجوز جميله ولو ده ما حصلش ولو هو ما بيحبهاش ولو هو مجرد بيقضي وقت لطيف ولو
قاطعته جميله : بس يا وليد انت ما تعرفش فهد ولا تعرف جميله .. فهد اخلاقه عاليه اه ممكن يكون عصبي او جامد في اظهار مشاعره بس مش من النوع اللي يلعب ببنت وجميله تربيتي انا واخلاقي انا
وليد : انا مش قاصد يا جميله اغلط في بنت اخوكي انا مجرد خايف عليها
جميله : انا ما بخافش عليها وهيا مع فهد ابني
وليد : لانك بصاله علي اساس ابنك مش علي اساس تربيه ميس .. ميس يا جميله فاكراها وفاكره هيا ممكن تعمل ايه ولا نسيتي ؟
جميله : مش ناسيه بس فهد منبته واصله طيب وده المهم وهتشوف
وليد : انا اتمني ..
((في السينما))
جميله : امتي الفيلم هيبدأ ؟
فهد : بعد ساعه ونص
جميله : ايه ؟ كتير قوي جدا
فهد : عارف انه كتير قوي بس اعمل ايه يعني قولتلك شوفي مكان قريب سمعتيني موال طويل عريض
جميله : خلاص خلاص ما تتفتحش تعال نقعد علي الكافيه لحد ما المعاد يجي
فهد : انا جعان
جميله : في ماك وكنتاكي وكوك دور ومحلات كتيره هنا تعال نشوف
فهد بتريقه : مفيش بيتزا هت
جميله بصتله : اعتقد في
دخلوا ماكدونلز لانهم مالقوش بيتزا وقعدوا واكلوا واكتشفت جميله شخصيه جديده في فهد شخصيه مدفونه تماما ..
فهد : هتشربي ايه !
جميله : ميلك تشك فراوله
فهد : ميلك تشك ؟؟
جميله : اه مالو ؟
فهد : الجو تلج يا جميله وهتشربي تلج !
جميله : انا حره
فهد رفع ايديه باستسلام : انتي حره فعلا
جابلها الميلك تشك وجاب لنفسه حاجه سخنه
جميله : كابتشينو ؟
فهد : لا اسبريسو مفيش قهوه
جميله : اممم الظاهر اني هندم تبدل ؟
فهد ابتسم : ده بعينك .. قومي نتمشي شويه يكون المعاد جه
قاموا الاتنين يتمشوا ويتفرجوا علي المحلات وجميله عجبها تيشرت اسود وبنطلون جينز
جميله : فهد ما تشتري دول ؟
فهد : لمين ؟
جميله : ليك انت يعني هيكون ليا انا مثلا !
فهد : وانتي من امتي بتشوفيني لابس جينز ؟
جميله : نفسي اشوفك لابس جينز
فهد : لا طبعا مش استايلي ولا مودي اصلا
جميله : انت مودك الغوامق وبيتربع علي قمتهم الاسود اهو اسود .. التيشرت اسود والبنطلون اسود عايز سواد ايه تاني !
فهد ابتسم انها فاهمه موده وذوقه في اللبس : انا ما بلبسش تيشرتات وجينز
جميله : البس من باب التغير .. طيب تعال انا هشتريهملك
فهد ضحك : انتي عبيطه ولا هبله !
جميله كشرت وزعقت : ما انت هتشتريهم يعني هتشتريهم
فهد بصلها وحط ايديه في جيوبه : والا ايه !
جميله فكرت شويه : والا هسيبك وامشي
فهد : انتي عارفه اني ما بيتلويش دراعي
جميله غيرت لهجتها تماما : انت عارف كويس قوي اني مش بلوي دراعك .. يمكن بستغل مكانتي عندك او بستغل خاطري .. ده مالوش قيمه عندك !!
فهد كان هينطق لأ بس شيء خلاه سكت يمكن قلبه منعه او عقله او الاتنين مع بعض .. ودخل المحل من غير ولا كلمه واشتري التيشرت والبنطلون وهيا مبتسمه ومبسوطه
فهد : اشتريتهم اه بس ده مش معناه اني هلبسهم علشان بس تكوني عارفه
جميله ابتسمت ابتسامه دوبته : عارفه بس مش مهم المهم دلوقتي انك اشتريتهم .. مشوار الالف ميل بيبدأ بخطوه
فهد بصلها : الف ميل ! ربنا يديكي طوله العمر
وصلو قدام السينما وبدؤا يدخلو الناس
جميله : فهد انا مش عايزه دي بقي ! وبعدين تلجت ايديا
فهد اخدها من ايدها وحطها في باسكت : تستاهلي
واول ما دخلوا السينما كانت ظلمه جدا وجميله كانت هتقع ف فهد مسكها من ايدها وطلع موبيله نوره مع كشاف المضيف اللي بيوصلهم لمكانهم علشان جميله ما توقعش .. فضل ماسك ايدها لحد ما قعدت في الكرسي وهو جنبها .. ولا هو بيسيب ايدها ولا هيا بتشدها وكأن الدنيا كلها وقفت علي مسكت ايديهم دي ..
فهد بهمس : ايدك تلج جدا
جميله : عارفه امال انا سيباها في ايدك ليه !
فهد : بتستغليني يعني تاني !
جميله : اه بستغلك .. اديا تلج وانا غلطانه خلاص كده مبسوط !
فهد : لا مش مبسوط
ساب ايدها وقام وهيا مستغربه هيروح فين ورجع بعد دقايق في ايده كوبايه شاي عطاهالها
جميله : دي ليا انا ؟
فهد : مش عايزاها هاتيها
جميله : لا طبعا عايزاها .. فيها نعناع كمان ؟
فهد : مش انتو بتشربوه كده !!
جميله فرحت جدا بكوبايه الشاي دي بس اتمنت لو هو اللي دفا ايديها .. الفيلم بدأ وكان ظريف وكوميدي باكشن .. وضحكوا فيه كتير ..
جت الاستراحه وفهد جاب فشار لجميله
جميله : طيب كل معايا
فهد : مبحبوش
جميله : ليه !
فهد : عادي يعني من غير ليه مش بستظرفه وبس
موبيله رن وكان يزيد فرد عليه
فهد : سوري سوري سوري يزيد
يزيد : لا عادي بس انت فين ؟
فهد : انا في مشوار قدامي مثلا ساعتين
يزيد : اممم طيب براحتك خلص وكلمني واقابلك اتفقنا
فهد : اتفقنا بس سوري هاه انا نسيت خالص معادنا
يزيد : لا يا سيدي ولا يهمك
قفل معاه وبص لجميله
جميله : معاد ايه ده اللي نسيته !
فهد : معاد مع حد ما تعرفيهوش المهم الاستراحه خلصت تعالي يالا
في نهايه الفيلم البطل اعترف لحبيبته بحبه اللي كان كبرياؤه مانعه ينطق .. واكتشف ان هيا كمان بتحبه جدا .. وكانت النهايه مرضيه لكل الاطراف .. خرجوا بصمت وخرجوا بره المول كله واول ما جميله خرجت جسمها كله اترعش من البرد والهوا .. فهد قلع جاكت بدلته وحطه حواليها وحط ايده حواليها يحميها من الهوا لحد العربيه ..
ركب كانت بتضحك : مالك بتضحكي ليه ؟
جميله : لا عادي
فهد باصرار: بتضحكي ليه ؟
جميله : مفيش بس ما تخيلتش ان ممكن يجي يوم وحد يقلعلي الجاكت بتاعه ويلبسهولي زي افلام السينما .. وبعدين انت اخر حد تخيلت انه ممكن يعمل كده
فهد بصلها قوي : تصدقي اني بعد ما بعمل اي حاجه معاكي بندم عليها
جميله ضحكت جامد وهو بص قدامه ودور عربيته وهيا بتضحك وماسكه دراعه بتحاول تعتذر وهو متجاهلها وشبح ابتسامه علي شفايفه مانعها تظهر ..
جميله : خلاص بقي ما تبقاش خنيق كده
فهد غير طريقه ووقف علي جنب مره واحده
جميله : وقفت ليه !
فهد بضيق : انتي عايزه مني ايه !
جميله : مش عايزه منك حاجه
فهد : خارجه معايا ليه !!يعني عايزه توصلي لايه ! انا خاطب يا جميله ومش هفسخ خطوبتي
جميله ولو عكست السؤال وقلتلك انت عايز مني ايه هتقولي ايه !
فهد : مش يمكن اكون بتسلي ؟
جميله : انت مش من النوعيه دي
فهد : ومين قالك اني مش من النوعيه دي ؟
جميله : احساسي
فهد بص لقدامه بعيد : طيب ولو قلتلك مش عارف !
جميله : هصدقك لانها اجابه صادقه ممكن بقي تروحني لاني اتأخرت جدا ومش بعيد ابويا يطردني وابات في الشارع النهارده
فهد : بجد يطردك ! طيب انا هكلمه
جميله : هتقوله ايه والنبي .. بص انت تسكت خالص
فهد : هسكت بس لو بتي في الشارع ابقي كلميني
جميله : هتعمل ايه !
فهد : هتصرف
جميله حست ان في وصله اتكونت بينها وبين فهد والوصله دي مهمه جدا لازم تحافظ عليها ..
جميله : ينفع تشغل الكاسيت !
فهد شغله والاتنين مدوا ايدهم مع بعض يعلوا الصوت علي اغنيه فايديهم خبطت في بعض والاتنين كشوا ايديهم ..
فهد جنبها في مليون فكره وفكره في دماغه واتمني مليون حاجه منها ان الطريق يفضل طويل وتفضل هيا جنبه .. اتمني يقدر ياخدها بيته واتمني يقدر يطلع بيتها .. واتمني يمسك ايدها اللي قدامه .. اه هو يقدر فعلا يمسك ايدها دي مسافه بسيطه بينهم وبدون تفكير كتير مد ايده ومسك ايدها ضغط عليها جامد وهيا قلبها خرج من مكانه ورجع تاني مع ضغطه ايده .. اتجمدت مكانها ومقدرتش حتي تبص ناحيته .. ايده كانت فوق ايدها بس هو عايز يضم ايدها مش مجرد انها تكون فوقها .. حرك ايده بحيث تكون ايدها في ايده وصوابعهم مكلبشين بعض … فهد ركن علي جنب ولحظات صمت فيها اصوات دقات قلوبهم اللي عاليه جدا ..
جميله بصوت مبحوح : انت ( احممم ) وقفت ليه ؟؟
فهد : وصلنا
جميله بصت حواليها مش عارفه هيا فين اصلا او مش مركزه : وصلنا فين !
فهد ابتسم : بيتك اخر الشارع اهو لو تحبي انزلك تحت البيت اكمل
جميله : لا لا كده كويس
حاولت تشد ايدها بس هو ضغط عليها قوي ففضلت مكانها وهو مستغرب نفسه وليه مش عايز يسيب ايدها .. شد ايدها وبكل رقه غير معهوده فيه باس ايدها وهيا شهقت وكتمت نفسها لحد ماهو بعد شفايفه عن ايدها طلعت النفس المحبوس … بصلها بنظرات مش مفهومه .. قرب ايدها تاني من شفايفه و وطي باس كل واحد من اصابعها برقه وهيا قلبها محتج عامل ثوره .. جسمها كله بيعترض علي كميه الاحاسيس اللي اول مره يحسها ..
فهد نفسه مش عارف ايه اللي بيحصله وليه كل مشاعره ثايره عليه ! ليه قلبه هينفجر جواه ! ليه انفاسه مقطوعه ؟ ليه عايز اكتر من انه يبوس ايدها .. عايز اكتر واكتر واكتر
اتقابلت عنيهم في نظره طويله وهو مد ايده علي خدها لمسه بكل رقه وحط ايده علي رقبتها يشدها بس هيا حطت ايدها علي شفايفه وهمست : لأ
فهد بعدم فهم : لأ ليه !
جميله : علشان مليون سبب وسبب
فهد : ما تهمنيش الاسباب
جميله : انا تهمني
فهد : ايه اسبابك يا جميله ؟
جميله : كتير يا فهد .. غلط وما ينفعش وما يصحش وسالي وحاجات كتيره قوي
فهد بعد عنها : غلط وما ينفعش ده بس اللي غلط ؟
جميله : لا مش ده بس .. خروجي معاك غلط .. دخولنا سينما غلط .. اكلنا مع بعض غلط .. مسكة ايدينا غلط .. قعدتنا دي دلوقتي غلط
فهد بعد فهم : ولما كل ده غلط انتي بتعملي ايه هنا معايا !
جميله : حد قالك اني معصومه من الغلط ؟ انا بشر وبغلط
فهد اتنرفز : وانا ما ارضالكيش الغلط .. انزلي وروحي وما تعمليش حاجه غلط .. انا مش هقبل انك تقعدي معايا ويكون ده غلط من وجهه نظرك فاتفضلي واسف واوعدك ان ده
جميله حطت ايدها علي شفايفه : بطل غباءك وتسرعك وحكمك علي الامور بمنطوق الابيض والاسود لان في مليون درجه بينهم
فهد : سعات كتير بيكون مفيش يا ابيض يا اسود يا وجودك معايا صح يا غلط ما يحتملش بين البينين ما يحتملش الرمادي ؟ يا صح يا غلط
جميله : فهد
قاطعها : يا صح يا غلط يا جميله ؟
جميله : يبقي غلط يا فهد
نزلت من العربيه وهو طلع زي الصاروخ وهيا دخلت بيتها دموعها سبقاها ولقت ابوها في الانتظار وشكله ما يطمنش
عماد : كنتي فين يا باشمهندسه جميله لحد دلوقتي !!
جميله بصت لابوها اللي شكله غريب جدا ومش عارفه تقوله ايه !!
عماد : كنتي فين ردي عليا ؟
جميله اترددت كتير بس اخيرا نطقت : كنت مع فهد
عماد : كنتي معاه فين ؟؟
جميله اخدت نفس طويل وبصت للارض : دخلنا سينما
ابوها رفع ايده وهيا صرخت وحطت ايدها علي خدها منتظره ضربه ابوها بس مضربهاش فبصتله وشافت وجع وندم في عنيه : طول عمري بثق فيكي وفي تربيتي ليكي بس النهارده …
جميله : بابا فهد
قاطعها : فهد ابن ميس مش ابن وليد وجميله مش ابن عمتك ،، فهد للاسف ابن ميس وابن ميس يعمل كتير قوي وللاسف انتي بتسمحيله يتمادي مش عارف ليه !
جميله : يا بابا
قاطعها تاني : مفيش مرواح الشركه دي تاني
جميله : بس عمتو
قاطعها : عمتك جوزها رجع وده بالدنيا كلها وهو هيعرف يرجع ابنه يعني وجودك حاليا مالوش لازمه .. ترجعي جامعتك وده اخر كلام ( حاولت تتكلم ) ادخلي علي اوضتك لاني مش قادر اشوفك اتفضلي
جميله دخلت تعيط كتير ومسكت موبيلها واتصلت بعمتها
جميله بعياط : عمتو
عمتها : حبيبتي جميله مالك فيكي ايه ؟
جميله : عايزه اشوفك ينفع !
عمتها بتردد : والله ما عارفه هشوف وليد هو في الحمام يخرج بس واخليه يوصلني طيب قوليلي فيكي ايه !
جميله : بابا مش عايزني اروح الشركه تاني عمتو انتي لازم تتصرفي ارجوكي
عمتها : حاضر حبيبتي اهدي انتي بس وبطلي عياط
وليد خرج من حمامه وسمعها : مين بيعيط !
جميله قفلت التليفون وبصت لوليد : جميله
وليد : ليه مالها !
جميله : عايزاني اروحلها ينفع !
وليد : ينفع طبعا يا قمر انتي تشاوري اجهزي اوصلك
نزلوا ولقت عربيه تحت البيت و وليد فتحلها الباب تركب
جميله : عربيه مين دي !
وليد : اركبي طيب الاول
ركبوا ووليد اتحرك : دي يا ستي جابها اكرم
جميله : اكرم ! هو غني قوي كده !
وليد : مبسوط وفي نفس الوقت دي من عربيات الشركه بتاعته
جميله : جدع قوي اكرم ده
وليد : فعلا
وصلوا ونزلوا وطلعوا وعماد فتحلهم
جميله : انت مزعل جميله ليه يا عماد ؟
عماد : هيا لحقت قالتلك !
جميله : مزعلها ليه !
عماد : كده !! المهم اتعشيتوا ولا نتعشي مع بعض ؟
وليد : ادخلي يا جميله لبنت اخوكي وسيبيني انا وعماد شويه
دخلت جميله لبنت اخوها ووليد قعد هو وعماد في البلكونه مع بعض …
…………….
فهد قابل يزيد وراحوا بيت صلاح وخبطوا عليه وفتحلهم واتفاجيء بفهد قدامه وكان هيقفل الباب في وشه بس يزيد منعه وفهد دخل ووراه يزيد
فهد : ايه مش عايز تشوفني ليه ؟
صلاح : ده بيتي وانا حر
فهد : بس كده !
صلاح : اه بس كده
فهد : انت فسخت الشراكه ليه !
صلاح : برضه انا حر
فهد : مفيش عريس لبنتك وشركتك فلست فليه ؟
صلاح : كبرت وعايز ارتاح
فهد : لو في حد بيهددك انا اقدر احميك منه !
صلاح ضحك بتريقه : انت تحميني !! طيب والنبي روح بيتك يالا وسيبني في حالي
فهد : انا اقدر احميك فعلا بس قولي مين بيهددك وبايه ؟
صلاح : تحميني ازاي ؟ وهتعمل ايه ؟ شوف يا ابني نصيحه مني ليك روح بيتك وامشي جنب الحيط وبلاش تعادي ناس انت مش قدهم
فهد : قصدك اعمامي صح ! هددوك بايه ؟
صلاح وقف : اطلع بره بيتي اذا سمحت .. شراكه مفيش خلاص وكلام بينا مش عايزو
فهد قاعد مكانه وبص لصلاح : عمي خالد كان بيهددك بايه ؟ وكان خارج من عندك بمسدس في ايده ليه ؟
صلاح بتوتر : انت جبت التخاريف دي منين ؟
فهد هنا وقف : خلاص براحتك خليك ساكت ( بص ليزيد ) يزيد هو عمي خالد فين ؟ خليني اروحله واقوله يبعد عن صلاح وما يهددوش تاني يالا !
يزيد : طبعا اتفضل
صلاح مسك فهد من دراعه : يا ابني انت مصر تأذينا انا وانت ليه ! انت ما تعرفش اعمامك ممكن يعملوا ايه ! ابعد عنهم وخليك في حالك وبلاش تدخل عش الدبابير برجليك
فهد : يا تقولي عمي علاء بيقابلك ليه كتير وبينكم ايه وخالد بيهددك بايه يا هروح واعرف منهم هما ؟؟
صلاح : مش هيقولولك حاجه
فهد : يبقي تقولي انت..
صلاح : معنديش كلام اقولهولك واتفضل بقي من غير مطرود من هنا
فهد يدوب هيتكلم بس اتفاجيء بواحده داخله عليهم
مي : عايزو يقولك ايه هاه ! انت جاي هنا ليه اصلا ؟
صلاح : خشي جوه يا مي ومالكيش انتي دعوه
فهد : انتي مين !
مي : انا السبب اللي خلي بابا يطاطي ليهم
فهد : فهميني اكتر
مي بهجوم : افهمك ليه ؟ انت جاي هنا عايز من بابا ايه !! انتم كلكم عيله وكلكم استغلالين ده انت حتي ابن عمك محستش بيه ولا حسيت انك جرحته فجاي هنا ليه !
صلاح : مي اسكتي انتي وادخلي جوه
مي زعقت : لا مش هسكت… انت مالكش ذنب تدفع تمن غلطتي .. وهو لازم يعرف .. لازم يعرف طبيعه عمه علاء وعمه خالد لان الاتنين اوطي من بعض
صلاح هيتكلم بس فهد منعه
فهد : انتي لازم تحكيلي بالتفصيل ايه اللي حصل وليه بتقولي عنهم كده ! وايه دخل ابن عمي ومحستش بيه في ايه !
حكتله مي كل حاجه وصلاح كمل كلامها وحكاله تهديدهم ليه ……
………………
جميله دخلت عند بنت اخوها اللي اول ما شافتها اتعدلت ورمت نفسها في حضن عمتها اللي بتعتبرها ام ليها
جميله : شوفتي بابا يا عمتو ! مش عايزني اروح الشركه تاني ؟
عمتها : وانت دلوقتي زعلانه ليه ؟ علشان الشركه والشغل ولا علشان اللي في الشركه ؟ ليه خرجتي مع فهد النهارده ؟
جميله : كان مخنوق من كل اللي حواليه وحبيت اني اخرجه من خنقته … عمتو فهد مختلف تماما عن اللي انتو فاكرينو .. فهد جواه حنين .. جواه كتير منك بس بيظهر غير كده .. هو محتاج حد يكون جنبه ويشده لبره .. بابا مش فاهم ده
عمتها دموعها نزلوا : ومش هيفهم .. هو اب وخايف علي بنته ..
جميله : بس ده فهد … ابنك
عمتها ابتسمت : ايوه ابني وحته مني بس بالنسبه لابوكي مش اغلي منك انتي بنته ..
جميله : عمتو انا وفهد النهارده في حاجه اتكونت بينا وبعدي دلوقتي عنه هـ ( معرفتش تقول ايه ) …. مش هينفع خالص ابعد دلوقتي ارجوكي كلمي اخوكي
عمتها : واقوله ايه ! سيبيه بس يهدي
جميه عيطت : عمتو انا لازم بكره اروح الشغل لازم والا فهد هيفهم عدم مرواحي غلط ارجوكي
سمعوا صوت وليد بينادي
…………………
وليد مع عماد في البلكونه
وليد : ليه عايز تمنع بنتك تروح الشركه ؟
عماد : انت رجعت والبركه فيك خليها هيا كمان ترجع شغلها
وليد : عماد بصلي وانت بتكلمني ! ليه عايز جميله تسيب الشغل مع فهد ؟ علشان السينما ؟
عماد بصله : انت عارف ؟
وليد : ايوه استأذنت عمتها قبل ما تروح
عماد وقف : وانتو وافقتوا ان بنتي تخرج معاه ! طيب ليه ؟ علشان ابنكم ؟
وليد : ينفع تهدي علشان نعرف نتكلم ولا ما ينفعش ؟
عماد : هديت اهو اتفضل
وليد : انا محتاج بنتك تفضل في الشركه ومحتاج انها تقرب من فهد اكتر من كده ينفع ولا مش هينفع ؟
عماد بصله : انت بتطلب مني طلبك ده ازاي ؟ عايزني اسمح ان بنتي تقرب من راجل غريب وتخرج معاه
وليد : الراجل ده ابني يا عماد مش راجل غريب
عماد اتنرفز : لا مش ابنك يا وليد .. انتو بتضحكوا علي نفسكم ده مش ابنكم .. اه ممكن تكونوا خلفتوه لكن ابنك اللي تربيه يا وليد مش اللي تخلفه وبس ما تطلبش مني اضحي ببنتي علشان خاطر وهم ابنك .. ابنك نسخه من ميس واخد اخلاقها ومتربي علي ايديها وانتو عايزين تضحوا ببنتي وتخلوها كبش فدا لابنك صح !!
وليد اتضايق ووقف : طالما انت شايف كده يبقي خلص الكلام يا عماد بعد اذنك
وليد اتحرك ونادي علي جميله : جميله يالا
عماد شد وليد : وليد انا ما اقصدش اللي انت فهمته
وليد : انت خايف علي بنتك ده حقك .. جميله يالا
جميله خرجت ووراها بنت اخوها
جميله : في ايه مالك يا وليد ؟
وليد : يالا هنمشي
جميله بصت لاخوها
عماد : جميله هدي جوزك وخليه يقعد يستني يفهم
وليد : ولا افهم ولا ما افهمش .. خلاص يا عماد .. انت خايف علي بنتك من ابني فخلاص حقك يا سيدي
جميله بصت لاخوها : في ايه مالكم !
عماد : هدي جوزك ممكن
جميله : وليد اهدي خلينا نتكلم في ايه مالك ؟
وليد زعق : في اني بقالي عشرين سنه بحلم باللحظه اللي ارجع فيها بيتي لمراتي ولابني ولما رجعت ملقتش حاجه وانتو مستكترين عليا اني ارجع اللي راح مني
جميله : وليد انا خايفه عليك
وليد : وانا يا جميله مش هسيب حقي ابدا ولا هسيب ابني ليهم .. وهرجعه بمساعدتكم ( بص لعماد ) او من غيرها .. يالا ولا هتفضلي هنا في بيت اخوكي انتي كمان ؟
وليد خرج وجميله بصت لاخوها
عماد : انا خايف علي بنتي يا جميله ارجوكي فهميه
جميله بصتله بتفهم : حقك تصبحوا علي خير
خرجت وري جوزها وقابلت وليد في وشها
وليد : عمتو وحشتيني .. عمو وليد مالو واخد في وشه
جميله : حبيبي بعدين ابقي تعال عندي ماشي سلام دلوقتي
وليد دخل مش فاهم مالهم وشاف ابوه واخته بتعيط
وليد : هو في ايه مالكم ؟ وعمتو زعلانه ليه ؟ وجوزها نازل بسرعه ليه ؟
عماد زعق : انا مش عايز بنتي تشتغل في الشركه انا حر ..
وليد : بس ليه دلوقتي ؟ ده بالعكس دلوقتي عمو وليد ممكن يحتاجها تكون عين ليه في الشركه
عماد : عارف وعلشان كده انا منعتها تروح
دلوقتي بالذات ابواب جهنم كلها هتتفتح بمجرد ما يعرفوا ان وليد عايش بوابه جهنم هتتفتح ومحدش هيقدر يقف في وشها وانا مش عايز اخسركم فانتو الاتنين هتبعدوا عن كل حاجه تخص وليد نصّار
وليد : احنا الاتنين ؟
عماد : ايوه انتو الاتنين وده اخر كلام عندي اتفضلوا علي اوضكم
عماد قعد مع نفسه مخنوق .. عمره ما كان قليل الاصل او اناني وحتي لو هيكون اناني مش هيكون اناني علي اخته .. اخته اللي ياما ضحت علشانه ولسه لحد النهارده بتضحي علشانه .. دي اتجوزت وليد علشانه واتحملت علشانه واتعلم بفضلها وسافر بفضلها واتجوز بفضلها ولما مراته ماتت كانت ام لعياله .. هو مستعد يضحي بحياته علشانها بس مش قادر يضحي ببنته .. دي بنته وحته منه ازاي يسيبها تدخل لحرب هو عارف انها مش قدها .. بس برضه دي اخته ودي بنته ازاي الواحد يختار بين اخته وبنته ! وايه الصح ؟ معدش قادر يفكر ولا عارف اصلا يفكر !! مش عايز يزعل جميله ولا يزعل وليد بس المقابل صعب قوي .. صعب قوي ومش قادر عليه …..
وليد وجميله روحوا بيتهم وبعد ما دخلوا
جميله : ينفع بقي تقولي ليه اتنرفزت كده علي عماد ! علشان خايف علي بنته ؟ هتمنعه انه يخاف علي بنته ؟
وليد : جميله ! تصبحي علي خير دلوقتي
جميله وقفت في وشه : قولي بتخطط لايه ؟ وليه عايز جميله في الشركه ؟
وليد : بقولك ايه ! اخوكي خايف علي بنته خلاص حقه محدش يقدر يقول حاجه .. خلص الكلام بقي هنا .. تصبحي علي خير
جميله : طيب انت بتتنرفز عليا انا ليه ؟
وليد زعق : جميله انا علي اخري اذا سمحتي سيبيني دلوقتي انا خارج سلام
جميله جريت وراه : استني انت قولت مش لازم حد يشوفك هتروح فين ؟
وليد : جميله اذا سمحتي ارجوكي سيبيني دلوقتي
سابها وخرج وهيا فضلت علي نار منتظره واخوها اتصل بيها فطلعت غيظها عليه
عماد : يا جميله اهدي انتي كمان
جميله : يعني انا مش فاهمه ليه دلوقتي ؟ ما انا قلتلك في الاول بلاش وانت وافقت ووديتها
عماد : جوزك رجع
جميله : ومحتاج لمساعدتنا يا عماد
عماد : يعني علشان اساعده ارمي عيالي في النار يا جميله ؟ دي بنتي
جميله : وفهد ابني
عماد : عارف بس قدري يا جميله
جميله : حاضر يا عماد هقدر .. هقدر خوفك علي عيالك .. هنبعد انا وجوزي عنك وعن عيالك تصبح علي خير خلي عيالك في امان وابعد عني مبسوط كده يا عماد !
قفلت السكه في وشه وعيطت هو اخوها ومن حقه يخاف علي عياله بس ما تخيلتش ابدا انه ممكن يتخلي عنها كده .. دي قضت عمرها كله تربي عياله دول ………
وليد نزل الشارع يتمشي لانه مخنوق ومش عارف يعمل ايه او يروح فين ! مراته ومستخبي معاها ، ابنه ومش مسموحله يشوفه ، امه ومت ينفعش يشوفها ، اخته ومش عارف يطمن عليها ، حس بخنقه كبيره وانه مش قادر حتي يتنفس علي الرغم من الهوا اللي حواليه .. الكل اتخلي عنه حتي اقرب الناس ليه عماد خايف علي عياله منه .. عماد متخيل انه ممكن يضحي بعياله علشان خاطر ابنه .. للدرجه دي عماد شايفو اناني كده ! ده مصيبته كلها في الحياه انه مش اناني يمكن لو كان اناني مكنش كل ده حصله .. لف كتير بعربيته لحد ما لقي نفسه قدام بيته منتظر علي بابه يمكن يلمح ابنه داخل او ندي مثلا خارجه .. يلمح اي حد يبرد ناره اللي جواه .. قعد كتير لحد ما لمح يزيد وفهد اللي نزل من عربيه يزيد ووقف شويه يتكلم معاه ..
وليد مراقبهم من بعيد واتمني لو ينزل من عربيته ويروح لفهد يضمه او يتكلم حتي مجرد كلام معاه .. يقوله ان هو ابوه .. يقوله انه اتحرم منه غصب عنه .. يضمه لصدره ولو مره .. يتكلم معاه .. اي حاجه بس يقرب منه … ابنه قدامه وممنوع يكلمه بقي في اصعب من كده !!
……………..
يزيد وصل فهد بيته وفهد نزل من عربيه يزيد ووقفوا يتكلموا شويه
يزيد : بتفكر في ايه ؟
فهد : عايز الفيديوهات اللي مع علاء تعرف ؟
يزيد : هحاول
فهد : عايزها يا يزيد
يزيد : حاضر
فهد : وعايز حراسه علي بيت صلاح بدون ما يحس وبنته لو راحت الجامعه حد يكون وراها ومراته كمان
يزيد : حاضر .. ناوي علي ايه ؟
فهد : عايز اعرف كل حاجه عن ابويا وعن جميله .. عايز اعرف هيا فين واختفت ليه ؟ عايز اعرف ميس فعلا حاولت تقتل وليد ؟
يزيد : لو اتعملها محضر واتحبست فدي سهل جدا نعرفها . المهم ينفع دلوقتي احط حراسه عليك انت ؟
فهد ابتسم : انا لأ
فهد روح بيته وطلع قابلته ميس
ميس : ممكن اعرف انت كنت فين ؟ وليه مشيت بدون ما تمضي علي العقد ؟
فهد : كان ورايا مشاوير بكره ان شاء الله هبقي اشوفه
ميس : اقف هنا وكلمني .. انت هتفضل لحد امتي كده ! انت بتهمل كل حاجه شغلك ، خطيبتك ، انا ، كل حاجه
فهد : حاضر ممكن بقي انام ؟
سابها وطلع اوضته وبيفكر في اليوم كله وافتكر لحظاته مع جميله .. مسك موبيله وفكر يكلمها بس تراجع .. هيقولها ايه !
الصبح نزل لقي سالي مع ميس واتخنق من مجرد وجودها
ميس سبقتهم علي الشركه وسالي قعدت مع فهد بتحاول تتكلم او تشده لها او تشد انتباهه بس فشلت
ركبت معاه يوديها الشركه وبتقلب في العربيه بدلع لقت تذكرتين السينما
سالي : انت روحت السينما ؟
فهد بص للتذكرتين : اه روحت
سالي : مع مين ؟ وليه ؟
فهد : هو انتي بتحاكميني ؟ روحت مع اللي رحت معاه مش تحقيق هو
نزلوا وهيا داخله عند ميس سمعت مني بتكلم جميله في التليفون
مني : بجد دخلتي السينما امبارح ؟ اخص عليكي يا جميله مش كنتي تقوليلي كنت رحت معاكي ؟ روحتي مع اخوكي الكيوت اللي جابلك البيتزا ؟ هنيالو يا عم
سالي وقفت وهتموت من غيظها .. هيا وصلت للسينما ! ماشي يا فهد انا هريحك منها خالص …..
فهد فضل كتير منتظر جميله وكل شويه يقوم يشوفها في مكتبها وما يلاقيهاش وسالي مرقباه ومراقبه تصرفاته واتجننت جدا
فهد دخل مكتبه واخيرا مسك موبيله واتصل بيها واول ما ردت انفجر فيها
فهد : يعني ماشي قولتيلي انه غلط بس ده مش معناه انك تسيبي الشغل ؟ ارجعي شغلك ووعد مني حتي الكلمه مش هوجههالك .. بس ارجعي شغلك .. مش هضايقك تاني يا ست جميله
جميله : علي طول متسرع وغبي
فهد : انتي عايزه ايه دلوقتي مش انتي غيبتي اهو من شغلك !
جميله : غيبت لاني رجعت لقيت بابا علي اخرو ولما سألني مقدرتش اكدب فقولتله اني دخلت معاك سينما وهو اتجنن عليا
ومنعني اجي الشركه فهمت بقي يا غبي
فهد : انتي منتظره مني ايه ؟ اجي مثلا ؟ انا قولتلك اني خاطب ومش هسيب خطيبتي انا مش فاهم انتي بتطلبي مني اعمل ايه بالظبط ؟
جميله : لا مش بطلب منك اي حاجه ومش عايزه اي حاجه منك خلاص ارتاح فهد بيه
فهد قفل السكه ومش عارف يعمل ايه ؟
هو خاطب ونبهها وهيا اللي رفضت تنبيهه فهو مش غلطا
رواية جميله الجزء الثاني للكاتبه شيمو
الحلقه العشرون
جميله : لا مش بطلب منك اي حاجه ومش عايزه اي حاجه منك خلاص ارتاح فهد بيه
فهد قفل السكه ومش عارف يعمل ايه ؟
هو خاطب ونبهها وهيا اللي رفضت تنبيهه فهو مش غلطان ابدا ..
مره واحده قام من مكتبه وطلع بسرعه مش عارف هيعمل ايه !
سالي قابلته في وشه : انت رايح فين ؟
فهد من غير ما يقف : مالكيش دعوه
سالي بعد ما مشي : ماشي يافهد ان مخليتك تتحسر عليها ما ابقاش انا سالي نصّار
……………
جميله لبست وطلعت لابوها
عماد : سيادتك لابسه ورايحه فين ؟
جميله : بابا ارجوك انا لازم اروح الشركه ما ينفعش في التوقيت ده بالذات انا ابعد
عماد : لا يا جميله مش هتروحي
جميله : بابا عمتو هتتخلى عنها دلوقتي ! عمي وليد محتاجني في الشركه و
عماد قاطعها : انتي رايحه علشان خاطر فهد وبس فارجوكي يا جميله بلاش تنزلي من نظري اكتر من كده وتحسسيني بخيبة امل فيكي اكتر من كده .. انا لاول مره ازعل اختي مني وازعل جوزها وللاسف انتي السبب … انتي حطيتيني في موقف صعب قوي يا جميله .. حطيتيني في اختيار من اصعب ما يكون فارجوكي بلاش علشان الموضوع لسه هيتطور اكتر من كده علي الاقل دلوقتي زعل محدش عارف لو استنيت اكتر هنوصل لايه فلأ مش هتروحي الشركه
جميله : بابا سيبني اروح واوعدك اني مش هكلم فهد وهركز في اللي عمي وليد عايزو وبس
عماد زعق : وليد عايز ينتقم من اللي قتلوه وحبسوه وهتبقي حرب وهتكون مجزره والدم هتلاقيه بحور الناس دي ما بتتفاهمش بالعقل وانا معنديش استعداد اخسرك انتي او اخوكي فاقفلي بقي الكلام لحد هنا وادخلي اوضتك ….
دخلت اوضتها تعيط مش عارفه تتصرف ازاي او هتعمل ايه ……
فهد لقي نفسه قدام بيت جميله ووقف كتير متردد مش عارف يعمل ايه او هيقول لابوها ايه ؟
نزل وخبط وفتحله عماد اللي اتفاجيء بيه قدامه لان ده كان اخر شخص متوقع انه يزوره …
عماد بجمود : نعم !
فهد : ينفع ادخل ولا هتقفل بابك في وشي ؟
عماد حس بإنه ظلم اخته جامد بسبب وقفة ابنها علي بابه كده يستأذنه ان كان يدخل بيته او لأ ، فتح الباب
عماد : طبعا اتفضل ده بيتك يا ابني
فهد استغرب الكلمه قوي بس تجاهلها
فهد : هو سؤال واحد اتمني تجاوبني عليه ! انت ليه منعت بنتك تيجي الشركه ؟
عماد اخد نفس طويل : انت عارف كويس اجابة سؤالك
جميله واقفه علي باب اوضتها وفهد لمحها وبصلها كتير وعماد كمان شاف نظرته ليها …
فهد بص لعماد : علشان خرجنا امبارح ؟ هو ده سببك ؟
عماد : يا ابني انت من توب غير توبنا ممكن يكون عندك عادي الكلام ده لكن احنا لأ فارجوك اذا سمحت
فهد : طيب يا عمي براحتك طبعا بنتك تنزل الشغل او لأ ده شيء يرجعلكم بس انا اوعدك اني من هنا ورايح مش هيكون في بينا اي كلام الا في نطاق الشغل وبس حرف زياده مش هيحصل واسف جدا اني اعتبرت نفسي منكم او اني ليا حق في البيت ده .. انا مش عارف حضرتك هتفهمني ولا لأ بس من اول مره دخلت فيها البيت ده وقابلت اخت حضرتك مش عارف بس حسيت ان ده بيت تاني ليا وان حضرتك وحضرتها ……. ( معرفش يكمل ويقول ايه لانه هو مش فاهم مشاعره ) وبناءا عليه اتعاملت مع جميله ووليد بشكل مختلف عمري ما اعتبرتها موظفه او وليد دكتور عند جدتي .. مش عارف انا اعتبرتهم ايه بس معاملتي معاهم كانت مختلفه عن معاملتي مع اي حد … انا عارف اني بتكلم كلام كتير مالوش اي معني بس اسف مره تانيه واسف اني اديت لنفسي حق مش حقي … باشمهندسه جميله هتكون مجرد موظفه ودكتور وليد مجرد دكتور وانا مجرد مدير شركه بنتك شغاله فيها .. واوعدك ان البيت ده مش هدخله تاني باي صفه وحضرتك مش هتشوفني تاني … اعتقد كده انا مش غلطان ؟ بنتك في امان مني في شركتي بعد اذنك
فهد مشي خطوتين وعماد وقفه : انا عندي سؤال واحد ليك جاوبني عليه
فهد وقف وبصله
عماد : انت اسمك ايه ؟
فهد استغرب سؤاله وبصله : نعم ؟
عماد : جاوبني وقولي اسمك ايه ؟
فهد : اسمي فهد وليد نصّار
عماد هنا ابتسم وقرب منه ومسكه من اكتافه : البيت ده لو انت اعتبرته بيتك فهو فعلا بيتك و وليد وجميله دول …….. دول إخواتك وانا واختي اهلك وعمر ما البيت ده في يوم من الايام هيتقفل في وشك انت فاهم ! ( نادي ) جميله تعالي ( جميله قربت ) انزلي مع فهد شغلك … انا واثق ان بنتي هتكون في امان يا ابن وليد نصّار
جميله ابتسمت ونزلت مع فهد اللي ماشي متلخبط اكتر من الاول ومش عارف ايه اللي بيحصل حواليه ومشاعرو دي متلخبطه كده ليه !
عماد نزل وراح بيت اخته خبط واخته فتحتله ودخل سلم علي وليد وقعد وصمت مسيطر علي الكل
عماد : وليد انا
وليد قاطعه : لو جاي تبرر منعك لبنتك انها تشتغل فأرجوك بلاش .. دي بنتك وده حقك وخوفك عليها طبيعي
عماد : ولما هو طبيعي ليه نظراتكم دي ليا وكأني ارتكبت ذنب فظيع ؟
وليد : لانك يا عماد تخيلت ان انا او اختك انانين لدرجه اننا ممكن نضحي بعيالك علشان خاطر ابننا … نسيت ان جميله و وليد دول زي ما هما عيالك فدول عيال جميله اختك وهيا اللي ربتهم وغلاوتهم من غلاوه فهد ويمكن اكتر كمان ..
عماد وقف : عارف الكلام ده .. انا اسف يا وليد … اسف يا جميله حقك علي راسي .. حقكم عليا بس لما شوفتها بالليل نازله من عربيته بعيد عن البيت ودخولها متأخر حسيت اني ممكن اخسرها … ما فكرتش واتصرفت بغباء وبعدين ما انتو طول عمركم عارفين اني غبي .. مش جديد عليا الغباء ده
وليد ابتسم : ما تتأسفش يا عماد انت مش غلطان .. الواحد لما سلامه ابنه بتتعرض لخطر مش بيفكر بعقله
عماد : يعني مش زعلان مني ؟
وليد : عيب عليك احنا اخوات
بص لجميله اخته : وانتي مش زعلانه ؟
جميله بحب : هو انا عمري زعلت من حد علشان ازعل منك يا عماد !
عماد حضنها واتأسفلها هيا وجوزها وقعدوا مع بعض
عماد : علي فكره فهد جالي البيت واخد جميله ونزل الشركه
وليد بصله هو وجميله وهو حكالهم بالتفصيل كل الحوار اللي دار
عماد : انا سبق يا وليد وقلتلك ان فهد ابن ميس بس كنت غلطان .. فهد ابنك انت وحته منك انت .. اللي كان واقف قصادي النهارده كان ابنك …
……………….
فهد في العربيه في صمت تام مع جميله
فهد : وبعدين ! ساكته ليه ؟
جميله : انا موظفه في الشركه وانت وعدت بابا ان كلامي مش هيتخطي حدود الشغل فحافظ علي وعدك
فهد بصلها : انتي عايزاني احافظ علي وعدي
جميله : طالما انت مش قد انك تغيره يبقي حافظ عليه
فهد : يعني ايه مش فاهم !
جميله : معاك لما تفهم لوحدك يا فهد نصّار
وصلوا الشركه وسالي كانت واقفه في مكتب فهد منتظراه وتليفونها رن كان بتاع الامن اللي علي البوابه
سالي : ايوه
الامن : فهد بيه وصل علي البوابه ومعاه باشمهندسه جميله
سالي قفلت التليفون وقامت بصت عليهم من الشباك
شافت جميله نازله و فهد جنبها وقفها وقالها حاجه وجميله دخلت وهو ركب عربيته ومشي
فهد نزل مع جميله وبعدها افتكر معاده مع يزيد
فهد : جميله انا ورايا مشوار مهم ادخلي انتي الشركه
جميله : حضرتك مش ملزم تقولي تحركاتك يا فهد بيه
فهد بصلها بغيظ : مش رايقلك دلوقتي
سالي فوق في المكتب وجواها غيظ بيكبر وكره كبير لجميله
خرجت من الشركه وراحت تشرب علي بار متعوده تروحله ديما وبتشرب بغيظ من فهد ومش عارفه تعمل ايه لجميله
الجرسون بيصبلها كاس : بدري يا هانم علي الشرب علي الصبح
سالي : وانت مالك انت ؟
الجرسون : يعني لو حد مضايق حضرتك احنا نأدبهولك
سالي انتبهت : هو لو انا فعلا عايزه أأدب حد او اخلص منه هتساعدني ! تعرف حد يخلصني من حد مضايقني ؟
الجرسون بص حواليه : مش هنا يا هانم الكلام ده ..
سالي : عايزه اخلص من حد وامحيه تماما من علي وجه الارض
الجرسون : طيب انا ورديتي هتخلص بعد عشر دقايق اقابلك بره ؟
سالي : تمام
سالي خرجت وانتظرت الجرسون اللي خرجلها بعد شويه وركب معاها واتحركت بيه
سالي : تقدر تخلصني ازاي ؟
الجرسون : انتي عايزه تخلصي تماما من الشخص ده وما يكونلوش اثر ولا حد يعرفله طريق تاني صح كده ؟
سالي : ايوه صح ازاي بقي !
الجرسون : انا اعرف ناس يخلصوكي من اي حد مضايقك بس شغلنا مفيهوش تراجع نهائي .. هتصدري الامر الموضوع هيخلص
سالي بابتسامه : امتي ؟
الجرسون : الوقت اللي تحبيه
سالي : هتعمل ايه ؟
الجرسون : هيا الاول بصحتها ولا بعافيه !
سالي باستغراب : بصحتها طبعا دي صغيره في السن زي كده
الجرسون : عز الطلب اسمها وعنوانها وحددي الوقت
سالي : طيب الاول عرفني هتعمل فيها ايه ! انا عايزاها تعاني مش تنتهي بسهوله كده !
الجرسون : احنا هناخد كل اعضاءها دي معاناة كفايا بالنسبه لحضرتك ولا ايه !
سالي ضحكت جامد جدا : تاخد كام وتنفذ النهارده !
الجرسون : النهارده مش هينفع .. النهارده حضرتك تديني معلوماتها وبكره باذن الله ننفذ او بعده بالكتير واللي حضرتك تجودي بيه انا راضي بيه .. بس اعضاءها احنا هناخدها
سالي ضحكت : اشبع بيها بس بعد ما تاخدوا كل اعضاءها عايزه صوره ليها تذكار … قبل وبعد
الجرسون : بس كده حضرتك تشاوري
سالي : بس مكنتش اعرف انك حته جرسون ويطلع منك كل ده !
الجرسون : انا شغال في مكان كل اللي فيه معاهم فلوس وكتير قوي وكتير بيشرب ويفضفض بكل اللي مضايقه .. اللي عايز عيل ! اللي عايز واحده ! اللي عايز عضو لحد عيان ! اللي عايز يخلص من حد !! فأنا في مكان حيوي وانا بصطاد اللي بيفضفضوا دول ..
سالي : وبتكسب من الشغلانه دي !
الجرسون : اهو بنقلب رزقنا يا هانم
سالي : لو خلصتني من المصيبه دي مش هخليك تحتاج تشتغل تاني
الجرسون فرح جدا بكلامها واخد اسم جميله
الجرسون : عنوانها بقي يا هانم
سالي : معرفوش بس هيا بتشتغل في الشركه وبتروح يوميا بتاكسي
الجرسون : خلاص يا هانم ده كفايا معاكي صوره ليها !
سالي : طبعا
بعتتله صورتها من علي موبيلها
الجرسون : بس خساره في الموت دي
سالي بضيق : نعم انت بتقول ايه!
الجرسون : ولا حاجه يا هانم هنفذ وابلغك
سالي روحت مبسوطه جدا وبتحلم ببكره وانها تخلص من جميله ويفضي فهد لها تماما …
……………..
علاء نازل من شركته وحس بحد وراه وبص اتفاجيء بمي
آسر كان نازل ولمحها قدامه وكان هيجري يلحقها بس علاء شافها فوقف مكانه .. وبعدها شاف مي بتركب مع علاء العربيه ومشي بيها وده ضايقه لاقصي حد ومش عارف ليه اتضايق كل ده
علاء : نعم عايزه ايه يا مي ؟
مي : انت
علاء : نعم يا اختي !
مي : انا اتجوزتك علشان بحبك
علاء: انتي عبيطه يا بت ولا هبله !
مي: علشان حبيتك !
علاء : انتي هبله ولا ايه ! حب ايه وزفت ايه انا بس كنت عايز اوصل لابوكي
مي : عارفه وبعدين ؟
علاء مش فاهم : وبعدين ايه انتي غبيه ولا ايه !
مي : انا حبيتك يا علاء .. سواء كنت بتضحك علي ابويا او بتضحك عليا المهم اني حبيتك
علاء : وعايزه مني ايه ؟
مي : انا مراتك يا علاء .. مراتك فاهم ؟ وعايزه ابقي مراتك بجد
علاء: انتي فاهمه انتي بتقولي ايه ولا انتي غبيه فعلا !
مي : يعني انت مش عايزني خلاص
علاء : انا مش بتاع جواز
مي : وانا ما طلبتش منك تاخدني للمأذون
علاء بصلها : قصدك ايه !
مي ضحكت : وتقول عليا انا اللي غبيه
علاء ضحك : يعني انتي مش غبيه انتي بس …..
مي : ايوه انا بس ا…… انت اللي بتترجم غلط
علاء : غلط مش هيتكرر … نطلع علي شقتي !
مي ضحكت : اطلع علي شقتك
راحت معاه الشقه ودخلوا وهو يدوب هيقرب منها
مي : لا ما تبقاش غشيم كده و واحده واحده عليا
علاء : براحتك
مي : عندك حاجه تتشرب !
علاء شاورلها علي البار : اختاري ما بدالك
مي ضحكت : عندك تلج ؟
علاء دخل معاها : الكاسات عندك واختاري هنشرب ايه وانا اجيبلك التلج
طلع التلج وهيا طلعت الكاسات
مي : ما تغير هدومك دي
علاء : ومالو اغير
دخل غير هدومه وهيا صبت الكاسات وراحتله : ادخل
علاء : طبعا
دخلت كان لابس بنطلون وعليه روب مقفول وهيا ناولته الكاس بتاعه وشربه مره واحده وحاول يقرب بس بعدت
مي : شغلي مزيكا
علاء : يووووه حاضر
شغلها مزيكا وهيا زقته قعدته علي السرير : انا هرقصلك
واتحزمت وبدئت تتحرك
علاء : طيب اقلعي الاول
مي : اتقل
علاء بدأ يدوخ ومي عطته الكاس بتاعها شربه ومره واحده وقع من ايده الكاس
علاء : انتي مين ؟ انتي فين ؟ هههه علاء بيغني ومش في وعيه نهائي
ومي بصتله بحقد وكره وقفلت المزيكا وخرجت فتحت باب الشقه
صلاح : انتي كويسه
مي : انا بخير
يزيد : طيب استاذ صلاح خد بنتك واتفضلوا من هنا
صلاح : انا عايز اكون موجود
فهد : اذا سمحت الباقي ده بقي خليه علينا .. وبعدين بنتك مش حلو يعني تشوف اللي هيحصل
صلاح : انا اسف يا فهد اني شككتك في اخلاق والدك .. حقك عليا
فهد ابتسم : ده كان غصبا عنك
صلاح هو و مي مشيوا وفهد ويزيد دخلوا وعملوا كل المطلوب منهم ومشيوا هما كمان …
((ايميلي باسم Shimooelwady))
علاء صحي بالليل مستغرب هو فين والدنيا ظلمه حواليه واتعدل وقام من سريره وحسس بايده لحد ما نور النور .. كان من غير هدومه وحاول يفتكر ايه اللي حصله بس مفيش مجرد صداع وبس .. افتكر مي ودخولها معاه وبس مش فاكر حاجه تانيه …
الصبح راح الشركه ودخل لقي محي عايزو في مكتبه وراحله كان صلاح وخالد في انتظاره
محي : اهو علاء وصل اهو ! اتفضل قولي عايز ايه !
صلاح ابتسم وطلع CD عطاها لمحي
محي : ايه دي !
صلاح : شغلها
محي شغل السي دي وكان فيها علاء بدون ملابس تماما وبيرقص بطريقه مقززه ومعاه بنت مش ظاهره بس البنت حزمته وهو بيرقص
محي قفل الفيديو وبص لعلاء اللي وشه احمر جدا
علاء : انت اتهبلت الفيديو ده متفبرك
صلاح : هو انت كنت فين امبارح ياتري
علاء افتكر : انت بعت بنتك ليا ! وخدرتوني .. انا
صلاح : فيديو قصاد فيديو .. والله انا راجل مش معروف واه بنتي هتتفضح بس محدش هيعرف مين دي وهاخدها واسافر ونبدأ من جديد انا شركتي وخسرتها لكن انت رجل اعمال ليك اسمك في السوق ولك وضعك والكل هيشاور عليك فتعال كل واحد ينشر الفيديو اللي معاه ونشوف مين هيخسر
علاء مسكه من هدومه بس محي وقفه
محي : عايز ايه !
صلاح : الفيديو بتاع بنتي و ورقه العقد العرفي ويطلقها
محي : وفهد !
صلاح : ماليش علاقه بيه انا هاخد بنتي واسافر زي ما قلت تديني الفيديو بتاعي واديك بتاعك ويادار ما دخلك شر انتو في حالكم وانا في حالي
خالد : وايه اللي يضمنا انك ما تجيش تبتزنا تاني
صلاح : نفس الضمان اللي يضمنلي انكم انتو كمان ما تهديدونيش تاني
محي : علاء اديه الفيديو بتاع بنته و العقد وطلق بنته
علاء طلع موبيله وفتحه وفتح فيديو مي
علاء : اتفضل امسحه بايدك
صلاح اخد الموبيل ومسحه من كل مكان زي ما يزيد فهمه بحيث ما يعرفش يرجعه تاني
صلاح ابتسم وبص لعلاء : دلوقتي طلق بنتي
علاء : هديك الورقتين قطعهم
صلاح : برضه احب اسمعها منك قولي بنتك طالق بالتلاته
علاء بغيظ : بنتك مي طالق مني بالتلاته .. مبسوط كده !
صلاح : ودلوقتي هات الورقتين
علاء خرج راح مكتبه ورجع بالعقد العرفي الورقتين عطاهم لصلاح اللي ابتسم اخيرا …
وصلاح عطاهم السي دي مع وعد ان مفيش نسخ تانيه وهو خارج خالد مسكه من ياقته
خالد : انت نبشت قبرك بايدك واوعدك اني هقتلك بايدي
صلاح ابتسم : تعملها يا خالد بيه ؟
خالد : اعملها ؟ ده مش بس اعملها ده انا كمان هشرب من دمك فاهم
صلاح طلع موبيله وحطه علي ودنه : سجلت كلامه !
خالد شد من ايده الموبيل وسمع الطرف التاني : سجلت تهديده طبعا
خالد مسكه من رقبته بس محي وقفه
محي : سيبه
صلاح قفل موبيله : ده مجرد ضمان بسيط في حاله فكرت تخل باتفاقك
خالد ابتسم : مين قال ان الاذيه تنفع معاك انت بس !! اوعدك اني هدفعك التمن غالي قوي وبدون ما المس شعره واحده منك … خاف بقي علي اللي في بيتك
صلاح وهو خارج كان فهد داخل وقابله وبصله كتير
فهد : انت بتعمل ايه هنا ؟
صلاح : شغل مع اعمامك وخلصته
سابه ومشي وفهد دخل لاعمامه وحس بالجو المتوتر
فهد : في ايه والراجل ده بيعمل ايه هنا؟
محي : بيبتزنا .. اننا ندفعله فلوس والا هيجي يتهمنا ويوسخ صورتنا قدامك
فهد : وخارج مبسوط ليه ! اوعي تكون عطيته حاجه
محي : لسه بس قلت نشوف رأيك انت ايه !
فهد طلب الامن اللي علي البوابه وكلمهم : صلاح عبد الكريم ما يدخلش الشركه تاني فاهمين ولا لأ ؟
الامن : حاضر يا افندم
محي ابتسم ان فهد معاهم علي الخط
علاء خارج من الشركه هيتجنن وعلي اخرو واتقابل هو وميس علي باب الشركه
ميس : مالك ودانك حمرا وبتطلع نار
علاء : انا ابن الكلب ده يلعب عليا ؟؟ انا يتعمل فيا اللي بعمله في الناس ؟
ميس ضحكت : اتعمل فيك ايه ؟ تعال تعال احكيلي .. تعال اركب معايا بدال ما تعمل حادثه تاخد بأجلك
علاء ركب معاها وطول الطريق هيولع وهيا بتضحك عليه .. سهروا الاتنين مع بعض وشربوا كتير واخر الليل ميس روحت سكرانه و فهد قابلها وحطها في سريرها وهو علي اخره منها … واستغرب لان عمرها ما كانت كده ….
………………..
وليد كان عند نبيله وميس انتظرته وهو خارج
ميس : وليد تعال
وليد وقف قصادها : نعم اتفضلي
ميس حطت ايدها علي ياقه قميصه : انت ليه عصبي ديما كده بس
وليد شال ايدها بعيد : ده الطبيعي بتاعي انا مش عصبي ولا حاجه
ميس : انا علي فكره ممكن احققلك كل احلامك واكبر كمان من احلامك
وليد : وانا يا افندم احلامي بسيطه جدا ومش محتاج لمساعده في تحقيقها
ميس : انا ممكن افتحلك مستشفي خاصه !!
وليد فكر لحظه وبتريقه : سوري مش محتاجها
ميس : عربيه اخر موديل
وليد : عربيه ابويا زي الفل
ميس : تسافر بره ؟ اي شيء بتحلم بيه
وليد : للاسف احلامي بعيده تماما عن طموحاتك يا هانم بعد اذنك
ميس : انا ما خلصتش كلامي نبيله هتخلص جلساتها امتي ؟
وليد : ده شيء في علم الغيب .. جلسات العلاج الطبيعي ممكن تستمر لفترات طويله
هنا امل دخلت مبتسمه هيا وندي
وليد ابتسم اول ما شافها وسلم عليهم
وليد : طيب استأذن انا
امل : مامي انا رايحه النادي باي
ميس : استني هنا .. مش هتسلمي علي جدتك !
وليد همس لامل : هنتظرك بره
سابها ومشي وهيا طلعت لجدتها سلمت عليها وميس حاولت تعطلها بس برضه امل سابتهم وجريت لوليد اللي منتظرها بره
امل : اتاخرت سوري
وليد بزعل مصطنع : لطعتيني كل ده اعمل بيها ايه سوري ؟
امل زعلت : حقك عليا اسفه بس طنط ميس
وليد قاطعها : مفيش فايده فيكي انتي لا يمكن
امل كشرت : اخص عليك بقي
وليد مسك ايدها وركبها عربيته واخدها وطلعوا بعيد
ميس مع ندي
ميس : انتي مش ملاحظه ان وليد عينه علي امل ؟
ندي : وفيها ايه ؟ شاب محترم جدا ودكتور وظريف
ميس اتجننت : انتي اتجننتي ولا ايه ؟
ندي : بنتي مالكيش دعوه بيها يا ميس واللي يختاره قلبها تاخده ..
…………..
عدى يومين وكل الامور هاديه تماما
وليد مع جميلته سرحان وهيا قربت منه وقعدت جنبه
جميله : مالك يا سيد الناس كلها !
وليد ابتسم لها : ما اتحرمش منك يا عمري سلامتك .. مفيش
جميله حطت ايدها علي شعره بحب : لا بجد فيك ايه وبتفكر في ايه !
وليد اتنهد واخد نفس طويل : عايز اشوف امي يا جميله .. لازم اشوفها
جميله : طيب ازاي !
وليد : مش عارف فعلا .. اروحلها الفيلا ! بس دي مخاطره انا في غني عنها !!
جميله بحب : اصبر يا حبيبي .. عارفه ان الصبر صعب بس معلش اصبر
وليد بصلها كتير : عندك حق مقدمناش غير الصبر … نصبر يا جميله عمري
اما في الشركه :
جميله بتتجاهل فهد وهو مش عارف يعمل ايه بس بيشوفوا بعض من بعيد لبعيد تماما ومفيش حرف بينطقوه لبعض وسالي ملاحظه نظراتهم .. كلمت الجرسون وقالتله ينفذ النهارده لان جميله ماشيه اخر النهار وهتكون متأخره وتقريبا مفيش حد في الشركه …
بتوع الامن علي الباب واقفين واحد اسمه منصور و واحد اسمه سيد
سيد : واد يا منصور هو التاكسي ده واقف كده ليه ؟
منصور : عطلان يا عيني وبيحاول يصلحه
سيد : ده من العصر وهو واقف وادينا المغرب اهو
منصور : اهو جاب ميكانيكي معاه اهو وبيصلحهالو
سيد : طيب اهو محمد وزكريا وصلوا اخيرا شرفتوا .. هقوم انا بقي اخد حاجتي واروح .. ماشي يا منصور ؟
منصور : ايوه يالا .. انت داخل جوه ؟
سيد : ايوه هجيب حاجتي
منصور : ما تجيبلي معاك شنطتي ؟
سيد : ماشي
دخل سيد يجيب حاجتهم وقابل جميله نازله
جميله : سلام يا عم سيد
سيد : سلام يا ست البنات
ابتسمت وخرجت وشاورت لتاكسي وركبت ومشيت
سيد خرج : خد شنطتك .. التاكسي مشي معقوله ؟
منصور : اه ده حظ باشمهندسه جميله وقفت تشاور لتاكسي وهو اشتغل وجه يوصلها
سيد بص ناحيه التاكسي اللي بعد وقلق ومش عارف سبب للقلق ده .. اخد حاجته ومشي هو ومنصور روحوا بيوتهم
جميله في التاكسي
السواق : شوكلاته يا هانم ؟
جميله : شكرا
السواق : دي بمناسبه جواز اختي .. عارفه انا اهلي اتوفوا من وانا عيل صغير ومعايا اختي واتمرمطت كتير لحد ما اخيرا قدرت بعون الله اجوزها .. ياه ما تتخيليش انا فرحان قد ايه ! حققت وعدي لامي اني استرها الاول واديني اهو جوزتها .. شوفي صورتها
عطاها موبيله وهيا شافت صوره عروسه بسيطه وعريس بسيط جنبها
جميله ابتسمت : ربنا يسعدهم
السواق : تسلمي عقبالك .. اتفضلي بقي شوكلاته فرحهم .. انا كل اللي بيركب معايا بياخد ويباركلي
جميله ضحكت : مبروك وعقبالك انت كمان اخدت واحده وكانت جعانه جدا فأكلتها
جميله : عقبالك
السواق : انا كبرت وبعدين مين اللي هترضي تتجوز سواق تاكسي ده البنات اليومين دول باصين لفوق
جميله : ليه يعني ! مش ….. كل … البنات
جميله حست بنفسها بتدوخ ومش قادره تتكلم وافتكرت الاف التحذيرات اللي كانت بتقراها في الفيس .. وازاي بيخطفوا البنات وازاي وازاي وازاي
وهيا دلوقتي بتتخطف !! كل حاجه مشوشه قدامها
سمعت السواق بيتكلم في موبيله : استوت علي اخرها .. قابلوني وانا هجيبها وجاي وجهز الدكتور الهانم عايزه كل حاجه تخلص النهارده …
اتأكدت جميله انها بتتخطف فعلا والله اعلم ايه اللي هيحصلها ……
……………..
بقلم / الشيماء محمد
رواية جميله الجزء الثاني للكاتبه شيمو
الحلقه الواحده والعشرون
سمعت السواق بيتكلم في موبيله : استوت علي اخرها .. قابلوني وانا هجيبها وجاي وجهز الدكتور الهانم عايزه كل حاجه تخلص النهارده …
اتأكدت جميله انها بتتخطف فعلا والله اعلم ايه اللي هيحصلها ……
طلعت موبيلها كان الواتس مفتوح بعتت رساله لفهد اللي عنيها وقعت عليه
(( الحقني ))
فهد كان قاعد مع يزيد بيتكلموا في خطوتهم الجايه وهيعملوا ايه وجتله الرساله فتحها وكشر
يزيد : في ايه ؟
فهد : جميله باعته رساله بتقولي الحقني
يزيد اتوتر : طيب شوف مالها
فهد بعتلها
(( في ايه وانتي فين ؟))
جميله (( بت ))
فهد بيقري الحروف ومش فاهم
يزيد : ايه ؟
فهد : اهو شوف
يزيد : بت ايه ؟
جميله كملت الكلمه (( خطف))
فهد : بت خطف
يزيد قراها : بتتخطف
فهد وقف : نعمل ايه ؟ اتصل بيها ؟
يزيد : لأ .. لو موبيلها رن هياخدوه منها خليها هيا تتصل
فهد كتبلها : ((اتصلي بيا بسرعه ))
جميله بتحاول تفضل مفتحه عنيها ودايخه بس جابت رقمه وداست عليه
فهد رد بسرعه : ايوه جميله اتكلمي
يزيد : ممكن ما تعرفش تتكلم
يزيد بسرعه طلب رقم وقالو يتتبع المكالمه بسرعه اللي علي موبيل فهد
فهد سمع جميله بتتكلم بالعافيه : انت واخدني …. فين ؟؟ انت ….. عملت … ايه ؟
السواق : اهدي خالص وكله هينتهي في دقايق .. مش هتحسي بحاجه خالص … نامي بس نامي
جميله : حرررااااممم ….. عليييييك … سيييبني …. سيب
وسكتت خالص بس الخط مفتوح وفهد هيتجنن وبص ليزيد
فهد : اتصرف .. هنعمل ايه ؟
يزيد : لحظه يا فهد رجالتي بتتبع المكالمه واول ما يحددوها هنتحرك انا وانت
فهد : ولو ملحقناهاش !! يزيد ؟؟
مش عارف يقوله ايه وحس بعجز رهيب ؟؟ تخيل للحظه انه ما يشوفهاش تاني ؟.
يزيد بيتكلم مع رجالته ومره واحده الباب اتفتح ودخل واحد : جهاز الجي بي اس لقط مكانها بس يارب المكالمه تفضل مفتوحه يالا !
يزيد اتحرك هو وفهد ووراه رجالة يزيد اكتر من عشره .. اتحرك تلات عربيات
فهد : يزيد سوق علي اقصي سرعه عندك لازم نلحقها بسرعه .. قبل ما المكالمه تفصل او يعرفوا بالموبيل …
يزيد : حاضر يا فهد ما تقلقش .. ما تقلقش .. هنوصلها باذن الله !!
دقايق بتعدي بساعات وحالة صمت مسيطره علي فهد ويزيد وكل واحد في افكاره .. يزيد اتأكد ان فهد مش بس بيحب جميله لا ده تخطي الحب من زمان … الخوف اللي هو شايفو في عنيه ده شيء تخطي الحب بمراحل ..
يزيد : هنلحقها يا فهد
فهد : طيب اتحرك بس .. انا حاسس ان انت واقف مكانك .. ينفع تخليني انا اسوق .. ارجوك
يزيد : فهد انا سايق علي اقصي سرعه
فهد : دي مش اقصي سرعه لعربيتي دي .. اركن واقف
يزيد مع اصرار فهد ركن وفهد نزل جري ساق هو عربيته .. ويزيد عرف الفرق بين سرعته وسرعه فهد المجنونه اللي تخطت حاجز العقل وحس انهم ممكن يموتوا قبل جميله كمان ورجالته وري بيحاولو عبثا يلحقو فهد اللي طاير بعربيته وبتجاوز اي حاجه في طريقه لدرجه يزيد ربط حزام امانه لاول مره في حياته خوفا عليها …
يزيد : وقفوا
فهد اتوتر : او قفلوا المكالمه !
يزيد اتصل بحد وبص لفهد : المكالمه مفتوحه لسه يا فهد هما وقفوا ..
فهد : قدامنا قد ايه !
يزيد : الجهاز بيقول عشر دقايق
فهد هيعصر دريكسيون العربيه في ايده ورجله عاصره البنزين واتمني لو يطير
يزيد: علي فكره لو موتنا احنا الاتنين برضه مش هنلحقها
فهد : مش هنموت .. مش قبل ما الحقها
……………..
جميله وقفت العربيه بيها وموبيلها وقع من ايدها في دواسه العربيه والسواق قابلوا اتنين رجاله قابلوه
السواق : اهي
راجل #١: خساره القمر ده في الموت
السواق : دي الاوامر
راجل #٢: الدكتور مستنيها يالا
شالوها ودخلوا بيها مبني ودخلوا اوضه تشبه العمليات بس قذره وحطوها علي سرير وجه دكتور شكله تخين ومبهدل وبياكل ساندوتش
الدكتور : هيا دي ! والله خساره فيكي الموت
راجل #١: ما تخليني اخد لفه معاها الاول
الدكتور : اخرس الاوامر انها اول ما توصل نخلص علي طول دول مستعجلين جدا عليها ..
راجل #٢: دكتور دي بتفوق …
الدكتور جاب حقنه وحقنها لجميله : ما تخافيش يا قمر مش هتحسي بحاجه خالص … ارتاحي انتي وانا هخلص كله بسرعه .. بت يا سناء … انتي يا بت
سناء : ايوه يا ضكتور
الدكتور : قلعيها يا بت وجهزيها وانا هجيب حبه طرشي ابلغ بيهم الساندوتش وانتو يالا من هنا بلغوا الباشا وشوف هيستلم الاعضاء ازاي وفين ؟ قولوه ساعه بالكتير. وكل حاجه تكون جاهزه
دخل الدكتور كانت جميله نايمه علي السرير وصدرها بس متغطي وبنطلونها لسه عليها
سناء : اقلعها الباقي
الدكتور بصلها : لا مش ضروري
سناء : هنبدأ بأيه ؟ قلبها ؟
الدكتور : هتفضلي حماره كده علي طول
سناء : ليه بس يا ضكتور ؟
الدكتور : علشان ميت مره قولتلك ان القلب اخر حاجه لانه لازم يفضل شغال يغذي الاعضاء دي والا تموت .. اخر حاجه بناخدها هيا القلب .. فهمتي يا حماره ولا لسه !
مسك المشرط في ايده وبيفكر هيبدأ من انهي كليه اليمين ولا الشمال …
…………..
فهد عمال يدعي جواه دعوات مستمره
( يارب عمري ما اعترضت علي اي حاجه حصلتلي .. ما اعترضتش علي موت ابويا او امي اللي سابتني … ولا علي عيشتي طول عمري لوحدي .. يارب راضي بكل حاجه تحصل الا جميله .. احفظها يارب وخليهالي … يارب مش هقدر اعيش في الدنيا لو جرالها حاجه …يارب مش عايز حاجه غيرها هيا وبس … يارب خليني اوصلها بسرعه … خليني الحقها ))
فاق علي صوت يزيد : اركن هنا يا فهد
ركن فهد ونزلوا بسرعه كان في مبني واحد وشكله مش ولابد وتاكسي واقف قدامها .. رجاله يزيد نزلوا بسرعه وفتحوا التاكسي ولقوا شنطه جميله وموبيلها
فهد : دي حاجتها .. اكيد هيا في المبني ده ..
دخل جري ويزيد بينادي عليه : الغبي ده مُصر يموت حد فينا
الكل جري وراه وهو بيفتح اي باب يقابله لحد ما شاف الاتنين رجاله اللي وقفوا ويدوب هيطلعوا مسدساتهم بس رجاله يزيد هجموا عليهم
فهد : جميله فين ؟
@ ما نعرفش حد يا بيه احنا هنا لوحدنا !
سناء طلعت بتنادي : انت يا موكوس منك ليه فين التلج علشان البت لتحمض
دخلت صوتت لما شافت رجاله يزيد والمسدسات في وشها ويزيد : البنت فين ؟
سناء شاورت بايدها : فوق
يزيد : قدامي
وطلعوا فوق واول ما دخلوا
الدكتور : جبتي يا بت التلج عايزين نفتح بقي البنج هيروح
اتفاجيء الدكتور بحد بيشده وحدفه بعيد جدا وده كان فهد اللي جري علي جميله قلبه هيقف من الخوف
فهد : عملتلها ايه انطق
يزيد مسك الدكتور من رقبته : والله ما عملت حاجه لسه بس متخدره
فهد قلع قميصه بسرعه وغطاها بيه ومش عارف يعمل ايه ! ايديه علي وشها
فهد : جميله !! جميله فوقي علشان خاطري .. علشان خاطري حبيبتي فوقي ..
يزيد قرب منه : يالا نطلعها من هنا .. رجالتي بلغوا البوليس وعلي وصول .. تحب تمشي من هنا قبل البوليس وندخل جميله في تحقيقات ولا تستني عادي !
فهد : لا هاخدها وامشي ..
يزيد : طيب انا هاجي معاك ورجالتي هنا هتأمن المكان ووالدي في الطريق مع البوليس .. وفي كذا بنت وكذا عيل صغير موجودين في المكان هنأمنهم كلهم ونرجعهم لاهاليهم .. يالا نتحرك
فهد بيشيل جميله
يزيد : اساعدك ؟
فهد : لأ
فهد حطها في عربيته ومتردد يسيبها
يزيد : اقعد جنبها انا هسوق ما تقلقش
فهد دخل جنبها وحط راسها علي رجليه وبيشكر ربنا في سره انه لحقها والا كان هيموت هو وراها …
يزيد : اعذر تدخلي يا فهد بس انت بتحبها جدا فليه لابس دبلة واحده غيرها
فهد معرفش يرد عليه بايه فسكت
يزيد : خساره تكتم الحب ده جواك لانها هيا كمان اكيد بتبادلك الحب ده والا مكنتش انت اول واحد يخطر علي بالها في خوفها وخطفها .. معني انها فكرت فيك انت ان انت اهم شخص في حياتها .. الانسان لما بيتعرض للموت مش بيفكر غير في احب الناس لقلبه .. عيد حساباتك تاني يا فهد …
…………….
عماد الباب خبط عنه وجري يفتح بس كانت جميله اخته وجوزها وليد
جميله : مالك يا عماد في ايه !
وليد : في حاجه حصلت ؟
عماد : لا مفيش بس جميله اتأخرت وانا قلقان عليها مش اكتر ..
وليد : طيب اتصل بيها !
عماد : اتصلت موبيلها مقفول
جميله : تحب اكلملك فهد اسأله ؟
عماد : موبيله هو كمان مقفول
وليد : انت شاكك انهم مع بعض ؟
عماد : انا متأكد انهم مع بعض .. بس هو وعدني
جميله : وعدك بايه ؟
عماد : ان علاقتهم مش هتتخطي الشغل وبس
وليد : وطالما وعد هينفذ نص ساعه لو ما وصلتش نبلغ اكرم يدور عليها ما تقلقش
عماد انا لسه هستني نص ساعه يا وليد
الباب خبط وعماد هيجري يفتح
جميله : لحظه عماد .. وليد ادخل البلكونه ليكون فهد موصل جميله !
وليد دخل البلكونه وعماد فتح وكان وليد بفانلته الداخليه وشايل جميله اللي لابسه قميصه و وسطها باين عريان لان قميصه اتشد وهو شايلها وعماد مليون فكره وفكره جت في دماغه
فهد بنفاذ صبر علشان عماد يفتحله الباب : ينفع ادخلها ولا ايه ؟؟
جميله امه فتحت الباب واول ما شافت جميله صوتت : مالها يافهد في ايه؟
فهد : طيب ادخلها الاول مش عايز حد يشوفها كده انجزوا
وليد بره كان عايز يدخل يشوف فهد ويطمن علي جميله بس منع نفسه بالعافيه …
فهد دخل حط جميله علي الكنبه برقه واضحه وشد قميصه غطي وسطها ويدوب اتعدل لعماد هيتكلم اتفاجيء بلكمه من عماد لدرجه انه كان هيقع من قوتها واتعور في شفايفه ..
وجميله صوتت و وقفت في وش اخوها
جميله : انت اتجننت يا عماد
عماد بجنون : عملت ايه في بنتي !! عملت فيها ايه انطق !! هو ده وعدك ليا ؟ قولت بنتي في امان هو ده الامان ؟ جايبهالي من غير هدومها والله اعلم مالها هو ده وعدك !!!
فهد مسح الدم اللي نازل من شفايفه وبص لعماد : بنتك وهيا نازله من الشركه ركبت مع تاكسي خطفها وخدرها ومن حسن حظها انها لما كلمتني كنت مع يزيد صاحب شركه امن وتتبعنا موبيلها لحد ما وصلنالها ولحقت الدكتور اللي كان هيشرحها علشان ياخد اعضاءها وجبتها علي هنا وسايب البوليس والدنيا مقلوبه ولو مش مصدقني ممكن تبص من البكونه تسأل يزيد اهو تحت وصلني لهنا .. بنتك كويسه ده مفعول البنج لما تفوق تقدر تتأكد منها ..
مشي خطوتين وبص لعماد : انا ما برجعش في وعد وعدته ابدا
خرج وامه وراه بسرعه مسكته من دراعه : حبيبي ما تزعلش منه
مدت ايدها ومسحت طرف شفايفه بكمها
فهد مسك ايدها : مش زعلان هو خايف علي بنته وده حقه .. اعتقد ان ده طبيعي في حاله الاب .. محظوظه جميله في ان عندها اب بيخاف عليها كده .. وعمة زيك بتعوضها عن امها ..
جميله دموعها نزلت : فهد
فهد : ما تقوليش حاجه ما تخافيش انا مش زعلان بس ممكن اطلب منك طلب ؟
جميله : شاور يا حبيبي
فهد : لما تفوق ينفع تطمنيني عليها
جميله ابتسمت : طبعا
فهد ابتسملها : بعد اذنك انا لازم امشي
وليد واقف في البكونه وشاف يزيد اللي بصله وبعدها بص قدامه واتكلم مع فهد اللي نازل فوليد بعد علشان فهد ما يشوفوش
فهد : يالا من هنا عايز اشوف اللي خطفوها
يزيد : يالا تعال … صح شنطه جميله وموبيلها ؟
فهد بصله : اطلع طلعهم انا مش هطلع تاني
يزيد طلع وعطالهم الحاجه واضطر ينزل بسرعه لفهد اللي منتظرو .. فهد ساند علي عربيته بيمسح شفايفه كويس و وليد فوق متابعو واتمني لو يقدر ينزل ويضمه .. يقوله انه راجل ومن ظهر راجل ..يقوله انه غصب عنه بعد عنه .. يقوله انه محتاجله جدا … يزيد نزل وركبوا ومشيوا ….
وليد دخل وبص لعماد اللي مش عارف يعمل ايه وحاله صمت مسيطره علي الكل بيقطعها دموع جميله
عماد : انا اتجننت لما شوفت جميله كده وهو شايلها .. يعني حطوا نفسكم مكاني .. اسف اني مديت ايدي عليه بس غصب عني .. دي بنتي
وليد وجميله ساكتين تماما ومحدش فيهم بيرد عليه وجميله كانت هتتكلم بس ضغطه من ايد وليد منعتها فسكتت وعماد بيبرر تصرفه ..
وليد رجع من بره مخنوق واول ما شافهم قاعدين كده : في ايه مالكم ؟ هيا جميله مالها ؟ بت يا جميله اصحي
بص لابوه : بابا هيا مالها !
عماد : متخدره
حكي لابنه ايه اللي حصل و وليد نزل جاب حقنه يفوقها بيها .. وبالفعل فاقت واول ما صحيت كانت بتنادي علي فهد
عماد ابوها بعد عنها وعمتها ضمتها وفضلت جنبها لحد ما فاقت
حكتلهم اللي حصل كله وهما حكولها الباقي واتمنت لو تشوف فهد او تكلمه
وليد اخوها : يعني كل البلاوي اللي بنسمع عليها واللي بنشوفها علي الفيس والاخبار والزفت وتاخدي برضه شوكلاته وتاكليها كمان يا جميله ! طيب بتجاملي خديها وارزعيها في شنطتك .. يعني لو فهد ما ردش او ما شافش رسالتك كان حصل ايه ؟ هاه ؟
عمته : خلاص يا وليد اختك بخير
وليد : علشان حظها مش اكتر وعلشان فهد لحقها .. طيب لو كانت كلمتني انا كنت هعمل ايه ؟ كنت هفضل اعيط جنبها .. طيب لو كلمت بابا .. طيب لو فهد مكنش مع يزيد في شركته وتتبع المكالمه ..
وليد نصّار وقف : اختك بخير والموضوع خلص والحمد لله هيا بخير .. يالا يا جميله
عماد : وليد انت زعلان مني ؟
وليد : حصل خير يا عماد .. انت اصدرت قرارك وحكمك ان فهد وحش فمهما يعمل هيفضل وحش في نظرك .. دي وجهه نظرك وانت حر فيها
عماد : يا وليد اعذرني
وليد زعق : وانا مين يعذرني
سكت وغمض عنيه للحظه وهدي : بنتك بخير والموضوع خلص خلاص .. بنتك ما تروحش الشركه تاني ..
جميله الصغيره : بس يا عمو
وليد : خلص الكلام .. الشركه ما تروحيهاش تاني ..تصبحوا علي خير
جميله وطت تسلم علي بنت اخوها وهمست في ودنها : كلمي فهد هيتجنن عليكي طمنيه … ( علت صوتها ) حمدالله علي سلامتك يا قلبي
وليد اخدها وصلها البيت وراح لاكرم
اكرم : حمدالله علي سلامه جميلة الصغيره
وليد : الله يسلمك .. وصلت لايه !
اكرم : رفعنا قضيه مستعجله ومنتظرين حكم القاضي وعملنا كل ما يثبت انك انت وليد نصّار .. المفروض دلوقتي كل حاجه عند القاضي
وليد : طيب ما تخلي القاضي ده ينجز
اكرم : لا دي صعبه عليا .. بس عارف مين ممكن يخليه ينجز؟
وليد : مين ؟
اكرم : مدير المخابرات ادهم.. كلمه واعتقد مش هيتأخر في انه يساعدك ..
وليد : طيب تعال نروحله .. يزيد فين ؟
اكرم : مع فهد بيشوفوا خطف جميله ده صدفه ولا بفعل فاعل !
وليد : و وصلوا لايه ؟
اكرم : الناس دي ما بتتكلمش بسهوله يالا بينا نروحله !
وليد : يالا وهكلمه في الطريق ابلغه بزيارتنا
…………….
فهد قعد بتعب علي الكرسي : وبعدين ؟
يزيد : هيتكلموا ما تقلقش ..
فهد : ايه اليوم ده ؟
يزيد : بس الحمد لله عدي علي خير وبأقل الخساير ..( بصله قوي ) بس انت ايه اللي عورك في شفايفك كده ؟انا لسه واخد بالي منها
فهد : دي من ابو جميله
يزيد باستغراب : نعم ؟ ليه ؟
فهد : واحد داخل قالع قميصه ملبسه لبنته ومدخلهالو مغمي عليها ..
يزيد : يعني انت هتعمل فيها حاجه مثلا وتروحاله البيت ؟
فهد : الله اعلم بقي دماغه راحت لايه ؟
يزيد بهزار : يالا ضرب الحبيب
فهد بصله وكشر عنيه : بقولك ايه الموضوع ده ما تتكلمش فيه ابدا
يزيد : فهد انت بتحبها وده شيء معدش ينفع تنكره
فهد : يزيد اقفل الموضوع ده دلوقتي
يزيد هيتكلم بس موبيل فهد رن وكان مكتوب جميله ويزيد ابتسم لان فهد وقف وخارج
يزيد : مش هتتعشي معايا
فهد بصله وماردش بس قفل الباب ويزيد ضحك عليه
فهد : انتي كويسه ؟
جميله : كويسه
فهد : لسه يدوب فايقه ؟
جميله : لا فوقت من شويه
فهد : ما طمنتينيش ليه طيب ؟
جميله : مش لما بابا و وليد اخويا سابوني وعمتي .. يدوب بقيت لوحدي .. احكيلي وصلتلي ازاي ؟
فهد : مش عايز افتكر يا جميله الدقايق اللي عدت عليا لحد ما وصلتلك
جميله بهمس : خفت عليا ؟
فهد اتردد كتير : تقدري تقولي اني اول مره في حياتي اطلب حاجه من ربنا
جميله : طلبت ايه ؟
فهد : اني اوصلك قبل ما حد يلمس شعره منك … اني الحقك يا جميله .. اني اوصلك بسرعه
جميله : و وصلتلي بسرعه ؟
فهد : لو اتأخرت دقيقتين كان شرحك ابن ……
جميله : ولو كان شرحني كنت هتعمل فيه ايه ؟
فهد : مش عارف مش عايز اعرف اصلا يا جميله مش عايز افكر ايه اللي ممكن كان يحصل لو مالحقتكيش .. بس اقل حاجه اني ممكن اشرحه انا بالمشرط اللي في ايده .. يوووووووه يا جميله مش عايز اتخيل حتي انه ممكن يكون لمسك
جميله ضحكت وسكتت وهو قاعد في عربيته وساند راسه لوري : المهم دلوقتي انك كويسه وبخير
جميله : الحمد لله
فهد وكأنه افتكر : بس ازاي ركبك وازاي خدرك ؟
جميله : تاكسي شاورت وجالي كان قدام الشركه اما خدرني ازاي فعطاني شوكولاته
فهد زعق : وانتي يا طفسه اي حد يديكي حاجه في الشارع تاكليها انتي هبله ؟
جميله : بقولك ايه انا سمعت الموشح ده من عمتي ومن بابا واخرها وليد ومعنديش استعداد اسمعه منك انت كمان .. الراجل وراني صور وقالي انها اخته وانه جوزها وفرحان بيها وانا زي المتخلفه صدقته واكلتها خلص بقي الموضوع
فهد بتلقائيه : ولو مكنش معاكي موبيلك او ما اتصلتيش بيا كنت انا هعمل ايه من غيرك يا متخلفه
جميله استوعبت جملته وسكتت وهو كمان سكت ومحدش فيهم عرف يقطع الصمت يقول ايه !
فهد : جميله تصبحي علي خير
جميله : انا مش هاجي الشركه تاني يا فهد !
فهد ابتسم بوجع لانه كان متوقع ده بس المره دي هو كمان شايف ان ده الصح
فهد : عارف
جميله : وايه ؟ خلاص كده ؟
فهد : سيبي الايام الجايه توضح كل حاجه يالا تصبحي علي خير دلوقتي
جميله بسرعه : فهد استني
فهد : استنيت
جميله : قميصك اللي انا لابساه ده هرجعهولك تاني ازاي ؟
فهد ابتسم : انتي لسه لبساه !
جميله : اه لسه
فهد : خلاص خليه معاكي يا جميله .. تصبحي علي خير
قفل وروح علي بيته ….. وهيا ابتسمت وضمت نفسها بايدها وحست ان فهد قريب منها وهيا لابسه هدومه وريحته حواليها …
…………….
ادهم استقبل اكرم و وليد في بيته وقعدوا مع بعض في جنينة الفيلا وبعد السلامات والتحيات
ادهم : انت يعني ورقك واقف علي القاضي ده ؟ خلاص سيب الموضوع عليا .. بس المهم دلوقتي اوعي حد منهم يعرف انك عايش لانك طول ما انت في نظر القانون ميت ممكن يقتلوك في ميدان عام ومحدش يقولهم تلت التلاته كام !!
وليد : ليه يعني مش بني ادم ؟
ادهم : بني ادم علي عيني وعلي راسي بس هو ينفع تقتل واحد ميت ؟؟ ما ينفعش وده القانون فلو قتلوك مالكش ديه انت لازم تفضل مستخبي لحد ما ورقك يخلص وترجع لقيد الحياه
سهروا كتير مع ادهم يخططوا هيعملوا ايه الفتره الجايه …….
…………..
الصبح في الشركه في مكتبه
عبير : فهد بيه سيد بتاع الامن عايزك بره
فهد باستغراب : خير ؟
عبير : معرفش … أدخله ولا امشيه ؟
فهد : لا دخليه
دخل سيد بارتباك واضح
فهد : خير في ايه ؟
سيد : خير يا باشا بس باشمهندسه جميله ما جاتش النهارده
فهد باستغراب : وبعدين ؟
سيد : يعني كنت عايز اطمن عليها بس
فهد : وهو كل موظف يغيب من شغله تجيلي انا اطمنلك عليه ؟
سيد : لا يا باشا
فهد : في ايه يا سيد اتكلم علي طول وليه عايز تطمن علي جميله ؟
سيد : هو والله ممكن تكون تهيؤات بس امبارح العصر كان في تاكسي قدام الشركه عطلان وفضل لحد المغرب وصاحبه راح جاب ميكانيكي وفضل يصلح فيه وبعدها فترتي خلصت ودخلت اجيب حاجتي واسلم ورديتي لزكريا ولما خرجت ما لقيتش التاكسي
فهد : وبعدين ؟؟
سيد : سألت منصور عليه قالي ان اول ما الباشمهندسه خرجت ووقفت تنتظر تاكسي هو دور وجالها واخدها والله انا شكيت يكون منتظرها هيا بالذات بس كدبت نفسي يعني دي بنت غلبانه وبسيطه بس لما غابت النهارده قلقت عليها وقولت اقول لحضرتك
فهد : تاني مره تاكسي او عربيه او اي حاجه تقف قدام الشركه تخليهم يتحركوا او تتصرف وتبلغني فاهم ! علي العموم جميله كويسه ما تقلقش
سيد ابتسم : الحمد لله انه كان بيتهيألي
فهد : لا مكنش بيتهيألك التاكسي خطفها فعلا ولولا انها كلمتني كان زمانا في العزا بتاعها .. المهم هيا بخير ومش عايز حد يعرف باللي حصل ولا صحابك اللي تحت .. وتاني مره حاجه زي كده تحصل تتصرف مش بعد ما تخرب مالطه جاي تبلغني
سيد : حاضر يا باشا بس بركه انها بخير دي بنت طيبه وجدعه
فهد خارج من مكتبه وقابل في سالي
سالي : رايح فين عايزاك
فهد : بعدين
سابها وراح ليزيد وحكاله اللي حصل
يزيد : يعني فعلا كانوا منتظرين جميله
فهد : ايوه ولازم اعرف مين اللي وري الموضوع ده
يزيد : طيب تعال والدي هناك معاهم تعال نروحله احنا علي فكره الدكتور قالنا ازاي بتوصله الحالات وعرفنا ان في جرسون في نايتكلب هو اللي بيصطاد الزباين بس ده كان ديما يصطاد اللي هيشتري الاعضاء مش الضحايا بس المره دي كان وضع مختلف
فهد : وبعدين جبتو الجرسون ده ؟
يزيد : جبناه اتفضل
وصلوا عنده وفهد طلب من يزيد انه هو يحقق مع الجرسون ده
فهد وقف قصاده : ليه جميله ؟
الجرسون: جميله مين ؟ معرفش انت بتتكلم عن مين ؟
فهد : جميله اللي خطفتوها امبارح من قدام الشركه !! وكنتو هتاخدوها اعضاءها
الجرسون فضل شويه بينكر ف فهد بعد خطوه وبص ليزيد
فهد : يزيد اتصرف معاه نشطله ذاكرته
يزيد بص لاتنين من رجالته اللي بدؤا يضربوا في الجرسون ضرب مبرح وموجع جدا لدرجه ان فهد دور وشه بعيد
فهد شاورلهم كفايه : اوعدك مش هلمسك بس كل اللي عايز اعرفه ليه دي بالذات مين طلب منك ؟
الجرسون : واحده طلبت مني .. زبونه في النايت بتيجي علي طول والكلام جاب بعضه وهيا كانت عايزه تخلص منها وانا وعدتها اساعدها
فهد طلع موبيله علي صوره ميس : هيا دي ؟
الجرسون : لا مش دي
فهد اتنهد بارتياح انها مش امه ميس بس فكر في سالي وراه صورتها : ايوه هيا دي … دي اللي طلبت مني ! والله يا بيه انا ماليا دعوه .. انا بس كنت بساعد
فهد بغيظ : تساعد بالقتل !! يزيد
الجرسون زعق : انت وعدتني مش هتلمسني
فهد باستغراب : وهو انا لمستك !! انا عند وعدي … انا مش هلمس شعره واحده منك
بص ليزيد وشاورله يشوف شغله معاه
واكرم ابتسم لان فهد نسخه من وليد وافتكر نفس موقف وليد لما ميس بعتتله ناس يهاجموه ….
يزيد خرج وري فهد وقفه
فهد : خير
يزيد : بلاش تعرف حد ان سالي وري خطف جميله
فهد : قصدك مين ؟
يزيد : ابوها !! عمتها !! اخوها !! اي حد انت كده بطل في نظرهم بلاش تكون السبب اللي بنتهم اتعرضت للخطف علشانه فاهم
فهد : هكدب يعني ؟
يزيد بغيظ : لا مش كدب ده بس بتداري الحقايق مش كل حاجه لازم تتعرف وبعدين دي فرصه تخلع من دي وتروح لدي ما تضيعهاش من ايدك
فهد خرج من عند يزيد وركب عربيته هيتجنن وموبيله رن كانت سالي فرد
سالي : وبعدين ؟ الكل منتظرك علي الغدا .. بعتلك رساله وقولتلك العيله كلها هنا النهارده عندنا .. انجز وتعال
فهد : طيب كويس جاي اديني خمس دقايق وهكون عندك
طول الطريق بيفتكر جميله وخطفها ومكالمتها معاه ومنظر البيت والرجاله ومنظرها هيا وهيا متخدره والدكتور ماسك المشرط هيشرحها .. طيب نفترض اتأخر عليها ! ولا نفترض انه مكنش مع يزيد !! طيب نفترض ان جميله ما اتصلتش بيه هو كان هيعمل ايه ؟كانت هتموت وبس ؟ كان هتنتهي من حياته ؟ مكنش حد هيعرف اصلا هيا راحت فين وحصلها ايه ؟ وكان هو هيتهمها انها بعدت عنه هو !! وصل لقمه غضبه من سالي اللي وصلت بيها انها تقتل .. بس هو اللي غلطان لانه عدالها لما وقعتها علي السلم واهي تمادت و دلوقتي حاولت تقتلها والله اعلم بكره ممكن تعمل ايه تاني ؟ بكره لا مفيش بكره
دخل عند فيلا علاء ودخل جوه وسالي قامت جري تستقبله وهو اول ما شافها وقربت منه ضربها بالقلم .. قلم قوي جدا لدرجه انها وقعت والكل قام وقف ..
علاء : انت اتجننت ..
سالي بصتله مش فاهمه ايه اللي حصل وفهد زعق : انتي تخطيتي كل الحدود انتي ازاي عملتي كده في جميله ؟
سالي باستغراب : جميله !!
وقفت : انت بتضربني علشانها
فهد : انا مش بس هضربك انا ممكن اقتلك كمان ..( مسكها من رقبتها ) وصلت بيكي الحقاره انك تجيبي ناس يخطفوها
علاء شده بعيد عن بنته : انت اتجننت ولا جرالك ايه !! وتطلع مين دي اللي تضرب بنتي علشانها ؟
فهد زق علاء بعيد عنه : بنتك المبجله اجرت بلطجيه يخطفوا جميله ولولا اني لحقتها كانوا شرحوها وباعوا اعضاءها
علاء بلا اهتمام : مافي داهيه هيا وعيلتها لكن بنتي تمد ايدك عليها اقطعهالك انت فاهم !
فهد بص لعلاء باستحقار : يعني مش غريبه تكون دي اخلاقها ماهي تربيتك انت .. نفس انعدام الاخلاق
ميس زعقت : فهد احترم نفسك وبعدين مين جميله دي اللي جاي تتخانق معانا عليها تطلع ايه دي ؟
فهد زعق : جميله خط احمر للكل …. فاهمين ؟ ولا مش فاهمين ! لو حد لمس شعره منها مش هسيبوا علي وجه الارض
الكل بص لفهد او وليد لانه حاليا ولتاني مره اللي واقف ده وليد مش فهد .. والزمن بيعيد نفسه من تاني ..
محي اخيرا نطق : انت بتتهم بنت عمك وبتفضل عليها حته موظفه في الشركه ؟
فهد : انا ما بتهمش حد انا اتأكدت تحبي اجيبلك الجرسون اللي اتفقتي معاه يخلصك من جميله !! اجيبهولك هنا يا سالي .. ( قلع الدبله من ايده ورماها في وشها ) اللي تخطط تقتل الله اعلم ممكن تخطط لايه تاني ! خطوبتي ليكي من الاول كانت غلط بس الحمد لله ملحوقه ..
ميس : فهد انت زودتها قوي
فهد : ارجوكي حضرتك ما تدخليش
ميس : البس دبلتك الامور ما تتحلش كده
فهد : سالي خلاص صفحه واتقفلت فريحي نفسك ميس هانم … تصبحوا علي خير كلكم ..
سابهم وخرج وخالد بص لابنه : اطلع وراه يا آسر وانتي يا امل خدي سالي وطلعيها اوضتها انتي وندي
آسر مشي وري فهد وركب معاه وامل وندي اخدوا سالي اللي بتعيط لاوضتها
علاء بص لميس : لتاني مره انتي السبب
ميس باستغراب : انا ؟؟ ليه بقي ان شاء الله ؟
علاء : ايوه انتي السبب محدش غيرك .. الاول جيبتي لجوزك واحده ملاك من السما يتجوزها وطبعا حبها واي رجل مكانه كان هيحبها ودلوقتي بتكرري نفس اللي حصل جيبتي لفهد جميله تانيه بس حسنتي عيوب جميله الاولي المره دي بجانب جمالها الصارخ جيبتيها متعلمه وذكيه وفيها كل اللي يتمناه اي راجل وحطيتيها قدامه وزي ما وليد رماكي زمان اهو ابنه بيرمي بنتي الزمن بيعيد نفسه
ميس : انا جيبتها انتقم منها مش علشان اجوزها فهد ومش هسمحلها تنتصر عليا
خالد : اعتقد انها انتصرت
ميس : لا مش هسمحلها وفهد هيتجوز سالي برضاه او غصب عنه وانت يا خالد لازم تشوف عريس لبنتك !!
خالد باستغراب : ليه بسرعه ؟
ميس : لان سيادتها عينها علي وليد اخو جميله
خالد : بتاع العلاج الطبيعي ؟
ميس : ايوه هو …. انا ما شغلتش جميله عندي علشان سيادتها تاخد فهد واخوها ياخد جميله ويكرروا اللي حصل زمان .
محي : ميس عندها حق .. خالد شوفلنا حد مناسب لبنتك
خالد : طيب ايه رأيكم آسر لسالي وامل لفهد
محي : انت اتجننت هتبدل ولا ايه مش هينفع ولا آسر هيوافق ولا فهد هيوافق
ميس : الشباب ماليه البلد
خالد بنرفزه : وانا هدلل لبنتي علي عريس ولا ايه !
محي : انا عندي العريس المناسب
كلهم بصوله
محي : مدير المخابرات ادهم مش عنده ابنه دكتور ..
خالد : انا اروح اقوله هات ابنك اجوزه لبنتي صح !
محي : انا هعزمه واكلمه نسب زي ده هيفيد كتير
امل كانت نازله وسمعت كلامهم ورجعت جري لامها وحكتلها وامها طمنتها
خالد اخد عيلته وروح ومحي طلع اوضته وطلب من علاء يوصل ميس لبيتها وبالفعل وصلها وقعدوا مع بعض شويه يشربوا ويتكلموا … علاء كان متنرفز جدا من فهد وفضل يشرب عند ميس ويشرب لحد ما سكروا الاتنين ..
فهد روح اخر الليل ودخل اوضته
الصبح فهد صحي ونزل سأل عن ميس فعلية قالتله انها لسه نايمه وهو استغرب فطلع يشوفها .. خبط خبطه واحده ودخل واتفاجيء بعلاء نايم جنب ميس والاتنين في وضع غير لائق بالمره …
فهد زعق : انت بتعمل ايه هنا ؟
علاء فتح عنيه وبص لفهد ومش عارف في ايه وميس صحيت وبصت شافت علاء جنبها فاتنفضت وقامت بسرعه شدت روب عليها وبصت لفهد اللي نظراته تغني عن اي كلام ..
ميس : انت … فهد … انا …
علاء بص لفهد : انا مكنتش في وعي واللي حصل غصب عني سوري يا فهد
فهد : سوري !! انت بتقولي سوري انك نايم في بيتي جنب امي وتقولي سوري
علاء : بقولك ايه كنت امبارح سكران واللي حصل حصل … اعملك ايه يعني دلوقتي ؟
فهد : ما تعملش انا اللي هعمل
فهد مره واحده هجم علي علاء وشده من السرير وقعه وضربه كذا لكمه في وشه وبعدها مسك في رقبته وبيخنق فيه وميس بتصرخ ومش عارفه تعمل ايه ؟
ميس ماسكه ايدين فهد عايزه تخلص علاء منه اللي بيطلع في روحه
ميس زعقت : بس يا فهد خلاص هيموت في ايدك ،،
فهد : مايموت انتي باقيه عليه ليه !
ميس مش عارفه تقول ايه ومره واحده رمت كلمة وقفت فهد بيها : علشان جوزي
فهد بص لميس : جوزك !! وانا اخر من يعلم !الظاهر ان فعلا كل حاجه مقلوبه والظاهر اني كنت فاهم كل حاجه بالشقلوب
سابه ووقع في الارض ماسك رقبته وبيكح : يا ابن المجنونه … يا ابن المجنونه
فهد خرج وميس جريت وراه حاولت توقفه بس مقدرتش وهو رزع الباب وراه وهيا رجعت كان علاء لبس
ميس : سوري !! ملقتش غير سوري تقولهالو !
علاء : يعني اعمله ايه ! سكرت وانتي كمان سكرتي يعني انتي غلطانه زيي
ميس : انا مش مستعده اخسر فهد دلوقتي يا علاء
علاء : هيهدي
علاء روح بيته وهناك اتقابل مع محي وقاله اللي حصل
محي : مش وقت خالص طفاستك دي ؟ انت مش عاتق يا اخي ! فهد حاليا بقي عامل زي التور الهايج ولازم يهدي ويرجع مكانه والا يدخل المدبح …
علاء : هو مش متقبل فكره اني وميس يعني !!
محي سكت شويه وبعدها اتكلم : انت وميس متجوزين وخفتوا تقولوله ليزعل
علاء : نعم ؟
محي : ميس عندها حق في اللي قالته كنتو مع بعض متجوزين ولا سكرانين وقضيتوا ليله ؟ انهي افضل ؟ وانهي اللي هينظف صورتكم قصاده؟
انت وميس متجوزين وانا هكلم ميس وافهمها تعمل ايه مع فهد وانت تروح عندها وتاخدها علي اقرب مأذون وتكتب عليها بتاريخ قديم … اتفضل
علاء : انا مش عايز اتجوز ميس
محي : انت هتتجوزها علي الاقل لحد ما نخلص المشروع ده ونشوف اخرتها ايه مع فهد …
……………..
راح علي الشركه حاسس ان كل حاجه غلط … كل حاجه متلخبطه .. وقف قدام الشركه كتير وبعدها غير رأيه ومشي راح لعمته ندي اللي رحبت بيه جدا
ندي : مالك يا حبيبي ؟ فيك ايه ؟
فهد : مخنوق من الدنيا كلها !!
ندي : زعلان علشان سيبت سالي ؟
فهد : انا محبتش سالي علشان ازعل عليها .. انا لو هزعل هيكون علشان جميله مش سالي
ندي ابتسمت بحب : انت بتحبها صح ! واضح قوي الحب عليك وهيا صراحه تستاهل حبك ده !!
آسر نزل وراهم : مين دي اللي تستاهل حبه دي ؟
فهد ابتسم : مالكش فيه !! الا قولي صح سمعت انك انت بتحب سالي ده بجد ولا اشاعه ؟
آسر سكت وماردش عليه
فهد : طيب ليه ما قولتليش ؟ انا خطبتها لمجرد ان جدك قالي وميس كانت موافقه وبس .. مجرد المتوقع
آسر : انا خلاص يا فهد تخطيتها
فهد : لو لسه بتحبها !!
آسر : لا مش بحبها
ندي : اخبار مي ايه يا آسر لسه زعلان منها !
فهد : مي بنت صلاح ؟ وانت زعلان منها ليه دي حته بنوته طيبه قوي
آسر بصله : وانت تعرفها منين !
فهد : انا اعرفها من صلاح وانت ؟
آسر بحذر : انا برضه عرفتها من صلاح
ندي : فهد انت عارف حاجه !
فهد بص لعمته : قصدك اللي عمله فيها عمي علاء وتهديد عمي خالد ليها هيا وابوها !
آسر : بابا هددها ؟ ليه ؟
فهد : انت تعرف ايه ؟
آسر : اعرف اللي عمله عمي علاء وصراحه مش مصدقو اصلا
فهد : لا صدق وكمان والدك اتدخل وهددها هيا وابوها
ندي : اكيد لما سمع اسر بيحكيلي راح يقفل بوقهم تماما
آسر : معقوله عمي يعمل كده وبابا يهدد ناس .. هو احنا فين ؟
فهد بص لعمته : عايز اعرف كل حاجه عن وليد وجميله ؟
ندي ابتسمت : اخيرا هتسمع عن ابوك .. عايز تعرف ايه ؟
فهد : مبدئيا حوض الورد مين اللي زرعه ميس ولا جميله !
ندي ابتسمت : جميله زرعته بحب مع انه كان عقاب لها .. ميس امرتها تنظف الجنينه وتزرع الحوض ده وساعتها جميله عملت كده وزرعت قلب في النص وقالت لوليد علشان كل ما تطلع بلكونتك تبتسم للقلب ده و وليد لما رجع وشافها قعد جنبها في الارض في الطين وزرعه معاها وساعتها ميس اتجننت لان منظرهم مكنش عقاب ابدا لجميله .. ده كان منتهي الحب
فهد فضل يسأل و ندي تجاوبه لحد ما خالد نزل والكل سكت …
خالد :
بقلم / الشيماء محمد
ايميل shimooelwady
توقعاتكم ايه ؟
رواية جميله الجزء الثاني للكاتبه شيمو
الحلقه الثانية والعشرون
قبل ما نبدا عايزاكم كلكم تصلوا علي اشرف الخلق اجمعين
اللهم صل وسلم وبارك علي سيدنا محمد عليه الصلاه والسلام ….
خالد نزل والكل سكت وبصله
خالد : امال بنتك فين ؟ انا عازم النهارده ادهم باشا ومراته وعياله
ندي : بنتك قالتلك انها مش عايزه
خالد : مش بمزاجها زي ماهو مش بمزاج فهد باشا يفسخ خطوبته كده بالسهوله دي
فهد وقف : طيب يا عمتي اشوفك بعدين ماشي يا اسر !
آسر : اه خدني معام
اخد اسر ونزلوا الشركه
……………..
علاء راح لميس كانت جاهزه ونزلت معاه
وفي العربيه
علاء : محي كلمك !
ميس : ايوه
علاء : وانتي موافقه ؟
ميس بصتله وزعقت : وسيادتك عندك حل تاني ! دي فكره كويسه ممكن فهد يسكت بيها
علاء سكت وراحوا للمأذون واتقابلوا كلهم هناك كتبوا كتابهم وكان محي وخالد شهود علي العقد وعملوا الجواز بتاريخ قديم وخلوا المأذون يعملهم قسيمه مضروبه يوروها لفهد لحد ما يطلع الاصليه
…………..
وليد بيفطر هو وابوه واخته وعمته اللي جاتلهم الصبح بدري
جرس الباب رن وقام وليد يفتح واتفاجيء بأمل قدامه بتعيط ورمت نفسها في حضنه وهو مش عارف يعمل ايه او يتصرف ازاي وابوه وراه مش مصدق اللي بيحصل ولا عارف مين دي وعياله جرالهم ايه ؟؟
عماد بيحمحم و وليد واقف مش عارف يعمل ايه وبص لاخته اللي قامت وشدت امل اللي كملت عياط في حضن جميله
جميله : في ايه يا قمر بس مالك ؟
امل : بابا عايز يجوزني
وليد هنا زعق : ايه يجوزك ؟ ليه ان شاء الله هيا سايبه ؟
عماد هنا اتدخل : ابوها وعايز يجوزها ايه السيبان في كده يا دكتور وليد ؟
وليد بص لابوه ومش عارف يقوله ايه واتدخلت عمتهم اللي مسكت امل : انتي بنت ندي ؟
امل بصتلها باستغراب فجميله لحقت نفسها : جميله بتحكيلي كتير عنك
امل ابتسمت : هيا برضه حكتلي كتير عن حضرتك
عمتهم : طيب اهدي كده وقولي في ايه اللي حصل والقمر ده زعلان من ايه !
امل حكتلهم اللي حصل وبعدها مره واحده وقفت وبصت لجميله : انت صح اتخطفتي ؟ فهد كان هيتجنن واتخانق مع الكل .. تعرفي انه فسخ خطوبته لسالي ؟
جميله بفرحه : فسخ خطوبته بجد !
امل : وانتي فرحتي قوي كده ليه ! هو انتو بينكم حاجه ؟
جميله : لا لا لا مفيش طبعا بس سالي مش لايقه عليه اصلا
امل : المهم انهم حاليا عايزين فهد يرجع لسالي وانا اتجوز ابن ادهم ده مدير المخابرات
عمتهم : مدير المخابرات اللي هو جوز الدكتوره اللي عالجت جدتك ؟
امل : ايوه هو ده
وليد : يوسف ! انتي تتجوزي يوسف ؟ امل : انت تعرفه يا وليد !
وليد : ايوه اعرفه بس بالاسم فقط
امل مسكت ايد وليد : طيب هنعمل ايه يا وليد ! انا لا يمكن اتجوزه
عماد كان هيتكلم بس اخته لحقته : روحي انتي يا امل دلوقتي وانتظري تليفون مننا وما تقلقيش خالص .. وليد هيتصرف
امل روحت بعد ما اطمنت من جميله اللي اتصلت بجوزها وطلبت منه يجي وجه هو ومعاه اكرم اللي تقريبا مش بيفارقه ابدا
وحكوله اللي حصل وكلام امل و وليد ما قالهمش ان سالي اللي دبرت خطف جميله علشان عماد ما يخافش زياده ..
جميله عمتهم : هاه يا ابو فهد هنعمل ايه ؟
عماد هنا اتنرفز : هما حرين في بعض ما تتجوز امل دي احنا مالنا وبعدين العريس اللي مختارينه مش وحش وابوه راجل له وضعه وامه كمان
وليد : بابا اذا سمحت
عماد : اذا سمحت ايه ! هو انتو رايحين تشتغلوا ولا تحبوا .. واحده تحب فهد وانت تحب امل وانا اتفرج كده عليكم
وليد نصّار : اهدي يا عماد عيالك مش صغيرين ..
عماد : اهدي ازاي بس والمصايب بترخ فوقينا
وليد نصّار : مفيش مصايب ولا حاجه ..
وليد : فعلا .. عمو حضرتك اتصل بادهم وقوله يرفض
وليد نصّار : الاول انت تعرف يوسف ده كويس ابن ادهم !
وليد : هو شغال في نفس المستشفي اللي انا شغال فيها معرفتنا سطحيه
وليد نصّار : بتثق فيا ؟
وليد : ايوه حضرتك طبعا بثق فيك
وليد نصّار : يبقي انت اتصل بأمل وقولها ما تعملش مشاكل وتوافق علي ابن ادهم
وليد اتجنن : نعم ؟ انا اقولها تروح تتجوز واحد تاني ! لا انتو اكيد مش طبيعين !
اكرم فهم وليد : عمك عنده حق اتصل بيها وبلغها واحنا نتصل بادهم ونبلغه يوافق علي عزومة خالد وطلبو
وليد اتجنن : انتو اكيد ما بتفهموش .. انا بحب امل
الكل سكت وبصله من اعترافه الصريح
وليد نصّار : انا عارف الكلام ده بس يا فصيح لو ادهم رفض ياتري خالد هيعمل ايه ! هاه !
وليد : هتقدملها انا !
وليد نصّار : ومتخيل انه هيوافق يا فصيح
وليد : امال اسيبها تتخطب لغيري ؟
وليد نصّار : يا ابني افهم خالد لو ادهم رفض هيشوفلها عريس تاني وهيجبرها توافق لكن لو تتخطب لحد نعرفه زي يوسف اللي احنا هنتفق مع ابوه اللي اتمني انه ما يعترضش ساعتها يوسف هيصونهالك ويحافظلك عليها لحد ما الامور تهدي والرؤيه تبان .. فهمت ليه بقولك توافق علي ابن ادهم ! لانه معانا ونقدر نكلمه
وليد : برضه !! ازاي اقبل وضع زي ده
عمته : يا ابني مش احسن ما تروح منك خالص !! استحمل معلش
وليد نصّار :روح يالا كلمها وانت يا اكرم المعلومات اللي وليد بلغهالكم عن نبيله واللي عانته السنين اللي فاتت خلي يزيد يبدأ يبلغ فهد بالمعلومات شويه شويه
اكرم : انت شايف ان وقته طيب هنبدأ بايه !
وليد نصّار : طبعا وقته خليه يعرف بقي كل حاجه حواليه .. يزرع الشك بدايه بنبيله واللي حصلها
اكرم مشي وبلغ يزيد اللي راح قابل فهد
يزيد : عرفت المعلومات اللي انت عايزها عن جدتك والمستشفي
فهد : عرفت ايه !
يزيد : احكيلك
وحكالو كل اللي حصل لنبيله ومعاناتها علي ايد ميس
فهد : هو ازاي انا كنت اعمي كده ! وازاي ميس تعمل كده في حماتها ؟ دي ام ابنها !
يزيد : ام ابنها ماشي بس في نظرها متهمه انها ضيعت منها جوزها فبالتالي حبت تعاقبها علي غلطها
فهد : تعاقبها بانها تحبسها كل السنين دي وفي مستشفي امراض عقليه وتتسبب في شللها وفقدانها للنطق وبعدها ترميها في دار مسنين ! وانا كمان ساعدتها وخليتها محبوسه في الدار
يزيد : انت مكنتش تعرف حقيقه الوضع وبعدين انت لحد دلوقتي ما تعرفش حقيقه الوضع ايه !
فهد : عمتي بتقول كلام كتير وميس بتقول نفس الكلام بس معكوس
يزيد : يبقي تسمع من الاتنين وانت تميز بنفسك .. اسمع من جدتك
فهد : جدتي ما بتتكلمش
يزيد : اسمع من طرف تاني كان موجود ساعتها .. حد من الشغالين في البيت مثلا !
فهد فكر في علية اللي ديما تشكر في جميله وقرر انه يسمعها ويسمع كل كلامها لازم بقي يفتح كل الصناديق….
فهد : طيب عايز اتكلم مع الدكتور ده . عايز اسمع بنفسي منه
ميس خبطت ودخلت ويزيد استأذن ومشي
ميس : مين ده ! بقيت بشوفه كتير هنا
فهد : شيء ما يخصكيش
ميس : بقي كده يا فهد !
فهد : بقولك ايه انا علي اخري فارجوكي اذا سمحتي سيبيني حاليا لوحدي
ميس بزعل وانكسار : حاضر هسيبك بس قبل ما اسيبك شوف دي
طلعت القسيمه وحطتها قدامه وهو بصلها مستغرب : ايه دي ؟
ميس : انا وعمك علاء متجوزين علي سنه الله ورسوله .. هو جوزي وانا خفت اقولك لترفض او تحس اني دخلت حد مكان ابوك .. سامحني يا فهد حقك عليا اني خبيت عليك .. مكنتش اتمني ابدا انك تعرف بالطريقه دي … سامحني
فهد بص لدموعها اللي معدش قادر يصدقها وفي نفس الوقت ما بقاش فاهم مين الوحش ومين الحلو ؟ طيب ميس ايه ؟ ضحيه اعمامه هيا كمان ! معقوله يكون علاء ضحك عليها ؟ طيب هيا عارفه باللي عمله في بنت صلاح ؟ لخبطه كتير مش عارفلها اول من اخر .. طيب جدته ! هيا ما انكرتش كرهها لجدته بالعكس هيا كانت صريحه وقالت انها مش عايزاها في بيتها وحطتها في دار مسنين وهو كان عارف وموافق ..
ميس : فهد ارجوك ما تسكتش كده .. قول اي حاجه
فهد : انا ما بقتش عارف حاجه خالص
ميس : حبيبي انا كل اللي يهمني سعادتك وبس
فهد سكت وهيا صممت انها لازم تكسبه : فهد انا بحبك انت عارف ده كويس .. اوعي تبعد عني او تتخلي عني ولو جوازي من عمك علاء مضايقك انا هخليه يطلقني حالا
فهد : لا يا ميس لو جوازك منه مريحك خلاص اعلنوه وخلوه علنا قدام الكل
ميس ابتسمت : بجد نعلنه !
فهد : طبعا اعملي حفله حتي بكره واعزمي فيها الشركه كلها ونعمل فرح صوري ايه رأيك ؟
ميس وافقت طبعا وهيا خارجه : ابقي اعزم جميله وعيلتها
فهد بصلها : اشمعني ؟
ميس : انت بتهتم بيها فاعزمها لو وجودها هيسعدك
…………
وليد نصّار كلم ادهم وبلغه باللي حصل ووافق يساعدهم وقبل عزومه خالد وفهم ابنه الوضع وقبل يوسف يساعدهم هو كمان وامل وليد كلمها وفهمها تعمل ايه
الكل كان متوتر والعزومه خلصت علي خير وفتحوا مواضيع كتيره ومحي لمح بالجواز لادهم اللي رحب جدا هو ومراته وخصوصا ان ليلي صديقه لندي جدا …
فهد محضرش العزومه وراح بيت جميله وفتحله عماد اللي مش عارف يعمل ايه
فهد : ينفع ادخل !
عماد : اتفضل
فهد دخل وسلم جامد علي امه جميله وقعد وسطهم
فهد : جاي اعزمكم علي حفله عندي في البيت بعد بكره اتمني كلكم تحضروها
جميله خرجت وفهد وقف لاستقبالها واكتشف انها وحشاه جدا .. سلم عليها وقعدت قصاده
عماد : احممممم
فهد انتبه وبص لعماد : مقولتش حفله ايه ؟
فهد : امي هتتجوز
الكل تنح وبصله وفهد كمل : هتتجوز عمي علاء وهنعمل حفله علي الضيق كده
جميله : انت موافق علي جوازها ده !
فهد سكت شويه : دي حياتها وهيا حره
امه جميله : ماشي بس انت موافق ؟
فهد : موافق او مش موافق مش هتفرق .. ميس هتتجوز علاء والحفله بعد بكره واتمني تنوروني
عماد : ربنا يسهل يا ابني وربنا يتمملها علي خير
فهد وقف علشان يمشي و جميله وقفت معاه توصله للباب
فهد بهمس : هتيجي الحفله !
جميله قربت منه : لو بابا وافق
فهد : لازم تيجي فاهمه !
جميله ابتسمت : انت فسخت خطوبتك ؟
فهد : مين قالك !
جميله شاورت علي مكان الدبله الفاضي : ده قالي وكمان امل
فهد مسك ايدها هو : فسختها
يدوب فهد هيقرب اكتر بس صوت عماد بعده عنها
عماد : الجيران يا جميله والباب
فهد ابتسملها ومشي …..
عزومة خالد خلصت وادهم روح مراته وهو طلع علي بيت عماد اللي فيه الكل متجمع
كل واحد حكي اللي عنده
وليد نصّار : بقي ميس هتتجوز علاء طيب والله لايقين علي بعض
ادهم : وبعدين هتعملوا ايه ! اعتقد يا وليد دي مناسبه حلوه نعمل شويه بلبله ونمهد للخبطه الكبيره
وليد نصّار : فعلا الكل يروح الحفله ويقوم بالواجب ويهني
جميله مراته : انت بتقول ايه ! الكل اللي هو مين ؟
ادهم : حضرتك واخوكي وعياله لان وليد مش لازم يظهر دلوقتي خالص
جميله : انتو عايزيني انا اروح لميس !
وليد نصّار : ايوه ظهورك هيعمل دربكه ولخبطه واللخبطه تعمل غلط والغلط دلوقتي مطلوب … جهزي نفسك للحفله انتي واخوكي ….
يوم الحفله جميله فرحانه جدا انها هتقابل فهد و وليد مخنوق انه هيشوف امل في ايد يوسف صاحبه وجميله عمتهم خايفه جدا من لقاءها مع ميس
فهد في الحفله منتظر جميله تيجي لدرجه اتصل بيها
فهد : انتي فين ؟ مجيتيش ليه ؟
جميله همست : في الطريق
فهد ابتسم : طيب يالا
ايد علي كتفه فاجئته ولقي خالد عمه
خالد : بتكلم مين !
فهد : حد عادي يعني
خالد : طيب ادهم باشا هيجي هو عيلته وياريت بلاش مشاكل
فهد : وهو انا اللي بعمل المشاكل !
خالد : ايوه بتحب تعمل دراما كتير
فهد : مش هرد عليك يا عمي ( بص بعيد ) ضيوفك وصلوا اهم
خالد راح يستقبل ادهم وشاور لمراته تيجي معاه
فهد عنيه طايره وآسر وقف جنبه: منتظر مين كده ؟
فهد : مش حد معين !
آسر : باين اصلا عليك بلا مش حد
فهد ابتسم وبصله : كلمت مي ولا لسه ؟
آسر كشر : واكلمها ليه !
فهد : اللي فهمته انك مهتم بيها
آسر : كنت
فهد بصله باهتمام : اوعي تكون بتحاسبها ان عمك لعب بيها ..
آسر : هيا بتشارك عمي غلطو لان هو ما اجبرهاش هيا وافقت بمزاجها
فهد : هيا عيله واتضحك عليها لو انت حاسس ناحيتها بحاجه فاتمسك بيها وبعدين عمك كان بيلوي دراعهم علشان الشراكه يعني اللي جرالها بسببنا احنا وانت تتخلي عنها
آسر : انت ليه عايز تحسسني اني غلطان !
فهد : مش حكايه غلطان .. حكايه انك ما تضيعش وقتك في زعل .. لو فعلا في مشاعر ناحيتها يبقي خد خطوه ما تقفش تتفرج زي ما عملت في سالي واتفرجت عليها وهيا بتضيع ووقفت ساكت .. لو مي انت حاسس ناحيتها بحاجه خد خطوه يا اسر ودلوقتي بعد اذنك
اسر بص في اتجاه عنين فهد وشاف جميله داخله
آسر : طيب ما تاخد انت خطوه الاول
فهد ابتسم : ما انا باخد اهو بعد اذنك
فهد راح قابلهم وسلم عليهم وداخل معاهم
فهد : اتفضلي باركي لوالدتي واعرفك عليها تعالي
جميله و وليد الصغيرين باركو لعلاء وميس اللي قاعدين وعلاء مش طايق جميله اللي قهرت بنته كده .. واتمني لو هو اللي يدبر خطه يتخلص منها
جميله : مبروك لحضراتكم
ميس : مرسي جميله
وليد : مبروك يا هانم .. مبروك علاء بيه
ميس بصتله بغيظ : شكرا دكتور
جميله : اعرفك علي عمتو يا ميس هانم
جميله بعدت وشاورت علي عمتها اللي قربت ووقفت في وش ميس اللي وقفت هيا كمان وعلاء كمان وقف معاها ومحدش فيهم نطق بحرف
جميله : في ايه ميس هانم !
فهد جه وراهم : اتعرفتو علي بعض .. ميس دي مدام عايده عمة جميله واخوها الاستاذ عادل
جميله سلمت علي ميس وباستها وهمست في ودنها ( اخيرا اتجوزتي حد يليق بيكي لايقين علي بعض قوي )
عماد جه ووقف في وشهم ومد ايده وميس سلمت مسلوبه الاراده هيا وعلاء
ومحي لاحظ نظراتهم وجه يشوف مالهم ووقف مكانه مش مستوعب ان دي جميله اللي قدامه … وشاور لخالد اللي استأذن ادهم وجالو بسرعه
خالد : في ايه ؟
محي : مصيبه
خالد بتوتر : ليه في ايه ؟
محي : شوف مين اللي بتسلم علي ميس هناك ومين معاها ؟
خالد بص وهو كمان اتفاجيء : جميله
طيب ازاي ! وايه علاقتها بجميله و وليد دول .. انا لازم افهم
خالد قرب : عندنا وجوه جديده
فهد : دي عايده واخوها عادل والد جميله وعمتها
خالد : ابوها وعمتها … يا اهلا بيكم
جميله اخدت عمتها وابوها وقعدوا والعيال اتلموا حواليهم .. فهد وآسر وامل و وليد
ميس : شايف الزمن ؟
علاء: اهدي يا ميس
ميس : اهدي ازاي وهيا قدامي كده وواقفه مع ابني
علاء بيصححلها: ابنها
ميس : انت بتغظيني ؟
علاء : ابنها اللي انتي اخدتيه منها .. اهدي انتي اللي كسبانه هنا مش هيا
تلاقيها لسه طالعه من السجن .. اهدي وما تتوتريش
ميس : لا هيا طالعه من زمان وسافرت مع اخوها بس معرفش رجعت امتي دي … انا فضلت متابعه اخبارها كتير بس لما لقيتها استقرت مع اخوها بره شيلتها من بالي .. اكيد باعته بنت اخوها ترجعلها ابنها شايف
علاء : اهدي بدال ما فهد يلاحظ ويسأل ويعرف
ندي لمحت جميله ومكنتش مصدقه عنيها وراحت ناحيتها بس باشاره من جميله علشان فهد مسكت نفسها واستنت جميله الصغيره تعرفهم علي بعض و وقفوا علي جنب الاتنين
ندي بدموع : كنتي فين ؟
جميله : في الدنيا
ندي : فهد يعرف ؟
جميله : لا ما يعرفش ومش عايزاه يعرف دلوقتي
ندي : ما تقلقيش مش هيعرف مني .. ماما لو شافتك هتفرح قوي
جميله : خليني اشوفها
ندي : هدخلك عندها استني هبلغها بس علشان الصدمه واظبط الدنيا واخدك
دخلت ندي ظبطت الدنيا والطريق وبلغت نبيله انها هتجيبلها ضيف يسلم عليها وانها لازم تستعد للمفاجأه ونبيله فكرها راح ان سليم رجع ابنها وليد وبتحاول تجهز نفسها لاستقبال ابنها ..
ندي خبطت هيا وجميله ودخلت وفي ايدها جميله
نبيله بصتلها مش مصدقه عنيها ابدا جميله برضه ما تقلش غلاوه عن ابنها ايوه كانت بتتمني وليد بس اهي من ريحته وحبيبته …
جميله وطت عليها وعيطت في حضنها وباستها كتير وباست ايديها مشاعر مختلطه متلخبطه .. حب وحزن وزعل علي اللي راح وقهر وظلم … مشاعر كتيره لازم يتغلبوا عليها ويقفوا علي رجليهم من تاني
ندي : كفايه بقي عياط .. كده فهد هيلاحظ والعيال هياخدوا بالهم
جميله مسحت دموعها ومسحت بايديها دموع نبيله
جميله : اوعدك يا امي ان الفرح هيرجع يملي البيت ده من تاني وكل اللي ضاع هيرجعلنا … الفرح هيرجع
نبيله بعياط : يارب يا جميله يا حته من الغالي … يارب يا قلبي .. طمنيني عليكي انتي الدنيا عملت فيكي ايه !
جميله : انا كويسه وربنا عوضني بعيال اخويا جميله و وليد ربيتهم ايوه معوضونيش عن لحظه في حضن ابني بس صبروني علي الاقل .. صبروني علي بعده وغيابه عني
ندي : مش هينفع الكلام ده دلوقتي .. فهد هيلاحظ وماما ما تنسيش المفروض انك ما بتتكلميش فاسكتوا بقي هبقي اخدها واخرج وتتقابلوا بس بره البيت مش هنا
جميله وقفت وبتحاول تستجمع قوتها وهنا الباب اتفتح ودخل فهد
فهد : انا قلت انكم اكيد هنا .. عمتي .. ميس طلبت مني ادور عليكي وقالت اني هلاقيكي هنا ..
ندي : حاضر هروحلها
فهد : طيب روحي انتي وانا هعرفهم علي بعض
ندي مشيت بتردد من عند نبيله وفهد وقف وسطهم
فهد : هو انا ليه حاسس انكم غريبين كده ..انتو اتقابلتو قبل كده ؟
جميله : لا يا حبيبي بس من كتر كلام وليد وجميله عنها حسيت اني اعرفها وانها من باقي عيلتي
فهد قرب بتلقائيه من جميله وحط دراعه حواليها : انتي تقريبا بتحسي ان كل الناس من عيلتك .. انتي ليه قلبك كبير كده ؟
نبيله بصتلهم ومقدرتش تمسك دموعها بس منظر فهد مع امه وهو مش عارفها يوجع قوي ومحتاج لقوه صعبه علشان ام تتحمل ابنها يكون قدامها وما يعرفهاش
فهد لاحظ وقعد علي ركبه قصادها : نفسي افهمك .. ونفسي تتكلمي معايا وتحطيلي نقط كتير علي حروف اكتر ( مد ايده ومسح دمعه منها ) مش وقت الدموع النهارده يا ريت .. تطلعي معانا بره ؟؟
نبيله شاورت بدماغها لأ لانها محتاجه تستجمع نفسها ومشاعرها
فهد بص لجميله : نخرج ولا عايزه تفضلي معاها شويه !
جميله ابتسمت: خليها ترتاح يالا وبعدين اكيد ضيوفك بيستعجلوك
وهما خارجين جميله لمحت حوض الورد فوقفت بتلقائيه
فهد : جميله حكتلك عنه !
امه : ايوه ينفع اشوفه من قريب ؟
فهد ابتسم : طبعا اتفضلي
اخدها ووقف جنبها : الحوض ده جواه لغز كبير وعلامه استفهام اكبر .. كل واحد بيقول كلام مختلف عنه
جميله : وبيهمك في ايه الكلام !! ما تسمع اللي قلبك يقولك عليه .. يفرق معاك في ايه مين زرعه المهم انه اتزرع بحب وبصدق خالص … ايا من كان بيحكي اعتقد ان الاتنين قالولك انهم زرعوه بحب فده المهم انه اتزرع بحب
فهد بصلها : ليه قولتي اتنين ومين قالك انهم اتنين ؟؟
جميله اتوترت : جميله قالتلي ان عمتك قالت كلام وميس والدتك قالت كلام فهما اتنين معرفش بقي اذا كان في حد تالت ولا مفيش فقلت اتنين
فهد سكت وبص قدامه : علي رأيك المهم انه اتزرع بحب بس للاسف الشخص اللي اتزرعله ما يستاهلوش وما يستاهلش حب حد
جميله بصتله بحده وكان نفسها تصرخ وتقوله لأ والف لأ وفهد استغرب نظراتها
فهد : ليه بتبصيلي كده ؟
جميله بوجع : لانك بتتكلم عن والدك بالطريقه دي !! لانك بتهين الحب بالطريقه دي ! ما تتكلمش عن حد ما شفتوش وما تعرفوش
فهد : وغلط مين اني ما شفتوش وما اعرفوش .. ذنب مين ؟
جميله مسكته من وشه : ذنب اللي ذنبه المهم انه مش موجود يدافع عن نفسه وطالما ما سمعتش منه هو يبقي علي الاقل تمنحه ميزه الشك … المهم زي ما انت قلت من شويه ده مش وقت للدموع فيلا نرجع لحفلتكم
اخدها وطلع وبعدها صرف كل الافكار من دماغه ودور علي جميله وراحلها
……………………
نبيله مع نفسها في اوضتها عيطت كتير قوي وطلعت صوره لابنها وفضلت تحضن فيها وتبوس فيها وتتوجع لوحدها
(( ياريتك ترجع يا وليد .. ياريت كنت عايش يا ابني … مش المفروض ابدا ان الام تدفن ابنها المفروض ابنها اللي يدفنها … سبتيني ليه يا وليد اتمرمط من بعدك … سيبت اختك لكلب ذلها .. كنت ظهر وسند لينا يا ابني …. اه يا وجعي ويا ظهري اللي انحني من بعدك يا وليد … حتي مراتك وحبيبتك ابنها جنبها ومش قادره تنطق ولا تضمه … يا مين يرجع الابن لامه ومين ينصر المظلوم ومين ينتصر من الظالم ؟ يارب انت العدل وقضاؤك عدل انصرني يا رب .. قويني بيك يارب .. كفايه يا رب تعبت بقي وهما ملوا الارض فساد فكفايه يارب … اظهر بقي عدلك علي عبادك … يارب صبرني يارب صبرني يارب صبرني … )
……………
فهد مع جميله
فهد : عقبالك
جميله : عقبالي في ايه ؟
فهد : انتي في فرح وواحد بيقولك عقبالك يبقي في ايه ؟
جميله بصت لفهد وايدها في وسطها : وانت عايزني اتجوز في فرح ميت كده .. ده العزا فيه ضحك ولعب اكتر من فرحكم ده
فهد ابتسم : انتي عايزه فرح ازاي ؟
جميله ابتسمت : عايزه فستان ابيض كبير جدا محدش لبسه قبلي وعايزه كل اللي في الفرح يرقص ويتنطط والكل يكون فرحان .. وعايزه عريسي عينيه ما تبعدش عن عنيا ابدا .. حتي لو بعيد مع حد ومع أصحابه عينه تكون عليا .. عايزه ارقص معاه سلو علي الاغنيه اللي اتغنت في خطوبتك وغناها ادهم للدكتوره مراته
فهد : مش حلوه قوي الاغنيه
جميله بتريقه : دي اغنيه قديمه وتحفه بس انت ما بتفهمش في الامور دي
فهد : ههههههه خفه .. المهم عايزه ايه تاني !
جميله فكرت : عايزه تورته عشر ادوار
فهد شاور بدماغه : طفسه طفسه يعني .. كنتي هتموتي بحبه شوكولاته
جميله خبطته في كتفه وزعقت: عايزه تورته عشر ادوار ما تقلش دور وفوقها عروسه وعريس صغيرين كده بيرقصوا مع بعض فاهم ولا مش فاهم ؟
فهد : وانا مالي انا افهم بتاع ايه ؟ مش لما تلاقي حد يعبرك الاول ويرضي يتنازل ويتجنن ويرتبط بيكي ؟
جميله شهقت : وهو يطول بس نظره مني !! الظاهر انه نسي
فهد بصلها : نسي ايه بقي ان شاء الله ؟
جميله : نسي لما ابعد ولا اغيب يوم ويجيلي لحد البيت يترجي ويبوس الايادي
فهد كشر وبصلها : تصدقي …… انا غلطان اصلا… انا غلطان .. امي بتشاور
مشي خطوه ونادتله : فهد
فهد بصلها : نعم
جميله : عايزه تورته شوكولاته من اللي هناك دول
فهد ابتسم : طفسه
راح لميس اللي عايزه تبعده عن جميله وخلاص ..
آسر وامل و وليد ومعاهم يوسف مع بعض وآسر انسحب يعمل تليفون
يوسف : ده ايه الوضع المحرج ده ؟
وليد : انا متشكر يا يوسف جدا
يوسف : ما تقولش كده يا وليد الناس لبعضها.. وامل ما تقلقش في عنيا
امل : مرسي جدا دكتور
يوسف : دكتور ايه بقي .. يوسف وبس وبعدين ما تنسيش المفروض اننا بنتعرف وهنتخطب فشيلي الالقاب
وليد : يوسف ،،انا ابوها بيبصلي ولازم اخد جنب خلي بالك منها
يوسف : ما تقلقش روح لوالدك انت
وليد رايح وقابلته ميس : تستاهل قلتلك تعال مرضيتش
وليد : استاهل ايه بالظبط ؟ هو ايه اللي حصل علشان استاهلو ؟
ميس : خطوبه امل ؟
وليد بتمثيل : امل ! طيب ما تتخطب وفيها ايه ! ربنا يتمملها علي خير هيا انسانه ظريفه
ميس : انت مش بتحبها !
وليد ضحك : انتي مشكلتك ما طلعتش في الطب بس انتي عندك مشكله في فهم كل العلاقات .. مبروك يا هانم ومبروك لامل وعقبال ابنك فهد
آسر اتردد كان وواقف بعيد كل ما موبيله يطفي ينوره .. عايز يدوس اتصال علي رقم مي ومتردد
وافتكر كلمه فهد هتفضل واقف لحد ما هيا كمان تضيع وتندم
اتصل واستني يسمع صوتها
مي : الو ….. آسر ؟
آسر : ايوه انا ازيك
مي : انا كويسه وانت !
آسر : انا كويس !! عملتي ايه ؟
مي : عمك طلقني ورجعلي العقود وكل حاجه اتحلت
آسر : ازاي !
مي : مش عارفه المهم ان الكابوس انزاح
آسر : اتمني انك ما توقعيش نفسك في كابوس تاني
مي : ربنا يسهل .. المهم انت عامل ايه ؟ كويس ؟ وابن عمك اخباره ايه ؟
آسر : كل حاجه تمام .. انا بس قلت اطمن عليكي .. تصبحي علي خير
مي : اسر …. خلي بالك من نفسك
قفل ورجع وقف مع اخته ويوسف
ادهم اعتذر ومشي بدري هو وعيلته علشان العيال ما يضطروش يمثلوا كتير ويخلصهم من الاحراج ده …
اما فهد فراح ناحيه البوفيه وبص حواليه واخد شوكة حطها في جيبه واخد تورته صغيره شوكولاته ومشي بعيد وجميلتين مرقبينه وجميله حبيبته قامت تحصله وعنيها اتقابلو مع عمتها اللي ابتسمتلها وشاورتلها تروح وراه … ميس كمان كانت متبعاها وشافتها بتشاور لجميله تروح وراه واتمنت لو هيا كمان تروح وتمسك التورته تلبسها في وش جميله اللي اتجرأت وعايزه تاخد فهد منها ..
فهد راح عند البيسين و جميله وراه
فهد : جايه ورايا ليه ؟
جميله : جايه وري التورته مش وراك
فهد : دي بتاعتي انا وهاكلها انا
قعد فهد وطلع الشوكه وقطع حته ويدوب هيحطها في بوقه كانت هيا ماسكه ايده واكلتها هيا
جميله : انا طلبتها يبقي انا اكلها
هو بيقطع قطعه بالشوكه وهيا بتمسك ايده تاكلها منه وهو مبتسم بياكل مره ويأكلها مره
فهد : تعرفي اني مش بحب الشوكولاته قد كده
جميله : مش مستغربه انت بتحب الحاجات الكئيبه فعادي ما تحبش الشوكولاته
فهد : مش هرد عليكي مع ان لسانك طويل
جميله اكلت حته بايدها واترددت بس اخدت حته شوكولاته بصوباعها وحطتها قدام فهد وهو بص لايدها ومش بيتحرك
جميله سحبت ايدها : برودك غير طبيعي بالمره
هنا هو مسك ايدها وقربها من بوقه واخد الشوكولاته من صوباعها ببوقه وهيا حبست انفاسها لحد ما ساب ايدها طلعت النفس المحبوس
كانت واقفه سالي مراقبه اللي حصل وطلعت عندهم وجميله هتقف بس فهد مسك ايدها منعها تقف
سالي : انت سيبتني علشانها صح
فهد : سيبتك علشانك .. انتي تخطيتي كل الحدود
سالي : ماشي يا فهد براحتك
فهد بصلها : الحفله من الناحيه التانيه مش هنا اتفضلي
مشيت بره البيت كله وسابتهم وجميله بصت لفهد اللي قطع حته شوكولاته وحطها قدام بوقها
جميله : عادي كده ؟
فهد : عادي كده
قاموا ورجعوا الحفله الاتنين وفهد طول الوقت عنيه مركزه معاها وهيا مبتسمه وميس مراقبه والنار بتزيد
وانتهت الحفله والكل روح بيته وميس مشيت مع علاء علي اساس يباتوا ليله في فندق لوحدهم بس اتجمعوا كلهم في بيت محي
محي : مش قلتي انها امان وانها علي ضمانتك
ميس : انا هتجنن طيب ازاي ؟ وبعدين فهد كلف مخبر خاص
علاء : مخبر مين ؟ وازاي معرفش ان عمتها تكون امه ؟
محي : مين المخبر ده ؟
ميس : الولد اللي معاه اليومين دول اسمه يزيد تقريبا
خالد : شركه يزيد للامن ؟
ميس : اه هو
محي : تعرفه ؟
خالد : انتو مش عارفين مين يزيد ده ؟
الكل : لأ
خالد : ده ابن اكرم .. فاكرين اكرم ؟؟
محي : البودي جارد بتاع وليد ؟
خالد : ايوه هو بعينه
ميس : يبقي كده بقي وضحت ولعبوها صح .. يا اولاد الايه ؟ يلعبوا علي فهد ويقع في حب جميله ويزيد يتفق معاهم هو وابوه ويلعبوا في دماغ فهد براحتهم
( صرخت ) انا عايزه اقتل جميله دي هيا وعمتها جميله … عايزه اقتل الاتنين
علاء : فعلا احنا لازم نتصرف
خالد : ايوه طالما جميله ظهرت في الصوره يبقي هيا واثقه من فهد وملت ايدها منه واهو قال جميله خط احمر .. وبدأ يقف للكل
علاء : بابا انت ساكت ليه ؟
محي بص لميس : انتي بكره تاخدي فهد في حضنك وتقوليله يخطب جميله ونروح نطلب ايدها ونخطبهالو
ميس زعقت : انا اخطبله دي ! انت اتجننت
محي : انا هقلب التربيزه عليهم … تروحي بكره وتقنعي فهد يطلب جميله ويخطبها وبسرعه
ميس : طيب فهمني
محي : افهمك
بقلم / الشيماء محمد
Shimooelwady
ونكمل بكره
توقعاتكم
رواية جميله الجزء الثاني للكاتبه شيمو
الحلقه الثالثة والعشرون
سبحانك لا اله الا انت اني كنت من الظالمين
محي : انا هقلب التربيزه عليهم … تروحي بكره وتقنعي فهد يطلب جميله ويخطبها وبسرعه
ميس : طيب فهمني
محي : افهمك
وشرح محي خطته كلها وهنا الكل ابتسم
ميس : انا هروح بيتي
علاء : النهارده فرحنا الصبح روحي
ميس : فرح ايه وبتاع ايه دلوقتي افضل علشان فهد !!
محي : فعلا رجوعك لفهد دلوقتي هيعزز موقفك قدامه ،، علاء وصلها وروح معاها
علاء: ما تقولش اني هعيش هناك في بيت وليد ؟طيب وسالي ؟
محي : سالي انا معاها ما تقلقش روح انت مع ميس دلوقتي
ميس روحت البيت كان فهد في الجنينه قدام حوض الورد وسرحان تماما
ميس : فهد
فهد اتفاجيء بيها وبصلها : انتي ايه اللي جابك دلوقتي ؟
علاء وراها : مهنش عليها تسيب ابنها لوحده وتعباني انا معاها
فهد ابتسم وقرب من ميس : خير رجعتي ليه
ميس : مش عايزه اسيبك لوحدك
فهد : وانا صغير ولا ايه !
علاء : طيب اروح انا بقي تصبحوا علي خير
فهد : تروح فين ؟ هو في حد بيسيب عروسته ويروح برضه يا تاخدها معاك يا تقعد معاها !
علاء باحراج : انا مش عايز افرض نفسي عليك يا فهد وبعدين اللي انت عملته فيا لما شوفتني الصبح عندها مش هقدر انساه
حط ايده علي رقبته
فهد ابتسم : اسف يا عمي بس ده علشان كنت فاكر انها ليله والسلام مش مراتك وعلاقتكم شرعيه .. البيت بيتك يا عمي اتفضل
علاء : انت واثق من ده يا فهد انا بجد مش عايز اضايقك ؟
فهد ضم ميس لحضنه : اي شيء يسعدها بيسعدني
ميس : اسبقني يا علاء وانا هحصلك
علاء طلع وهيا بصت لفهد : انت واثق حبيبي ان وجوده مش هيضايقك ؟
فهد : ويضايقني ليه يعني عادي ؟المهم رجعتي ليه ؟
ميس ابتسمت : شوفتك النهارده لما سرقت تورته الشوكولاته واخدتها بعيد وشوفت اللي راح وراك
فهد اتحرج : ما اخدتش بالي ان حد شافني
ميس ابتسمت : انا بشوفك بقلبي قبل عنيا حبيبي وبحس بيك وانا حاسه انك مبسوط
فهد : الحمد لله
ميس : حبيبي لو سعادتك معاها انا معنديش مانع
فهد بصلها باستغراب : نعم ! انتي بتقولي ايه ؟
ميس : بقول انك بتحبها وده واضح فلو هيا اللي هتسعدك اتجوزها يا فهد وعيش معاها مبسوط
فهد ابتسم : انتي بتتكلمي بجد ! بس دي اسمها جميله اللي انتي شغلتيها علشان
ميس قاطعته : دي خطفت قلب ابني وحبها وسعادته معاها يبقي اهلا بيها في بيتها تكون بنتي هيا كمان .. سعادتك بالدنيا وبعدين مش علشان انتقم من ذكرى يا حبيبي اهمل سعادتك انت … اطلع كلمها وقولها انك بتحبها وقولها ان بكره انا وانت وعمك هنروح نخطبها
فهد مش مصدق : انتي بتقولي ايه ؟ نخطب مين ؟ انا اصلا تفكيري ما وصلش للمرحله دي ؟
ميس ضحكت : خليه يوصل .. و ( مره واحده سكتت )
فهد : في ايه سكتي ليه ؟
ميس : فهد لو تفكيرك ما وصلش للمرحله دي وجميله مجرد بنت انت بتقضي وقت ظريف معاها فانا
قاطعها فهد بصرامه : لا طبعا جميله مش مجرد بنت
ميس : يبقي بكره نروح نخطبها
فهد : الصبح ارد عليكي
اخدها وطلع بيها وقدام اوضتها ابتسم وباسها وسابها ودخل اوضته وهيا دخلت عند علاء اللي كان لابس برنس حمام
ميس بصتله وضحكت : مالك ؟
علاء : ماليش هدوم هنا !
ميس : طيب وفيها ايه ! وليد مكنش عنده هدوم عند جميله وكان كل يوم يخرج من عندها بفوطه حوالين وسطه .. كان فاكر نفسه بيستغفلني
علاء : طيب دي جميله تستاهل يتخرج من عندها بفوطه
ميس بصتله بحده : نعم بتقول ايه ؟
علاء: بقول اتصرفي شوفيلي هدوم مش هخرج انا بفوطه وبعدين وليد كان في بيته بيتنقل من اوضه لاوضه
ميس : لحظه
خرجت من عنده وراحت عند فهد اللي كان خارج من الشاور ولابس برنسه : خير يا ميس
ميس : هو ايه حكايه البرنس في البيت النهارده كل ما ادخل اوضه الاقي اللي فيها لابس برنس
فهد ضحك : عايزه ايه بس ؟
ميس : علاء معندوش هدوم هنا ينفع تجيب حاجه من عندك !
فهد شاور علي اوضه هدومه : نقي اللي يعجبك
ميس دخلت بتقلب تختار حاجه ولمحت كيس فتحته فيه بنطلون جينز وتيشرت وفهد واقف بينشف في شعره فبصلها في المرايه وابتسم وهيا بصتله : جينز ؟؟
فهد : عادي يعني
ميس ابتسمت : اه عادي قولتلي ؟ طيب ينفع اخدهم لعلاء مش استايلك اصلا
فهد بسرعه شد الكيس من ايدها : لا دول لأ
ميس : مش كانوا عادي من لحظه ؟
فهد : عادي اشتريهم بس مش عادي تاخديهم عايز اجرب بعدين الاوضه مليانه اشكال الوان قدامك … اتفضلي
عطاها تيشرت وبنطلون للبيت وطلع بدله عطاهالها
فهد : اهو لبس للبيت ولبس للصبح ينزل بيه
ميس : وهيلبس ايه تحتهم !
فهد ابتسم وفتح درج وطلع هدوم جديده
فهد : اتفضلي
ميس اخدتهم وخارجه بس وقفت : عادي يعني !
فهد : عايزه ايه يا ميس !
ميس : ده ذوقها هيا صح !!
فهد : تصبحي علي خير روحي لجوزك اللي بالبرنس يالا
ميس ضحكت وقفلت الباب وبعد ما قفلته ابتسامتها اختفت وراحت اوضتها حدفت الهدوم علي السرير
علاء : يا ساتر مالك
ميس : الهانم جيباله هدوم علي ذوقها .. وهو متيم بيها
علاء مسكها من اكتافها وهو وراها : ما تسيبه يوتيّم يومين ما احنا هنجيبه علي جدور رقبته .. سيبيه يفرحله يومين وتعالي بقي هنا لان الليله اللي فاتت مش فاكرها للاسف
ميس : انت اتجننت ولا ايه !
علاء : اه اتجننت تعالي بقي
…………………
جميله و وليد روحوا بيتهم
جميله : هتنام ولا هتسهر شويه ؟
وليد : ادخلي ارتاحي انتي يا جميله !!
جميله وقفت تبصله وهو لاحظ نظرتها ليه
وليد : خير يا جميلتي عايزه حاجه ؟
جميله : هو انت مش ملاحظ انك من ساعة ما رجعت وانت بعيد عني !!
وليد بصلها باستغراب : بعيد عنك ازاي يعني ؟ انا طول الوقت معاكي ! بغيب ساعه لو غيبت عنك ؟
جميله : معايا في البيت بجسمك اه لكن عقلك مش معايا نهائي .. بعدين انت اه بتكون جنبي بس بعد ما بنام بتقوم من جنبي .. انت ولا يوم نمت في سريرك !! بصحي الاقيك يا اما صاحي يا اما نايم علي الكنبه في الصاله !! ممكن تفهمني بقي في ايه وانت مالك ؟
وليد مسكها من اكتافها : مفيش اي حاجه حبيبتي لو انا مقصر معاكي فمعلش اعذريني غصب عني دماغي مشغوله بمليون حاجه وقلقان علي الكل .. اما حكايه النوم فأنا فعلا نومي قليل وبخاف اضايقك او ازعجك او اطير النوم منك فبفضل بعيد مش اكتر ولا اقل ..
جميله بصتله كتير : ماشي يا وليد براحتك ممكن بقي تيجي معايا جوه وما تفضلش لوحدك هنا
وليد ابتسم ومد ايده لايدها واخدها ودخلوا اوضتهم .. وبعد فتره طويله من الحب والدلع
جميله : وليد
وليد : قلب وليد
جميله : بتفكر في ايه ؟
وليد فضل كتير ساكت وباصص للسقف : في ابنك ! مش قادر احدد رد فعله هيكون ايه !
جميله : ما تقلقش …. ( غيرت الموضوع ) انت عارف انه بيحب جميله ! شوفتهم النهارده مع بعض كان الحب واضح في عنيه
وليد : فعلا … شوفتهم
جميله باستغراب : شوفتهم ازاي ؟
وليد ابتسم : حبيبتي انا عيني علي الكل ومراقب الكل انا واكرم
جميله : يعني الكل في امان صح !
وليد : ايوه ما تقلقيش
جميله فجأه اتعدلت : نبيله محتاجالك قوي يا وليد كان نفسي النهارده اقولها انك عايش .. حالتها صعبه قوي يا وليد
وليد زعل : ما تتخيليش ازاي صعب عليا اصلا يا جميله ما اشوفهاش لحد دلوقتي
جميله ضمته بحب : عارفه يا قلب جميله .. ان شاء الله هتشوفها هيا وندي كمان .. ندي كمان اتغيرت قوي
وليد : اتغيرت ازاي ؟
جميله بحزن : بقت …. مش عارفه بقت ايه بس مش دي ندي القويه اللي كانت زمان .. دي واحده مكسوره مغلوبه علي امرها … الله اعلم خالد عمل فيها ايه ! مع اني كنت بحس ان خالد ده الوحيد اللي كويس في عيلتكم كلها
وليد افتكر لما حط الفلاشه في جيبه : خالد ده زي التعبان يا جميله بيقرص ويختفي .. ما تتخيليش انا ازاي ندمان .. انا اللي اقنعت ندي تتجوزه .. انا سلمتها بإيدي لاسوأ انسان علي وجه الارض ..
جميله بحب : انت كنت مخدوع فيه زينا
وليد : فعلا .. مش قادر انسي نظرته وهو بيحط الفلاشه في جيبي بعد ما ضربوني بالنار وقالي دي ضمان علشان ما ترجعش تاني خالد كان السبب اني ما ارجعش الفتره دي كلها
جميله دموعها نزلت: احكيلي اكتر يا وليد
وليد : مفيش حاجه تتحكي اهي سنين وعدت
قربت جميله منه وضمته وفضلت في حضنه وشويه وهو بيقوم مسكت فيه : رايح فين ؟ خليك جنبي الليله ما تبعدش
وليد : مش عايز انام دلوقتي
جميله : الفجر قرب يا وليد
وليد : ما انا قولتلك نومي قليل
جميله : ماشي بس برضه خليك جنبي مش عايزه افتح عنيا ما تبقاش جنبي .. افضل صاحي براحتك بس هنا جنبي
وليد ابتسم : حاضر بس خليني اخد شاور دافي يمكن انام بعده علي طول اوك
جميله مسكته وهو بصلها
جميله : احكيلي ايه اللي حصلك وانت محبوس ؟ يمكن لما تحكي ترتاح
وليد : مفيش حاجه حصلت يدوب كنت محبوس مش اكتر ولا اقل
جميله اتعدلت : بس يا وليد !! وعدم نومك ؟ والكوابيس اللي بتمنعك من النوم ؟ ( حطت ايدها علي ظهره بس هو اتحرك ) والعلامات اللي علي ظهرك دي ؟
وليد : انتي عايزاني اقولك ايه يا جميله ؟ كنت محبوس في قضيه تجسس متخيله ايه اللي حصلي ؟
جميله : عايزاك تحكيلي يا وليد فضفض يا حبيبي
وليد : مفيش حاجه تتحكي
جميله دموعها نزلت : طيب طالما مش عايز تحكي يبقي انسي يا وليد
وليد بصلها : انسي !! طيب ازاي يا جميله ! طيب ولنفترض هنسي اللي جرالي انسي اللي جرالك انتي ازاي بلاش كل ده ابني اللي مش مسموحلي اتكلم معاه كلمه واحده انساه هو كمان ؟ انسي ايه ولا ايه يا جميله ؟؟
جميله ضمته وعيطت اكتر في حضنه وهو سيطر علي نفسه بالعافيه
جميله : ياريتني اقدر اعمل اي حاجه يا عمري كله !! بس ربنا هينصرنا يا وليد خلي ثقتك بيه كبيره
وليد ابتسم : عارف يا جميله عمري ابدا ما فقدت ايماني بربنا ويمكن ده اللي قواني لحد النهارده … ان ربنا هينصرنا .. وابننا هيرجع لحضننا .. ما تقلقيش عليا يا جميلتي
سابهاو ابتسملها ودخل الحمام وقف كتير تحت الشاور يرتب افكاره وهيعمل ايه وهيتصرف ازاي في الايام الجايه … خرج واخدها في حضنه بس معرفش ينام
……………..
فهد في سريره بس مش مقتنع ابدا بموافقه ميس المفاجأه دي .. في حاجه مش صح ابدا .. بس يا تري ايه هيا ؟ هل مثلا عايزه تكمل انتقامها من جميله امه في شخص جميله مراته !! مراته ؟ ازاي فكر فيها كده ! هو فعلا بيحبها ولا ايه زي ما كله بيقول ؟ قالهالو قبل كده يزيد ودلوقتي بتقولها ميس ! طيب وازاي هما لاحظو حبه ده ! ايه ده ! هو بيعترف اهو لنفسه بالحب ! ايه يا فهد ما انت سبق ووعدت نفسك انك مش هتسمح لقلبك يدق زي ابوك ! ليه سمحت لجميله تانيه تتسلل جواه وتسكن فيه ! هيا فعلا سكنت جواه وكل ملامحها محفوره جواه … بيفتكر ابتسامتها ! تريقتها ! غضبها ! وشها الاحمر لما تتنرفز ! رفعه صوباعها في وشه وهيا بتهدده ! قوتها ! شجاعتها ! حتي خوفها !
اتنهد واخد نفس طويل حبسه جواه وطلعه براحه بحيره .. طيب هو محتار ليه ! ما يتجوزها زي ما بيقولو ! طيب هل هيا هتقبل الجواز منه ! هيا اكيد بتحبه زي ماهو بيحبها ! بس باماره ايه ؟ اه باماره التورته اللي انت لسه مأكلهالها من شويه ! او باماره الامان اللي بتحس بيه وهيا معاك لما بتخاف ! بأماره انها شاركتك اعمق اسرارها .. اوووووف هيتجنن من التفكير
اتعدل ومسك موبيله وجاب رقم جميله ! بس هيكلمها دلوقتي ؟ مش هينفع ابدا غير الرقم وطلب وانتظر رنه بعد رنه
صوت نعسان @ الوووو
فهد : الو يا يزيد انا فهد … سوري صحيتك
يزيد اتعدل : في ايه يا فهد ! في حاجه حصلت ؟ انت كويس ! اتكلم يا ابني في ايه ؟
فهد : في ايه انت ؟ اهدي بس شويه عادي يعني ! هيكون ايه اللي حصلي وبعدين انت مش حاطط تحت البيت بودي جارد اللي مصر عليهم قلقان من ايه بقي !
يزيد : قلقان من اللي جوه البيت
فهد : بتقول ايه ! مين جوه البيت ؟
يزيد : بقولك انا نعسان عايز ايه !
فهد : عايز اتكلم مع حد ! ينفع تنزل تقابلني ؟
يزيد : اقابلك الصبح !
فهد : دلوقتي يا يزيد انزل يالا انا جايلك بيتك سلام
فهد قفل ومعطاش فرصه ليزيد يرد عليه ويزيد بص للموبيل واضطر يقوم
@ حبيبي رايح فين ؟
يزيد : نامي انتي يا سمر نامي حبي هقابل فهد وارجع علي طول
سمر : حبيبي الفجر خلاص هتقابله ليه دلوقتي هو في حاجه !
يزيد : والله ما عارف بس زي ما انتي عارفه الفتره حرجه جدا بالنسبالو وانت عارفه انه مهم جدا لبابا .. اعذريني عارف اني مشغول عنك الفتره دي بس بإذن الله هعوضك
سمر ابتسمت : باذن الله بس خلي بالك من نفسك ممكن
يزيد : ما تقلقيش يا قلبي نامي انتي
فهد نزل واتحرك ووراه البودي جارد اللي متابعينه زي ظله وراح عند بيت يزيد اللي نزله نايم علي نفسه وفهد اول ما شافه ضحك : للدرجه دي !
يزيد : انا معاك من امتي هاه ! والحفله وتأمينها ! انت مش نايم ليه ومهدود زيي؟
فهد ابتسم : عادي يعني وبعدين انت وراك ايه يعني ! أبقي نام الصبح ساعه زياده ؟
يزيد : علي فكره انا متجوز ومراتي ممكن تنزل تقتلك
فهد باستغراب : انت متجوز بجد ! مكنتش اعرف ! انت مقولتليش
يزيد : انت ما سألتش عن حياتي الخاصه
فهد : عندك عيال ؟
يزيد : لا لسه ربنا ما ارادش
فهد : عايز عيال ؟
يزيد : اكيد طبعا عايز عيال .. بس فهد هو انت جاي بس ترغي ولا في حاجه مهمه ؟
فهد كشر لما افتكر : اكيد في طبعا .. ميس طلبت مني اتجوز جميله
يزيد استغرب : ميس ؟ وانت تتجوز جميله ؟
فهد : اه شوفت بقي
يزيد : طيب ليه جميله ؟ وبعدين المفروض انها بتكرهها علي كلامك فازاي تطلب منك تتجوزها الا اذا كان لها غرض
فهد : ايه بقي الغرض ده ! وليه ؟ وازاي اصلا هتقبلها ؟
يزيد : طيب انت ما سألتهاش ليه ؟
فهد : طبعا سألتها بس اجابتها ما دخلتش دماغي بنكله
يزيد : اجابتها كانت ايه ؟
فهد : انها مهتميه بسعادتي
يزيد : هيا والدتك فليه ما تكونش فعلا مهتميه بسعادتك ؟
فهد : ميس معندهاش المشاعر دي ولا الاحاسيس دي .. ميس عندها هتستفاد ايه وهتكسب ايه وبس .. فلازم يكون لها غرض من جوازي من جميله ! بعدين دي كانت لسه هتتجنن لما سيبت سالي دلوقتي بتقنعني بجميله طيب ازاي ؟
يزيد : طيب انت ايه مشكلتك من جوازك من جميله ! ما تتجوزها ؟
فهد : اتجوزها ازاي يا ابني ! وبعدين لنفترض ان ميس عايزاني اتجوزها علشان تنتقم من ضرتها في صوره جميله ساعتها انا هيكون موقفي ايه ؟ هسيب امي تعذب مراتي ولا هحمي مراتي علي حساب امي
يزيد : لا انا مااعتقدش ان ده ابدا السبب هيا مش هتخلي ابنها يتجوز علشان تنتقم من صوره لشبح في الماضي مش منطق يعني
فهد بنفاذ صبر : طيب قولي انت سبب تاني .. اي سبب
يزيد : طيب اتجوز يا فهد .. او علي الاقل خد خطوه ناحيه جميله وبعدين انت اصلا بتحبها فايه المانع ! اتجوزها وسيب الايام توضحلك ايه السبب !!
فهد : طيب انا عايز اعرف ماضي ميس .. كل حاجه عنها !! حاول تعرفلي كل اللي تقدر عليه عنها وعن اعمامي دول
يزيد : حاضر بس انت كلم جميله واطلب ايدها
فهد : ما اعتقدش ان جميله كمان هتوافق بسهوله
يزيد : دي بقي مشكلتك انت مش مشكلتي عايز انام بقي
فهد ابتسم : اطلع نام سلام
يزيد : سلام والصبح ابقي طمني عملت ايه مع جميلتك
………
جميله الصغيره في بيت ابوها بتفتكر لحظاتها مع فهد وبتبتسم لوحدها
موبيلها رن واستغربت الوقت متأخر بصت كان فهد فابتسمت وردت
جميله بهمس : انت عارف الساعه كام ؟
فهد ابتسم : نمتي يعني ! اقفل ؟
جميله : لا لسه مانمتش
فهد : بتعملي ايه ؟
جميله : في سريري وانت ؟
فهد : انا زيك
فضلوا ساكتين شويه وفهد مش عارف ازاي يفتح معاها الكلام او يقولها ايه جميله منتظراه يتكلم
فهد : هو انتي مش هتيجي الشركه تاني خلاص ؟
جميله : انت عايزني اجي ؟
فهد : اكيد
جميله : بابا ما اعتقدش هيوافق
فهد : انا هخليه يوافق
جميله : ازاي بقي ؟
فهد : هتجوزك
فهد رمي الكلمه وجميله حست انها سمعت حاجه غلط او مش عارفه اصلا هيا سمعت ايه ! وفهد منتظر رد فعلها للكلمه
جميله : انت قولت ايه ؟
فهد : قلت هخلي باباكي يوافق
جميله : اللي بعدها قلت ازاي ؟
فهد ابتسم : قلت هتجوزك
داس علي كل حرف ونطق كل حرف لوحده في كلمه هتجوزك
جميله : يعني انا سمعت صح فعلا .. انت بتهزر صح ! مجرد استظراف منك ؟
فهد : وانا من امتي بهزر او بستظرف معاكي ؟
جميله : انت علي طول بتستظرف .. موضوع وكلام زي ده مفيهوش هزار اصلا
فهد ابتسم : ايه الهبله دي بقولك هتجوزك تقوليلي هزار واستظراف ؟ مش عايزه او مش موافقه قولي صراحه !! موافقه ولا مش موافقه !
جميله : اوافق علي ايه ؟ هو انت قلت ايه يتوافق عليه ولا المفروض انا اخمن ؟
فهد : اهدي بس يا جميله .. بقولك هتجوزك موافقه ولا مش موافقه ؟
جميله بغباء : هتتجوزني علشان اجي اشتغل في الشركه ؟؟
فهد باستغراب : شركه !! شركه ايه يا فصيحه انتي ! هو انا ممكن اتجوز واحده لمجرد اني اشغلها عندي ؟ انتي عبيطه النهارده ولا جرعه الغباء زياده ليه ! مالك يا جميله ؟
جميله : ماهو انا مش فاهمه حاجه يا فهد ؟ انت بتقول حاجات غريبه
فهد : طيب شوفي يا ستي الصبح هاجي لابوكي احدد معاه معاد اطلبك رسمي منه خلاص !
جميله:ولنفترض وركز في كلمه نفترض دي نفترض اني وافقت فهل ميس هتوافق ؟
وليد : ما تقلقيش من حد انتي .. ميس موافقه دي هيا كمان اللي فتحت معايا الموضوع لما شافتني وانا بسرق التورته ليكي وقالت لو سعادتي معاكي فافضل معاكي … المهم انتي موافقه ولا لأ الباقي سهل ؟؟
جميله : انت عايز تتجوزني ليه يا فهد ؟
فهد : جميله عايز اتجوزك زي اي حد ما بيعوز يتجوز … ما تستنيش مني رومانسيات يا جميله واعترافات لان ماليش فيها ابدا
جميله : يعني ايه يا فهد !
فهد : يعني ده اقصي ما عندي .. موافقه تتجوزيني ولا لأ ؟
جميله : بالطريقه دي لأ والف لأ كمان
فهد : انتي بترفضيني يا جميله !
جميله : انا برفض طريقتك واسلوبك .. الوقت اتأخر يا فهد تصبح علي خير
قفلت السكه بسرعه وهيا متوتره ومش عارفه تنام من التفكير …. واخيرا قررت تكلم عمتها فرنت عليها
وليد كان صاحي وشاف الموبيل لقي جميله فرد عليها هو
جميله : اسفه يا عمو لو كنت صحيتك
وليد : لا يا قمر انا كنت صاحي اصلا .. خير في حاجه !
جميله باحراج : لا كنت عايزه ارغي مع عمتو .. متعوده بقي ارغي معاها في اي وقت اعذرني بقي .. تصبح علي خير
وليد : استني يا بت انتي .. طيب عمتك نايمه ارغي معايا انا .. اصلا مش جايلي نوم وعمتك مذنباني جنبها .. كنت عايزه تحكيلها ايه !
جميله ضحكت : كنت هحكيلها عن فهد
وليد قلبه دق : فهد ! ماله !
جميله : لا مفيش مالوش
وليد : امال ايه اللي جد بينكم من ساعة ما سرقلك التورته واكلهالك ؟؟
جميله باستغراب : عمتو قالتلك
وليد ضحك : المهم ايه اللي جد ؟
جميله : كلمني وطلب يتجوزني .. انت متخيل فهد يطلب يتجوزني !! انا اصلا مش مصدقه نفسي
وليد قلق : جميله اهدي .. ميس مش هتوافق اصلا ولا اعمامه ؟
جميله : لا يا عمو .. ميس اصلا اللي عرضت عليه وقالت انه طالما بيحبني وسعادته معايا فبراحته
وليد هنا كشر وعرف انهم بيخططوا لحاجه جديده
جميله : رحت لفين يا عمو !
وليد : لا يا جميل بس مش متخيل ميس توافق
جميله : غريبه صح ! بس فهد قالي ما اشغلش بالي بيها
وليد : طيب انتي قولتيله ايه في الاخر يعني ؟ وافقتي ؟
جميله : لا طبعا .. اوافق ازاي وانا مش فاهمه حاجه ! وبعدين هو طلبه للجواز كان بطريقه مستفزه زي ما يكون واثق تماما اني هوافق وانا بكره ثقته دي ..
وليد ابتسم : رفضتيه عندا فيه يعني ؟
جميله : لا يا عمو مش بس عندا فيه ! في اسباب تانيه
وليد ابتسم : ماشي يا ستي براحتك المهم الصبح هجيبلك عمتك وترغي معاها براحتك
جميله : متشكره جدا ياعمو …. عمو
وليد : نعم
جميله : ادعيلي ان فهد لو فعلا من نصيبي يحبني زي ما حضرتك بتحب عمتو
وليد اتنهد : يارب يا جميله .. يارب ..
قفل معاها وفضل كتير يفكر ليه ميس عايزة فهد يتجوز جميله ؟؟ اكيد مش لله في لله ؟ لازم يكون وراها غرض ؟؟
وليد فضل كتير صاحي لحد ما النوم اتغلب عليه ونام …..
جميله فتحت عنيها علي همهمات وصوت حد بيتوجع واتفاجئت ان ده وليد وهو اللي بيإن جنبها .. وعمال يقول .. لأ .. لأ … مش انا … حرام … كفايه … لأ
جميله بتحاول تصحيه وتفوقه من الكابوس اللي هو فيه وهو صحي بيصرخ وزقها بايده فوقعت من علي السرير واتخبطت في الكوميدينو واتعورت في راسها واتجرحت و وليد فتح عنيه وبص حواليه شاف جميله في الارض .. نور النور بسرعه وبصلها كانت ايدها علي دماغها ولمح الدم فقام بسرعه ومسك ايدها وهو متوتر وخايف ومسك مناديل يمسح الدم
جميله : وليد اهدي انا كويسه … وليد وليد
وليد مش بيرد عليها بس الخوف مالي كل ملامحه وهو بيمسح دماغها ومش عارف يعمل ايه ؟
جميله : وليد رد عليا
وليد بصلها : انتي محتاجه غرزتين علي الاقل .. قومي هاخدك مستشفي
جميله : اهدي اهدي مش هروح مستشفيات .. ومش هخاطر حد يشوفك علشان غرزه
وليد زعق : جميله الجرح بينزف ولازم يتخيط
جميله : الصبح هبقي اكلم وليد ويعدي ياخدني معاه
وليد : قومي البسي مش هستني للصبح .. قولتلك خليني بعيد لكن انتي بتصري
جميله : اوعي تفكر كده يا وليد
وليد : امال افكر ازاي ؟ قومي والبسي يا جميله
جميله حاولت تعترض او ترفض بس وليد اصر وهيا لبست ونزلت معاه
جميله : طيب هنروح فين ؟
وليد : لدكتور
جميله : مين في الفجر ده ؟
وليد ما ردش بس طلب رقم ومنتظرو يرد
وليد : الو .. اسف جدا يا ادهم اني بتكلم في وقت زي ده !
ادهم : لا يا وليد ولا يهمك خير !
وليد : جميله اتعورت ومحتاج حد يخيطلها الجرح وزي ما انت عارف مش هينفع اروح مستشفيات
ادهم قاطعه : انت بتبرر في ايه يا وليد ؟ هاتها يا ابني بسرعه ..
وليد : انا قربت علي البيت
ادهم : طيب يالا منتظرك
قفل وصحي ليلته وقالها اللي حصل وقام هو يلبس : تيشرتي فين ؟
ليلي ابتسمت : انت رميته في حته دور عليه
ادهم بصلها : ايوه رميته فين !
ليلي بصت حواليها : هناك متعلق علي التسريحه
ادهم بصله وضحك : للدرجه دي
ليلي : واكتر
جهزوا ونزلوا استقبلوا وليد اللي كان التوتر والخوف مسيطر عليه
ليلي بنجت المنطقه وبدئت تخيطها و وليد هيتجنن جنبها
نزل يوسف علي أصواتهم وسلم عليهم
يوسف : هو حضرتك اللي عورتها صح ؟
الكل بص ليوسف قوي
يوسف : بتبصولي كده ليه ! باين قوي علي ملامحه وخوفه ان هو له يد !
وليد : كانت بتصحيني وانا زقتها وقعت واتخبطت
يوسف : امممممم .. وياتري دلوقتي بتفكر تبعد عنها علشان ما تأذيهاش صح نفس التفكير الاناني
ادهم : اناني ؟ لما تفكر انك ما تأذيش الانسان اللي بتحبه فدي انانيه في نظرك ؟
يوسف : طبعا انانيه لانك بتحمي نفسك من احساسك بالذنب لو اذيته .. بتحمي نفسك من وجع اكبر .. ( بص لوليد ) بس نصيحتي ليك اوعي تعمل كده
وليد : بتتكلم وكأنك عشت التجربه دي !
يوسف : طبعا عشتها بابا في فتره من الفترات قتل ماما
وليد بص لادهم بس يوسف اتكلم
يوسف : كان نايم وهيا صحته في وقت غلط فخنقها وما سبهاش غير لما ماتت في ايده وحتي خالي لما اتدخل كسرله دراعه وساعتها بابا قرر انه يبعد علشان يحميها من نفسه وكان فاكر ان ده الصح !!
ادهم : انت مش فاهم انت بتتكلم عن ايه وطول ما انت ما حبتش فما تتكلمش عن شيء ما تفهموش
يوسف : ايوه ما حبتش ومش عايز احب لان الحب شيء بيسلبك ارداتك وبيخليك عرضه للاذي وكل قرارتك بتكون غبيه ..
ادهم : انت بتقول ايه ؟ الحب ده اجمل شيء ممكن يحصلك لو انا محبتش امك مكنتش هخلفكم انت وآسيا .. مكنتش هعيش سعيد في حياتي .. كنت هفضل ضايع .. مكنتش هقابل عيلتي ولا اعرف اي حاجه عن ماضييا
يوسف : ولو محبتش مكنتش هتسيب شغلك وانت في قمه مجدك .. مكنتش هتتقاعد وانت صغير بسبب خوف حبيبتك عليك .. مكنتش هتبطل اكتر شيء بتحبه في الدنيا وهيا اثاره مهماتك علشان خاطرها .. كان زمانك هتكون اسطوره زي والدك لكن انت اختارت الحب وبقيت ماضي
ادهم : واختياري كان صح وانا راضي عنه ولو الزمن رجع كنت هختار نفس اختياري ده
يوسف : علشان بتحب
وليد اتدخل : الحب مش وحش يا يوسف ولا هو السبب في قرارتتا الغبيه
يوسف بصله : ارجوك حضرتك بالذات ما تتكلمش عن الحب
وليد : ليه ؟
يوسف : لان حياتك اتدمرت تماما بسبب الحب .. لو مكنتش حبيت جميله كنت هتفضل مستقر في بيتك مع مراتك ومفتح عنيك لاعمامك ومكنوش قدروا يأذوك ابدا
وليد : انت فعلا مش فاهم انت بتتكلم عن ايه يا يوسف .. يا ابني قبل ما احب جميلة انا مكنتش عايش .. حياتي بدئت فعليا لما حبتها .. اتنفست اما حبيتها وعرفت قد ايه انا كنت محروم وميت بالحيا .. وبعدين لو مكنتش حبيتها مكنتش هخلف فهد ابني
يوسف : وهو فهد فعلا ابنك ! لو مكنتش حبيتها كنت هتخلف فهد وهتربيه مع مراتك وساعتها كنت
قاطعه وليد : كنت ايه ؟ هعيش ؟ وحياتي ملهاش اي معني !! يا ابني اللحظات الجميله اللي بتقضيها مع حبيبك مفيش شيء ابدا يعوضها ابدا
يوسف : حتي بعد عشرين سنه حبس ؟
وليد : حتي بعد مية سنه
يوسف : انتو بتتكلموا باي منطق
ليلي امه اتدخلت : بمنطق ساعه بقرب الحبيب ولا عمر كامل من غيره .. مش هتفهم احنا بنتكلم عن ايه الا لو
جربت تحب
يوسف بص لجميله : حضرتك رأيك ايه ؟ ندمتي انك حبيتيه ؟
جميله : عمري !! وليد كان اجمل شيء حصل في حياتي
يوسف : انتي اتحبستي بسببه واتحرمتي من ابنك يسبّبه
جميله : خلفت ابني بسببه وعشت اجمل قصه حب بسببه واخويا سافر واشتغل بسببه وخلف عيلين بسببه واتربوا احسن تربيه بسببه .. في حاجات كتيره حلوه حصلت في حياتي بسببه ..
يوسف : انتو مفيش فايده فيكم .. اسيبكم احسن بعد اذنكم والف سلامه عليكي
ادهم اخد وليد وطلعوا يتمشوا في الجنينه بره
ادهم : انت فعلا بتلوم نفسك ؟
وليد : انا زقتها
ادهم : بتفكر في ايه دلوقتي ؟
وليد : زي ما قال ابنك .. ابعد لحد ما اموري تستقر
ادهم : وزي ما قال ابني برضه ما تبعدش وخليك معاها
وليد : انا ما بنامش خوفا من الكوابيس اللي بحس انها هتقتلني .. الليله اللي فاتت اصرت اني افضل جنبها ودي النتيجه
ادهم : يبقي انت محتاج لمساعده مش الحل في بعدك يا وليد
وليد : انت عملت ايه ؟
ادهم حكاله كل اللي حصل وعلاجه النفسي مع دكتور عصام
ادهم : عايز نصيحتي انا بقي تروح لدكتور عصام وتشوف ايه سبب المشكله وتعالجها
وليد : ان شاء الله بس دلوقتي مش هينفع لاني المفروض ما اظهرش
ادهم : لا روحله وانا هكلمه وافهمه الوضع وما تقلقش .. المهم في جديد ؟
وليد : ميس عايزه فهد يتجوز جميله وهيروح يطلب ايدها الصبح
ادهم : ميس ؟ دي كده بتخطط لحاجه كبيرة خلي بالك
وليد : عارف بس يا تري ايه ؟
ادهم : ممكن تكون نقطه ضغط ليها ؟ او تخلي البنت تحت ايدها ! المهم جميله كان ردها ايه عليه؟
وليد : رفضته
ادهم : لا حاول تقنعها توافق يا وليد علشان تفهم ميس بتخطط لايه و نشوف اخرتها ايه وادينا مستعدين لاي حاجه
وليد : ربنا يسهل
وليد شكر ادهم ومراته كتير واخد جميله يوديها عند بيت اخوها وهما تحت البيت
جميله : انت جبتني هنا ليه ؟ اوعي تكون بتفكر تبعد ؟ او تخليني هنا ؟ لا يا وليد مش هسمحلك انت فاهم ؟ انت مش هتبعد ؟ ومش هتفضل بعيد عني !!( حاول يتكلم بس منعته )) مش هتقنعني ومش هوافق افضل هنا ! يالا البيت
وليد : يا بنتي اصبري .. لوك لوك لوك ايه هو ! بنت اخوكي عايزاكي
جميله : بتضحك عليا ؟
وليد : والله ابدا .. ابنك طلب يتجوزها وهيا رفضته وعايزك تقنعيها توافق عليه
جميله فرحت جدا : بجد فهد طلب ايدها
وليد : جميله اهدي كده لان الموضوع فيه إنة فحاولي تقنعي بنت اخوكي و تفهميها لو وافقت تكون مستعده لاي صدمه ممكن تحصل .. ميس مش هتوافق كده الا لو كان وراها غرض
جميله بخوف : هما ممكن يأذوها يا وليد ؟
وليد : ممكن تحاول لكن ما تقلقيش انا مأمن الكل .. اكرم حاطط حراسه علي الكل .. اخوكي وعياله الاتنين حتي فهد كمان عيننا عليه فما تقلقيش .. المهم يالا ننزل وشوفي هتقولي ايه لبنت اخوكي وهتقنعيها ازاي توافق
نزلوا مع بعض وطلعوا و الكل اتخض علي جميله من الجرح اللي في راسها بس قالتلهم انها اتخبطت وهما ما رضيوش يضغطوا عليها
وليد قعد هو وجميله الصغيره لوحدهم
وليد : هاه يا جميله فكرتي ؟
جميله : افكر في ايه بس يا عمو ؟
وليد : في طلب فهد
جميله : حضرتك عايز توصل لايه ؟
وليد : حضرتي عايزك توافقي طبعا
جميله : طيب ليه ؟
وليد : لاني يا جميله لازم افهم غرض ميس ايه ؟ وميس مش هتكشف اوراقها بسهوله .، لازم توافقي يا جميله وتكوني قريبه من فهد
جميله سكتت كتير و وليد منتظر منها رد
وليد : جميله قولتي ايه ؟
جميله : عمو انا مقدرش ارفض لحضرتك طلب طبعا فلو حضرتك عايزني اعمل ده هعمله حضرتك وعمتو فضلكم عليا كبير اوي
وليد قاطعها: جميله انا عمري ما هفرض عليكي تعملي حاجه انتي مش عايزاها او انتي مش مقتنعه بيها فبلاش الكلام الاهبل ده تقولي فضل ومش فضل .. انا لو كنت بقنعك دلوقتي فده علشان انا عارف انك بتحبي فهد وعارف انه بيحبك وبناءا عليه اتكلمت غير كده لأ
جميله : عارفه يا عمو الكلام ده
وليد بحيره : ولما انتي عارفاه رفضتي فهد ليه !
جميله بعناد : مش بالطريقه دي يطلبني وكأني امر مفروغ منه !! عايزني يبقي يتعب علشاني لكن مش كده … انا مش قادره افهم حضرتك اللي انا حساه
وليد ابتسم : انا فاهم تماما اللي انتي حساه … بس رفضك القاطع غلط كان المفروض توجهيه للي انتي عايزه مش ترفضيه
جميله : هنا بقي ياعمي تسمحلي اقولك انك غلطان لان فهد ابنك بيعشق التحدي ومش بيقبل ابدا بكلمه لأ وطالما انا قلت لأ فده معناه انه هيعمل المستحيل علشان اغير ال لأ دي
وليد ابتسم ووقف : والله انتي ادري انتي اكتر حد قرب منه
وليد سابها وراح لعماد وقعد معاه يقنعه ان لو فهد اتكلم ما يرفضوش … وعماد في النهايه اقتنع يسمع وجهه نظر وليد …
الباب خبط وعماد فتح وكان فهد اللي علي الباب : اتفضل يا ابني
فهد دخل وسلم وقعد مش عارف يبدأ منين او يقول ايه ! اما جميله فوافقه في المطبخ متابعه فهد وبتسمع هيقول ايه لابوها
عماد : خير يا ابني !
فهد : اه خير ان شاء الله .. شوف انا عارف ان جميله سابت الشركه عندي خلاص وحضرتك رافض شغلها عندي
عماد باستغراب لان مش ده الموضوع اللي كان متخيل ان فهد هيتكلم فيه : اه وبعدين ؟
فهد : انا باستأذنك اخد جميله لمده ساعتين او تلاته بالكتير
عماد باستغراب اكبر : تاخدها فين ؟
فهد : عندي وفد الماني ( بص لساعته ) المفروض هستقبله في المطار في اقل من ساعه وللاسف انا مش بعرف الماني وجميله بتعرف الماني كويس فمحتاجها معايا تستقبلهم واخدهم الفندق وبعدها هجيبها لحد هنا البيت وابقي متشكر جدا لحضرتك
عماد سكت شويه : طيب وبعدين ؟ وبكره وبعده هتعمل ايه ولا كل ما تحب تكلمهم هتيجي تاخدها ؟
فهد : لا طبعا هشوف مترجم
عماد : طيب شوف دلوقتي
فهد : عمي الساعه ٨ الصبح وزيارتهم كانت فجأه لكن الشركه عندي هتشوف حد النهارده … عمي انا مش عايز افرض نفسي عليك لو حضرتك شايف اني متقل علي حضرتك بطلبي ( قام وقف ) فأنا اسف بس زي ما سبق وقلت لحضرتك اني بعتبركم اهل
عماد : اكيد طبعا يا ابني اهل .. ( نادي علي جميله اللي خرجت مش قادره تحدد هل فهد بيتكلم بجد ولا مجرد حجه علشان يتكلم معاها ؟)
جميله : نعم يا بابا
عماد : فهد عايزك معاه تقابلي الوفد الالماني ؟
جميله : الشركه تقدر توفرله بدال المترجم عشره !
عماد : الوقت بدري يابنتي وهو طالب مساعدتك هاه !
جميله بصتله بتحدي وهو نظرته غامضه معرفتش تحدد معناها : اه طبعا يا بابا لحظه هغير هدومي
فهد بيغيظها : بسرعه بس يا جميله طيارتهم قدامها تقريبا نص ساعه يدوب نلحق
جميله بغيظ : طبعا
دخلت واخدت عشر دقايق وفهد كل شويه بيبص للساعه فأبوها قام يستعجلها
جميله خرجت ونزلوا الاتنين مع بعض وفتحلها باب عربيته ركبت وقفله وركب جنبها ودور عربيته واتحرك
فهد بدون ما يبصلها : اتأخرتي وانتي بتلبسي !
جميله بتريقه : وفيها ايه لما اتأخر ولا الوفد هيتلطع علي باب المطار
فهد بصلها بس عنيه مستخبيه وري نظارته وماردش عليها
كان سايق بسرعه جدا واتفاجئت جميله انه داخل فعلا علي المطار لحد ما ركن
جميله : فهد هو بجد موضوع الوفد ده ؟
فهد بصلها : انا مش قادر افهم انا من امتي بهزر معاكي او بستظرف علشان انتي ما بتثقيش في كلامي وبتعتبريه هزار ؟
نزل وهيا نزلت وراه وماشي بسرعه وهيا تقريبا بتجري علشان تحصله … دخل وسأل علي الطياره وعرف انها نزلت بس الركاب لسه ما خرجوش بره فوقف وبصلها
فهد : كويس لسه ما خرجوش
جميله : طيب انتي ليه مقولتليش انه بجد ؟
فهد رفع نظارته من علي عنيه وحطها علي راسه وبصلها وما ردش عليها
جميله : انت ما بتردش ليه؟
فهد : ارد اقولك ايه هاه ؟ ولا كنتي عايزاني اقولك ايه ! اقولك يا جميله علي فكره انا مش بضحك علي ابوكي انا بتكلم جد .. كنت عايزاني اقولك كده ؟
جميله : معرفش يا فهد بس انا فكرت
فهد : فكرتي في ايه ؟ اني هموت واشوفك مثلا !
جميله بغيظ : وليه لأ هاه ؟ مش لسه من كام ساعه كنت بتطلب مني اتجوزك ؟ ولا نسيت ؟ ولا كان هزار ! لا صح حضرتك ما بتهزرش
فهد : انا فعلا ما بهزرش واه طلبت اتجوزك وسيادتك رفضتي وطالما رفضتي فمش من حقك تسألي اي اسئله تانيه … الاسئله المفروض تكون قبل الرفض مش بعده … الناس بدئت تطلع
سابها واتحرك وهيا هنا قلقت لانها مش عارفه هتعمل ايه ؟ طيب عمتها وجوزها ؟ هتقولهم ايه !
فهد نادي عليها بس ما سمعتوش لانها سرحانه وهو قابل الوفد وبيشاورلها وهيا مفيش خالص لحد ما راحلها وشدها
فهد : في ايه يالا ! اتفضلي
جميله شدت ايدها بعيد عنه : ما تزقش
بدئت تتكلم معاهم وعرفتهم علي فهد
الوفد كان عباره عن اتنين رجاله وبنت وواحد من الرجاله كان شكله معجب بجميله
ايوه فهد مش فاهم كلامهم بس ده ما يمنعش انه حاسس انه بيعاكسها وهيا لاحظت ضيق فهد فكانت بتضحك علي كل كلمه الراجل ده يقولها …
طلعوا يركبوا عربيته بس فهد شد جميله علشان تقعد هيا جنبه ومنعها تركب وري جنب الراجل ده .. وصلهم الفندق بسرعه واعتذر منهم علي وعد يتغدوا مع بعض ..
اخد جميله ومشي
فهد : عاجبك قوي الاخ ده ؟
جميله : وانت مالك يعجبني ولا ما يعجبنيش وبعدين ايوه راجل لطيف ودمه خفيف وبيفهم في الذوق
فهد وقف ومسكها من دراعها جامد جدا وشدها عليه : قسما بالله يا جميله
جميله دراعها وجعها بس ما بينتش : بتقسم بإيه سيادتك !
فهد : اتلمي واتكلمي كويس
جميله : انا اتكلم براحتي وانت مالكش دعوه وبعدين بدال ما تشكرني ؟
فهد : اشكرك ؟ علي ايه ؟
جميله شدت دراعها : اني رضيت اجي معاك والظاهر اني غلطانه
فهد : هو انتي متخيله اني فعلا محتاجك ومش هعرف اجيب غيرك للوفد .. انا باشاره هيكون قدامي عشره مترجمين علي الاقل
جميله : ولما باشاره جبتني ليه هاه ؟
فهد قرب وشه منها : علشان انا عايز كده وانتي تنفذي اللي انا عايزو
جميله بصتله كتير بغيظ ومره واحده مشيت من قدامه وبتحاول تشاور لاي تاكسي وهو وراها مسك اي
رواية جميله الجزء الثاني للكاتبه شيمو
الحلقه الرابعةوالعشرون
سبحان الله وبحمده سبحان الله العظيم
شكر خاص لكل من شجعني او وقف جنبي وشكر خاص لشريك عمري وحبيبي وزوجي .. ربنا يخيلك ليا يارب ويباركلنا في حياتنا مع بعض يارب
فهد لبس نظارته وداري عنيه تماما وهيا هتموت وتنطق انها مش بس بتحبه انها بتعشقه بكل مافيه وانها موافقه علي اي شيء يقربها منه .. بس الصمت سيطر عليها وهو حاسب الجرسون ومشيوا فتحلها باب العربيه وركبها وقفل الباب وركب جنبها واتحرك بصمت مطبق بينهم
جميله عارفه تماما انها لو ما اتكلمتش فده معناه انها خسرت فهد تماما .. هو قدم كل اللي عنده والكوره دلوقتي في ملعبها هيا ومش عارفه تنطق ازاي او تقول ايه !! اتمنت اي حاجه تحصل تعطلهم او الطريق يقف او اي حاجه توقفهم .. اي حاجه تقطع الصمت ده
جميله : الجو حر
فهد ما بصلهاش بس قفل الشبابيك وفتح تكيف العربيه بدون ما ينطق حرف او يبصلها
جميله جواها … يووه ما نطقش طيب اقول ايه ! يا فهد ما تصعبهاش كده ..
وقفوا في اشاره طويله وهو ايده علي فرامل اليد رفعه ومنتظر وهيا مش عارفه تعمل ايه او تقوله ايه .. بصمت مدت ايدها ومسكت ايده اللي جنبها وقلبها هيقف لانها مش عارفه رد فعله هيكون ايه ؟
فهد بصلها باستغراب وبص لايدها اللي ماسكه ايده ومش عارف يتكلم او يفسر ده بايه .. بس باصصلها وهيا باصه قدامها هربانه من عنيه … وهو مش عارف يقولها ايه ؟ الاشاره فتحت واتفاجيء بعربيات كتير بتزمر علشان يتحرك ونسي انه رافع الفرامل وبيتحرك بس افتكر الفرامل ومش عارف يعمل ايه لانه مش عايز يسيب ايدها فهيا ابتسمت وسابت ايده علشان يعرف يتحرك بالعربيه فاتحرك ومشي شويه وركن علي جنب وبصلها وهيا بصتله
مد ايده وهيا بصت لايده ومش عارفه تعمل ايه ! هيا اه مسكت ايده بس ده كان علشان تلحقه لكن مش معناه انها …. انها ايه ؟ بقت متلخبطه ومش عارفه تعمل ايه !
فهد : حطي ايدك في ايدي يا جميله
بتردد حطت ايدها في ايده وهو ضم ايدها وابتسم : افهم من كده انك موافقه ؟
جميله ابتسمت وشاورت بدماغها اه
جميله بهمس : ينفع تتحرك !
فهد ابتسم واتحرك بس ما سابش ايدها
فهد : هيا دي جميله اللي انا عايز اتجوزها البنوته اللي بتتحرج وبتبتسم زي البنات عادي .. بس علشان اوصل لدي لازم معاها جميله الشرسه ( كانت هتتكلم بس معطاهاش فرصه ) اللي انا برضه عايزها وعايز اتشاكس معاها .. جميله بشخصياتها كلها المتعدده انا عايزها
وصلوا بيتها وهيا نازله وهو نزل معاها
جميله : انت رايح فين ؟
فهد : هطلع احدد معاد مع ابوكي علشان اجي اطلب ايدك منه
جميله : طيب مش دلوقتي
فهد : ليه مش دلوقتي ؟
جميله : بابا هيفهم انك طلبتني علشان كده
فهد : طيب ما يفهم ايه المشكله ؟
جميله : يا فهد لأ
فهد : اطلعي انتي بس ومالكيش دعوه
طلع معاها وقابلتهم جميله الكبيره علي الباب
جميله امه : اهلا يا حبيبي تعال
فهد مسك دراعها : استني .. اخوكي فين ومزاجه رايق ولا ايه ؟
امه ابتسمت : ان شاء الله ما تقلقش
فهد : كنت عايز اطلب منه طلب ولو رفض حضرتك اتدخلي !
جميله ابتسمت : ما تقلقش يا حبيبي
وقابل باباها وقعد معاه
عماد : خير يا فهد عايز تقول ايه !
فهد : كنت عايز احدد مع حضرتك معاد بحيث اجيب اعمامي ونطلب ايد جميله من حضرتك فيناسبك امتي ؟
جميله كانت وافقه متبعاهم وفهد بصلها وابوها كمان بصلها ومش عارف يقول ايه !!
فهد : هاه يا عمي !
عماد : يا ابني مش افكر ولا ايه ! واشوف رأيها واشوف الدنيا فيها ايه !
فهد : هيا موافقه
عماد : وانت عرفت منين ! ولا عملت موضوع الوفد ده علشان
فهد قاطعه : لا يا عمي احنا فعلا روحنا وقابلنا الوفد واتكلمت معاها لاني ببساطه كان لازم اخد رأيها قبل ما اكلم حضرتك
عماد : طيب ماشي بس برضه اديني وقت
فهد بص لامه : ايه ما تقولي حاجه حضرتك ؟
جميله ابتسمت : عماد يا حبيبي وافق وحدد معاه معاد يالا
عماد : انتو مستعجلين ليه ؟
فهد : عمي انا مش بعرف اصبر .. احنا باذن الله خلال اسبوع هنكون اتجوزنا وجميله هتكون في بيتي
عماد : ليه هو سلق بيض ولا ايه ؟ الامور تتاخد بالهداوه
فهد : ماهو هداوه بس ليه التأخير ؟ يعني حضرتك معترض عليا انا مثلا ! مش شايفني جدير ببنتك ! ولا ايه ! فهمني يعني ؟
جميله : لا يا حبيبي انت بتقول ايه ! عماد انطق
فهد : طيب النهارده الساعه ٧ المغرب ايه رأيك ! هجيب اهلي ونيجي نطلبها رسمي
جميله : منتظرينك يا ابني
فهد وقف وعماد اتكلم : وبعدين معاكي !
جميله : وبعدين معاك انت .. العيال وعايزين بعض خلاص ما تتدخلش بينهم .. فهد حبيبي هنكون في انتظارك
فهد خارج وهيا معاه وعلي الباب باسها في خدها : انت مش متخيله انا بحبك قد ايه ؟ بحبك زي والدتي بالظبط ! سلام يا قمر
سابها ومشي وهو مش عارف كلمته عملت فيها ايه ؟ اه لو تعرف اني انا والدتك يافهد وانك انت حبيبي وابني وعمري كله ..
عماد فوّقها علي صوته : انتي ازاي توافقي كده ! وبعدين اهله هيوافقو ليه هاه ! دول عارفين ان جميله بنت اخوكي
جميله : عارفه
عماد : عارفه وبعدين ؟؟ طيب وليد جوزك بيفكر في ايه يا جميله ؟
جميله : معرفش بس هو مستعد لاي حاجه تحصل
عماد : ربنا يستر يا جميله مش هقول غير كده .. الستر من عندك يا رب
فهد راح الشركه وراح علي طول علي مكتب ميس بلغها بالمعاد وهيا بلغت محي
………………..
وليد اتجمع مع اكرم ويزيد ومعاهم ادهم كمان
وليد : جميله وافقت علي عرض فهد والنهارده اخر النهار المفروض فهد هيجيب عيلته ويطلب ايدها
ادهم : تمام عينكم تبقي مفتحه بقي جدا ونشوف وراهم ايه وليه دلوقتي !
اكرم : البيت كله تحت عنينا وكمان هركب كاميرا في البيت جوه بحيث نكون متابعين كل اللي يحصل اول بأول
يزيد : طيب فهد اللي طالب يعرف اي معلومات عن ميس هنقوله ايه !
وليد : اكشفله اي معلومه جديده
يزيد : زي ايه !
اكرم : هو مش سبق وطلب منك معلومات عن ميس اكشفله محاوله قتلها لوليد
ادهم : تمام خلينا نزعزع ثقته في ميس كمان ممكن تكشفله نقطة جوازهم مش انت سبق وقلت ان القسيمه مزوره بتاعت جوازهم وانهم اتجوزوا فعليا بس بعد كده قول لفهد علي النقطه دي
يزيد : بس هما اتجوزوا فعليا وعلي يد مأذون
ادهم : ماشي بس لما هو شافهم مكنوش متجوزين وده المهم .. ميس كدبت عليه علشان مصلحتها ومن هنا يفهم ان ميس ممكن تكدب
وليد : طيب وهو ده وقته ! يعني يوم زي ده مميز
ادهم : لا يا وليد المشاعر دي اركنها تماما علي جنب وبعدين فهد منتظراه مصايب وخبطات اكبر من دي بمراحل فخلينا نوزع الصدمات .. كل يوم هنديله صدمه بدال ما كله يتكشف مره واحده
وليد : ربنا يستر
يزيد كلم فهد وراح قابله وقعدوا مع بعض وبدأ يحكيله عن ميس واللي عملته في وليد وفهد ساكت تماما …
فهد : انت مصدرك ايه يا يزيد ؟
يزيد طلع ورقه وعطاها لفهد : دي صوره المحضر اللي اتعمل لميس وبعدها ابوك ماهانش عليه انها تفضل محبوسه فخرجها
فهد : بس هيا ممكن تكون غيرتها من جميله عملت فيها كده وبعدين وليد نفسه ساوم شريف علشان يطلعله بنته
يزيد : انت بتبرر لميس محاوله قتلها لابوك بالغيره !! طيب ماشي بلاش دي القسيمه اللي ميس ورتهالك دي قسيمه مزوره
فهد وقف : يعني ايه مزوره ! هما مش متجوزين !
يزيد : مش ده السؤال الصح يا فهد
فهد : امال ايه السؤال الصح ؟
يزيد : هما متجوزين اه بس امتي ده السؤال ؟
فهد : امتي ؟
يزيد : الجواز الفعلي تم في اليوم اللي هيا ورتك فيه القسيمه .. عملو قسيمه مضروبه لحد ما الصحيحه تطلع ..
فهد مش مصدق ابدا ومش عايز يصدق
فهد : ممكن تكون انت غلطان !! او ممكن اتجوزوا عرفي مثلا ! او ممكن
يزيد ( هنا يزيد وقف وهيمشي ) : الظاهر انك بتضيع وقتي يا فهد
فهد : انت رايح فين ووقتك ايه اللي بضيعه ؟
يزيد : انت كل معلومه ببلغهالك بتحط مبررات للي عملها فلازمته ايه تعرف طالما تفكيرك ما بيتغيرش وهتفضل تحط اعذار؟ بنتسلي مثلا ؟ ولا ايه ؟ هتفضل تحط اعذار لامتي ؟
فهد : تحب اقوم امسك ميس واخنقها لحد ما تموت ! كده هكون بطلت الاعذار !
يزيد : مش اقصد كده
فهد : امال تقصد ايه سيادتك !! ميس هيا الام اللي عرفتها فأه هفضل احطلها اعذار لان علي الرغم من اللي بسمعه ان ميس وحشه وان جميله كانت ملاك بس هتفضل حقيقه واحده قدامي وهيا ان جميله اختفت وميس اللي فضلت معايا وللاسف الحقيقه دي بتنسف اي معلومه سيادتك بتعرفهالي
يزيد : طيب يبقي كفايه بقي وعيش في حضن ميس حبيبتك والدتك وبطل تفتح في الماضي
فهد : عايز اعرف جميله فين ؟ عايز اعرف اتجوزت فعلا ولا راحت فين السنين دي كلها ؟ عايز اقف قصادها واقولها سابتني ليه مع ميس لما هيا عارفه انها وحشه !! عايز اقف قصادها وابص لعنيها واسمع اجابتها .. ومن هنا ورايح يا يزيد مش عايز اسمع منك حقايق عايز اقابل جميله وبس
يزيد : حاضر هوصلك لجميله بس اتمني لما تسمع منها تسمع زي ما بتسمع لميس مش تحط حكمك مسبقا
فهد : لا يا سيدي هقابلها واسمعها الاول واسمع كل اللي عندها
يزيد : حاضر هدورلك عليها بس مش النهارده يا فهد .. النهارده هتروح تخطب حبيبتك
فهد بضيق : حبيبتي ! امال ان مكنتش عارف الموضوع من اوله ؟
يزيد : يعني انت مش بتحبها يا فهد ؟
فهد كان هينطق بس سكت مره واحده : انا
يزيد : هاه انت ايه ؟
فهد غير الموضوع : هاتلي جميله امي
يزيد : حاضر يا فهد هجيبها روح يالا اجهز لمعادك
اخر النهار عند ميس .. ميس وعلاء منتظرين فهد ينزل لان محي كلمهم علشان يستعجلهم لانه هيروح معاهم
ميس بتنادي عليه : فهد يالا
فهد كان بيلبس بس بعد ما لبس بدلته وبص لنفسه في للمرايه غير رأيه وغير هدومه كلها تاني ولبس هدوم جميله
فهد لنفسه : لما نشوف يا ميس هتعملي ايه ورد فعلك هيكون ايه اني البس هدوم جميله ! هل انتي فعلا تقبلتيها ولا بتفكري في ايه !
لبس وبص لنفسه مره تانيه .. هو انت لابس ده عندا في ميس يا فهد ولا علشان جميلتك؟ وهيا من امتي بقت جميلتك وامتي بتتكلم بصيغه ملكيتك ليها ؟
ميس اتفاجئت بمنظر فهد اللي نازل لابس بنطلون جينز اسود والتيشرت الاسود وعليه جاكت بدله كان شكله شيك جدا بس ده نرفز ميس لانه لابس علي ذوق جميله
فهد : بتبصيلي كده ليه !
ميس : يعني انت اول مره تلبس جينز
علاء : براحته بقي يا ميس يالا هنتأخر علي الناس ..
ميس : يعني ايه براحته ؟ هو ده لبس يروح يخطب بيه ! ده اللي معندوش بدله بيروح يأجرله واحده
فهد : هو حضرتك متضايقه من ايه دلوقتي ؟
ميس زعقت : كلك علي بعضك منظرك يضايق يا فهد
فهد : ليه علشان ده ذوق جميله ؟
ميس زعقت : من دلوقتي وبتلبس علي ذوقها امال بكره هتعمل ايه ؟
علاء اتدخل بسرعه : ميس بلاش الغيره وشغل الحموات من اولها .. هما حرين يا ميس تلبسه علي كيفها .. هنتأخر يالا بقي
شدها وخرجوا وفهد غارق في افكاره الخاصه … فهد وقف مره واحده علي باب الفيلا : اوبس
ميس : نسيت ايه !
فهد : تيته .. مدخلتش عندها .. استنوني لحظه
ميس بنفاذ صبر : هو في ايه يا فهد النهارده ؟ حد مسلطك عليا ؟ تيته مين اللي تدخل عندها ؟
فهد بهدوء : جدتي
ميس : جدتك !! من امتي بقي الحنيه دي ؟
فهد : مش عارف المهم لازم اخد بركتها الاول
سابهم فهد وميس هتولع وده ظاهر جدا وفهد بيحاول يحلل كل ردود افعالها .. بس نفسه بقي لو يعرف ليه وافقت علي جميله !
دخل عند جدته اللي ابتسمت اول ما شافته قرب منها وقعد علي ركبه قصادها: عرفت ان ميس كانت السبب في حبستك في المستشفي وانها كانت متفقه مع الدكتور يخدرك الكلام ده صح !
نبيله عنيها دمعت وشاورت بدماغها اه وفهد بقي متلخبط اكتر من الاول وهيا مدت ايدها بحب حطتها علي راسه وهو وقف بسرعه وكأنه مش عايز يسمح لمشاعره تنجرف وري عواطفه
فهد : النهارده رايح اخطب جميله اعتقد ده خبر يسعدك ؟
نبيله ابتسمت وشاورت بدماغها اه بعنف وحب
فهد ابتسم : لازم اخرج علشان ميس و لينا كلام تاني بس بعدين
طلعلهم بره ونظره واحده لميس توضح مدي غيظها وكرهها …
ركبوا واتحركوا وفهد وصلهم لحد باب البيت والكل متوتر ومترقب
وعند جميله الكل برضه متوتر وخايف من المواجهه ومحدش عارف ناويين علي ايه
وليد هو واكرم تحت البيت بيراقبوا الوضع ورجالتهم منتشره حوالين البيت مراقبين المكان
اخيرا جرس الباب رن وقلوب الكل رنت معاه والكل بيتساءل ياتري هيحصل ايه ؟
الكل متوتر وباصص للباب وعماد فتح واخد نفس طويل قبل ما يفتح
محي وميس وعلاء قدامه ووراهم فهد
نظره طويله للكل
محي : ايه مش هتقولنا اتفضلوا !
عماد فتح الباب وشاورلهم يدخلوا : لا ازاي اتفضلوا طبعا
دخلوا والكل مترقب وفهد بس اللي عادي جدا ..
جميله استقبلتهم وميس بصتلها كتير بنظره توعد ..
ميس : مين كان يصدق ان مجرد موظفه تدخل عيلتنا وتاخد ابني
جميله : النصيب بقي والقدر لما يقول كلمته …يا اهلا بحضرتك ..
فهد اتدخل : النصيب والقدر تمام مش هتدخلوا بقي ولا ايه ؟ .. عمتي عايده امال فين جميله !
ميس حمحمت وبصت لفهد يسكت
فهد : في ايه !
محي اتكلم : تعال يا فهد هنا خلينا نتكلم في المفيد
عماد : يا اهلا بحضراتكم
محي : اهلا بيك .. طبعا اكيد فهد ابننا قالك اننا جايين نطلب ايد بنتك جميله لابننا فهد
عماد : فهد فعلا بلغني الصبح بس مش عارف هو ليه مستعجل قوي كده؟
علاء : الحب يعمل اكتر من كده ! امال فين العروسه مش هتنادولها
عماد مش عارف يعمل ايه بص لابنه وليد : هات اختك يا وليد
وليد قام يجيب اخته
ميس : بس غريبه الاسمين دول جميله و وليد !
جميله : غريبه ليه ؟
ميس : اصل وليد اسم جوزي ومراته كان اسمها جميله
فهد : مش وقته يا ميس المواضيع دي
جميله : لا عادي يا ابني ( داست علي كلمه ابني ) وليد ده علي اسم جده الله يرحمه اما جميله فده لانها ماشاء الله عليها جميله جدا فكان اسم علي مسمي
ميس : اممممم
جميله الصغيره خرجت ومحرجه جدا وميس وقفت تستقبلها
ميس : اهلا باللي خطفت ابني ..
الكل بصلها لانها بتلمح لوليد جوزها وان جميله برضه خطفت منها جوزها
جميله الصغيره : اهلا ميس هانم
ميس : هانم ايه بقي ! قوليلي ماما او ميس زي فهد ما بيقول
محي وقف وسلم عليها وكمان علاء
علاء : جميله الجميلات
فهد وقف : عمي جميله خط احمر هاه
علاء : ما انت قولتهالنا قبل كده وما تخافش انا مش بنسي
فهد : تمام .. ازيك يا جميله
جميله سلمت عليه وبصتله كله من فوق لتحت وابتسمت وهو لاحظ ابتسامتها دي وعرف انها علشان هو لبس علي ذوقها هيا ….قعدت جنب عمتها وميس بصالهم الاتنين بتقارنهم ببعض
محي : هاه يا استاذ عماد نقرأ فاتحه؟
عماد : انا حاسس انكم بتجروا
محي : ولا بنجري ولا حاجه خير البر عاجله .. النهارده هنقري فاتحه ويوم الخميس هنعملهم خطوبه ونعمل حفله كده نعرف فيها الناس والاسبوع الجاي نجوزهم
عماد مذبهل : ايه ده كله حيلكم عليا .. براحه و واحده واحده الامور ما تتاخدش كده
فهد : ليه يا عمي ؟ هنستني ايه يعني ؟ انتو عارفيني وانا عارفكم والامور كلها واضحه
عماد : مفيش اي حاجه واضحه خالص يا ابني .. اهدي كده واستهدوا كلكم بالله و واحده واحده
علاء : انت خايف من ايه !
عماد : انا مش خايف بس ما بحبش الاستعجال
محي : وهو فين الاستعجال ؟ بنتك بقالها كام شهر معانا هاه ؟ الكل عارفها
عماد : ماشي بس فهد يدوب فاسخ خطوبته من بنت عمه
علاء : وانا ابوها اهو جاي اطلب بنتك معاه .. بنتي خلاص تخطت الموضوع ده
عماد : هو انتو مستعجلين كده ليه ! بتخططوا لايه بالظبط ؟
ميس : اقولك انا … بخطط اجوز ابني باسرع ما يمكن ( بصت لجميله ) لان ابني اهم شيء في دنيتي ويهمني اشوفه مبسوط .. مش ابني الوحيد ولا ايه !
فهد ابتسملها اما جميله امه اتضايقت مع انها عارفه ان ده غرض ميس
محي : يالا هنقرأ الفاتحه .. يالا يا ابو وليد اقرا معانا يالا … بسم الله الرحمن الرحيم
الكل قرأ الفاتحه ولحظه صمت سيطرت علي الكل ولولا وليد مأكد علي عماد يوافق علي الجواز كان طردهم كلهم بره بيته …
قعدوا كتير واتكلموا كتير وبعدها محي وقف : نستأذن احنا بقي وعلي معادنا الخميس يلبسوا دبل .. يالا يا فهد
فهد بصلهم وبص لميس وكمان امه جميله
جميله امه : خلي فهد قاعد مع خطيبته شويه
ميس : اه يالا احنا وسيب العيال يفرحوا ببعض .. فهد انا حجزتلك العشا في المكان اللي بتحبه خد جميله وعشيها بره .. طبعا ده بعد اذن ابوها
جميله امه : وليه لأ خليهم يفرحوا ببعض
عماد بص لاخته بتوعد والكل مشي وفضل فهد منتظر ياخد جميله
فهد : هاه يا عمي ! نمشي !
عماد بص لفهد بتردد كبير وساعتها تليفونه رن وكان وليد
عماد : هرد وارجعلكم
سابهم ودخل اوضته وقفل عليه
عماد : وبعدين يا وليد
وليد : مالك بترن كتير ليه ما الامور كلها ماشيه طبيعيه
عماد : ابنك عايز ياخد بنتي ويخرج ؟
وليد : طيب سيبهم يخرجوا
عماد : ميس اللي حجزالهم فاهم !
وليد : فاهم بس ما تقلقش وراهم تلات عربيات حراسه وانا عارف المكان اللي حجزت فيه ميس والمكان كله متأمن وكل الجرسونات هيكونوا رجالتنا فما تقلقش ابدا ووافق انهم يخرجوا عيني عليهم ما تخافش
عماد : وليد !!!
وليد : خلي عندك ثقه فيا ما تقلقش كل حاجه تحت ايدينا ما تخافش علي بنتك وبعدين انا واكرم بنفسنا هنروح وراهم
عماد : طيب برضه دي بنتي ومن اول يوم كده تخرج مع خطيبها لوحدهم؟
وليد فكر : خلي اخوها يروح معاها
عماد : ايوه علشان لو حاجه حصلت يروحوا الاتنين مني مره واحده
وليد : يا ابني ما تقلقش المكان كله متأمن خايف من ايه ! وبعدين ده ابني ودول عيالي انا كمان في ايه يا عماد ؟
عماد خرج وبصلهم والكل واقف
فهد : هاه ؟
عماد : اخوها يخرج معاها وتتعشوا مع بعض
فهد و وليد هيعترضوا بس جميله الكبيره سبقتهم : عين العقل طبعا .. يالا يا عيال اخرجوا
فهد كان هيتكلم بس جميله شدته يتحرك ووقفوا كلهم معاها علي الباب
وليد : عمتو وبعدين ؟
جميله عمته : هتخرج معاهم وتشوف وراك ايه وانتو هتتعشوا مع بعض وقبل ما تروحوا تكلموا وليد وترجعوا مع بعض فاهمين !
فهد ابتسم : والله وطلعتي نمس يا عمتو انتو يا قمر …
جميله امه ابتسمت : يالا امشوا وما تتأخروش
خرجوا و وصلوا وليد للمكان اللي رايحو وفهد اخد جميله علي المكان اللي ميس حجزاه وقعدوا الاتنين عاجبهم تجهيزات ميس جدا
جميله : جميل المكان .. ميس عندها ذوق عالي
فهد بص حواليه : في الحاجات دي اه عندها …
جميله بصتله : ينفع اسألك سؤال ؟
فهد بصلها مباشره ورجع لوري في كرسيه : اسألي
جميله : ليه لبست الهدوم دي النهارده ؟
فهد سكت شويه : عايزه الصراحه ولا
جميله : ولا
فهد ابتسم : علشان دول ذوقك
جميله كشرت بعدم فهم : دي ولا ! امال الصراحه ايه بقي ؟
فهد : علشان اضايق ميس .. هيا عارفه ان دول ذوقك وكانت هتولع اني لبستهم
جميله باستغراب : وانت ليه عايز تضايقها ؟
فهد سكت كتير : ليا اسبابي الخاصه غيري الموضوع
جميله : بقي مش لابسهم علشاني !! امممم ماشي
فهد : تحبي اكدب عليكي ؟
جميله : لا طبعا محدش بيحب حد يكدب عليه
فهد بسرحان : بالظبط محدش بيحب حد يكدب عليه
جميله فكرت انها هيا بتكدب عليه وهو لو عرف مش هيسامحها علي كدبها ده ! بس هل لما يعرف الحقيقه كامله هيكون رد فعله ايه !! وهل من حقها دلوقتي تصارح حبيبها بالحقيقه ؟؟
فاقت من سرحانها علي صوته
جميله : قولت ايه ؟
فهد : قولت محبش ابدا انك تسرحي او تشردي مني كده
جميله بصتله وابتسمت : ليه بقي ان شاء الله ؟
فهد قرب وسند علي الترابيزه : لان ده معناه انك بتفكري في حاجه غيري وده انا مقبلوش ابدا .. انك تكوني معايا وفكرك مشغول عني
جميله ابتسمت وقربت هيا كمان : اللي يسمعك كده يقول انك بتحب وتغير ؟
فهد : مش حب ولا غيره بس غرور .. غروري وكبريائي كراجل انك تكوني معايا وتفكري في غيري
جميله ضحكت : غرورك !! يخربيت غرورك يا اخي .. عارف انت من غير غرورك ده بتكون بني ادم لطيف علي فكره
فهد ابتسم : ومين قالك اني احب اكون لطيف ؟؟ المهم هتتعشي ايه ؟
جميله فكرت شويه : يا انا اعشيك علي ذوقي يا انت تعشيني علي ذوقك ؟
فهد فكر شويه وبعدها شاور للجرسون
جميله : قررت ايه !
فهد ماسك المنيو وبصلها : علي ذوقي طبعا انا معرفش ذوقك هيكون ايه في الاكل ومعنديش استعداد اخاطر
جميله بصتله : امال لما اكون في بيتك هتعمل ايه ؟ ماهو انت هتكون مضطر تخاطر وتاكل من ايدي
انقذه الجرسون من الاجابه وطلب العشا وبعدها بصلها : ومين قالك اني هاكل من ايدك ! او اني هسمحلك تدخلي تعملي اكل بايدك ؟
جميله باستغراب : امال مين هيعمل الاكل ؟
فهد : في ناس مختصه للموضوع ده
جميله : عمتي علمتني ان الست الشاطره اللي جوزها ياكل من ايدها
فهد ابتسم : يعني انتي هتسيبي الشغل وهتقعدي في البيت تعمليلي اكل !
جميله ابتسمت وقربت منه بتريقه : علشان ارضي غرورك كراجل ايه رأيك !
فهد ابتسم : ان كان كده موافق .. العشا وصل
سكتوا الاتنين وانتظروا الاكل يترص قدامهم وبعدها بص لجميله : اتمني يعجبك
جميله ابتسمت واكلوا الاتنين مع بعض في جو شبه صامت .. كل واحد غرقان في اسراره ..
خلصوا اكل وقعدوا قصاد بعض ساكتين
جميله فجأه : علي فكره المكان هنا تحفه بس مش عارفه ليه حاسه بالكآبه
المكان ميت يا فهد
فهد بص حواليه : فعلا بس معظم الاماكن الراقيه بتكون كده
جميله : طيب مش عايزه مكان راقي قوم نتمشي في اي مكان هتخنق هنا
فهد طاوعها وقام معاها ودخلوا عربيته وبصلها : عايزه تروحي فين !
جميله : اي مكان مفتوح وفيه هوا
فهد دور عربيته ومش عارف يروح فين !
فهد : طيب هنروح فين ؟
جميله : حتي لو فضلنا في العربيه نلف بيها كده معنديش مانع
فهد بصلها بطرف عنيه : ماهو مش انتي اللي سايقه
جميله ابتسمت وشغلت الكاسيت اللي قدامها وفضلت تقلب في المحطات ومفيش حاجه عجباها لحد ما لقت اغنيه حاجه مستخبيه فسابتها وفهد كان اول مره يسمع الاغنيه دي فركز معاها قوي وحس انها منطبقه قوي عليه .. حب جميله حاجه مستخبيه جواه ومش قادر يقولها ولما بيقف قصادها بينسي ايه اللي المفروض يقوله ،. فالاغنيه متفصله عليه وجميله بصتله وحست انه مندمج قوي مع الاغنيه فسابته لافكاره لحد ما مره واحده : اقف هنا يا فهد
فهد بصلها : اقف فين ! احنا في ولا مكان
جميله : اقف بس
فهد هدي ووقف علي جنب : يا بنتي ده احنا في صحرا .. مفيش مباني هنا ولا بيوت ..
جميله : هو احنا فين كده !
فهد : ده طريق اسكندريه الصحراوي
جميله باستغراب : ليه !
فهد : في كافتيريا علي الطريق ده ظريفه جدا كنت قعدت فيها مره انا واسر وعجبتنا
جميله : اممم .. هنا كويس
فهد بص حواليه : هنا ايه يا جميله ده مقطع وغلط اصلا نوقف في مكان زي ده !!
جميله : خايف ؟
فهد : مش عليا اكيد
جميله ابتسمت : امال عليا انا ؟
فهد بصلها : عايزه توصلي لايه ! انتي بنت في طريق صحراوي وبالليل مش المفروض انا اللي اخاف
جميله ابتسمت : سيبها علي الله تعال ننزل
فهد : لا انتي كده اتجننتي رسمي
جميله نزلت مع اعتراض فهد وهو اضطر ينزل معاها
فهد : يا بنتي ارجعي هنا بقي
جميله مشيت كام خطوه وبعدها فردت ايديها ولفت حوالين نفسها
جميله : مفيش أجمل من مكان زي ده وانت لوحدك تحت القمر
فهد ابتسم وحط ايديه في جيوبه يتفرج عليها : بس انتي مش لوحدك
جميله بصتله وكانت جميله فوق جمالها تحت القمر : وانا ايه وانت ايه ! مش واحد !!
فهد قلبه دق غصبا عنه وابتسم وسكت
فهد مش عايز يندمج في الجو الرومانسي اللي حواليه
فهد : خلينا قريبين من العربيه
جميله قربت وشاورت بصوابعها : اششش .. ما تتكلمش لانك بتبوظ اللحظه .. اسكت يا فهد
فهد اخد نفس طويل وبص للسما وبعدها بصلها وشاور علي بوقه انه هيسكت تماما
جميله ابتسمت وقربت منه ووقفت قصاده بالظبط وكانت قصيره عنه وهو بصلها من فوق
جميله : اموت فيك وانت بتسمع الكلام كده ..
طلعت موبيلها وهو استغرب وشغلت اغنيه رومانسيه .. الاغنيه اللي غناها ادهم في الحفله .. وهو ابتسم لذكري الاغنيه
فهد : اغنيه من حفله خطوبتي ؟ ده اختيارك
جميله شاورت تاني : هششششش .. دي اغنيه حب .. قمه الحب .. وبعدين دي ما كانتش تتسمي خطوبه ده كان صفقه بيزنس وفشلت مش عايزين نفكر فيها مفهوم !!
فهد سكت وبصلها وهيا قربت وحطت الموبيل في جيب الجاكته بتاعت فهد وهو بص للموبيل وبصلها فمدت ايدها
جميله : تسمحلي يا فهد وليد نصّار بالرقصه دي !
فهد بص لايديها وبعدها مسكهم وبدأ يتحرك معاها علي انغام الاغنيه
فهد : علي فكره انا مش رومانسي
جميله : هشششششش
فهد :جميله انا بتكلم بجد
جميله : هشششششش
فهد سكت شويه وبعدها اتكلم : انتي منتظره تغيريني وده مش هيحصل
جميله بصتله ووشها قصاد وشه وقالت بكل هدوء : هشششششش
فهد بصلها وسكت وهيا حطت راسها علي كتفه وايديها سابوا ايديه وهو استغرب بس استغرابه انتهي لما حطت ايديها حوالين رقبته وهو اتردد شويه بس بعدها حط ايديه حوالين وسطها بتحفظ شويه
فهد : وبعدين !
جميله من غير ما ترفع دماغها : هششششش
فهد اتنرفز ف بايديه مسكها من اكتافها و بعدها عنه بعنف وفضل ماسكها : وبعدين معاكي ! هشش هششش هششش وبعدين ؟ انا مش كده يا جميله ومش هكون كده ! انا مش الراجل اللي هترقصي معاه تحت القمر في مكان مفيهوش غيرنا !! ده مش انا .. انا مش كده .. ماليش في الاجواء دي .. المزيكا والرقص والشموع وتحت القمر و و و ………. انا مش كده نهائي .. انا مش راجل حالم انا راجل عملي ومبحبش الرومانسيات لانها تضيع وقت انا راجل عملي
فهد ساب ايديها بس فضل باصصلها
جميله : راجل عملي ! ماشي وبعدين ! تحب تعمل ايه يا عملي في وقت زي ده ومكان زي ده ؟ طالما مش عايز ترقص ومش عايز مزيكا ومش عايز الجو ده ! انت عايز ايه يا فهد وايه اللي بتحب تعمله ؟ انا وريتك اهو اللي انا بحبه والي عايزه اعمله !! دورك بقي وريني تحب تعمل ايه !
فهد فضل يبصلها كتير بسكوت ومش لاقي اجابه منطقيه ليها لانه هو مش عارف هو يحب يعمل ايه لان فكره واحده بس مسيطره علي افكاره والفكره دي معدش في اي شيء له معني بجانبها فحط الفكره حيز التنفيذ
فهد : انا احب اعمل ده
وقبل ما تفهم معني كلامه ايه كانت شفايفه علي شفايفها بعنف .. عنف ضيع منها العقل والمنطق والحذر .. وقفت جامده وده ضايق فهد جدا فرفع شفايفه عنها وبصلها بدون ما يبعد
فهد : ده رفض ؟
جميله بصت لعنيه : هو فعلا رفض
كان هيبعد بس ايدها كانت اسرع منه ومسكت من رقبة تيشرته وهو بصلها باستفسار
جميله : بس ياتري هو رفض لايه بالظبط يا فهد ؟
فهد بصلها ومش قادر يفهم قصدها ايه او هيا عايزه ايه منه ! مجرد انه جديد على المشاعر دي كلها ومش فاهم
فهد بصوت مبحوح : رفض لايه ؟ ليا ؟
جميله بصت للارض بفقدان امل انه يفهم : لو ليك مكنتش هوافق اتخطبلك واتجوزك يا فهد
فهد بحيره : امال رفض لايه بالظبط ؟
جميله ماسكه تيشرته بعنف وغيظ وهو بص لايدها اللي تحت رقبته ومش فاهم بس شدتها ليه فهمته انها فعلا مش رفضاه طيب ايه !! بص لعنيها كتير ومع شدة ايدها ومع نظره عنيها قرب منها بحذر منتظر منها انها تبعد بس ما بعدتش عنه .. شفايفه قدام شفايفها ومنتظر رفضها لكن ما رفضتش فقرب براحه منها علشان يديها فرصه تبعد لو عايزه لكن ما بعدتش واتجاوبت معاه وهنا هو فهم واخيرا فهم انها رافضه عنفه .. عايزه حبه ورقته .. واتجاوبت هيا مع رقته ..
فضلوا كتير كده اتنين بقوا كيان واحد حس انها بقت قلبه اللي بينبض جواه وده كان احساس اول مره يعيشه .. هنا قلبه اعترف جواه انه بيعشق المخلوقه اللي قدامه دي … بعد اخيرا عنها يتنفس واتقابلت عنيهم في نظره ابلغ من اي كلام ممكن يتقال وابتسم فهد لها ودي كانت اول مره يبتسم بحب وصفاء وبعدها ضمها لصدره وهيا حطت راسها علي صدره واتفاجئت بيه بيضمها قوي لحضنه وكأنه عايز يدخلها جواه علشان كلها تكون جزء منه مش بس قلبه .. ابتسمت للحب اللي هيا عيشاه وفجأه سيطر عليها خوف رهيب .. خوف من كدبتها البيضه وهل هو هيشوفها كدبه بيضه فعلا ..
فهد حس بتصلبها ده فبعد براحه عنها ورفع وشها ليه وهمس : مالك ! فكرتي في ايه ضايقك !
جميله بصتله بحب واضح : فهد عايزاك توعدني انك ديما تحاول تفهمني قبل ما تحكم عليا
فهد باستغراب : افهم قبل ما احكم ؟ احكم علي ايه بالظبط ؟
جميله : علي اي تصرف مني ! اسمعني الاول وبعدها احكم
فهد : اعتقد يا جميله الحياه الزوجيه بتكون كده .. بنسمع الاول وما اعتقدش اننا بنصدر احكام علي بعض
جميله : اتمني ده بس برضه اوعدني
فهد ابتسم ومسك دقنها بايده رفع وشها علشان عنيها تكون في عنيه : اوعدك اني هسمعك ديما .. ومش هحكم مبسوطه كده !
جميله ابتسمت ومسكت ايده بعدتها عن دقنها علشان تعرف تستخبي في حضنه لان حاليا خوفها انها تخسره اكبر من اي شيء تاني …
موبيلها رن في جيبه فبعد شويه وخرجه لمح اسم اخوها فبصلها : اخوكي
جميله اخدت الموبيل وردت
وليد : جميله انتوا فين انا عايز اروح عندي مستشفى بدري .. وبعدين انا مش مع حبيبي هاه فقدري ده
جميله بعدت خطوتين عن فهد بس سمعها وابتسم
جميله : طيب ما تقدر انت ان انا مع حبيبي
وليد : ما انا بقدر بقالي ٣ ساعات اهو بس اكتر من كده ابوكي هيطردنا انا وانتي فانجزي يالا
جميله بصت لفهد بأسف فقرب منها
فهد : قوليله مسافه الطريق
جميله : سمعت خلاص ؟
وليد : سوري بقي يا قلبي بس انجزي
قفلت وبصتله : يالا !
فهد : يالا
مشيوا ناحيه العربيه وفهد فتحلها الباب ركبت وهو قعد جنبها واتحرك بعربيته ومسك ايدها وهيا ابتسمتله بحب وقربت منه حطت راسها علي كتفه بحب وهو ساب ايدها وحطها حواليها …
لحد ما وقف وبصلها : وصلنا عند اخوكي رني عليه علشان يطلع
طلعت الموبيل وقبل ما ترن مسك ايدها فبصتله وهو هنا قرب منها عايز شفايفها من تاني بس بعدت
فهد : بتبعدي ليه !
جميله بحرج : سحر اللحظه انتهي
فهد : نعم ! سحر اللحظه ؟ يعني ايه ؟
جميله : يعني عقلي رجعلي .. يعني ده مش من حقك يا فهد
فهد بغضب : انا خطيبك علي فكره مش خارج معاكي من وري اهلك ؟
جميله : برضه ده ما يديلكش الحق
فهد بتملك : حق ولا مش حق انتي ملكي
جميله : ملكك اه بس برضه ده مش حقك
فهد : وامتي يكون حقي سيادتك ؟
جميله : لما أبقي مراتك وفي بيتك
فهد بغيظ : رني علي اخوكي قبل ما اغير رأيي وانزلك تنتظريه وتروحوا مع بعض
جميله : طيب مش رانه يا فهد ووريني هتنزلني ازاي ؟ ووريني هتعملها اصلا وتنزلني من عربيتك ازاي !
فهد بصلها : بقولك ايه يا جميله رني علي اخوكي وانتي ساكته
جميله : مش رانه هاه
فهد بصلها كتير ومره واحده شد من ايدها التليفون ورن هو علي اخوها
فهد : انجز يا ابني احنا بره
قفل قبل ما وليد حتي ينطق بحرف وحدف التليفون علي رجليها وهيا كانت متغاظه منه لدرجه فوق التوقع
جميله : انت بني ادم بارد
فهد بتريقه : انا اللي بارد !! والله العظيم يا ناس … انا اللي بارد صح
جميله : بارد جدا كمان
فهد بصلها : ايوه صح ( بتريقه ) عندك حق اصل سحر اللحظه انتهي
جميله بصتله وقبل ما تنطق كان اخوها وصل وفتح الباب ودخل وبيتكلم ويهزر وهما الاتنين كل واحد باصص قدامه وجامدين
وليد : يا ساتر ده اول يوم خطوبه امال لما تتجوزوا هتعملوا ايه !
محدش رد عليه وهو سكت لحد ما وصلوا البيت و وليد نزل : هستناكي علي المدخل ما تتأخريش
جميله وفهد ساكتين ومحدش لاقي كلمه يقولها ولما سكوتهم طال
فهد : انزلي لاخوكي
جميله : مش نازله
فهد بغيظ : انتي علي فكره كتير بتعندي لمجرد العند فقط
جميله : بعض ما عندكم
فهد : لا يا جميله انا ما بعندش لمجرد العند ابدا .. ديما بيكون عندي اسبابي
جميله سكتت شويه : انا عايزه افهم انت عامل مشكله ليه !
فهد : مش عايز اتكلم انا دلوقتي اللحظه مش مناسبه مفيهاش سحر
جميله بغضب : وبعدين يا فهد ؟ انت ليه معترض قوي علي كلمه سحر اللحظه ! انا مع خطيبي في جو رومانسي وعقلي كان مغيب فعلا وبتمني قربك زيك ويمكن اكتر .. وده خلاني اقرب منك كده .. لكن سحر اللحظه انتهي ورجعنا للواقع وعقلي رجع وده اللي خلاني ابعد .. كنت في حضنك يا فهد مسلوبه الاراده والتفكير وحسن القرار لكن لما رجعت لعقلي عرفت اميز بين الصح والغلط فانت زعلان من ايه !
فهد : مش حكايه زعل يا جميله ..
جميله : امال ايه !
فهد : حكايه انك شايفه ان قربنا من بعض غلط وان قربنا ده حصل وانتي مغيبه عن عقلك ده اللي مضايقني .. سالي كانت بتتمني قربي باي شكل
جميله بصتله وهو استوعب غلطه بس كانت الجمله اتقالت خلاص
جميله : سالي !! تصبح علي خير يا فهد
نزلت وهو ضرب دركسيون العربيه لغباؤه ونزي جري وراها ومسكها من دراعها : مش قصدي اتكلم عن سالي دلوقتي
جميله : سيب ايدي وقلتلك مليون مره قبل كده ما تمسكش دراعي بالمنظر ده
فهد : انا امسكه زي ما احب
جميله : لا طبعا
فهد : جميله
وليد هنا خرج علي صوتهم : ايه انت وهيا ! الساعه كام هاه ! فاكرين نفسكم فين ! بعدين بتتخانقوا علي ايه يوم خطوبتكم ! مش فاهم انا ! فهد ارجع لعربيتك ولما توصل البيت ابقي اتصل بيها طمنها واتصالحوا .. جميله يالا علشان ابوكي في البلكونه وشكله ما يطمنش
الاتنين رفعوا دماغهم لفوق وفعلا عماد كان واقف في البلكونه
فهد : تصبحوا علي خير
وركب عربيته وطار بيها وجميله طلعت جري ووليد واقف محتار بس طلع وري اخته
عماد قابلهم وقبل ما يتكلم
وليد : يا بت في ايه !
جميله بغيظ وغضب : مفيش تصبحوا علي خير
سابتهم ودخلت اوضتها ورزعت الباب وراها وعماد بص لابنه : مالها !
وليد هنا اتوتر هيقول لابوه ايه ! ما يعرفش مالها !
وليد : شدت هيا وفهد ما انت عارفهم الاتنين .. الاتنين اعند من بعض
عماد: ايوه شدوا ليه يعني !
وليد : وانا ايش عرفني
عماد : هو انت مش كنت معاهم ؟
وليد بشبه تزعيق. : ايوه كنت معاهم بس اكيد مش لازق مناخيري وسطهم يعني يا بابا وبعدين مش كفايه الوضع المحرج اللي حطتني فيه وحسستني اني عامل زي هادم اللذات
عماد : انت اخوها
وليد : انا كنت حشري مش اكتر وقاعد بين اتنين مخطوبين وبدال ما يعبرلها عن مشاعرو قعدت انا بينهم واهم راجعين متخانقين فلو سمحت يا بابا .. تصبح علي خير بقي
سابه وليد بسرعه قبل اي اسئله تانيه ..
فهد روح بيته متغاظ ودخل كانت ميس منتظراه
ميس : كل ده معاها ؟؟
فهد : تصبحي علي خير يا ميس وعلي رأي جوزك ما تعيشيش دور الحما من دلوقتي
سابها وطلع وهيا طلعت لاوضتها هتفرقع من الغيظ ..
فهد فضل كتير متردد وباصص للموبيل وجميله في بيتها منتظره موبيلها يرن
واخيرا رن كانت هيا عنيها بتنام بس مسكت الموبيل بسرعه
فهد : نمتي !
جميله : ما تتخيلش انا زعلانه منك قد ايه !
فهد : ليه !
جميله : علشان تخيلت انك اول ما هتركب عربيتك هتكلمني مش لما تروح !!
فهد : محبطه مني صح ! وده نفس احساسي ناحيتك
جميله : انت مش من حقك تحبط علي فكره
فهد : وانتي مش من حقك تحبطي علي فكره
جميله : انت اتأخرت جدا
فهد : انا يدوب واصل واخدت شاور وقابلت امي واتكلمت معاها ويدوب ! فين تأخيري ده ؟
جميله : انت بتألف علي فكره
فهد : عايزه ايه يا جميله لاني مش حمل مناهده تانيه ؟
جميله : مش من حقك تزعل مني لان ده ببساطه مش من حقي وانا مش ملك نفسي علشان انت تملكني
فهد : امال انتي ملك مين هاه !
جميله : طول ما انا في بيت ابويا ابقي ملكه هو لحد ما انت تحط ايدك في ايده وتاخدني منه ساعتها انا هكون ملك يمينك
فهد باستسلام : ماشي يا جميله وانا هنتظر لحد ما احط ايدي في ايد ابوكي .. كده تمام
جميله ابتسمت : مش تمام قوي
فهد : يوووووه ايه تاني ؟
جميله : بقي بتفكر في سالي وانت معايا !
فهد : لعلمك بس سالي دي بنت عمي يعني هتكون علي طول موجوده
جميله : كبنت عمك اهلا وسهلا بيها لكن كذكري خطيبتك لأ والف لأ
فهد ابتسم من غيرتها : ماشي يا ستي سوري اني اتكلمت عنها اوكي !! كان تشبيه سيء مني .. بس قصدي انها كانت بتحاول تقرب لكن انا محبتش قربها ده وكنت ديما بعيد عنها لكن انتي مش قادر اصلا ابعد عنك فده كان قصدي
جميله ابتسمت : ماشي بس برضه ما تتكلمش عنها تاني
فهد ابتسم : حاضر .. هشوفك امتي تاني !
جميله : مش عارفه
تاني يوم فهد الصبح اتصل علي جميله موبيلها كان مغلق فاتصل علي تليفون البيت ورد عليه ابوها
وليد : يا اهلا يا فهد
فهد : اهلا عمي .. هو انا ينفع استأذنك جميله تيجي الشركه !
وليد باستغراب : الشركه ؟ ليه ؟
فهد : عايزها معايا وانا بعلن خطوبتنا للكل ونعزم الكل علي حفله الخطوبه
وليد اتردد بس وافق دخل لبنته صحاها و بلغها وهيا قامت بسرعه تجهز علشان تنزل ومسكت موبيلها لقته فاصل شحن وحطته علي الشحن بسرعه
موبيلها رن وكان فهد
فهد : انزلي انا تحت
جميله ابتسمت وبصت من شيش الشباك بتاعها وشافت عربيته
جميله : طيب انزل من عربيتك كده
فهد استغرب ونزل وبص لفوق : انتي فين اصلا ؟
جميله فتحت شباكها وشاورتله : انا هنا
فهد ابتسم: طيب انجزي وانزلي
جميله : طيب ما تطلع انت
فهد : جميله انجزي بقي يالا
جميله : هكمل لبسي وانزل اديني دقيقتين
نزلت بعد عشر دقايق كان علي اخره
واول ما ركبت بصلها : دي اخر مره انتظرك فيها اوك
اتحرك وهيا ضحكت ووصلوا الشركه ودخلوها وطلعوا الاسانصير وقبل ما يخرجوا منه مد ايده لها وهيا ابتسمت وحطت ايدها في ايده وخرجوا مع بعض والكل وقف وبص لايديهم باستغراب
فهد : اكيد مستغربين كلكم … بس انا وجميله هنتجوز ان شاء الله والكل معزوم علي خطوبتنا يوم الخميس .. الخطوبه هتكون في الفيلا عندي والكل معزوم طبعا
الكل بيبارك ويهني والكل سكت لدخول سالي اللي بصت لجميله نظرات كفيله بحرقها
سالي لاحظت ان كل العيون عليها فاضطرت تبتسم وقربت تسلم
سالي بهمس : دخلتي عش الدبابير برجليكي ( بعدت ) اهلا بيكي في عيلتنا
جميله همست برضه : ومالو المهم اني دخلت ووصلت .. الدور والباقي عليكي انتي اللي طلعتي بره اللعبه بدري
فهد : سالي عقبالك يا قمر مع حد يستاهلك
سالي انسحبت وفهد اخد جميله وانسحبوا علي مكتبه وقعد هو وجميله يخططوا لخطوبتهم ودخلت جميله علي النت تختار فستان وفهد شاركها في تنقيه الفستان الخاص بيها ..
وليد كان عايز يشوف نبيله بأي طريقه واخيرا قرر انه يروحلها .. راح لوليد الن عماد
وليد نصار : وليد انت رايح النهارده لوالدتي صح !
وليد عماد : ايوه الساعه ٥ العصر معادي معاها
وليد نصار سكت شويه وبعدها : طيب بتتمشي معاها في الجنينه !
وليد : ايوه لازم امشيها شويه !
وليد نصار : بتكونوا لوحدكم ولا حد معاكم ؟
وليد : اغلب الوقت لوحدنا ولو في حد بيكون داده علية .. ليه كل الاسئله دي يا عمو ؟
وليد نصار : طيب اسمع وافهمني كويس …
ونكمل بكره
بقلم /الشيماء محمد
رواية جميله الجزء الثاني للكاتبه شيمو
الحلقه الخامسة والعشرون
اللهم صل وسلم وبارك علي محمد
التسجيل ان شاء الله اول ما القناه تبعتهولي هنشره علي طول فاللي سمعه ما يقلقش هنشره علي الصفحه
وبدأ وليد يفهمه عايزو يعمل ايه بالظبط وبالفعل وليد راح لنبيله وبدأ علاجه وتمارينه لها
وليد : يالا بقي معاد تمشيتنا
نبيله : مش قادره يا ابني بلاش النهارده
وليد : لا بلاش ايه ! النهارده بالذات ما ينفعش وبعدين انا محضرلك مفاجأه هتعجبك قوي
نبيله وافقت وطلعوا الجنينه مع بعض و وليد اخدها وكل ما توقف يمشيها شويه كمان
نبيله : خلاص مش قادره تعبت خالص
وليد : معلش حبه كمان
نبيله : لا مش قادره
وليد : لازم تقدري يالا
نبيله بصتله واستغربت اصراره : ليه يا وليد لازم !
وليد : علشان تشوفي اغلي انسان بتحبيه فلازم تكوني قويه
نبيله عنيها لئلئت بالدموع وإحساس غريب ملاها وقوه غريبه دبت فيها واتعدلت ومشيت بصمت جنب وليد وقلبها سابقها مش عايزه تفكر ومش عايزه تحط اي امل بس ماشيه بصمت جنب وليد لحد ماهو وقف وبص حواليه
ونبيله قلبها هيخرج من مكانه وبتبص حواليها واخيرا لمحوا حد بجلابيه وشال علي دماغه ومعرفوش مين ده وافتكروه حد من الجناينيه و وليد قلق وراح ناحيته علشان يمشيه قبل ما وليد يوصل ولما وصله اتفاجيء ان ده وليد فابتسم وقربوا من نبيله
وليد وصل لعندها وكشف الشال عن وشه وبصلها وهيا بصتله كتير ……
لحظات واقفين قصاد بعض محدش فيهم ناطق بحرف حتي .. وليد قرب من امه ومد ايده علي خدها مسح دموعها اللي نازله بصمت وهيا مسكت وشه بايديها الاتنين وبتهز دماغها مش مصدقه ابدا ان ابنها بين ايديها ..
نبيله بصوت تايه : ابني …… ابني
عيطت ودفنت وشها في حضن ابنها اللي ضمها قوي ودموعه هو كمان نزلت
وليد : امي …
عيطوا الاتنين و وليد كمان دموعه نزلت وبعد عنهم يراقب الطريق
نبيله : حبيبي … ابني … وليد
عيطت كتير وهيا بتقول اسمه
وليد : ايوه انا وليد يا امي .. انا وليد
نبيله : عمري وسندي ليه غيبت عن امك كل ده !! ليه سيبت امك يا قلب امك
وليد عيط : غصب عني يا امي … غصب عني … سامحيني
نبيله : مسمحاك يا قلبي بس كنت فين يا وليد عشرين سنه يا ابني سيبت امك لميس تحبسها وجميله مراتك حبستها وندي اختك خالد حبسها وذلها وابنك .. ابنك فهد ميس علمته الكره وملت قلبه بسواد ليه يا وليد غيبت كل ده .. عملوا فيك ايه لما سافرت ؟
وليد باس ايديها : ضربوني بالنار وحطولي فلاشه فيها اسرار عسكريه واتحبست بتهمه تجسس .. عشرين سنه يا امي محبوس واول ما خرجت جيت لهنا خرجت بفضلك انتي .. انتي اللي خرجتيني
نبيله عيطت : يا ريتني كنت بره كنت خرجتك من زمان .. غصب عني يا ابني .. سامحني انت كمان
وليد باسها : اسامحك علي ايه بس .. المهم انك دلوقتي بخير واوعدك ان كل حاجه هترجع زي الاول واحسن .. المهم محدش يعرف دلوقتي يا امي برجوعي لحد ما اطلع شهاده اني عايش ..
نبيله : ما تخافش محدش هيعرف مني ابدا بس جميله مراتك عرفها
وليد ابتسم : انا معاها ما تقلقيش
نبيله ابتسمت : طول ما انت معاها ما بقلقش عليك ..
فهمها هتعمل ايه وهتتصرف ازاي وسابها ومشي و وليد رجعها مكانها ..
نبيله فضلت طول الليل تشكر ربنا علي رجوع ابنها وتدعي انه يحميه وينصره علي اعداؤه كلهم ….
وفي يوم الحفله الكل متجمع
خالد وعلاء ومحي وميس
محي : هاه يا ميس ؟
ميس : ما تقلقش يا عمي
محي : كل حاجه جاهزه !
خالد : طبعا كله جاهز والنهارده هنجيب اخر العيله دي بقي
ميس : وفهد ؟
محي : يا يكون مننا يا يكون عدونا
علاء : اختياره واضح وهيكون زي ابوه
خالد ابتسم : يبقي نخليه يموت موته ابوه ويتقابلوا في الجنه بقي ….
الكل ضحك بس ميس في جواها شويه خوف علي فهد منهم ….هل ممكن تكون حبته بجد ! ولا اتعودت علي وجوده في حياتها ! ولا عرفان بالجميل لانه لولاه مكنتش هيا رجعت لمكانتها دي من تاني ! ايه احساسها ده ! هل ممكن تتنازل عن انتقامها من جميله وعيلتها علشانه ؟؟ برزت الاجابه واضحه قدامها … لأ والف لأ حتي لو هيكون الثمن موت فهد نفسه مش مهم المهم انها هيا اللي تنتصر في النهايه وهيا اللي تتربع علي عرش عيلة نصّار
عند وليد نصّار الكل متجمع
يزيد و اكرم وادهم وعماد متجمعين مع وليد اللي قلقان جدا من الحفله ومتوتر
ادهم : كله عارف مطلوب منه ايه ! مش عايزين غلطات
وليد : انت هتكون موجود في الحفله صح ؟
ادهم : مش عارف بس يوسف هيكون موجود مع امل لان خالد عزمه واصر انه يحضر
وليد : محدش عزمك ؟
ادهم : لا طبعا عزموني كلهم بس بفكر ما اروحش علشان اكون معاكم انت واكرم خلينا نراقب الوضع من بره
اكرم : احنا مستعدين كويس لاي حاجه فما تقلقش كده يا وليد وانت كمان يا عماد
عماد : ما اقلقش ازاي وبنتي في وش المدفع !! دي بنتي
وليد : ما تقلقش عليها
عماد : امال انت قلقان ليه لما انا مقلقش ؟
وليد : لان بنتك في امان لكن المشكله كلها في فهد هو اللي هيكون فعلا في وش المدفع
يزيد : عمو حضرتك برضه اطمن اهم حاجه بس حضرتك ما تظهرش دلوقتي وان شاء الله الليله تمشي زي ما احنا مخططين
وليد : ان شاء الله بس جميله مش المفروض تكون فاهمه خطتنا ؟
اكرم : اي جميله فيهم ؟
وليد : ان جيت للحق الاتنين بس انا بتكلم عن مراتي
ادهم : لا يا وليد الاتنين ما ينفعش يعرفوا لان الستات عاطفيه بطبعها وعواطفهم بتفضحهم ومراتك بالذات من النوعيه اللي ما بتعرفش تسيطر علي عواطفها ابدا وطيبه زياده عن اللزوم دي مش بعيد ترفض اصلا الخطه كلها وتروح تقولها لفهد
وليد سكت شويه : هيا فعلا طيبه وتعملها
اكرم : يبقي مالوش لزوم تعرف حاجه خلي ردود الفعل كلها تكون طبيعيه
وليد : ربنا يسترها ….
………….
فهد بيتغدى مع ميس وعلاء وموبيله رن فبصله كانت جميله فابتسم بتلقائيه وميس كشرت لانها فهمت من ابتسامته انها جميله وفهد بصلهم و وقف : الحمد لله بعد اذنكم
ميس : انت ما اكلتش
فهد : شبعت كده كملوا انتو
ميس بغيظ : كل ده علشان تكلمها ! ماهو ممكن تكلمها بعد ما تاكل او ممكن ما تكلمهاش خالص وهتشوفها بعد كام ساعه
علاء شد ميس من دراعها : في ايه يا ميس ما تهدي كده
ميس : يعني ما يتغدي الاول
فهد واقف باستغراب : شبعت خلاص في ايه يا ميس ! مالك ؟
ميس : مجنونه وبقطع في شعري مالي يعني !
فهد : غريبه .. بعد اذنكم
سابهم وطلع اوضته رن عليها
جميله : ساعه علشان ترد ؟ افرضنا كنت مخطوفه مثلا !
فهد : افتكري حاجه كويسه بالله عليكي مش ناقصه هيا
جميله : ماشي بس اتأخرت ليه عقبال ما ترد !
فهد : كنت بتغدي وخليتيني سيبت الاكل وقومت وميس تحت شايطه
جميله ضحكت : ههههههههه طيب انا ما يهونش عليا ما تاكلش
فهد بابتسامه : وبعدين !
جميله : وبعدين عمتو عامله حبه محشيات تحفه مش قادره اوصفلك طعامتهم
فهد : اممممم وبعدين ؟
جميله : مفيش بعدين بقي تعال اتغدي
فهد : وابوكي !
جميله : ابويا بره تعال بس وانا هنزلك تحت مش لازم تطلع البيت
فهد : مجنونه انتي مش ناقصه مشاكل
جميله : ومن امتي الفهد بيخاف هاه يالا قوم وتعال بطل رخامه
فهد : يا بنتي مش حكايه خوف بس فعلا مشغول و مش فاضي دلوقتي ورايا مليون حاجه
جميله بزعل : يعني النص ساعه دي هيا اللي هتفرق ! خلاص براحتك
فهد بتردد : نص ساعه بس
جميله ابتسمت : اصلا لازم اجهز واروح للكوافير خلال ساعه اقولك تعال انت وصلني للكوافير بدال انتظاري لوليد واهو كده بقي رسمي
فهد : طيب ان كان كده ماشي اجهزي و جايلك
جميله قامت جري لعمتها باستها
عمتها : انتي نازله دلوقتي ؟
جميله : لا هجهز لحد ما فهد يجي
عمتها : فهد ؟ اشمعني ؟
جميله : عرض يجي يوصلني وانا وافقت واه ما اتغداش جهزيله طبق
عمتها ابتسمت : هجهزله طبعا حبيب قلبي .. ربنا يحميه يارب
جميله باستها : يارب يا عمتو يارب
جميله جهزت كل حاجتها ومنتظره فهد
الباب بيتفتح وبيدخل ابوها
عماد : هو وليد لسه مجاش ؟ تعالي يالا انا هوصلك
جميله بصت لعمتها اللي اتدخلت : لا يا عماد ارتاح انت خطيبها هيوصلها
عماد : خطيبها ؟ فهد ؟ اشمعني يعني ؟
جميله : كان قريب يا بابا وكلمني فبنرغي وعرض عليا يوصلني فوافقت .. هو في مشكله اني وافقت ؟
عماد : لا يا بنتي مفيش .. خطيبك وابن عمتك .. ربنا بس يعدي الليله علي خير
موبيلها رن وجميله طارت عليه وكان فهد
جميله : لحظه نازله
جميله مكنتش عارفه تشيل شنطتها وفستانها وكمان طبق فهد
عمتها : هاتي حبيبتي انا هنزل معاكي
عماد وقف : خليكي مرتاحه انا هنزلها
عمتها : لا يا عماد انا عايزه اشوفه واهي حجه اشوفه بيها ..
عماد : ان كان كده ماشي
نزلوا جميلتين مع بعض وفهد اول ما شافهم نزل من عربيته واخد الحاجه اللي في ايد خطيبته وحطها في العربيه وبعدها جميله مامته سلمت عليه : حبيبي جابتك علي ملى وشك
فهد : عادي يعني .. المهم اخبارك ايه !
جميله امه: انا كويسه حبيبي اتفضل اتغدي بقي في الطريق
فهد : انتي برضه سمعتي كلام البت دي ؟
جميله امه : ده انا ما صدقت انك تاكل من ايدي
فهد ابتسم واخد منها الطبق وركب جنب جميلته واتحرك بيها واول ما اتحرك شويه خبطته في دراعه
فهد : اه في ايه يا بت ؟
جميله : تاني بت دي !؟ اسمي جميله مش بت
فهد ابتسم : بت وبت وبت … وبعدين اكشفي الطبق ده وامسكيه واكليني يالا
جميله : لييييييه !! سي السيد وانا مش واخده بالي ؟
فهد : لا وانتي الصادقه سي فهد فاهمه .. جربي قوليها كده ؟ سي فهد
جميله بصتله كتير وبعدها بصت قدامها
فهد : ما تكتميش في نفسك لاحسن يجرالك حاجه يوم خطوبتك .. قولي اللي جواكي
جميله بصتله : عهد سي السيد ده خلص من زمان .. من زمان جدا علي فكره
فهد : عمتي ندي قالتلي ان جميله امي كانت بتقول لابويا سي وليد .. ايوه انا مش مصدق الكلام ده بس اهو
جميله : وليه مش مصدقه ! ماهو ممكن بتقولها بحب مش شرط نظام سي السيد .. الواحده لما بتحب بجد بيكون جوزها حبيبها وتاج راسها بس ده لما يكون يستاهل بجد
فهد وقف علي جنب : وياتري بقي ايه المانع انك تقوليلي سي فهد ؟ انتي ما بتحبينيش بجد ولا انا ما استاهلش ؟؟
جميله : لا دي ولا دي
فهد : امال ايه ؟
جميله : انا اقولها طواعيه مني لكن انت بتطلبه
